Featured – Page 320 – Dielli

DINJITETI PËRBALLË TOTALITARIZMIT

August 19, 2019 by dgreca

ISH TË PËRNDJEKURIT NË LUSHNJE: KUJTESË, LULE, FOTOGRAFI NGA JETA NË KAMPET E INTERNIMIT DHE PROTESTË /

Nga Dalip Greca/

-Kryetari i të Përndjekurëve Nebil Çika: Është hipokrizi të vish dhe të vendosësh lule tek Memoriali dhe të mos kërkosh falje për krimet e komunizmit, është hipokrizi të vish këtu mes atyre që vuajtën dhe të qëndrosh në Parlament me ata që kanë kryer krime ndaj shtresës së të përndjekurëve apo kanë bërë vrasje në kufi…

-Uran Kostreci: Ne, serës sonë, nuk na takon që të mos sillemi me fisnikëri dhe të mos respektojmë kodin e mortit…

-Sofokli Kuqeshi: Ju vazhdoni të na shihni ne si “delja e zezë”, përse ne duhet të vazhdojmë të vuajmë edhe sot…As një emër rruge në Savër nuk keni miratuar në kujtesë të vuajtjeve tona…Së paku ruani një barakë si dëshmi të jetës tonë të mundimshme….

— FAIK MATJANI: KISHA SHUME PER TE THENE PER PORTO PALERMON, TEPELENEN, PER GJAZEN, PER…POR NUK ME PYETI NJERI….

****

Të Djelën, 18 Gusht 2019, në Orën 10 të mëngjesit, në qytetin e Lushnjës, pranë Monumentit Kombëtar të Internim-Dëbimeve për vitet 1954-1990 nisën takimet e Kujtesës. Veprimtaria u organizua në kuadër të 23 gushtit, Ditës Europiane të Viktimave të Regjimeve Totalitare dhe 30 gushtit, Ditës Ndërkombëtare të të Zhdukurve. Organizatorë të veprimtarisë ishin Autoriteti për Informim mbi Dokumentet e ish-Sigurimit të Shtetit, në bashkëpunim me Bashkinë e Lushnjës, Institutin për Integrimin e të Përndjekurve, Shoqatën Antikomuniste të Përndjekurve Politikë etj. Nën moton: “Dinjiteti përballë totalitarizmit”, organizatorët synonin të risillnin në kujtesë jetën në kampet e internimit në të gjithë komponentët e saj nga vuajtjet, përndjekjet, apelet, privimet, deri tek martesat.

Takimet pranë Memorialit Kombëtar tashmë janë të përvitshme. Ish të përndjekurit politikë, familjet e internuara, të mbijetuar nga kampet e vuajtjes, vijnë edhe nga emigracioni për të ruajtë dhe përcjellë kujtesën e vuajtjeve të kohës së diktaturës. Kësaj veprimtarie i ishte bashkuar edhe ambasadori Zviceran në Shqipëri z. Adrian Maître, Kryetarja e Autoritetit të Dosjeve të Ish Sigurimit zonja Gentiana Sula me bashkëpunëtorët e saj,Kryetari i Shoqatës së të Përndjekurëve Politikë Nebil Çika, kryetari i bashkisë Fatos Tushe, deputeti socialist Bashkim Fino, Kryetari i Partisë Lëvizja e Legalitetit Shpëtim Axhami e të tjerë.

Pasi janë vendosur kurora me lule pranë monumentit, z. Simon Mirakaj, anëtar i Autoritetit të Dosjeve të ish Sigurimit, i ka përshëndetur bashkëvuajtësit dhe organizatorët dhe ka bërë thirrje për Kujtesë.

Më pas pjesmarrësit kanë shkuar në mjediset e Qendrës Kulturore’Vaçe Zela” për të ndjekur ekspozitën fotografike nga jeta në kampet e internimit si dhe për të parë dokumente nga Dosjet e e përndjekjet e sigurimit famkeq të diktaturës, që ekspozoheshin për herë të parë. Kryetarja e Autoritetit ka përgëzuar grupin e punës që e ralizuan ekspozitën si:Ardita Repishti, Anton Dukagjini, Bianka Hada, Ardiana Topi, Eda Isaku , Simon e Pal Mirakaj, Altin Hoxha e të tjerë.

