Archives for September 2023

Vushtrri, 25 shtator 2023/

Kryeministri i Republikës së Kosovës, Albin Kurti, ishte sot në fshatin Samadrexhë të Vushtrrisë, ku me ceremoni shtetërore u varros polici i rënë dje në krye të detyrës, Heroi i Republikës së Kosovës, Afrim Bunjaku.

Para të pranishmëve të shumtë, familjarëve e kolegëve të të ndjerit, përfaqësuesve të institucioneve të vendit e atyre ndërkombëtare, kryeministri Kurti tha se rënia në detyrë e Rreshter Afrim Bunjakut i veshur me uniformën e Policisë së Kosovës, është një sakrificë në betejën e Kosovës për ligj dhe kushtetutshmëri, për drejtësi e të drejta, për çdo qytetar të Kosovës pa dallim. Ai tha se heroizmin e Afrimit e vazhduan sërish me profesionalizëm dhe vetëmohim kolegët e tij, policët e Kosovës, që i përballën grupet e armatosura kriminale e terroriste të Serbisë në veri të Kosovës.

Kryeministri ndër të tjera tha se dhënia e jetës për popullin dhe tokën që të ka lindur dhe rritur është vepra më sublime që mund ta bëjë një njeri, se dëshmori është grada më e lartë pas të cilës asgjë dhe askush nuk mund ta degradoj atë, dhe se pjesëmarrja në varrim është obligimi ynë i fundit për jetën e tij, kurse nderimi i veprës dhe vazhdimi i idealeve të saj, është obligimi i përjetshëm i ne të gjallëve për dëshmorët.

Fjala e kryeministrit Kurti:

Të dashur qytetarë,

E nderuara Presidente, Kryeparlamentar,

E nderuara familje Bunjaku, policë të Kosovës, kolegë të heroit Afrim Bunjaku,

Ministra e zëvendësministra, e deputetë e zyrtarë shtetërorë, të Kosovës, të Shqipërisë dhe të vendeve mike e partnere,

Komandat Bashkim Jashari,

Drejtor i policisë, Gazmend Hoxha,

Baca Rifat,

Kryetarë të Komunave,

Myfti Naim,

Shkëlqesi ambasadorë e diplomatë të tjerë,

Motra dhe vëllezër nga e gjithë Kosova që keni ardhur sot këtu në Samadrexhë të Vushtrrisë për ta nderuar veprën e heroit Afrim Bunjaku dhe për t’i dhënë lamtumirën. Dhënia e jetës për popullin dhe tokën që të ka lindur dhe rritur, është vepra më sublime që mund ta bëjë një njeri. Dëshmori është grada më e lartë pas të cilës asgjë dhe askush nuk mund ta degradoj atë. Pjesëmarrja në varrim është obligimi ynë i mbramë për jetën e tij, kurse nderimi i veprës dhe vazhdimi i idealeve të saj, është obligimi i përjetshëm i ne të gjallëve për dëshmorët.

Për heroin e Republikës së Kosovës, Afrim Bunjakun, dje erdhëm për t’u shprehur ngushëllime dhe për t’u dhënë mbështetje familjes Bunjaku këtu në Samadrexhë të Vushtrrisë, kurse në mbrëmje, bashkë me ministra të Qeverisë dhe deputetë të Kuvendit, si dhe me shumë qytetarë ndezëm qirinj në Prishtinë, para stacionit qendror policor.

Afrim Bunjaku u qëllua dhe u vra në një natë me hënë, teksa po kryente detyrën bashkë me kolegët e tij që morën plagë në atë rast. Në orët që pasuan gjatë ditës së 24 shtatorit, nën dritën e diellit u ndriçuan rrethanat dhe kryerësit e këtij akti kriminal dhe terrorist. U ndriçuan nga kolegët e Afrimit, pjesëtarë të Policisë së Kosovës që me profesionalizmin më të lartë, reaguan në përputhje me rrethanat. Ata e kryen detyrën e tyre, e nderuan Afrimin, na nderuan të gjithë neve dhe Republikën e Kosovës!

