-Ministrja për Dialog Edita Tahiri: Muri te ura në Mitrovicë do të hiqet. Kosova ka arritur t’i heq të gjitha barrikadat në veri, ishin mbi njëzetë/

-Kuvendi i Komunës Jugore të Mitrovicës është ftuar nesër në një seancë urgjente për zhvillimet në veri, me të vetmen pikë në axhendë: Situata politike dhe e sigurisë pas ndërtimit të murit matanë urës së Ibrit/

PRISHTINË, 13 Dhjetor 2016-Gazeta DIELLI-B.Jashari/ Ministrja për Dialog Edita Tahiri, deklaroi sot se, qeveria e Kosovës është duke punuar intensivisht për të zgjidhur problemin e krijuar në Mitrovicë ku është ndërtuar një mur ilegal duke cenuar lëvizjen e lirë dhe në kundërshtim me ligjet e Kosovës dhe Marrëveshjen e Brukselit.

“Po punojmë së bashku me Bashkimin Evropian për zgjidhjen e këtij problemi dhe ju sigurojmë se nuk do të ketë mur në qytetin Mitrovicës, ky mur do të hiqet dhe i gjithë procesi i revitalizimit të urës dhe rrugës për këmbësorë në anën veriore të qytetit do të realizohet në pajtim me Marrëveshjen e Brukselit” , tha ministrja Tahiri.

Ajo përkujron se, Marrëveshja e Brukselit për heqjen e barrikadës dhe Plani për revitalizimin e urës së Ibrit që është nënshkruar në 25 gusht 2015 në Bruksel parasheh heqjen e barrikadës dhe revitalizimin e urës nga ana e BE-së si dhe revitalizimin e rrugës kryesore të pjesës veriore të qytetit të Mitrovicës që sipas marrëveshjes do të jetë rrugë për këmbësor (shëtitore) që është kompetencë e komunës,  sipas ligjeve të Kosovës.

Qeveria e Kosovës konsideron se ndërtimi i këtij muri ilegal është në kundërshtim me ligjet e Kosovës dhe Marrëveshjen e Brukselit për heqjen e barrikadës dhe revitalizimin e urës së Ibrit të datës 25 gusht 2015.

“Në lidhje me këtë zhvillim ilegal nuk kemi pasur njohuri përveç në momentin kur është shfaqur ky mur ilegal në mbrëmjen e 6 dhjetorit 2016. Pas komunikimit të menjëhershëm me Bashkimin Evropian për të ngritur shqetësimet e shkeljes së Marrëveshjes së Brukselit, ata po ashtu kanë konfirmuar të njëjtën, se nuk kanë pasur njohuri dhe se një mur i tillë është jashtë Marrëveshjes së Brukselit”, shprehet ministrja kosovare.Më tej thekson se, qeveria e Kosovës ka ndërmarrë masat ligjore për ndaljen e punimeve të cilat edhe janë ndalur që nga data 7 dhjetor 2016, kur është nxjerrë vendimi i qeverisë së Kosovës përkatësisht i Ministrisë së Mjedisit dhe Planifikimit Hapësinor i cili i është dërguar autoriteteve lokale të Komunës.

“Po ashtu, Ministria e Mjedisit dhe Planifikimit Hapësinor vazhdimisht po bënë monitorimin e situatës përmes inspektorëve të vet zyrtarë. Në të njëjtën kohë Policia e Kosovës është e angazhuar plotësisht për të ruajtur rendin dhe qetësinë duke marrë parasysh pakënaqësinë legjitime të qytetarëve për shkeljen e Marrëveshjes së Brukselit dhe frikën nga skenarët djallëzorë të Serbisë”, thekson deklarata.

Qeveria e Kosovës, vijohet më tej, siguron qytetarët se po punon maksimalisht së bashku me partnerët ndërkombëtarë, Bashkimin Evropian, për zgjidhjen e këtij problemi.

“Ju sigurojmë se nuk do të ketë mur dhe që procesi i revitalizimit të urës së Ibrit dhe rruga për këmbësorë në formën e shëtitores do të jetë plotësisht sipas Marrëveshjes së Brukselit. Ne jemi të vendosur për këtë çështje, do ta zgjidhim, mirëpo dëshirojmë të theksojmë se do ta zgjidhim me kujdesin më të madh duke marrë parasysh ndjeshmërinë e kësaj çështje, por gjithnjë sipas ligjeve të Kosovës dhe duke respektuar Marrëveshjen e Brukselit. Koha e mureve, kjo dukuri negative, nuk do të lejohet në shtetin tonë i cili në Kushtetutën e vet ka vendosur themelet e shtetit demokratik, të lirive themelore dhe lëvizjes së lirë, të cilat askush nuk mund t’i cenojë”, deklarohet më tej.

 

Theksohet se, qeveria e Kosovës ka arritur që deri tani t’i heq të gjitha barrikadat në veri të vendit, që kanë qenë mbi njëzetë sosh.

“Dhe po ashtu hoqëm edhe barrikadën nga ura e lumit Ibër, duke falënderuar dialogun e Brukselit dhe qëndrimin tonë konsekuent në këtë proces. Prandaj, edhe këtë problem do të zgjidhim, pa mure dhe pa vonesa”, përfundon deklaratën ministrja Tahiri.

Kuvendi i Komunës Jugore të Mitrovicës është ftuar nesër në një seancë urgjente për zhvillimet në veri, me të vetmen pikë në axhendë: Situata politike dhe e sigurisë pas ndërtimit të murit matanë urës së Ibrit.