Ekonomi – Page 135 – Dielli

Kosova, Strategji Kombëtare për Zhvillim

February 15, 2016 by dgreca

-Kryeministri Isa Mustafa: Strategjia është e destinuar për të mundësuar një zhvillim të qëndrueshëm dhe është hartuar nga qeveria e Republikës së Kosovës, në bashkëpunim dhe në përkrahje të plotë nga Zyra e Bashkimit Evropian/
-Shefi i Zyrës së BE-së, Samuel Zhbogar: Besoj se Kosova ka arritur në një fazë në të cilën është e aftë që të përballet me problemet e veta/
-Ministri kosovar i Financave, Avdullah Hoti: Strategjia Kombëtare për Zhvillim është një dokument i gjallë, i cili do të plotësohet gjatë procesit të implementimit/
PRISHTINË, 15 Shkurt 2016/ Kryeministri i Republikës së Kosovës, Isa Mustafa, dhe përfaqësuesi special i Bashkimit Evropian në Kosovë, Samuel Zhbogar, kanë bërë sot lansimin e Strategjisë Kombëtare për Zhvillim 2016-2021. Ky projekt është finalizuar përmes projektit të financuar nga BE-ja, “Mbështetje për politikat e Kosovës dhe planifikimin strategjik”, në vlerë prej 2.585.000 euro. Projekti ka përfshirë mbështetjen për përgatitjen e Programit të Reformave Ekonomike 2016-2018 dhe programet e IPA II. Strategjia Kombëtare për Zhvillim është e përqendruar në katër shtylla: kapitali njerëzor, sundimi i ligjit, infrastruktura dhe konkurrueshmëria.
Në ceremoninë e zhvilluar me këtë rast, kryeministri Mustafa foli për rëndësinë e hartimit të Strategjisë Kombëtare për Zhvillim, e cila është aprovuar në mbledhjen e qeverisë së Republikës së Kosovës, në 22 janar të këtij viti.
“Strategjia është e destinuar për të mundësuar një zhvillim të qëndrueshëm dhe është hartuar nga qeveria e Republikës së Kosovës, në bashkëpunim dhe në përkrahje të plotë nga Zyra e Bashkimit Evropian”, tha kryeministri, duke falënderuar për mbështetje Zyrën e Bashkimit Evropian dhe përfaqësuesit e vendeve të BE-së të pranishëm në ceremoni.
Kryeministri Mustafa tha se esenca e kësaj Strategjie është që ajo e kapërcen mandatin e kësaj qeverie duke përfshirë një periudhë kohore deri në vitin 2021.
“Ne me këtë Strategji kemi bërë të qarta orientimet tona, edhe pozicionin tonë se zhvillimi ekonomik, promovimi i punësimit dhe rritja e mirëqenies, do të jenë themeli i qeverisjes së mirë të vendit për këto katër vite të mandatit të kësaj qeverie, dhe se të gjitha këto bazohen në iniciativën private, në konkurrencën e tregut të hapur, si forca kryesore që sigurojnë prosperitet ekonomik dhe zhvillim”, tha kryeministri Mustafa, duke prezantuar në detaje përmbajtjen e kësaj strategjie të rëndësishme për Kosovën.
Ndërsa, lidhur me temat aktuale në vend, kryeministri Mustafa tha se nuk ka temë më të rëndësishme politike për këtë vend se sa zhvillimi ekonomik, hapja e vendeve të reja të punës, ardhmëria e Kosovës në Bashkimin Evropian.
