Featured – Page 326 – Dielli

Ambasada e re në Kosovë, manifestim i përkushtimit të Amerikës

July 5, 2019 by dgreca

-ELIOT ENGEL: KOSOVA ËSHTË PJESË E SHBA-ve/

-Ambasadori i SHBA-ve në Kosovë, Philip Kosnett: Ambasada e re është manifestim fizik i përkushtimit të Amerikës për partneritet të qëndrueshëm me Republikën e Kosovës. Përderisa vazhdoni rrugëtimin për të mundësuar paqe, drejtësi dhe prosperitet për tërë popullin e këtij vendi, Shtetet e Bashkuara të Amerikës do të qëndrojnë përkrah jush në çdo hap/

PRISHTINË, 4 Korrik 2019-Gazeta DIELLI/ Ambasadori i SHBA-ve në Kosovë, Philip Kosnett, dhe Zonja Alison Kosnett,ishin nikoqirë të pritjes që për nder të Ditës së Pavarësisë së SHBA-ve të mbajtur sot, kur u zhvillua edhe ceremonia e përurimit të ndërtesës së re të Ambasadës Amerikane në Kosovë.

FJALA E AMBASADORIT KOSNETT GJATË PËRURIMIT TË NDËRTESËS SË RE TË AMBASADËS AMERIKANE NË KOSOVË, 4 KORRIK 2019

Zonja dhe zotërinj, Alisoni dhe unë ju falënderojmë të gjithëve që jeni me ne në përurimin e shumëpritur të ndërtesës së re të ambasadës sonë. Presim me padurim fjalimet e mysafirëve tanë, prandaj do të flas shkurt.

President Thaçi, kryetar i Kuvendit Veseli, kryeministër Haradinaj, kryetar i komunës Ahmeti, mysafirë të nderuar!

Prania e kaq shumë zyrtarëve të nderuar të Kosovës pasqyron partneritetin tonë të ngushtë dhe gjallërinë e demokracisë së Kosovës. Nuk do të qëndronim këtu pa mbështetjen e nikoqirëve tanë në nivel qendror dhe komunal.

Kam nderin e posaçëm t’i uroj mirëseardhje kryesuesit të Komisionit për Punë të Jashtme, Z. Eliot Engel dhe z-njës Patricia Engel. Askush nuk ka bërë më shumë se ai për ndërtimin e partneritetit të ngushtë ndërmjet Shteteve të Bashkuara të Amerikës dhe Kosovës, përfshirë edhe me mbështetjen e kësaj ambasade.

Gjithashtu, jam tepër i lumtur që drejtori Tad Davis nga Byroja e Departamentit të Shtetit për veprimtari ndërtimore jashtë vendit është këtu si përfaqësues i sekretarit Pompeo dhe për t’na ndihmuar për përurimin e kësaj ambasade të bukur, efikase dhe të përparuar nga pikëpamja mjedisore që ajo Byro e ka dizajnuar dhe ndërtuar.

Por, kur them që Departamenti i Shtetit e ka ndërtuar këtë ambasadë, kjo është vetëm një anë e rrëfimit. Me ne sonte janë disa nga ndërtimtarët, inxhinierët, drejtuesit dhe studentët e sektorit privat – nga SHBA-ja dhe Kosova – përpjekjet e palodhshme të të cilëve e kthyen ëndrrën në realitet. Edhe ata e meritojnë një duartrokitje.

Jemi duke i kryer punët e fundit në brendi para se ambasada të çelet për biznes diku kah vjeshta e hershme. E pastaj do të bëhet vend pune i rangut botëror për punonjësit amerikanë dhe vendorë nga gjithë ato agjenci amerikane në Prishtinë që për herë të parë do të veprojnë nën një kulm.

Por, kjo ambasadë është më shumë se veç një ndërtesë dhe nga ajo nuk do të përfitojnë vetëm punonjësit e saj. Sektori i zgjeruar i konsullatës do të mbrojë dhe do t’ju shërbejë shtetasve dhe udhëtarëve amerikanë dhe do t’ua lehtësojë udhëtimin në SHBA biznesmenëve, studentëve dhe vizitorëve kosovarë. Do të kemi vend dhe hapësirë për ta bërë ambasadën vendtakim ku mund të takohen burrështetasit, studiuesit, artistët dhe ndërmarrësit nga të gjitha komunitetet e Kosovës.

Dhe në fund, ambasada e re është manifestim fizik i përkushtimit të Amerikës për partneritet të qëndrueshëm me Republikën e Kosovës. Përderisa vazhdoni rrugëtimin për të mundësuar paqe, drejtësi dhe prosperitet për tërë popullin e këtij vendi, Shtetet e Bashkuara të Amerikës do të qëndrojnë përkrah jush në çdo hap.

