Albanian American Newspaper Devoted to the Intellectual and Cultural Advancement of the Albanians in America | Since 1909
Sot në orën 11 am kryetari i Komunës së Preshevës Z.Shqiprim Arifi do të zhvillojë një vizitë zyrtare në Federatën Pan-Shqiptare të Amerikës Vatra.
Ai do të zhvillojë një bashkëbisedim në Selinë Qendrore të Vatrës me vatranët dhe komunitetin shqiptar në New York e më gjërë.
Ftohen mediat dhe komuniteti që të marrë pjesë.
Rafaela Prifti/
Arkimandriti Nikodhim është Peshkopi i Bostonit dhe i Kryedioqezës shqiptare nën kupolën e Kishës Ortodokse në Amerikë (OCA). Besimtarët pjesëmarrës në shugurimin ceremonial të tij në 16 shtator në Katedralen Ortodokse Shqiptare të Shën Gjergjit në lagjen Bostoni i Jugut (South Boston) e ndiejnë rëndësinë historike që ka ky moment. Peshkopi Nikodhim eshte pasadhës i Hirësisë së tij Nikon (Liolin) (1945-2019) i cili e ishte mësuesi i tij, ndërsa ai vetë pohonte se ishte pasuesi i Metropolitit Fan Noli (1882-1965). Ruajtja e vazhdimësisë nënkupton stabilitet dhe qëndrueshmëri, të cilave kisha si institucion u kushton shumë vëmendje. Artur Lionlin, ish-Kancelar i Kryedioqezës Shqiptare të Bostonit, ku ka shërbyer për 50 vjet, dhe vëllai i Peshkopit të mëparshëm, tha se ceremonia do jetë diçka e paharrueshme për të gjithë ata që do kenë fatin të jenë dëshmitarë. At Liolini nuk mund të ishte fizikisht i pranishëm, por nëpërmjet birit të tij Evans tha: “Jemi të kënaqur të shohim vazhdimësi për Kryedioqezën Shqiptare.”
Hirësisë së tij i është dhënë titulli Kancelar Nderi në vitin 2021 kur në atë post u vendos përkohësisht Igumeni Nikodhim.
Ceremonia ka peshë historike edhe për shkak të vendit të veçantë që ka Kisha e Shën Gjergjit në Boston për historinë e komunitetit dhe të kombit shqiptar. “Kisha Ortodokse shqiptare në Amerikë dhe Vatra kanë luajtur rol kyç për çështjen kombëtare, duke qënë dy shtyllat që kontribuan në momentet më të vështira për kombin shqiptar,” tha Kryetari i Nderit i Vatrës Agim Rexhaj. Në këtë ditë, Federata PanShqiptare e Amerikës Vatra përfaqësohej nga z. Rexhaj, Sekretarja Nazo Veliu, Editorja e Anglishtes së gazetës Dielli Rafaela Prifti dhe Petrit Alibeaj i Degës së Vatrës Boston.
Peshkopi Nikodhim, 44 vjeçar, i lindur Nathan Preston në një familje amerikane protestante nga Idaho, ka kryer studimet teologjike dhe ka shërbyer mbi dhjetë vjet në Kishën Ortodokse Shqiptare të Shën Nikollës në Nju Jork. https://gazetadielli.com/father-nikodhim-gets-a-farewell…/
At Nikodhim u zgjodh Peshkop në Asamblenë e Dioqezës shqiptare në shtator të vitit të kaluar në Nju Jork. I pari peshkop joshqiptar i zgjedhur në këtë post do mbikqyrë tani kishat shqiptare nën kupolën e Kishës Ortodokse OCA. Shumë klerikë amerikanë dhe me prejardhje të tjera si ruse, rumune etj, kanë shërbyer dhe shërbejnë me përkushtim në famullitë e dioqezës shqiptare në Amerikë prej shumë viteve. Vetë At Nikodhim u përkujdes të përgatiste pasardhës si Dhjaku Eugen (Eugene), gjatë periudhës së shërbesës në Kishën e Shën Nikollës (Shën Kollit) në Nju Jork.
Numri i priftërinjve shqiptarë në Shtetet e Bashkuara dhe në dioqezën shqiptare nën Kishën Ortodokse në Amerikë është i pakët. Vala e emigratëve shqiptarë në këtë vend rritet me shpejtësi në dekadat e fundit. Fluksi e vendos më shumë në rend të ditës çështjen e përgatitjes së klerikëve për kishën.
Nga ana e tij, Hirësia e tij Tikhon, Kryepeshkop i Uashingtonit dhe Metropolit për Amerikën dhe Kanadanë, shprehu qëndrimin e Kishës Ortodokse në Amerikë ku aderojnë Dioqezat e pakicave midis tyre edhe ajo shqiptare që nga viti 1971. “Ndasitë etnike dhe gjuhësore nuk i shërbejnë punës në emër të Zotit,”- tha Kryepeshkopi Tikhon.