“Vetë fakti që ne po punojmë fuqishëm në këto fusha, flet që fuqishëm jemi të përcaktuar që qeveria ta bëjë punën e vet deri në fund të këtij mandati, dhe se institucionet e Republikës së Kosovës do të funksionojnë dhe të konstituohen sipas mandatit të Kushtetutës”, tha kryeministri Mustafa.
Shefi i Zyrës së BE-së në Kosovë, njëherësh përfaqësues special i BE-së, Samuel Zhbogar, ka thënë se është i kënaqur që po e bashkëlanson Strategjinë Kombëtare për Zhvillim, dokument i parë i këtij lloji në Kosovë, i mbështetur nga BE-ja, si një prej dokumenteve më të rëndësishme për Kosovën dhe udhërrëfyes për zhvillimin e ekonomisë kosovare.
“Besoj se Kosova ka arritur në një fazë në të cilën është e aftë që të përballet me problemet e veta. Është e nevojshme që të gjitha palët e interesuara në Kosovë të bashkojnë forcat për të drejtuar Kosovën në një rrugë të zhvillimit më të fuqishëm ekonomik. Kjo është po ashtu e vetmja mënyrë për të tejkaluar krizën aktuale politike, pasi interesi kombëtar duhet të vihet mbi të gjitha interesat tjera. Instrumentet sikurse Strategjia Kombëtare për Zhvillim, Programi i Reformave Ekonomike dhe Marrëveshja për Stabilizim dhe Asociim, janë mjetet e duhura për të adresuar çështjet e Kosovës dhe për të ecur përpara”, tha Zhbogar.
Ministri kosovar i Financave, Avdullah Hoti, tha se Strategjia Kombëtare për Zhvillim është një dokument i gjallë, i cili do të plotësohet gjatë procesit të implementimit. “Qëllimi i këtij dokumenti është orientues për qeverinë në planifikimet e ardhshme buxhetore. Ne qysh tash po punojmë në kornizat afatmesme të shpenzimeve bazuar në këtë strategji. Ne presim që bizneset të marrin parasysh në planet e tyre afatgjate orientimet e qeverisë të dhëna në këtë Strategji. Presim nga partnerët zhvillimorë që të marrin parasysh prioritetet që i ka vendosur qeveria përmes kësaj strategjie, e po ashtu edhe bankat zhvillimore, Bankën Evropiane për Rindërtim dhe Zhvillim, Bankën Botërore, USAID-in dhe partnerët tjerë që na kanë mbështetur deri tash në rrugën e zhvillimit të Kosovës”, tha ministri Hoti, duke paralajmëruar tryeza tematike për fushat specifike të strategjisë.
Qemajl Marmullakaj, drejtor i Zyrës për Planifikim Strategjik në Zyrën e Kryeministrit, duke prezantuar Strategjinë Kombëtare për Zhvillim tha se ky është një dokument udhërrëfyes për planifikim të politikave dhe një dokument që qeveria e Republikës së Kosovës e harton për herë të parë. “Strategjia Kombëtare për Zhvillim si proces ka filluar gjatë vitit 2014, duke bërë analizimin e dokumenteve strategjike në dispozicion që përfshijnë një mori dokumentesh nga institucionet qeveritare apo edhe mekanizmat ndërkombëtarë, duke marrë parasysh edhe praktikat më të mira ndërkombëtare, të cilat kanë qenë të krahasueshme me Kosovën”, tha Marmullakaj.

