SHOQATA E SHKRIMTARËVE SHQIPTARO-AMERIKANË DHE FEDERATA” VATRA” PROMOVUAN KRIJIMTARINË E SHKRIMTARES ELIONA GJERGO, QË PËR 18 VJET JETON NË GREQI/

NGA DALIP GRECA/DIELLI/

Të Shtunën paradite, me 29 Qershor 2019, në mjediset e Vatrës u promovua vepra letrare e shkrimtares nga Korça, Eliona Gjergo, që prej 18 vitesh jeton në Greqi. Veprimtaria pat për organizatorë Vatrën dhe Shoqatën e Shkrimtarëve Shqiptaro-Amerikanë. E moderuar nga kryetari i Shoqatës së Shkrimtarëve, Mhill Velaj, veprimtaria ka nisë me një minut heshtje në nderim të gazetarit Rrok Berisha, që ndëroi jetë në Kosovë.

Më pas Kryetari i Vatrës Dritan Mishto i ka uruar mirëseardhjen në Vatër pjesmarrësve dhe një urim i veçantë i ëshë drejtuar shkrimtares Eliona Gjergo, që jeton dhe punon në shtetin fqinj me Shqipërinë, në Greqi, ku jetojnë rreth 750-800 mijë shqiptarë. Kjo është një urëlidhje mes dy mërgatave që duhet të thellohet në të ardhmen. Kryetari i Vatrës ka uruar edhe kryetarin e ri të Shoqatës së Shkrimtarëve Mhill Velaj, si dhe presidentin Adnan Mehmeti,ish kryssaren Raimonda Moisiu, që siç tha ai, janë edhe pjesë e Vatrës.

Eliona Gjergo dhuroi për Vatrën një flamur të qëndisur nga mjeshtret korçare.
Presidenti i Shoqatës së shkrimtarëve Shqiptaro-Amerikanë Adnan Mehmeti, i falenderoi pjesmarrësit dhe uroi Kryesinë e re dhe kryetarin Mhill Velaj, në këtë dalje të parë publike në një veprimtari promovuse së bashku me Vatrën. Ai informoi se shoqata e ka shtuar numrin e anëtarëve dhe përmendi një pjesë prej më të rinjve të anëtarësuar në radhët e shoqatës, ku veçoi profesor Sami Repishtin dhe shkrimtarë të tjerë.
Ish Kryetarja e Shoqatës, shkrimtarja Raimonda Moisiu, pasi ka treguar lidhjet me miken e saj , shkrimtaren Eliona Gjergo, ka analizuar romanin e Gjergos me titull” Gjashtë Gishta e gjysmë”, duke u ndalur në subjektin e veprës, në realizmin e ngjarjeve, në përjetimet e personazheve dhe në kompozicionin e romanit.

Editori i Diellit, Dalip Greca, ka falenderuar Eliona Gjergon, që promovimin e veprës së saj me shqiptarët e Amerikës e bëri në Vatër. Këtu në Vatër dhe në Gazetën e saj Dielli, janë gjurmët e shkrimtarëve, ish editorë të Diellit; Fan S. Noli, Faik Konica, Kristo Floqi, Kostë Çekrezi, Nelo Drizari, Athanas Gegaj, Bilal Xhaferri, Edward Licho, Xhevat Kallajxhiu, Arshi Pipa, apo e zonjës së Vatrës Nexhmije Zaimi, e mjeshtrit të Fotografisë Gjon Mili e shumë emrave të tjerë.

Duke analizuar veprën letrare të shkrimtares Eliona Gjergo, editori i Diellit, u ndal në stilin dhe mjeshtërinë e rrëfimit artistik, duke analizuar romanet “Bisha prej Qelqi” dhe “Dy gishta e Gjysmë”.

Shkrimtari Mhill Velaj analizoi me detaje romanin” Bisha prej Qelqi”, duke u ndalur në subjektin, personazhet dhe mesazhet që përcjell shkrimtarja. Ai e vlerësoi romanin si një arritje e letërsisë për fëmijë, ku shkrimtarja ka arritur që të përcjellë me realizëm botën e fëmijëve në prag të adoleshencës.

Poeti Vahid Hyzoti, analizoi romanin më të fundit të shkrimtares Gjergo me titull”Specter”, një roman me vlera artistike. Folësi u ndal në stilin e rrëfimit dhe në realizimin artistik të romanit.

Shkrimtarja Eliona Gjergo falenderoi Vatrën dhe Shoqatën e shkrimtarëve për organizimin e promovimit të romaneve të saj, falenderoi Fatos Mustafaj, për mbështetjen , Raimonda Moisiun, Vaid Hyzoti etj. Ajo tha: Lista e miqëve të mi para se të vija këtu ishte shumë e vockël, por tani siç e shihni, unë bëra shumë miq këtu. Falenderime të përzemërta për fjalët e mira dhe vlerësimin që i bëtë librave të mi.”
Lista e falenderimeve të saj ishte tepër e gjatë.

Përshëndetën dhe i shprehën urimet shkrimtares edhe regjisorja Marika Krasniqi, aktori dhe produseri Avni Abazi, Sabije Veseli, Shkumbin Teta, Prend Qetta, Nexhat Imeraj, Dritan Haxhia e të tjerë. Këngëtarja Sabahete Bejarolli, e ka shprehur urimin e saj duke interpretuar këngë nga repertori.
Eliona Gjergo e nisi rrugëtimin e saj letrar në vitin 2010 me romanin”Kur i lëmë ëngjëjt të vdesin”, “Skizofrenia” më 2012; “Gjashtë Gishta e Gjysmë” më 2016, “Bisha prej Qelqi” më 2017, “Specter” 2019.(Për më shumë lexoni Diellin në print)