Archives for July 2019

President Trump: “Për hir të Zotit mos i mbështesni më komunistët !”

July 9, 2019 by dgreca

-Letra e të përndjekurve politikë për presidentin e SHBA-/

Të përndjekurit politikë antikomunistë te shqetësuar për raportet Shqipëri- SHBA i dëgjuan një vit me pare një letër presidentit te SHBA-ve Donald Traump ku shprehin shqetësimin për mbështetjen që administrata amerikane ,veçanërisht përfaqësuesit e sajë në Shqipëri po u japin komunistëve të Shqipërisë .Te përndjekurit antikomunistë pasi e informuan për atë që po ndodh i kërkuan Presidentit të SHBA te ndërhynte për te ndryshuar gjendjen dhe duke ju lutur që administrata e Tij të mos mbështeste me komunistët.

Ja letra e plotë

Tiranë 09. 07.2018

I nderuar Shkëlqesi , Presidenti i SHBA, z. Donald Trump !

Në emër të të përndjekurve politike antikomunistë te Shqipërisë ju uroj Ju shëndet, mbarësi dhe suksese në detyrën fisnike si dhe familjes suaj gjithë të mirat.
Ne të përndjekurit politike antikomunistë të Shqipërisë, historikisht pro amerikanë, kemi mbështetur publikisht me shpresë e gëzim zgjedhjen Tuaj President i SHBA-ve dhe ndjekim me vëmendje punën tuaj të madhe ne përpjekjet për një bote më të mirë.
Shqipëria ishte në kohën e luftës së ftohte vendi me diktaturën më të egër në Evropën komuniste pasojat e së cilës janë të rënda edhe sot. Rreth 35 % e popullsisë u përndoq politikisht nga regjimi komunist nga pushkatimet deri tek internimet e dëbimet sipas parimit komunist te luftës se klasave, një përndjekjeje që vazhdoi për disa breza te familjet të përcaktuara si armike të komunizmit. Shqipëria komuniste ishte i vetmi vend ne botë qe ndaloi me ligj besimin ne Zot ndërkohë që vendi u rrethua me tela me gjemba e ushtare duke u izoluar plotësisht.
SHBA-ja u shpall armiku kryesor dhe çdo person qe guxonte te thoshte qofte edhe një fjale te mire për te ndëshkohej rende, nga burgosje deri në dënim me vdekje.
Për arsye historike shqiptaret ishin dhe mbeten populli me pro-amerikan në Evropë e ndoshta edhe në Botë gjë që antikomunistët shqiptarë e demonstruan edhe në kushtet e egra të diktaturës komunistë. Një nga arsyet e përndjekjes sonë ishte respekti dhe besimi qe ne kishim tek vlerat e kombit, popullit e shtetit amerikan gjë qe vazhdojmë ta demonstrojmë edhe sot.
Ne pritem me shprese në ndërrimin e sistemeve politike në vitin 1991 që në Shqipëri të zbatoheshin sado pak parimet dhe vlerat e demokracisë amerikane, por konstatojmë me keqardhje zhgënjimin tonë ,pasi kjo nuk ka ndodhur ende.
Shqipëria në 28 vite të pluralizmit politik vazhdon të jetë ende nën sundimin e komunistëve të shndërruar në “kapitalistë” të cilët manifestojnë sjellje politike të ngjashme me kohën e diktaturës.
Sot në Shqipëri komunistët kanë pushtet absolut dhe vendi drejtohet nga autorë të njohur të krimeve kundër njerëzimit dhe gjenocid.
Kështu kreu i parlamentit, ligjërisht posti nr 2 i shtetit shqiptar është ish ministri i brendshëm i qeverisë së diktaturës komuniste Gramoz Ruçi përgjegjës për krime kundër njerizimit.
Ky politikan ishte shpallur me pare “non grata” në SHBA por pas zgjedhjes në krye të Parlamentit është lejuar të vizitojë vendin tuaj. Ndërkohë që qindra pjesëtarë të policisë kriminale politike të diktaturës Sigurimi i Shtetit, drejtues e anëtarë të partisë e nomenklaturës së lartë komuniste janë pjesë e parlamentit, qeverise, drejtësisë, ushtrisë, shërbimit sekret etje.