Kosovë-Portofoli kreditor me Bankën Botërore

February 9, 2016 by dgreca

-Ministri i Financave në qeverinë e Kosovës, Avdullah Hoti: Deri më tani, shuma totale e kredive të nënshkruara me Bankën Botërore është 68 milion SDR, apo me kursin aktual rreth 85 milion euro/
PRISHTINË, 9 Shkurt 2016/Ministria e Financave në qeverinë e Kosovës sot mbajti Tryezën e diskutimit për Portofolin kreditor me Bankën Botërore, në të cilin murrën pjesë përfaqësues të Institucioneve vendore, përfaqësues të Bankës Botërore, si dhe koordinatorë të projekteve.
Ministri i Financave Avdullah Hoti duke shpreh zotimin e tij dhe institucionit që ai drejton për implementim të suksesshëm të të gjitha projekteve me financim përmes portofolit të Bankës Botërore, bëri të ditur se ky është takimi i parë për këtë viti si pjesë e takimeve të rregullta që organizohen vazhdimisht në mënyrë që të sigurohet implementimi i suksesshëm i Marrëveshjeve Financiare që Qeveria e Republikës së Kosovës ka nënshkruar me Bankën Botërore.
“Ministria e Financave ka të nënshkruara me Bankën Botërore gjithsej 9 Marrëveshje financiare , ndërsa 2 prej tyre tashmë kanë përfunduar. Nga 9 Marrëveshjet Financiare shtatë nga ato janë me kompozim Kredi/Grant për financim të projekteve specifike që kontribuojnë në mirëqenien sociale në Kosovë, si dhe një Marrëveshje Financiare e nënshkruar në fushën e Arsimit e cila është në proces të Ratifikimit. Deri më tani, shuma totale e kredive të nënshkruara me Bankën Botërore është 68 milion SDR, apo me kursin aktual rreth 85 milion euro”, tha ministri Hoti.
Ministri Avdullah Hoti paraqiti zotimin e Ministrisë së Financave që projektet të kenë implementim të suksesshëm brenda kornizës së paraparë ligjore, ngase sipas tij çdo shtyrje paraqet kosto më të lartë të huamarrjes si dhe efekt buxhetor. Ai bëri të ditur se në bazë të Marrëveshjes Financiare gjatë vitit 2016 pritet të finalizohen 3 projekte: Projekti për përforcimin e sektorit financiar dhe infrastrukturën e tregut, Projekti për modernizimin e sektorit publik, si dhe Projekti për pastrim të sektorit të energjisë dhe bonifikim të tokës./b.j/

