Ekonomi – Page 173 – Dielli

NJOFTIM I FAMILJES MESHAJ-HAP TË PAME ME 28 JANAR

January 15, 2018 by dgreca

Redaksia e Gazetës “DIELLI” ka marrë këtë njoftim nga familja Meshaj:

Njoftojmë familjarët, miqte dhe dashamirët se me datën 28 Janar 2018 hapim të pamen për nënën tonë Nurije Meshaj, e cila ndërroi jetë me 8 Janar 2018, dhe u varros me 12 Janar.

Familja njofton se e Pamja do të organizohet në Royal Regency, që ndodhet në adresën:

165 Tuckahoe Rd

Yonkers, NY 10710
Orari për të përcjellë ngushllimet është nga ora 10:00 deri ne ora 16:00.
Me respekt djemet : Bajrami, Agimi, Bekimi, Ajdini , Ajeti dhe vajza Aferdita.

ASNJË SHTET NUK NDËRTON VARREZA MEMORIALE PËR USHTRITË PUSHTUESE

December 23, 2017 by dgreca

– KOMENT I GAZETËS DIELLI”, ORGAN I FEDERATËS PANSHQIPTARE TË AMERIKËS”VATRA”/

– Ngritja e varrezave greke në Shqipëri cënon sovranitetin dhe dinjitetin e Shqipërisë dhe nxit më tej nacional-shovinizmin e verbër të qarqeve antishqiptare./

Diplomacia e Qeverisë “Rama 2″ duket se ka kapitulluar pa kushte. Ministri ynë i Jashtëm, duke përcjellë direktivat e pakonsultuara të Kryeministrit,që vetë vendos e vetë vulos(madje pa u konsultuar as me Presidentin e Republikës) ka cënuar interesat kombëtare të shqiptarëve duke lëkundur nga themelet marrdhëniet me partnerët strategjik, veçanërisht me Shtetet e Bashkuara të Amerikës. Vota”kundër” në OKB ishte qartësisht një Akt Antikombëtar, siç e konsideron deklara e Kryetarit të Federatës Panshqiptare të Amerikës VATRA, z. Dritan Mishto.

Ky akt foshnjor në Diplomaci, u parapri nga një tjetër akt antikombëtar siç është Vendimi i Qeverisë “Rama 2” i 13 Dhjetorit për ndërtimin e varrezave greke në Shqipëri. Qeveria shqiptare ka deklaruar se bisedimet e fundit greko-shqiptare kanë dhënë shenja pozitive për heqjen e Ligjit të Luftës, por duket se çmimi do të jetë tepër i kripur. Qëndrimi servil i qeverisë shqiptare me lëshimet që po bën për ndërtimin e varrezave greke në Jugun e vendit do të jetë me pasoja të pariparushme. Diplomacia shqiptare duhej të kishte këmbëngula fort se Ligji i luftës është një mbetje historike e njëanshme pasi Shqipëria kurrë nuk i ka shpallë Luftë Greqisë. Nga ana tjetër ushtarët grek që ranë në tokën shqiptare hynë për ta pushtuar Jugun e Shqipërisë. A mund të nderohen pushtuesit me varreza monumentale apo mauzole?

Qeveria e Kryeministrit Rama duhet të shohë edhe pasojat e vendimit të saj antikombëtar. Mirë është që të dëgjojë dhe historianët e krahut të vet, që këmbëngulin se ndërtimi i varrezave do të ligjërojë njohjen e të ashtuquajturit Vorio Epir.

Federata Panshqiptare e Amerikës përherë ka qenë e ndjeshme ndaj akteve të tilla që cënojnë sigurinë kombëtare dhe hapin plagë të vjetra siç janë ato të pretendimeve njëshekullore greke për Vorio-Epirin. Qëllimi strategjik i fqinjit tonë Jugor është që ta bëjë fakt të kryer atë që ajo e cilëson Vorio-Epir dhe të faktojë pretendimet e qarqeve antishqiptare, duke plotësuar me varreza kufirin e shtetit të pretenduar, një fantazmë që mbanë ngritur rrethe antishqiptare në Greqi e brenda Shqipërisë.