Në sallën e Kinoteatrit me ish-të internuarit dhe trashëgimtarët e tyre, qytetarë e të ftuar të tjerë, ka nisë prezantimi i projektit të Autoritetit në bashkëpunim me IPP e SHAPP, për kthimin në vendkujtese të qendrave të internimit, bashkëbisedim i hapur ku pritej të shkëmbeheshin ide e sugjerime me të pranishmit. Ndoshta këtu e pati zanafillën edhe revoltimi i disa prej ish të internuarave, që ndërprenë aktivitetin. Ato nuk e panë veten objekt të aktivitetit dhe protestuan për mospërmendjen e emrave e disa familjeve që vuajtën në këto kampe deri më 1991, e cilësuan hipokrizi pjesmarrjen e deputetit socialist, dhe njëra prej tyre i kërkoi sallës që të ngrihej në këmbë dhe të mbante 1 minut heshtje për të ndjerin Sherif Kaloshi, që sapo ndërroi jetë në Kanada.

Në shenjë proteste për pjesmarrjen e deputetit socialist Fino, Vera Iliazi, Rudina Dema dhe Bedrie Kaba, braktisën sallën duke u pasuar edhe nga të revoltuar të tjerë.

KRONIKA:Takimin e bashkëbisedimit e ka hapë Ardita Repishte, që ka përshëndet të pranishmit dhe ka ftuar kryetarin e Bashkisë z. Fatos Tushe për të përshëndetur. Z. Tushe ka përgëzuar bashkorganizatorët, pjesmarrsit, dhe ka vlerësuar pjesmarrjen e ambasadorit zviceran. Më pas ai ka vlerësuar….(Të plotë do ta lexoni në Gazetën Dielli në Print)

FESTA E VJELJES SË RRUSHIT NË RAHOVEC -KOSOVË

August 17, 2019 by dgreca

-Presidenti i Shqipërisë Ilir Meta përshëndet Festën e Vjeljes së Rrushit në Rahovec, ku ishin edhe Presidenti i Kosovës Hashim Thaçi dhe Kryeministri në detyrë Ramush Haradinaj: Shkëmbimet mes Shqipërisë dhe Kosovës të rriten edhe më tej!- Kultivimi i hardhisë në këtë pjesë të Kosovës, dëshmi e orientimit tonë evropian. -Rahoveci, model i njerëzve që punojnë/

Gazeta DIELLI nga korrespondenti në Kosovë Behlul Jashari

RAHOVEC, 16 Gusht 2019/ Në qytetin e Rahovecit në Kosovë ka nisur sot Festa e Vjeljes së Rrushit “Hardh Fest 2019” me moton “Një got’ për mot!”, ku ka marrë pjesë edhe Presidenti i Shqipërisë Ilir Meta.

Në festën ku ishin edhe Presidenti i Kosovës Hashim Thaçi, Kryeministri në detyrë Ramush Haradinaj, deputetë dhe përfaqësues të pushtetit vendor, Presidenti Meta në fjalën e Tij të rastit tha:

“Nuk mund të mos isha sot këtu në këtë festë për tri arsye: E para sepse kur kam ardhur me Ambasadorin Minxhozi dhe kemi vizituar fabrikën ‘Stone Castle’ kam ngelur vërtet me shumë përshtypje nga ky potencial i jashtëzakonshëm që ka Kosova, por jo vetëm ajo, por i gjithë rajoni ynë.Së dyti, sepse unë jam nga krahina e Skraparit, që nuk shquhet për verë si Rahoveci, por që mban vendin e parë për raki të fortë në Shqipëri.Kjo festë nuk është vetëm gëzim, por mbi të gjitha është begati, pasi vreshtaria është një nga burimet kryesore të jetesës, së punës e të begatisë për të gjithë bashkësinë tuaj.Së treti, sepse ne të gjithë duhet t’i kushtojmë më shumë vëmendje mbështetjes së prodhimit vendas dhe në mënyrë të veçantë prodhuesve të verës, të cilët meritojnë një mirënjohje të jashtëzakonshme sepse me shumë profesionalizëm kanë arritur të hyjnë në tregun ndërkombëtar të verës, ku konkurrenca është shumë e fortë.Populli i Rahovecit meriton një mirënjohje tepër të veçantë për shkak se vera e Rahovecit është bërë mjaft e famshme në tregjet ndërkombëtare.Ne duhet të mësojmë shumë nga njëri-tjetri! Sidomos Shqipëria shumë më tepër nga Kosova dhe anasjelltas, sepse na takon të vëmë në lëvizje të gjitha ato potenciale që kanë vendet tona, e sidomos ato që ka Shqipëria në fushën e bujqësisë, por edhe në atë të turizmit.

Edhe njëherë suksese! Prodhime të mbara! Mbarësi dhe begati për të gjithë bashkësinë tuaj!”