Ekonomia me vendime e ligje politike është tërësisht në duar të komunistëve. Prona privatë e publike është grabitur dhe po grabitet çdo ditë nga komunistet në pushtet gjë që ka çuar në një pushtet pothuaj absolut të komunistëve ne Shqipëri.
Vendi është kthyer në një qendër trafiqesh ndërkombëtarë, droge, qeneje njerëzore, armë etje të gjitha nën kontrollin e komunistëve shqiptar dhe lidhjeve të tyre të vjetra e të reja me organizata kriminale ndërkombëtare.
Qeveria aktuale trashëgimtare politike, juridike e gjenetike e diktaturës komuniste ka rikthyer hapur kursin antiamerikan sidomos pas zgjedhjes Suaj President i SHBA.
Kryeministri aktual Edi Rama ishte i vemi kryeministër në botë që doli hapur kundër zgjedhjes Suaj President duke ju quajtur publikisht si “turpi i njerëzimit “ gjë që na bën ne si antikomunistë e pro amerikanë te ndjehemi shumë keq.
Qeveria ka votuar disa herë kundër interesave amerikane në OKB përfshi edhe kundër vendimit tuaj për njohjen e Jeruzalemit kryeqytet te Izraelit, një vote që shkon kundër vullnetit të shumicës absolute të shqiptarëve në veçanti kundër vullnetit tonë si antikomunistë.
Por, ajo që na shqetëson ne më shumë nuk janë komunistët shqiptarë dhe orientimi i tyre historik antiamerikan, por fakti që ata kanë pasur dhe kanë mbështetjen zyrtare të SHBA-ve dhe përfaqësuesve diplomatikë të saj në Shqipëri.
Mbështetja amerikane për komunistet shqiptarë është sa e pakuptueshme edhe e papranueshme për ne. Kjo mbështetje gjatë presidencës Obama u bë e hapur dhe e drejtpërdrejtë gjë që solli edhe një rikthim e hapur të komunisteve në pushtet duke vendosur de facto diktuarën e tyre.
Politikat dhe interesat e George Soros u kthyen në politika të shtetit amerikan dhe njerëzit e tij në Shqipëri ,shumica komunistë, kontrollojnë pothuaj çdo gjë, pushtetin politik, ekonomik, mediat etje.
Të ashtuquajturat reforma si ajo në drejtësi sponsorizohen e drejtohen nga njerëz e Soros dhe po çojnë në kapjen e plotë të drejtësisë nga komunistët .
Me keqardhje konstatojmë se të paktën tre ambasadorë të SHBA-ve në Tiranë sidomos ky i fundit kanë dalë hapur në mbështetje të komunistëve duke dëmtuar rëndë imazhin e SHBA-ve dhe tronditur fort besimin e shqiptarëve pro amerikanë.
Ambasadorët dhe diplomatët janë fytyra e SHBA-ve këtu dhe nga sjellja e tyre varet edhe perceptimi publik për SHBA-të. Me vjen keq që e them por mbështetja e tyre ndaj komunisteve ka dëmtuar imazhin amerikan në sytë e shqiptarëve pro amerikanë që janë sigurisht antikomunistët.
Kujt ja priste mendja 28 vite më parë që atë që nuk e beri dot më dhune e gjak diktatura komuniste, ngjalljen e ndjenjave antiamerikane, ta bëjnë vetë diplomatet amerikanë me sjelljet dhe politikat e tyre prokomuniste ne Shqipëri.
Me keqardhje konstatojmë që Ambasada USA në Tiranë, personeli shqiptar i saj është i mbushur kryesisht me ish oficerë të shëlbimit sekret të komunizmit Sigurimi i Shtetit, përgjegjës për krime ndaj të përndjekurve antikomunistë e pro amerikanë.
I nderuar Shkëlqesi!
E di që vëmendja juaj është përqendruar në probleme shumë të mëdha globale dhe Shqipëria e vogël nuk mund të jetë një prioritet Juaji dhe i administratës suaj.
Por do tu lutesha në emër te njerëzve të mi ,që kanë sakrifikuar e vuajtur aq shumë për antikomunizmin, pro-amerikanizmin dhe sidomos për besimin qe kemi tek Ju, të rishikoni këto politika e praktika të aplikuara deri tani nga diplomatet tuaj në Shqipëri!
Për hir te Zotit mos i mbështesni më komunistët!

