Ina Kocaqi Xoxa/

Pas 5 muajsh përgatitjesh intensive, 60 fëmijë të moshave 4–16 vjeç morën pjesë në edicionin e 12-të të Marlee’s Got Talent. Si çdo vit, të gjithë pjesëmarrësit i dhuruan publikut këngë dhe valle folklorike nga të gjitha trevat shqiptare, duke sjellë në skenë traditën, kulturën dhe talentin e brezit të ri.

Eventi i dytë i rëndësishëm për MGT ishte pjesëmarrja në “Festë në Shesh”, një festë mbarëshqiptare e organizuar nga Ambasada jonë në Ottawa dhe Konsullata e Kosovës në Toronto.

Kori i MGT-së, me fëmijë nga 4 deri në 16 vjeç, interpretoi me shumë entuziazëm dhe emocion tre kolazhe të bukura folklorike nga Tropoja, Kolonja dhe Vlora. Ndërkohë, grupet e valleve “Erzeni” dhe “Drini” u paraqitën me interpretimin e mrekullueshëm të valles treshe të Jugut.

Falënderojmë nga zemra fëmijët, prindërit dhe sponsorët e MGT-së për mbështetjen dhe përkushtimin e tyre, si edhe organizatorët e “Festë në Shesh” për mundësinë që iu dhanë fëmijëve dhe grupeve të tjera artistike nga Ontario, Kanadaja dhe SHBA-ja për të promovuar kulturën dhe traditat tona shqiptare.

Toma Apostull pasi vuri dorën në plagë besoi.

Zef Pergega

Krishti i Gjallë na fton ta pranojmë thirrjen e Tij që na drejton për t’u bërë njerëz të rinj e dëshmitarë të sinqeritetit e të së vërtetës, si apostujt që i komunikuan Tomës takimin e tyre me Të: “E pamë të Ringjallurin”, e si Toma që pas dyshimeve, pas vështirësisë së besimit, ra në gjunjë duke rrëfyer fenë e tij në Zotin e Gjallë, edhe ne të besojmë e të biem në gjunjë para Krishtit Zot e Shpëtimtar.

“Krishti është gjallë”, një thirrje që sot në rreth 200 besimtarë të mbledhur në festë në kishën shqiptare të “Shën Thomait” në Detroit, tingëlloi si një tingull lajmetar që e sollën engjëjt. Kishin ardhur nga shumë zona, mbasi edhe zgjedhjet e reja edhe e diela e pas Pashkëve e shenjtë e lumnueme në sytë e besimtarëve, këshilli i ri me kryetar 27-vjeçarin, Aleksandër Kume, me anëtarin e këshillit Niko Butka, nipin, shkrimtarin model të satirës shqiptare, Nonda Buka ose Gjergj Fishta i Jugut, aq më tepër me energjitë hyjnore e kombëtare të priftit të ri Juxhin Shkurtin, për të marrë pjesë në meshë dhe në festë, e cila përkoi me 97-vjetorin e themelimit të saj në Detroit nga Fan Noli. Në themelet e saj të forta u lartua fjala në Hyun dhe në shpirtin atdhetar të ortodoksëve shqiptarë. Tani ndihet më fort fryma shqiptare në kishën plot dhe në zemrat zjarr në besim të mbushura shpirtërisht.

Drekën e bekoi Lumturia e Tij Fra Danakas, sekretari i përgjithshëm i Arkidioqezës shqiptare në Amerikë. U kënduan dy himne kombëtare nën moderimin e Androko Mengri, si dhe nën zërin melodioz e melankolik të këngëtares Ermira Babaliu. Aktivitetin e përcolli AlbTV i shqiptarëve të Amerikës nëpërmjet gazetarit Rafael Floqi.

At’ Shkurti ndër të tjera tha: “…Zemra ime është plot, vëllezër dhe motra të dashur, siç janë zemrat tuaja plot, të shoh kaq shumë njerëz të mbledhur në shenjtëroren tonë. Falënderoj Zotin që në një farë mënyre njerëzit po zgjohen me besim. Që njerëzit janë bërë më të fortë, më të palëkundur. Krishti është ai që na themelon. Krishti është ai që na udhëzon. Zemra ime është gjithashtu plot, kur ju shoh juve nga larg, që jeni këtu në këtë shenjtore. Zemra ime është plot kur shoh besimtarët ortodoksë që janë duke u lutur në këtë vend të shenjtë dhe kërkojnë shpëtim. Një falënderim sot për Ekrem Bardhën, Konsullin e Nderit, i nderuari Mondi Rakaj nga Federata “Vatra”, biznesmenë, shkrimtarë, njerëz të besimit e të kulturës që na kanë ardhur sot si miq në shtëpinë e Zotit. Ky është edhe një motiv më tepër për të punuar për misionin e shenjtë të fjalës së Zotit në të mirë të bashkimit të komunitetit!”