Çdo minutë të një dite të gjatë zbatonin ligjin dhe mbronin territorin, mbanin rendin dhe ruanin qytetarët, për paqe me siguri, për të gjithë me secilin.

Rënia në detyrë e Rreshter Afrim Bunjakut i veshur me uniformën e Policisë së Kosovës, është një sakrificë në betejën e Kosovës për ligj dhe kushtetutshmëri, për drejtësi e për të drejta, për çdo qytetar të Kosovës pa dallim. E heroizmin e Afrimit e vazhduan sërish me profesionalizëm dhe vetëmohim kolegët e tij, Policët e Kosovës, që i përballën grupet e armatosura kriminale e terroriste të Serbisë në veri të Kosovës. Përballë këtyre strukturave armiqësore, do të ngadhënjejë Kosova me përpjekjen e saj legjitime për rend dhe ligj dhe sovranitet, në gjithë territorin e Republikës së Kosovës dhe për të gjithë qytetarët e saj.

Me terrorin dhe krimin nuk ka kompromis. Dje jo vetëm që janë rrezikuar, por edhe janë cenuar sovraniteti shtetëror, integriteti territorial dhe siguria kombëtare. Sot, përpara se Afrim Bunjaku të varroset si një hero në tokën e tij, portreti dhe profili i Afrimit le të skaliten në kujtesën tonë fotografike dhe në mbamendjen tonë kolektive, si fytyra e një heroi dhe si vepra e një dëshmori!

Afër Afrimi, larg krimi!

Lavdi Rreshter Afrim Bunjakut, Heroit të Republikës së Kosovës dhe dëshmorit më të ri të tokës së saj: lavdi sot e mot, gjithnjë e përgjithmonë!

Prishtinë, 25 shtator 2023/

Kryeministri i Republikës së Kosovës, Albin Kurti, sot mori pjesë në mbledhjen komemorative në nderim të policit të rënë në detyrë, Heroit të Republikës së Kosovës, Afrim Bunjaku.

Kjo ditë, u shpreh ai, është dita kur do t’i bëhen nderimet më të larta shtetërore dhe gjithëpopullore policit Afrim Bunjaku, sepse bashkë me pikëllimin dhe dhembjen, ndjejmë krenari dhe besim për Afrimin dhe për të gjithë policët e Policisë së Kosovës.

Në këtë mbledhje komemorative, nën patronatin e ministrit të Punëve të Brendshme, Xhelal Sveçla, Presidentja e Republikës së Kosovës, Vjosa Osmani Sadriu i ndau post-mortem, urdhrin më të lartë Afrim Bunjakut, Hero i Republikës së Kosovës.

Fjala e plotë e kryeministrit Kurti:

Shkëlqesia juaj Vjosa Osmani- Sadriu, Presidente e Republikës së Kosovës,

I nderuari Glauk Konjufca, Kryetar i Kuvendit të Republikës së Kosovës,

I nderuari Xhelal Sveçla, Ministër i Punëve të Brendshme,

I nderuar Gazmend Hoxha, Drejtor i Përgjithshëm i Policisë së Kosovës,

E nderuara familje Bunjaku, bashkëshortja Lumnija, vajza Arbenita, djemtë Jetlum dhe Fatlum,

Të nderuar përfaqësues të korit diplomatik,

Të nderuar përfaqësues të kabinetit qeveritar,

Të nderuar deputetë të Kuvendit të Republikës,

Të nderuar zyrtarë policorë, kolegë të rreshter Afrim Bunjakut,

Të dashur qytetarë,

Të nderuar të pranishëm,

Zonja dhe zotërinj,

Motra dhe vëllezër,

Dita e djeshme, e diela e 24 shtatorit 2023, na ka mbledhur ne sot këtu dhe shpirtërisht me gjithë Kosovën për ta nderuar veprën e Afrim Bunjakut, pjesëtarit të Policisë së Kosovës të rënë në kryerje të detyrës. Dita e sotme është ditë zie në vendin tonë, për shkak të pikëllimit dhe dhembjes së përbashkët për Afrim Bunjakun, rreshterin e policisë sonë që e humbëm dje. Por e sotmja, është edhe dita kur do t’i bëhen nderimet më të larta shtetërore dhe gjithëpopullore policit Afrim Bunjaku, sepse bashkë me pikëllimin dhe dhembjen, ndjejmë krenari dhe besim për Afrimin dhe për të gjithë policët e Policisë së Kosovës; për policinë tonë që me veprimet e saj profesionale dhe të guximshme dje e pamundësuan një skenar më të gjerë kriminal e terrorist.

