Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

ATDHETARI SAMI KULLA NDËRROI JETË NË CONNECTICUT, SHBA

by

  • FEDERATA VATRA DHE PARTIA LËVIZJA E LEGALITETIT NGUSHËLLOJNË FAMILJEN KULLA PËR HUMBJEN E NJERIUT TË TYRE TË DASHUR, VATRANIT DHE LEGALISTIT SAMI KULLA- /

Familja e madhe Kulla në Waterbury njoftoi se në mëngjesin e së Shtunës, 7 Shtator 2019, ndërroi jetë në moshën 86 vjeçare në St. Mary’s Hospital, i rrethuar nga familja e tij e dashur. 

Samiu ishte martuar me Ikbal(Kiazim) Kulla, e cila ndërroi jetë po në moshën 86 vjecare në 14 Shkurt të këtij viti.

Samiu Kulla u lind në Zemblak të Korçës më 15 Mars 1933.Ishte djali i të ndjerit Belul dhe Fatime (Bablusha) Kulla. Samiu u largua nga Shqipëria në moshën 18 vjecare, në vitin 1951, dhe pasi kaloi tre vjet në një kamp refugjatësh në Greqi, emigroi më pas në Francë dhe në Zvicër. Prej andej Samiu udhëtoi drejt Kanadasë, ku u vendos në vitin 1955 duke u mirëpritur nga kushërinjtë e tij. Samiu nuk humbi kohë por nisi menjëherë integrimin dhe iu fut biznesit. Ai hapi restorantin e tij të parë, “Miss Diana” në Toronto, dhe pati sukses deri në vitin 1969, kohë kur u transferua në Waterbury për t’u bashkuar me vëllain e tij të ndjerë Muhamer Kulla.

      Kur ishte në Toronto ai së bashku me Ibrahim Kullën dhe shumë nacionalistë të tjerë u bënë mbështetje e fuqishme për Vatrën, sic ishin edhe mbështetës të Familjes Mbretërore në Mërgim.

        Në vitin 1970, Samiu hapi  restorantin Bill & Sam’s Diner 

në Wolcott deri në pensionimin e tij në vitin 2010. Gjatë të gjithë jetës së tij, Samiu ka qenë një pjesëmarrës shumë aktiv në Komunitetin Shqiptaro-Amerikan së bashku me gruan e tij të ndjerë Ikbal. 

         Samiu vinte nga një familje nacionaliste, kundërshtare e regjimit komunist, mbështetëse e Mbretit Zog, dhe e përndjekur nga diktatura. Ishte kjo arsyeja përse pjesa më e madhe e familjes Kulla mërgoi në Kanada e SHBA. 

Samiu ishte i apasionuar pas çështjes Kombëtare dhe u bë pjesë aktive e veprimtarive të komunitetit. Ai ishte bujar dhe nuk kurseu asgjë për çështjen Kombëtare. Siç ishte aktivist në Toronto, ashtu veproi edhe në Ëaterbury, ku nuk pushoi së punuari për çështjen Kombëtare. Samiu ishte një nga krijuesit e komunitetit Shqiptar të atyshëm dhe përherë i papërtuar në krye të puënve kombëtare dhe fetare.

   Sami Kulla ishte anëtar i Vatrës dhe pajtimtar i Diellit deri në momentet e fundit të jetës së tij, sic ishte edhe një legalist i devotshëm.

Sami Kulla la pas djalin e tij, Agim Kulla me gruan e tij Myzen, tre mbesat e tij, Jetona Bardhollari dhe burrin e saj Rudi, Sheriban Kulla dhe Lindita Kulla. Të gjithë ushqejnë për të dashuri e respekt dhe ndjehen krenarë për trashëgiminë dhe veprën atdhetare që la pas. Ai gjithashtu la pas vëllezërit e tij të dashur, Neshet Kulla dhe bashkëshorten e tij Nezaqet që jetojnë në Watertoën; Vedat Kulla dhe bashkëshorten e tij Vera që jetojnë Middlebury si dhe kunatën e tij, Paula Kulla në Waterbury. Samiu gjithashtu ka lënë pas mbesa, nipër, kushërinj dhe miq.

