Sokol Paja/

New York, 29 qershor 2024- Federata Pan-Shqiptare e Amerikës “Vatra” përkujtoi në Selinë Qëndrore në New York 80 vjetorin e gjenocidit grek mbi shqiptarët e Çamërisë. Në fjalën e hapjes Sekretari i Vatrës Dr. Pashko Camaj theksoi se gjenocidi grek mbi shqiptarët e pafajshëm të Çamërisë ishte një ndër ngjarjet më të tmerrshme të ndodhura ndaj popullsisë shqiptare. Në kumtesën e Ndriçim Kullës lexuar nga Nancy Kajo u tha se: “Zhdukja me çdo kusht e minoritetit shqiptar të çamërisë u bë një nga detyrat më të rëndësishme të grekërve për të realizuar të ashtuquajturën “Ide të madhe” të tyre, edhe pse ishte një detyrë agresive dhe kishte në thelb kryerjen e një akti çnjerëzor. Grabitjet e dhunshme të pasurisë së shqiptarëve, stimulimi i grekërve për t’u vendosur në fshatrat me popullsi çame dhe për të ndryshuar strukturën e përbërjes së popullsisë dhe shfrytëzimi arbitrar i pasurisë së tyre ishin veprime të përditshme që u bënë gjithmonë me urdhëra të qeveritarëve të Athinës veprime këto të stilit fashist”. Alket Veliu

Drejtues i Fondacionit Çamëria “Hasan Tahsini” në kumtesën e dërguar për këtë përkujtimore lexuar nga editori i Diellit shprehet se: “Masakrat dhe spastrimi etnik, duke dëbuar dhe shpërngulur me dhunë popullsinë shqiptare myslimane të Çamërisë, përbëjnë një ngjarje tragjike që ka lënë gjurmë të thella në historinë e kombit tonë. Kanë ndodhur krime monstruoze, që kapërcejnë çdo lloj imagjinate kriminale, krime të cilat kanë mbetur pa u ndëshkuar dhe, akoma më keq, as nuk pranohen nga pasardhësit e ekzekutorëve të këtyre krimeve” thuhet ndër të tjera në kumtesën e z.Veliu. Patrioti i shquar çam Ahmet Xhafo në fjalën përshëndetëse të dërguar për këtë takim shprehet se gjenocidi grek ishte “një krim që ndodhi mu në zemër të qytetërimit europian e askush nuk reagon, fatkeqësisht as shteti shqiptar. Shteti grek vodhi e sekuestroi me dhunë pasuritë, tokat, bizneset, bagëtitë, e shtëpitë e shqiptarëve. Ende sot asnjë falje, asnjë kompensim, as asgjë, vetëm harresë, por shqiptarët e Çamërisë nuk do të harrojnë përjetë”. Aktivisti i çështjes kombëtare Bashkim Shehu e cilësoi gjenocidin ndaj shqiptarëve të Çamërisë si një ndër ditët më dhimbshme të historisë sonë kombëtare dhe se shqiptarët nga Amerika duhet të punojnë për çështjençame. Poeti Mhill Velaj përgëzoi Vatrën për aktivitetet patriotike, apeloi që shqiptarëve të Çamërisë tu garantohen të gjitha të drejtat e mohuara shekullore dhe shprehu ngushëllime për humbjen e mikut të madh të Vatrës, Diellit e shqiptarëve të Amerikës Atë Antonio Bellusci. Pjetër Marku nga akademia “Mirdita” i bëri apel politikës shqiptare që të mos e harrojë kurrë çështjen çame. Në përfundim të përkujtimores, patrioti nga Kosova Toni Musaj shtroi një koktail për të pranishmit.

Ina Kocaqi Xoxa, mësuese e Festivalit të Fëmijëve Shqiptarë të Torontos “Marlee`s Got Talent (MGT)” dhe GTA (Greater Toronto Area), në një rrëfim ekskluziv për gazetën “Dielli”, Organ i Federatës Pan-Shqiptare të Amerikës VATRA, New York, dhënë Editorit Sokol Paja, analizon organizimin e një spektakli pë talentet dhe fëmijët shqiptarë duke krijuar një qendër kulturore, patriotike, sociale dhe atdhetare për familjet dhe fëmijët e mërgatës së Torontos. Festivali i përvitshëm ka një rëndësi të jashtëzakonshme për ruajtjen e gjuhës, kulturës, traditës dhe identitetit kulturor kombëtar  shqiptar.