Takimin e përshëndeti Mondi Rakaj e Rafael Floqi. Fjalën kryesore e mbajti kryetari i këshillit të kishës, Aleksandër Kume.

Detroit, 19 prill 2026

Personalitete të shquara të kombit tonë në Amerikë, veprimtarë të çështjes kombëtare, kontributorë me dekada për kombin e komunitetin, aktivistë të ndryshëm, media e politikanë kryen homazhe në nderim të jetës, veprës e kontributit të jashtëzakonshëm të Kongresmenit Eliot Engel për kombin shqiptar e komunitetin shqiptaro-amerikan në Shtetet e Bashkuara. Të udhëhequr nga Harry Bajraktari, miku i ngushtë i Eliot Engelit, në homazhe mori pjesë edhe Glauk Konjufca Zv. Kryeministër i Parë & Ministër i Punëve të Jashtme dhe Diasporës së Republikës së Kosovës, z.Rrustem Gecaj, Dr. Elmi Berisha, Ambasador Dr. Blerim Reka, Dr. Sulejman Çelaj, z.Xhafer Gecaj, z.Ilir Cubi, z.Halil Mula etj.

Kombi shqiptar do ti jetë përjetë mirënjohës Kongresmenit Eliot Engel për mbështetjen në ditë të vështira dhe historike sidomos për lirinë dhe pavarësinë e Kosovës.

Federata Pan-Shqiptare e Amerikës “Vatra” shpreh ngushëllime, trishtim e dhimbje të thellë për ndarjen nga jeta të mikut të madh të kombit shqiptar e komunitetit shqiptaro-amerikan Eliot Engel.

Si Kryetar i Komitetit për Punët e Jashtme në Dhomën e Përfaqësuesve të SHBA-së, Engel luajti një rol të jashtëzakonshëm e të pazëvendësueshëm në bashkëpunimin dhe në forcimin e marrëdhënieve të SHBA me Ballkanin e veçanërisht Kosovën e Shqipërinë dhe ishte një mbështetës i palëkundur i Kosovës dhe i çështjes shqiptare në çdo dalje publike e qëndrim diplomatik.

Këtë njeri të madh të Kombit Amerikan pata fatin ta njoh nga afër, të këshillohem e diskutojmë ngushtë për Kosovën e Kombin tonë.

Engel la pas një kontribut monumental në dobi të historisë e drejtësisë së kombit tonë. Eliot Engel ishte zë i fuqishëm e autoritet i lartë moral e njerëzor që nuk u kursye asnjë moment për të drejtat e shqiptarëve.

Vepra, shërbimi, lidershipi e misioni i tij frymëzues do të kujtohen prej çdo shqiptari me respekt e mirënjohje të përjetshme.

Pushoftë në paqe e përjetësi miky ynë Eliot Engel

Lavdi e nderim jetës e kujtimit tij të paharruar.

Me dhimbje e trishtim

Kryetari i Vatrës

Dr. Elmi Berisha

Rafaela Prifti/

Një bllok i vogël kapak-zi me logon e AFC-së në tavolinat e bardha të sallës së gjimnazit Boston College High School u bë një simbol të dyfishtë – dije dhe origjinë – në pasditen bashkëbiseduese për gastroenterologjinë të nikoqirëve nga Albanians Fighting Cancer (AFC) dhe mjekëve të ftuar të Shoqatës Gastrointestinale Shqiptaro-Amerikane (Albanian American Gastrointestinal Association AAGA) me komunitetin shqiptar, ditën e shtunë, më 4 prill, në Boston. “Efekti anësor i prezantimeve” të specialistëve ishte paraqitja e temave në gjuhën amtare, gjë që, për tre prej mjekëve në panel, të ardhur në Amerikë në moshë shumë të njomë, ishte përvojë e re. Anëtari i Bordit, mjeku Agim Aliaj, në cilësinë e moderatorit, u ndal tek mesazhi prekës i videos hyrëse të takimit për të shpjeguar zanafillën e AFC-së. Duke e lidhur videon me konceptin e “afërsisë me njëri tjetrin” në momente kyçe të jetës, ai udhëhoqi bisedën dhe diskutimin, duke e ruajtur dhembshurinë njerëzore si boshtin qendror të pasdites.

