PRESIDENTI NISHANI, TAKIM LAMTUMIRE

June 12, 2017 by dgreca

Presidenti Nishani në takimin përshëndetës me Trupin Diplomatik: Në qendër të vëmendjes sime ka qenë promovimi i marrëdhënieve të mira, miqësore e fqinjësore, si dhe demonstrimi i angazhimit të Shqipërisë si vend partner e i besueshëm.

Tirane, 12 qershor 2017/

Presidenti i Republikës, Sh. T. Z. Bujar Nishani së bashku me Zonjën e Parë, Odeta Nishani, dhanë një pritje për Trupin Diplomatik duke zhvilluar një takim përshëndetës, ku ishin të pranishëm Ambasadorët e vendeve mike dhe aleate dhe përfaqësues të organizatave ndërkombëtare të akredituar në Tiranë, Konsujt e Nderit si dhe ish-Ambasadorë të Shqipërisë ndër vite.

Duke iu drejtuar të pranishmëve, Kreu i Shtetit në fjalën e Tij përshëndetëse, pasi shprehu falënderimet për bashkëpunimin gjatë gjithë këtyre viteve, theksoi se: “Gjatë mandatit tim presidencial u kam kushtuar një vëmendje shumë të veçantë marrëdhënieve të Shqipërisë me vendet fqinje, të rajonit të Evropës Juglindore, por edhe atyre me organizatat evropiane dhe ndërkombëtare, në funksion të politikës së jashtme të fqinjësisë së mirë dhe të orientimit evropian dhe euroatlantik të vendit.”

Presidenti Nishani nënvizoi gjithashtu se: “Në përmbushje të njërës prej tri përgjegjësive të mia si President i Vendit, në të gjitha takimet apo vizitat e mia me homologë dhe autoritete të tjera të huaja, në qendër të vëmendjes ka qenë promovimi i marrëdhënieve të mira, miqësore e fqinjësore, si dhe demonstrimi i angazhimit të Shqipërisë si vend partner e i besueshëm në përballimin e sfidave e kërcënimeve, me të cilat po përballet bota e shoqëria njerëzore sot.”

Presidenti Nishani vuri në dukje gjithashtu se: “Sigurisht, që jo gjithçka ka shkuar ashtu siç do të dëshiroja dhe siç do ta kërkonte dhe meritonte interesi më i mirë i përfaqësimit të vendit e shqiptarëve jashtë. Me gjithë vullnetin e dëshirën time, Shqipëria ka mbetur fatkeqësisht peng i interesave meskine deri diku dhe ende e pa përfaqësuar në nivel Ambasadori në Selinë e Shenjtë në Vatikan, OSBE dhe në Këshillin e Evropës, tri seli shumë të rëndësishme për Shqipërinë. I kam siguruar drejtuesit dhe përfaqësuesit e këtyre selive se mungesa e përfaqësimit nuk lidhet aspak me një qëndrim politik të Shqipërisë ndaj tyre, por thjesht me aspekte të brendshme institucionale shqiptare. Shpresoj dhe besoj se kjo çështje do të trajtohet seriozisht nga Qeveria e re shqiptare që do të dalë nga zgjedhjet e 25 qershorit dhe pasardhësi im në detyrën e Presidentit të Republikës.”

Në vijim fjala e plotë e Presidentit të Republikës, Sh. T. Z. Bujar Nishani në pritjen e lamtumirës me Trupin Diplomatik:

“I nderuar Dekan i Trupit Diplomatik, Zoti Ambasador Zarić,
Shkëlqesi Ambasadorë, zonja të Ambasadorëve, zotërinj të Ambasadoreve,
Të nderuar Konsuj Nderi të vendeve mike dhe aleate,
Të nderuar ish-Ambasadorë të Republikës së Shqipërisë ndër vite,
Zonja dhe zotërinj të pranishëm!

Së pari dëshiroj për pranimin e ftesës dhe praninë tuaj sonte në këtë takim përshëndetës! Ju siguroj se sonte nuk kam ndërmend që të bëj një analizë apo bilanc të bashkëpunimit diplomatik të Shqipërisë me vendet, popujt dhe organizatat që ju përfaqësoni, pasi këtë analizë dhe bashkëbisedim e kemi bërë shumë herë në raste të tjera. Por dëshiroj të shfrytëzoj këtë mbrëmje dhe praninë tuaj për të shprehur kënaqësinë dhe t’ju falënderoj, edhe stafet e Ambasadave dhe misioneve tuaja për bashkëpunimin e shkëlqyer që kam pasur gjatë këtyre viteve, si Kreu i Shtetit shqiptar me përfaqësuesit e vendeve mike dhe partnere.

Me disa prej jush kam pasur rastin e kënaqësinë që të njihem e bashkëpunoj që në ditët e para të mandatit tim Presidencial. Me të tjerët diçka më pak. Por ajo që mendoj se është shumë e rëndësishme është ajo çka së bashku kemi arritur në këto vite për t’i zgjeruar e forcuar më tej marrëdhëniet tona ndërshtetërore apo me organizatat ku Shqipëria bën pjesë e ato që ju përfaqësoni. Së bashku jemi takuar shpesh në evente të ndryshme tradicionale, por edhe në shumë aktivitete të veçanta e tematike dypalëshe apo edhe ato ndërkombëtare të organizuara në Shqipëri. Sfidat dhe angazhimet gjatë këtyre viteve kanë qenë të shumta, si në kontekstin dypalësh, ashtu edhe në atë rajonal dhe ndërkombëtar. Për përballimin e tyre me sukses, unë dëshiroj të falënderoj gjithësecilin prej jush sonte për bashkëpunimin dhe koordinimin e shkëlqyer që më keni dhënë dhe keni ofruar.

Si Kreu i Shtetit shqiptar, kam pasur nderin dhe kënaqësinë që gjatë këtyre pesë viteve të pres letrat kredenciale të pothuajse të gjithëve Ambasadorëve të huaj që janë të pranishëm sonte në këtë pritje, me ndonjë përjashtim të rrallë, por njëkohësisht kam pasur kënaqësi edhe të vizitoj apo të mirëpres homologë e zyrtarë të lartë të vendeve e organizatave tuaja. Gjatë mandatit tim presidencial u kam kushtuar një vëmendje shumë të veçantë marrëdhënieve të Shqipërisë me vendet fqinje, të rajonit të Evropës Juglindore, por edhe atyre me organizatat evropiane dhe ndërkombëtare, në funksion të politikës së jashtme të fqinjësisë së mirë dhe të orientimit evropian dhe euroatlantik të vendit. Në përmbushje të njërës prej tri përgjegjësive të mia si President i Vendit, në të gjitha takimet apo vizitat e mia me homologë dhe autoritetet e tjera të huaja, në qendër të vëmendjes ka qenë promovimi i marrëdhënieve të mira, miqësore e fqinjësore, si dhe demonstrimi i angazhimit të Shqipërisë si vend partner e i besueshëm në përballimin e sfidave e kërcënimeve, me të cilat po përballet bota e shoqëria njerëzore sot.

