PER QEVERINE E RE – Dielli

-Kuvendi i Kosovës,sot në seancë të jashtëzakonshme për zgjedhjen e Qeverisë së re/

-Ramush Haradinaj në 100 ditëshin kryeministër, në intervistë ekskluzive Gazetës Rilindja në fundvitin 2004: Sigurt do të arrijmë suksesshëm në vlerësimin pozitiv të standardeve. Pavarësia e Kosovës do të shënojë edhe një fillim të ri për shumë çështje që e preokupojnë rajonin sikurse që është integrimi i shpejtë në strukturat evropiane dhe ato veriatlantike/
-Cilat janë kompetencat e Qeverisë e të Kryeministrit, që i përcakton Kushtetuta e Republikës së Kosovës/

Gazeta DIELLI nga korrespondenti në Kosovë Behlul JASHARI/

PRISHTINË, 9 Shtator 2017/ Zgjedhja e Qeverisë së Republikës së Kosovës sot në orën 16:00 është pika e vetme e axhendës së seancës së jashtëzakonshme të Kuvendit kosovar, i cili seancën konstituive të nisur në 3 gusht e përfundoi dje, afër 3 muaj pas zgjedhjeve të parakohshme të 11 qershorit.

Kandidati i koalicionit fitues të zgjedhjeve PDK-AAK-Nisma, Ramush Haradinaj, është mandatuar për formimin e Qeverisë së re të Kosovës, menjëherë pas seancës konstituive të Kuvendit, nga presidenti i Republikës, Hashim Thaçi.

Kryesia e Kuvendit të Republikës së Kosovës, mbajti te premien me 8 shtator mbledhjen e parë për Legjislaturën VI, të drejtuar nga Kadri Veseli, kryetar.

Kryesia shqyrtoi kërkesën e 45 deputetëve nënshkrues për thirrjen e seancës së jashtëzakonshme për votimin e qeverisë së re të Kosovës.

“Kryesia vlerësoi se kërkesa i plotëson kushtet formale-juridike dhe njëzëri vendosi që konform kësaj kërkese, Kuvendi të mblidhet në seancë të jashtëzakonshme të shtunën, më 9 shtator, në orën 16:00, me pikën e vetme të rendit të ditës: Zgjedhja e Qeverisë së Republikës së Kosovës”, thekson njoftimi zyrtar i sapodërguar nga Kuvendi sot pasdite.

Në përfundim të seancës konstituive të Kuvendit të Kosovës, dje pasdite, i saporizgjedhur kryeparlamentar Kadri Veseli paralajmëroi për të shtunën seancën për zgjedhjen e liderit të AAK Ramush Haradinajt kryeministër dhe Qeverisë së Kosovës, e më parë mandatimin.

Derisa vononte konstituimi i Kuvendit që pasohet me zgjedhjen e qeverisë së re të Kosovës, qeveria e zgjedhjeve të para tre viteve zhvilloi në 30 gusht 2017 mbledhjen e 154-të, të tetën të pas zgjedhjeve të parakohshme parlamentare të 11 qershorit, të nëntën si qeveri në detyrë pasi u rrëzua në 10 maj në seancën e Kuvendit në mocion mosbesimi.

Në 10 maj, një muaj para zgjedhjeve të parakohshme, Kuvendi i Kosovës u vetëshpërnda me kalimin me shumicë votash, të opozitës e edhe të partisë më të madhe të maxhorancës – PDK, të mocionit të mosbesimit për qeverinë e udhëhequr nga LDK të zgjedhur në 9 dhjetor 2014 në Kuvendin kosovar të konstituuar një ditë më parë me vonesë gjashtë muajshe pas zgjedhjeve të 8 qershorit, të cilat ishin poashtu të parakohshme.

Ramush Haradinaj ishte kryeministër i Kosovës edhe më parë rreth 100 ditë.

Në 3 dhjetor 2004, pas zgjedhjes së Presidentit të Kosovës, deputetët e Kuvendit të Kosovës me vota të hapura zgjodhën kryeministrin dhe kabinetin qeveritar. Pasi më parë Presidenti Ibrahim Rugova para deputetëve nominoi në këtë post Ramush Haradinajn nga AAK-ja, ai mori votëbesimin e Kuvendit dhe u zgjodh kryeministër i ri i Kosovës si dhe 11 ministrat nga radhët e koalicionit. Për kabinetin qeveritar votuan 72 depuetë, kudnër ishin 2 dhe pesë abstenuan.

Ramush Haradinaj në seancën e nesërme pritet të zgjedhet kryeministër i Kosovës me votat e koalicionit PDK-AAK-Nisma-AKR dhe të komuniteteve pakicë, ashtu si u zgjedh dje kryetari i Kuvendit.

