Prishtinë, 25 shtator 2023/

Kryeministri i Republikës së Kosovës, Albin Kurti, sot mori pjesë në mbledhjen komemorative në nderim të policit të rënë në detyrë, Heroit të Republikës së Kosovës, Afrim Bunjaku.

Kjo ditë, u shpreh ai, është dita kur do t’i bëhen nderimet më të larta shtetërore dhe gjithëpopullore policit Afrim Bunjaku, sepse bashkë me pikëllimin dhe dhembjen, ndjejmë krenari dhe besim për Afrimin dhe për të gjithë policët e Policisë së Kosovës.

Në këtë mbledhje komemorative, nën patronatin e ministrit të Punëve të Brendshme, Xhelal Sveçla, Presidentja e Republikës së Kosovës, Vjosa Osmani Sadriu i ndau post-mortem, urdhrin më të lartë Afrim Bunjakut, Hero i Republikës së Kosovës.

Fjala e plotë e kryeministrit Kurti:

Shkëlqesia juaj Vjosa Osmani- Sadriu, Presidente e Republikës së Kosovës,

I nderuari Glauk Konjufca, Kryetar i Kuvendit të Republikës së Kosovës,

I nderuari Xhelal Sveçla, Ministër i Punëve të Brendshme,

I nderuar Gazmend Hoxha, Drejtor i Përgjithshëm i Policisë së Kosovës,

E nderuara familje Bunjaku, bashkëshortja Lumnija, vajza Arbenita, djemtë Jetlum dhe Fatlum,

Të nderuar përfaqësues të korit diplomatik,

Të nderuar përfaqësues të kabinetit qeveritar,

Të nderuar deputetë të Kuvendit të Republikës,

Të nderuar zyrtarë policorë, kolegë të rreshter Afrim Bunjakut,

Të dashur qytetarë,

Të nderuar të pranishëm,

Zonja dhe zotërinj,

Motra dhe vëllezër,

Dita e djeshme, e diela e 24 shtatorit 2023, na ka mbledhur ne sot këtu dhe shpirtërisht me gjithë Kosovën për ta nderuar veprën e Afrim Bunjakut, pjesëtarit të Policisë së Kosovës të rënë në kryerje të detyrës. Dita e sotme është ditë zie në vendin tonë, për shkak të pikëllimit dhe dhembjes së përbashkët për Afrim Bunjakun, rreshterin e policisë sonë që e humbëm dje. Por e sotmja, është edhe dita kur do t’i bëhen nderimet më të larta shtetërore dhe gjithëpopullore policit Afrim Bunjaku, sepse bashkë me pikëllimin dhe dhembjen, ndjejmë krenari dhe besim për Afrimin dhe për të gjithë policët e Policisë së Kosovës; për policinë tonë që me veprimet e saj profesionale dhe të guximshme dje e pamundësuan një skenar më të gjerë kriminal e terrorist.

Le ta themi qartë edhe sot, sikurse dje: Afrim Bunjaku u vra gjatë një sulmi ndaj policëve të Kosovës dhe ndaj vetë shtetit tonë, nga një grup personash shumë të armatosur dhe të pajisur rëndë, të trajnuar profesionalisht dhe me plan, të përkrahur politikisht, të financuar materialisht dhe të mbështetur logjistikisht nga Serbia. Reagimi profesional i Policisë sonë rezultoi me eliminimin e disa terroristëve e kriminelëve, arrestimin e disa të tjerëve dhe neutralizimin e gjithë grupit të tyre si dhe konfiskimin e shumë armatimeve dhe mjeteve të tjera mbështetëse logjistike.

Nga dje, asgjë më nuk mund të jetë njësoj: faktet dolën sheshazi përballë nesh, në sytë tanë dhe të bashkësisë ndërkombëtare si dhe në sytë e secilit që ka kurajo dhe vullnet për ta parë të vërtetën e rajonit në të cilin jetojmë.

Ky reagim profesional dhe i matur i institucioneve të Kosovës dje, ishte në përputhje me vetë natyrën e shtetit tonë demokratik dhe properëndimor.

Afrim Bunjaku 50 vjeçar nga Samadrexha e Vushtrrisë, ishte i martuar dhe bashkë me gruan e tij Lumnije Hazirin, ishin prindër të tre fëmijëve: Arbenitës 25 vjeçare, Jetlumit 18 vjeçar dhe Fatlumit 10 vjeçar. Ky i fundit, e ka trashëguar emrin e të vëllait Fatlumit, që ishte 17 vjeçar, kur më 2012 e kishte humbur jetën në një aksident trafiku.

Pas kryerjes së Shkollës së Shërbimit Policor të Kosovës në vitin 2001, Afrim Bunjaku ka shërbyer në stacionin policor në Vushtrri deri më 4 maj 2007, kur ishte graduar rreshter. Rreshter Afrim Bunjaku e vazhdoi shërbimin e tij për shtatë vite si udhëheqës i ekipit në stacionin policor në Mitrovicë të Jugut deri në vitin 2014, kur u kthye sërish në Vushtrri për të shërbyer si instruktor në Akademinë e Kosovës për Siguri Publike.