Me nderim e respekt të veçantë

Nebil Çika

Kryetar i Shoqatës Antikomuniste e të Përndjekurve Politike të Shqipërisë.

ZERI I AMERIKES- Fondacioni “Soros”: Komentet e Presidentit Meta për komplot, të çuditshme

July 8, 2019 by dgreca

Fondacioni Shoqëria e Hapur apo siç njihet ndryshe fondacioni “Soros” ka reaguar pas akuzave të hedhura në adresë të themeluesit të tij, miliarderit George Soros nga Presidenti i Shqipërisë Ilir Meta, duke e akuzuar për ndërhyrje në zhvillimet e brendshme në Shqipëri, kryesisht reformën në drejtësi.

Në një koment publik të pak ditëve më parë, zoti Meta akuzonte zotin Soros, se qëndronte pas “një komploti të kurdisur prej kohësh për të ushqyer përplasjen civile më 30 qershor, si dhe për të ndikuar reformën në drejtësi”. Komentet e zotit Meta pasuan mbajtjen e zgjedhjeve lokale të 30 qershorit, të cilat ai i konsideron si të paligjshme.

Por si përgjigje ndaj interesimit të Zërit të Amerikës mbi këto akuza, shefja e zyrës së komunikimit të fondacionit “Soros” me seli në Nju jork, Laura Silber, tha se “Fondacioni Shoqëria e Hapur është krenar për rolin që ka luajtur, krahas Shteteve të Bashkuara dhe Bashkimit Evropian, për të mbështetur reformën në sistemin gjyqësor në Shqipëri, që është një kërkesë e domosdoshme për hapjen e negociatave me Bashkimin Europian”. Në deklaratën e zonjës Silber thuhet më tej se “karakterizimi që Presidenti Meta i ka bërë kësaj përpjekjeje kaq publike si një komplot, është i çuditshëm. Ne presim që të takohemi në të ardhmen e afërt me Presidentin Meta, në bazë të ftesës që na ka dërguar”, shton më tej ajo.

Presidenti Ilir Meta ka akuzuar edhe më parë manjatin e biznesit George Soros për lidhjet e tij me kryeministrin Edi Rama. Qëndrimit kritik të zotit Meta iu bashkuan së fundmi në Uashingon edhe disa dhjetra shqiptarë me banim në SHBA. Të dielën (7 korrik) ata protestuan ndaj asaj që e quajtën “ndërhyrje e multimiliaderit George Soros në punët e brendshme të Shqipërisë si dhe kundër kryeministrit Edi Rama”.

“Fondacionet për një Shoqëri të Hapur” janë një rrjet ndërkombëtar organizatash jofitimprurëse, të pavarura, jo qeveritare dhe jo politike që mbështesin financiarisht grupe të shoqërisë civile në sektorë të drejtësisë, arsimit, shëndetit publik dhe shtypit të pavarur në mbarë botën. Në Shqipëri “Fondacioni Soros” e zhvillon aktivitetin që prej vitit 1994.

SHQIPTARËT E AMERIKËS PROTESTUAN PARA SHTËPISË SË BARDHË

July 8, 2019 by dgreca

– AGIM REXHAJ: JEMI PARA SHTEPISE SE BARDHE PER TE PROTESTUAR KUNDER DIKTATATURES SE FINANCUAR NGA MANJATI GEORGO SORROS/

NGA DALIP GRECA /*

Ashtu sic e cilesoi dhe Zëri i Amerikës, Vatra nuk ishte organizatore e kësaj proteste, por iu bashkua organizatorëve, për të ngritur zërin kundër korrupsionit, kundër zgjedhjeve farsë të manipuluara, kundër autoritarizmit të qeverisë së korruptuar, ndikimit të grupeve kriminale në qeverisjen dhe zgjedhjet shqiptare, kundër autokracisë dhe pushtetit absolut që ka grumbulluar rreth vetes kryeminsitri socialist Edi Rama, si dhe kundër ndërhyrjes së Xhorxh Soros.

Kronika: Të Djelën me 7 Korrik 2019, në mesditë, shqiptarët e Amerikës të ardhur nga Washingtoni, Virxhinia, Nju Jorku, Nju Xhersi, Pensilvania, Michigani, e shtete të tjerë, kanë protestuar kundër qeverisë së korruptuar të Edi Ramës, kundër rikthimit të diktaturës në Shqipëri,dhe ndikimit të manjatit George Soros në Reformën e Drejtësisë, e cila synon të kapë drejtësinë shqiptare me të ashtuquajturën Rama-Reformë. Sipas protestuesëve, fondacioni SOROS synon të minojë demokracinë në Shqipëri dhe ta kthejnë atë në një Edi Rama Diktaturë të ngjashme me atë të Enver Hoxhës.

Ervis Xholi, një nga organizatorët e protestës, i ardhur nga Michigani, tha për Diellin se shqiptarët e Amerikës protestojnë kundër qeverisë së korruptuar Rama, por dhe kundër ndërhyrjes së Xhorxh Sorosit, që ka hedhur para për të kualifikuar si pjesë të drejtësisë shqiptare kandidatë të kapur. Besnik Xhama nga Nju Xhersi, tha se Xhorxh Soros po financon të majtën në Shqipëri dhe po frenon proceset e reformes ne Drejtësi, ai duhet të largohet nga Shqipëria.

Shqipe Nebiaj kishte udhetuar nga Nju Jorku per t’i bashkuar protestueseve. Veprimtare te Diaspores si Ilir Demalia e te tjere gjithashtu ishin bashkuar me protestuesit per te ngritur zerin per cfare po ndodh ne Shqiperi, ku Demokracia eshte ne rrezik, madje dhe vete Shqiperia rrezikon te shembet ne greminen e politikes korruptive dhe percarese. Vera Matoshi, qe ka udhetuar nga Nju Jorku, tha se kishte ardhe te protestonte per lirine e popullit te vet, ku demokracia eshte e kompromentuar dhe rrezikuar.

