Komandant i UÇK Hajdin Balaj i njohur me nofkën (Bokseri), vëllai i dëshmorit të Atdheut Milazim Balaj, Kryetari i Organizatës së Veteranëve të Luftës së UÇK-së në Klinë, Kosovë, në një rrëfim ekskluziv me gazetarin Sokol Paja, për gazetën Dielli, Organ i Federatës Panshqiptare të Amerikës VATRA, New York, deklaron se populli i Kosovës nuk do ta njohë kurrë Gjykatën e padrejtë Speciale. Një gjykatë sipas tij kundër luftës dhe kundër interesit kombëtar të shtetit të Kosovës. 

Komandant (Bokseri) Hajdin Balaj, vëllai i dëshmorit të Atdheut Milazim Balaj, Kryetari i Organizatës së Veteranëve të Luftës së UÇK-së në Klinë, Kosovë, pas konfirmimit të aktakuzave ndaj ish ushtarëve të UÇK-së, presidentit të vendit, Hashim Thaçit, ish kryeparlamentareve Kadri Veseli dhe Jakup Krasniqit dhe deputetit të Kosovës, Rexhep Selimit, ka kundërshtuar me forcë si qytetar i Republikës së Kosovës, si luftëtar që shtetit të Kosovës i ka dhënë dëshmorë në familje, si pjesëmarrës në luftë për liri dhe pavarësi, aktin e pashembullt të Gjykatës me mandate të përfunduar. Komandant Balaj edhe si anëtar i kryesisë së Organizatës së Veteranëve në nivel Kombëtar ka theksuar se arrestimet janë fundosje jo e individëve por një shkatërrim me themel i institucioneve të Kosovës. Sipas z.Balaj konfirmimi i aktakuzave është një padrejtësi e madhe që po i bëhet luftëtarëve të UÇK-së të cilët janë simbol i lirisë dhe sakrificës sublime për Atdhe.

Komandant Balaj deklaron se lufta e UÇK-së ka qenë e drejtë dhe e pastër dhe se Serbia erdhi e bëri krime të pashembullta në Kosovë dhe jo shqiptarët e Kosovës shkuan e luftuan në Serbi.

Kryetari i OVL UÇK në Klinë, Hajdin Balaj, ka denoncuar se bashkësia ndërkombëtare me veprimet e fundit po bën një tradhti të ndyrë ndaj shtetit dhe qytetarëve të Kosovës. Drejtësia ndërkombëtare në Kosovë, nuk po bën asgjë më shumë veçse po organizon komplote kundër luftëtarëve të Ushtrisë Çlirimtare të Kosovës e cila është e pastër si drita e diellit. Sipas komandant Balaj, Gjykata akuzon padrejtësisht se UÇK ka kryer krime mbi katolikët e Kosovës të cilët ne i kemi vëllëzer dhe kemi luftuar bashkarisht në mbrojtje të territorit e simboleve tona kombëtare. Kjo është një akuzë përçarëse dhe e poshtër. Ne kemi vetëm një komb. Ne kemi qënë dhe do të jemi gjithmonë bashkë në luftë për liri, dinjitet dhe prosperitet të popullit tonë. Armiku ynë ka qene Serbia jo vëllezërit tanë katolikë. Kjo tentativë ndasie në mes qytetarëve të Kosovës është një ndyrësi e rëndë. Tentativa e poshtër e ndërkombëtarëve sdo na përçajë dot. Komandant Hajdin Balaj thotë se Gjykata Speciale ka mandat të përfunduar dhe se procedurat e arrestimit të udheheqësve të luftës nuk janë asgjë më shumë veçse rrënimi i simboleve të luftës së UÇK dhe shkatërrim i shtetit të Kosovës. Është totalisht në shkelje të të drejtave të njeriut si procedurë. Është një tradhti. Është një pabesi e flliqtë. Sipas Balajt kanë mbledhur 150 mijë firma të qytetarëve të Republikës së Kosovës të cilat janë dërguar në Bruksel, të cilët kundërshtojnë këtë Gjykatë e cila është një maskaradë në dëm të shtetit dhe të popullit të Kosovës. Sipas Balajt UÇK nuk kreu krime, por mbrojti popullsinë civile të pafajshme nga dhuna e represioni e genocidi serb. Lufta e UÇK ishte për vetmbrojtje dhe se çdo veprim ka ardhur si nevojë e domosdoshme dhe urgjente për të mbojtur kombin, shtetin e popullin e pambrojtur të Kosovës prej ofensivës dhe masakrave serbe. Sipas Hajdin Balajt specialja do të dështojë në këtë drejtim të dërrmimit të institucioneve, vjedhjes së qytetarëve të Kosovës, rrëmbimit të dhunshëm e të padrejtë të individëve dhe se të gjithë luftëtarët e UÇK-së, përfshirë Thaçin, Veselin, Krasniqin, Selimin, Mustafën, Ngucatin e Haradinajn, do të dalin të pastër dhe faqebardhë në përballje me drejtësinë e padrejtë ndërkombëtare.