Komuniteti shqiptar ka ndjeshmëri për mbajtjen e liturgjisë në gjuhën shqipe. Në hirësimin e Nikodhimit u ndoqën nomet kanonike të ortodoksisë dhe gjatë betimit të Peshkopit të zgjedhur, veshjes me rrobet e hierarkut u kënduan hymne dhe lutje në shqip dhe në anglisht. https://gazetadielli.com/highlights-ahead-of-ordination…/
Në mbyllje, gjashtë klerikët pjesëmarrës në dorëzimin e Nikodhimit Peshkop e drejtuan të ulej në fronin e tij, shoqëruar me fjalët “I Denjë”. Duke mbajtur “stapin e peshkopit” – relike e paraqitur në foto dhe portrete të klerikëve paraardhës, Nikodhimi i saposhuguruar përmendi se gjatë përgatitjeve te diteve te fundit në kishë u gjet “pagëzori” i Nolit, i parë si shprehje simbolike e vazhdimësisë dhe unitet të dioqezës.
Mes besimtarëve pjesëmarrës në kishën e Shën Gjergjit ishin anëtarët e familjes Preston nga Idaho, të mbledhur në “A Big family reunion” (bashkim të gjerë familjar,) tha Nikodhimi.
Hirësimi i Nikodhimit Peshkop i Bostonit dhe Dioqezës Shqiptare shihet si provë për kishën dhe komunitetin shqiptar në përpjekjet për të qenë të bashkuar.
Sokol Paja/
New York, 16 Shtator 2023 – Promovim madhështor i librit “Mri Dedja e Mërrnaçajve, zoja e hekurt me shpirt florini”. Në sallën e Konferencave “Nënë Tereza”, pranë Kishës Katolike “Zoja e Shkodrës” në Hartsdale – New York, libri i studiuesit Jozef Radi ngjalli kureshtjen e komunitetit shqiptar dhe mbarë diasporës shqiptaro-amerikane në New York e më gjerë. Me pjesëmarrjen masive të komunitetit, miqve e familjarëve, dashamirësve të librit, përfaqësuesëve të Kishës e mediave të komunitetit, libri “Mri Dedja e Mërrnaçajve, zoja e hekurt me shpirt florini” është një vepër e shkëlqyer rreth rrëfimeve në vetën e parë të shqiptares së shquar Mri Mërrnaçaj, përfaqësuese e dy prej familjeve më të nderuara e respektuara në Kelmend të Malësisë së Madhe, Nilaj e Merrnaçaj. Ky botim është një nderim i veçantë për vuajtjet, qëndresën dhe sakrificën heroike të femrës shqiptare. Libri homazh për prindërit e Mrisë, djalit Nik Merrnaçaj e bashkëshortit të ndjerë Marash Merrnaçaj, paraqet qendresën antikomuniste të familjes, arratisjen nga ferri komunist, emigrimin drejtë Malit të Zi e më pas rrugëtimin në Shtetet e Bashkuara të Amerikës. Nën prezantimin brilant të Mikela Nonaj, Famullitari Dom Pjetër Popaj teksa shpalosi tragjizmin dhe vuajtjet në libër, e quajti Mri Mërrnaçajn një heroinë të vërtetë dhe në fjalën e tij foli për fetarinë, bujarinë, fisnikërinë, mirësinë e vlerat e jashtëzakonshme të familjes Merrnaçaj e në veçanti të Mrisë. Një dokumentar historik i përgatitur me profesionalizëm nga TV Albanian Culture paraqiti për pjesëmarrësit jetën e vështirë e plot sakrifica dinjitoze të Mri Mërrnaçaj e familjes së saj. 25 vite në shërbim të komunitetit shqiptar në Amerikë, Adem Belliu dhe familja e tij mediatike kanë pasur një lidhje e miqësi me familjen Mërrnaçaj që dokumentohet dhe në dokumentar.
Majori i Yonkersit Mike Spano pasi falenderoi të pranishmit e organizatorët u shpreh se mësimet e historisë kalojnë nëpërmjet dhimbjeve e vuajtjeve. Mësuesja Liza Pllumbi shpalosi në detaje aspekte jetësore të familjes Merrnaçaj dhe u ndal te vlerat e larta të Mrisë në përballje me vuajtjet dhe fatin e jetës.