Vendimi i Qeverisë që tashëm është bërë publik(Dielli e ka këtë vendim) duket se ka shumë pika të errta dhe mbjell pasiguri Kombëtare. Vendimi nuk zbardh vendgërmimet për të gjetë eshtrat e ushtarëve grekë të rënë gjatë luftës Italo-greke, gjë që mund të çojë të përsëriten ngjarjet e turpshme të Kosinës në Përmet, ku prifti bënte pazare me eshtrat e të vdekurëve dhe në varrezën gjoja të ushtareve grekë u gjetën eshtra fëmijësh dhe pleqësh shqiptar, pa përmendur eshtrat e kafshëve.

Qeveria lipset të jetë trasparente dhe të tregojë publikisht se ku do të bëhen gërmimet , ku do të ndërtohen varrezat e reja dhe sa do të jetë numri i tyre?!

Qeveria Rama në Vendimin e publikuar u drejtohet edhe vendimeve të qeverivë paraardhëse, duke iu referuar Qeverisë Berisha në vitet 2010, 2011 dhe në 2012-tën. Në Vendim shkruhet se ky Vendim i tanishëm mbështetet në neni 100 të Kushtetutës dhe u referohet neneve 4-5, të marrëveshjes së bashkëpunimit ndërmjet Këshillit të Ministrave të Republikës së Shqipërisë dhe qeverisë së Republikës së Greqisë, për kërkimin, zhvarrimin, identifikimin dhe varrimin e ushtarakëve grekë, të rënë në Shqipëri gjatë luftës greko-italiane të viteve 1940-1941, dhe për ndërtimin e vendprehjes për ta, brenda territorit të Republikës së Shqipërisë, ratifikuar me ligjin nr, 10256, datë 25.3. 2010. Në vendim janë përcaktuar detyrimet e Ministrive përkatëse si e mbrojtjes, Infrastrukturës dhe energjisë,detyrimet e pushtetit vendor, por nuk përcaktohen saktësisht vendgërmimet dhe vendvarrimet.

Vendimi i qeverisë dikton Shqipërisë që çdo vit të organizojë me 28 tetor ceremonitë zyrtare për të nderuar ushtarakët grekë!

Federata VATRA i ka kundërshtuar në vijëmësi vendimet e qeveritarëve shqiptarë, qofshin të majtë a të djathtë duke këmbëngulur se pas strategjisë greke fshihen qëllime të qarqeve antishqiptare që kanë pretendime ndaj të ashtuquajturit Vorio-Epir. Është i njohur qëndrimi mospajtues i Vatrës edhe gjatë kohës kur në pushtet ishin demokratët. Në atë kohë ish kryetari i Federatës Panshqiptare VATRA, dr. Gjon Buçaj, pat shkruar një Letër publike ish presidentit Bamir Topi, ku i kërkonte publikisht që të mos e dekretonte Ligjin e miratuar nga Kuvendi i Shqipërisë me 25 mars 2010 , për ngritjen në territorin e Shqipërisë të varrezave për ushtarët grekë të vrarë gjatë Luftës Italo-Greke në periudhën e viteve 1940-1941.

Ish Kryetari i Vatrës, shkruante në letrën drejtuar presidentit se vatranët, si të gjithë shqiptarët kudo në botë, të cilët e duan kombin e atdheun, janë thellësish të shqetsuar nga ky veprim i kryer në ditën kur, gjatë paradës në Athinë duke kremtuar pavarësinë e Greqisë, njësi ushtarake greke thërrisnin se do të pinin gjakun e shqiptarëve. Ky nuk është një episod i izoluar, por nji akt i rëndë provokues, i përsëritur disa herë, edhe në 2007-ën. Qeveria dhe shteti grek nuk kanë bërë asgjë për të parandaluar përsëritjen e dukurive të tilla armiqsore kundër Shqipërisë e shqiptarëve.

