Dr. Bledar Kurti/
Arti i ri e përmbush artin e epokave të shkuara. Arti i ri nuk e përmbys dijen dhe emancipimin njerëzor. Përkundrazi, e plotëson atë.
Michelangelo progresoi nga Davidi i Donatello dhe Verrocchio për të çliruar Davidin e tij nga mermeri. E të gjithë artistët e mëvonshëm çuan përpara artin, estetikën dhe kulturën greko-romake, duke kulmuar në shekullin e 20-të me thjeshtëzimin, simbolizimin dhe minimizimin konceptual të historisë së zhvillimit njerëzor, me vepra që do krenonin etërit më të hershëm të fushave krijuese.
E njëjta gjë ka ndodhur edhe me krijimtarinë letrare. Homeri, Eskili, Virgiili, Dante, Shekspiri, etj, vendosën piketat e rrëfimit, stilit dhe artit të fjalës. Mjeshtrit e mëvonshëm ndërtuan mbi thesarin e së shkuarës duke krijuar vepra plotësuese që bartin frymën dhe shpirtin e krijimtarisë së mijëvjeçarëve.
Asnjë foshnjë nuk lind me rrudhat e jetës. Çdo rrudhë është një shenjë përvoje, një vragë dhimbje apo udhëtimi kohor.
Kësisoj, cilido që pretendon se meriton titullin e madh “shkrimtar” apo “artist” por që nuk është ushqyer me esencën e nuk ka mbllaçitur kurrë pjalmin e krijimtarisë epokale botërore, është thjesht një flluskë jashtë mbretërisë ekzistenciale, të ndërtuar me mund, gjak, sakrifica, revolucione, shtegtime, besim, privim dhe guxim.
Në moçalin post-modern me ujë të ndënjur mediokriteti, të shumtë janë ata që mendojnë se janë kurorë lavdie, kur në fakt nuk janë as një thua në trupin e përsosur e të qendrueshëm të dijes dhe krijimtarisë.
Për më tepër, ajo që duhet kuptuar mirë, e që fatkeqësisht është vandalizuar nga gaztorët e mendimit dhe krijimtarisë, është se arti, letërsia, muzika, edukimi, shkenca, filozofia dhe mendimi në tërësi janë të pandara. Janë univers. Nga kjo rrjedh fjala “universitet” (latinisht: universitas) që do të thotë “plotësi.”
Ky nuk është koncept por ligj i patjetërsueshëm i natyrës. Ndaj edhe Albert Einstein tha: Asgjë nuk ndodh derisa diçka lëviz. Kur diçka vibron, elektronet e të gjithë universit rezonojnë bashkë me të. Gjithçka është e lidhur. Plotësia pra. E shkuara, e tashmja dhe e ardhmja, në një pikë kohore që rezonon në univers përjetësisht, përmes një vepre arti, një libri, një simfonie, një shpikje, një zbulimi, një botëkuptimi.
Dhe pyetja nuk është nëse ti je apo nuk je pjesë e ekzistenciales por cilin rol ti zë në këtë gjithësi, atë të aktorit apo spektatorit, të artistit apo shikuesit, të shkrimtarit apo të lexuesit, të mjekut apo pacientit, të shkencëtarit apo të kavjes, të qenies së gjallë plot jetë apo të një hije që vetëm sa merr frymë, ecën, e pret, atë ditë, kur eshtrat të shpërndahen në grykën e varrit, në vendin ku vetëm flokët e thonjtë rriten, për pak kohë, aq sa edhe emri yt nis e harrohet.