AMBASSADOR KOSNETT’S REMARKS AT THE DEDICATION OF THE NEW U.S. EMBASSY, JULY 4, 2019

Ladies and gentlemen, Alison and I thank all of you for joining us to mark the long-awaited dedication of our New Embassy. We are all eager to hear from our guests, so I will be brief.

President Thaci, Speaker Veseli, Prime Minister Haradinaj, Mayor Ahmeti, honored guests…

The presence here of so many esteemed Kosovo officials is a reflection of our close partnership and the vibrancy of Kosovo’s democracy. And we would not be standing on this site without the support of our hosts at both the national and municipal level.

It is a special honor to welcome House Foreign Affairs Chairman Eliot Engel and Mrs. Patricia Engel. Nobody has done more to establish the close partnership between the United States and Kosovo, including through support of this Embassy.

And I’m delighted that Director Tad Davis of the State Department’s Bureau of Overseas Building Operations has made the trip to represent Secretary Pompeo, and to help us open the environmentally advanced, efficient, and beautiful Embassy that his Bureau has designed and constructed.

Now, when I say the State Department built this Embassy, that’s only part of the story. With us this evening are some of the private sector construction workers, engineers, managers and students – from both the U.S. and Kosovo – whose tireless efforts made the dream into reality. They deserve a round of applause as well.

We are still putting the finishing touches on the interior of the Embassy, so it will be early this autumn before we open for business. Then it will become a world-class workplace for American and local employees from the many U.S. agencies in Pristina – operating under one roof for the first time.

But an Embassy is more than just an office building, and it isn’t only the people working here who will benefit. Our expanded Consular Section will protect and serve American residents and travelers, and facilitate travel to the States for Kosovo business people, students, and visitors. And we will have the space and facilities to make the Embassy a gathering spot where statesmen, scholars, artists, and entrepreneurs from all of Kosovo’s communities can come together.And finally – this New Embassy is a physical manifestation of America’s commitment to an enduring partnership with the Republic of Kosovo. As you continue on your journey to bring peace, justice, and prosperity to all the people of this nation, the United States will be at your side every step of the way.

***

ELIOT ENGEL: KOSOVA ËSHTË PJESË E SHBA-ve

-Engel në përurimin e ambasadës së SHBA-ve: E dua Kosovën/

Në hapjen e Ambasadës së re të Shteteve të Bashkuara të Amerikës në Kosovë ka marrë pjesë edhe kongresmeni amerikan Eliot Engel, raporton “Zëri.info”.

“Sot e festojmë pavarësinë e ShBA-ve por edhe miqësinë me Kosovën”, tha Engel.

Engel u shpreh i mrekulluar për ambasadën e re teksa u shpreh para të pranishmëve se kjo ndërtesë është dëshmi se gjërat e mira duhet të ndodhin.

“Është mrekulli të jem sot këtu. Është e mrekullueshme të jem pjesë e miqësisë së kosovarëve. Njerëzit e Kosovës kanë punuar shumë. E dua Kosovën”, ka thënë Engel.

Tutje ai ka falënderuar SHBA-të që u dolën në ndihmë kosovarëve gjatë viteve të 90-ta.

”Sot është një ëndërr e cila është bërë realitet. Gjërat e mira mund të ndodhin. Faleminderit SHBA-ve që ishit me kosovarët me 1999-të. ShBA-të do të qëndrojë pranë Kosovës sepse Kosova është pjesë e SHBA-ve”, ka thënë tutje ai.

Ai po ashtu tha se Kosova duhet te njihet nga te gjitha kombet e botes dhe të bëhet pjesë e OKB-së.

“ShBA-te gjithmonë duhet te qëndrojnë me popullin e Kosovës. Amerika ka shpenzuar rreth 2 miliardë dollar në Kosovë”, tha mes tjerash Engel.

HAPPY JULY 4TH!-GEZUAR FESTEN E PAVARESISE AMERIKE!

July 4, 2019 by dgreca

HAPPY JULY 4 USA!/

GEZUAR FESTEN E PAVARESISE AMERIKE! (4 korrik 1776- 4 korrik 2019)/
Si një magnet gjigand Shtetet e Bashkuara të Amerikës kanë tërhequr vazhdimisht njerëz nga vende të mdryshme të botës.

Ky udhëtim i gjatë që vazhdon edhe në ditët tona, nisi katër shekuj më parë kur paraardhësit e këtij vendi të madh guxuan ta ndrrojnë Evropën e mbretërve me një botë të re, në gjëndje të egër, por të lirë.
Të ardhurit e parë mbijetuan. Pasardhësit e tyre e quajtën veten ‘amerikanë’ dhe e shndëruan vëndin nga koloni të perandorisë britanike në një superfuqi botërore.