VATRA mbështet marrëdhënje të vërteta miqësie midis Shqipërisë dhe Greqisë. Ne besojmë se dy vendet dhe popujt tanë kanë shumë vlera të përbashkëta që shkojnë deri në lashtësi. Por miqësia e vërtetë vendoset në barazi, dinjitet dhe interes të ndërsjelltë. Asnjëherë dinjiteti shtetëror dhe kombëtar nuk mund t’i bëhet dhuratë një vendi të huaj, sado mik që të jetë ai.

Asnjë shtet sovran nuk i ngre përmendore apo varreza një ushtrie të huaj pushtuese. Është fakt historik se Shqipëria e pushtuar nga Italia fashiste kishte humbur pavarësinë dhe personalitetin juridik si subjekt i së drejtës ndërkombëtare. Pavarësisht nga kjo, edhe pse dy vendet tona janë tashmë anëtarë të NATO-s, Parlamenti Grek mban në fuqi Ligjin e Gjendjes së Luftës me Shqipërinë, duke u shkaktuar dëme të mëdha pasurore shtetasve shqiptarë me interesa ekonomike në Greqi.

……….Është e vërtetë se në vitin 1940-1941 trupat greke mbrojtën me heroizën vendin e tyre nga fashistët italianë. Mirëpo ato u kthyen vetë në trupa pushtuese kur hynë në trojet shqiptare, përfshirë Korçën, Gjirokastrën, Himarën, Sarandën etj. Qeveria greke vendosi një regjim të vërtetë pushtimi në Shqipërinë e jugut, duke mos lejuar ngritjen e flamurit shqiptar, duke futur në qarkullim monedhën greke e duke ndërmarrë veprime të tjera aneksuese. Madje, qeveria greke refuzoi edhe thirrjet e Mbretit Zog dhe të patriotëve shqiptarë për krijimin e forcave të përbashkëta ushtarake që do të ndërmerrnin çlirimin e plotë të Shqipërisë nga Italia fashiste dhe rikëthimin e qeverisë së ligjshme shqiptare në vend.Shembulli më i qartë i synimeve aneksioniste të Athinës ishte vendimi i shtatmadhorisë greke për të mos tërhequr trupat pushtuese nga Shqipëria e jugut, megjithë kërcënimin që i vinte vendit të tyre nga ndërhyrja gjermane në Maqedoni. Për më tepër, edhe para kapitullimit ndaj gjermanëve, gjeneralët grekë u përpoqën të hyjnë në pazarllëk me nazistët që Shqipëria e Jugut t’i mbetej Greqisë.

Praktika ndërkombëtare tregon se për raste të tilla do të mjaftonte një monument i thjeshtë dhe jo ndërtimi i varrezave masive në tokën shqiptare. Eshtrat e ushtarëve grekë le të varrosen me nderime në Peloponez apo Atikë, por kurrsesi në tokën tonë. Ngritja e varrezave për ta në Shqipëri cënon sovranitetin dhe dinjitetin e Shqipërisë dhe nxit më tej nacional-shovinizmin e verbër greko-madh.

SHBA – KOSOVËS, GRANT MBI 30 MILIONË DOLLARËSH

December 20, 2017 by dgreca

-Presidenti Thaçi dhe ambasadori Delawie nënshkruan sot amandamentimin e marrëveshjes 30 milionë dollarëshe ndërmjet Kosovës dhe SHBA-së: Partneriteti për zhvillim ndërmjet Shteteve të Bashkuara të Amerikës dhe Republikës së Kosovës është i fuqishëm/PRISHTINË, 19 Dhjetor 2017-Gazeta DIELLI/ Presidenti i Republikës së Kosovës, Hashim Thaçi, bashkë me ambasadorin e SHBA-së në Kosovë, Greg Delawie, dhe shefin e USAID-it në Kosovë, James Hope, nënshkruan sot amandamentimin e Marrëveshjes mbi Grantin e Objektivave Zhvillimore ndërmjet Kosovës dhe SHBA-së.