Të nderuar të pranishëm,

Vizita ime e parë dhe e fundit shtetërore gjatë mandatit presidencial ka qenë në Kosovë, si dhe kam pasur kënaqësinë që edhe të mirëpres dy Presidentë të Kosovës në Tiranë gjatë kësaj periudhe. Kosovën e kam vizituar edhe në shumë raste të tjera, por përveç vizitave shtetërore, në mënyrë të veçantë kujtoj 5-vjetorin e Pavarësisë, si dhe ceremoninë e inaugurimit të Presidentit Hashim Thaçi.

E paharrueshme për mua si President, si për nga përmasat ashtu edhe nga mesazhet e dhëna, ishte mundësia për ta mirëpritur në Shqipëri Papa Françeskun, në shtator 2014. Mesazhet e Atit të Shenjtë, krahas mesazheve apostolike, ishin një inkurajim i madh për shqiptarët. Por edhe vizita ime në Vatikan në kuadrin e shenjtërimit të Nënë Terezës, sot Shën Tereza e Kalkutës, do të mbetet e pashlyer në kujtesën time.

Në kuadrin e axhendës rajonale, me ftesë të homologëve të mi, gjatë kësaj periudhe kam zhvilluar vizita zyrtare, në Slloveni, Mal të Zi, Kroaci, Bosnje-Hercegovinë, Bullgari, ku edhe njëherë gjej rastin t’i falënderoj Kryetarët e këtyre shteteve për mikpritjen e ngrohtë që më rezervuan gjatë këtyre vizitave. Po ashtu kam patur kënaqësinë e veçantë të mikpres në Tiranë, Presidentët e Maqedonisë, Bullgarisë, Bosnje-Hercegovinës. Një vëmendje të veçantë u kam kushtuar vendeve të rajonit, ku jeton në minoritet popullsi shqiptare. Në bashkëpunim me autoritetet e larta të atyre vendeve, kam vizituar shqiptarët që jetojnë në Mal të Zi dhe në Serbi, duke përcjellë mesazhe bashkëjetese e bashkëpunimi, pavarësisht përkatësisë etnike. Me ndjenjë të lartë përgjegjësie dhe dëshirë për të evidentuar kontributin e Shqipërisë për një të ardhme më të mirë të rajonit, kam marrë pjesë aktivisht në të gjitha Samitet e Procesit të Brdo-Brijunit dhe të Procesit të Bashkëpunimit të Evropës Juglindore (SEECP), që janë zhvilluar gjatë kësaj periudhe, ku së bashku me liderë të tjerë të vendeve pjesëmarrëse kemi arritur që të përmirësojmë ndjeshëm frymën e mirëkuptimit e të bashkëpunimit mes vendeve të këtij rajoni, që vetëm pak vite më parë përjetonte konflikte të dhunshme ndëretnike.

Drejtimi i Samitit të Procesit të Bashkëpunimit të Evropës Juglindore në mbyllje të Kryesisë së Radhës së Shqipërisë, në maj 2015, ka qenë një eksperiencë shumë e veçantë. Në këtë Samit, i cili u ndoq nga shumë krerë shtetet e qeverish të vendeve pjesëmarrëse në këtë Proces, Shqipëria demonstroi angazhim dhe përkushtim për çështjet e paqes, sigurisë dhe zhvillimit të këtij rajoni.

Gjithashtu, vizita shumë të rëndësishme kam shkëmbyer me dy vendet fqinje anëtare të Bashkimit Evropian: Itali dhe Greqi si dhe në Turqi. Gjatë kësaj periudhë e kam vizituar dy herë zyrtarisht Italinë me ftesë të Presidentëve Napoletano dhe Mattarella dhe kam patur nderin t’i uroj mirëseardhjen në Tiranë Presidentit Napoletano. Kam pasur nderin gjithashtu të mirëpres në Tiranë Presidentin e Greqisë Karolos Papulias, si dhe të shkëmbej vizita zyrtare me Presidentin e Turqisë, Reccep Tayip Erdogan. Në Itali kam pasur kënaqësinë të vizitoj dhe komunitetin e vjetër arbëresh, që prej më shumë se 5 shekujsh ruan e promovon kulturën e traditat e të parëve të tyre shqiptarë. Sigurisht që një vëmendje e veçantë i është kushtuar bashkëpunimit me vende të ndryshme evropiane, me të cilat Shqipëria ka pasur një miqësi historike e tradicionale, por edhe për shkak të axhendës evropiane dhe reformave të thella që do ta afrojnë me Bashkimin Evropian. Kam pasur gjithashtu kënaqësinë e veçantë të mirëpres në Tiranë, Presidentët e Austrisë, të Hungarisë dhe të Maltës, Kapitenët Regjentë të San Marinos, si dhe Mjeshtrin e Madh të Urdhrit Sovran të Maltës, etj. Por në vizita të ndryshme pune apo evente të ndryshme ndërkombëtare, kam pasur kënaqësinë të shkëmbej mendime me Presidentët gjermanë Gauck e Steinmeier, si dhe me Presidentin e Francës, François Hollandë, mesazhet e të cilëve kanë qenë shumë inkurajuese për mua, Shqipërinë dhe shqiptarët, veçanërisht në kuadër të procesit të integrimit evropian. Një kujtim i veçantë dhe i paharruar do të mbetet ftesa dhe pjesëmarrja në 90-vjetorin e lindjes së Presidentit të Izraelit, Shimon Peres.

Kam pasur gjithashtu kënaqësinë që gjatë këtyre viteve të vizitoj institucionet më të rëndësishme evropiane, që janë të lidhura ngushtësisht dhe me ecurinë dhe progresin e Shqipërisë pas ndryshimeve demokratike. Kam vizituar dy herë Këshillin e Evropës, institucionin që u bë garancia e mbrojtjes së të drejtave e lirive të njeriut të shqiptarëve që u ishin mohuar, dhunuar e nëpërkëmbur për afro 5 dekada nga regjimi komunist. Po ashtu kam vizituar dy herë Selinë e NATO-s në Bruksel, të Aleancës më të madhe politiko-ushtarake të planetit në takime të rëndësishme me Sekretarin e Përgjithshëm të Aleancës. Deri 27 vite më parë Shqipëria ishte një vend ekstremisht i izoluar, ndërsa sot, anëtare e NATO-s dhe pjesë e hapësirës së saj të sigurisë. Dhe po ashtu kam vizituar dy herë institucionet evropiane, si Këshillin dhe Parlamentin Evropian, dhe jam takuar me drejtuesit e këtyre institucioneve, Presidentin Tusk, Presidentin e Parlamentit Shulc si dhe lidershipin e BE-së, si pjesë e agjendës evropiane të vendit dhe garancisë për standarde dhe zhvillim të qëndrueshëm të vendit. Takimet e shpeshta nuk kanë munguar as me Sekretarin e Përgjithshëm të OSBE-së dhe përfaqësues të tjerë të kësaj organizate.