Nga viti 2015, Afrimi shërbeu si udhëheqës i ekipit reagues në stacionin policor të Vushtrrisë, kurse nga 6 janari i vitit 2023, Afrim Bunjaku ka qenë i caktuar në stacionin policor në Zveçan, në detyrën e mbikëqyrësit të ekipit patrullues. Plot 22 vite të kaluara në uniformën e Policisë së Kosovës, pra që nga viti 2001, e deri në ditën kur ra në kryerje të detyrës me po këtë uniformë, janë vite shërbimi dhe sakrifice që e bëjnë hero Afrim Bunjakun: hero të Republikës së Kosovës!

Sot, përballë e pranë fotografisë me portretin e Afrim Bunjakut në uniformë të policisë së Republikës sonë dhe përballë veprës së tij heroike, përkulemi me nderime dhe respekt, si dhe zotohemi për drejtësi dhe kujtesë.

Ne bëjmë atë që duam sepse duhet: ligjshmëri dhe kushtetutshmëri, paqe dhe siguri, për të gjithë dhe secilin, pa dallim.

Lavdi rreshter Afrim Bunjakut, heroit të Republikës së Kosovës!

Prishtinë, 24 shtator 2023/

Në nderim të veprës së Afrim Bunjakut, policit të rënë sot në detyrë nga sulmi terrorist i grupeve kriminale në fshatin Banjskë të Zveçanit, Kryeministri i Republikës së Kosovës, Albin Kurti së bashku me anëtarë të kabinetit qeveritar kanë ndezur qirinj para Stacionit Policor Qendër, në Prishtinë.

Ftesës për të ndezur qirinj iu përgjigjën qytetarë të shumtë, përfaqësues të institucioneve, deputetë të Kuvendit të Republikës së Kosovës si dhe diplomatë të vendeve partnere.

Deklarimi i plotë i kryeministrit Kurti:

Unë porsa mbërriva para stacionit Qendra të Policisë së Kosovës, nga fshati Samadrexhë, ku ishim për ngushëllime tek familja e policit Afrim Bunjaku, dhe këtu me ndezjen e qiririt, ne, secili prej neve e shtojmë një dritë të vogël për shpirtin e madh të Afrim Bunjakut, i cili me trimërinë dhe sakrificën e tij ndriçoi rrugën e shtetit të së drejtës të Kosovës, që nuk zmbrapset para asnjë krimineli e terroristi.

Takuam gruan e tij Lumnijen, dhe tre fëmijët e tij, takuam axhallarët, hallën, takuam farefisin e gjerë, miqtë edhe dashamirët, të cilët bashkërisht me neve, me mua, me zëvendësministrin e Punëve të Brendshme, me Drejtorin e Policisë, me kolegë të Afrimit, ndamë dhembjen edhe pikëllimin për këtë polic që e humbi sot Kosova, teksa ajo fitonte më shumë ligj, më shumë kushtetutshmëri, më shumë drejtësi, më shumë siguri, pikërisht për shkak të kontributit dhe flijimit të Afrim Bunjakut.

Me këtë rast falënderoj të gjithë qytetarët të cilët kanë ardhur sonte këtu për të bërë nderime dhe për të treguar se Afrimin e kemi afër në zemrat tona, dhe se rruga e shtetit ligjor, rruga e kushtetutshmërisë, dhe e ballafaqimit me kriminelët e me terroristët është rrugë e cila do të ndjeket nga secili prej nesh dhe të gjithë bashkë deri në ngadhënjimin përfundimtar të shtetit të Kosovës, të Republikës tonë të pavarur.

I falënderoj edhe të gjithë ambasadorët dhe përfaqësuesit e tjerë diplomatik të shteteve mike, të cilët na janë bashkuar këtu sonte që të bëjmë nderime për policin Afrim Bunjaku, për heroin tonë Afrim Bunjaku.

Lavdi Afrimit, dhe urojmë që ky të jetë i fundit në këtë rrugën e vështirë për ligj e për drejtësi për qytetarët dhe lirinë e të drejtat e tyre. Faleminderit!

Presidentja e Republikës së Kosovës Shkëlqesia e Saj Vjosa Osmani Sadriu ka njoftuar se për shkak të vrasjes së policit shqiptar Afrim Bunjaku në veri të Kosovës ka anulluar takimin e programuar për në orën 11.30 në Federatën Vatra.

Për shkak të rrethanave të reja të sigurisë kombëtare Presidentja Osmani ka udhëtuar menjëherë për Kosovë duke anulluar të gjitha aktivitetet e programuara në Shtetet e Bashkuara të Amerikës në ditët në vazhdim.

Vatra dhe komuniteti shqiptaro-amerikan shpreh ngushëllimet më të thella për humbjen e jetës në krye të detyrës së policit shqiptar Afrim Bunjaku dhe dënon me forcë sulmin terrorist serb mbi forcat e policisë së Kosovës.

