-Në Kosovë themelohet Zona e Veçantë Ekonomike Amerikane, Qeveria merr vendimin/

-Kryeministri i Kosovës, Ramush Haradinaj: Themelimi i Zonës së Veçantë Ekonomike Amerikane përkon me 4 Korrikun, Ditën e Pavarësisë së Shteteve të Bashkuara të Amerikës dhe dëshmon përkushtimin e Kosovës për të thelluar partneritetin strategjik me SHBA-të/

Gazeta DIELLI nga korrespondenti në Kosovë Behlul Jashari/

PRISHTINË, 26 Qershor 2018/ Qeveria e Kosovës në mbledhjen e sotme mori vendimin për themelimin e Zonës së Veçantë Ekonomike Amerikane.  Ky vendim është mbështetur në propozimin e grupit punues të themeluar nga qeveria për të shqyrtuar mundësit dhe procedurat e themelimit të kësaj zone.

“Themelimi i Zonës së Veçantë Ekonomike Amerikane përkon me 4 Korrikun, Ditën e Pavarësisë së Shteteve të Bashkuara të Amerikës dhe dëshmon përkushtimin e Kosovës për të thelluar partneritetin strategjik me SHBA-të”,  tha kryeministri i Kosovës, Ramush Haradinaj.

Në mbledhjen e qeverisë u theksua se, themelimi i  Zones së Veçantë Ekonomike do të ketë një rëndësi të madhe për ofrimin e kushteve të nevojshme për investimin e kompanive të ndryshme nga Shtetet e Bashkuara të Amerikës, e gjithashtu do të mundësojë zhvillimin ekonomik të Kosovës dhe rritjen e punësimit.

Zyra e Kryeministrit do të koordinojë gjithë procesin e themelimit të Zonës së Veçantë Ekonomike Amerikane, sipas propozimit të grupit punues, në bashkëpunim me institucionet tjera kompetente.

Përzgjedhja e lokacionit në komunën e Gjakovës është bazuar në faktin se ky lokacion plotëson kushtet e hapësirës, mbi 500 hektarë, si dhe përparësitë tjera, si kyçja direkt në magjistralen Gjakovë-Prishtinë, qasje e lehtë në Autostradën e Dukagjinit, afërsia me aeroportin e Gjakovës, por edhe të Prishtinës.

Me qëllim të realizimit të projektit, pas miratimit të vendimit nga qeveria e Kosovës, do të përgatitet memorandumi i bashkëpunimit me palën amerikane, hartimi i studimit të fizibilitetit për procesin dhe përzgjedhja e një operatori ekonomik për realizimin e të gjitha aktiviteteve të nevojshme për themelimin e Zonës së Veçantë Ekonomike.

Që në nisje të mbledhjes së sotme të Qeverisë së Kosovës, Kryeministri i Kosovës Ramush Haradinaj ka informuar Kabinetin Qeveritar për punën intensive në finalizimin e Ligjit për pagat, ligj ky që është në fazën e tij finale të përpilimit dhe javën e ardhshme do të jetë pikë diskutimi në Qeveri. Po ashtu, Kryeministri Haradinaj ka theksuar qëndrimin e tij se në ligjin e ri do të ketë rritje pagash për Policinë e Kosovës, punëtorët shëndetësorë dhe kategori të tjera të rëndësishme. Miratimin e Qeverisë e kanë marr edhe tre Koncept dokumente:
-Koncept dokumenti për shëndetin riprodhues dhe fertilizimin e asistuar mjekësor adreson nevojën e rregullimit të kësaj fushe në sistemin shëndetësor të Kosovës me qëllim të ruajtjes dhe përmirësimit të shëndetit, përmirësimin e kualitetit të jetës. Koncept dokumenti propozon ndryshimin dhe plotësimin e Ligjit për shëndetin riprodhues me qëllim të eliminimit të problemeve aktuale në këtë fushë.
-Koncept dokumenti për rregullimin e shpronësimit të pronës së paluajtshme i cili adreson sfidat në implementimin e dispozitave të tanishme ligjore të përcaktuara në Ligjin për shpronësimet e pronës së paluajtshme. Bazuar në rekomandimet nga Avokati i Popullit, Komisioni për Bujqësi, Pylltari, Mjedis e Planifikim Hapësinorë në Kuvendin e Republikës së Kosovës ka diskutuar edhe me akterët tjerë dhe ka rekomanduar plotësimin dhe ndryshimin e Ligjit.
-Koncept dokumenti për rregullimin e fushës së marrëdhënies së punës i cili ka për synim avancimin  e kushteve të punës për punëtorët, realizimin e të drejtës së lehonisë, luftimin e punësimit informal, garantimin e standardeve minimale për sigurinë dhe shëndetin në punë në pajtim me standardet ndërkombëtare.
Kabineti qeveritar ka miratuar nismën për lidhjen e Marrëveshjes bilaterale për transportin rrugor ndërkombëtar të udhëtarëve dhe mallrave ndërmjet Republikës së Kosovës dhe Republikës së Malit të Zi. Ministria e Infrastrukturës në Qeverinë e Republikës së Kosovës do të zhvillojë negociatat me palën malazeze për finalizimin e kësaj marrëveshje të dobishme për të dyja vendet.
Me miratim të një vendimi të veçantë, Qeveria ka ndarë mjetet për mbulimin e shpenzimeve për trajtimin shëndetësor jashtë vendit të ish-kryeministrit të Qeverisë së Kosovës në ekzil, Bujar Bukoshi.