Viron Xhavarra ka udhetuar nga Filadelfia. Ai kerkon me ze te larti pengimin e ndikimit te Xhorxh Sorosit, qe po invetson per mbajtjen e se majtes ne pushtet.

Në protestë kanë marrë pjesë edhe një grup vatranësh që kanë udhëtuar nga Nju Jorku, me nënkryetarin e VATRËS Agim Rexhaj, anëtarin e kryesisë së Vatrës Marjan Cubi me zonjën Dila, anëtarit të këshillit Muhamet Omari me zonjën Rita, Asllan Bushati, vatranit Bryen Kozi me vëllanë, editori i Diellit etj. Po ashtu dega e Vatrës në Michigan kishte dalë në përkrahje të protestës përmes një deklarate që publikoi Dielli online. Po ahstu edhe dega e Vatrës në Tampa-Cleawater.

Folësit: Agim Rexhaj, Muhamet Omari, Marjan Cubi, Asllan Bushati e të tjerë, kanë denoncuar qeverinë Rama për korrupsion e dhunë, por mbi të gjitha ndikimin e manjatit Xhorxh Soros, I cili ka investuar për të kapur Reformën në drejtësi.Ata i janë drejtuar Presidentit amerikan Donald Trump për ndihmë, duke i kërkuar që të ndalë dorën e zgjatur të Sorosit në Shqipëri.

Z. Agim Rexhaj, që ishte dhe folësi kryesor i tubimit, e nisi fjalën e tij duke u kthyer 15 vjet pas, kur Shqipëria dhe Kroacia, parapërgatiteshin për të marrë ftesën për t’u pranuar në NATO së bashku me Kroacinë. Kisha një ftesë nga vetë Presidenti Georg W Bush, tha z. Rexhaj,për të qenë në ceremoninë e rastit, por unë dhe shokët e mi zgjodhëm të mos hynim në Shtëpinë e Bardhë për të duartrokitur Fatos Nanon, por dolëm pikërisht këtu ku jemi sot për të demaskuar politikën greko-serbe të Fatos Nanos.

Po publikojmë të plotë fjalën e z. Agim Rexhaj mbajtur gjatë protestës.

***

AGIM REXHAJ: JEMI PARA SHTEPISE SE BARDHE PER TE PROTESTUAR KUNDER DIKTATATURES SE NDIHMUAR NGA SPEKULANTI GEORGO SORROS

Të dashur Pjesmarrës,

Unë jam Agim Rexhaj, Nënkryetari i Federatës Pan Shqiptare të Amerikës “VATRA”

Falenderoj Organizatoret per mbajtjen e ketij tubimi.

Jam bashkë – drejtues i kësaj Federate që prej mëse 30 vjetësh. I jam bashkuar VATRËS sepse besoj tek Amaneti i bashkthemeluesit Te Federates VATRA, Imzot Nolit, qe eshte kthyer ne moto per Cdo Vatran dhe Shqiptar:

Mbahu nëno Mos ke Frikë

Se ke djemtë në Amerikë!

Kam tredhjet e pese vjet në Amerikë që luftoj për të drejtat e popullit tim, popullit shqiptar në Kosovë, Shqipëri, Maqedoni, Mal të Zi, Preshevë e Bujanovc e nëCameri. Kam Tredhjet e pese vjet që i bashkohem të tëra protestave që i kontribuojnë të mirës së popullit tonë. Ishim ne që mbështetëm dhe e arritëm çlirimin dhe Pavarësinë e Kosovës dhe ia arritëm; Ne ndihmuam nxjerrjen e Shqipërisë nga kthetrat e Diktaturës dhe ja arritëm. Sot kanë ardhur kohëra të reja. Prapë duhet kontributi jonë dhe ne do ja dalim. Ky i sotmi është një kontribut i vyer.

Prandaj jam këtu për të protestuar kundër Edi Ramës, Narko – Kryeministrit të Shqipërisë i cili po e çon Shqipërinë drejt një Diktature të re – Diktaturës së Narkos, Diktaturës së Drogës, Diktaturës së ndihmuar nga Spekullanti George Sorros.

Jam këtu për të deklaruar dashurinë time ndaj Amerikës, vendit që na dha çdo gjë që na mungonte në vendin tonë dhe për ti shprehur Amerikës besnikërinë dhe devotshmërinë e qytetarit më të mirë të këtij vendi;

Por jam këtu për të shprehur edhe indinjatën time për përfshirjen në punët e brendshme të Republikës së Shqiprisë te Fondacionit Soros të cilët kanë për qëllim:

· Të zhdukin demokracinë në Shqipëri dhe ta kthejnë atë në një EdiRama Diktaturë të ngjashme me atë të Enver Hoxhës;

· Të realizojë Kapjen e Shtetit nga një dorë e vetme, pinjoll i Diktaturës, djalë i një shërbëtori vrasës të Diktatorit Enver Hoxha.

