CYRIH – Në ambientet e Bibliotekës Pestalozzi në Cyrih u mbajt mbrëmja tematike me titull “Çështja çame: Histori, të drejtat e njeriut dhe dialog”, e organizuar nga Fondacioni Çamëria “Hasan Tahsini” në bashkëpunim me LIDHJA SHQIPTARE NË BOTË

Në panel morën pjesë drejtuesi i Fondacionit Çamëria “Hasan Tahsini”, Alket Veliu, juristi Nazmi Jakurti, akademiku dhe diplomati Prof. Dr. Pëllumb Xhufi, diplomati dhe shkrimtari Luan Rama, Prof. Dr. Bashkim Kuçuku si dhe filantropi Lazim Destani. Të pranishëm ishin gjithashtu veprimtarë, intelektualë dhe pjesëtarë të komunitetit shqiptar në Zvicër.

Mbrëmja u hap nga Nazmi Jakurti, i cili falënderoi drejtoreshën e bibliotekës, Suela Jorgaqi, delegacionin e ardhur nga Shqipëria dhe të gjithë pjesëmarrësit. Ai theksoi se një ditë më parë çështja çame ishte ngritur edhe në Organizatën e Kombeve të Bashkuara, duke bërë të ditur se Fondacioni Çamëria “Hasan Tahsini” kishte dorëzuar dokumentacion përkatës lidhur me këtë çështje. Në fjalën e tij, Jakurti u ndal te nevoja për drejtësi dhe trajtim të dinjitetshëm të kësaj teme historike.

Filantropi Lazim Destani falënderoi organizatorët për ftesën dhe shprehu kënaqësinë për pjesëmarrjen në këtë aktivitet, duke përshëndetur të pranishmit.

Në vijim, gazetari dhe publicisti Enver Robelli foli për rëndësinë e mbrojtjes së të drejtave të shqiptarëve kudo që jetojnë, duke përmendur sfidat me të cilat përballen shqiptarët në rajon. Ai theksoi nevojën për mobilizim dhe bashkëpunim më të gjerë kombëtar.

Fjalë rasti mbajti edhe drejtoresha e Bibliotekës Pestalozzi, Suela Jorgaqi, e cila falënderoi pjesëmarrësit dhe prezantoi fondin e librave në gjuhën shqipe që posedon biblioteka. Ajo njoftoi se në fund të aktivitetit pjesëmarrësit do të kishin mundësinë të vizitonin ambientet e bibliotekës dhe të njiheshin më nga afër me koleksionin e saj.

Një moment i veçantë i mbrëmjes ishte paraqitja e një grupi të udhëhequr nga stilistja Balaj Flora, ku katër pjesëmarrës të veshur me kostume tradicionale çame surprizuan delegacionin e ardhur nga Shqipëria dhe të pranishmit në sallë.

Prof. Dr. Pëllumb Xhufi u ndal gjerësisht te historia e Çamërisë, duke trajtuar zhvillimet historike dhe sfidat me të cilat është përballur popullsia çame ndër vite.

Diplomati dhe shkrimtari Luan Rama foli për dimensionin njerëzor të çështjes çame, duke shprehur shqetësimin për humbjen graduale të identitetit dhe trashëgimisë kulturore të çamëve që jetojnë në Greqi.

Ndërkaq, Prof. Dr. Bashkim Kuçuku u fokusua në zhvillimet më të reja historike, duke trajtuar aspektet që lidhen me të drejtat dhe trajtimin e komunitetit çam në periudha të ndryshme.

Në fjalën e tij, Alket Veliu vlerësoi bashkëpunimin me Lidhjen Shqiptare në Botë dhe organizatat shqiptare brenda dhe jashtë trojeve shqiptare. Ai kujtoi kontributin e shqiptarëve çamë gjatë periudhës së luftës në Kosovë, duke bërë paralele mes përvojave historike të dëbimit të popullsisë çame dhe vuajtjeve të shqiptarëve të Kosovës. Veliu prezantoi gjithashtu aktivitetet e fondacionit dhe theksoi nevojën që çështja çame të zërë më shumë vend në tekstet shkollore.

Në vazhdim, Nazmi Jakurti ritheksoi se nuk duhet të ketë dallime mes shqiptarëve, ndërsa vlerësoi kontributin e gazetarit veteran Rexhep Rifati.