Kosova, përvoja ndërkombëtare për Trepçën

February 5, 2016 by dgreca

-Qeveria e Kosovës ka miratuar sot vendimin për sigurimin e buxhetit për angazhimin e ekspertëve për studime rasti lidhur me përvojat ndërkombëtare në rastet e ngjashme me Ndërmarrjen Trepça/
-Është miratuar edhe propozimi për themelimin e Komisionit për Verifikimin e Diplomave të lëshuara nga Universiteti i Mitrovicës së Veriut/
-Qeveria e Kosovës falënderon Parlamentin Evropian për vlerësimin pozitiv lidhur me progresin në përmbushjen e kritereve për liberalizim të vizave, duke apeluar që të bëhen veprimet e nevojshme në mënyrë që kosovarët të udhëtojnë pa viza gjatë vitit 2016/
Nga Behlul JASHARI/ PRISHTINË, 5 Shkurt 2016/ Qeveria e Kosovës ka miratuar sot vendimin për sigurimin e buxhetit për angazhimin e ekspertëve për studime rasti lidhur me përvojat ndërkombëtare në rastet e ngjashme me Ndërmarrjen Trepça. Kjo do të shërbejë në hartimin e Strategjisë dhe të Ligjit për Trepçën, gjigantin e ekonomisë kosovare.
Kryeministri Isa Mustafa tha se kanë zhvilluar takime me të gjitha palët e interesuara lidhur me Trepçën dhe janë ndarë disa prej detyrave që të punohet në transformimin e Trepçës.
“Është një orientim që ne të kemi studime të rastit, të kompanive të ngjashme me Trepçën, në mënyrë që ato t’i marrin si modele gjatë hartimit të Strategjisë dhe të Ligjit për Trepçën. Këto mjete, janë të destinuara për ato qëllime”, tha kryeministri Mustafa.
Krahas reformave substanciale që ka bërë, qeveria e Kosovës ka theksuar se tani do të fokusohet në zgjidhjen përfundimtare të çështjes së asetit më të rëndësishëm strategjik të Kosovës, Trepçës.
Në mbledhjen e sotme të qeverisë së Kosovës është miratuar edhe propozimi për themelimin e Komisionit për Verifikimin e Diplomave të lëshuara nga Universiteti i Mitrovicës së Veriut.
Edhe vendimi që të kërkohet rekomandimi i Presidentes së Republikës së Kosovës për dhënien e autorizimit Ministrit të Integrimit Evropian, për nënshkrimin e Marrëveshjes financiare për IPA 2015 ndërmjet Republikës së Kosovës dhe Bashkimit Evropian, ka marrë miratimin e qeverisë.
Kabineti qeveritar është informuar për rezultatin dhe rekomandimet nga takimet e Dialogut të Procesit të Stabilizim Asociim për Drejtësi, Liri dhe Siguri dhe Inovacion, Kapital Njerëzor, Politika Sociale dhe Shoqërinë Informative, që janë zhvilluar nga 26 deri më 28 janar 2016 në Prishtinë.
Në mbledhjen e sotme, qeveria e Republikës së Kosovës ka emëruar Ibrahim Makollin, kryetar të delegacionit të Kosovës për bisedime në çështjen e personave të zhdukur.
Me kërkesë të kryeministrit, ministri i Integrimeve Evropiane, Bekim Çollaku, ka njoftuar kabinetin qeveritar në lidhje me procesin e plotësimit të tetë rekomandimeve të Komisionit Evropian për liberalizimin e vizave. Sipas ministrit Bekim Çollaku, nga tetë rekomandime, gjashtë janë plotësuar ndërsa dy janë në proces. Ministri Çollaku është shprehur i bindur për një vendim meritor për liberalizim të vizave nga ana e Komisionit Evropian.
Qeveria e Kosovës, e drejtuar nga kryeministri Isa Mustafa, zhvilloi sot mbledhjen e 73-të, të gjashtën në vitin 2016, të cilin e nisi me dy mbledhje brenda ditës së 8 janarit. Në mbledhjen e kaluar, në 29 janar, qeveria ka themeluar Këshillin Organizativ për shënimin e tetë vjetorit të Pavarësisë së Republikës së Kosovës, në 17 shkurt.
Mbledhja u mbajt një ditë pas miratimit nga Parlamenti Evropian të Rezolutës për Kosovën, e cila, siç thekson deklarata përshëndetëse e qeverisë, përmban kërkesa të qarta për avancimin dhe shpejtimin e procesit të integrimit evropian të Kosovës.
Qeveria e Kosovës falënderon Parlamentin Evropian për vlerësimin pozitiv lidhur me progresin në përmbushjen e kritereve për liberalizim të vizave, duke apeluar që të bëhen veprimet e nevojshme në mënyrë që kosovarët të udhëtojnë pa viza gjatë vitit 2016.
Qeveria e Republikës së Kosovës e konsideron hap shumë të rëndësishëm gatishmërinë e Parlamentit Evropian për të dhënë pëlqimin pas rekomandimit të Komisionit Evropian për liberalizimin e vizave, si dhe ftesën drejtuar Komisionit Evropian që të ndërmarrë një hap të tillë sa më shpejtë.
Qeveria e Republikës së Kosovës ka shprehur mirënjohje të posaçme për përkrahjen e vazhdueshme të Parlamentit Evropian për Kosovën, duke pas parasysh edhe faktin se në këtë rezolutë është përsëritur thirrja e europarlamentarëve për pesë shtetet e mbetura të BE-së që të njohin Republikën e Kosovës.
Qeveria e Kosovës, me kryeministër Isa Mustafën, e koalicionit të dy partive më të madha PDK e LDK, ku përfshihen edhe minoritetet, vazhdon punën në vitin e saj të dytë që nga zgjedhja në 9 dhjetor 2014, në Kuvendin kosovar të konstituuar një ditë më parë, gjashtë muaj pas zgjedhjeve të parakohëshme parlamentare të 8 qershorit.
*Foto Gazeta DIELLI –Behlul Jashari: Qeveria e Kosovës në mbledhje, 5 shkurt 2016

