-Ansamblit “Mati” nga Burreli çmimi i parë/
Gjonaj i Hasit-Prizren, 7 Maj 2017-Gazeta DIELLI-B.Jashari/ Me ndarjen e çmimeve tradicionale u përmbyll mbrëmë edicioni i 28 i festivalit mbarëkombëtar i folklorit burimor “Hasi Jehon 2017”, i zhvilluar gjatë tre ditëve në fshatin Gjonaj të Hasit, në rajonin e Prizrenit, afër kufirit me Shqipërinë.
Çmimin e parë “Malësori” juria ia ndau Ansamblit “Mati” nga Burreli.
Çmimi i dytë “Malësorja” iu nda shoqërisë kulturore artistike (ShKA) “Bajram Shabani” nga Kumanova.
Çmimi i tretë “Lahuta” iu dha ShKA “Januz Ramadani” nga Smira dhe Ansamblit “Rugova” nga Peja.
Çmimi “Nazmije Tota” iu nda trios së këngëtareve nga Mati.
Valltari më i dalluar u vlerësua Muhamet Sinani i ShKA “Bresana” nga fshati me këtë emër në Opojë, ndërsa valltarja më e mirë Elizabeta Zeneli nga ShKA “Prishtina”.
Dyshja më e mirë e valltareve u vlerësuan Vjollca Hajrullau dhe Ermira Sheta nga Kruma e Hasit.
Koreografia më e mirë u shpall ajo e Mehmet Xhemajlit nga ShKA “Prishtina”.
Për lojën më të mirë popullore u vlerësua ajo e ShKA “Katarina Josipi”, ndërsa për kostumet ShKA “Rapsha” nga Tuzi.
Rituali më objektiv u vlerësua ai i Ansamblit “Muharrem e Xhevat Qenaj” nga Ramaja.
Çmimi rapsodi më i mirë i festivalit iu nda rapsodes Xhevrije Vataj.
Grupi i rapsodëve më të mirë u vlerësuan Hamit Kastrati e Përparim Brati nga Hasi i Shqipërisë.
Orkestra më e mirë u vlerësua ajo e ShKA “Shote Galica” nga Drenasi, ndërsa klarineti nga Kavaja –
Instrumentisti më i dalluar.
Në natën e tretë në festivalin “Hasi Jehon” u paraqitën 5 ShKA. Në përmbyllje, derisa u parqit në skenë mikpritësi – shoqëria kulturore artistike “Malësori” e Gjonajt të Hasit, juria në përbërje Dilaver Kryeziu, Sami Piraj dhe Hysen Dida vendosën për çmimet tradicionale të festivalit “Hasi Jehon”.
“Publik i mrekullueshëm si zakonisht. E meritoni notën më të lartë për qëndrueshmërinë dhe për kulturën që e keni si publik”, tha Kryeziu, kryetar i jurisë.
Ndërsa, drejtori i festivalit, Haziz Hodaj, e falënderoi publikun. “Juria ndau çmimet për ansamblet, ndërsa unë them se çmimi i parë si zakonisht ju takon juve që e përcillni me kujdes paraqitjen e çdo grupi. Mirupafshim në vitin e ardhshëm”, u shpreh ai.
Festivali “Hasi Jehon” i ka fillet në 8 mars të vitit 1975, kur nga mësuesit e fshatit u themelua shoqëria kulturore-artistike “Malësori” dhe nëpër vite u shndërrua në një nga ngjarjet më të organizuara dhe më të suksesshme kulturore në Kosovë.