Le ta themi qartë edhe sot, sikurse dje: Afrim Bunjaku u vra gjatë një sulmi ndaj policëve të Kosovës dhe ndaj vetë shtetit tonë, nga një grup personash shumë të armatosur dhe të pajisur rëndë, të trajnuar profesionalisht dhe me plan, të përkrahur politikisht, të financuar materialisht dhe të mbështetur logjistikisht nga Serbia. Reagimi profesional i Policisë sonë rezultoi me eliminimin e disa terroristëve e kriminelëve, arrestimin e disa të tjerëve dhe neutralizimin e gjithë grupit të tyre si dhe konfiskimin e shumë armatimeve dhe mjeteve të tjera mbështetëse logjistike.

Nga dje, asgjë më nuk mund të jetë njësoj: faktet dolën sheshazi përballë nesh, në sytë tanë dhe të bashkësisë ndërkombëtare si dhe në sytë e secilit që ka kurajo dhe vullnet për ta parë të vërtetën e rajonit në të cilin jetojmë.

Ky reagim profesional dhe i matur i institucioneve të Kosovës dje, ishte në përputhje me vetë natyrën e shtetit tonë demokratik dhe properëndimor.

Afrim Bunjaku 50 vjeçar nga Samadrexha e Vushtrrisë, ishte i martuar dhe bashkë me gruan e tij Lumnije Hazirin, ishin prindër të tre fëmijëve: Arbenitës 25 vjeçare, Jetlumit 18 vjeçar dhe Fatlumit 10 vjeçar. Ky i fundit, e ka trashëguar emrin e të vëllait Fatlumit, që ishte 17 vjeçar, kur më 2012 e kishte humbur jetën në një aksident trafiku.

Pas kryerjes së Shkollës së Shërbimit Policor të Kosovës në vitin 2001, Afrim Bunjaku ka shërbyer në stacionin policor në Vushtrri deri më 4 maj 2007, kur ishte graduar rreshter. Rreshter Afrim Bunjaku e vazhdoi shërbimin e tij për shtatë vite si udhëheqës i ekipit në stacionin policor në Mitrovicë të Jugut deri në vitin 2014, kur u kthye sërish në Vushtrri për të shërbyer si instruktor në Akademinë e Kosovës për Siguri Publike.

Nga viti 2015, Afrimi shërbeu si udhëheqës i ekipit reagues në stacionin policor të Vushtrrisë, kurse nga 6 janari i vitit 2023, Afrim Bunjaku ka qenë i caktuar në stacionin policor në Zveçan, në detyrën e mbikëqyrësit të ekipit patrullues. Plot 22 vite të kaluara në uniformën e Policisë së Kosovës, pra që nga viti 2001, e deri në ditën kur ra në kryerje të detyrës me po këtë uniformë, janë vite shërbimi dhe sakrifice që e bëjnë hero Afrim Bunjakun: hero të Republikës së Kosovës!

Sot, përballë e pranë fotografisë me portretin e Afrim Bunjakut në uniformë të policisë së Republikës sonë dhe përballë veprës së tij heroike, përkulemi me nderime dhe respekt, si dhe zotohemi për drejtësi dhe kujtesë.

Ne bëjmë atë që duam sepse duhet: ligjshmëri dhe kushtetutshmëri, paqe dhe siguri, për të gjithë dhe secilin, pa dallim.

Lavdi rreshter Afrim Bunjakut, heroit të Republikës së Kosovës!