Rexhep Rifati ndau përvojat nga vizita e tij në Çamëri, duke folur për trashëgiminë historike dhe kulturore të krahinës, si dhe për ngjashmëritë mes komuniteteve shqiptare të shpërndara në vende të ndryshme.

Pjesa e fundit e aktivitetit iu kushtua diskutimit të hapur me pjesëmarrësit, të cilët parashtruan pyetje dhe ndanë mendimet e tyre mbi çështjen çame dhe sfidat me të cilat përballen komunitetet shqiptare në rajon.

Mbrëmja u përmbyll me një vizitë në ambientet e bibliotekës, ku pjesëmarrësit patën mundësinë të njiheshin me fondin e librave në gjuhën shqipe dhe të zhvillonin biseda e njohje të mëtejshme mes tyre në një atmosferë miqësore.

Marrë nga “Besainfo Ch”

WATERBURY, CT – Komuniteti shqiptar në Waterbury festoi me sukses Festivalin Shqiptar, një aktivitet dyditor që mblodhi rreth pesë mijë pjesëmarrës për të shijuar kulturën, traditat dhe mikpritjen shqiptare. Festivali u zhvillua në ambientet e Qendrës së Komunitetit Shqiptaro-Amerikan Mysliman në Waterbury dhe ofroi një program të pasur me aktivitete kulturore, artistike dhe komunitare.

Gjatë dy ditëve të festivalit, vizitorët patën mundësinë të shijojnë gatime tradicionale shqiptare, muzikë live, aktivitete familjare dhe një atmosferë të ngrohtë që pasqyroi vlerat dhe trashëgiminë tonë kombëtare.

Një nga momentet më të veçanta të festivalit ishin vallet e fëmijëve, të interpretuara me shumë përkushtim nga nxënësit e shkollës së komunitetit. Performancat e tyre u pritën me duartrokitje të shumta dhe dëshmuan rëndësinë e ruajtjes së gjuhës, kulturës dhe traditave shqiptare te brezat e rinj.

Në kuadër të aktivitetit u ndanë gjithashtu bursa për studentët, duke vlerësuar arritjet e tyre akademike dhe duke inkurajuar vazhdimin e suksesit në arsim. Ky gjest përfaqëson përkushtimin e komunitetit për të mbështetur të rinjtë dhe të ardhmen e tyre.

Një moment tjetër i rëndësishëm ishte ceremonia e nderimit të disa personaliteteve dhe mbështetësve të komunitetit. Me titullin “Miq të Shqiponjës” u vlerësuan individë që kanë kontribuar në forcimin e lidhjeve dhe mbështetjen e komunitetit shqiptar. Po ashtu, me mirënjohje të veçantë u nderua z. Rrustem Demiraj për kontributin e tij të palodhur dhe punën vullnetare ndër vite në shërbim të komunitetit.

Festivali u karakterizua nga një pjesëmarrje e gjerë dhe aktivitete të shumta që promovuan unitetin, kulturën dhe krenarinë shqiptare.

Organizatorët shprehin mirënjohjen e tyre të sinqertë për të gjithë sponsorët, vullnetarët, anëtarët e komisionit organizues dhe pjesëmarrësit që kontribuuan në suksesin e këtij festivali. Falë mbështetjes dhe përkushtimit të tyre, Festivali Shqiptar në Waterbury vazhdon të mbetet një nga ngjarjet më të rëndësishme kulturore të komunitetit shqiptar në Connecticut.

Faleminderit të gjithëve që kontribuuan dhe morën pjesë në këtë festë të kulturës, traditës dhe bashkimit shqiptar.

Me rrespekt dhe lutje.

Endrit Himaj

Foto: Gerolld Nikoliqi

Fondacioni Çamëria “Hasan Tahsini”/

Sot, në zyrën e Komisionerit të Lartë për të Drejtat e Njeriut të Kombeve të Bashkuara në Gjenevë, u zhvillua një takim kushtuar çështjes çame dhe të drejtave të mohuara të shqiptarëve të Çamërisë për më shumë se 82 vjet.

Delegacioni shqiptar përbëhej nga Alket Veliu, drejtues i Fondacionit Çamëria “Hasan Tahsini”, Nazmi Jakurti, kryetar i Lidhjes së Shqiptarëve në Botë me qendër në Zvicër, diplomati dhe akademiku Prof. Dr. Pëllumb Xhufi, diplomati, shkrimtari dhe publicisti Luan Rama, si dhe Prof. Dr. Bashkim Kuçuku, themelues dhe kryeredaktor i parë i gazetës “Çamëria”.

