-Presidenca njofton zyrtarisht axhendën për nesër: Presidentja e Republikës së Kosovës, Atifete Jahjaga pret në takim të përbashkët drejtuesit e subjekteve politike parlamentare në orën 09:00-
PRISHTINË, 7 Shkurt 2016/ “I jam përgjigjur pozitivisht takimit të Presidentes në mënyrë që prezantoj qëndrimin tonë, tashmë të bërë publik e të palëkundur se si të dalë vendi nga kriza institucionale politike”, shprehet në deklaratën 6 pikëshe lideri i AAK, Ramush Haradinaj, pjesë e tre subjekteve të opozitës së bashkuar, ku janë edhe Lëvizja Vetëvendosje e Nisma, të cilat kanë deklaruar se nuk shkojnë në takimin e nesërm të liderëve të maxhorancës e opozitës të ftuar nga Presidentja e Republikës së Kosovës, Atifete Jahjaga.
Në pikat në vijim të deklaratës së dërguar lideri i AAK-së, Haradinaj thekson:
2. Në këtë tryezë do të kërkoj që të shpërndahet parlamenti dhe vendi të shkojë ne zgjedhje të parakohshme, si e vetmja mundësi kjo për të dalë nga kriza.
3. Poashtu do të kërkoj që zgjedhja e presidentit të bëhët me votë të drejtpërdrejtë nga populli.
4. Do t’i njoftoj akterët e kësaj tryeze se Opozita e bashkuar është e vendosur ta vazhdojë kundërshtimin politik e qytetar deri në përgjigje pozitive për këto kërkesa.
5. Vlerësoj se vetizolimi i udhëhehësve opozitarë nënkupton izolim të kauzës së drejtë e opozitës, e cila duhet të depërtojë çdo kund, duke përfshirë edhe qarqet ndërkombëtare. Ndërkaq vlerësimet e individëve për qëndrimin tim dhe të AAK-së, në raport me kētë tryezë, i konsideroj ose të ngutshme, ose me agjendë.
6. Pavarësisht prej të gjithave, AAK do të mbetet e palëkundur në frontin e përbashkët opozitar të kundërshtimit të degradimit të shtetit! , perfundon Haradinaj.
Nënkryetari i Lëvizjes Vetëvendosje, Driton Çaushi, për dallim nga bashkëpartiaku i tij Frashër Krasniqi, nuk është treguar i matur në deklarimin e tij ndaj vendimit të liderit të AAK-së, Ramush Haradinaj, për të marrë pjesë në takimin e thirrur nga presidentja Atifete Jahjaga.
Çaushi, përmes një postimi në Facebook, ka thënë se vendimi për pjesëmarrje në takimin e thirrur nga Jahjaga me Mustafën e Thaçin, është flirtim me ta.
Ndërsa, axhenda e Presidentes Jahjaga për datën 8 shkurt 2016 u dërgua pak më pare zyrtarisht nga Presidenca:
Presidentja e Republikës së Kosovës, Atifete Jahjaga pret në takim të përbashkët drejtuesit e subjekteve politike parlamentare, për të diskutuar tejkalimin e gjendjes së krijuar në vend. Dita: E hënë, 8 shkurt. Koha: 09:00. Vendi: Kabineti i Presidentes. Mediat mund të marrin pamje në fillim të takimit./b.j/