NGA ALBANA M LIFSCHIN/*

-Ne festen e Pavaresise se SHBA kujtojme fillimin e ketij eksperimenti njerezor kolosal.
Ato ishin 13 koloni që me gjithë mozaikun e ngjyrave kishin një gjë të përbashkët: Dëshirën për të krijuar një jetë të re, të lirë dhe të pavarur nga Perandoria Britanike. Për të arritur atë ditë, ato kaluan një proces formimi të vështirë edhe interesant që filloi me krijimin e kolonisë së parë Xhejmstaun, (Jamestown) në 1607, që kolonistët i vunë emrin e mbretit te tyre dhe vazhdoi për më shumë se një shekull me krijimin e kolonisë së 13-të, Xhorxhas (Georgia), 1733, së cilës gjithashtu i dhanë emrin e mbretit Xhorxh të Anglisë. Duket sikur edhe pse pakënaqësia i dërgoi mijra mile larg vëndit “mëmë”, kolonistët nuk do të bënin dot pa të.
Koha provoi që ata jo vetëm që ishin të aftë për t’u vetqeverisur, por madje edhe për të ngritur sistemin më të përparuar të kohës.
Kolonitë e bashkuara krijuan Shtetet e Bashkuara të Amerikës duke vënë në themel parimin monumental “të gjithë njerezit janë krijuar të barabartë”, që theu të gjitha barrierat midis qënieve njerezore. Ky parim ishte sa i guximshëm aq edhe e pakonceptushëm për Evropën e asaj kohe.
Kolonistët e parë të ardhur nga Anglia ngritën banimet e tyre në brigjet verilindore të Amerikës, buzë Atlantikut, për arsyen e
thjeshtë se pas një udhëtimi të gjatë e të lodhshëm ai u ndodh
stacioni më i afërt. Kështu në bregun verilindor u formuan kolonitë e Massachustes,Rhode Island, New Hampshire dhe Connectikut.
Në pjesen juglindore u formuan Virginia, Maryland, North Karolina,South Karolina, dhe Georgia. Kolonitë e mesme ishin New York, New Jersey, Delaware, dhe Pennsylvania.
Kolonistët e parë erdhën nga një botë qytetare e kultivuar, për të filluar jetën në një tokë ku pemët harliseshin në atë lartësi ku syri të shikonte vetëm qiell e zogj.
Mjaft prej tyre i shtyu shpirti i aventures, mendimi se në “Botën e re “ do të gjenin flori. Por vetëm një dekadë më pas njerezit filluan ta linin Anglinë jo për floririn por për Lirinë. Sidoqoftë jo të gjitha kompanitë tregëtare që morën përsipër
udhëtimin e tyre u treguan se po i shpinin drejt
një bote krejt të virgjër në primitivitetin e vet.
Qytetari Jonas Michaelius pasi arriti në Nju Jork në 1628, në letrën që i shkruante familjes në Evropë i thosh: “Premtimi që më dhanë zotërinjtë e kompanisë se këtu do gjeja shtëpi, s’doli i vërtetë. Këtu nuk gjen as shtëpi, as kuaj, as lopë, as punëtorë që t’i blesh me para.
Vëndi ofron gjëra të mira por këto janë në gjëndje të egër..”
Qytetarët që lanë shtëpitë e tyre në Londër, në “Botën e re” e filluan jetën nga pastrimi tokës, nga prerja e drurëve e shkurreve nën kërcënimin e shigjetave të fiseve indiane që shfaqeshin papritur për t’u marrë jetën.
Gjenerata e parë e kolonistëve mbijetoi. Gjeneratat e reja e quajtën veten e tyre me një emër të ri: Amerikanë
Procesi i kalimit nga “Amerikani britanik” në
qytetarin “Amerikan” erdhi gradualisht e në
mënyrë të natyrshme. Kishte kaluar një shekull
e gjysëm nga koha që kolonistët e parë kishin
zbritur në kontinent e ndërkohë historia amerikane
kishte hyrë në zhvillimin e vet. Ndryshimet që
egzistonin midis amerikanit dhe evropjanëve, me kalimin e kohës po bëheshin sa vjen e më të mëdha. Ndjenja e të qënit “amerikan” u bë një ndjenjë natyrale. Gjeneratat e reja e quajtën veten “amerikanë”.
Në vitin 1750, kur fermerja e njohur Eliza Pinkni* nga Karolina Jugut u paraqit në oborrin e Mbretit Xhorxh të Anglisë, ajo insistoi që ta prezantonin si “amerikane.”
Në Karolinën e Jugut në një diskutim lidhur me shpënien e fëmijëve për studime në Angli, u mbrojt mendimi se “vështirë të besohet se arsimi anglez u përshtatet më fëmijëve të Amerikës.” Ezra Stajlls hartoi planin e ngritjes se një Akademie “Amerikane” të Shkencave, ku mendohej që të drejtën e anëtarësisë në të, duhej ta gëzonin vetëm
të lindurit “amerikanë.”
Po këtë vit, në një gazetë të Bostonit reklamohej dalja e një birre amerikane. Njerëzit nxiteshin të çliroheshin nga ndjenja inferiore e admirimit të produkteve të ardhura nga Evropa. Benxhamin Frenklini në almanakun e tij, në vitin 1750, përdorte termin”patriotët amerikanë”. Kur kongresi u mblodh në Filadelfia, për here të parë,
Petrik Henri tha: “ Nuk ka më dallim midis virxhinasve,
njujorksve,pensilvenasve.. Unë nuk jam virxhinias, por jam
amerikan”
Pra, ndërsa perandoria britanike e shikonte Amerikën ende si një pjesë të saj, amerikanët po shkruanin historinë e tyre sipas së cilës ata nuk ishin më anglezë që kishin ndërruar vënd, por amerikanë qe e shndëruan vëndin nga ish koloni ne nje superfuqi boterore
—
Dy fjalë nga parathenia e autores.
Kur u ula të shkruaj librin “Udhëtim në Historinë Amerikane,
fillimisht qëllimi im ishte që t’u vija në ndihmë emigrantëve që kishin ardhur dhjetëvjeçarin e fundit në Amerikë dhe që
po përpiqeshin të integrohen në shoqërinë amerikane.
Në kursin e jetës së përditshme njohja me historinë e
Amerikës, ashtu sikurse me gjuhën angleze, për shqiptaro-amerikanët është një domosdoshmëri. Ndërkohë që punoja me librin ky mendim u zhvillua më tej. Në ditët tona kur SHBA është vënë në shënjestër të grupeve terroristeve ngado në botë, del e nevojshme që njerëzit, në përgjithësi, të njohin historinë e këtij vendi që lindi e u zhvillua mbi parimet e demokracisë së vërtetë.
Për mua ishte e rëndësishme që ta jepja historinë e Shteteve të Bashkuara të Amerikës në një formë të thjeshtë e interesante, të kuptueshme për të gjitha moshat. Nga ana tjetër u përpoqa që libri të kishte më shumë një karakter informativ e argëtues, se sa akademik. Madje këtë përshtypje doja ta jepja që në titull.
Për të arritur këtë qëllim më ka ndihmuar studimi dhe
përdorimi i rreth 60 librave të karakterit historik, shoqëror, biografik e letrar.
Në ndërmarrjen e kësaj pune të madhe e të guximshme, më ka inkurajuar fjala e kolegëve e veçanërisht përkrahja që më kanë dhënë Profesorët e njohur e të respektuar Nikolla Pano, Petër Prifti, Sami Repishti e Aleks Luarasi të cilëve u jam shumë mirënjohëse për vlerësimin që i kanë bëre punës sime.
Kenaqesine me te madhe e kam marre nga lexuesit e interesuar qe pergatiteshin per te ardhur ne kete vend dhe natyrisht te porsa ardhurit.