Presidenti Thaçi shprehu falënderimin e tij për këtë grant rreth 30 milionë dollarë në mbështetje në fushën e sundimit të ligjit, qeverisjes së mirë, nxitjen e investimeve në sektorin privat dhe ngritjen e kapaciteteve njerëzore.

“Marrëveshja e sotme në mes të Republikës së Kosovës dhe Shteteve të Bashkuara të Amerikës është edhe një hap përpara i mbështetjes së fuqishme që Shtetet e Bashkuara të Amerikës i kanë dhënë konsolidimit të shtetit të Kosovës në rrafshin e sundimit të ligjit, zhvillimit ekonomik dhe progresit të gjithanshëm, për çka edhe u jemi mirënjohës, i nderuari ambasador, juve dhe Shteteve të Bashkuara të Amerikës”, theksoi presidenti Thaçi.

Ai tha më tej se këto ditë të fundit të këtij viti janë shumë pozitive për Kosovën, para së gjithash kur nesër do të nënshkruhet edhe marrëveshja tjetër në sektorin energjetik për Kosovën e Re- një investim prej 1 miliardë e 300 milionë eurosh që do ta bëjnë investitorët amerikanë.

“Ky është mesazhi më i mirë që mund të burojë nga Kosova në prag të dhjetëvjetorit të pavarësisë, por edhe të mesazhit për atmosferën e mirë të investimeve në Republikën e Kosovës për investitorët e huaj” shtoi i pari i vendit.

Kurse, ambasadori i Shteteve të Bashkuara në Kosovë, Delawie, tha se ceremonia e sotshme e nënshkrimit të këtij granti bën pikërisht këtë zotim: punën e përbashkët në 2018-tën.

“Kjo marrëveshje për grante shton edhe mbi 30 milionë dollarë për aktivitetet e USAID-it që do t’i trajtojnë sfidat kryesore të zhvillimit të Kosovës: avancimin e sundimit të ligjit dhe qeverisjen e mirë, rritjen e ekonomisë së larmishme që krijon investime dhe vende pune, si dhe fuqizimin e kosovarëve të rinj me zotësi akademike dhe profesionale për të qenë gjenerata e ardhshme e prijësve të Kosovës” theksoi ambasadori Delawie.

Ai tha se partneriteti për zhvillim ndërmjet Shteteve të Bashkuara të Amerikës dhe Republikës së Kosovës është i fuqishëm.

“Ai reflekton pothuajse dy dekada të punës së përbashkët për jetë më të mirë dhe të ardhme më të ndritur për qytetarët e Kosovës. SHBA-ja mbetet e përkushtuar në zotimet e saj dhe presim vazhdimin e partneritetit tonë të vazhdueshëm”, pohoi ambasadori Delawie.

Presidenti i Kosovës, Hashim Thaçi, falënderoi ambasadorin amerikan, Delawie, dhe shefin e USAID, Hope, për mbështetjen që i kanë dhënë vazhdimisht Kosovës./b.j/

FJALA E AMBASADORIT TË SHBA-SË NË KOSOVË, GREG DELAWIE:PARTNERITETI PËR ZHVILLIM NDËRMJET SHTETEVE TË BASHKUARA TË AMERIKËS DHE REPUBLIKËS SË KOSOVËS ËSHTË I FUQISHËM:

Dhjetori është gjithmonë koha e duhur për të shikuar prapa dhe për të vlerësuar vitin që po e lëmë pas, e ky vit ka shënuar të arritura të rëndësishme.