Gjatë 100 ditëve të qeverisjes, në kohën kur Kosova prej disa vietesh e lirë shkonte drejt shpalljes së pavarësisë, kryeministri Ramush Haradinaj në një intervistë që kam zhvilluar për gazetën tradicionale kosovare Rilindja shprehte besimin se pavarësia e Kosovës do të shënojë edhe një fillim të ri për shumë çështje që e preokupojnë rajonin sikurse që është integrimi i shpejtë në strukturat evropiane dhe ato veriatlantike, derisa fliste edhe për bisedimet për statusin final.

“Ne bisedat i konsiderojmë si punë e mëtejme për t’i shpjeguar bashkësisë ndërkombëtare dhe të gjithëve edhe vendeve të rajonit se njohja apo pranimi i vullnetit politik të popullit të Kosovës për pavarësi, pra njohja e pavarësisë së Kosovës është zgjidhja e vetme dhe që siguron ose shënon edhe më tej ndihmesë në stabilitetin e Kosovës dhe të rajonit”, theksonte Haradinaj.

Kryeministri i Kosovës Ramush Haradinaj shprehej optimist se Kosova do të arrijë me sukses e me kohë në cakun e caktuar për mesin e vitit 2005 për Vlerësimin Gjithpërfshirës të Standardeve dhe fillimin e bisedimeve për statusin final të Kosovës.

“Dinamika jonë, angazhimi ynë, reflekton edhe te UNMIK-u dhe mund të them se sigurt do të arrijmë suksesshëm në maj, pra në gjysmën e vitit që vjen me vlerësimin pozitiv. Veç tani ka sinjale të një sigurie të këtillë edhe nga pala ndërkombëtare duke vërejtur seriozitetin me të cilin ne po angazhohemi për zbatimin e standardeve për Kosovën”, theksonte Haradinaj.

Ai deklaronte edhe se me pavarësinë e Kosovës krijohet rrethanë e re për pozitë më të mirë edhe për pakicat.

“Pozita e pakicave sot, pozita e serbëve e cila nuk është e mirë në këtë rast nuk mund të përmirësohet pa ndryshime, pa e ndryshuar pozitën edhe të shumicës. Me pavarësinë e Kosovës krijohet rrethanë e re për pozitë më të mirë për serbët, pra unë besoj se pavarësia e Kosovës do të shënojë edhe një fillim të ri për shumë çështje që i preokupojnë pjesëtarët e pakicave, por edhe shumë çështje që e preokupojnë rajonin sikurse që është integrimi i shpejtë në strukturat evropiane dhe ato veriatlantike”, theksonte Haradinaj.

Ai shprehej se, “Qeveria e Kosovës, institucionet e Kosovës kanë treguar dhe janë të vendosura që t’i japin rëndësi thellimit të bashkëpunimit me vendet fqinje dhe në rajon. Në këtë rast edhe me Beogradin. Ky qëndrim yni do të jetë vazhdimisht i këtillë dhe do të jetë edhe synim që të thellojmë bashkëpunimin në rajon me të gjitha vendet dhe me Beogradin. Besoj se pala serbe do ta vërtetojë se është edhe në dobi të rajonit që edhe ata të marrin pjesë me një vullnet, do ta quaja tonin, e që është shumëpalësh, pra që edhe Serbia të veprojë njëjtë si vendet e tjera fqinje sikurse Maqedonia, Mali i Zi e Shqipëria që kanë shprehur gatishmëri për thellimin e bashkëpunimit të gjithanshëm”.

Intervista ekskluzive me kryeministrin Haradinaj u zhvillua në pasditën e 30 dhjetorit të vitit 2004, ndërsa u botua të nesërmen me titullin “Sigurt do të arrijmë suksesshëm në vlerësimin pozitiv të standardeve” në numrin festiv të Rilindjes të Vitit të Ri 2005, në të cilin gazeta tradicionale e Kosovës kishte jubileun e 60 vjetorit. Me këtë rast, kryeministri Ramush Haradinaj në zyrën e tij në ambientet e Qeverisë së Kosovës priti për intervistë kryetarin e Këshillit Drejtues e kryeredaktorin e Gazetës Rilindja, Behlul Jashari, tash korrespondent në Kosovë i Gazetës DIELLI.