*Albana Melyshi Lifschin
(Marre nga libri “Udhetim ne historine e Amerikes”,
botuar ne 2003, ribotuar ne 2006,dhe ne 2010 nen kujdesin e Ministrise se Kultures Rinise dhe Sporteve te Kosoves)

PËR HERË TË PARË: EKSPOZOHET DEKLARATA KUSHTETUSE E 2 KORRIKUT 1990

July 3, 2019 by dgreca

SPECIALE NGA KOSOVA-Ekspozohet për herë të parë Deklarata Kushtetuese e 2 Korrikut 1990 /

-Deklarata Kushtetuese për Kosovën e pavarur, ekzemplari origjinal që u lexua në mbledhjen e Kuvendit të Kosovës në 2 Korrik të vitit 1990, në 30 Maj 2019 është dërguar në Arkivin Shtetëror nga gazetari Behlul JASHARI – korrespondenti nga Prishtina, i cili dokumentin historik viteve më parë e ka dërguar si foto për botim në Gazetën DIELLI/

PRISHTINË, 3 Korrik 2019-Gazeta DIELLI/ Ekspozohet për të parën herë Deklarata Kushtetuese e 2 Korrikut 1990 për pavarësinë e Kosovës, në një ekspozitë të hapur në Prishtinë të Arkivit Shtetëror të Kosovës.

Deklarata Kushtetuese për Kosovën e pavarur, e shkruar me makinë shkrimi, ekzemplari origjinal që u lexua në mbledhjen e Kuvendit të Kosovës në 2 Korrik të vitit 1990, në 29 vjetorin e saj, është dërguar në Arkivin Shtetëror nga gazetari Behlul Jashari, i cili për herë të parë e ka dërguar si foto për botim në Agjencinë Shtetërore Zyrtare të Lajmeve të Shqipërisë si korrespondent nga Kosova nga 24 Maji 1992 i zgjedhjeve të para pluraliste në rrethana të rënda okupimi, si dhe në Gazetën DIELLI – organ i Federatës Pan-Shqiptare të Amerikës VATRA, korrespondent i akredituar i së cilës është tani ka më shumë se katër vite.