Gjatë kësaj periudhe 5-vjeçare, një vëmendje të veçantë i kam kushtuar edhe bashkëpunimit me Vendet e Lindjes së Mesme dhe ato Arabe të Gjirit, vende që i kanë dhënë një ndihmesë të vyer e bujare Shqipërisë dhe shqiptarëve, për kapërcimin e vështirësive ekonomike veçanërisht pas rënies së regjimit diktatorial, por edhe për angazhimin në investime të ndryshme zhvillimore. Kam pasur nderin të shkëmbej vizita zyrtare në Tiranë dhe Aman me Madhërinë e Tij, Mbretin e Jordanisë, Abdullah II, si dhe të vizitoj Shtetin e Katarit me ftesë të Emirit të Katarit. Së fundmi, pata rastin që me ftesë të veçantë të Mbretit të Arabisë Saudite dhe Kujdestarit të dy Xhamive të Shenjta të vizitoj vendet e shenjta në Mekë dhe Medina. Sigurisht që kam pasur dhe raste të tjera që të vizitoj edhe Emiratet e Bashkuara Arabe e të takohem me personalitete e drejtuesit e këtij shteti.

Lidhur me axhendën ndërkombëtare, kam pasur nderin t’i adresohem tri herë në emër të Shqipërisë, Asamblesë së Përgjithshme të Kombeve të Bashkuara (67-të, 69-të dhe 71-të, respektivisht 2012, 2014 dhe 2016), si dhe të marr pjesë në tre Samite të organizuara me iniciativë të Sekretarit të Përgjithshëm të Kombeve të Bashkuara e shumë të rëndësishme për fatet e njerëzimit. Samiti i Parisit për Klimën, i Stambollit për krizën humanitare të refugjatëve dhe ai i Kankunit për Reduktimin e Rrezikut të Katastrofave, kanë nxitur më shumë solidaritetin dhe bashkëpunimin mes vendeve anëtare të Kombeve të Bashkuara për t’i përballuar këto sfida afatgjata.

Të nderuar Shkëlqesi Ambasadorë,

Sigurisht, që jo gjithçka ka shkuar ashtu siç do të dëshiroja dhe siç do ta kërkonte dhe meritonte interesi më i mirë i përfaqësimit të vendit dhe shqiptarëve jashtë. Me gjithë vullnetin e dëshirën time, Shqipëria ka mbetur fatkeqësisht peng i interesave meskine deri diku dhe ende e papërfaqësuar në nivel ambasadori në Selinë e Shenjtë në Vatikan, OSBE dhe në Këshillin e Evropës, tri seli shumë të rëndësishme për Shqipërinë. I kam siguruar drejtuesit dhe përfaqësuesit e këtyre selive se mungesa e përfaqësimit në rang ambasadori nuk lidhet aspak me një qëndrim politik të Shqipërisë ndaj tyre, por thjesht me aspekte të brendshme institucionale shqiptare. Shpresoj dhe besoj se kjo çështje do të trajtohet seriozisht nga Qeveria e re shqiptare që do të dalë nga zgjedhjet e 25 qershorit dhe pasardhësi im në detyrën e Presidentit të Republikës.

Zonja e Zotërinj!

Realizimi i shkëmbimit të vizitave të përmendura më lart, por jo vetëm, krahas bashkëpunimit shumëplanësh diplomatik të përfaqësive tuaja me Qeverinë shqiptare, nuk do të kishte qenë i mundur të realizohej suksesshëm pa një bashkëpunim intensiv e shumë efiçent me Ambasadorët e përfaqësuesit e këtyre vendeve, por edhe me Konsujt e Nderit të këtyre vendeve në Shqipëri.

Gjithashtu, një ndihmesë të veçantë kam pasur edhe nga konsultat shumë të mira e profesionale me një pjesë të mirë të ish-Ambasadorëve dhe diplomatëve shqiptarë, që kanë shërbyer prej vitesh denjësisht për Shqipërinë në vende e organizata të ndryshme ndërkombëtare, duke më ofruar ndihmën me ekspertizën e tyre.

Ndaj dhe përfitoj nga rasti që t’ju falënderoj e shpreh të gjithëve mirënjohjen për bashkëpunimin e shkëlqyer që kemi pasur e më keni ofruar gjatë këtyre viteve, si dhe njëkohësisht t’ju uroj gjithsecilit prej jush personalisht, familjeve tuaja, që ju ndjekin e mbështesin në misionet tuaja, që të keni çdo të mirë në jetë, në familje, në karrierën tuaj të suksesshme dhe në bashkëpunimin e mëtejshëm midis Shqipërisë me vendet dhe organizatat tuaja.

Ju faleminderit edhe njëherë! Kënaqësi e veçantë që pata në bashkëpunimin me ju dhe njëkohësisht ju falënderoj për praninë tuaj sonte!

DIELLI, REGJISTRI ME I HERSHEM I SHQIPTAREVE TE AMERIKES

May 30, 2017 by dgreca

NGA DALIP GRCA/EDITOR I DIELLIT/*

I nderuari Shkëlqesia Juaj, President i Republikës, z. Bujar Nishani/

Të Përndershëm klerikë/

Të nderuara diplomate të Shqipërisë dhe Kosovës/

Të dashur bashkatdhetarë/

Vatranë të nderuar/

Kam nderin që ta marr këtë Dekoratë të Lartë, në emër të gjithë Editorëve, që dhanë gjithçka për gazetën –Ikonë, më të vjetrën e Botës Shqiptare , që ende është në botim, falë kontributit të vatranëve, që ia kanë rritur jetëgjatësinë me kursimet e tyre. Dielli, ishte me fat sepse u udhëhoq nga pena të talentuara, shkrimtarë e gazetarë të njohur, (po perdor renditjen kohore)duke nisë me Fan S Noli, Faik Konica, Kristo Dako, Kostë Çekrezi, Kristo Floqi, Bahri Omari, Aqile Tasi, Refat Gurrazezi, Nelo Drizari, Qerim Panariti,(ndihmës Peter Prifti) Dr.Athanas Gegaj,(pak kohë punoi si ndihmës editor edhe poeti e shkrimtari Çam Bilal Xhaferri) Xhevat Kalljaxhiu, Dr.Eduard Liçaj, Prof. Arshi Pipa, Anton Çefa dhe prej 8 vitesh kam nderin që ta Editoj unë Gazetën-Ikonë, dhe të jap kontributin tim modest në rikthimin e Diellit, pas një pushimi prej 2 vitesh e gjysëm.

