Një ditë përpara mbledhjes së Komisionit të Posaçëm Parlamentar për Reformën në Drejtësi, kryetari i Kuvendit Ilir Meta priti në zyrën e tij kryeopozitarin Lulzim Basha, i cili shoqërohej nga nënkryetari i Komisionit të Posaçëm për Reformën në Drejtësi, Oerd Bylykbashi.

Menjëhërë pas takimit i cili zgjati rreth 60 minuta, zyra e shtypit e Kryesisë së Kuvendit në një njoftim për mediat bëri me dije se në qendër të tij ishte mënyra e miratimit sa më të shpejtë dhe me konsensus të Ligjit për Vettingun.

Në takimin Meta-Basha u dakortësua në parim nevoja për miratimin me përparësi, brenda muajit gusht të Ligjit për Vettingun, si dhe mbi kalendarin e shqyrtimit të këtij ligji sipas procedurave kushtetuese parlamentare.

Kryeopozitari Basha ofroi mbështetjen e tij për këtë kalendar, duke vënë theksin tek fakti se opozita do të marrë pjesë aktive dhe konstruktive në Komisionin e Posaçëm, duke filluar me prezantimin e komenteve të saj për Ligjin e Vettingut në mbledhjen e ditës së martë.

Në njoftimin për mediat të Kryesisë së Kuvendit bëhet me dije se Kryetari i Partisë Demokratike shprehu gatishmërinë për të avancuar edhe me ligjet e tjera, sapo anëtarët dhe ekspertët e opozitës të njihen me draftet më të fundit të përgatitura nga Komisioni i Posaçëm, veçanërisht Ligji për Prokurorinë Speciale dhe Ligji për Organet e Qeverisjes së Gjyqësorit.

Gjatë takimit i cili u mbajt në Kryesinë e Kuvendit, Meta informoi Bashën dhe Bylykbashin mbi bisedimet që ka pasur me Kryetarin e Komisionit të Posaçëm të Reformës në Drejtësi, Fatmir Xhafaj, Ambasadorin e SHBA Lu, Ambasadoren e BE Vlahutin mbi domosdoshmërinë e miratimit të Ligjit për Vettingun brenda muajit gusht.