– Drejt faljes së borxheve publike rreth 680 milionë euro-Priten edhe ndryshimet kushtetuese drejt Forcës së Armatosur të Kosovës/
Nga Behlul Jashari/ PRISHTINË, 7 Korrik 2015-Kuvendi i Republikës së Kosovës do të mbajë seancë plenare në 9 korrik, vendosi sot në mbledhjen pëgatitore Kryesia bashkë me shefat e grupeve parlamentare, kryesuar nga kryeparlamentari Kadri Veseli.
Pas miratimit nga qeveria në 26 qershor, shqyrtimi i parë i Projektligjit për ndryshimin dhe plotësimin e Ligjit për Buxhetin e Republikës së Kosovës për vitin 2015, do të jetë një nga rreth 10 pikat e seancës së ardhëshme plenare të Kuvendit.
Pas shqyrtimit dhe miratimit në Kuvendin e Kosovës të Projektligjit për ndryshimin dhe plotësimin e Ligjit për Buxhetin, do t’i hapet rruga rishikimit të Buxhetit të Shtetit për këtë vit, ndërsa sipas paralajmërimeve të qeverisë shpenzimet e parapara do të jenë më të ulëta për 49 milionë euro. Rishikimi i Buxhetit është bërë në harmoni të plotë edhe me marrëveshjet e arritura me Fondin Monetar Ndërkombëtar, ka theksuar qeveria.
Buxheti i Kosovës 2015 me të hyra të planifikuara 1 miliard e 576 milionë euro, me një rritje prej rreth 8.1% krahasuar me vitin 2014, është miratuar në 29 dhjetor nga Kuvendi i zgjedhjeve të 8 qershorit, i konstituar pas gjashtë muajsh.
Në axhendën e seancës vijuese plenare të Kuvendit pritet të jenë edhe shqyrtimi i parë i Projektligjit për Faljen e Borxheve Publike, si dhe i Raportit të Bankës Qendrore të Republikës së Kosovës dhe i Raportit të Fondit të Kursimeve Pensionale për vitin 2014.
Në 3 qershor 2015, qeveria e Kosovës, e drejtuar nga kryeministri Isa Mustafa, miratoi Projektligjin për Faljen e Borxheve Publike, ndërsa sipas Ministrisë së Financave shuma e borxhit që do të falet vlerësohet të jetë rreth 680 milionë euro. Rreth 148 milionë borxh ndaj Administratës Tatimore të Kosovës, rreth 6 milionë borxh ndaj Doganës së Kosovës, rreth 57 milionë borxh ndaj tatimit në pronë dhe rreth 465 milionë borxh ndaj ndërmarrjeve publike.
Ministri kosovar i Financave, Avdullah Hoti, ka thënë se, sipas vlerësimeve të institucioneve që kanë marrë pjesë në hartimin e këtij ligji, kryesisht do të përfitojnë personat fizikë të cilët kanë paqëndrueshmëri në mirëqenën e tyre sociale.
“Kjo do t’i shërbejë prioriteteve të qeverisë së Republikës së Kosovës në fushën e mirëqenies sociale. Në anën tjetër, falja e borxheve sipas këtij ligji do të krijojë një momentum të ri që do të shërbejë për ngritjen e disiplinës së përgjithshme të personave fizikë dhe juridikë në Kosovë karshi obligimeve të tyre publike”, tha ministri Hoti .
Shtypi i sotëm kosovar paralajmëron edhe ardhjen në rend dite të propozimeve për ndryshimet kushtetuese, që i hapin rrugën transformimit të FSK-së në Forcën e Armatosur të Kosovës, të cilat do t’i dorëzohen Kryesisë e Kuvendit, menjëherë pas shqyrtimit të hënën e ardhëshme në Komisionit parlamentar për legjislacion.
Jo-ja nuk është fjala e fundit
Pas dorëheqjes së Ministrit të Financave Varoufakis Greqia kërkon një fillim të ri në negociatat me kredidhënësit. Por pozicionet janë ngurtësuar./
Nga Jani Padimitriou/
Që dy orë pas mbylljes së lokaleve të zgjedhjeve ishte e qartë: në bazë të rezultateve paraprake të Ministrisë së Brendshme të Athinës, në këtë kohë kampi-Jo ndodhej me 61 përqind të votave shumë përpara dhe mori thuajse në çdo zonë elektorale shumicën e votave.