Tek mbushte Motin e parë të botimit, Editori i dytë i Diellit, Faik Bej Konitza, shkruante:”Me këtë numër, 22 Tetor 1910- DIELLI mbushi Motin e parë të Botimit. Kur bën një udhë të gjatë, udhëtari qëndron ndonjëherë, rri mbi gur dhe hedh sytë pas. Është një çlodhje, një kurajo për të shkuar përpara, kur sheh se sa eci dhe kur mendon se ku do të shkojë…” …

Natyrisht, Konica, nuk e mendoi se Dielli do ta kalonte një shekull Jetë!

Ndërsa Editori i parë i gazetës, ai që e pagëzoi Diellin,me emrin e bukur ndricues-,ai që hartoi programin Kombëtar, të botuar në numrin e parë, Fan S. Noli, që pati fatin ta shoh Diellin-burrë të rritur, tek festohej 50 vjetori i gazetës, Uronte:”Urojmë me gjithë zemër që DIELLI,gazetë e parë në Gjuhën Shqipe, që u botua e përditshme, të arrijë të festonjë dhe 100 vjeçarin.”

Dhe ja, Dielli e kaloi 100 vjeçarin, po mbyll dekadën e parë të shekullit të dytë të jetës së vet dhe vatranët nuk do ta lejonë që të shuhet ky qiri Kombëtar i ndezur në kohë errësire për Kombin.

Dielli i Vatrës mbetet regjistri më i vjetër dhe më jetëgjatë i Botës Shqiptare në Amerikë, që ka regjistruar jetën e shqiptarëve, që kur zbriti emigranti i parë e deri në ditët e sotme. Nuk mund të hartosh historinë e shqiptarëve të Amerikës pa u ndalë në Faqet e Diellit dhe pa patur si pikënisje Vatrën, që luajti për shumë kohë rolin e shtetit të vdekur shqiptar dhe mbrojti kufijtë e Shqipërisë.

Po ku qëndron Misteri i jetës shekullore, 105 Vite VATRA dhe 108 Vite –Dielli?

Kësaj pyetjeje janë përpjekë që t’i japin përgjigje analistë, studiues, gazetarë, historianë. Duket se konkluzionet e ish sekretarit të Vatrës në vitet 1957-59, dhe ndihëms Editor i Diellit Peter Prifti, janë më të pranuarat. Së pari, Shqiptari e sheh Vatrën jo si një shoqatë, por si një Institucion, si një Monument historik. Së dyti, edhe Vatra, edhe Dielli, lidhen me dy figura eminente të Historisë Kombëtare, Noli dhe Konica.

Së treti, Semantika kuptimore e VATRËS dhe DIELLIT, janë magjike. Emri i Federatës të sjell menjëherë në mendje imazhin e ngrohtë të Vatrës dhe oxhakut, që shpërndajnë ngrohtësi, por dhe Mikpritje, Bujari karakteristike shqiptare. Po edhe –DIELLI-, është një fjalë që na tërheq si me magnet, sepse”Diell” do të thotë Dritë,energji e pasosur,Jetë e Gjallëri. Vatra dhe Dielli janë emra të goditur, që i kanë tërhequr fort shqiptarët nga fillimi i Shekullit 20 e deri tash në shekullin e 21.

Mendoj se nuk ka kurrfarë misteri e enigmash në jetgjatësinë e Vatrës dhe Diellit. A e dini PSE?

Kush futet në Vatër, i jep besën, dhe nuk ndahet prej saj derisa të ketë frymë. Madje nuk i ndahet edhe kur janë të sëmurë, edhe kur janë në karrocë, sic është vatrani-simbol Jonuz Ndreu, që edhe pse në karrocë, ka udhëtuar 70 mile për të ardhur sonte këtu në darkë me Presidentin e Shqipërisë.

E dini kush e bën jetëgjatë Vatrën dhe Diellin e saj? Po ju tregoj një rast fare të freskët: një vatran që e ka në shpirt Vatrën, Mehmet Kadrijaj quhet, para tri ditësh me emocionoi, kur erdhi në Vatër dhe më tregoi: Kam punuar një muaj natën, dhe pagesën e parë dua t’ia jap Vatrës. Dhe nuk ishin pak, por 2 mijë dollarë, një punëtor i thjeshtë është Mehmet Kadrija, Jo biznesmen,por ja që jep me shpirt kursimet e veta! Po nuk është hera e parë: Mehmeti, kur dorëzoi Bibliotekën e vet në Vatër dhuroi edhe $2 mijë, kur nisi fushata për sistemimin e arkivit, dhuroi shumën 1 mijë dollarë. Nuk është i vetmi, ai, po kështu janë vatarnët.Ja pra kush e mbanë vatrën dhe Diellin gjallë! Fryma Vatrane, shpirti bujar Vatran!

…Edhe një herë falenderoj Presidentin e Republikës për Dekoratën e lartë, NDERI I KOMBIT, që i akordoi Gazetës”DIELLI”.

Falenderoj Vatrën, që ma besoi drejtimin e saj para 8 vitesh, Falenderoj vatranët që më japin mbështetje. Falenderoj bashkëpunëtorët e shumtë të Diellit, që ma lehtësojnë barrën.

Falenderoj familjen time, e cila me mbështetjen që më jep, është bërë pjesë e Gazetës dhe e Vatrës.

Faleminderit zoti President!

* KJO ISHTE PERSHENDETJA E EDITORIT TE GAZETES, NË DARKËN PËR DEKORIMIN E DIELLIT NGA PRESIDENTI BUJAR NISHANI ME URDHERIN”NDERI I KOMBIT”, POR QE PER MUNGESE KOHE NUK U LEXUA.

Presidenti Nishani:Pas 24 korrikut do të kem kohë, për të bërë analistin, opinionistin…aktivistin

May 29, 2017 by dgreca

Intervistë e Presidentit Nishani dhënë për “Zërin e Amerikës”/*

Gazetarja (Menada Zaimi): Përshëndetje zoti President!

Presidenti Nishani: Kënaqësi që jam me ju!

Gazetarja: Zoti President, cili është komenti juaj lidhur me lëndimin e një numri të madh qytetarësh, përfshirë dhe liderin e opozitës z. Lulzim Basha gjatë tubimit të çeljes së fushatës elektorale në Bulevardin Dëshmorët e Kombit. Duhet thënë që ju e keni bërë një reagim, zyra juaje shtypit në faqen zyrtare të internetit.