Kosova ka mbajtur zgjedhje të qeta dhe pati kalimin te qeveria e re; pastaj kemi qenë dëshmitarë se Kosova është vlerësuar ndër dhjetë shtetet më reformuese në raportit e të bërit biznes nga Banka Botërore; kemi qenë dëshmitarë të integrimit të gjykatave të Kosovës; si dhe së shpejti edhe të shënimit të përmbylljes komerciale të investimet më të madh privat në Kosovë që do të mundësojë furnizim të sigurtë me energji elektrike. Këto janë rezultate mbresëlënëse. Por, duhet të vazhdojmë rrugën e reformave sepse duhet të punojmë ende për të siguruar ecjen përpara të Kosovës në rrugëtimin e saj drejt integrimit evroatlantik.

Ceremonia e sotshme e nënshkrimit të këtij granti bën pikërisht këtë zotim: punën e përbashkët në 2018-tën. Kjo marrëveshje për grante shton edhe mbi 30 milionë dollarë për aktivitetet e USAID-it që do t’i trajtojnë sfidat kryesore të zhvillimit të Kosovës: avancimin e sundimit të ligjit dhe qeverisjen e mirë, rritjen e ekonomisë së larmishme që krijon investime dhe vende pune, si dhe fuqizimin e kosovarëve të rinj me zotësi akademike dhe profesionale për të qenë generata e ardhshme e prijësve të Kosovës.

Partneriteti për zhvillim ndërmjet Shteteve të Bashkuara të Amerikës dhe Republikës së Kosovës është i fuqishëm. Ai reflekton pothuajse dy dekada të punës së përbashkët për jetë më të mirë dhe të ardhme më të ndritur për qytetarët e Kosovës. SHBA mbetet e përkushtuar në zotimet e saj dhe presim vazhdimin e partneritetit tonë të vazhdueshëm.

Ju faleminderit!

Ambassador Delawie’s Statement for the Signing of the USAID Development Grant Agreement

December is always a good time to look back and review the year we’re bidding farewell to, and this past one recorded significant achievements.

Kosovo went through peaceful elections and transition to a new government; witnessed Kosovo as a top ten reformer in the World Bank Doing Business report; integrated Kosovo’s courts; and soon, the commercial close of Kosovo’s largest ever private investment that will make reliable energy possible. These are all impressive results. But we must continue on the reform path, there is still more to be done to ensure Kosovo moves forward on its path to Euro-Atlantic integration.

Today’s signing ceremony commits us to just that: shared work to be done in 2018. This grant agreement adds over $30 million for USAID activities that are addressing Kosovo’s priority development challenges: advancing the rule of law and good governance, growing a diverse economy that creates investment and jobs, and empowering young Kosovars with the academic and professional skills to be the next generation of Kosovo’s leaders.

The Development partnership between the United States and Republic of Kosovo is strong. It reflects nearly two decades of working together to create a better life and a brighter future, for the citizens of Kosovo. The United States remains steadfast in its commitments and we look forward to our continued partnership.

Thank you!

Bukuritë natyrore të Kosovës prezantohen në Zvicër

December 19, 2017 by dgreca

-Kosova shënon me ekspozitë Vitin 2017, si Vit i shpallur Ndërkombëtar nga Kombet e Bashkuara për Zhvillimin e Qëndrueshëm të Turizmit/

MELIDE, 18 Dhjetor 2017-Gazeta DIELLI/ Në qendrën e Arteve, “Ibrahim Kodra”, në Melide të Zvicrës, është hapur ekspozita “Bukuritë Natyrore të Kosovës”, ekspozitë kjo që synon të forcojë dhe zgjerojë marrëdhëniet sociale dhe kulturore në mes Konfederatës Zvicerane dhe Republikës së Kosovës.

Organizimi i kësaj ngjarje u bë si rezultat i bashkëpunimit me Komunën e Melides, Ambasadën e Republikës së Kosovës në Bernë dhe Muzeun Kombëtarë të Republikës së Kosovës, ndërsa ky projekt iu dedikua vitit 2017, i cili është shpallur nga Asambleja e 70-të e Kombeve të Bashkuara si Vit Ndërkombëtar i Zhvillimit të Qëndrueshëm të Turizmit për Zhvillim. Ky aktivitet u hap nga Drejtoresha e Artit të Fondacionit, “Ibrahim Kodra”, Maria Pacolli, e cila edhe prezantoi nismën e Kombeve të Bashkuara, ndërsa me një video mesazh të pranishmëve iu adresua edhe Sekretari i Përgjithshëm i Organizatës së Kombeve të Bashkuara për Turizmin Botëror, Taleb Rifai.

