Nga Fritz RADOVAN*/Melbourne-Australi/
Prej vitit 2014 e këndej, Populli Shqiptar ka histori të shkrueme dhe të bazueme mbi të vertetat historike, prej Burrit Pukës Kolë Bibë Mirakaj (1899 – 1968). Asht kenë fat i madh që Kolë Mirakaj, kur mori penën me shkrue per Shqipninë e Gjergj Kastriotit, Ai nuk e tjetersoi kenjen e Saj të Vertetë as me Shqipninë e Toptanëve, as me ate të zogistave, as me të fashistave apo nazistave…E per Shqipninë “komuniste” as nuk bahet fjalë! Madje, këte të fundit e quen: “VETVRASJA E NJË KOMBI”…
Gjatë kohës që e kishe në dorë librin e Tij, si asht e mujtun që asnjëherë nuk më shkoi mendja me dyshue per të vertetat që unë ishe tue lexue per të paren herë në jeten time, e nga kush, nga vetë Ministri i Mbrendshem i Fashizmit në Shqipni?!
Kolë Mirakaj asht e vertetë se ka kenë Miku i të Parëve të mijë, dhe kryesisht i Babës sim Kolë Radovanit, po kur Baba vdiq, unë me vështirsi i kujtova portretin e Tij se ishe vetem 3 vjeç, kur Ai më la në doren e gjaksorëve ma të pamëshirshem të historisë…
Kur ishim nder bankat e shkollave mbas viteve 1945, fillueme me mësue se per me njoh “historinë”, ma parë duhet të dijmë kush ishte “druzhe Tito, baba ynë Stalini math dhe, ay që na lidhi me to, gjeneral kolonel Enver Hoxha!”… Dhe, pa dalë drita mirë në mengjes, rreth orës 5, me hapë sytë e veshtë per me ndigjue krismat e mitralozave që po shprazeshin në Zallin e Kirit në Shkoder, mbi gjokset e “tradhëtarëve” të lidhun dhe të pranguem edhe persëvdekuni, pranë murit Varrezave të Rrëmajit…
Pra, “pa marrë mend” mësuem fjalët tradhëtarë, armik i popullit dhe partizan…
Pa ma të voglin dyshim, po t’ ishte në Shqipni edhe Kolë Biba, një ditë heret në mengjes edhe Ky do t’ ishte i shtrimë me “tradhëtarët” mbi grumbujt e plehut… Atë fat të zi e patne jo pak vetë edhe nga Familja e Nderueme e Tij Mirakaj…
Dëshmitë e veprave të Kol Mirakaj, nuk janë shenime udhtimi apo kujtime nga “mbramjet e bukra” nder pallatet e Romës apo të Musolinit, nuk janë as “përrallat me mbret” të majorëve anglez apo amerikan, mbas Konferencës së Jaltës, nuk janë asnjëherë as “barceletat” e partizanëve tanë “trima”, që robnisë sllavokomuniste i thonin “çlirim”!
Po, ma kryesore asht se Kol Mirakaj ka shumë të kjartë jo vetem, vizionin e vet, po edhe të “atyne” Shqiptarëve, me të cilët ka marrë rrugët e pafund të Botës së Lirë, me të vetmin objektiv: “Liria e Atdheut, asht detyra e parë e jona!”…
Po kush, ua vuni veshin fjalëve të Tij? Edhe ate e keni të shkrueme!
Po kush, mësoi nga fjalët e veprat e Tij? Edhe ate e gjeni tek libri i Tij!
Po Librin e Tij “Vetvrasja e një Kombi”, a e kanë të gjithë Shqiptarët?
Edhe po nuk e patën të gjithë, do të bajnë çmos me pasë Ata që janë Shqiptarë!
Fallsifikatorët e Historisë dhe trashigimtarët e atyne që kanë krye Vetvrasjen e Kombit Shqiptar, nuk besoj se e kanë dhe as nuk do ta kenë, se shumë shpejtë kalamajt e vegjel do t’i pyesin: “Babë, po gjyshi ynë.., paska qenë tradhëtar i Atdheut?!”
Një fakt sot dihet i sigurt: Historia e vertetë do të shkruhet!
Në kjoftë se numuri i t’ arratisunve jashta Atdheut nuk dihet i saktë, një fakt sot dihet nga të gjithë Shqiptarët: Se, Kolë Bibë Mirakaj, bash Ai Puknjani “fashist” i 1942,
Asht i rrallë, e ndoshta, i vetmi, që jo vetem i la faqen e bardhë trashigimtarëve të Vet, po i zbardhi faqen Pukës, Puknjanëve, Malësorëve të Shqipnisë së Veriut, dhe i la siper Fletëve të Panjollosuna të Historisë Popullit Shqiptar, Rrëfimin e Fundit të së Vertetes, që Trashigimtari i Trojeve të Gjergj Kastriotit shkruen me Gjakun e vet dhe të Fisit, mbi testamentin që nder shekuj do të mbesin i Pandryshueshem!
Ai testament asht “VETVRASJA E NJË KOMBI” me Autor Kol Bib Mirakaj!
Melbourne Dhjetor 2015.
* Përshendetje e përcjellë nga Viktor M Daragjati në promovimin e Librit”Vetvrasja e një Kombi”, organizuar me 13 Dhjetor nga Federata Panshqiptare e Amerikës”VATRA”