Presidenti Nishani: Menada unë do të kërkoja mirëkuptimin tuaj që përpara se të nisja përgjigjen, të shfrytëzoja këtë mundësi që më keni dhënë me ftesën në studion televizive të “Zërit të Amerikës” sot nga Uashingtoni ju dhe unë nga Nju Jorku për të shprehur nderimin e popullit shqiptar për “Ditën e Kujtesës” që është një nga ditët e veçanta, që përkujtohet dhe nderohet këtu në SHBA dhe nga populli amerikan. Sot populli amerikan kujton sakrificat e panumërta, historinë, bijtë dhe bijat e rëna në përpjekje për të mbërritur sot ku Amerika e madhe është. Dhe besoj se ky është një shembull që na inspiron dhe ne shqiptarët. Ndaj, unë përfitoj sot nga rasti që të bashkoj nderimin tim dhe nderimin e popullit shqiptar dhe të gjithë shqiptarëve me nderimin që populli amerikan i bën heronjve të tij edhe gjithë kësaj historie të madhe. Ne jemi krenar që në faza dhe momente të caktuara dhe shumë të rëndësishme Shqipëria dhe bijtë e Shqipërisë kanë bashkuar përpjeket e tyre me përpjekjet e djemve dhe vajzave të popullit amerikan në interes të lirisë dhe paqes siç ka ndodhur në Afganistan, Irak dhe më tej. Ne shqiptarët kemi edhe ne heronjtë, martirët tanë së bashku me bijtë e SHBA-së dhe popullit amerikan në ruajtjen dhe arritjen e paqes dhe lirisë. Ndaj, desha ta bëja këtë mesazh sot pikërisht në këtë ditë të veçantë sot për Amerikën dhe popullin amerikan.

Gazetarja: Pa diskutim është një mesazh shumë i vlefshëm.

Presidenti Nishani: Në lidhje me pyetjen tuaj është një një situatë shqetësuese, është një ngjarje e rëndë. Unë kam pasur që ditën e djeshme menjëherë sapo jam informuar për ngjarjen me autoritetet e institucioneve dhe agjencive ligjzbatuese në Shqipëri; të Inteligjencës, Prokurorisë, Policisë së Shtetit. Vazhdoj të kem kontakte me ta. Stafi im në Tiranë vazhdon të ketë kontakte me këto institucione. U kam dërguar së pari urimet e mia më të sinqerta dhe solidaritetin tim me gjithë ata qytetarë të lënduar, përfshirë dhe liderin e opozitës z. Basha, tejkalimin e kësaj situate pa pasoja. Me sa kam marrë informacion që nuk ka rreziqe eminente tek jeta dhe shëndeti i të prekurve dhe lënduarve. Gjithsesi mendoj që autoritetet dhe shërbimi mjekësor duhet të vijojë ndekjen dhe ofrimin e të gjithë ndihmës për të mos pasur asnjë pasojë te të prekurit dhe lënduarit, dhe nga ana tjetër vazhdoj të ndjek dhe të pres me shumë interes dhe angazhim hetimin e plotë dhe zbulimin e plotë të arsyeve dhe shkaqeve të kësaj ngjarje në mënyrë të tillë që fushata elektorale, që tashmë ka nisur në Shqipëri, të karakterizohet nga elementet e sigurisë së plotë.

Gazetarja: Zoti President, Shqipëria sapo ka dalë nga një krizë e cila rrezikonte që vendi të shkonte në zgjedhje pa opozitën. Ju e keni përshëndetur marrëveshjen e arritur mes dy udhëheqësve kryesorë Kryeministrit Edi Rama dhe Kryetarit të opozitës Basha, e cila për hir të së vërtetës erdhi pas një trysnie të fortë ndërkombëtare. Në versionin tuaj, zoti President a ishte kjo një zgjidhje e momentit apo është një zgjidhje në fakt që ka një produkt afatgjatë, që shkon përtej problemit të këtyre zgjedhjeve?

Presidenti Nishani: Unë vlerësoj mbi të gjitha frymën, frymën e përgjegjshmërisë të paraqitur nga të dy ekspontët kryesorë të vendit, lideri i mazhorancës dhe lideri i opozitës. Personalisht kam qenë i përfshirë për aq sa mund të përfshihet Presidenti i Republikës në mënyrë për të sjellë sa më afër të ishte e mundur frymën dhe qëndrimin e kompromisit midis dy liderëve politikë dhe procesi i nisur i kontakteve të tyre dhe asistenca, nuk do të thoja presioni, por ka patur një asistencë miqësore dhe një ndikim miqësor nga partnerët dhe aleatët tanë SHBA-së dhe BE-së për të nënvizuar sesa e rëndësishme është për Shqipërinë përfshirja në një proces normal, të drejtë, të barabartë zgjedhor në Shqipëri ku të gjitha palët të përfshihen në të, por të përfshihen me kushte dhe kritere të barabarta. Ndaj, unë besoj që edhe marrëveshja e arritur tregoi jo vetëm një përgjegjshmëri të të dy liderëve të mazhorancës dhe opozitës z. Rama dhe z. Basha, por besoj që edhe vendimi që ata morën, jam i bindur që nuk ka qenë vendim i lehtë sepse në fund të fundit të dy liderët lëshuan diçka nga qëndrimet e tyre për t’iu afruar kompromisit. Në fund të fundit ky është dhe sensi i kompromisit, sensi i negociatës. Jam i bindur që nuk kanë qenë vendime të lehta qoftë i liderit të mazhorancës dhe qoftë dhe i liderit të opozitës, por liderët prandaj janë, për të marrë vendime të forta jo të lehta, por të qarta. Jam i bindur që kjo frymë duhet të vijojë pa dyshim në sensin e ruajtjes dhe respektimit të interesave reciproke të secilës krah politik të majtë apo të djathtës, por në fund të fundit kur vjen puna për çështje madhore që t’i shërbejë interesave kombëtare dhe interesave të vendit. Besoj se këto përgjegjësi duhen pasqyruar dhe reflektuar në sensin e kompromisit.

Gazetarja: Megjithatë, zoti President, a është normale që me vendim të partive kryesore të shtyhet data zgjedhjeve, po me vendim të partive kryesore të përjashtohet mundësia e koalicioneve duke kapërcyer afatet dhe parashikimet ligjore.