Delegacioni u prit nga znj. Claudia De La Fuente, Sekretare e Nënkomitetit për Parandalimin e Torturës pranë Degës së Traktateve të të Drejtave të Njeriut.

Gjatë takimit, z. Veliu theksoi se çështja çame nuk është thjesht një çështje historike e së kaluarës, por një problem me pasoja konkrete që vazhdojnë të prekin shqiptarët e Çamërisë edhe sot. Ai nënvizoi se të drejta themelore, si e drejta e pronës, e drejta mbi trashëgiminë historike dhe kulturore, si dhe e drejta për të vizituar lirisht vendlindjen e prindërve dhe gjyshërve të tyre, vazhdojnë të mohohen nga shteti grek.

Në mënyrë të veçantë, z. Veliu solli në vëmendje rastet e shumta të personave të lindur në Çamëri, të cilëve u ndalohet hyrja në Greqi dhe vizita në shtëpitë ku kanë lindur, përmes pretekstesh administrative që bien ndesh me standardet europiane të të drejtave të njeriut.

Prof. Dr. Pëllumb Xhufi paraqiti një pasqyrë historike të çështjes çame, duke argumentuar se që prej vitit 1913 politika shtetërore greke ka ndjekur një linjë të qartë diskriminimi dhe spastrimi etnik ndaj popullsisë shqiptare të Çamërisë. Ai vuri në dukje gjithashtu mungesën e një angazhimi të qëndrueshëm të diplomacisë shqiptare për trajtimin e kësaj çështjeje në arenën ndërkombëtare. Prof. Xhufi theksoi se mbajtja në fuqi e Ligjit të Luftës përbën një paradoks të papranueshëm në marrëdhëniet mes dy vendeve që kanë nënshkruar traktate miqësie dhe bashkëpunimi.

Diplomati dhe shkrimtari Luan Rama solli në vëmendje mënyrën se si Europa ka trajtuar rastet e krimeve të kryera ndaj popullsive të ndryshme, duke kujtuar aktet e reflektimit dhe kërkimit të faljes të ndërmarra nga burra shteti europianë si François Mitterrand dhe Willy Brandt. Ai theksoi se një reflektim i tillë nga shteti grek mungon ende për krimet e kryera ndaj shqiptarëve të Çamërisë.

Z. Rama ngriti gjithashtu shqetësimin për humbjen progresive të identitetit shqiptar në Çamëri. Sipas tij, shkatërrimi i shtëpive tradicionale, objekteve të kultit, monumenteve dhe trashëgimisë historike përbën jo vetëm humbje për shqiptarët, por edhe për vetë trashëgiminë kulturore europiane. Ai nënvizoi se shqiptarët nuk kanë kërkuar kurrë ndryshim kufijsh, por vetëm respektimin e të drejtave themelore të mohuara prej dekadash.

Prof. Dr. Bashkim Kuçuku foli për përpjekjet e vazhdueshme të shqiptarëve të Çamërisë, institucioneve dhe intelektualëve shqiptarë për ta sjellë çështjen çame në vëmendjen e institucioneve ndërkombëtare. Ai theksoi se kërkesat e shqiptarëve të Çamërisë janë paqësore dhe plotësisht në përputhje me frymën e konventave europiane dhe ndërkombëtare për të drejtat e njeriut.

Nga ana e tij, z. Nazmi Jakurti theksoi se çështja çame është një çështje kombëtare shqiptare, për të cilën janë angazhuar shqiptarë nga të gjitha trojet dhe diaspora. Ai nënvizoi se Lidhja e Shqiptarëve në Botë e ka përfshirë çështjen çame në mënyrë të vazhdueshme në agjendën e saj institucionale dhe publike.

Në përfundim të takimit, znj. Claudia De La Fuente falënderoi delegacionin për informacionin e paraqitur dhe shprehu gatishmërinë për ta përcjellë këtë çështje pranë strukturave përkatëse të Komisionerit të Lartë për të Drejtat e Njeriut. Ajo theksoi gjithashtu rëndësinë e marrjes së informacionit zyrtar nga shteti grek dhe ai shqiptar, me qëllim krijimin e një panorame të plotë mbi qëndrimet institucionale lidhur me çështjen çame.