          Familja njofton komunitetin se shërbimet funerale do të kryhen ditën e Hënë 9 Shtator 2019 nga ora 5:30 deri në 8:30 p.m. në  adresën:

The Albini Family Funeral Home, 430 Chase Parkway, Waterbury, Connecticut- 06708. 

Ceremonia e varrimit do të organizohet të Martën me 10 Shtator 2019 në Shtëpinë Funerale, ndërsa arkivoli me trupin e  të ndjerit do të përcillet në New Pine Grove Cemetery në Waterbury.

    FEDERATA VATRA DHE PARTIA LËVIZJA E LEGALITETIT NGUSHËLLOJNË FAMILJEN KULLA PËR HUMBJEN E NJERIUT TË TYRE TË DASHUR, VATRANIT DHE LEGALISTIT SAMI KULLA- 

NË SHTËPINË E PAVARËSISË DR. IBRAHIM RUGOVA…

by

“Shtëpia e Pavarësisë – Dr. Ibrahim Rugova” është vendi prej nga filloi projekti i pavarësisë dhe u vunë themelet e shtetit sovran të Kosovës/

PRISHTINË, 7 Shtator 2019/ “Shtëpia e Pavarësisë – Dr. Ibrahim Rugova”, është vendi prej nga filloi projekti i pavarësisë dhe u vunë themelet e shtetit sovran të Kosovës, është shprehur sot, kandidatja e LDK-së për kryeministre, znj. Vjosa Osmani.

Nga kjo shtëpi u lidhën fijet e miqësisë së madhe me SHBA- të dhe vendet e tjera. Bota e njohu përpjekjen tonë për liri.

Tri postulatet e dr. Rugovës: Liri, pavarësi e demokraci duhen jetësuar në shtet të qëndrueshëm e demokratik.

Prandaj, na duhet demokraci efektive dhe vendosmëri për ta ndërtuar shtetin mbi themelet e vlerave qytetëruese perëndimore.

Dr. Osmani theksoi mirënjohjen e thellë të saj dhe të LDK-së ndaj të gjithë atyre që kontribuan në lëvizjen për pavarësi dhe anëtarëve të  Qendrës për Informim të Kosovës (QIK), nëpërmjet të cilit bota u njoh për përpjekjet tona për liri, njofton Zyra për Informim e LDK.

Njoftohet edhe se Sot,  me rastin e përvjetorit të Kushtetutës së Kaçanikut, kandidatja e LDK-së për Kryeministre, Vjosa Osmani, viziton edhe Shtëpinë e Kulturës në Kaçanik, ku para 29 viteve u mbajt seanca e Kuvendit të Kosovës për shpalljen e Kushtetutës së Republikës së Kosovës.

KOSOVA REPUBLIKË ME KUSHTETUTË PARA 29 VITEVE

by

Histori-KOSOVA REPUBLIKË ME KUSHTETUTË PARA 29 VITEVE/



-Para 29 viteve, në 7 Shtator 1990, Kosova u shpall Republikë me Kushtetutën e miratuar nga Kuvendi i saj në një mbledhje në Kaçanik, që pasonte Deklaratën Kushtetuese të 2 Korrikut e pasohej me Referendumin për Kosovën shtet sovran dhe i pavarur të mbajtur nga 26 deri në 30 Shtator 1991 me votimin pro 99,87 për qind/
-Presidenti historik i Kosovës, Dr. Ibrahim Rugova në mesazhet e 7 Shtatorit -Viti 1998:


-Miratimi i Kushtetutës së Republikës së Kosovës më 7 shtator të vitit 1990 shënon aktin fundamental për shtetin e Kosovës. Viti 2005: Dhashtë Zoti që sa më shpejt ta gëzojmë njohjen direkte të pavarësisë së vendit tonë nga Shtetetet e Bashkuara të Amerikës dhe Bashkimi Evropian, çfarë do të qetësonte popullin e Kosovës dhe këtë pjesë të Europës e të botës/


KALENDAR-Gazeta DIELLI nga korrespondenti në Kosovë Behlul Jashari


PRISHTINË, 7 Shtator 2019/ Kosova para 29 viteve, në 7 Shtator 1990, u shpall Republikë me Kushtetutën e miratuar nga Kuvendi i saj në një mbledhje në Kaçanik, që pasonte Deklaratën Kushtetuese të 2 Korrikut, poashtu të vitit 1990, e pasohej me Referendumin për Kosovën shtet sovran dhe i pavarur të mbajtur nga 26 deri në 30 Shtator 1991 me votimin pro 99,87 për qind dhe pjesëmarrjen masive 87,01% të 1.051.357 qytetarëve me të drejtë vote.