Presidenti Nishani: Mund të them që ka pasur një qëndrim dhe propozimi dhe marrëveshja e tyre ka qenë në fakt, dhe e kam vlerësuar këtë, në kufij të respektimit të Kushtetutës dhe ligjit. Data vërtet u ndryshua dhe u shty, por ishte një datë e përcaktuar brenda atyre afateve kushtetuese dhe ligjore dhe Presidenti i Republikës vuri në dispozicion diskrecionin e tij për të bërë ndryshimin e dekretit dhe referoi datën e dytë sepse Presidenti ka pasur në dispozicion dy data për të zgjedhur për zgjedhjet e ardhshme, dt. 18 dhe 25 qershor. Paraprakisht kisha menduar të ishte 18 qershori si një datë e cila jepte mundësinë që partitë të futeshin në një situatë dhe për shkak të klimës që vjen në Shqipëri dhe për shkak situatës së verës që sjell angazhime të tjera të qytetarëve. Edhe data 25 qershor ishte një datë e parashikuar në Kushtetutë, e parashikuar në kodin zgjedhor dhe nuk ka pasur një shkuarje dhe shtyrje në shkelje as të Kushtetutë dhe as të ligjit. Ndaj unë mendoj që kjo marrëveshje krahas frymës së përgjegjshmërisë për kompromis edhe për të krijuar një ambient edhe më të mirë dhe më të qetë nga ai që ishte para marrëveshjes dhe të mos harrojmë që kishim një situtatë dhe një ambient politik ekstremisht të polarizuar i cili mund të tentonte të shkonte edhe në përplasje civile nëse nuk do të kishte një relaksim.

Gazetarja: Dhe nuk do ta kemi këtë mjedis të polarizuar pas kësaj marrëveshje. Për shembull si i shihni ju akuzat në mendia apo insinuatat që janë hedhur në media që kjo është një përpjekje për të eleminuar partitë e vogla. Ka patur interpretime të tilla, apo jo?

Presidenti Nishani: Natyrisht që interpretimet do të jenë gjithmonë prezente, analizat do të jenë gjithmonë prezente, por unë besoj që fryma e kompromisit për të krijuar një ç’tensionim të atij polarizimi ekstrem dhe që vinte gjithmonë e në rritje në prag të fushatës elektorale, besoj që do të ishte i dëmshëm jo vetëm për shumicën dërrmuese të qytetarëve shqiptarë dhe votuesve, por do të ishte edhe një shqetësim për prespektivën, për prespektivën evropiane të Shqipërisë, aq më tepër për imazhin e Shqipërisë anëtare e NATO-s. Ndaj mendoj që përgjegjësia pavarësisht ndonjë kostoje personale që mund të kenë marrë secili në krahun e tij politik qoftë lideri i mazhorancës, qoftë lideri i opozitës, besoj që i kanë shërbyer me mençuri një prespektive më të mirë, jam i bindur edhe të garës. Pastaj do të jetë gara ajo e cila do të tregojë se cila forcë politike, cili krah politik në suazën e respektimit të plotë të marrëveshjes, të angazhimeve, të standardeve për të treguar se kush do të fitojë shumicën e mbështetjes së qytetarëve shqiptarë.

Gazetarja: Zoti President pse nuk ka ende një Shef Shtabi të Përgjithshëm të Forcave të Armatosura në Shqipëri. Kaq e vështirë është të gjendet gjuha e përbashkët me qeverinë?

Presidenti Nishani: Jo nuk kam ende një propozim konkret nga qeveria për një emër, është e thjeshtë përgjigjja.

Gazetarja: Ju prisni një propozim nga qeveria?!

Presidenti Nishani: Po!

Gazetarja: Zoti President pjesa më e madhe dërrmuese e mandatit tuaj ka përkuar me qeverisjen socialiste. Ju si do ta përkufizonit të gjithën? Keni pasur akuza nga qeverisja e majtë se jeni ndikuar shumë nga Partia Demokratike sepse ju vini nga një ‘background’ i djathtë. Cila është përgjigjja ndaj këtyre akuzave?

Presidenti Nishani: Në fakt ishte hera e parë në Shqipëri që ndodhte një President i së djathtës që ishte në pushtet dhe ushtronte detyrën e Presidentit me një qeveri dhe një maxhorancë parlamentare të së majtës. Ka pasur akuza politike, por mund t’ju them që saga e akuzave të së djathtës në Shqipëri për fatin e keq është një sagë shumë e gjatë që ende nuk ka përfunduar edhe që duket që vazhdon të bëhet edhe gjithmonë e më shumë e sofistikuar edhe gjithmonë e instrumentalizuar, por gjithsesi unë mendoj që nuk ka pasur përtej akuzave as edhe një fakt konkret që të mbështesë nga pikëpamja logjike, nga pikëpamja e fakteve dhe provave që unë e kam ushtruar detyrën e Presidentit të Republikës në interes të opozitës apo në interes të së djathtës në Shqipëri.

Përkundrazi unë jam përpjekur dhe besoj dhe shpresoj që t’ia kem arritur që të ruajë tre dimensione: dinjitetin, integritetin edhe thjeshtësinë. Thjeshtësinë e ushtrimit të detyrës veçanërisht në raportin komunikativ me qytetarët shqiptarë. Do të isha i lumtur shumë në se shumica e qytetarëve shqiptarë do të besonin vërtetë që unë kam mundur t’i realizojë këto tre dimensione gjatë periudhës sime në zyrën e Presidentit të Republikës.

Gazetarja: Zoti President, cila janë planet tuaja pasi të përfundojë mandati juaj si President i Republikës ? Do t’i riktheheni politikës?

Presidenti Nishani: Deri më 24 korrik do të qëndrojë në zyrën e Presidentit të Republikës në respekt të plotë të atij betimi që kam bërë. Pas 24 korrikut unë do të kem kohë, shumë kohë për të bërë analistin, për të bërë opinionistin për të bërë aktivistin, por ajo që mund të them sot ka të bëjë me faktin që situata politike në Shqipëri kërkon mendje të kthjellta, kërkon zemër dhe shpirt të fortë, përballim me dinjitet të sfidave të shumta.

Mund të them të dyja aspektet qoftë si President i Republikës, qoftë si edhe si qytetar. Si President i Republikës më vjen keq të shoh se shpeshherë edhe në situata qesharake kalohet kur gati 90 % e estabilshmentit politik, 90 % e medias janë tërësisht në akuza ndaj opozitës. Jo se opozita duhet të marrë mbështetjen e gjithkujt, por besoj që Shqipëria në këtë rast përbën rastin unikal në vendet demokratike, në vendet pluraliste ku i gjithë ky angazhim i përmasave të mëdha adresohet për të sulmuar opozitën. Në një kohë unë mendoj që në përgjithësi energjitë për opozicion duhen drejtuar ndaj fenomeneve, ndaj problematikave që kanë qytetarët shqiptarë, të shqetësimeve të tyre, të jetës së tyre ekonomike. Ndaj, ky angazhim shumë i sofistikuar edhe ditët e fundit ndaj opozitës kryesisht ndaj liderit të opozitës zotit Basha duket që krijon perceptimin dhe gati–gati bindjen që gjithçka është e instrumentalizuar politikisht ndaj opozitës dhe liderit Basha.

Por gjithsesi ajo që unë doja të thoja ka të bëjë me faktin që për ne është shumë e rëndësishme që të ruajmë standardet edhe te kemi gjithmonë kurajën dhe gjithsecili në postin dhe pozicionin që ka ta kuptojë dhe ta ushtrojë mundësinë e tij si shërbyes, si shërbëtor dhe jo si përfitues.