HISTORIKU I FESTIVALIT TË FËMIJËVE SHQIPTARË NË TORONTO “MARLEE`S GOT TALENT (MGT)”

Marlee`s Got Talent (MGT) është një talent show ose Festival i Fëmijëve Shqiptarë të Torontos dhe GTA (Greater Toronto Area) të moshave 4 deri 18+ vjeç që organizohet vullnetarisht çdo vit në fund të Majit ose në fillim të Qershorit. Unë fillimisht e nisa aktivitetin muzikor me dy fëmijët e mi të vegjël duke u mësuar të këndojnë dhe të luajnë në piano dhe kitarë këngë shqiptare. Të dy fëmijët e mi interpretuan këngë shqiptare në Festën e Flamurit në Nëntor 2011 të organizuar nga SHBSHK Toronto. Dëshirës së shumë prindërve të lagjes Marlee Avenue në Toronto ju shtua edhe pasioni im për të punuar me fëmijë, si dhe qëllimit tim për të krijuar një arkive të zgjedhur kulturore shqiptare për fëmijët e lindur jashtë Atdheut, me krijimet më të mira foklorike e të zhanreve të tjera të muzikës sonë. Me inkurajimin e bashkëpunëtores sime të ngushtë, Gentjana Aliaj, dhe muzikanteve të talentuara Entela Galanxhi dhe Mara Cako, mora iniciativën të krijoj Korin e Fëmijëve të Torontos me 24 koristët e parë. Me ftesë të Dr. Ruki Kondaj, ish presidente e Shoqatës së Bashkësisë Shqiptare të Torontos (SHBSHK) Kori i MGTsë mori pjesë në Festën e 8 Marsit 2012, në Festen e Shkollave Shqip të Torontos në Qershor 2012 si dhe në Koncertin e madh të 100 vjetorit të Pavarësisë, të gjitha të organizuara nga SHBSHK Toronto. Më pas dëshira e fëmijëve për pjesëmarrje po rritej kështu që mendova të organizoj një talent show ku fëmijët shqiptarë do të kishin mundësi të këndonin në kor këngë shqip, të kërcenin vallet tona të bukura, të luanin instrumenta, të recitonin etj me një repertor shqiptar, kanadez dhe internacional. Kështu u krijua Marlee`s Got Talent (MGT). MGT 1 është shfaqur në Maj 2014 me 20 pjesëmarrës. U quajt Marlee`s Got Talent pasi shumica e pjesëmarrësve janë nga Lagjja Marlee Ave (lagjja më e madhe me shqiptarë, në Toronto). Këtë vit në Marlee`s Got Talent 2024 plot 60 fëmijë festuan në skene 10 vjetorin e MGTsë me një program të pasur më këngë, valle, poezi etj.

ANGAZHIMI I FËMIJËVE NË RUAJTJEN E IDENTITETIT DHE KULTURËS KOMBËTARE

Suksesi i MGTsë është meritë e fëmijëve vetë por edhe e prindërve. Kemi gjetur një komunikim shumë frytdhënës falë transparencës së bashkëpunimit dhe dëshirës së përbashkët : Trashëgimi i Kulturës tonë dhe Gjuhës Shqipe! Një meritë të veçantë në suksesin 10 vjeçar të Korit dhe përformancave Instrumentale ka muzikantja/violinistja e talentuar Entela Galanxhi, mësuese ne TDSB dhe concertmaster of Greater Toronto Philharmonic Orchestra (GTPO). Entela Galanxhi e ka mbështëtur vullnetarisht korin që në krijimin e tij duke kompozuar/arranxhuar muzikën e mbi 50 këngëve shqiptare. Së bashku me të shoqin, muzikantin e talentuar Qazim Kallushi, mësues ne TDSB dhe drejtor ekzekutiv i GTPO si dhe me Mara Cakon, mësusese në TDSB dhe pianiste në GTPO, kanë shoqëruar korin dhe solistët në skenë në shfaqjet e MGTsë në vite. Gjithashtu pianistja e talentuar Sofia Papadhimitri së bashku me Mjeshtrin Jani Papadhimitri te Trio Fammus kanë shoqëruar korin e  MGTsë në disa përformanca mbresëlënëse. Entela Galanxhi & Qazim Kallushi, Mara Cako, Sofia Papadhimitri dhe Rudin Lengo kanë ndihmuar shumë anëtarë të MGTsë me përformancat e tyre në Talent show (piano, kitarë, violinë etj) dhe studentët e tyre vazhdojnë të marrin pjesë në MGT. Veçantia e korit dhe e talent show-t është se fëmijët pranohen pa audicione/përzgjedhje pasi qëllimi parësor i këtij festivali është që tu ofrojë të gjithë fëmijëve shqiptarë që kanë dëshirë, një mundësi për të mësuar këngë e valle shqiptare, folklorike e të përpunuara.

