Federata Pan-Shqiptare e Amerikës “Vatra” dhe gazeta “Dielli” shprehin ngushëllimet më të dhimbshme për ndarjen nga jeta të ish-editorit të gazetës “Dielli” Din Derti. Mbarë vatranët i gjenden pranë familjes e miqve në këto momente të vështira dhe luten që shpirti i patriotit Din Dertit të gjejë paqen e amshuar.
Atdhetari Din Derti ishte ndër aktivistët më të shquar të çështjes kombëtare në mërgatën e Amerikës në vitet 80-90-të. Din Derti shërbeu si editor në vitin 1990. Puna patriotike e intelektuale, veprimtaria dhe angazhimi në gazetën “Dielli” e Federatën Vatra kontribuoi thelbësisht në ndërkombëtarizimin e çështjes shqiptare dhe të drejtave të shqiptarëve në Kosovë e Shqipëri, ishte organizator e pjesëmarrës aktiv në organizimet dhe tubimet patriotike në Amerikë e më gjerë.
Din Derti ishte ndër themeluesit e Albanian-American Civic League, së bashku me figura të tjera të shquara të komunitetit shqiptaro-amerikan, pjesëmarrës në të gjitha lëvizjet, tubimet e ngjarjet patriotike të diasporës në Amerikë, duke lënë pas një trashëgimi atdhetare që meriton në çdo kohë respekt dhe vlerësim. Në vitin 2023, me rastin e 15-vjetorit të pavarësisë së Kosovës, Din Derti u nderua nga Këshilli i Qytetit të Nju Jorkut si një nga aktivistët e hershëm e kontributor të komunitetit shqiptaro-amerikan. Vepra e tij atdhetare do frymëzojë breza patriotësh në mërgatën e Amerikës.
“Vatra”, “Dielli”, komuniteti e kombi do t”i jenë përjetë mirënjohës.
Pranë familjes, miqve e kolegëve
Me nderim të veçantë
Kryetari i Vatrës
Dr. Elmi Berisha
Editori i Diellit
Dr. Sokol Paja