dgreca – Page 1280 – Dielli

Amerika shënon përvjetorin e sulmeve të 11 shtatorit

September 11, 2018 by dgreca

Amerikanët shënuan të martën 17 vjetorin e sulmeve terroriste të 11 shtatorit 2001 ku humbën jetën pothuajse 3000 njerëz në Nju Jork, Virxhinia dhe Pensilvani.

Presidenti Donald Trump mori pjesë në një ceremoni në memorialin e 11 shtatorit në Shanksville të Pensilvanisë, pranë vendit ku avioni i United Airlines me numër fluturimi 93 u rrëzua pasi 40 pasagjerët dhe anëtarët e ekuipazhit rimorrën kontrollin e avionit nga rrëmbyesit e lidhur me al-Kaidën.

“Lotët tuaja nuk derdhen të vetëm, sepse ata janë pjesë e hidhërimit të një kombi të tërë”, tha Presidenti Trump përpara familjeve të të vrarëve më 11 shtator.

“Ne brengosemi së bashku për çdo nënë dhe baba, motër dhe vëlla, bijë dhe bija që na u morën në Kullat Binjake, Pentagon dhe këtu, në këtë fushë të Pensilvanisë”.

“Avioni me numër fluturimi 93 u përplas vetëm disa metra vendit ku ne ndodhemi, vetëm 20 minuta fluturim nga kryeqyteti i Shteteve të Bashkuara. Përmes sakrificës së tyre, të 40 pasagjerët shpëtuan jetën e amerikanëve të panumërt, shpëtuan kryeqytetin tonë nga një goditje shkatërrimtare,” tha Presidenti Trump. “Kjo fushë tani është një monument i qëndresës amerikane. Ky memorial është tani një mesazh për botën, se Amerika kurrë nuk do t’i nënshtrohet tiranisë. Faleminderit.”

Shumë pranë Uashingtonit, Zëvendëspresidenti Mike Pence dhe sekretari i Mbrojtjes Jim Mattis morën pjesë në një ceremoni në Pentagon për familjet e atyre që u vranë kur një aeroplan i rrëmbyer u rrëzua në ndërtesë.

“Familjeve të të rënëve, të mbledhur këtu dhe të gjithë atyre që ndodhen me ne! Ju kujtoni me mall momentet e fundit që ndatë me njerëzit tuaj të zemrës, diçka që pa dyshim duket sikur ka ndodhur dje – një puthje lamtumire, një përqafim i ngrohtë ose një përshëndetje e fundit me dorë. Dijeni se vendi juaj e kupton, që ndërsa ne të gjithë kemi pësuar humbje atë ditë, ju keni një barrë të veçantë. Por ne mblidhemi këtu në hijen e ndërtesës ku të dashurit tuaj u larguan nga kjo jetë, për t’ju thënë se ju nuk e mbani atë barrë të vetëm,” tha Nënpresidenti Pence.(VOA)

SHBA shënojnë 17-vjetorin e sulmeve të 11 shtatorit

Remembering september 11- 2001

September 11, 2018 by dgreca

Remembering september 11- 2001/

Peace

Pence on 9/11 anniversary: “Our spirit cannot be broken”

Vice President Mike Pence marked the 17th anniversary of the attacks on September 11th at the Pentagon on Tuesday. He said that the country should never forget the lessons of 9/11 and “remain ever vigilant in the defense of our nation and our people.”

FSK-ja në shenjë nderimi përkujtoi 11 shtatorin e sulmeve terroriste në SHB

September 11, 2018 by dgreca

Sot në të gjitha kazermat e Forcës së Sigurisë të Kosovës u përkujtua 17 vjetori i sulmeve terroriste në Nju Jork të Shteteve të Bashkuara të Amerikës.Për të nderuar viktimat e sulmit terrorist të 11 shtatorit të vitit 2001, të ndodhur në kullat binjake në New York të SHBA-ve, ku humbën jetën mijëra civilë të pafajshëm, të gjitha njësitet e FSK-së, partnerët tanë amerikanë, oficerë dhe nënoficerë nderuan me një minutë heshtje viktimat e ngjarjes më tragjike që njeh historia ndaj Shteteve të Bashkuara të Amerikës.

Në Kazermën ,,Adem Jashari“ komandanti i Forcave Tokësore, gjeneral brigade Enver Cikaqi, me këtë rast theksoi, se tash më është bërë tradicionale në Forcën e Sigurisë së Kosovës të bëjmë homazhe si shenjë përkujtimi në përkrahje të familjeve të viktimave dhe popullit amerikanë. „Me këtë ngjarje është sulmuar demokracia jo vetëm në Amerikë, po në gjithë botën. Jemi këtu, së bashku për të përkujtuar dhe për të nderuar Shtetin tonë aleatë, që gjatë gjithë historisë ishte në përkrahje të popullit të Kosovës dhe në veçanti gjatë viteve më të vështira të luftës 1998-1999, dhe po vazhdon të ndihmojë në ngritjen e shtetit të Kosovës, demokracisë kudo në botë dhe po kontribuon në ngritjen e kapaciteteve të Forcës së Sigurisë së Kosovës”, tha në fund të fjalës së tij përkujtimore, komandanti i Forcave Tokësore të FSK-së, gjeneral brigade Enver Cikaqi.(per me shume fotografi-shko ne facebook dielli vatra)