· Të shkatërrojë sistemin e Drejtësisë Duke dorezuar çelsat e gjykatave tek Edi Rama.

· Të korruptojë tërë aktivitetin ekonimik të vendit nëpërmjet të një dorë të ngushte oligarkësh që i pinë gjakun shqiptarëve me vjedhjet e tyre.

· Të largojë Shqiptarët nga vendi i tyre dhe të sundojë lirshëm me trafikantët dhe drogmenët si Saimir Tahiri, Geron Xhafa, Grupi Habilaj, Gjiknuri, Ahmetaj, Spiropali.

· Të kriminalizojë tërë segmentet e shoqërisë shqiptare sic ka bërë deri tani;

· Të mos lejojë zgjedhje të Lira duke bërë këtë të kapë tërë pushtetet dhe ti korruptojë të tëra në shërbim të spekullantëve dhe në dëm të popullit duke venë në veprim grupet kriminale të drejtuara nga ai vetë më Damian Gjiknurin, Hulsi Manjan, Imer Lalën, Avdylajt, Vangjush Dakon, Taulan Ballën e sa e sa të tjerë;

· Të mbysë çdo zë opozitar dhe të bllokojë çdo Medja që thotë të vërtetën – Të fusë në lojë tërë SORROISTËT ANTI DEMOKRATË Brenda dhe jashtë vendit madje edhe spiunë të rregjur të Miloshevicit nga Prishtina;

· Të denojë gazetarët dhe të kalojë ligje kundër medias dhe kundërshtarëve të vet;

· Ta kthejë shtetin në një shtet policor të drejtuar nga një Gjeneral si Sandër Lleshaj;

· Të korruptojë individë të rëndësishëm të institucioneve Ndërkombëtare të akredituara në Tiranë sidomos ata të monitorimit të standarteve demokratike;

· Të korruptojë Ambasadorë, diplomatë, misionarë – të gjithë të infiltruar në shërbim të George Sorrosit dhe për rrjedhojë të Edi Ramës;

· Të përdorë tërë grupet kriminale në shërbim të vjedhjes së votave – Modeli më i shëmtuar edhe se ai i Maduras në Venezuelë.

· Të xhvleftësojë dhe të tallë Instutucionet e Shtetti dhe shkatërrojë Opozitën duke përdorur të gjitha format që nga intimidimi deri tek blerja korruptive;

· Të fusë Shqipërinë në borxhe që nuk i paguan dot as për 30 vjet nëpërmjet të formave të tij të sofistikuara korruptive siç janë PPP – të dhe Konçesionet

· Të lejojë përhapjen e ndërtimit të fabrikave të prodhimit të drogave të forta nëpër Shqipëri si ajo e Xibrrakës, Hasit etj dhe ta kthejë Shqipërinë në një Lavatriçe të Parave të Pista të ardhura nga Drogat duke i kthyer në Pallate shumëkatëshe që po i zënë frymën Tiranës.

Prandaj unë i kërkoj PRESIDENTIT TRUMP të shohë me vemendje seçfarë bën George Sorros në Shqipëri

Të shpëtojë Demokracinë Shqiptare nga kthetrat e Spekullantit Sorros,

Të shpëtojë Kosovën nga Ndarja dhe coptimi e cila ka për qëllim që TREPCA dhe MITROVICA minierat më të pasura të Evropës të merrn nga Soros, nepermjet Vucucit, Rames dhe Thacit,

Të shpëtojë Shqipërinë nga RAMA-REFORM që po i shkatërron Drejtësinë Shqipërisë dhe që e ka lënë:

· Pa Gjykatë Kushtetuese,

· Pa Gjykatë të Lartë dhe ngadalë dalë pa gjykata.

Ai e ka kthyer Shqipërinë në vendin e vetëm në botë pa këto Gjykata. Edhe Kim Jong – un në Korenë e Veriut ka Gjykata, por Shqipëria i humbi ato falë Ramës dhe Sorrosit.. A mund ta lejojë këtë Amerika. JOOO, dhe JOOO sepse populli shqiptar është aleati më Besnik i Amerikës.

Të ndërpresë dorën George Sorrosit nga shkatërrimi i VENDIT MË TË DASHUR PËR AMERIKËN – Shqipërisë – Vend antar i NATO – s duke destabilizuar dhe ndarë edhe Kosovën në përfitim të Serbisë.

Shoqëria e Hapur e George Sorrosit është Hapja e Shqipërisë dhe nënshtrimi i saj ndaj krimit, drogës, korrupsionit dhe për rrjedhojë DIKTATURËS së Edi Ramës. Kjo ka sjellë dëshpërim dhe Shqiptarët ikin më shumë në numër se Sirianët nga Lufta.

Shoqëria e Hapur është Vdekja e Ngadalshme e Demokracisë në Shqipëri dhe ne e kundërshtojmë atë.

PRESDIENT TRUMP Get rid of this Cancer, Please!