Ramush Haradinaj është dorëzuar vullnetarisht në Tribunalin e Hagës në 9 mars 2005, pasi një ditë më parë kishte dhënë dorëheqje nga funksioni i kryeministrit të Kosovës, menjëherë pasi ishte njoftuar për ngritjen e aktakuzës nga Tribunali i Hagës. Në 29 nëntor 2012 u shpall i pafajshëm për të gjitha pikat e akuzës.Në 10 korrik 2014, kryetari i AAK-së, Ramush Haradinaj, ishte pjesë e regjistrimit të deputetëve të Legjislaturës V të Kuvendit të Republikës së Kosovës, të dalë nga zgjedhjet e parakohshme parlamentare të 8 qershorit, para seancës konstituive të 17 korrikut.

“Pas 10 vjetësh, sot u çertifikova për herë të dytë në mandatin e deputetit të Kuvendit të Kosovës. Sigurisht se ishte përjetim i veçantë, pas një periudhe të gjatë, me plot sfida, që kaluam unë, familja dhe Kosova. Ky moment shënon edhe një pikënisje të re për të gjithë ne, në rrugën dhe synimet e përbashkëta për Kosovën evropiane”, shprehej me atë rast Haradinaj.

Ai vlerësonte se, “Kosova ka shënuar të arritura, është shtet i pavarur, por shtetit dhe pavaresisë sonë i duhet rend, ligj, zhvillim, sovranitet dhe integrim”.

Në Kuvendin e Kosovës me gjithësej 120 deputetë, prej tyre 100 shqiptarë e 20 të komuniteteve pakicë, për zgjedhjen e qeverisë së re duhen së paku 61 vota.

Në Kushtetutën e Republikës së Kosovës për kompetencat e Qeverisë e të Kryeministrit shkruan:

Neni 93 [Kompetencat e Qeverisë] Qeveria ka këto kompetenca: (1) propozon dhe zbaton politikën e brendshme dhe të jashtme të vendit; (2) mundëson zhvillimin ekonomik të vendit; (3) propozon Kuvendit projektligje dhe akte të tjera; (4) merr vendime dhe nxjerr akte juridike ose rregullore, të nevojshme për zbatimin e ligjeve; (5) propozon Buxhetin e Republikës së Kosovës; (6) udhëzon dhe mbikëqyr punën e organeve të administratës; (7) udhëzon veprimtarinë dhe zhvillimin e shërbimeve publike; (8) i propozon Presidentit të Republikës së Kosovës emërimet dhe shkarkimet për shefa të misioneve diplomatike të Kosovës; (9) propozon amendamentimin e Kushtetutës; (10) mund të referojë çështje kushtetuese në Gjykatën Kushtetuese; (11) ushtron edhe funksione të tjera ekzekutive, të cilat nuk u janë caktuar organeve të tjera qendrore ose vendore.

Neni 94 [Kompetencat e Kryeministrit] Kryeministri ka këto kompetenca: (1) përfaqëson dhe udhëheq Qeverinë; (2) siguron që të gjitha Ministritë të veprojnë në pajtim me politikat qeveritare; (3) siguron zbatimin e ligjeve dhe të politikave të përcaktuara të Qeverisë; (4) ndërron anëtarët e Qeverisë, pa pëlqimin e Kuvendit; (5) kryeson Këshillin e Sigurisë të Kosovës; (6) emëron Drejtorin e Përgjithshëm të Policisë së Kosovës; (7) këshillohet me Presidentin e Republikës së Kosovës mbi çështjet e Inteligjencës; (8) së bashku me Presidentin, emëron Drejtorin, Zëvendësdrejtorin dhe Inspektorin e Përgjithshëm të Agjencisë së Kosovës për Inteligjencë; (9) këshillohet me Presidentin për zbatimin e politikës së jashtme të vendit; (10) kryen edhe punë të tjera, të përcaktuara me Kushtetutë dhe me ligj.

PAN zotohet se i ka numrat për zgjedhjen e kryetarit të Kuvendit dhe formimin e Qeverisë/

1 PAN

Konstituimi i Kuvendit, pritet të pasohet me formimin e shpejtë të Qeverisë së re të Kosovës. Kështu të paktën paralajmëron subjekti fitues i zgjedhjeve, koalicioni PAN, ku bëjnë pjesë Partia Demokratike e Kosovës, Aleanca për Ardhmërinë e Kosovës dhe Nisma.Presidenti i Kosovës, Hashim Thaçi, ka thirrur seancën konstituive të Kuvendit për datën 3 gusht.Përfaqësues nga koalicioni PAN [PDK, AAK dhe Nisma] thonë se të enjten deputetët e rinj do të votojnë për zgjedhjen e kryetari i të këtij institucioni.