ÇFARË MËSOJNË FËMIJËT

Përzgjedhja e Programit bëhet pas një pune këmbëngulëse kërkimore që unë bëj për tu mësuar fëmijëve këngët e vallet më origjinale që përfaqësojnë të gjitha trevat në Shqipëri, Kosovë, Çameri, Arbëreshe etj. Falë sistemit arsimor të Kanadasë, fëmijët janë të familjarizuar me konceptin e origjinës, integritetit e kulturave të ndryshme në botë. Pjesëmarresit në MGT e kuptojnë qëllimin dhe rëndësinë e këtij aktiviteti që në fakt është kyçi i vazhdimësisë. Të gjithë fëmijët, pa përjashtim, këndojnë në kor dhe vallëzojnë në grupe vallesh sipas moshës. Unë punoj në detaje tekstet që fëmijët të kuptojnë çfarë do të këndojnë/recitojnë dhe ndalem pak në historinë e trevës që përfaqësojnë këngët e vallet. Për shembull fëmijët këtë vit mësuan që Vallja e Shotës është Vallja lirike e rosave pasi “shotë” i thonë rosës në dialektin Kosovar etj etj. Programi i Koncertit përbëhet nga 2 pjesë. Pjesa e parë është teresisht Folklorike Shqiptare ndërsa Pjesa e Dytë përfshin një repertor të zgjedhur ndërkombëtar (dhe shqiptare) nga të gjitha zhanret e artit përformues: Recitime, këngë, pjesë baleti, pjesë instrumentale, kërcim modern, retro, stand up, comedy etj etj.. Disa përformanca janë zgjedhje të vetë fëmijëve sipas talenteve.

PËRFITIMET E FËMIJËVE PREJ FESTIVALIT TË FËMIJËVE SHQIPTARË NË TORONTO “MARLEE`S GOT TALENT (MGT)”

MGT shërben si një qendër komunitare shqiptare për familjet dhe fëmijët. Krijohen miqësi mes anëtareve gjatë 5 muajve të provave. Rritja e vetëbesimit, përballja me “stage fright”, puna në grup dhe leadership (fëmijët me eksperiencë në talente të ndryshme ndihmojnë pjesëmarrësit e rinj). Njohja me krijimet më të mira shqiptare në këngë, valle, pjesë instrumentale, krijime letrare (një pasuri që do ti përdorin në gëzime familjare kur të rriten). Mësojnë tekstet dhe pasurojnë gjuhën nëpërmjet diskutimeve që bëjmë mësojnë për Skënderbeun, Rilindasit, kënget e prindërve të tyre në festivale etj. Fëmijët drejtojnë dhe mësohen me përgjegjësi. I përdorin “community volunteer hours” për aplikime në universitet. Mësojnë si të bëjnë fundraising dhe të mbështesin bashkëmoshatarët në Shqipëri si mbledhja e fondeve (pas termetit), pjesëmarrja në koncertin bamirës të Ervin dhe Linda Meço, fundraising në Mbrëmjet e “Shoqëria Jonë e Torontos” etj. Përfshirja e të dyja kulturave, shqiptare dhe kanadeze, në program ndihmon në vazhdimësinë e MGTsë pasi fëmijët identifikohen plotësisht në të. Ne si prindër mësojmë shumë prej fëmijëve duke parë sa të komunikueshëm janë dhe sa mbështëtes të njeri-tjetrit. Së bashku, jemi duke krijuar kujtime të mrekullueshme që do t’ju vlejnë shumë fëmijëve kur të rriten.