Shqiptarët kërkojnë një demokraci të vërtetë dhe jo atë të pinjollëve të diktaturës si Edi Rama.

Duke e përfunduar dua të falenderoj të tërë pjesmarrësit në këtë tubim dhe uroj që të bashkohemi dhe të luftojmë për të drejtat e Kombit tonë sa herë që ato preken. Ne jemi Populli që e do më shumë Amerikën.

Zoti e bekoftë Amerikën

Zoti e bekoftë Shqipërinë

Zoti i bekoftë shqiptaro – amerikanet

Falemnderit!

*-FJALA E Z AGIM REXHAJ, NE PROTESTEN E MBAJTUR PARA SHTEPISE SE BARDHE, TE DJELEN , 7 KORRIK 2019-

*Per me shume fotografi shihni ne Facebook(dalip Greca)

BOTA ME NJE SY

July 8, 2019 by dgreca

Hyrje/
Gjatë më shumë se një çerek shekulli jete në SHBA u mësova ta shoh botën me një këndvështrim të plotë e të paanshëm.
Me këtë botkuptim, gjashtë vjet më parë, u ula për të shkruar librin “Yjet nuk janë të kuq”, kushtuar figurës së Pal Melyshit dhe familjes të njohur të Melyshajve me të vërtetat jetsore e historike.
Libri i ri që keni në dorë është ditari i nënës sime, motrës së Palit. Gjatë leximit u shkreha në vaj disa herë, sepse kishte shumë gjëra që unë, e bija, nuk i dija. Më kujtohet që nëna më pat thënë për gjyshen që ajo i “mbante vuajtjet brenda vetes dhe fëmijëve të saj nuk ua thoshte kurrë, sepse nuk donte që ata të rriteshin të trishtuar”. Edhe nëna ime kishte bërë të njëjtën gjë me ne.
Një lexuese më pyeti nëse “Bota me një sy” mund të konsiderohet si pjesë e dytë e librit “Yjet nuk janë të kuq”, e sagës së Melyshajve. Po, ky libër mund të konsiderohet si pjesë e sagës.
I dedikohet dy zonjave për mua të pakrahasushme, që u bënë viktima të urrejtjes klasore brenda e jashtë familjes: Nënë Davës, -nënës së Pal Melyshit, dhe motrës së tij të vetme Marie Melyshit. Libri shpalos atmosferën armiqsore në të cilën mbijetuan, në rastin më të ashpër të luftës së klasave -brenda familjes, që u zhuriste zemrën si hekur i skuqur i ferrit.
Për Pal Melyshin është folur herë pas here në shtyp e u shkruan libra. U bë edhe një film për të “Operacioni zjarri”. Por heroin e lanë “jetim”, të shkëputur nga familja e tij imediate. Askush s’foli për nënën e tij, motrën, dhe as për vëllezërit në moshë të njomë që shoqëronin nënën e tyre nga një internim në tjetrin, për 12 vjet. Askush nuk e përmendte kalvarin e mundimshëm të kësaj gruaje të pafajshme pas telave me gjëmba. Pse?

Bota qe e madhe, por ne kishim vetëm një sy për të parë e një vesh për të dëgjuar.
Ndërkohë brezit të ri i duhet të gërmojë thellë në minierë për të njohur botën në të cilën jetuan prindërit e gjyshërit e tyre.
Shpresoj që ky libër-ditar të jetë një kontribut për ta.

Albana Melyshi Lifschin
Shkurt, 2019. USA
Episodi 1/
Zjarri partizan rrëmben kullën e Melyshajve
Tërë atë natë askush nuk vuri gjumë në sy në kullën tonë. Ka mbetur një nga netët më të paharruara të jetës sime.

Qentë lehnin e lehja e tyre qe ndjellakeqe. Gratë kishin mbledhur fëmijët pranë vetes e psherëtinin.

Plaku i shtëpisë, gjyshi ynë, u ngrit dy- tri herë e doli në oborr duke u sokëllirë qenve që të pushonin.

Mbaj mend gjyshen që i u afrua e i tha:

-Leni qentë, o plak, se nuk kanë leh kurrë si sonte!

Pastaj ajo lëshoi një ofshamë të thellë:

-Lehja e qenve për kët shtëpi asht lajm i keq! Oh, e mjera unë! Ku i kam djemtë? Ku i kam nipërit?!

-Mbahu, plakë, se kurrë s’të kam pa të të lëshojë zemra! Të pata marrë prej dere trimash.

Gjyshi qe ulur te vendi i tij, tek oxhaku, ku trazonte hirin ende të ngrohtë.

-Mandej as djemtë e as nipërit nuk janë ma kalamaj e po të kujtoj se burrat e kësaj shtëpie të tanë kanë vdekë nga plumbi e jo nga qyrret!