Gazetarja: Ju faleminderit!

Presidenti Nishani: Ju faleminderit juve dhe ju uroj suksese juve dhe gjithë stafit tuaj. Përshëndetje!

NJË NDERIM I MERITUAR

May 28, 2017 by dgreca

NJË NDERIM I MERITUAR: PRESIDENTI NISHANI DEKORON ISH-SENATORIN BOB DOLE/

2-Frank-shkreli-2-300x183-1

Nga Frank Shkreli/Të shtunën në Uashington, Presidenti i Republikës së Shqipërisë, Z. Bujar Nishani nderoi me dekoratën e lartë ish-senatorin republikan të Shteteve të Bashkuara dhe mikun e madh të kombit shqiptar, Z. Robert Dole.

auto_unnamed_114959784001495984599 Senatori Dole, një burrë shteti amerikan me një përvojë të gjatë në politikën e mbrendshme dhe ndërkombëtare të Shteteve të Bashkuara dhe me vonë një mik i madh i shqiptarëve, ishte zgjedhur në Kongresin amerikan në vitin 1960 nga shteti Kansas dhe më pastaj në vitin 1968 u zgjodh senator nga i njëjti shtet. Fillimisht, ai fitoi nam në politikën amerikane si Kryetar i Komisionit Kombëtar të Partisë Republikane, nga viti 1971-1972. Në vitin 1976, Presidenti Xherald Ford e zgjedhë për nën-president të tij dhe në vitin 1984 Senatori Dole zgjidhet Udhëheqës i shumicës republikane në Senatin e Shteteve të Bashkuara, duke shënuar kështu mandatin më të gjatë në këtë detyrë, në historinë e kombit si udhëheqës republikan. Ai dha dorëheqjen nga Senati duke iu përveshur fushatës për president të Shteteve të Bashkuara. Pas humbjes ndaj kandidatit demokrat Bill Clinton ai tërhiqet nga politika, por fati e deshti që megjithse ishin kundërshtarë politikë, Bob Dole dhe Bill Clinton punuan së bashku në mbrojtje të të drejtave të shqiptarëve.

Në mirënjohje për veprimtarinë e tij në mbështetje të shqiptarëve, sidomos Kosovës, në një ceremoni të veçantë të shtunën në Uashington, Presidenti i Republikës së Shqipërisë, Z. Bujar Nishani nderoi ish-Senatorin Dole me dekoratën më të lartë të vendit, “Dekoratën e Flamurit Kombëtar”, duke e cilësuar politikanin e njohur amerikan, si “përkrahsin e palëkundur të lirisë dhe Pavarësisë së Kosovës”. Në portalin e Presidentit Nishani thuhet se kryetari I shtetoit shqiptar, gjëndej në Uashington në kuadër të një vizite pune, gjatë së cilës, “Në prani të Ambasadorëve të Shqipërisë dhe Kosovës, Zonjës së Parë Odeta Nishani e të ftuarve të nderuar shqiptarë dhe amerikanë, Kreu i Shtetit vlerësoi dhe çmoi me “Dekoratën e Flamurit Kombëtar” Senatorin Robert Joseph Dole me motivacionin:“Me mirënjohje të thellë dhe vlerësim të lartë shtetëror ndaj kontributit të çmuar dhe ndihmesës thelbësore dhënë për promovimin dhe zgjidhjen e çështjes kombëtare shqiptare, si dhe për lobimin në Senatin Amerikan në përkrahje të palëkundur të lirisë dhe Pavarësisë së Kosovës”.

Në fjalën e mbajtur me këtë rast, që përmbledhë shumë mirë veprimtarinë e Senatorit Dole, në mbështetje të të drejtave të shqiptarëve, Presidenti Nishani shprehu, kënaqësinë dhe privilegjin që me rastin e Ditës së Kujtesës së (Memorial Day) kur nderohen sakrificat dhe heronjtë, ka mundësinë: “Për të vlerësuar dhe nderuar kontributet e çmuara dhe mbështetjen thelbësore të mikut të madh të Shqipërisë dhe shqiptarëve, përkrahësit të palëkundur të çështjes sonë kombëtare dhe zgjidhjes së saj, Senatorit Robert (Bob) Dole.”

Në vijim Kreu i Shtetit e cilësoi “Senatorin Dole se ka qenë dhe mbetet një nga përkrahësit dhe politikëbërësit amerikanë më me influencë, që jo vetëm ka përkrahur qysh në fillim të viteve ’90-të, por ka ndihmuar zgjidhjen e çështjes shqiptare në Kosovë si dhe përparimin e proceseve demokratike në Shqipëri, duke ndikuar edhe në procesin e paqtimit, dialogut, mirëkuptimit, begatisë dhe orientimit euro-atlantik të mbarë rajonit të Ballkanit.”

“Ju ishit nga të parët që u përpoqët me vendosmëri, që përcaktuat vijën e kuqe të ndalimit të gjenocidit serb ndaj popullsisë civile e të pafajshme shqiptarë në Kosovë, duke lobuar fuqishëm në Senatin amerikan për fitimin e merituar të lirisë e më pas të Pavarësisë së shumëpritur të Kosovës”, i ka thënë Presidenti Nishani, Z. Dole.

“Për të gjitha këto kontribute, i nderuar Senator Dole, shqiptarët si komb, kudo që jetojnë, ju janë përjetësisht mirënjohës. Prandaj në emër edhe të qytetarëve shqiptarë, në cilësinë e Kreut të Shtetit dëshiroj t’ju përgëzoj, t’ju falënderoj nga zemra dhe t’ju akordoj dekoratën më të lartë e më të shenjtë për ne: atë të Flamurit tonë Kombëtar!”, ka deklaruar udhëheqsi shqiptar duke spikatur meritat e këtij burri të madh amerikan dhe mik i shqiptarëve.

Ju faleminderit dhe dëshiroj t’ju siguroj se ju dhe vepra juaj e paharrueshme do të mbeten përherë të gdhendura në kujtesën dhe mirënjohjen historike të kombit shqiptar!”- përfundoi fjalën e tij Presidenti Nishani.

Shumë i emocionuar, Senatori Dole – i cili kishte shërbyer me vite edhe si Ambasador nderi i Presidentit historik të Kosovës në Uashington, Dr. Ibrahim Rugova dhe si përfaqsues i interesave të Kosovës në kryeqytetin amerikan — e falënderoi Presidentin Nishani për këtë vlerësim të lartë, duke kujtuar me nostalgji se, “kur kandidoi për President të Shteteve të Bashkuara në vitin 1996, është i sigurtë që mori votat e të gjithë shqiptaro-amerikanëve”.