11 Shtatori si Kujtese-KOSOVA BASHKË ME AMERIKËN

September 11, 2018 by dgreca

-Kosova, Memorial të përhershëm per viktimat e sulmit terrorist të 11 shtatorit 2001 në SHBA/

-Homazhe në përkujtim të viktimave të sulmit terrorist të 11 shtatorit 2001 në Shtetet e Bashkuara të Amerikës/

-Kryeministri Haradinaj: Vendosja e Memorialit, ndjenjë e përkrahjes së parezervë për familjet e viktimave të 11 shtatorit 2001 në SHBA. Kosova dhe Amerika janë bashkë edhe në këtë ditë dhe do të jenë gjithnjë /

-Ambasadori Amerikan Delawie: Sulmet terroriste të 11 shtatorit 2001 në Nju Jork, Uashington dhe në Pensilvani, terrorizuan gjithë botën dhe populli i Kosovës gjithë kohën ka qenë me ne/

Gazeta DIELLI nga korrespondenti në Kosovë Behlul Jashari

PRISHTINË, 11 Shtator 2018/ Në shenjë nderimi për jetët e humbura të tragjedisë së 11 shtatorit 2001 në Shtetet e Bashkuara të Amerikës, qeveria e Kosovës sot mori vendim për vendosjen e Memorialit të përhershëm në oborrin e qeverisë, për të cilin kryeministri Ramush Haradinaj tha se është e ndjenja e përkrahjes, e lutjeve për familjet e viktimave të 11 shtatorit, por edhe e përkrahjes së parezervë të popullit dhe institucioneve të Kosovës për Amerikën në luftën kundër terrorizmit.

Në mbledhjen e qeverisë së Kosovës të nisur me nderime me një minutë heshtje, kryeministri Haradinaj tha se, pikërisht në ditën e sotme në vitin 2001 kanë ndodhur sulmet terroriste në New York, Pensilvani dhe Uashington, të Shteteve të Bashkuara të Amerikës, dhe në këtë rast janë vrarë shumë njerëz të pafajshëm.

“Shtetet e Bashkuara të Amerikës i kanë prirë botës në shpëtimin e jetëve tona në kohëra të vështira të luftës së Kosovës dhe i kanë mbrojtur popujt e botës dhe këtë e ndjejmë më së shumti dhe më së miri ne, dhe është e kuptueshme ndjenja e përkrahjes, e lutjeve tona për familjet e viktimave të 11 Shtatorit, por edhe e përkrahjes së parezervë të popullit të Kosovës, të institucioneve, për Amerikën në luftën kundër terrorizmit”, tha kryeministri Haradinaj.

