-Nis afati njëjavor i aplikimit të  subjekteve politike dhe kandidatëve për zgjedhjet e pas një muaji/

PRISHTINË, 12 Maj 2017-Gazeta DIELLI-Behlul Jashari/ Kosova pas rrëzimit të qeverisë me vota të bashkuara edhe nga partia më e madhe e maxhorancës me opozitën dhe vetëshpërndarjes së Kuvendit në 10 maj 2017, pas 30 ditësh, në 11 qershor, zhvillon zgjedhjet e parakohshme parlamentare, të cilat u dekretuan dje nga Presidenti i Republikës dhe menjëherë mblodhën e mobilizuan Komisionin Qendror Zgjedhor për përgatitjet.

Sipas vendimit të KQZ-së për caktimin e afateve të aktiviteteve, aplikimi i  subjekteve politike dhe kandidatëve për zgjedhje ka nisur që dje dhe do të përfundojë pas një jave në 19 maj 2017.

Afati i tërheqjes së shortit për renditjen në fletëvotim do të jetë 27 maji 2017.

Afati për të caktuar kufizimin e shpenzimeve për fushatë filloi në 11 maj dhe mbaron në 15 maj 2017.

Fushata zgjedhore si dhe afatet për tubimet zgjedhore do të fillojnë në 31 maj dhe do të përfundojnë në 9 qershor 2017.

Dorëzimi i kërkesës për akreditimin e organizatave për vëzhgimin e zgjedhjeve dhe vëzhgueseve do të fillojë në 11 maj  dhe do të përfundojë në 4 qershor 2017.

Aplikimi për regjistrim si votues jashtë Kosovës do të fillojë në 15 maj dhe do të përfundojë në 22 maj 2017.

Për organizimin e zgjedhjeve të parakohshme parlamentare Komisioni Qendror i Zgjedhjeve, duke u mbështetur në ligj, mori vendim që të shkurtojë afatet kohore në përputhje me rrethanat, miratoi Planin Operacional dhe Planin e Buxhetit në vlerën 4 milionë e 944 mijë e 900 euro.

Sipas Ligjit për Zgjedhjet e Përgjithshme, dita kur duhet të mbahen zgjedhjet e parakohshme duhet të jetë ditë e diel, jo më herët se 30 ditë dhe jo më vonë se 45 ditë nga shpërndarja e Kuvendit.

Në Kosovë, zgjedhjet e parakohshme parlamentare të 11 qershorit 2017 do jenë të gjashtat në liri, të tretat në pavarësi, ndërsa zhvillohen tre vjet pas zgjedhjeve të kaluara të 8 qershorit 2014, që ishin poashtu të parakohshme pas vetëshpërndarjes së Kuvendit.

Në Kosovën e lirë nga qershori 1999, të parat zgjedhje parlamentare u mbajtën në 17 nëntor 2001.

Legjislatura e tretë ishte ajo që ka hyrë në histori me shpallen e Pavarësisë së Kosovës në 17 shkurt 2008.

Pas zgjedhjeve të parakohshme parlamentare në këtë pranverë, Kosova këtë vit, në vjeshtë, mban edhe zgjedhje lokale, në afat të rregullt, katër vjet pas zhvillimit të tyre në 3 nëntorin 2013.

Në deklarata e biseda para shpërndarjes së Kuvendit të Kosovës një nga alternativat ishte që nëse koalicioni qeverisës nuk do qëndronte deri në fund të mandatit në vitin 2018, zgjedhjet parlamentare dhe lokale të mbahen përnjëherë edhe në 2017-tën, ashtu si kanë ndodhur edhe më parë para 10 viteve,  në 17 nëntor 2007, që kështu të kishte edhe kursim buxheti, që mos të mbahen njëherë të parat e pastaj të dytat brenda një viti, në pak muaj distancë.

Tash në largim pas mocionit të mosbesimit, qeveria e Kosovës, e koalicionit të dy partive më të madha, PDK e LDK, ku përfshihen edhe parti të vogëla dhe minoritetet, është zgjedhur në 9 dhjetor 2014 në Kuvendin kosovar të konstituuar një ditë më parë, gjashtë muaj pas zgjedhjeve të parakohëshme parlamentare të 8 qershorit.