Komuniteti shqiptaro-amerikan është i vetdijshëm se në rolin e tij si ambasador nderi i Presidentit Rugova në Uashington, Senatori Dole, ka luajtur rol të veçantë për të mobilizuar Kongresin dhe administratat amerikane, republikane dhe demokrate, në favor të Kosovës. Zoti Dole citohet nga Zëri i Amerikës të ketë thënë gjatë ceremonisë se “Ushqente dashuri të veçantë për shqiptarët dhe e priti me emocion nderin që iu bë”.

Pas largimit nga Senati, Z. Bob Dole ka shërbyer në detyra të larta në jetën private dhe është nderuar me një numër dekoratash kombëtare dhe ndërkombëtare. Në vitin 2005, kur shërbeja si Drejtor Ekzekutiv i Këshillit Kombëtar Shqiptaro-Amerikan,(KKSHA) vendosëm që Senatorin Dole ta dekoronim me çmimin e rëndësishëm, “Hands of Hope”, “Duartë e Shpresës”, së bashku me Dr. Elez Biberaj, të cilit iu dorëzua dekorata për “Arritje Jetësore”. Dekoratën e KKSHA-së ia dorëzoi Senatorit Dole, aktivisti i dalluar i komunitetit shqiptaro-amerikan dhe mbështetës i fortë i Senatorit Dole për dekada, Z. Xhim Xhema, për angazhimin e tij ndaj idealeve që rrjedhin nga të drejtat e pandryshueshme dhe sovrane të individit dhe të cilat duhet të jenë pjesë e njl shoqërie që qeveriset dhe drejtohet nga idealet e një demorkacie të stilit amerikan.

Me këtë rast të dekorimit të tij nga udhëheqsi më i lartë i shtetit shqiptar, falendëroj Senatorin Dole edhe për ndihmën dhe këshillat që ai dhe bashkpuntorët e tij më kanë dhënë mua personalisht dhe KKSHA-së gjatë periudhës që kam shërbyer si Drejtor Ekzekutiv i Këshillit Kombëtar Shqiptaro-Amerikan. Zyra e tij ishte gjithmonë e hapur për ne. Për këtë i jam shumë mirënjohës Senatorit Dole dhe bashkpuntorëve të tij të ngushtë. Njëkohsisht i shprehi edhe falënderimet edhe Presidentit Bujar Nishani për dekorimin e këtij miku të madh të kombit shqiptar, shumë të merituar, si mbështetës dhe luftëtar për të drejtat e shqiptarëve kudo.

auto_s1495984594

Me Senatorin Robert Dole në darkën me rastin e dekorimit të Senatorit nga Këshilli Kombëtar Shqiptaro-Amerikan, 2005/

Presidenti Nishani nderon senatorin Bob Dole

May 28, 2017 by dgreca

Në Uashington, Presidenti i Shqipërisë Bujar Nishani nderoi me dekoratën më të lartë të vendit ish-senatorin amerikan Bob Dole. Senatori Dole, i cili ka luajtur rol të veçantë për të mobilizuar Kongresin dhe administratën amerikane në favor të Kosovës, tha se ushqente dashuri të veçantë për shqiptarët dhe e priti me emocion nderin që iu bë. Bob Dole ka qenë i emëruar si kandidat për president nga Partia Republikane në zgjedhjet e vitit 1996. Kolegu ynë Ilir Ikonomi ishte në ceremoni dhe përgatiti këtë kronikë.

Ish-senatori Bob Dole është 94 vjeç dhe prej vitesh përdor karrocën e invalidit. Por ai ka një kujtesë të fortë, është i qartë në mendime dhe nuk ka hequr dorë nga shakatë.

Presidenti i Shqipërisë Bujar Nishani, së bashku me ambasadoret e Shqipërisë dhe Kosovës në Uashington, si dhe një grup dashamirësish kanë ardhur për të nderuar senatorin me një ceremoni të veçantë.

Kur në sallë luhen himnet e dy vendeve, senatori ngrihet në këmbë në shenjë nderimi.

“Ju, senator Dole ishin ndër të parët që u përpoqët, me vendosmëri duke u rreshtuar në vijën e parë për të ndalur gjenocidin ndaj popullit të pafajshëm të Kosovës. Ju bëtë një lobim të fuqishëm në senatin amerikan për lirinë që meritonte Kosova dhe më pas për pavarësinë e saj,” tha Presidenti i Shqipërisë.

Zoti Nishani tha se zotit Dole po i akordohej medalja më e lartë dhe më e shenjtë që jep Shqipëria – dekorata e Flamurit Kombëtar.

Senatori Dole pati momente përmallimi.

Në vitin 1996 ai fitoi emërimin e Partisë Republikane si kandidat për president, por humbi ndaj Bill Clintonit. Ai e kujtoi kështu atë kohë:

“Në vitin 1996 unë garova për president dhe humba. Por fitova thuajse të gjitha votat e shqiptarëve.”

Senatori e vlerëson shumë ndihmën e madhe që i dhanë shqiptarët në fushatë, mes të cilëve ai veçoi shqiptaro-amerikanin Xhim Xhema.

“Xhim Xhema dhe të tjerë, mobilizuan dhjetra njerëz për të më ndihmuar në shtetin Nju Hemshër. Ata vendosnin pankarta. Kishte njerëz që ua hiqnin, por ata i vendosnin përsëri,” kujtoi ish-senatori.

Bob Dole ka treguar vazhdimisht interesim të veçantë për Kosovën. Ai e vizitoi atë në vitin 1990 dhe ishte ndër të parët dhe ndër të paktët zëra që paralajmëruan se në Kosovë po afrohej lufta.

Në vitin 1998, Bob Dole e vizitoi përsëri Kosovën dhe paralajmëroi se tani masakra ishte e afërt. Senatori i bëri thirrje administratës Clinton për veprime energjike. Ai sensibilizoi ligjvënësit e tjerë për të kërkuar që presidentit serb Sllobodan Millosheviç t’i dërgohej një mesazh i qartë për Kosovën, ashtu siç ishte vepruar më parë edhe në Bosnje.

“Ka nga ata që thonë se gjendja në Kosovë është ndërlikuar, – shkruante senatori Dole në atë kohë. – Në fakt gjendja është më e qartë se kurrë. Kjo është një luftë kundër civilëvedhe ne e dimë se kush është përgjegjës: Sllobodan Millosheviçi.”

Bob Dole është vetë veteran i Luftës së Dytë Botërore, nga e cila edhe sot ka plagët në trup.

Kjo është ndoshta arsyeja që jeta e tij ka qenë gjithmonë në krah të atyre të cilët vuajtën nga shtypja dhe kërkuan lirinë. Në këtë kauzë, shqiptarët mbeten ndër miqtë e tij më të mirë, nga ata që nuk të harrojnë.(Zeri i Amerikes)