BASHKËPUNIMI ME KOMUNITETIN SHQIPTARË, ORGANIZATAT DHE SHOQATAT SHQIPTARE

Festivali vazhdon të organizohet çdo vit vullnetarisht, falë dëshirës së fëmijëve, punës së  palodhur të prindërve që ndihmojnë me çte munden, sponsoreve dhe dashamiresve. MGT vazhdimisht fton në social media të gjithë fëmijët nga Toronto, GTA e kudoqoshin të marrin pjesë në këtë event komunitar gjithëpërfshirës. Bashkëpunetoret më të dalluara të MGTsë që kanë ndihmuar për shumë vite me radhë në kor dhe valle janë të rejat e talentuara: Olivia Xoxa, E.A., Amanda Doku, Doreen Shtylla, Alyssa Dedelli, Elia Pasha, Ariel Doku, Eralba Hajdaraj, Eva Shtylla etj. Një brez i lë stafetën tjetrit duke ruajtur këtë traditë bashkëpunimi që është për tu admiruar. Nëe kontribut të veçante për 10 vjet me radhë, në organizimin dhe manaxhimin e shfaqjeve ka dhënë bashkëpunëtorja ime e ngushtë Gentjana Aliaj, Eva Hoxha, stilistja jonë e talentuar, Enkeleda Deda, financierja, dhe Alma Doku the graphic designer of MGT etj etj. Një mirenjohje të veçantë sponsorëve tanë që në MGT 1: Pasqyra Shqiptare (Ilir dhe Tony Lena), që me përkushtim dhe entuziazem ka xhiruar të plotë  çdo shfaqje dhe ka transmetuar çdo vit emisione të veçanta për të afruar sa më shumë anëtarë të rinj. LGH Art Photography (Genti e Lorida Hali), që kanë fotografuar çastet më të bukura të fëmijëve në skene), Entela Galanxhi, Vasil Kristaqi, Gojard Kodra,  Rrobaqepesi “Xhesi” në Sarandë, Xhesila Berberi Islamaj, atdhetare dhe patriote që ka sponsorizuar MGTnë për vite me radhë duke qepur kostumet popullore për fëmijët e të gjitha moshave, Gojard Kodra, Shoqëria Jonë e Torontos etj etj. Sponsoret dhe vullnetaret e MGT 2024 po i ndajmë me lexuesit në foto me mirënjohje dhe shumë respekt.

ARRITJET, ÇMIMET DHE PJESËMARRJET

Aktivitete të ndryshme të Korit të MGTsë: MGT talent Show çdo vit që prej vitit 2014 ka realizuar e marrë pjesë në koncerte, aktivitete të organizuara nga SHBSHK Toronto si: Koncerti i shkollave shqip të Torontos, Koncerti i 8 Marsit,  Koncerti i 100 vjetorit të Pavarësisë, Koncerti i Shenjtërimit të Nënë Terezës, Pjesëmarrje në Fundraising Concerts Ëorld Vision, Global 6K for Ëater Concert, shoqëruar nga Trio Fammus (Jani & Sofia Papadhimitri), koncerti i bamirësisë “Tinguj për vendin tim” organizuar nga Linda & Ervin Meço, fundraising me donacione nga vetë fëmijët dhe 2 këngë të korit në mbështetje të bashkëmoshaterëve në Shqipëri (Termeti 2019). Mbrëmjet e Festës së Flamurit – organizuar nga “Shoqëria Jonë e Torontos”, koncerti virtual i Festës së Flamurit 2020 organizuar nga Ambasada Shqiptare në Ottaëa, festivali i 11-të ndërkombëtar i Vjenës 2021 – Ëorld Peace Choral Festival 2021(online). Në këtë festival morën pjesë 300 kore nga 40 vende të botës. Kori i MGTsë mori pjesë me dy këngë shqiptare: “Margjelo” – Kori i të rinjve dhe “Këndo bilbil i fushave”. MGT Choir dhe Kori i të rinjve u vlerësuan me Bronze Aëard Certificate. Koncerti i MGTsë me rastin e 110 Vjetorit të Pavarësise – 19 Nëntor 2022, Forest Hill Spring Concert – nën drejtimin e Livia Simas, Koncerti “I love Çamëria” organizuar nga Gojard Kodra 30 Qershor 2024.