Sokol Paja/

New York, 21 Shtator 2023 – Federata Pan-Shqiptare e Amerikës VATRA nderoi shqiptarin e madh, ish-Presidentin e Republikës së Kosovës z.Behgjet Pacolli me mirënjohje për kontributin të jashtëzakonshëm për kombin shqiptar e shtetin e Kosovës. Në një ceremoni zyrtare të zhvilluar në Selinë Qëndrore të Vatrës, në hapje të takimit të ngrohtë e vëllazëror, kryetari i Vatrës z.Elmi Berisha i shprehu mirënjohjen e thellë e respektin e lartë në emër të të gjithë vatranëve e shqiptaro-amerikanëve për punën e jashtëzakonshme në dobi të kombit, shtetit e çdo shqiptari anëkënd botës.

Në fjalën e tij ish-Presidenti Pacolli shprehu mirënjohje e vlerësim për punën shekullore e lobimin e jashtëzakonshëm të Vatrës sa herë e ka kërkuar çështja kombëtare. Ndër të tjera në fjalën e tij z.Pacolli u shpreh: “Falenderim e respekt Vatrës e të gjithë vatranëve. Mirënjohje për kontributin e punën e tyre të pa ndalur. Vatra e shqiptaro-amerikanët janë krahu legjendar i shqiptarisë. Vatra është krenari, ju bëj thirrje të gjithë shqiptarëve që ta mbështesin Vatrën. Sa më e fortë të jetë të Vatra aq më të nderuar e më të respektuar jemi ne si shqiptarë në Amerikë. Puna e Vatrës ka qenë e jashtëzakonshme. Lobimi i Vatrës ka qenë ekzistencial për kombin tonë. Me mbështetje dhe unitet arrihen punët e mëdha. Pa mbështetjen e Shteteve të Bashkuara të Amerikës ne si shtet e si komb nuk mund të ekzistojmë. Në themel të shtetit të Kosovës qëndrojnë Shtetet e Bashkuara të Amerikës” deklaroi ndër të tjera z.Pacolli. Ai ekspozoi rrezikun e sanksioneve në Kosovë dhe theksoi se çdo mendim apo lëvizje kundër Amerikës është i pafalshëm për klasën politike. Z.Pacolli i bëri thirrje shqiptarëve që të vazhdojnë të kontribuojë për Kosovën, Shqipërinë e trojet etnike. “Populli ynë dhe shtetet tona kanë nevojë shumë të madhe për ju. Tre kryeministra shqiptarë në Ballkan është arritje e madhe dhe tregues i rolit të shqiptarëve në Ballkan. Arritjet tona të na shërbejnë nxitje për arritje të tjera si komb. Unë nuk do ndalem për ti dhënë kombit e shtetit gjithçka, deri në frymën time të fundit. Lutem për të gjithë shqiptarët që të gjithë kudo që jemi të bashkëpunojmë me njëri-tjetrin” apeloi z.Pacolli. Ai deklaroi se falë lobimit të tij do të deklarohen 3 njohje të reja për Pavarësinë e Kosovës të cilat do publikohen këto ditë. Në përfundim të takimit kryetari i Vatrës z.Berisha në emër të Vatrës dhe të gjithë vatranëve e nderoi me mirënjohje z.Behgjet Pacolli me motivacion: “Për merita të veçanta në promovimin e imazhit të shtetit të Kosovës në arenën ndërkombëtare, për lidershipin e treguar, për rritjen e njohjeve të Pavarësisë së Kosovës, për forcimin e demokracisë, për zhvillimin e diplomacisë ekonomike, për konsolidimin e institucioneve e shtetit ligjor në Kosovë, për humanizmin e shquar dhe suksesin e jashtëzakonshëm si biznesmen shqiptar”. Pas takimit vatrani Kujtim Funiqi shtroi një drekë vëllazërore në restorant “Çakor” në nderim të shqiptarit të madh z.Behgjet Pacolli.

Presidentja e Republikës së Kosovës, Vjosa Osmani, e cila po qëndron në New York ku po mbahet sesioni i 78-të i Asamblesë së Kombeve të Bashkuara, ka marrë pjesë në pritjen zyrtare të organizuar nga presidenti i SHBA-ve, Joe Biden.

Në një bashkëbisedim të ngrohtë me Presidentin Biden, Presidentja Osmani ka theksuar se në themelet e lirisë dhe shtetësisë së Kosovës është aleanca e përhershme me SHBA-të.

Rrjedhimisht, në këtë kontekst, ka përsëritur qëndrimin se partneriteti me Amerikën është ekzistencial, i pacenueshëm dhe i pazëvendësueshëm. Presidentja poashtu pati mundësinë ta njoftojë Presidentin Biden për zhvillimet e fundit dhe sfidat me të cilat po ballafaqohet Kosova.

Pas këtij bashkëbisedimi, Presidentja Osmani theksoi se ka marrë garanca të fuqishme nga Presidenti Biden për mbështetjen e vazhdueshme amerikane ndaj Kosovës. Presidentja Osmani ka falënderuar Presidentin Biden për ndihmën, të cilën në vazhdimësi e japin SHBA-të për Kosovën në rrugën e saj drejt stabilitetit dhe zhvillimit.