Në Agjencinë Shtetërore të Arkivave të Kosovës dokumenti origjinal është dorëzuar me këtë shënim bashkangjitur në një letër shoqëruese të veçantë:

“Kjo është Deklarata Kushtetuese e Kuvendit të Kosovës e 2 Korrikut 1990, ekzemplari origjinal që sapo u lexua e mora dhe e ruajë prej atëherë, kur edhe e kam cituar në redaksionalin që shkruajta për gazetën Rilindja me titull ‘Fillim i së nesërmes’ botuar në faqen e parë në numrin e 3 Korrikut 1990. Prishtinë, 30 Maj 2019 Behlul Jashari”.

Në redaksional theksohej se, “Deklarata Kushtetuese e delegatëve të Kuvendit të Kosovës është deklarim i popullit për barazi e subjektivitet të plotë të Kosovës e të shqiptarëve… është fitore e akt historik i shprehjes së vullnetit gjithëpopullor demokratik, është fillimi i fundit të pabarazisë e padrejtësive…Kosova e re, ajo me rregullim kushtetues sipas Deklaratës të sapo aprovuar do të jetë një djep kombëtar dhe i bashkëjetesës për të gjithë, i të drejtave të plota…”

Dokumenti historik i 2 Korrikut 1990 i Kosovës drejt pavarësisë është pjesë e ekspozitës “Figurat kombëtare dhe familjet e njohura shqiptare në veprat e artistëve evropianë”, të autorit Eqrem Zenelaj, e hapur mbrëmjen e djeshme në një ceremoni ku mori pjesë edhe drejtori i Arkivave të Shqipërisë, Ardit Bido.

Për rëndësinë Deklaratës Kushtetuese të 2 Korrikut 1990 dhe ecjet e Kosovës drejt lirisë e pavarësisë, në hapje të ekspozitës, foli kryeshefi ekzekutiv i Agjencisë së Arkivave të Kosovës, Ramë Manaj, ndërsa një fjalë rasti mbajti drejtori për Veprimtari Arkivore, Ruzhdi Panxha, duke theksuar arritjet.

Pranë Deklaratës Kushtetuese janë ekspozuar edhe faqe të gazetës tradicionale të Kosovës Rilindja me shkrimet për ngjarjen historike të 2 Korrikut 1990, e cila u pasua me Kushtetutën që shpalli Kosovën Republikë në 7 Shtator 1990 dhe me Referendumin për Pavarësi të shtatorit 1991, në të cilin pro votuan 99,87% në pjesëmarrjen masive të 87,01% të qytetarëve me të drejtë vote.

“Me këtë Deklaratë shprehet dhe shpallet qëndrimi burimor kushtetues i popullsisë së Kosovës dhe i këtij Kuvendi si akt i vetëvendosjes politike…”, theksohej në vendimin historik, që merrej në mbedhjen para dyerve të mbyllura e snajperëve në rrethana të shtetrrethimit ushtarako-policor që kishte vendosur regjimi i Beogradit, pasi me “kushtetutën e tankeve” në marsin 1989 kishte suprimuar autonominë që kishte Kosova element konstituiv i federatës me të drejtë vetoje me Kushtetutën e vitit 1974.

Dërgimin e shumëmirëpritur të origjinalit të Deklaratës Kushtetuese në Pallatin e dokumenteve historike korrespondenti i Gazetës DIELLI, Behlul Jashari, e kisha paralajmëruar në takime e komunikime me Kryeshefin Ekzekutiv të Agjencisë Shtetërore të Arkivave të Kosovës, Ramë Manaj dhe Drejtorët Hamit Shala e Ruzhdi Panxha, si dhe me Kryeinspektoren Dijana Dushullovci Haziri, e cila e mori në dorëzim.

Ekspozita që do qëndrojë e hapur gjatë javës në Muzeun Kombëtar të Kosovës në Prishtinë ka sjellë para publikut 139 portrete – gravura e dokumente të figurave kombëtare shqiptare me përmasa ndërkombëtare.

“Në këtë ekspozitë sjell 139 portrete-gravura e dokumente të figurave kombëtare shqiptare me përmasa ndërkombëtare – nga Skënderbeu, Gjergj Dhimitër Basta, Papë Shqiptar Albani, Dinastia Shqiptare në Moldavi e Rumuni, Gjika deri tek gjeniu i hekurudhave, Karl Gasper Gega, e Mehmet Aliu i Egjipt. Pjesë e kësaj ekspozite janë edhe portretet e Ali Pashë Tepelenës, Ismail Qenalit dhe pjesëtarëve të familjes, etj”, theksoi autori, profesori Eqrem Zenelaj – hulumtuesi i 22 arkivave të Evropës.

U bë e ditur se, ekspozita e shënimit të 2 Korrkut u organizua edhe me rastin e pensionimit të Kryeshefit Ekzekutiv të Agjencisë së Arkivave të Kosovës, Ramë Manaj.