Presidenti i Kosovës Hashim Thaçi ka shkruar: “Duke promovuar kulturën e punës dhe historikun e festës së vjeljes së rrushit, sot kam marrë pjesë në hapjen e Festivalit “Hardh Fest” në Rahovec. Kultivimi i hardhisë në këtë pjesë të Kosovës është edhe dëshmi e orientimit tonë evropian, i cili është i rrënjosur thellë në vlerat e lashta perëndimore. “Hardh Fest” ka arritur të ndërkombëtarizohet, të sjellë emra të njohur të artit ndërkombëtar në Rahovec, të organizojë aktivitete shumë atraktive, që kanë tërhequr vëmendje edhe botërore. Urime të gjithë vreshtarëve festa e vjeljes së rrushit!”

Kryeministri në detyrë, Ramush Haradinaj, gjatë pjesëmarrjes në hapjen zyrtare të festës së rrushit “Hardh Fest” u shpreh:

“Jam i bindur se në Rahovec e gjejmë një model të njerëzve që punojnë dhe me punën e tyre kanë krijuar këto vlera dhe institucionet e Kosovës edhe në të ardhmen duhet t’i përkrahin njerëzit e suksesshëm të Rahovecit”.

Para të pranishmëve të shumtë, Kryeministri në detyrë, Haradinaj, tha se është mirë që fokusimi të mbetet te politikat fiskale, lirimet tatimore, përkrahja e fermerëve, vreshtarëve, pemëtarëve, për arsye se vetvetiu do të ketë më shumë rezultate.”E vërteta është se deri tani ka rezultate dhe këto na inkurajojnë që të vazhdojmë me këto politika fiskale, me lehtësimet tatimore, në përkrahje të prodhuesve dhe të prodhimit vendor”, tha Haradinaj, duke shtuar se nevojitet të ecet para edhe me gjyqësor kredibil, për arsye se duhet të fitojë oferta dhe kualiteti më i mirë dhe jo të dominojnë instrumentet e tjerë.Kryeministri në detyrë, Ramush Haradinaj, tha gjithashtu se duhet eliminuar mangësitë që ekzistojnë në shoqëri, korrupsionin dhe të jenë të sinqertë dhe real në përballje me të.Kryetari i Komunës së Rahovecit, Smajl Latifi, tha se, kjo festë ofron për fermerët, vreshtarët, artistët, rininë, njerëzit e këtyre zonave dhe të gjitha palët e interesit, që të bëhen më aktivë në jetën shoqërore dhe kulturore.

“Gjatë këtyre ditëve, Rahoveci dhe njerëzit e tij hapin dyert dhe zemrat , duke shfaqur bujarinë, krenarinë dhe përkushtimin e tyre për festën”, tha kryetari Latifi.Në nisjen e festës treditore të rrushit në Rahovec është bërë shpallja e vreshtarëve dhe verëtarëve më të mirë, si dhe u bë hapja e panairit të rrushit, verës, rakisë dhe gastronomisë.Festa e vjeljes së rrushit organizohet që nga viti 2001 dhe tani është shndërruar në festë nacionale të të gjithë qytetarëve të Kosovës.

*Per me shume fotografi shihni ne Facebook (Gazeta Dielli)

KRYETARI I VATRËS, TAKIM MIQËSOR ME ISH PRESIDENTIN BILL KLINTON

August 16, 2019 by dgreca

Kryetari i Federatës Pan Shqiptare të Amerikës “Vatra” z. Dritan Mishto zhvilloi një takim miqësor informal me ish Presidentin Bill Klinton, mikun e madh të shqiptarëve.

Kryetari Mishto i shprehu Presidentit Klinton respektin më të thellë për gjithë kontributin e tij në ndihmë të shqiptarëve dhe proceseve integruese. Gjithashtu z. Mishto e njohu Presidentin Klinton me reformat rrënjësore të Federatës Vatra dhe qëndrimet e saj lidhur me zhvillimet më të fundit në Shqipëri, Kosovë e Ballkan. Gjatë kohëve të fundit Kryetari i Federatës Pan shqiptare të Amerikës “Vatra” është takuar disa herë miqësisht me Presidentin Klinton.