Në fund të takimit, z. Veliu i dorëzoi znj. De La Fuente një dosje të gjerë dokumentare mbi çështjen çame, që përfshin materiale historike, juridike, politike dhe kulturore, si dhe dëshmi autentike të të mbijetuarve të dëbimit dhe persekutimit të shqiptarëve të Çamërisë.

Gjenevë 5 Qershor 2026

Dr. Dritan Demiraj/

Prej shumë vitesh kam ngritur zërin publikisht në media, konferenca dhe institucione ndërkombëtare për një fenomen tepër shqetësues: vendimmarrjen që shpeshherë i ka shërbyer interesave të ngushta politike, ekonomike dhe të huaja, ndërsa interesat e qytetarëve shqiptarë janë lënë në plan të dytë.

Ajo që dikur konsiderohej si paralajmërim, sot po shfaqet përpara syve të të gjithëve. Mashtrimi, propaganda, dezinformimi dhe përdorimi i mediave të kontrolluara për të fshehur realitetin nuk mund të mbulojnë më pakënaqësinë e qytetarëve. Shqiptarët po përballen çdo ditë me humbjen e pronës, pasigurinë ekonomike, emigracionin masiv dhe mungesën e shpresës për të ardhmen.

Protestat e nisura në Vlorë, Lezhë, Dukagjin, Rrjoll dhe zona të tjera të vendit tregojnë qartë se propaganda e pushtetit po humbet fuqinë e saj. Qytetarët po kuptojnë se pas sloganëve për “investime strategjike” shpesh fshihen interesa të ngushta oligarkike që nuk përputhen me interesin kombëtar dhe zhvillimin e qëndrueshëm të vendit.

E njejta gje po ndodh ne Qipro, Greqi tashme dhe ne Shqiperi, ku objektivi eshte i qarte shpopullim i qellimshem me qellim gazakizimin e Shqiperise, duke perdorur terma dhe justifikime per investime strategjike dhe metoda dhune, shkaterrimi, kercenimi me disa ndyresira me kapuc qe masakrojne qytetaret nen mbrojtjen e policise te shtetit e cila ka per mision mbrojtjen e tyre.

Për më shumë se një dekadë kam paralajmëruar për rrezikun e zbrazjes demografike të Shqipërisë, për largimin e të rinjve dhe për shndërrimin e vendit në një hapësirë ku qytetari i zakonshëm ndihet gjithnjë e më pak zot i shtëpisë së vet. Sot, fatkeqësisht, këto shqetësime po bëhen gjithnjë e më të dukshme.

Asnjë qeveri dhe asnjë pushtet nuk mund të qëndrojë mbi ligjin, mbi të drejtën e pronës dhe mbi dinjitetin e qytetarëve. Dhuna, presioni, intimidimi apo përdorimi i forcës kundër qytetarëve nuk mund të zëvendësojnë dialogun dhe drejtësinë.

Prandaj, është momenti që qytetarët të mbrojnë me mjete demokratike dhe paqësore familjet e tyre, të ardhmen e fëmijëve të tyre dhe të drejtën e pronës. Protesta qytetare është një e drejtë themelore në çdo demokraci dhe duhet të mbetet paqësore, e organizuar dhe e vendosur.

Zëri i qytetarëve nga Veriu në Jug duhet të dëgjohet qartë. Nga Rrjolli e Dukagjini, në Vlorë, Shkodër dhe Tiranë, shqiptarët duhet të kërkojnë llogari, transparencë dhe respekt për interesin kombëtar, duke krijuar nje mase e cila duhet te detyroje qeverine antishqiptare te Rilindjes ti pergjigjet deri ne nje popullit qe e ka vjedhur keto 14 vjet deri ne palce.

Koha për të reaguar është sot. Nesër mund të jetë vonë.

Keto protesta nuk duhen lejuar te behen prone e partive politike, por e perfaqesuesve nga populli qe nuk perfaqesojne interesat e oligarkeve te pushtetit.

Shqipëria u përket shqiptarëve dhe e ardhmja e saj duhet të ndërtohet në shërbim të qytetarëve të saj.

Nga Keze Kozeta Zylo

Albany, New York/

Nën tingujt e këngëve shqipe, buzëqeshjet e fëmijëve dhe emocionet e prindërve, Shkolla Shqipe “Alba Life” Ambasadori i Kombit në Albany, kryeqytetin e shtetit të Nju Jorkut, mbylli me sukses vitin akademik 2025–2026, duke dëshmuar se gjuha shqipe vazhdon të jetojë e të lulëzojë edhe larg trojeve amtare.