MIRËNJOHJE DHE RESPEKT PËR PRINDËRIT

Ne komunikojmë hapur me prindërit jemi shumë transparentë dhe mirëpresim çdo ide e formë bashkëpunimi. Programi ju dërgohet prindërve e fëmijëve që të njihen me të. Prindërit janë pjesë e MGTsë pasi ndjekin provat, sjellin gatime për fëmijët. Ata tashmë e dinë qëllimin kryesor të këtij aktiviteti që është tërësisht vullnetar, jo kompetitiv midis fëmijëve, përkundrazi është gjithëpërfshirës, si një qender komunitare e mirëfilltë.

KUSH ËSHTË INA KOCAQI XOXA?

Quhem Ina Kocaqi Xoxa, jam diplomuar si mjeke e përgjithëshme në Universitetin e Tiranës në 1997, ndërsa në Kanada jam diplomuar në arësim në vitin 2008. Punoj si mësuese e licensuar (OCT- Ontario Certified Teacher) në shkollat publike të PDSB në Ontario. Jetoj në Toronto që prej vitit 2000. Pasionin për muzikën, artin dhe punën me fëmijët e kam trashëguar nga prindërit e mi, Stefan e Shqipe Kocaqi, që kanë qenë arsimtarë të përkushtuar dhe artëdashës, dhe sidomos nga im atë që ka qenë organizator koncertesh në shkollë por edhe një aktivist i dalluar në komunitet, në Lukovë (teater dhe variete). Nga mami im dhe nga gjyshja ime, Adelajde Birjani, kam mësuar si të komunikoj me njerëzit, të jem tolerante dhe ti pranoj pa paragjykime. Kam marrë pjesë në orkestrinat (piano) në festivalet e fëmijëve në Sarandë nën drejtimin e mjeshtrit Thoma Gjoni dhe në koret e Festivaleve. Një mbështëtje të vazhdueshme në punen time vullnetare si themeluese dhe drejtuese artisike e MGTsë kam patur nga familja ime, bashkeshorti im, Vaska Xoxa dhe fëmijët e mi Scott dhe Olivia Xoxa. Vitet e fundit vajza ime, Olivia, më ka ndihmuar shumë si bashkëpunëtore në zgjedhjen e këngëve, përshtatjen e lëvizjeve koreografike të valleve si dhe në përfshirjen e ideve të brezit të ri në organizimin e shfaqjeve. Motivimin për të krijuar MGTnë e kam gjetur tek arbëreshet dhe rilindasit tanë që edhe pse larg Atdheut kanë mundur të ruajnë gjuhën dhe kulturën shqiptare për shekuj me radhë. Motoja ime është: Lum kush sheh me sytë e të ardhmes!