DEKLARATË E FEDERATËS PAN SHQIPTARE TË AMERIKËS”VATRA”

August 14, 2019 by dgreca

Federata Panshqiptare e Amerikës VATRA distancohet dhe dënon përdorimin nga Qeveria Shqiptare të simbolikave që dëmtojnë të ardhmen evropiane të Shqipërisë dhe faktorit shqiptar./

Kohët e fundit, në një errësirë zyrtare informative, publiku u njoh shkarazi, me ngritjen e një memoriali të vendosur në Parkun e Tiranës, në nderim të një numri shtetasish turq, të cilët kanë humbur jetën gjatë trazirave të ndodhura në Turqi në Korrik 2016. Për publikun mbeten të pasqaruara arsyet e një veprimi të tillë dhe mungesa e llogaridhënies dhe transparencës në këtë rast tregon se praktikat, që ndiqen dhe realizohen në institucionet shtetërore i nënshtrohen dëshirave dhe interesave të drejtuesve të tyre, jashtë standardeve demokratike.

Federata Panshqiptare e Amerikës VATRA u themelua nga korifenjtë e mendimit modern shqiptar, Noli e Konica si një domosdoshmëri për të nxitur dhe bërë realitet shkëputjen nga errësira qindra vjecare otomane dhe orientimin e Shqipërisë drejt perëndimit, të cilit i kemi përkitur dhe do t’i përkasim.

Në këto rrethana VATRA dënon publikisht dhe distancohet qartazi nga ngjarja e fundit dhe nga cdo tentative të ngjashme, simbolika e të cilave synon plotësimin e agjendave, me të cilat shqiptarët janë ndarë që prej më shumë se një shekulli. Ftojmë forcat politike shqiptare, pa dallim, që cuditërisht po heshtin, t’i bashkohen qëndrimit të qytetarisë shqiptare.

Federata Panshqiptare e Amerikës VATRA ka shprehur në vazhdimësi publikisht dhe jopublikisht tek institucionet amerikane, shqetësimin e thellë për gjendjen e demokracisë në Shqipëri, në tërë kompenentët përbërës të saj. Por, ngjarja e fundit, përcjell mesazhe të dëmshme në kuadër të një optike më të gjerë të partneritetit strategjik.

I bëjmë thirrje Kryeministrit Edi Rama të nisë menjëherë fuqizimin e marrëdhënieve me Shtetet e Bashkuara, ringritjen e këtyre marrëdhënieve në nivelin, që shqiptarët kërkojnë dhe të heqë dorë nga cdo simbolikë që dëmton objetivat tona perëndimore.

Patriotë apo tradhtarë? Emigracioni politik shqiptar në vitet 1944-1990

August 13, 2019 by dgreca

Thirrje për prezantime për konferencën shkencore/

Në vjeshtën e vitit 1944, qyteti i Shkodrës përjetoi grumbullime të shumta njerëzish në kërkim të një mjeti transporti që do t’i largonte ata nga Shqipëria. Pjesa më e madhe e tyre ishin shqiptarë të pasur dhe të shkolluar, të cilët kishin pasur pozicione të rëndësishme në administratat e krijuara nga pushtuesit italian dhe gjerman, por edhe disa nga krerët e Ballit Kombëtar, Legalitetit dhe organizatave të tjera politike të krijuara gjatë Luftës së Dytë Botërore në Shqipëri.

Vendimet e Kongresit të Përmetit dhe të Mbledhjes së Dytë të Këshillit të Përgjithshëm Antifasisht Nacionalçlirimtar kishin vulosur marrjen e pushtetit nga PKSH-ja e, së bashku me të, edhe drejtimin që do të merrte Shqipëria në të ardhmen. Për këto personalitete, e vetmja mënyrë për t’i shpëtuar hakmarrjes së pushtetarëve të rinj, ishte të zgjidhnin këtë rrugëtim larg atdheut, i cili për një pjesë të madhe të tyre rezultoi pa kthim. Kësaj vale të parë të emigracionit politik shqiptar, kohë pas kohe, iu shtuan edhe shumë e shumë të tjerë, të cilët u detyruan të largoheshin nga vendi për t’i shpëtuar represionit komunist, apo sepse refuzonin të jetonin midis telave me gjemba të imponuar nga regjimi.

Në Shqipëri, drejtuesit e lartë të regjimit i konsideruan emigrantët politikë shqiptarë si “tradhtarë të atdheut”, për shkak të qëndrimeve që kishin mbajur gjatë Luftës së Dytë Botërore; të angazhimit të tyre në mjaft operacione të organizuara nga shërbimet e huaja të inteligjencës, por edhe për shkak të kundërshtimit të hapur ndaj regjimit totalitar të vendosur në Shqipëri. Në emigracion, shumë prej tyre u shndërruan në zëra të spikatur në jetën akademike dhe shoqërore dhe nuk reshtën duke ngritur zërin kundër totalitarizmit shqiptar, por edhe për çështjen kombëtare shqiptare. Në institucionet ndërkombëtare si OKB, Amnisty International, Parlamenti Europian, Senati i SHBA, apo Këshilli i Evropës, kohë pas kohë, do të dërgoheshin letra dhe peticione nga individë apo organizata të emigracionit politik shqiptar, në të cilat shprehej shqetësimi për problematika të ndryshme që lidheshin me Shqipërinë dhe shqiptarët.