Në biografi shkruan mes tjerash se Ramë Manaj “në vitet 1977 – 1979 ka punuar në Gazetën e përditshme ‘Rilindja’ – korrespodent i rregullt nga Komuna e Klinës”, se “prej vitit 1990 politikisht ishte i angazhuar dhe vazhdimisht aktiv në forume të larta të Lidhjës Demokratike të Kosovës-anëtar i Kryesisë dhe Sekretar i Përgjithshëm i saj” dhe se “në legjislaturën e tretë ka qenë deputet në Kuvendin e Republikës së Kosovës dhe Zëvendës Kryeministër në Qeverinë e Republikës së Kosovës”. Poashtu theksohet se, “ka punime dhe botime profesionale në editorial të ndryshëm në vend dhe jasht Kosove”.

*Per me shume fotografi shihni ne Facebook Gazeta Dielli

Kongresisti Eliot Engel po qëndron në Serbi

July 3, 2019 by dgreca

Kongresisti Eliot Engel gjatë takimit me nënkryetarin e Kuvendit të Serbisë Vladimir Marinkoviq/

Kongresisti amerikan, Eliot Engel po qëndron për vizitë në Serbi. Ai u takua të mërkurën me nënkryetarin e Kuvendit të Serbisë, Vladimir Marinkoviq dhe një grup deputetësh serbë.

Engel pritet të takojë edhe presidentin e Serbisë, Aleksandar Vuçiq.

Eliot Engel është kryetar i Komisionit për Marrëdhënie me Jashtë të Dhomës së Përfaqësuesve, dhe ka qenë i përfshirë në zhvillimet në Ballkan që nga fillimi i viteve të 90-ta.

Presidenti i Serbisë ishte takuar më parë me Engel, gjatë Konferencës së 55-të Sigurisë në Mynih, në muajin shkurt. Me atë rast, fokusi i bisedës ishte rasti ende i pazgjidhur i vrasjes së vëllezërve Bytyqi.

Agron, Yll dhe Mehmet Bytyçi kanë luftuar në radhët e Ushtrisë Çlirimtare të Kosovës.

Ata janë vrarë në vitin 1999, pasi paraprakisht janë arrestuar nga autoritetet serbe për shkak të, siç është thënë, hyrjes së paligjshme në Serbi.

4 KORRIKU-SHQIPTARET DHE FESTA E AMERIKES

July 2, 2019 by dgreca

Shoqata Shqiptaro Amerikane “Skënderbej” Inc. nderoi me madhështi Pavarësinë e Amerikës, Atdheun tonë të dytë/

Woodrow Wilson- Fan S.NOLIT:Unë do të kem vetëm një zë në Konferencën e Paqes në Paris, dhe këtë zë do ta përdor për të drejtat e Shqipërisë”. -4 Korrik 1918/

Nga Keze Kozeta Zylo/ DIELLI/*

Me këtë thënie proverbiale të Presidentit Willson të konkretizuar me vepër nuk ka shqiptar që nuk frymëzohet dhe nderon aktin gati hyjnor të këtij presidenti amerikan për Kombin tonë. Si qytetar shqiptaro amerikan nderojmë dhe përkujtojmë çdo vit, me katër korrik Pavarësinë e Amerikës. Është dashuria dhe respekti i madh që kryesia e Shoqatës Shqiptaro Amerikane “Skënderbej” Inc. e krijuar që më dhjetor, 2017 të me kryetar z.Bashikm Shehu ish zv/minister i mbrojtjes dhe z.Mark Qehaja ish ushtarak në forcat e Natos organizuan aktivitetin në mjediset e restorant “Riccardo” në Astoria, Queens.

Që në hyrje të restorantit të mirëprisnin dy zonja aktiviste të bukura dhe plot elegancë znj.Arta Xhaferri anëtare e kryesisë dhe znj.Jeta Haxhiaj. Salla ishte e mbushur plot e përplot dhe ndrinte nga dekorimet e posaçme për këtë festë nga me të rëndësishmet për popullin amerikan, festë që ka 243 vjet që përkujtohet në çdo shtëpi amerikane.

Ishin mjaft familje ushtarake, anëtare të shoqatës dhe simpatizantë të saj që kishin ardhur për të festuar dhe gëzuar së bashku si motra e vëllezër ngase na lidh gjaku shqiptar. Në këtë festë nderoi me pjesëmarrjen e tij ligjvënësi amerikan nje politikan i karierës në Westchester County z.David Tubiolo.

Programi në nderim të 243 vjetorit të Pavarësisë së Amerikës

Aktiviteti u hap me hymnet Kombëtare të Shteteve të Bashkuara të Amerikës dhe të Shqipërisë, ku të gjithë pjesëmarrësit u çuan në këmbë për t’i shoqëruar të dy hymnet.