Republika e Kosovës me kushtetutën e vet e institucionet demokratike të zgjedhje parlamentare e presidenciale që pasuan, të 24 Majit 1992, atëherë nuk u njoh ndërkombëtarisht, por megjithatë ishte dhe njihej si deklarim i fuqishëm i vullnetit të popullit mbi 90 përqind shumicë shqiptare, si edhe pjesëtarëve të komuniteteve pakicë.
Në krye të Kuvendit të Kosovës në atë kohë të vendimeve e ngjarjeve historike ishte Ilaz Ramajli. Ishin këto ngjarje e zhvillime drejt lirisë dhe pavarësisë së Kosovës, gjithnjë në rrethana të rënda të okupimit e shtetrrethimit ushtarako-policor që kishte vendosur Beogradi, kur në mënyrë kundërkushtetuese dhe përgjakshëm me kushtetutën serbe të tankeve u rrënua autonomia që kishte Kosova me Kushtetutën e vitit 1974 element konstituv me të drejtë vetoje i federates. Ajo Kushtetutë ishte e para në historinë kushtetuese të Kosovës, ndërsa e dyta ishte ajo e 7 Shtatorit 1990, në rrugën drejt lirisë e pavarësisë.
“Deklarata Kushtetuese e 2 Korrikut dhe Kushtetuta e Republikës së Kosovës e 7 Shtatorit 1990, jo vetëm që ishin akte kushtetuese juridike, por në kohën kur u nxorën ishin edhe akte mbrojtëse dhe pozicionuese në raport me situatë e krijuar në ish Jugosllavi”, ka theksuar Ramajli në një intervistë që kam zhvilluar.
Nga shpërbërja e ish Jugosllavisë, nga elementet konstituive të federatës, mes të cilave ishte edhe Kosova që u bë shtet, shtete të reja të rajonit dolën gjithësej shtatë – edhe Sllovenia, Kroacia, Bosnja e Hercegovina, Maqedona, Mali i Zi dhe Serbia.
“Akti i nxjerrjes së Kushtetutës u bë pikërisht në kohën kur më nuk kishte asnjë dyshim se Jugosllavia kishte hyrë në rrugën e pa kthim të shpërbërjes së sajë. Nxjerrja e Kushtetutës dhe shpallja e Republikës së Kosovës nga Kuvendi me 7 Shtator 1990 ishte dhënie e formës kushtetuese juridike të vullnetit të shprehur unanimisht nga shumica dërmuese e qytetarëve të Kosovës, dhe nga subjektet e atëhershme politike në Kosovë”, shprehet Ilaz Ramajli.
Në Kosovën e lirë nga qershori 1990, prej vitit 2001 deri para 11 viteve, Kosova ka pasur një Kornizë Kushtetuese, e miratuar nga OKB-ja, e cila ishte dokument më shumë inicial kushtetues, por ka mundësuar zhvillimin e vendit nga një krijesë de fakto e pavarur, ndonëse nën protektorat, në një entitet shtetëror të pavarur, edhe pse nën mbikëqyrje ndërkombëtare për një kohë.
Kosova para 11 viteve miratoi Kushtetën e Republikës, e cila në nenin 1 e përcakton “shtet i pavarur, sovran, demokratik, unik, dhe i pandashëm”. Ishte viti 2008 kur nga Kuvendi i Kosovës u miratua Kushtetuta – akti më i lartë juridik i shtetit në ditën e 9 Prillit, më pak se dy maj pas shpalljes së pavarësisë në 17 Shkurtin historik, ndërsa ka hyrë në fuqi në 15 Qershor.
Atëherë, dekretimi i 41 ligjeve, të dala nga paketa e Propozimit Gjithpërfshirës për Zgjidhjen e Statusit të Kosovës të Kryenegociatorit Martti Ahtisaari – Emisarit Special të OKB-së, ishte një nga zhvillimet më të rëndësishme të ditës së hyrjes në fuqi të Kushtetutës.Zhvillimet më të rëndësishme brenda njëmbëdhjetë viteve ishin në 2012-tën, kur Kuvendi, në 7 Shtator që ishte ditë e përvjetorit të Kushtetutës 1990, ka miratuar amendamentimin e Kushtetutës së Republikës lidhur me përfundimin e mbikëqyrjes ndërkombëtare të pavarësisë së Kosovës, ndërsa në 10 Shtator pasoi vendimi i Grupit Drejtues Ndërkombëtar, i mbledhur në Prishtinë, për përfundimin e mbikëqyrjes ndërkombëtare.“Përmbyllja e mbikëqyrjes është vlerësimi më i lartë ndërkombëtar, që i është bërë shtetit të Kosovës pas shpalljes së Pavarësisë”, u vlerësua atëherë.Grupi Drejtues Ndërkombëtar (ISG) për Kosovën, i cili përbëhej nga vendet që e kanë njohur pavarësinë, ishte formuar në 28 Shkurt të vitit 2008 dhe synonte të orientojë dhe mbikëqyrë zhvillimin demokratik të shtetit të ri, të nxisë qeverisjen e mirë dhe shumetnicitetin.Kosova e pavarur e shpallur para më shumë se 11 vitesh në 17 Shkurt 2008 deri tani është njohur nga 116 shtete anëtare të OKB-së, ndërsa sot ka edhe një përvjetor – dyvjetorin e konstituimit në 7 Shtator 2017 të Kuvendit të zgjedhjeve parlamentare të 11 Qershorit 2017, të tretave në pavarësi e të gjashtave në vendin e lirë.
E pas një muaji – në 6 Tetor 2019 Kosova mban zgjedhje të reja të parakohshme parlamentare…
PRESIDENTI HISTORIK RUGOVA: 7 SHTATORI 1990, THEMEL I SHTETËSISË SË KOSOVËS
-Miratimi i Kushtetutës së Republikës së Kosovës më 7 shtator të vitit 1990 shënon aktin fundamental për shtetin e Kosovës/
Presidenti historik i Republikës së Kosovës, Dr. Ibrahim Rugova, vlerësonte se miratimi i Kushtetutës së Republikës së Kosovës në 7 Shtator të vitit 1990 shënonte aktin fundamental për shtetin e Kosovës. Po sjellim dy mesazhe të Presidentit Rugova për 7 Shtatorin, të vitit të luftës 1998 dhe të vitit të lirisë 2005 – të fundit të Presidentit historik për ditën historike të Kushtetutës së Republikës së Kosovës:
VITI 1998: DEKLARATË E PRESIDENTIT TË REPUBLIKËS SË KOSOVËS DR. IBRAHIM RUGOVA ME RASTIN E 7 SHTATORIT
PRISHTINË, 7 Shtator 1998/ Me rastin e 7 Shtatorit – Ditës së miratimit të Kushtetutës së Republikës së Kosovës – Presidenti i Republikës Dr. Ibrahim Rugova dha një deklaratë në të cilën thuhet:Pas shpalljes së Deklaratës së Pavarësisë së Kosovës më 2 korrik të vitit 1990, miratimi i Kushtetutës së Republikës së Kosovës më 7 shtator të vitit 1990 shënon aktin fundamental për shtetin e Kosovës. Kjo ngjarje e rëndësishme në historinë më të re të Kosovës, ka vënë themelet juridike e politike të shtetësisë së Kosovës.Sot, tetë vjet pas miramitit të këtij akti të lartë, populli i Kosovës edhe pse në gjendje okupimi dhe i ballafaquar me ofensivat e egra të forcave serbe, me një vullnet të fortë po ndërton shoqërinë demokratike e civile në Kosovë. Dhe, përkundër vuajtjeve nëpër të cilat po kalon, ai është i përcaktuar që me mjete politike ta realizojë pavarësinë e Kosovës.Në këto çaste të vështira që po përjeton, populli i Kosovës me përkrahjen dhe ndihmën e botës demokratike e sidomos të SHBA-ve dhe Unionit Evropian, do të dijë ta kapërcejë këtë gjendje të rëndë.
Zoti e bekoftë popullin e Kosovës!