Kosovë – AKP me Bordin e ri, në axhendë edhe Trepçën

February 3, 2016 by dgreca

-Bordi i Drejtorëve i Agjencisë Kosovare të Privatizimit, i udhëhequr nga kryesuesi Petrit Gashi, mori vendim që të formojë Komisionin për analizën preliminare të kërkesave kreditore si dhe Komisionin për përgatitjen e termave të referencës për studimin e fizibilitetit për Trepçën me orientime strategjike për zhvillimin e kësaj ndërmarrje/
-Gazeta tradicionale e historike e Kosovës Rilindja në 30 dhjetor 2008: Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë/
Nga Behlul Jashari/ PRISHTINË, 3 Shkurt 2016/ Bordi i Drejtorëve i Agjencisë Kosovare të Privatizimit, i udhëhequr nga kryesuesi Petrit Gashi, në dinamikën e vazhdueshme të punës, diskutoi për një numër çështjesh të përcaktuara me axhendë. Sot bëhet e ditur se, me konsensus zgjodhi Bajram Zejnullahun zëvendës kryesues Bordi, ndërsa diskutoi lidhur me pozitat vakante në menaxhmentin e Agjencisë Kosovare të Privatizimit dhe me këtë rast aprovoi komisionin, rregulloren dhe procedurat e rekrutimit të menaxhmentit, si dhe përshkrimet e vendit të punës dhe mori vendim për shpalljen dhe publikimin e konkursit për pozitat vakante të drejtorit dhe zëvendësdrejtorit menaxhues.
Bordi u informua edhe për zhvillimet lidhur me ndërmarrjen Trepça dhe kërkesat ligjore rreth riorganizimit dhe afatit ligjor për dorëzimin e Planit të riorganizimit. Bordi mori vendim që të formojë Komisionin për analizën preliminare të kërkesave kreditore si dhe Komisionin për përgatitjen e termave të referencës për studimin e fizibilitetit për Trepçën me orientime strategjike për zhvillimin e kësaj ndërmarrje.
Më tutje, në mbledhje, Bordi diskutoi për zhvillimet lidhur me punën e aktivitetet e Agjencisë Kosovare të Privatizimit dhe shqyrtoi Raportin Vjetor të Punës për vitin 2014. Vendosi që ky raport t’i dërgohet Kuvendit të Republikës së Kosovës sipas kërkesave të Ligjit mbi Agjencinë Kosovare të Privatizimit. Poashtu, Bordi shqyrtoi raportet e punës së Agjencisë Kosovare të Privatizimit për periudhën deri në 31 nëntor 2015.
Bordi diskutoi edhe për procesin e privatizimit dhe të likuidimit të ndërmarrjeve shoqërore, sfidat dhe nevojat e Agjencisë dhe me këtë rast emëroi disa komisionie. Bordi diskutoi dhe miratoi emërimin e anëtarëve të Komitetit të Auditimit dhe zgjati mandatin e Komisionit për Shitjen e Banesave në pronësi të ndërmarrjeve shoqërore tek palët me të drejtë të shfrytëzimit.
Agjencia Kosovare e Privatizimit (AKP) nisi vitin 2016 me Bordin e Drejtorëve, të ri, të munguar në 2015-tën. Për Agjencinë Kosovare të Privatizimit emërimi i Bordit të Drejtorëve të saj në fundin e seancës përmbyllëse të sesionit vjeshtor të Kuvendit të Kosovës dhe konstituimi i këtij Bordi në ditën e fundit të vitit 2015 është një ngjarje e rëndësishme dhe e pritur gjatë.
“Gjatë vitit 2015 Agjencia Kosovare e Privatizimit nuk ka realizuar asnjë shitje të aseteve të ndërmarrjeve shoqërore për shkak të mungesës së Bordit të Drejtorëve”, ka theksuar në konferencën vjetore për shtyp Avni Jashari, ushtruesi i detyrës së zëvendësdrejtorit menaxhues të kësaj Agjencie, e cila në mungesë Bordi kishte mbetur pa drejtor menaxhues.
Bordi i Drejtorëve të Agjencisë Kosovare të Privatizimit, në 31 dhjetor, pak orë para ardhjes së Vitit të Ri 2016, ka mbajtur mbledhjen e parë, konstituive, të udhëhequr nga Petrit Gashi, kryesues i Bordit, ku u diskutua për një varg çështjesh të përcaktuara me axhendë bazuar në mandatin ligjor të Agjencisë.
Për vitin 2016, menaxhmenti i Agjencisë Kosovare të Privatizimit ka përcaktuar 20 objektiva kryesore të punës, të cilat ka paralajmëruar se do të bëhen të ditura pas miratimit nga Bordi i Drejtorëve.
Në kuadër të procesit të ligjshëm të privatizimit pritet e kërkohet edhe ridalja e gazetës së përditëshme tradicionale të Kosovës Rilindja, e cila ka nisë të dalë në Prizren para 71 vitesh, në 12 shkurt 1945. Gazeta historike e Kosovës Rilindja, e cila ka filluar të dalë në frymën e Konferencës së Bujanit e me anagzhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur detyrimisht me dëbim të kundërligjshëm e të padrejtë nga Pallati i saj në Prishtinë nga administrata e UNMIK para 14 vitesh në 21 shkurt 2002. Pas kësaj date gazeta Rilindja ka dalë me numra protestues të jashtëzakonshëm, të kohëpaskohshëm.
Gazeta Rilindja, kronikë e zhvillimeve historike të Kosovës, pasi doli me botime speciale edhe për ngjarjen historike të shpalljes së pavarësisë në 17 shkurt 2008 dhe për njohjet ndërkombëtare që pasuan, ka përmbyllë daljet e mëse 40 numrave protestues në 30 dhjetor 2008, me numrin e festës së Vitit të Ri 2009, me paralajmërimin në ballinë: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”.

