-Kuvendi i Kosovës i dalë nga zgjedhjet e 14 Shkurtit 2021, i legjislaturës së tetë në liri e të pestës në pavarësi, sot mbajti seancën konstituive, Glauk Konjufca i Lëvizjes Vetëvendosje u zgjodh Kryeparlamentar dhe nga Kryeparlamentarja e derisotme Vjosa Osmani e mori edhe detyrën e ushtruesit të detyrës së Presdentit të Kosovës/
-Kuvendi i Kosovës do mblidhet përsëri në një seancë tjetër për të zgjedhur Qeverinë e re me Kryeministër Albin Kurtin – liderin e Lëvizjes Vetëvendosje, e cila parti fituese e zgjedhjeve për Presidente të Kosovës ka nominuar Vjosa Osmanin dhe edhe për këtë pritet të votohet në një seancë plenare të Kuvendit/
-Të dielen e 14 Shkurtit 2021 Kosova votoi në zgjedhjet parlamentare – të tetat në 22 vjet liri, të pesta në 13 vjet pavarësi e të katërta të njëpasnjëshme të parakohëshme/
-Në Kosovën e lirë nga Qershori 1999, të parat zgjedhje parlamentare u mbajtën në 17 Nëntor 2001/
-Legjislatura e tretë, e zgjedhjeve të 17 Nëntorit 2007, ka hyrë në histori me shpalljen e Pavarësisë së Kosovës në 17 Shkurt 2008/
-Zgjedhjet e para pluraliste në Kosovë ishin parlamentare dhe presidenciale, të mbajtura para 29 vitesh, në 24 Maj 1992, si pjesë e lëvizjes për liri e pavarësi/
Gazeta DIELLI nga korrespondenti në Kosovë Behlul JASHARI
PRISHTINË, 22 Mars 2021/ Deputeti Glauk Konjufca i Lëvizjes Vetëvendosje është zgjedhur sot Kryetar i ri i Kuvendit të Kosovës dhe nga Kryeparlamentarja e derisotme Vjosa Osmani e mori edhe detyrën e ushtruesit të detyrës së Presdentit të Kosovës.
Kuvendi i Kosovës do mblidhet përsëri në një seancë tjetër për të zgjedhur Qeverinë e re me Kryeministër Albin Kurtin – liderin e Lëvizjes Vetëvendosje, e cila parti fituese e zgjedhjeve për Presidente të Kosovës ka nominuar Vjosa Osmanin dhe edhe për këtë pritet të votohet në një seancë plenare të Kuvendit.
Zhvilloi sot seancën konstituive Kuvendi i Kosovës me gjithësej 120 deputetë i zgjedhjeve të parakohëshme parlamentare të 14 Shkurtit 2021 i legjislaturës së tetë në liri nga qershori 1999 e të pestës në pavarësi nga 17 Shkurti 2008.
Pikë e parë e axhendës ishte formimi i Komisionit të përkohshëm për verifikimin e kuorumit dhe të mandateve, për t’u pasuar me betimin e deputetëve. Seanca konstituive u përmbyll me zgjedhjen e kryetarit dhe nënkryetarëve të Kuvendit.
Në sallën e seancës plenare, konform rregullores dhe praktikës së deritashme, grupi më i madh parlamentar – Lëvizja Vetëvendosje është ulur në qendër, grupi i dytë me radhë – Partia Demokratike e Kosovës në anën e djathtë të kryesuesit të seancës, ndërsa grupi i tretë – Lidhja Demokratike e Kosovës në anën e majtë të kryesuesit.
Seanca konstituive e Kuvendit të Kosovës u kryesua nga deputeti në i vjetër Avni Dehari i Lëvizjes Vetevendosje dhe deputetja më e re Adelina Grainca e Partisë Demokratike të Kosovës.
Kryetari i Kuvendit të Kosovës Glauk Konjufca pasi u zgjodh me 69 vota pro, 33 kundër e asnjë abstenim, në deklaratën e parë nga ulësja e kryeparlamentarit u shpreh:
“Unë zotohem që do ta kryej detyrën time me nderë, me përgjegjësi dhe me përkushtim. Për mua nuk do të ketë deputetë të kësaj apo të asaj partie. Për mua si Kryetar i Kuvendit do të ketë vetëm deputetë të barabartë të popullit të Kosovës, sepse kështu jemi. Përmbi të gjitha, të gjithë së bashku dhe në emër tuajin po i falënderojmë qytetarët e Republikës së Kosovës meqë pa votuar ata as ne nuk do mund të vinim këtu, e bile as nuk do të mund të votonim sot. Na priftë e mbara në punët që na presin dhe me këtë raste po e shpalli të mbyllur këtë seancë themeluese të legjislaturës së tetë të Kuvendit të Kosovës. Kurse për seancën e zgjedhjes së Qeverisë do t’ju lajmërojmë me kohë”.