Më tej, kryeministri Haradinaj tha se sot janë bërë homazhe e nderim në përkujtim të viktimave nga kabineti qeveritar, kryetari i Kuvendit dhe zyrtarë të tjerë institucionalë të Kosovës, duke shprehur falënderim edhe për ambasadorin e Shteteve të Bashkuara të Amerikës në Kosovë, Greg Delawie dhe kolegët tjerë të Ambasadës Amerikane. Kryeministri Haradinaj tha se Zyra e Kryeministrit në kuadër të përgatitjeve për sot, ka vendosur për ndërtimin e një memoriali të përhershëm kushtuar viktimave të 11 shtatorit, siç tha ai, një memorial i vogël por që do të shprehte respekt dhe në traditën e nderimit do të ishte i përvitshëm nderimi, sipas protokollit shtetëror, i këtyre viktimave të pafajshme, të sulmeve terroriste. “Nga ajo që u pa sot, nga mënyra e nderimit u vërtetua se një memorial simbolik, por i respektueshëm do t’i bënte nder Kosovës, institucioneve të Kosovës, qeverisë së vendit dhe të gjithë liridashësve, dhe do ta shprehte qartë përcaktimin tonë për koalicionin tonë kundër terrorizmit”, tha kryeministri Haradinaj. Po ashtu, sot në kuadër të këtyre aktiviteteve bëhen homazhe dhe ndezën qirinj në përkujtim të viktimave të sulmit terrorist të 11 shtatorit 2001, organizuar nga Zyra e Kryeministrit.Në mëngjesin e ditës së sotme në Prishtinë u bënë homazhe në përkujtim të viktimave të sulmit terrorist të 11 shtatorit 2001 në Shtetet e Bashkuara të Amerikës. “Kosova dhe Amerika janë bashkë edhe në këtë ditë dhe do të jenë gjithnjë. Lutjet tona shkojnë për familjet e viktimave të sulmeve të 11 shtatorit. Falënderoj ambasadorin Delawie për nderin që na bëri sot që të jetë bashkë me ne”, tha kryeministri i Kosovës, Ramush Haradinaj, pasi bëri homazhe. Në ceremoninë e homazheve, të organizuar nga kryeministri, ishin të pranishëm edhe kryetari i Kuvendit Kadri Veseli, ish-presidentja Atifete Jahjaga, ambasadori i SHBA-ve në Kosovë, Greg Delawie, ambasadorë tjerë të akredituar në Kosovë, ministra të kabinetit qeveritar dhe punonjës së Zyrës së Kryeministrit, të cilët nderuan viktimat e sulmit terrorist të 11 shtatorit 2001 në Shtetet e Bashkuar të Amerikës.
Kryetari i Kuvendit, Kadri Veseli, tha se 11 shtatori ka qenë sulm mbi vlerat civilizuese, ka qenë provë për gjithë botën demokratike, për t’iu përgjigjur një fryme, e cila ka qenë çnjerëzore.
“Sot, kaq vjet pas asaj dite të rëndë, Shtetet e Bashkuara të Amerikës dhe bota e civilizuar ka triumfuar. Çdo ditë e më tepër po mbizotëron arsyeja dhe në të njëjtën kohë vlerat demokratike, vlerat tona civilizuese perëndimore nuk ka askush që mund t’i cenojë”, tha kryetari Veseli, duke shtuar se Kosova do të jetë së bashku me Amerikën, sepse Amerika është shpëtimtare e Kosovës dhe do të jemi bashkërisht përjetë.
Ambasadori i SHBA-ve në Kosovë, Greg Delawie, tha se Shtetet e Bashkuara përkujtojnë sulmet e 11 shtatorit dhe me këtë rast falënderojmë Qeverinë dhe popullin e Kosovës për partneritetin dhe mbështetjen në këtë situatë. “Sulmet terroriste të 11 shtatorit 2001 në Nju Jork, Uashington dhe në Pensilvani, terrorizuan gjithë botën dhe populli i Kosovës gjithë kohën ka qenë me ne”, tha ambasadori Delaëie.
Sot në mbrëmje, ora 20:00, para Teatrit Kombëtar në Prishtinë, Kryeministri i Kosovës Ramush Haradinaj merr pjesë në homazhe dhe ndezjen e qirinjve në përkujtim të viktimave të sulmit terrorist në SHBA, të 11 shtatorit 2001.

Kosovë-Qeveria Haradinaj, një vit pune dinamike

September 10, 2018 by dgreca

-Në njëvjetor, nesër mbledhja e 64-të. Në bilancin e njëvjetorit të qeverisë së Kosovës, drejtuar nga kryeministri Ramush Haradinaj, është edhe mbledhja e përbashkët me qeverinë e Shqipërisë, e mbajtur në 27 nëntor 2017 në Korçë, ndërsa zhvillohen përgatitje për mbledhjen e radhës të dy qeverive, që do mbahet në nëntor 2018 në Pejë/

Gazeta DIELLI nga korrespondenti në Kosovë Behlul Jashari/

PRISHTINË, 10 Shtator 2018/ Qeveria e Republikës së Kosovës, e kryeministrit Ramush Haradinaj, mbush vitin e parë të punës nesër, 11 shtator 2018, kur do të mbajë edhe mbledhjen e 64-të.

Kryeministri Haradinaj në mbledhjen e mbajtur në 28 gusht, ka vlerësuar se qeveria që ai drejton është ndër më dinamiket që ka pas Kosova që nga pas lufta e përfunduar në qershor 1999 dhe theksoi faktin që në më pak se një vit punë ka 900 vendime të miratuara me interes për jetën e qytetarëve të vendit, por edhe se po evidentohen vendime që mungojnë.

“Nëse në tema tjera jemi më shumë se njëqind për qind proaktivë, atëherë duhet që edhe temave që kanë të bëjnë me procesin e integrimeve t’u japim prioritet”, tha kryeministri Haradinaj, duke siguruar që në periudhën që po hyhet do t’i kushtohet rëndësi e veçantë kësaj teme. “Duhet identifikuar ngecjet që kanë të bëjnë me zbatimin e Axhendës së Reformës Evropiane dhe të lëvizim përpara”, ka theksuar ai në takimin e Këshillit Ministror për Integrim Evropian, i cili u mbajt para mbledhjes së qeverisë së Kosovës, të njëjtën ditë.

Në bilancin e njëvjetorit të qeverisë së Kosovës është edhe mbledhja e përbashkët me qeverinë e Shqipërisë, e mbajtur në 27 nëntor 2017 në Korçë, ndërsa zhvillohen përgatitje për mbledhjen e radhës të dy qeverive, që do mbahet në nëntor 2018 në Pejë.

Qeveria e Kosovës e zgjedhjeve të 11 qershorit 2017, e votuar në seancë të jashtëzakonshme të Kuvendit në 9 shtator, nisi punën në 11 shtator duke mbajtur në mbrëmje mbledhjen e parë, ku u bë konstituimi dhe u shqyrtua programi qeverisës, pasi gjatë ditës fillimisht u bë pranim-dorëzimi i detyrave në Kryeministri dhe nëpër ministri.