Njoftimi i dërguar nga MPJ e Kosovës thekson se, turizmi sot është bërë një katalizator i rëndësishëm i transformimit pozitiv, që mund të kontribuojë në një zhvillim të qëndrueshëm në ekonomi, shoqërim, ambient dhe fusha të tjera.

Ai, gjithashtu, mund të forcojë paqen, duke mbështetur mirëkuptimin në mes popujve, rritjen e vetëdijes së trashëgimisë së pasur në mes kulturave të ndryshme dhe duke ftuar gjithsecilin që të vlerësojë vlerat e tij.

Në këtë ekspozitë ka marrë pjesë edhe Ambasadorja e Republikës së Kosovës në Bern, Nazane Breca, e cila ka theksuar se “kultura bën një kontribut të madh, që Kosova të njihet më shumë dhe që të zbulohen thesaret e saj”.

Ekspozita “Bukuritë Natyrore të Kosovës” në Qendrën e Arteve në Fondacionin “Ibrahim Kodra” ka prezantuar fotografitë e realizuara nga fotografët ndërkombëtarë dhe pjesëmarrësit në garën e fotografisë më të mirë për promovimin e Kosovës për vitin 2017, e cila ishte organizuar pak kohë më parë nga Ministria e Punëve të Jashtme e Kosovës.

Autorët e fotografive të ekspozuara në këtë ekspozitë janë si më poshtë: Aleksandra Hiltmann, Arben Islami, Erza Rudi, Jeta Abazi Gashi, Maria Pacolli, Marieke Lebet-Booij, Shkelzen Rexha, Yllka Fetahaj, Agon Nimani, Arian Mavriqi, Armend Nimani, Bleron Caka, Dea Lajqi, Sehida Miftari.

Në ekspozitë janë shfaqur edhe punime tjera artistike, duke përfshirë artistin kosovar, Sylë Mujaj. Pas përfundimit të ekspozitës është shërbyer edhe ushqim tradicional nga Kosova. Ekspozita do të mbetet e hapur deri në 14 Janar 2017. /b.j/

“KOSOVA E RE”, HAP I MADH ENERGJETIK

December 14, 2017 by dgreca

-Ambasada e Shteteve të Bashkuara të Amerikës në Prishtinë: Kosova, një hap shumë të madh drejt sigurisë energjetike/

–U.S. Embassy Statement on the agreement between Kosovo Government and Contour Global/
-Qeveria e Shteteve të Bashkuara ka punuar me Kosovën që nga viti 2003 që t’ia sigurojë asaj të ardhmen energjetike/

-Deklaratë e ambasadës së SHBA-ve për marrëveshjen mes Qeverisë së Kosovës dhe Contour Global/-U.S. Embassy Statement on the agreement between Kosovo Government and Contour Global/-Ndërtohet Termocentrali “Kosova e Re”. Marrëveshja për ndërtimin u arrit Në mbledhjen e Komitetit Drejtues, në prani të përfaqësuesit e Kompanisë amerikane Contour Global/

-Republika e Kosovës, në cilësinë e kryesueses, është mikpritëse e takimit XV të Këshillit Ministror të Komunitetit të Energjisë, ngjarjes më të rëndësishme rajonale të sektorit të energjisë, që nisi pasditën e sotme në Prishtinë/