Pasoi një festë në qendrën e Athinës të mbështetësve të Jo-së, deri në orët e para të mëngjesit. Kjo në një kohë kur të gjitha sondazhet e ditëve të fundit patën sugjeruar një garë kokë më kokë. Kryeministri Alexis Tsipras, i cili e thirri referendumin për propozimet e kursimit duket më i fortë në pozicionin e tij.
Numri i nevojshëm i pjesëmarrësve, prej 40 përqind që referendumi të shpallej i vlefshëm, u tejkalua mjaft me shifrën 65 përqind. “Edhe vetëm pjesëmarrja e madhe e njerëzve e largon çdo dyshim për ligjshmërinë e referendumit”, deklaron Nikos Filis, zëdhënës i Grupit Parlamentar të partisë së majtë Syriza, në intervistë me televizionin grek Mega.
Arsyeja për këtë deklaratë: të gjithë gjykatësit kushtetues dhe jo së fundi Këshilli i Evropës patën shprehur para referendumit dyshim nëse referendumi ishte në përputhje me ligjet – para së gjithash për shkak të pyetjeve të paqarta dhe shumë komplekse, si dhe kohës jashtëzakonisht të shkurtër të fushatës elektorale.
Pas fitores së qartë të papritur të kampit-Po, në shtypin e Athinës janë shtuar spekulimet për një Grexit, për daljen e Greqisë nga Eurozona. “Dakordim ose Grexit” është pyetja që shtrohet tani e tutje, bën të ditur gazeta ekonomike liberale Kathimerini. “Reforma ose Grexit”, është titulli i shkrimit të gazetës Ta Nea. Një interpretim tjetër bën Avgi, gazeta partiake e të Majtëve grekë: “61 përqind i thonë jo politikës së rreptë të kursimeve.”
“Populli ynë mund të rezistojë”
Megjithë reagimet e ashpra nga vendet e BE, qeveria Tsipras e kupton referendumin jo si një fund, përkundrazi, si një fillim të ri të negociatave me kredidhënësit. “Ne punojmë që të arrijmë një dakordim. Populli ynë ka treguar se ai mund të rezistojë”, deklaroi Ministri i Brendshëm, Nikos Voutsis të dielën në një intervistë televizive.
Dhe shtoi: “Një javë të tërë duruan njerëzit në Greqi, me siguri që do të durojnë edhe disa ditë më shumë”, një aludim për mbylljen e bankave me urdhër të qeverisë të hënën e kaluar (29.6.), hap që ndoshta, në mungesë ta parave do të zgjatet.
Ekonomisti Kostas Stoupas beson se qeveria greke ndodhet në një rrugë pa krye dhe do të konfrontohet me pasoja të pakontrollueshme javët dhe muajt e ardhshëm për shkak të mbylljes së bankave. Sipas mendimit të tij kërcënon zvarritja e pagesave në shërbimet publike, si dhe mungesë ushqimesh, medikamentesh dhe e benzinës. Stoupas është i sigurtë: “Fitorja e Jo-së në referendum e vështirëson pozicionin e negociatave të Greqisë.”
Kthim në tryezën e negociatave
Qeveria e Athinës e sheh këtë ndryshe: përfundimi i referendumit nuk është porosi për t’u prishur me donatorët, deklaroi Kryeministri Tsipras në një fjalim televiziv të dielën në darkë. Ka padyshim zgjidhje të qendrueshme, megjithatë me kredidhënësit duhet folur edhe për një ristrukturim të borxheve greke.
Vetëm pas referendumit grek nis “pjesa substanciale e negociatave”, tha zëdhënësi i qeverisë, Gavriil Sakellaridis. Prej kohësh kryeministri Tsipras ka premtuar se do të arrihet një dakordim me donatorët “brenda 48 orëve pas referendumit”.