Në majin e trëndafilave ne festuam së bashku mbylljen e vitit me mësues, nxënës, prindër dhe gjyshër të shkollës Shqipe “Alba Life” në kryeqytetin e Nju Jorkut në Albany në një nga shkollat e rrjetit më të madh në diasporë të Familjes së Madhe “Alba Life”.

Ishte një ditë e dielltë, si vetë ndriçimi i Gjuhës Shqipe ndër shekuj. Kur e filluam këtë nismë me Prof. Qemal Zylo këtu në Albany rruga nuk ka qenë e shtruar si në dafina, por me përpjekje të mëdha, e arritëm këtë sukses të radhës duke festuar bashkë vetëm shqip.

Më duhet të them se hapja e shkollës në Albany, për ne frymëzuese ka qenë Parlamenti dhe Senati i Nju Jorkut të cilët na vlerësuan maksimalisht, ka qenë një ditë historike ku Shkollat Shqipe “Alba Life” në NY, Ambasador i Kombit u nderuan në Parlamentin e Shtetit të Nju Jorkut, për punën dhe përkushtimin e palodhur me dy rezoluta dhe duke pasur njëkohësisht një Rezolutë, ligj në emër të “Alba Life”.

Krenar të udhëtonim drejt kryeqytetit të Nju Jorkut në Albany ku para ceremonisë na priti përzemërsisht drejtori i Shkollës “Sand Creek Middle School”, Albany, z. Michael P. Marhon. Gjithmonë jam krenar tha Drejtori (Principal) z. Marhon me Shkollën Shqipe që po vazhdoni në këto mjedise publike. Gjithë ekipi im ju falënderon për rregullin dhe mësimin profesional.

Shkolla Shqipe “Alba Life”, Albany në kryeqytetin e Nju Jorkut është histori suksesi vazhdoi z. Qemal Zylo themelues i TV dhe Shkollave Shqipe “Alba Life”, pasi kjo shkollë shqipe u hap për herë të parë në historinë e Diasporës, në Albany. Ne ishim në takim pune me z. Marhon para se të fillojmë ceremoninë e mbylljes plot sukses të vitit akademik 2025-2026 pranë kësaj shkolle, një ndër shkollat e Familjes së Madhe “Alba Life” rrjetit më të madh të Shkollave Shqipe në Diasporë për 19 vjet pa u ndalur.

Siç e përsëris gjithmonë nga thelbi i zemrës se bota e fëmijëve gjithmonë më ka magjepsur dhe e nderuar të kem karrierën time të punës midis dy kontinenteve pranë tyre profesionalisht dhe mirësisht. Sa shkuam pranë klasës ku nxënësit do të shfaqnin programin takimi aq i pastër me ta si pika e lotit na jepte frymëzim dhe energji për më shumë punë.

Mësuesja e talentuar Ida, dy asistentet Lousiana, Breana dhe mësuese Edvina për semestrin e parë ishin në krye të detyrës.

Mësuese Ida i rregullonte, u vinte kapelet e bukura si kurorë në kokat e tyre, bashkë me Breanen dhe Lousianen dy asistente të mrekullueshme, plot përkushtim dhe dashuri. Prindërit e rinj të interesuar falënderonin themeluesit, mësueset dhe donin me ngulm që fëmijët e tyre të mësonin gjuhën shqipe.

Ceremonia e mbylljes u shndërrua në një festë të bukur të dijes, kulturës dhe identitetit kombëtar. Nxënësit recituan poezi, interpretuan këngë dhe valle shqiptare, duke sjellë para të pranishmëve, prindërve të tyre jo vetëm talentin e tyre, por edhe frytin e një viti të tërë pune e përkushtimi.

Në një kohë kur brezat rriten mes kulturash dhe gjuhësh të ndryshme, misioni i shkollës shqipe “Alba Life” merr një rëndësi të veçantë. Çdo shkronjë e mësuar, çdo varg i recituar dhe çdo këngë e kënduar në gjuhën amtare është një gur i çmuar në ruajtjen e identitetit shqiptar.

Siç shprehej ideologu i madh i Rilindjes Kombëtare, Sami Frashëri: “Gjuha është shenja e kombësisë.” Kjo thënie jehon fuqishëm në mjediset e shkollës shqipe në Albany, ku fëmijët mësojnë të flasin, të shkruajnë dhe të ndihen krenarë për rrënjët e tyre shqiptare.