VITI 2005: PRESIDENTI RUGOVA U DREJTOI NJË MASAZH QYTETARËVE TË KOSOVËS ME RASTIN E 7 SHATORIT
PRISHTINË, 7 Shtator 2005/ Presidenti i Kosovës, Dr. Ibrahim Rugova, ka përgëzuar qytetarët e Kosovës me rastin e 7 Shtatorit, ditës kur para 15 vjetësh u miratua Kushtetuta e Republikës së Kosovës në Kaçanik. Në mesazhin e Presidentit Rugova thuhet:Me rastin e 7 Shtatorit, në 15 vjetorin e miratimit të Kushtetutës së Republikës së Kosovës, Ju shpreh urimet e mia të përzemërta.Dita e 7 Shtatorit e vitit 1990 është një ditë e rëndësishme në historinë tonë të re, sepse u miratua Kushtetuta e Republikës së Kosovës, që u bë pas shpalljes së Deklaratës së Pavarësisë në korrik të po atij vitKjo i vuri themelet e shtetit të Kosovës, që u vërtetua me Referendumin për pavarësi dhe hapi perspektiva për ndërtimin e jetës shtetërore demokratike.Dhashtë Zoti që sa më shpejt ta gëzojmë njohjen direkte të pavarësisë së vendit tonë nga Shtetetet e Bashkuara të Amerikës dhe Bashkimi Evropian, çfarë do të qetësonte popullin e Kosovës dhe këtë pjesë të Europës e të botës.