Sokol Paja/

New York, 15 qershor 2024- Federata Pan-Shqiptare e Amerikës “Vatra” përkujtoi me nderim dhe respekt 25 vjetorin e çlirimit të Kosovës. Një një ceremoni festive të organizuar në Selinë Qëndrore të Vatrës, në këtë ditë historike kryetari i Vatrës Dr. Elmi Berisha shprehu mirënjohjen e përjetshme Shteteve të Bashkuara të Amerikës e NATO-s për ndihmën e jashtëzakonshme për çlirimin e Kosovës e mbështetjen e jashtëzakonshme që i kanë dhënë shqiptarëve të Kosovës në veçanti e shqiptarëve në trojet etnike në përgjithësi. Kryetari Berisha falënderoi Batalionin Atlantiku për ndihmën dhe kontributin e çmuar, të gjithë shqiptaro-amerikanët e mbarë vatranët me në krye Marjan Cubin, të cilët meritojnë vlerësime e nderime të veçanta. z.Berisha uroi festën duke shpresuar në bashkimin kombëtar te te gjitha trojeve shqiptare si aspiratë e përjetshme e çdo shqiptari. Sekretari i Vatrës Dr. Pashko Camaj theksoi se shqiptarët e Kosovës u çliruan nga regjimi gjenocidal i Millosheviçit falë mbështetjes ndërkombëtare e përpjekjeve të lavdishme të luftës së Ushtrisë Çlirimtare të Kosovës.
Studiuesi Dr. Paulin Marku në fjalën e tij theksoi se lufta e Kosovës e vendosi bashkësinë ndërkombëtare në pozitën përcaktuese të një vendimi konkret e përcaktues për popullin shqiptar në Kosovë, të vuajtur dhe të dhunuar prej dekadash prej pushtuesit serb. Populli shqiptar i epur për liri e pavarësi frymëzoi çdo shqiptar anëkënd botës. Ngritja dhe organizimi i Ushtrisë Çlirimtare te Kosovës me në ballë familjen e Adem Jasharit frymëzonte shqiptaret brenda dhe jashtë kufijve që ti bashkoheshin lëvizjes ushtarake për liri e pavarësi. Ishin të shumtë shqiptarët e diasporës që ju bashkuan luftës, siç ishin shqiptaret e diasporës. Sipas Dr. Markut ndërhyrja e NATO-s në Kosovë ishte dëshmi e mbrojtjes së vlerave njerëzore dhe shtonte besimin e shqiptarëve ndaj forcës së armatosur se të drejtat e shqiptarëve po rivendosen në vendin e duhur, bazuar ne konceptin e sigurimit të të drejtave të njeriut në Kosove, të cilat ishin sfida te mëdha dhe ne qarqet ndërkombëtare. Çlirimi i Kosovës ishte ngjarje e madhe dhe përben arritje të jashtëzakonshme për shqiptarët, pas shpalljes së Pavarësisë së Shqipërisë.
Studiuesi Prof. Elez Osmani në kumtesën e dërguar me këtë rast shprehet se: Lufta e Ushtrisë Çlirimtare ishte bijë e të gjitha përpjekjeve të atdhetarëve shqiptarë, të cilët asnjëherë nuk ishin pajtuar me pushtimin sllav, asnjëherë nuk kishin pushuar së kërkuari liri dhe mëvetësi. Çlirimi i Kosovës është përmbyllje e një pjese të procesit historik të bashkimit kombëtar, i cili do të bëhet një ditë, deshën apo nuk deshën qendra të caktuara të Evropës, citon prof. Osmani. Lavdi përjetë dëshmorëve të kombit tonë, heronjve, luftëtarëve e çlirimitarët që dhanë gjithçka për lirinë e shtrenjtë të shtetit e kombit shqiptar. Rroftë përjetë e mot Kosova e lirë, demokratike dhe Euroatlantike.

Federata Pan-Shqiptare e Amerikës “Vatra” i dërgon të gjithë shqiptarëve anëmbanë botës e sidomos shqiptarëve të Kosovës urimet më të përzemërta me rastin e 25 vjetorit të çlirimit. Në këtë ditë historike i shprehim mirënjohjen tonë të përjetshme Shteteve të Bashkuara të Amerikës, NATO-s, Mbretërisë së Bashkuar e cdo diplomati perëndimor që ndihmoi shqiptarët e Kosovës të çlirohen nga regjimi gjenocidal i Millosheviçit. 12 Qershori 1999 mbetet përjetësisht i skalitur në memorien e historisë sonë kombëtare, ditë krenarie e lavdie historike për qëndresën dhe gjakun e derdhur për liri e pavarësi.

Kjo ditë e lavdishme nuk do të kishte mbërritur pa qendresën e studentëve në vitet 80-të, diplomacinë dhe urtësinë e presidentit historik Doktor Ibrahim Rugova dhe qëndresën e luftën e lavdishme të Ushtrisë Çlirimtare të Kosovës. Sot përulemi me nderim e respekt për dëshmorët e kombit tonë, heronjtë, luftëtarët e çlirimitarët që dhanë gjithçka për lirinë e shtrenjtë të shtetit e kombit tonë. Mirënjohje të veçantë në këtë ditë mërgatës shqiptaro-amerikane, të gjithë vatranëve e sidomos Batalionit “Atlantiku” që dhanë shembull të madh lirie e atdhedashurie. E ardhmja e Kosovës në rrugën euroatlantike, me përkrahjen e Shteteve të Bashkuara të Amerikës, Perëndimit dhe kontributin e shqiptarëve në mërgatë, do të jetë e pakthyeshme.

Kjo ditë e shenjtë e lirisë e gjen Kosovën në zhvillim, progres, siguri, paqe e stabilitet.

Zoti e bekoftë Republikën e Kosovës

Zoti e bekoftë Republikën e Shqipërisë

Zoti i bekoftë të gjithë shqiptarët anëmbanë botës

Zoti i bekoftë Shtetet e Bashkuara të Amerikës

Me respekt e gëzim

Kryetari i Vatrës

Dr.Elmi Berisha

Flamur Vezaj/

Në bibliotekën publike të qytetit Quincy, në jug të Bostonit, VATRA mblodhi komunitetin shqiptar për të kujtuar 80 vjetorin e gjenocidit grek ndaj Çamërisë.