Gjatë vitit akademik, nxënësit përvetësuan njohuri në gjuhën shqipe, histori, kulturë dhe tradita kombëtare, ndërsa mësuesit dhe prindërit punuan së bashku për të mbajtur të gjallë frymën shqiptare në zemër të Amerikës.

Në fund të ceremonisë z. Qemal Zylo shpërndau certifikata mirënjohjeje dhe vlerësime për mësueset Ida, Edvina dhe Kristianthi të cilat kanë punuar pa u lodhur me dashuri dhe profesionalizëm, si dhe për gjithë nxënësit, ndërsa emocionet e momentit rikujtuan fjalët e pavdekshme të At Gjergj Fishtës:

“Dashninë me ua ndez shqiptarve, për ka gjuha e vendit t’parve”.

Kjo thënie dukej sikur merrte jetë në zërat e fëmijëve që flisnin shqip me krenari, duke dëshmuar se fara e mbjellë nga Rilindasit vazhdon të japë fryte edhe në brigjet e largëta të Atlantikut.

Mbyllja e suksesshme e vitit akademik 2025–2026 është një dëshmi e përkushtimit të mësuesve, mbështetjes së prindërve dhe etjes së brezit të ri për të njohur gjuhën dhe kulturën e të parëve.

Me këtë arritje, Shkolla Shqipe në Albany jo vetëm që mbylli një vit shkollor, por hapi një kapitull të ri shprese për të ardhmen e shqipes në diasporë. Sepse, siç na mësoi Rilindja Kombëtare, një komb jeton përmes gjuhës së tij, dhe aty ku dëgjohet fjala shqipe, rreh edhe zemra e Shqipërisë.

Shkolla Shqipe në Albany vazhdon të jetë një vatër e rëndësishme e edukimit në gjuhën shqipe dhe e promovimit të kulturës shqiptare në kryeqytetin e shtetit të Nju Jorkut.

Suksesi i vitit akademik 2025–2026 dëshmon edhe një herë se komuniteti shqiptar në këtë zonë mbetet i përkushtuar në ruajtjen e identitetit kombëtar dhe në përcjelljen e tij tek brezat e rinj.

Me këtë mbyllje të suksesshme, të vitit të 19-të mbushur me arritje pret me optimizëm vitin e ri shkollor të 20-in, duke vazhduar Misionin Kombëtar të saj në shërbim të gjuhës dhe kulturës shqiptare në bashkëpunim të ngushtë me të gjithë stafin dhe mësueset e shkollave në gjithë Nju Jorkun.

Fëmijët tanë na treguan edhe një herë se rrënjët mbahen gjallë, kur ne i ushqejmë me kujdes, me kulturë dhe me krenari.

Pas koncertit artistik nxënësit dhe prindërit u shtruan në tryeza për të darkuar së bashku, e sponsorizuar nga sipërmarrësi, prind dhe dashamirësi i madh i Shkollave Shqipe “Alba Life”

z. Rigels Bracellari, New York Style Pizza.

Programi artistik:

Himni i Flamurit Kombëtar

Poezia “Gjuha shqipe” Gjergj Fishta: Madison dhe Hannah Hoxha Kosova interpretuar nga Anea Balaj

Fjalë të urta popullore nga Ermelisa, Anea, Sofia, Madison, Drini, Dylan, Hannah, Vanessa, George, Isabelle, Ella, Emily, Alba dhe Anika

Vallja Pogonishte

Gjuha Shqipe: Naim Frashëri interpretojnë George dhe Alba

Poezia “Skënderbeu” nga Naim Frashëri: vëllezërit Jack dhe Dylan Delia

Fragment nga Bagëti dhe Bujqësi nga Sofia, Anea, Ermelisa, Madison, Drini dhe Dylan

Kënga “Tring Zilja” të gjithë nxënësit

Motrat Belishta: “Fjalët e Qiririt” nga Naim Frashëri

Poezia: “Gjuha e Nënës” interpretojnë Drini, Hannah, George, Ermelisa dhe DylanPoezia “Shko Dallëndyshe”, Filip Shiroka interpretojnë Emily, Vanessa dhe Isabelle

Gjëegjëza: nga Alba, Isabelle, Ella dhe Jack

Kënga “Fluturo Shqiponja” interpretojnë Sofia dhe kori

Vallja e Tropojës

Vallja e Gajdes

Himni i shkollave Shqipe “Alba Life”

29 Maj, 2026

Albany, New York