Tirane, 22 Mars/ Kryetari i Partisë Demokratike, Lulzim Basha, u uroi sot shqiptarëve 22 Marsin e vitit 1992, ditën e fitores historike të demokracisë.

Në një mesazh në faqen sociale Facebook, Kreu i PD-së, Basha shprehet se “22 marsi 1992 shënoi fitoren e dritës mbi errësirën. Shqiptarët rikthyen sytë drejt perëndimit dhe nisën rrugëtimin europian dhe euro-atlantik. Sot jemi anëtarë të NATO-s, Kosova është e pavarur dhe shqiptarët lëvizin të lirë në mbarë Europën. Integrimi i plotë i Shqiperisë në Europë është misioni hyjnor i Partisë Demokratike që e nisi këtë rrugë me 22 mars 1992″.Ndërsa ish-kryeministri Berisha shkruan “gëzuar 22 Marsin, ditën e parë të lirise dhe dinjitetit tonë, ditën që me votën e lirë rrëzuam diktaturën e regjimit barbar hoxhist, nisëm ndërtimin e sistemit demokratik në vendin më monist dhe vendin e tretë më të varfër të globit. Në 22 vite ne ende nuk jemi aty ku e meritojmë, por jemi vite dritë larg asaj kohe. Sot Kosova është e lirë dhe e pavarur, Shqipëria është anëtare e NATO-s, afër marrjes së statusit të vendit kandidat dhe renditet tashmë në grupin e vendeve me të ardhura të mesme e të larta”, shprehet ish-kryeministri Berisha.