Z.Bashkim Shehu Kryetar i Shoqatës Shqiptaro Amerikane “Skënderbej” mbajti fjalën e hapjes së aktivitetit. Z.Shehu përshëndeti të gjithë pjesëmarrësit dhe iu uroi atyre ta gëzojmë festën e Pavarësisë së Amerikës. Ne jemi krenar si shoqatë “Skënderbej” që së bashku të festojmë dhe të nderojmë 243 vjetorin e Pavarësisë së Amerikës, vendit më demokratik në botë, vendit që hapi krahët dhe i ndenji në momentet më të vështira Kombit tonë. Ai falënderoi gjithë kryesinë për këtë organizim të shkëlqyer, organizime që tashmë janë bërë traditë e bukur për gjithë shoqatën tonë.

Amerika, Atdheu i dytë i shqiptarëve dhe Pavarësia e saj

Autorja e këtyre radhëve mbajti fjalën kryesore dhe midis të tjerash tha: “shtë nder dhe kënaqësi për mua që kryesia e shoqatës me kryetar z.Bashkim Shehu më caktuan për të mbajtur fjalën kryesore rreth Pavarësisë së Amerikës. Si një qytetare amerikane me të drejta të plota nga Kushtetuta amerikane së bashku me ju kemi se me seç të krenohemi dhe të flasim për Amerikën e cila për të gjithë bashkëkombasit e mi këtu në Amerikë është bërë Atdheu i dytë. Ju e dini mirë se ç’do të thote t’i thuash një kombi Atdheu i dytë, është njësoj në se shumëkush prej nesh e ka provuar për të quajtur dikë si prind të dytë që do të thotë për respektin, ngrohtësinë dhe ndihmën që të ka dhënë prindi i dytë në rast nevoje dhe dashurie. Këtë unë, ju dhe gjithë bashkatdhetarët e mi duke filluar që nga i pari që ka shkelur tokën e bekuar amerikane të dokumentuar që është Kolë Kristofori i cili zbarkoi në Boston në fillim të viteve 1880-të dhe mbahet mend si pioner i grupit etnik shqiptar në SHBA e kanë ndjerë në palcë të shpirtit ndihmën e madhe që ka dhënë Amerika në pikat më nevralgjike që ka kaluar Kombi ynë.

Kombi amerikan u themelua nga trembëdhjetë kolonitë e Britanisë së Madhe, ndodhur përgjatë bregdetit Atlantik. Më 4 korrik 1776, ato nënshkruan Deklaratën e Pavarësisë, që shpalli Pavarësinë e tyre nga Britania e Madhe dhe formimin e një bashkimi te gjitha kolonive.

Shtetet kryengritëse mposhtën Britaninë e Madhe në Luftën Revolucionare Amerikane, luftën e parë të suksesshme të kolonive për Pavarësi. Kuvendi i Filadelfias përpiloi Kushtetutën e tashme të Shteteve të Bashkuara, më 17 shtator 1787; miratimi i saj në vitet vijuese i bëri shtetet pjesë të një republike të vetme me qeveri të fuqishme qendrore. Karta e të Drejtave, e përbërë nga 10 amendamentet e para kushtetuese si garanci e të drejtave dhe lirive themelore qytetare, u ratifikua më 1791.

Amerika ështe nje komb që e identifikojmë me Flamurin me të gjitha të drejtat tona.

Arsyet pse qëndron flamuri amerikan aq lart eshte sepse eshtë krijuar nga përvojat e një populli të madh. Gjithçka për të cilën qëndron Flamuri është shkruar nga jeta e tyre. Flamuri është mishërimi, jo sentimenti, Flamuri është historia, do te thoshte Presidenti amerikan Woodrow Wilson, miku i madh i shqiptarëve.

Më 1945, Shtetet e Bashkuara dolën nga Lufta e Dytë Botërore si vendi i parë me armë bërthamore, anëtar i përhershëm i Këshillit të Sigurimit të Kombeve të Bashkuara, si dhe themeluese e NATO-s. Fundi i Luftës së Ftohtë dhe shpërbërja e Bashkimit Sovjetik e la

SHBA-në si superfuqinë e vetme. Afro 50% të shpenzimeve ushtarake të rruzullit bëhen nga Shtetet e Bashkuara, që vazhdojnë të jenë forcë drejtuese ekonomike, politike dhe kulturore në botë.

Shtetet e Bashkuara janë federata më e vjetër e botës. Janë Republikë Kushtetuese, ku “sundimi i shumicës zbutet nga të drejtat e pakicës, mbrojtur prej ligjit.”

Presidenti i pare i Amerikes është Xhorxh Washington dhe nderohet me një ditë pushimi nga Amerikanët për ditëlindjen e Tij. Amerika luftoi për Lirinë e fjalës, liri që e ka me nenin e kushetutës dhe dënohet me ligj kushdo që ndalon fjalën e lirë, sepse Liria e fjalës është siç thotë Washingtoni si: “Nëse liria e fjalës rrembehet dhe hidhet ne plehra, atëherë heshtja mund të udhëheq, dhe te çon si qengji drejt therrjes tek kasapi.