Gazeta DIELLI nga korrespondenti në Kosovë Behlul JASHARI

PRISHTINË, 14 Dhjetor 2017/ Ambasada e SHBA-ve në Prishtinë deklaroi sot se mirëpresin marrëveshjen e djeshme mes Qeverisë së Kosovës dhe Contour Global, e cila paraqet një hap shumë të madh drejt sigurisë energjetike në Kosovë. “Pasiguria energjetike është një nga pengesat më të mëdha të Kosovës për zhvillimin e saj ekonomik. USAID-i ka porositur studime që kanë përllogaritur se humbjet ekonomike të Kosovës shkojnë në 300 milionë euro në vit për shkak të furnizimit të pasigurtë me energji elektrike”, thekson deklarata e dërguar. Qeveria e Shteteve të Bashkuara, shtohet me tej, ka punuar me Kosovën që nga viti 2003 që t’ia sigurojë asaj të ardhmen energjetike, dhe ka përkrahur përsëritje të ndryshme të këtij projekti që nga viti 2006.

“Projekti ‘Kosova e Re’ do të përmbushë standarde të rrepta evropiane për efektshmëri dhe emisione, dhe do të jetë në përputhshmëri me studimet e Bankës Botërore që tregojnë se thëngjilli është opsioni më i përballueshëm për Kosovën”, vlerëson ambasada e SHBA.

“Kosova e Re”, vijon deklarata, poashtu do të mundësojë që më shumë burime të energjisë së ripërtëritshme të integrohen në sektorin e energjisë në kuadër të përkushtimit të Kosovës për përdorim të 25% të energjisë së ripërtëritshme deri në vitin 2020, dhe për mbylljen përfundimtare të termocentralit “Kosova A”, dhe me këtë zvogëlimin e mëtutjeshëm të emisionit të karbonit në Kosovë.

“Kur të përfundohet, ‘Kosova e Re’ do të jetë investimi më i madh i huaj privat në historinë e Kosovës, përfundon deklarata e ambasadës së SHBA-ve për marrëveshjen mes Qeverisë së Kosovës dhe Contour Global.Kryeministri i Republikës së Kosovës, Ramush Haradinaj, mbajti dje mbledhjen e Komitetit Drejtues për Termocentralin “Kosova e Re”.Në këtë takim ku ishin të pranishëm edhe përfaqësuesit e Kompanisë amerikane “Contour Global”, u arrit marrëveshja për ndërtimin e Termocentralit “Kosova e Re”.

Marrëveshja komerciale pritet që të nënshkruhet ditët e ardhshme dhe me të në Kosovë do të investohen mbi 1 miliard euro, gjë që paraqet investimin më të madh në historinë e re të Kosovës.
Pas finalizimit, ky projekt do të sigurojë pavarësinë energjetike për shtetin dhe popullin e Kosovës.Termocentrali do të ndërtohet me një bllok të vetëm superkritik, me efiçiencë minimum 40% dhe kapacitet elektrik bruto prej 500 MW.
Me komponentën e koogjenerimit për ngrohjen qendrore, do të ketë kapacitete shumë më të mëdha për zgjerimin e rrjetit të ngrohjes për qytetin e Prishtinës, Obiliqit, Drenasit dhe Fushë Kosovës,

Arritja e marrëveshjes është rezultat i punës shumëvjeçare të qeverive të Kosovës, i shumë njerëzve, shumë ekspertëve, që në kushte të vështira arritën që t’i sigurojnë vendit të ardhme të sigurt energjetike dhe njëkohësisht kontratë që garanton arritjen e maksimumit për institucionet dhe popullin e Kosovës.
Termocentrali i ri do të fillojë të ndërtohet në vitin 2018 dhe do të jetë funksional që nga viti 2023, do të jetë i ndërtuar me fjalën e fundit të teknologjisë dhe në këtë mënyrë do të reflektojë në uljen e emetimit të gazrave, respektivisht në ruajtjen e mjedisit.Ndërtimi i Termocentralit “Kosova e Re” është ngjarje historike për popullin e Kosovës sepse energjia është kushti i pashmangshëm për të ardhmen prosperuese ekonomike, politike dhe sociale.