Unë u ngjesha pas fustanit të nënës sime. Atë kohë isha rreth 12 vjeçe. Në kullë kishim një çift të varfër pleqsh, të cilëve gjyshi u kishte dhënë strehë. Ishin bërë pjesëtarë të familjes, ishin si të gjithë ne. Edhe ata rrinin të tulatur pas njëri-tjetrit, po nuk flisnin asnjë fjalë. Atë natë askush nuk vuri gjumë në sy. Kur filloi të zbardhte, njerëzit e shtëpisë zunë të hiqnin shulet dyerve të kullës për të dalë jashtë, siç bënin çdo mëngjes.

Papritur, nga oborri u dëgjua një zë i plotë burri me dialekt tosk:

-Ndal! Mos lëvizni! Jeni të rrethuar!

Njerëzit në kullë ngrinë. Nuset e reja u tmerruan. Fëmijët, tek panë nënat e tyre të trembura, ia plasën të qarit. Çifti i pleqve të vobektë u trembën shumë. Nana jonë u ngrit e iu afrua gjyshit.

-Babë, dikush nga ne duhet të dalë të marrë vesh për se na kanë rrethu. Në më lejofsh, dal e flas unë me ta. Im bir e im shoq janë partizanë.

-Do të dal vetë! – tha gjyshi me një zë të vendosur.

Nana bëri mënjanë. Gjyshi u dha në derë. Ne mbajtëm frymën. Dëgjuam që i tha dikujt:

-Në ke ardhë për mik, futu në kullë të ngrohesh, në të kundërt na thuj ç’farë ka ba vaki?

-Prit këtu, o plak, se po thërras komisarin që të bisedoni,- qe përgjigjja.

Pas pak u dëgjua një zë që foli duke u përpjekur të përshtaste dialektin:

-Tu’ngjat’jeta, bajraktar!

Quhej Petrit Pëllumbi. Nuk do t’ia harronim kurrë emrin që nga ajo ditë që ia mësuam. Kishte një vështrim të keq. Në zë i ndihej ironia. E pyeti gjyshin se ku i kishte burrat e shtëpisë dhe pastaj i komunikoi urdhërin e internimit për të gjithë familjen që ndodhej aty, çka nënkuptonte gjyshin dhe gjyshen, axhën, nënën time, mua me dy vëllezërit më të vegjël, gruan e xhaxhait me tri vajza

të vogla, gruan e kushëririt të parë me dy djem… Dy pleqtë e vobektë që jetonin në shtëpinë tonë, nuk ishin përfshirë në listën e internimit, por ata e ndjenë veten më keq se të gjithë. Si do të bënin pa ne? Ku do të shkonin qyqarët pas djegies së shtëpisë? Kush do të kujdesej për ta?

Komisari bëri apelin e na nxori të gjithëve jashtë nga shtëpia duke urdhëruar të mos merrnim asgjë me vete,me përjashtim të rrobave të trupit. Nana jonë u përpoq të shpëtonte një batanije të kuqe të leshtë duke menduar që me të, të mbulonte fëmijët. Por ai e shtyu tutje duke i thënë:

-Vetëm rrobat e trupit!

Kullës sonë qe vendosur t’i vihej flaka. U mor shpejt e shpejt bar nga mullarët e u fut në të dy katet e kullës dhe pastaj asaj iu vu zjarri.

Nana ime, që partizanët i quante shokë të të birit, pasi edhe ai ishte partizan, lëshoi zë: – Largohuni ma andej djemtë e nanave, se kjo shtëpi ka kenë e pushkës, e bukës dhe e besës, por muret e saj janë të mbushuna me armë e municion.

Sa mbaroi nana këto fjalë, u dëgjua shpërthimi i tyre.

Partizanët bënë disa metra larg që në krismën e parë. Ne ishim mpirë të gjithë. Na dukej e pabesueshme pamja që po na shihnin sytë. Po digjej shtëpia jonë, kulla e madhe e bajraktarit, që i kishte mbajtur hapur dyert e saj për shtegtarin e panjohur, ditën dhe natën.

Po digjej shtëpia që kishte pritur partizanët e uritur, kujtimin e të cilëve e kishin ende të freskët edhe më të vegjëlit e shtëpisë. Gruaja e axhës mbushte furrën me bukë për partizanët e nana jonë ua mbushte trastat me ushqim. Ishte e pabesueshme që kulla të digjej pikërisht nga ata!

Flaka vazhdonte të dilte nga të shtatë dhomat e saj dhe nga kuzhina e gatimit. Gjuhët e flakëve dilnin nga dyert e dritaret e bëra prej pishe. Nga brenda digjeshin sëndukët e drunjtë të grave të shtëpisë. Ne fshinim lotët,por askush s’thoshte gjë. Komisari kishte porositur të na vëzhgonin me kujdes të gjithëve gjatë djegies së kullës.

Zjarri zgjati deri pasdite.