Muharrem Nitaj, anëtar i Kryesisë dhe zëdhënës i AAK-së, tha për Radion Evropa e Lirë se veç konstituimit të Kuvendit, mund të votohet edhe për Qeverinë e re të Kosovës në të njëjtën ditë.“Deputetët e Kuvendit të Kosovës do të votojnë kryetarin e Kuvendit, e ndoshta me gjasa reale që të njëjtën ditë të nxirret për votim edhe Qeveria e zotit Haradinaj. Përgatitjet, deri në këto qaste kanë shkuar sipas agjendës dhe kornizës se paraparë. Unë besoj që nuk do të ketë asnjë telashe që të mbahet mbledhja që shënon edhe krijimin e legjislaturës së re të Kosovës“, tha Nitaj.

Siç është bërë e ditur, deri më tash nga koalicioni PAN, pritet që Kadri Veseli, kryetar i Partisë Demokratike të Kosovës, të jetë kandidat për postin e kryetarit të Kuvendit të Kosovës.

Blerand Stavileci, anëtar i kryesisë së PDK-së, dhe aktualisht ministër në detyrë i Zhvillimit Ekonomik, tha për Radion Evropa e Lirë se tashmë është e ditur se koalicioni PAN do të formojë institucionet e reja.Ai nënvizon po ashtu se janë bërë veprime të nevojshme që të ketë vota të mjaftueshme për krijimin e institucioneve.”Ne konsiderojmë se tashmë kjo është punë e kryer dhe nuk presim diçka ndryshe. Pra, presim që nga data 3 gusht e tutje të nisë një epokë e re me institucionet e reja të Republikës së Kosovës“, tha Stavileci.

Nitaj thotë se rezultatit i zgjedhjeve parlamentare të 11 qershorit ka nxjerrë koalicionin PAN me numrin më të madh të mandateve, dhe sipas Kushtetutës dhe ligjeve të Kosovës, koalicionit PAN, shton ai, i takon të propozojë dhe ta zgjedh kryetarin e Kuvendit dhe kryeministrin.“Tani ka një Kuvend aty. Ka disa deputetë dhe gjithçka do të varet nga vota e deputetëve të zgjedhur të Kuvendit të Kosovës. Ne jemi të bindu,r dhe besojmë fuqishëm se koalicioni PAN nuk do të ketë telashe as në krijimin e Qeverisë së Kosovës, mirëpo as në zgjedhjen e kryetari të Kuvendi“, thotë Nitaj.

Në seancën e 3 gushtit, pritet të bëhet verifikimi i mandateve të deputetëve, të bëhet betimi dhe zgjidhet kryetari dhe nënkryetarët.

Valmir Ismajli, analist nga organizata joqeveritare “Demokraci Plus”, konsideron se nuk mund të ketë probleme të mëdha në zgjedhjen e kryetari të ri të Kuvendit të Kosovës, nëse respektohen rregullat dhe ligjet. Mirëpo, sipas tij, problem mund të ketë në krijimin e Qeverisë së re të Kosovës, si pasojë e numrit të pamjaftueshëm të votave nga koalicioni PAN.

“Problemin më të madh e shoh në krijimin e Qeverisë, sepse deri më tani, veç asaj që është thënë se PAN-i i ka numrat, në fakt nuk ka asgjë konkrete dhe të gjithë të apostrofuarit (deputetët e përfolur se do ta votojnë Qeverinë e re) e kanë mohuar një gjë të tillë”.

“Megjithatë, unë pres që gjithçka do të duhej të shkonte sipas procedurës dhe mundësia e parë për formimin e Qeveris t’i jepet PAN-it, përderisa mundësia e dyte duhet t’i jepet koalicionit LAA ose VV. Nëse një gjë e tillë nuk shkon sipas këtyre proceduarave, mund të kemi problem ose bllokadë siç kemi pas edhe në vitin 2014“, thotë Ismajli.

Koalicioni PAN, si koalicion fitues i zgjedhjeve parlamentare të 11 qershorit, pritet të përballet me dy ‘beteja’ rreth krijimit të numrave.

Së pari, në seancën konstituive, kërkon të gjejë mbështetjen e deputetëve për zgjedhjen e kryetarin e Kuvendit, i cili sipas të gjitha matematikave zgjedhore, i takon që të propozohet nga ky koalicion.

Sigurimi i numrave, është shndërruar në pjesën më të rëndësishme të kalkulimeve politike në prag të seancës konstituive të Kuvendit të Kosovës, më 3 gusht.(Kortezi:Arton Kunushevci)

KOSOVË-KUVENDI, SOT SEANCË PËR QEVERINË E RE

PAN I KA MANDATET PER QEVERINE E RE