KOSOVA, MIKPRITËSE E TAKIMIT TË KËSHILLIT MINISTROR TË KOMUNITETIT TË ENERGJISË

Sot, kryeministri i Republikës së Kosovës, Ramush Haradinaj, mori pjesë në takimin e 15-të të Këshillit Ministror të Komunitetit të Energjisë, në të cilin theksoi përkushtimin e qeverisë në hartimin e politikave për integrim në tregun rajonal të energjisë elektrike.Me këtë rast kryeministri tha se janë të angazhuar maksimalisht në përafrim të legjislacionit me direktivat e BE-së dhe për zbatimin në praktikë, duke kërkuar për këtë edhe mbështetjen e Komisionit Evropian.Kryeministri Haradinaj në këtë takim njoftoi të pranishmit edhe për arritjen e Marrëveshjes për ndërtimin e Termocentralit “Kosova e Re”, për të cilin tha se vlera e këtij investimi është 1 miliard e 300 milionë euro, dhe me këtë do të sigurohet një situatë e qëndrueshme energjetike në Kosovë dhe avancim në krijimin e një energjie të pastër, sepse teknologjia e tanishme që përdoret është e vjetër dhe nuk është miqësore me ambientin.

Republika e Kosovës, në cilësinë e kryesueses, është mikpritëse e takimit XV të Këshillit Ministror të Komunitetit të Energjisë, ngjarjes më të rëndësishme rajonale të sektorit të energjisë, që nisi pasditën e sotme në Prishtinë. Takimi i Këshillit kryesohet nga ministri i Zhvillimit Ekonomik, Valdrin Lluka dhe përfaqësuesi i Komisionin Evropian, Christofer Jones.

Këshilli i 15-të Ministror i Komunitetit të Energjisë mbledh ministrat përgjegjës për energji të nëntë Palëve Kontraktuese të Traktatit të Komunitetit të Energjisë: Shqipërisë, Bosnjë e Hercegovinës, Gjeorgjisë, Kosovës, Maqedonisë, Moldavisë, Malit të Zi, Serbisë dhe Ukrainës, si dhe Bashkimit Evropian.Takimi i Këshillit Ministror të Komunitetit të Energjisë në këtë sesion ka në fokus zhvillimet e përgjithshme të politikave të energjisë, legjislacionin e ri evropian për energjinë, raportin vjetor për aktivitetet e tij dhe buxhetin për vitin 2018-2019. Në fund të takimit Këshilli do të dalë me konkluza. Me këtë rast, Kosova do të dorëzojë kryesimin te kryesuesja e radhës – Maqedonia. Komuniteti i Energjisë është një organizatë ndërkombëtare që bashkon vendet nënshkruese te traktatit te komunitetit te energjisë dhe Komisionin Evropian me qëllim ndihmën në procesin e reformave në energji konform legjislacionit evropian dhe mbështetjen e procesit me synim të krijimit të një tregu të përbashkët rajonal për energjinë, si dhe integrimin e tij në tregun pan-evropian të energjisë.

14 December 2017

U.S. Embassy Statement on the agreement between Kosovo Government and Contour Global

We welcome yesterday’s agreement between the Government of Kosovo and Contour Global, which represents a huge step towards energy security in Kosovo. Energy insecurity is one of Kosovo’s greatest barriers to economic development. USAID has commissioned studies that put Kosovo’s economic losses at €300 million per year because of unreliable electricity supply.

The United States Government has been working with Kosovo to secure its energy future since 2003 and has supported the various iterations of this project since 2006. The Kosova e Re project will meet stringent European standards for efficiency and emissions and will be in line with World Bank studies showing coal to be the most affordable option for Kosovo. Kosova e Re will also allow for more renewable energy sources to be integrated into the energy sector as part of Kosovo’s commitments to use 25% renewable energy by 2020, and for the eventual closing of Kosovo A, further reducing pollution and carbon emissions in Kosovo. Upon completion, Kosova e Re will be the largest private foreign investment in Kosovo’s history.