Mbi veprimtarinë e emigracionit politik shqiptar, për fat të keq, ende nuk ka botime akademike serioze. Për të mundësuar nxitjen e një debati të shëndetshëm shkencor mbi veprimtarinë dhe personalitetet shqiptare të emigracionit politik shqiptar gjatë viteve 1944-1990

Autoriteti për Informim mbi Dosjet e ish-Sigurimit të Shtetit dhe Instituti i Historisë

pranë Akademisë së Studimeve Albanologjike,

në bashkëpunim me

Institutin për Studimin e Krimeve dhe Pasojave të Komunizmit dhe

Institutin për Integrimin të ish-të Përndjekurve Politikë

Ju ftojnë të paraqitni propozimet për prezantime rreth këtyre çështjeve:

Veçoritë e krijimit të emigracionit politik shqiptar gjatë viteve 1944-1990;
Shtrirja gjeografike e emigracionit politik shqiptar;
Profile të emigrantëve politikë dhe veprimtaria e tyre;
Shoqatat e krijuara nga emigracioni politik shqiptar dhe qasja e tyre kundrejt Shqipërisë komuniste;
Operacioni “Rollback” dhe përfshirja në të e emigracionit politik shqiptar;
Reagimi i shtetit komunist shqiptar ndaj emigracionit politik shqiptar;
Veprimtaria e emigracionit politik shqiptar për mbrojtjen e interesave kombëtare shqiptare;
Kampet e emigrantëve në Europë.
Lufta e Ftohtë, marrëdhëniet e shtetit shqiptar me jugosllavët, grekët dhe italianët.

***

Pranë arkivit të AIDSSH-së ruhet dhe administrohet një larmi e madhe dokumentesh arkivore të cilat përmbajnë dhe trajtojnë informacione e të dhëna rreth emigracionit politik shqiptar, të arratisurve jashtë vendit, grupeve diversante, organizatave të ndryshme politike të krijuara nga emigracioni shqiptar në Europë, Shtetet e Bashkuara të Amerikës dhe vende të tjera. Këto dokumente konsistojnë në raporte, statistika dhe informata mbi veprimtarinë e emigracionit shqiptar në vende të ndryshme, relacione dhe raporte mbi bandat e diversantët që operonin kryesisht në Jugosllavi, etj., relacione dhe statistika për të arratisurit, të dhëna dhe dosje për emigrantët politikë e ekonomikë, etj.

Dokumentet e mësipërme përllogariten të jenë afërsisht 90 mijë dosje e fashikuj dhe i përkasin periudhës 1944-1991. Shumica prej këtyre dokumenteve pritet të bëhen publike për herë të parë për qytetarët dhe studiuesit.

Ndërkohë, prej një viti Autoriteti ka ndërmarrë projektin e mbledhjes së dëshmive gojore të të mbijetuarve të përndjekjes, pjesë e të cilit janë bashkësia shqiptare në SHBA dhe ajo në Belgjikë. Marrëveshja e AIDSSH-së me Zërin e Amerikës dhe bashkëpunimi me Federatën Panshqiptare Vatra ka mundësuar realizimin e intervistave me të arratisur në Shtetet e Bashkuara, të përndjekur nga Sigurimi i Shtetit, dëshmitë e të cilëve janë depozituar pranë arkivit digjital të Autoritetit. I njëjti projekt vijon në Belgjikë, në bashkëpunim me komunitetin shqiptar atje. Përfaqësues të këtyre komuniteteve ftohen të japin kontributin e tyre në konferencë.

Propozimi duhet të jetë në formë abstrakti jo më shumë se 300 fjalë dhe të dërgohet deri më 15 shtator 2019 në adresën elektronike: info@autoritetidosjeve.gov.al

Pjesëmarrësit do të njoftohet për përzgjedhjen jo më vonë se më 30 shtator 2019.

Komiteti Organizativ:

Akademik Beqir Meta (ASA)

Dr. Marenglen Kasmi (AIDSSH)

Dr. Adriana Topi (AIDSSH)

Prof. Asoc. Dr. Sonila Boçi (ASA)

Dr. Çelo Hoxha (ISKPK)