Në perëndim të diellit, i ra fuqia. Gjyshi iu afrua komisarit partizan e i tha:

-Ju i dogjët të tana, pa mendu se kjo shtëpi ka dy parti. I ka dhanë luftës dy partizanë: tim bir Nikollin e tim nip Palin, i biri i tim biri. Nuk rujtët të paktën as dy dhoma për ta. Unë di që kjo luftë u ba për drejtësi.

I pashë se si ata u mblodhën kokë më kokë për disa minuta. Pastaj u shpërndanë pa i dhënë përgjigje gjyshit. Na vunë në rresht njësh kolonë të gjithëve sa u ndodhëm në shtëpi, 25 veta, e kështu morëm atë udhëtim të detyruar pa ditur se ku.

Kaluam shtigje e përrenj e pas disa orëve rrugë, të shoqëruar para e pas me ushtarë të armatosur, mbërritëm në Shpal. Bagëtitë e sekuestruara na vinin pas. Në Shpal na mbajtën të mbyllur pa ngrënë e pa pirë, pa ujë e pa dritë, për njëzet e katër orë në një barakë të vetme të gjithëve. Unë nuk qaja, por fëmijët qanin pareshtur e të rriturit flisnin me zë të ulët. Ajo barakë pa tavan u bë shtëpia jonë për dy javë. Pranvera qe ende larg.

Kishim të ftohtë në trup e akull në shpirt. Nana ime fliste me vete: “Ku asht im shoq? Ku asht im bir? A janë gjallë? A i dinë ata këto që po na ndodhin ne?” Psherëtinte vazhdimisht. Më vinte shumë keq për të. S’e kisha parë kurrë më të dëshpëruar. I rrija afër si më e madhja e fëmijëve, po nuk dija si ta ngushëlloja. Njëlloj si ajo, edhe unë pyesja veten: ”A është baba gjallë? Po Pali? Pse nuk vijnë për me na shpëtu? Përse?

Libri “Bota me një sy” u përgatit për botim nga

Albana Melyshi Lifschin

Shkurt 2019, USA

Gjakova priti mikun e shqiptarëve Eliot Engel

July 6, 2019 by dgreca

Gjakova dhe Malësia e Gjakovës, kanë pritur sot mikun e madh të shqiptarëve, kongresistin amerikan Eliot Engel, të cilit i kanë rezervuar një pritje madhështore, ashti siç ishte madhështore edhe përpjekja e vazhdueshme e tij në shërbim të kombit shqiptar.Fillimisht kongresisti Engel, ka vizituar Qendrën Kreative “Bone Vet”, me ç ‘rast nga stafi i kësaj qendre dhe nga kryetari i komunës së Gjakovës është njoftuar për së afërmi me aktivitetin e përditshëm dhe misionin e “Bone Vet”

Më pastaj, kongresisti Engel i shoqëruar nga bashkëshortja e tij, bashkëpunëtorët dhe dy veprimtarët shqiptaro – amerikan Harry Bajraktari dhe Rrustem Geci, është ndalur në pikën kufitare të Qafë Morinës, aty ku është zhvilluar ceremonia e emërtimit të rrugës Ponoshec – Bajram Curri, me emrin “Eliot Engel”, vendim ky i marrë bashkërisht nga komuna e Gjakovës dhe bashkia e Tropojës.Nga ana tjetër, presidenti shqiptar Ilir Meta, në fjalën e tij ka thënë se emërtimi i rrugës me emrin e Eliot Engel është më e pakta që shqiptarët kanë mundur të bëjnë për të nderuar kontributin e tij dhe të popullit amerikan, por ka shtuar se në aspektin emocional emri i Eliot Engel është jo vetëm në këtë rrugë, por në zemrat e të gjithë shqiptarëve në tërë botën.

Ndërkohë, duke folur para të pranishmëve, vet kongresisti Eliot Engel se përgjatë këtyre viteve ka dëgjuar për Shqipërinë dhe Kosovën dhe për mikpritjen e shqiptarëve, por tashmë është i lumtur që ka ardhur edhe personalisht t’i shoh këto dy vende të ta përjetojë këtë mikpritje.Ai ka rikujtuar ditët e vështira të shqiptarëve dhe faktin se ky popull nuk e humbi asnjëherë shpresën duke luftuar për liri e demokraci, prandaj edhe ka garantuar se me këtë frymë, aleanca dhe miqësia në mes të popujve shqiptar dhe atij amerikan nuk do të zhduket asnjëherë.Kongresisti Engel dhe delegacioni që po e shoqëron kanë zhvilluar një vizitë edhe në qytetin e Bajram Currit dhe në Luginën e Valbonës, për tu kthyer përsëri në Gjakovë, për të vënë kurora me lule në Pllakatin e vendosur në sheshin “Tom Lantosh” dhe për të zhvilluar një takim me kryetarin e komunës së Gjakovës Ardian Gjini.