Projektori gjigand në faqen e murit përballë, podiumi, stendat anash panelit me logot e secilës shoqatë, flamurët, tavolina e sponsorëve aty pranë, vazot me buqeta të freskëta në sallën me rreth 120 pjesëmarrës përfshirë edhe studentë të interesuar për fushën e mjekësisë ishin si shenjëza mirëseardhjeje në një takim ku prisje të merrje njohuri, por edhe të ishe pjesëmarrës në bisedë.

Shoqata gjashtëvjeçare AFC, e krijuar dhe drejtuar nga Roberta Panariti Nashi, dhe Shoqata e Gastrointensinale Shqiptare Amerikane AAGA, krijuar vitin e kaluar nga Dr. Zana Nikolla, u bashkërenduan, dhe në sajë të grupit të punës të Anilës, Zanës, Elisës, arritën një bisedë të nivelit të një seminari mjekësor. Për sa i takon rritjes së ndërgjegjësimit, Dr. Nikolla përmendi se muaji mars i kushtohet vetëdijesimit për kancerin kolorektal. Sindroma e zorrës së irrituar (IBS) dhe aciditeti i shtuar përfshirë GIRD, prezantuar nga Dr. Lidia Spaho nga Çikago, shkaqet dhe shqetësimet e konstipacionit diskutuar nga Dr. Ergen Musa nga Nju Hampshire, njohuritë dhe studimet më të reja për hepatitin dhe mëlçinë sjellë nga Dr. Zana Nikolla nga Nju Jorku dhe paraqitja shumë e detajuar e endoskopive të avancuara nga Dr. Manol Jovani nga Florida vunë theksin tek dy gjëra: kujdesi proaktiv dhe depistimi (testimet). Dr. Olga Ndoci Ndreko, DPT nga Usteri, me shumë këmbëngulje, theksonte se për shumicën e çrregullimeve të sistemit tretës, që lidhen me fundin e legenit: “Terapia fizike duhet të jetë ndalesa e parë, jo e fundit!”

Udhëzimet e mjekëve për shëndetin e sistemit tretës fillojnë nga dieta, në veçanti marrja e fibrave përmes një konsumimi të pasur me fruta, perime, bishtajore dhe drithëra integrale që është jetik për prebiotikët të cilët ushqejnë bakteriet e mira, stili i jetesës që ndikon thellësisht në mirëqenien e sistemit tretës, hidratimi dhe ngrënia me vetëdije, menaxhimi i stresit, boshti zorrë-tru është një sistem komunikimi me dy-kahe, reduktimi i stresit që përbën një element jetik për të lehtësuar problemet funksionale gastrointestinale si IBS, dhe rëndësia e aktivitetit fizik ditor.

Mesazhi kryesor: Sistemi tretës nuk është thjesht një kombinim organesh për procesimin e ushqimit, por një ekosistem kompleks i lidhur me shëndetin metabolik dhe atë imunitar, meqenëse rreth 70% e imunitetit tonë gjendet në zorrë. Pas prezantimeve, që vazhduan rreth dy orë, vijuan pyetjet për mjekësinë konvencionale dhe atë të modernizuar, vendi që pritet të ketë AI në diagnostikimin mjekësor etj., edhe më tej me biseda “tek e tek” me mjekët e ftuar. Më pas, në pjesën tjetër të sallonit, nga krahu i dritareve të larta nga-toka-në-tavan, ishin shtruar tavolinat me specialitete shqiptare nga Maria’s Trattoria dhe Shkodra Byrek, të sponsorizuara nga TissueCypher krijuar prej kompanisë Castle Biosciences, Inc.

Roberta Nashi shprehu mirënjohje për bujarinë e mjekëve dhe sponsorëve si edhe të gjithë pjesëmarrësve në bashkëbisedimin e së shtunës. Ajo theksoi se “fondet e këtij takimi do përdoren për ecurinë e nismës sonë për të kompletuar pavijonin onkologjik të Spitalit Rajonal të Korçës, që sapo e pajisim me aparatura dhe që do vijojmë ta furnizojmë me pajisje të tjera të nevojshme.”

Foto nga Artan Malaj