Prek Ndue Pllumaj apeloi për të pranishmit që të mos harrohet historia e lavdishme e Kelmendit. Pjesa muzikore me violinë e luajtur nga Rozeta Ujkaj e Mimoza Lleshaj shërbeu për pjesëmarrësit si një moment reflektimi, paqeje e qetësimi shpirtëror. Studiuesi Idriz Lamaj u ndal në aspekte shpirtërore të rrëfimit të heroinës Mri Mërrnaçaj. Studiuesi Lamaj kishte sjellë me vete një libër të vogël uratësh dhe ia tregoi Famullitarit Popaj në shenjë nderimi ndaj Monsinjor Zef Oroshit që ia kishte dhuruar Idriz Lamajt plot 52 vite më parë. Lindita Harizaj Dema u shpreh se në libër gjejmë pjesë nga dramat tona, gjej shumë femra shqiptare. Ky është një libër i dhimbshëm e heroik ku kam gjetur dhe veten time ku Mrija është model i nënës, motrës e gruas shqiptare, tha ndër të tjera zonja Harizaj-Dema. Marjana Naçaj e cilësoi librin si rrëfim i nevojshëm për historinë kombëtare. Shkrimtari Mhill Velaj në fjalën e tij e cilësoi librin si burim historik, dokumentar e letrar, i shkruar me një gjuhë të ëmbël me rrëfime e përjetime autentike. Libri përjetëson një figurë heroike të femrës shqiptare. Asllan Bushati lexoi kumtesën e Sami Milloshit i cili e quajti librin enciklopedi.
Autori i librit Jozef Radi shpjegoi etapat e përgatitjes së librit dhe deklaroi për pjesëmarrësit se libri është një monument për femrën shqiptare. Ai falënderoi në mënyrë të veçantë familjen Mërrnaçaj, Mark Mërrnaçajn, Prek Pllumajn e Anton Përdodën. Personazhi që i dedikohet libri, Mri Mërrnaçaj në fjalën e saj falënderoi Dom Pjetër Popaj, At Gazmend Tinaj, Mark Mërrnaçaj, Jozef Radi, të gjithë folësit e të gjithë pjesëmarrësit.
At Gazmend Tinaj në fjalën e tij deklaroi se rrëfimi i Mri Mërrnaçaj është shpallje, është simfoni e trishtë melankolike. Janë rrëfime zemre. Zemra është memoria e ngjarjeve të trishta të njeriut. Libri është si një rrëfim për të mos harruar kurrë, u shpreh At Tinaj. Mark Gjonaj në fjalën e tij theksoi se Marash e Mri Mërrnaçaj tragjeditë i kthyen në forcë e dhimbjen ne fuqi për të ecur përpara me dinjitet e krenari. Promovimi i librit “Mri Dedja e Mërrnaçajve, zoja e hekurt me shpirt florini, rrëfime t’nji jete” bashkoi shqiptarët e Amerikës në respekt, vlerësim e mirënjohje të familjes Mërrnaçaj, qendresën e tyre, shembullin e për gjithçka që ata i kanë dhënë komunitetit shqiptar në Shtetet e Bashkuara të Amerikës. Në përfundim të promovimit familja Merrnaçaj shtroi një koktejl për gjithë të pranishmit dhe të ardhurat nga shitja e librit ia dhuroi Kishës Katolike “Zoja e Shkodrës” në New York.
Presidenti i Republikës së Shqipërisë z. Bajram Begaj do të zhvillojë një vizitë zyrtare në Federatën Pan-Shqiptare të Amerikës Vatra, ditën e Premte më 22 Shtator 2023 në orën 6 PM.
Z.Begaj do të zhvillojë një bashkëbisedim në Selinë Qendrore të Vatrës me vatranët dhe komunitetin shqiptar në New York e më gjerë.
Ftohen mediat dhe komuniteti që të marrë pjesë.
Zëri i Amerikës/
Rudina Dervishi, gazetarja dhe drejtuesja e njohur prej shumë vitesh e emisionit televiziv “Ditari” të Zërit të Amerikës, u nda nga jeta të martën, më 12 shtator, në moshën 53-vjeçare, pas një beteje dy vjeçare me kancerin e gjirit.
Ikja e saj e parakohshme, është një humbje e madhe për familjen dhe për kolegët e saj të Shërbimit Shqip të Zërit të Amerikës.
Për më shumë se 25 vjet, Rudina dha një kontribut të çmuar me profesionalizmin e saj si një gazetare e apasionuar, duke mbuluar tema të shumëllojshme nga ekonomia, politika, të drejtat e njeriut dhe të gruas, e deri tek arti.
Ne, kolegët e saj të Zërit të Amerikës, do ta mbajmë mend Rudinën për mprehtësinë, dinamikën, humorin dhe përkushtimin e saj.
Ajo la pas bashkëshortin, tre djemtë dhe nënën.