Zgjedhjet parlamentare në Kosovë dhe Vjosa Osmani

by

Shkruan: Nikë Gashaj/

Me 6 tetor 2019, do të mbahen zgjedhjet e jashtëzakonshme parlamentare në Kosovë.Lidhja Demokratike e Kosovës kandidoi znj.Vjosa Osmanin për kryeministre të Qeverisë së Kosovës. Referencat e saja të larta profesionale, shkencore, politike dhe dëshmia patriotike e rekomandojnë atë si kandidaten më të mirë  për kryeministre, për çka meriton mbështetjen e shumicës së  trupit elektorial të Kosovës.

Të dhënat e saja biografike tregojnë: Vjosa Osmani e ka kryer fakultetin juridik në Prishtinë me sukses të shkëlqyeshëm, si dhe studimet për master dhe doktoraturën në Universitetin e Pitsburgut, në SHBA. Në vitin 2005 është shpërblyer dy herë nga Universiteti i Pitsburgut: me Çmimin “Excellence  For The Future Aëard” dhe me Çmimin Sheth Internacional Achievement Aëard”, për kontributin e saj në fushën e të drejtave të njeriut. Po ashtu është ligjeruese në dy Universitete: Prishtinë dhe  Pitsburg.

Ajo ka qenë shefe e stafit të Presidentit të Republikës së Kosovës, Fatmir Sejdiu; pjesë e palës shqiptare në Gjykatën Ndërkombëtare të Drejtësisë, për mbrojtjen e pavarësisë së Kosovës. Për tri mandate deputetja më e votuar e Palamentit të Kosovës. Si politikane është e treguar: e aftë, objektive, guximtare, vizionare dhe e vendosur për  ruajtjen dhe mbrojtjen e  tërësisë territoriale të Kosovës dhe të sovranitetit të plotë të shtetit të Kosovës. Në angazhimin e saj politik është treguar luftare energjike kundra korrupsionit dhe krimit të organizuar, ndërsa në anën tjetër, është ithtare për ndërtimin dhe funksionimin konsekuent të pushtetit ligjor dhe kushtetues.

Ka qenë Kryetare e Komisionit për Punë të Jashtme, Diasporë dhe Investme strategjike; kryetare e Komisionit për integrime Evropiane; nënkrytare e Komisionit për Reforma kushtetuese në Kosovë.