Disfata e papritur e rëndë e kampit të Po-së ka pasoja jo së fundi edhe për opozitën në Athinë: para një takimi krize të të gjithë drejtuesve të partive me Presidentin e shtetit Prokopis Pavlopoulos të hënën (06.07.) dha dorëheqjen udhëheqësi i opozitës konservatore dhe ish-kryeministri Antonis Samaras. Kryetar i ri i përkohshëm i partisë do të bëhet ish-Presidenti i Parlamentit Vangelis Meimarakis, i cili i ka kërkuar Kryeministrit Tsipras ta realizojë tani premtimin për “dakordim brenda 48 orësh.”
Parlamenti Grek Miraton Referendumin e 5 Korrikut
ATHINË, 28 qershor / – Parlamenti grek miratoi sot në orët e para të mëngjesit referendumin e propozuar nga qeveria e Aleksis Ciprasit lidhur me ofertën e fundit të kreditorëve, që rrezikon një stuhi financiare para datës së zhvillimit të tij më 5 korrik.
Referendumi u miratua me 178 vota pro dhe 120 kundër në parlamentin me 300 vende.Deputetët e SYRIZA-s dhe aleatët e Grekëve të Pavarur votuan për referendumin ashtu si edhe ata të ”Agimit të artë”, në ndërkohë që votuan kundër deputetët e ”Demokracisë së re” dhe të PASOK-ut, ashtu si ata të KKE-së dhe të ”Potami”-t.”Populli grek do t’i thotë një ‘jo’ të madhe ultimatumit të kreditorëve”, deklaroi Cipras.Në këtë referendum, grekët do të përgjigjen me ”po” ose ”jo” masave të kreditorëve të vëna qeverisë Cipras./
Denoncimi i ‘Alarm’, shkarkohet nga detyra kreu i AKU, Aleksandër Kalemaj
Pas publikimit të fakteve në emisionin “Alarm” në Ora News, se kreu i Autoritetit Kombëtar të Ushqimit Aleksandër Kalemaj akuzohej për falsifikim të produkteve ushqimore ka ardhur edhe reagimi i Ministrisë së Bujqësisë.
Kjo e fundit me kërkesë të Kryeministrit, kreu verifikimet e duhura për këtë person dhe pas këtyre verifikimeve, Aleksandër Kalemaj është larguar nga detyra dhe nuk kryen më funksionet e Përgjegjësit të Sektorit të Ushqimit, në Drejtorinë e Menaxhimit të Riskut, pranë Autoritetit Kombëtar të Ushqimit.
Zbulimi i emisionit Alarm
“Policia e Vlorës gjatë operacionit të koduar “Porosia”, ka bërë të mundur arrestimin e Gramoz Bilbil Kalemaj, 56 vjeç, Aleksandër Bilbil Kalemaj, 58 vjeç dhe 25 vjeçarit Detjon Namik Dapaj, të tre banues në Vlorë.Arrestimi erdhi pasi nga hetimet e kryera ka rezultuar se këta shtetas, në bashkëpunim me njëri-tjetrin kishin përshtatur një magazinë e cila ndodhej në lagjen “29 Nëntori” në Vlorë, brenda së cilës në mënyrë artizanale prodhonin sasi të konsiderueshme dhe të ndryshme pijesh alkolike, si konjak, uzo, raki verë etj., të cilën e ambalazhonin në shishe, i vendosnin etiketa me mbishkrimin e subjektit “KALEMI” dhe më pas e tregtonin në qytet. Këtë veprimtari ekonomike këta shtetas dyshohet se e kryenin në mënyrë të paligjshme pasi nuk ishin pajisur me dokumentacion përkatës, si dhe nuk paguanin detyrimet financiare. Sipas të dhënave të policisë Gramoz Kalemaj ka qenë i dënuar më parë për veprën penale “Prodhimi i kundërligjshëm i mallrave ushqimore dhe industrialë”.
Ky është njoftimi i policisë së shtetit i datës 31 tetor 2012, për arrestimin e Aleksandër Kalemaj që në serinë e fundit të emisionit “Alarm” ishte personazh kryesor i investigimit, pasi edhe pse i akuzuar për një vepër të rëndë penale dhe jo vetëm, drejton sot institucionin që i shmnagej në mënyrë të jashtëligjshme. Njeriut që prodhonte produkte ushqimore të falsifikuara në një bodrum pa asnjë kriter, tashmë qeveria i ka besuar AKU-n. Një skandal ky që i ka shkuar si uji në mulli edhe Partisë Demokratike që ka bërë denoncimin e radhës.