Në një sallë të mbushur me shqiptaro-amerikanë dhe familje me origjinë nga Çamëria, gjithçka nisi pas intonimit të himnit kombëtar amerikan dhe atij shqiptar, si dhe një minutë heshtje për viktimat e gjenocidit grek ndaj shqiptarëve të Çamërisë, që nisi në qershor të vitit 1944.

Për të kujtuar 80 vjetorin e një prej ngjarjeve më të rënda ndaj popullit shqiptar, aktivitetin përkujtimor e hapi kryetari i VATRES në Boston, z. Mentor Maksutaj, me fjalën “Mos Harroni Çamërinë”.

Më pas, për këtë ngjarje të rëndë folën edhe personalitete të ndryshme, si vatrani z. Klajdi Haruni për ngjarjen e gjenocidit grek ndaj Çamërisë, viktimat dhe detaje të ndryshme të ndodhura në qershor të 1944 e në vazhdim. Studiuesi z. Agron Alibali foli për “Çështjen Çame sipas të drejtës ndërkombëtare”, profesoresha znj. Oltiana Muharremi për “Ndikimi Ekonomik nga Gjenocidi ndaj Shqiptarëve Çamë”, dhe vatrani z. Artur Vrekaj renditi detaje historike të përfshirjes së klerit grek në gjenocidin ndaj shqiptarëve të Çamërisë dhe bashkëpunimin e tyre me nazistët gjermanë. Aktivistja e komunitetit shqiptar në Boston, znj. Eva Hysi, emocionoi të pranishmit me baladën për Çamërinë. Ndërsa shkrimtari z. Namik Selmani lexoi poezinë “Aromë Çamerie” nga libri i tij antologjik “Çamëria, bisk i ëndrrës”.

Për gjenocidin grek ndaj Çamërisë dhe shpërnguljen e shqiptarëve, të pranishmit dëgjuan edhe rrëfimin emocional të një nga të mbijetuarit e asaj kohe, tashmë 88 vjeçare, znj. Rruke Klefti. Më pas folën pjesëtarë të familjeve Haruni, Hysi, Zenelaj, Duraj-Avdulla me origjinë çame, të cilët jetojnë në SHBA.

Nuk munguan poezitë, shfaqja e dokumentarit për 80 vjetorin e gjenocidit grek ndaj shqiptarëve, si dhe mesazhet përshëndetëse për këtë organizim të VATRES në Boston. Ndër këto mesazhe ishte edhe ai i kryetarit të shoqatës patriotike “Çameria” z. Liljan Idrizaj, të cilin e lexoi z. Jorid Çelaj, dhe mesazhi i vatranit çam nga Kalifornia, z. Ahmet Xhafo, të cilin e lexoi para të pranishmëve z. Fuat Memelli, ndërsa përshëndetjen e regjisorit z. Bujar Alimani e lexoi znj. Lindita Meçe.

Veç këtyre, aktivitetin e organizuar nga VATRA e përshëndetën edhe sekretari i përgjithshëm i VATRES, dr. Pashko Camaj, i ardhur nga Nju Jorku, sekretari i VATRES në Uster, profesor Thanas Gjika, si dhe përfaqësues të shoqatave shqiptare në Boston, z. Artian Rreza nga “Çunat e Bostonit”, znj. Roberta Nashi/Panariti nga “Albanian’s Fighting Cancer” (AFC), kryetarja e shoqatës “Labëria” në Boston, znj. Rudina Bardhi, një nga përfaqësueset e grupit social “Gocat e Bostonit”, znj. Edlira Duraj/Avdulla, si dhe në emër të shoqatës së shkrimtarëve shqiptaro-amerikanë, z. Mhill Velaj.

Në fund, para se dy moderatorët e këtij eventi, anëtarët e kryesisë së VATRES, znj. Lindita Meçe dhe Ervis Dhima, të mbyllnin aktivitetin, ftuar kryetarin e VATRES në Boston, z. Maksutaj, i cili falënderoi një nga një të gjithë folësit që bënë të mundur këtë aktivitet dhe premtoi se mesazhet dhe sugjerimet e bëra gjatë aktivitetit përkujtimor, VATRA në Boston do të mundohet t’i realizojë në vazhdim.

Foto nga aktiviteti Subi Çako