Nënkryetarë të Kuvendit të Kosovës nga tre partitë më të mëdha jënë zgjedhur me 107 vota pro, 6 kundër dhe asnjë abstenim Saranda Bogujevci nga Lëvizja Vetëvendosje, Bedri Hamza nga Partia Demokratike e Kosovës dhe Kujtim Shala nga Lidhja Demokratike e Kosovës.
Nga komunitetet pakicë nënkryetarë të Kuvendit të Kosovës u zgjodhën përfaqësuesi i serbëve Slavko Simiç i Listës Serbe dhe Bekim Arifi nga komunitetetet tjera pakicë.
Kosova në Vitin e Ri 2021 shkoi në zgjedhje parlamentare të jashtëzakonshme pas rënes së dy qeverive në vitin 2020 të pas zgjedhjeve të parakohshme të 6 Tetorit 2019.
Në 2020-tën Qëveria me kryeministër Albin Kurtin e Lëvizjes Vetëvendosje e zgjedhur në 3 Shkurt 2020 u rrëzua me mocion mosbesimi të inicuar nga partneri i koalicionit qeverisës – Lidhja Demokratike e Kosovës, e cila mori drejtimin e Qeverisë me kryeministër Avdullah Hotin të zgjedhur në 3 Qershor, por në dhjetor Gjykata Kushtetuese shpalli të pavlefshme votën e një deputeti të minoriteteve, Etem Arifi, pasi kishte të humbur mandatin për shkak të një dënimi të formës së prerë nga gjykata. Vota e tij ishte vendimtare për zgjedhjen e Qeverisë pasi mundësoi arritjen e minimumit të nevoshem prej 61 votave të parlamentit 120 anëtarësh.
Në Kosovë, në zgjedhjet e jashtëzakonshme parlamentare të 14 Shkurtit 2021, sipas rezultateve përfundimtare të certifikuara nga Komisioni Qendror i Zgjedhjeve, Lista e Lëvizjes Vetëvendosje është fituese me 438.335 vota – 50,280 përqind – 58 mandate deputetësh të Kuvendit 120 anëtarësh, e numri dy në këtë listë Vjosa Osmani është më e votuara nga të gjithë kandidatët e të gjitha listave me 300 756 vota. Gjatë historisë së zgjedhjeve parlamentare në Kosovë më shumë vota ka marrë vetëm Presidenti historik i Kosovës Ibrahim Rugova.
Nga votimet në zgjedhjet e Kosovës të 14 Shkurtit 2021 janë edhe këto rezultate përfundimtare të certifikuara:
E dyta ka dalë Partia Demokratike e Kosovës me 17,009 përqind – 148.285 vota e 19 deputetë.
E treta është Lidhja Demokratike e Kosovës me 12,731 përqind – 110.985 vota e 15 deputetë.
E katërta është Aleanca për Ardhmërinë e Kosovës me 7,124% përqind – 62.111 vota e 8 deputetë.
Me vendet e garantuara me Kushtetutën e Kosovës serbët kanë 10 deputetë dhe komunitetet tjera pakicë poashtu 10 deputetë.
Nisma Soacialdemokrate me 2,523 përqind – 21.997 vota dhe parti të tjera shqiptare nuk e kanë kaluar pragun prej 5 përqind dhe nuk do jenë pjesë e Kuvendit të Kosovës.
Kosova të dielen e 14 Shkurtit 2021 votoi në zgjedhjet parlamentare – të tetat në 22 vjet liri, të pesta në 13 vjet pavarësi e të katërta të njëpasnjëshme të parakohëshme.
Në Vitin e Ri 2021 Kosova shkoi në zgjedhje parlamentare të jashtëzakonshme pas rënes së dy qeverive në vitin 2020 të pas zgjedhjeve të parakohëshme të 6 Tetorit të vitit 2019.