“Kryeministri ia ka besuar sigurinë ushqimore të shqiptarëve, Aleksandër Kalemajt, i arrestuar më parë për prodhim dhe shitje të ushqimeve të rrezikshme për shëndetin.Personi i akuzuar se një magazinë në Vlorë e kishte kthyer në fabrikë ku prodhonte pije dhe mallra të tjera të rrezikshme për jetën e qytetarëve dhe konsumatorëve, është sot personi që Edi Rama i ka besuar drejtimin e AKU-së, kësaj agjencie që garanton cilësinë dhe standardet ushqimore në vend.Me këtë emërim, Edi Rama ka treguar se nuk ka më turp nga asgjë, dhe se arrin deri këtu, sa një prodhues të paligjshëm të pijeve e të ushqimeve, të arrestuar dhe të akuzuar në tetorin e vitit 2012, pas një hetimi të gjatë të policisë dhe prokurorisë, ta bëjë përgjegjës për sigurinë tonë ushqimore. Edi Rama e gjeti këtë person të zhytur në paligjshmëri, si më të përshtatshim për ta bërë përgjegjës të sigurisë ushqimore në vend. Kjo është rilindje” tha deputetja demokrate Voltana Ademi në një deklaratë për mediat.
Ekon-Biznesi kërkon heqjen e barrierave për shkëmbimet me Kosovën
Biznesi shqiptar shprehet i shqetësuar lidhur me shfaqjen sërisht të problematikës së bllokimit të eksporteve drejt Kosovës nga vendimarrja e Autoriteteve Doganore kosovare për të ndryshuar proçedurat e zhdoganimit te mallit nga vendi jonë. Nëpërmjet një deklarate për mediat Drejtori Ekzekutiv i (QKB) Gjergj Prebibaj thotë se, është një bllokim që po i bëhet eksporteve drejt Kosovës, konkretisht të materialeve të ndërtimit si Tulla dhe Tjegulla. Në këtë mënyrë shtohen procedurat, burokracite dhe kostot. Jemi në kushtet e shkeljes së marrëveshjes së CEFTA dhe marrëveshjeve dypalëshe për lehtesimin e procedurave dhe barrierave për shkëmbimet tregtare. Kemi të bëjme me artifica te cilat praktikisht e bëjnë të pamundur eksportimin e materialeve të ndërtimit drejt Kosovës si Tulla dhe Tjegulla. Qendra e Klasterave të Biznesit sqaron se bëhet fjalë për një kosto shtesë totale prej 240 Euro që është vendosur për kamion, malli i te cilit ka vlerë përafersisht 800 Euro ( kostoja shkon mbi 30% e vlerës totale të mallit) që ka sjellë bllokimin e tregtisë. Kjo praktike përbën një problem mjaft shqetësues edhe për industritë e tjera eksportuese (çimento etj) duke i bërë më pak konkurues në treg por në rastin e tullave dhe tjegullave duke qenë se vlera totale e mallit është e vogël, kjo procedure e bllokon totalisht.
Nga Shqipëria në drejtim të Kosovës shkojnë rreth 1050 kamiona me vlerë të përafërt
850 000 Euro ne muaj, ose 10 Milion Euro ne Vit. Qendra e Klasterave të Biznesit bën të ditur se këto vlera janë vetëm për produktet Tulla dhe Tjegulla dhe po të merret në konsideratë e gjithë gama e produkteve, humbja është shumë herë më e madhe.Lidhur me këtë shqetësim Qendra e Klasterave te Biznesit ka informuar menjeherë Ministrine e Ekonomisë dhe Drejtorine e Pergjithshme të Doganave të Shqipërise duke ju kërkuar ndërhyrjen institucionale për zgjidhjen e problemit.
Kjo situatë vazhdon prej 4 ditësh dhe sipas informacioneve më te fundit nga bashkëpuntorët tonë në Kosovë të cilët kanë qenë në bisedime të vazhdueshme me Autoritete Doganore Kosovare ka sinjale pozitive për zgjidhjen e problemit gjatë dites së sotme. QKB shpreson në arritjen e një zgjidhjeje përfundimtare për këtë problem dhe jo të përkohshme si marrëveshja e Gushtit 2013