Kosovë-AKP: Prioritet, shlyerja e obligimeve ndaj punëtorëve

February 2, 2016 by dgreca

-Bordi i i Bordit të Drejtorëve i Agjencisë Kosovare të Privatizimit (AKP) takoi përfaqësues të punëtorëve të dy ndërmarrjeve shoqërore, “KHT Kosova” dhe Trasing-
-Në kuadër të procesit të ligjshëm të privatizimit pritet e kërkohet edhe ridalja e gazetës së përditëshme tradicionale të Kosovës Rilindja, e cila ka nisë të dalë në Prizren para 71 vitesh, në 12 shkurt 1945/
Nga Behlul Jashari/ PRISHTINË, 2 Shkurt 2016/ Kryesuesi i Bordit të Drejtorëve tw Agjencisë Kosovare të Privatizimit (AKP), Petrit Gashi me anëtarë tjerë të Bordit dhe menaxhmentin e Agjencisë zhvilluan sot një takim me përfaqësuesit e punëtorëve të ndërmarrjeve shoqërore “KHT Kosova” dhe “Trasing”, të cilët mbajtën një protestë para dyerve të Agjencisë.
Drejtuesit e AKP-së u njoftuan nga përfaqësuesit e punëtorëve me kërkesat e tyre, që ishin shlyerja e pagesës së pagave të papaguara, borxh ky i mbetur në të kaluarën nga ndërmarrja shoqërore. Bordi dhe menaxhmenti i Agjencisë, pasi që i dëgjuan kërkesat e punëtorëve i sqaruan ata se Bordi me përbërjen e re do ta trajtoj me prioritet këtë çështje të shlyerjes së pagave të papaguara të trashëguara nga e shkuara, ndërsa i informoi ata se kërkesat e tyre do të trajtohen sipas Ligjit gjatë procesit të likuidimit të ndërmarrjeve shoqërore “KHT Kosova” dhe “Trasing”.
Bordi konfirmoi zotimin se shlyerja e obligimeve ndaj punëtorëve për këtë rast dhe për raste të tjera do të jetë prioritet në axhendën e punës gjatë ushtrimit të mandatit ligjor dhe për këtë është e nevojshme informimi nga Dhoma e Posaçme e Gjykatës Supreme për numrin e ankesave të parashtruara për secilën ndërmarrje në likuidim, ndërsa punëtorët dhe opinioni i gjerë do të njoftohet me kohë për çdo vendim që do të merr Bordi në lidhje me pagesat e punëtorëve.
Agjencia Kosovare e Privatizimit (AKP) nisi vitin 2016 me Bordin e Drejtorëve, të ri, të munguar në 2015-tën. Për Agjencinë Kosovare të Privatizimit emërimi i Bordit të Drejtorëve të saj në fundin e seancës përmbyllëse të sesionit vjeshtor të Kuvendit të Kosovës dhe konstituimi i këtij Bordi në ditën e fundit të vitit 2015 është një ngjarje e rëndësishme dhe e pritur gjatë.
“Gjatë vitit 2015 Agjencia Kosovare e Privatizimit nuk ka realizuar asnjë shitje të aseteve të ndërmarrjeve shoqërore për shkak të mungesës së Bordit të Drejtorëve”, ka theksuar në konferencën vjetore për shtyp Avni Jashari, ushtruesi i detyrës së zëvendësdrejtorit menaxhues të kësaj Agjencie, e cila në mungesë Bordi kishte mbetur pa drejtor menaxhues.
Bordi i Drejtorëve të Agjencisë Kosovare të Privatizimit, në 31 dhjetor, pak orë para ardhjes së Vitit të Ri 2016, ka mbajtur mbledhjen e parë, konstituive, të udhëhequr nga Petrit Gashi, Kryesues i Bordit, ku u diskutua për një varg çështjesh të përcaktuara me axhendë bazuar në mandatin ligjor të Agjencisë.
Për vitin 2016, menaxhmenti i Agjencisë Kosovare të Privatizimit ka përcaktuar 20 objektiva kryesore të punës, të cilat ka paralajmëruar se do të bëhen të ditura pas miratimit nga Bordi i Drejtorëve.
Në kuadër të procesit të ligjshëm të privatizimit pritet e kërkohet edhe ridalja e gazetës së përditëshme tradicionale të Kosovës Rilindja, e cila ka nisë të dalë në Prizren para 71 vitesh, në 12 shkurt 1945. Gazeta historike e Kosovës Rilindja, e cila ka filluar të dalë në frymën e Konferencës së Bujanit e me anagzhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur detyrimisht me dëbim të kundërligjshëm e të padrejtë nga Pallati i saj në Prishtinë nga administrata e UNMIK para 14 vitesh në 21 shkurt 2002. Pas kësaj date gazeta Rilindja ka dalë me numra protestues të jashtëzakonshëm, të kohëpaskohshëm.
Gazeta Rilindja, kronikë e zhvillimeve historike të Kosovës, pasi doli me botime speciale edhe për ngjarjen historike të shpalljes së pavarësisë në 17 shkurt 2008 dhe për njohjet ndërkombëtare që pasuan, ka përmbyllë daljet e mëse 40 numrave protestues në 30 dhjetor 2008, me numrin e festës së Vitit të Ri 2009, me paralajmërimin në ballinë: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”.