Nga Suela Shala Kërxhaliu/
Kur Ilda Hila u nis nëpër botë e etur për të fituar dije dhe ndërtuar ëndrrat e rinisë së hershme, ndoshta nuk e kishte imagjinuar që, me mallin për vendin që kishte lënë pas dhe pak aromë ushqimesh shqiptare, do të ngrinte një sipërmarrje të guximshme që do t’i sillte më afër bashkëvendasit e saj në diasporë me Shqipërinë. Këto dy përbërës të rëndësishëm ajo i bashkoi me një ekspertizë të specializuar dhe ngriti kështu një start-up të quajtur “Me Zemër”, që ka për mision të sjellë më pranë produktet dhe kulturën shqiptare me diasporën kudo nëpër botë.
Me përfundimin e studimeve për financë në Milano, Itali, dhe fitimin e një përvoje të pasur akademike dhe profesionale në universitetet italiane, koorporatat evropiane dhe në Azi, Ilda vendosi të rikthehej në qytetin e saj të bukur dhe poetik të lindjes, Lezhë, për të ndërtuar aty diçka autentike shqiptare. Ajo dëshironte t’i jepte vendit të saj të vogël, por me burime të jashtëzakonshme natyrore, kulturore dhe shpirtrore një markë krejtësisht shqiptare. Por Ilda e dinte që vetëm pasioni nuk mjaftonte për ta realizuar këtë. “Nevojitej shumë profesionalizëm, strukturë dhe një qasje që respekton klientin global.” Falë një vizioni të qëndrueshëm global, etike pune dhe standardeve ndërkombëtare, ajo arriti ta ngrinte në këmbë dhe t’i jepte shpirt një misioni që, në fakt, në thelb kishte shpirtin: atdhedashurinë dhe mallin njerëzor.
Kur kthen kokën pas në kohë, ajo kujton se si, një fëmijë i rritur në emigracion, e kishte parë gjithmonë familjen e saj ta paketonte mallin për atdheun dhe njerëzit nëpër valixhe në formën e produkteve shqiptare. Ajo thotë që ideja për një start-up të tillë kishte kohë që rrinte zgjuar brenda saj, por nisi të merrte formë vetëm gjatë izolimit që krijoi pandemia e disa viteve më parë. Ilda e quan misionin që ka marrë përsipër “Me Zemër” një udhëtim emocional të çdo shqiptari nëpër botë drejt shtëpisë së munguar për shumë kohë, por edhe një pasaportë për ata që duan ta njohin këtë vend të vogël dhe me energji e histori të jashtëzakonshme, të pasur veçanërisht në fushën gastronomike.
Themeluesja e “Me Zemër” thotë që priti pikërisht këtë moment për të nisur misionin e saj për të çuar produkte si verëra dhe pije të tjera, ku më e famshmja është rakia shqiptare, apo vaj ulliri në sa më shumë tryeza nëpër botë, sepse tani mund të thuhej që ky vend ishte gati për t’u prezantuar jashtë kufinjve të tij përmes cilësisë. Ilda shkon edhe më tej duke thënë që konsumatori tani nuk kërkon vetëm një produkt, por edhe një histori, një përjetim. “Dhe pikërisht këtë përpiqemi që të ofrojmë çdo ditë, një përvojë që të ngroh zemrën dhe ruan identitetin.”
“Me Zemër” realizon dërgesa nëpër gjithë Evropën brenda dyzet e tetë orësh dhe në gjithë Amerikën brenda katërmbëdhjetë ditësh. Ajo i administron porositë në mënyrë digjitale dhe siguron shërbim mbështetës 24/7 në disa gjuhë, dërgesa të shpejta dhe transparencë në çdo hap të udhëtimit të produktit. Ilda thotë se, në rrugëtimin e saj, ka pasur gjithmonë mbështetjen e investitorëve të huaj, që e kanë ndihmuar të krijojë besimin se, edhe nga një vend i vogël si Shqipëria, mund të lindë një markë që fiton respektin e tregut ndërkombëtar.
“Me Zemër” e bën përzgjedhjen e produkteve që eksportohen mbështetur në tre kritere kryesore: autenciteti, cilësia dhe përfaqësimi i vlerave shqiptare. Në këtë mision, ata mbështeten nga një rrjet profesionistësh, që përfshijnë somelierë, agronomë dhe ekspertë të certifikimeve, midis të cilëve, partnerë të certifikuar ndërkombëtarisht si AIS Club Albania, për të siguruar cilësinë më të mirë në përputhje me normat e sigurisë së produkteve ushqimore nëpër botë. “Me Zemër” shpesh mbështet edhe vetë prodhuesit me përmirësimin e etiketimit, paketimit dhe dokumentacionit për eksportin. Ky mision ka udhëtuar nëpër gjithë Shqipërinë për t’u takuar me artizanët më të mirë vendas, përfaqësuesit e traditës dhe të burimeve të çmuara që ka vendi ynë i begatë.
Në shqip, ne kemi një shprehje shumë të dashur: “Dashuria kalon përmes stomakut”. Ilda nuk e ka parë asnjëherë këtë nismë thjesht si një sipërmarrje biznesi, por edhe si një urë komunikimi midis prodhuesve vendas, duke fuqizuar kështu bashkësitë rurale, dhe diasporës kudo nëpër botë. Produktet që “Me Zemër” eksporton në mbarë botën mbajnë një vulë të bukur idilike, atë të mallit, atdhedashurisë, që kush jeton në migrim, e di shumë mirë se çfarë vlere te veçantë ka.
Si pjesë e iniciativës së saj për të sjellë verërat, ushqimet dhe aromrat shqiptare në sa më shumë tavolina rreth e rrotull botës, ditën e fundit të gushtit që sapo lamë pas, nën kujdesin e Shef Fejsal Demiraj, “Me Zemër” organizoi një darkë që e kombinoi me verërat e vreshtarive më të njohura të Shqipërisë si Çobo Winery, Uka Winery, Duka Winery, Alimani Winery. Fejsal Demiraj është themeluesi i “Amëz”-it, i njohur për markën e parë në botë gourmet të salcës së specave, një traditë njëshekullore shqiptare. Midis udhëtimeve të tij të shumta profesionale nëpër botë për rreth njëzet vjet, në kërkim të teknikave dhe aromrave të reja të gatimit, ai ka punuar plot gjashtë vjet në “Noma” të Kopenhagenit, i votuar si restoranti më i mirë në botë.
Ky organizim privat në banesën e familjes Lukaj në Grinuiç, Kënektikat, u mbështet nga Vjosa dhe Richard Lukaj, një filantropist dhe profesionist shumë i suksesshëm shqiptaro-amerikan, të cilët mblodhën në një tryezë të përbashkët pronarë të njohur restorantesh, administratorësh dhe shefash kuzhine nga vende të ndryshme të Amerikës si Bruno Selimaj, Elio Ahmetaj, Nick Zherka, Ben Çelaj dhe Mira e Dorian Puka.
(Për ata që janë të interesuar të njohin historinë e “Me Zemër”, ose të porosisin produkte shqiptare në cilindo vend të botës ku ndodhen, ju lutemi të vizitoni www.mezemer.com)
