PRISHTINË, 29 Shtator 2015/ Presidenti i Partisë Liberal Demokratike në Serbi, Çedomir Jovanoviq, e konsideron si proces të pakthyeshëm pavarësinë e Kosovës. Ai thotë se realitetin në Ballkan nuk e njohin vetëm politikanët e papërgjegjshëm.

Shteti i Kosovës është një proces i pakthyeshëm dhe ai vazhdon të injorohet vetëm nga politikanët e papërgjegjshëm. Kështu ka deklaruar në një intervistë ekskluzive sot në gazetën kosovare “Zëri”, presidenti i Partisë Liberal Demokratike në Serbi, Çedomir Jovanoviq. Ai thotë se sa më shpejt që Kosova të pranohet nga Organizata e Kombeve të Bashkuara dhe nga Bashkimi Evropian është më mirë që konfliktet e vjetra me Serbinë të kthehen në një marrëdhënie të respektimit të dyanshëm, “në shpresë dhe miqësi”. Politikani më i moderuar serb Jovanoviq, duke folur për themelimin e Asociacionit të Komunave me shumicë serbe në Kosovë ka thënë se shpallja si “fitore” nga ana e Serbisë me këtë Marrëveshje është vetëm një vazhdim i politikave destruktive në Beograd që humbjet t’i cilësojë si fitore. Duke pranuar se Serbia ka kryer krime të tmerrshme në Kosovë, Jovanoviq, që në Serbi e njohin si “Çeda”, i ka ftuar serbët e Kosovës që t’i mbrojnë vetë interesat e tyre e jo të lejohen të manipulohen nga Beogradi. Jovanoviq ka folur edhe për klasën politike në Serbi dhe në Kosovë, idenë e ish-kryeministrit, Zoran Djindic, për zgjidhjen e çështjes së Kosovës, si dhe për shqiptarët në Luginën e Preshevës./b.j/