Në 2020-tën qëveria me kryeministër Albin Kurtin e Lëvizjes Vetëvendosje e zgjedhur në 3 Shkurt u rrëzua me mocion mosbesimi të inicuar nga partneri i koalicionit qeverisës – Lidhja Demokratike e Kosovës, e cila mori drejtimin e qeverisë me kryeministër Avdullah Hotin të zgjedhur në 3 Qershor, por në dhjetor Gjykata Kushtetuese shpalli të pavlefshme votën e një deputeti të minoriteteve, Etem Arifi, pasi kishte të humbur mandatin për shkak të një dënimi të formës së prerë nga gjykata. Vota e tij ishte vendimtare për zgjedhjen e qeverisë pasi mundësoi arritjen e minimumit të nevoshem prej 61 votave të parlamentit 120 anëtarësh.
Në Kosovën e lirë nga Qershori 1999, të parat zgjedhje parlamentare u mbajtën në 17 Nëntor 2001, kur numri i votuesëve të regjistruar ishte 1,249,987, ndërsa pjesëmarrja në zgjedhje 803,796 votuesë – 64.30%.
Zgjedhjet e dyta parlamentare u zhvilluan në 23 Tetor 2004. Numri i votuesëve të regjistruar ishte 1,412,680, ndërsa pjesëmarrja në zgjedhje 699,519 votuesë – 49.52%.
Zgjedhjet e treta parlamentare u mbajtën në 17 Nëntor 2007. Numri i votuesëve të regjistruar ishte 1,567,690, ndërsa pjesëmarrja në zgjedhje 628,630 votuesë – 40.09%. Legjislatura e këtyre zgjedhjeve, e treta, ishte ajo që ka hyrë në histori me shpalljen e Pavarësisë së Kosovës në 17 Shkurt 2008.
Zgjedhjet e katërta parlamentare në liri, të parat në pavarësi, u zhvilluan në 12 Dhjetor 2010. Numri i votuesëve të regjistruar ishte 1,632,276, ndërsa pjesëmarrja në zgjedhje 706,317 votuesë – 45.29%.
Zgjedhjet e pesta parlamentare në liri, të dytat në pavarësi, u zhvilluan në 8 Qershor 2014. Numri i votuesëve të regjistruar ishte 1,799,023, ndërsa pjesëmarrja në zgjedhje 734,055 votuesë – 42.63%.
Zgjedhjet e gjashta parlamentare në liri, të tretat në pavarësi, u zhvilluan në 11 Qershor 2017. Numri i votuesëve të regjistruar ishte 1,888,059, ndërsa pjesëmarrja në zgjedhje 779,729 votuesë – 41.3%.
Zgjedhjet e shtata parlamentare në liri, të katërta në pavarësi, u zhvilluan në 6 Tetor 2019 . Numri i votuesëve të regjistruar ishte 1,961,213, pjesëmarrja në zgjedhje 826,916 votuesë – 44.56%.
Në zgjedhjet parlamentare të 14 Shkurt 2021 – të tetat në liri e të pestat në pavarësi numri i votuesëve të regjistruar ishte 1,851,927, pjesëmarrja në zgjedhje 48.78% – numri i pranuar i fletëvotimeve të vlefshme 877,503.
Zgjedhjet e para pluraliste në Kosovë ishin parlamentare dhe presidenciale, të mbajtura para 29 vitesh, në 24 Maj 1992, si pjesë e lëvizjes për liri e pavarësi, në rrethana të rënda të dhunës e shtetrrethimit nga Serbia okupatore.
Ishin ato zgjedhje të rezistencës gjithëpopullore kosovare të shqiptarëve që krijuan një rend demokratik dhe forcuan institucionalisht Republikën e shpallur të Kosovës në zhvillime historike, që pasonin Deklaratën e Pavarësisë të 2 Korrikut e Kushtetutën e 7 Shtatorit 1990, si dhe Referendumin e zhvilluar nga 26 deri 30 Shtator 1991, në të cilin për Kosovën Shtet Sovran dhe i Pavarur u deklaruan pro 99,87 për qind e qytetarëve pjesëmarrës masivisht në votim – 87,01 për qind.
Në mbledhjen 2 Majit 1992 Kuvendi kosovar shpalli zgjedhjet shumëpartiake, në të cilat partitë politike angazhoheshin jo për rivalitete mes tyre, por të gjitha së bashku për vendosjen e pushtetit të Kosovës në Kosovë, të lirisë e demokracisë, në vend të pushtetit të Serbisë, të okupimit e imponimit.