Ajo nuk ka hipoteka nga e kalura e luftës së Kosovës,  kundra saj nuk mund të ngritet, aktakuza apo aktpadi për krime të luftës, e që është me rëndësi për ndërkombëtarët që politika shtetërore e Kosovës të lirohet  nga komandantët e luftës. Nga personat e tillë, tashmë janë  të lodhur dhe qytetarët e Kosovës, meqenëse për sfidat e kohës së re bashkëkohore dhe për ndertimin e shtetit modern të Kosovës, është i nevojshëm një profil tjetër i ri i kuadrave – ekperteve të dëshmuar në fusha të ndryshme, me vizone dhe mundësi të reja.  

Më në fund znj.Vjosa Osmani i takon moshës së re, andaj ka dhe energji fizike dhe intelektuale të konsiderueshme, si dhe cilësi karizmatike për të drejtuar Qeverin e Kosovës  dhe të zhvillimit të Dialogut, Kosovë-Serbi për normalizimin e marrëdhënieve dhe njohjen e ndërsjellët shtetërore. Gjithë ashtu, zgjedhja e saj për kryeministre, paraqet dhe një akt me rëndësi të barazisë gjinore dhe të emancipimit politik më të madh të gruas  shqiptare.

……nëse/

by

Rudyard Kipling*/
(shqipërim nga Astrit Lulushi)/

Nëse kokën tënde e ruan
Kur të gjithë rreth teje
Të vetën e humbasin
Dhe të fajësojnë ty,
Nëse i beson vetes
Kur të gjithë të dyshojnë,
Pa harruar se je
Nën dyshimin e tyre;

Nëse mund të presësh
Dhe të mos lodhesh duke pritur,
Ose i gënjyer,
Mos u merr me gënjeshtra,
Duke qenë i urryer
Mos i hap udhë urrejtjes,
Dhe megjithatë,
Mos u duk shumë mirë,
As mos u trego i mbimençur;

Nëse mund të ëndërrosh –
Mos e bëj ëndërrën zotin tënd;
Nëse mund të mendosh –
Mos e bēj mendimin qëllimin tënd,
Nëse mund të takohesh
Me triumfin dhe shkatërrimin
Trajtoji të dy njësoj;

Nëse dëgjon të vërtetën
Të Shtrembëruar nga kamxhikët,
Ose shikon gjërat
Që të dhanë jetën, të prishura,
Mblidh veten dhe ndërto
Me ato që të kanë mbetur;

Nëse fitimeve e grumbulluara
Një ditë i humbet të gjitha
Nis përsëri në fillimet e tua,
Dhe kurrë mos nxirr një fjalë
Për humbjen që ke pësuar;

Nëse forcon zemrën
Dhe mendjen tënde
Për të dalë nga fatkeqësia
Shumë kohë pasi ajo zhduket
Kështu vazhdo
Edhe nëse asgjë nuk ke
Përveç Vullnetit që të thotë: ‘Qëndro!’…..

—-
*Joseph Rudyard Kipling (1865 – 1936) gazetar anglez, shkrimtar i tregimeve të shkurtra, poet dhe novelist. U lind në Indi, ku u frymëzua për shumë nga krijimet e tij.
Reputacioni i Kiplingut ka ndryshuar me klimën politike dhe shoqërore të epokës. Kritikat ndaj tij vazhduan për pjesën më të madhe të shekullit të 20-të. George Orwell e shihte Kipling si “imperialist agresiv”, i cili ishte “moralisht i pandjeshëm dhe estetikisht i pështirë”.
Kritiku letrar Douglas Kerr shkruan: “Kipling është një autor që mund të frymëzojë mosmarrëveshje pasionante dhe përcaktimi i vendit të tij në historinë letrare është larg nga zgjidhja….Ai njihet si i pakrahasueshëm, interpretues i diskutueshëm i mënyrës sesi u përjetua perandoria britanike. Kjo dhe një njohje në rritje e tregimtarisë së tij të jashtëzakonshme, e bëjnë Kipling një forcë për t’u llogaritur” (Kerr)