Të nderuar pjesëmarrës,

Sot ne festojmë 4 korrikun, ditën e Pavarësisë së Amerikes sonë Atdheut të dytë. Me te drejte ju si kryesi vendoset të bënit këtë aktivitet kulturor dhe që duket është tejet i veçantë për nga lloji dhe rëndësia që ka. Të nderuar ushtarake dhe bashkëkombas: Ju dini të vlerësoni dhe të çmoni vlerat sepse kush më shumë se ju e ndjen në shpirt gjakun e popullit të vet që është populli më proamerikan në botë, sepse ne gjithmonë i shprehim mirënjohjen e pakufishme për çfare i ka dhuruar Kombit tonë filluar me Willson ku mbështeti me plot dashuri kërkesat e Vatrës se drejtuar nga Fan Noli kryetar dhe themelues i saj. Kur Atdheu thërriste bijtë e vet emigrantët shisnin deri xhaketën e trupit dhe dërgonin dollarët për të mbajtur në këmbë shtetin shqiptar ku është perjetësuar me vargjet lapidar te Nolit si: “Mbahu nëno, mos ki frikë/Se ke djemtë në Amerikë!”

Ne kurrë s’duhet ta harrojmë historinë, por duhet ta mbajmë të gjallë ne kujtesën tonë dhe të brezave atë çfarë bëri Willson në Konferencën e Paqes në Paris 1919, i cili dënoi ashpër planet gjëmëzeza të fuqive të mëdha dhe mbojti me forcë popujt e vegjël.

Më 4 korrik 1918, Presidenti Uilson tek e takoi Imzot Nolin gjate vendosjes se kurorave me lule tek varri i presidentit George Washington, kerkeses se atit shpirteror te shqiptareve, themeluesit te Kishes autoqefale dhe bashkthemeluesit te Vatres, per te shpetuar Shqiperine qe rrezikohej te zhbehej, i tha se: “Zeri dhe vota ime do te jene ne mbrojtje te Kombeve te vegjel, si Shqiperia”. Pas takimit Noli i shkroi kryetarit te Vatres, Kole Tromares: E takova tre here here persidentit Wilson, te tria heret me tha: Nje vote timen dhe zerin tim do t’i perdor per t’i mbrojte shqiptaret”…

Kjo formulë shpëtimtare karakterizoi qëndrimin e tij ndaj çështjes shqiptare.Diaspora shqiptaro amerikane e udhëhequr nga Vatra organizata më e vjeter shqiptare ka nje rol kyç në Pavarësinë e Shqipërisë nga Konica, Noli dhe burra të tjerë të shquar dhe kjo falë lidhjeve që kishin me presidentin Willson i cili mbështeste parimin e vetëvendosjes.

Emocionuese dhe shume domethënëse është dhe letra e nëntëstudentëve të Vjenës drejtuar presidentit Willson, më 15 dhjetor të vitit 1918, pra 101 vjet më parë. Letrat janë 4 faqe në shqip dhe në anglisht, studentët i luteshin Wilsonit që përpara mbajtjes së Konferencës së Paqes në Paris të ndihmonin Shqipërinë e cila e kishte humbur Pavarësinë.

Studentët që nenshkruan letrën dhe qe t’i kushtonte vetëm 15 minuta nga koha e çmuar, ishin: Remzi Baçe, Jani Basho, H. Hifzi, Nush Bushati, Xhevat Korça, Luigj Kakarriqi, Gjovalin Gjadri, Raku Buda dhe Fuad Asllani.

Një nga paragrafet më të fuqishme të letrës së studentëve dërguar Wilsonit ishte kur ata i drejtoheshin Presidentit te Amerikes me fjalët: “Zotëri! Ju lutemi në emër të djelmërisë shqiptare e të kombit shqiptar, ta merrni këtë komb fatkeq nën mbrojtjen Tuaj”.

Amerika gjithmonë ka qenë në krah të shqiptarëve, përkrahje që kulmoi nëpërmjet Zërit të Amerikës që frymëzoi shqiptarët dhe rrëzoi, përmbysi diktatorin dhe diktaturën që izoloi për dekada një popull të tërë.

Kurrë populli shqiptar nuk mund ta harroje Pavarësisë e Kosovës, më 17 shkurt 2008, me perkrahjen e jashtëzakonshme të Amerikës. Këtë e dimë shumë mirë ne që i përjetuam demonstratat, ecejaket në Kongresin Amerikan, lidhjet me senatorët, sensibiizimin në kolegje ku kishte studentë shqiptarë, krijimin e Batatlionit ‘Atlantiku” që sot është “Nderi i Kombit”, apo fondacionin “Vendlindja thërret” që themeluesin z.Shefki Mexhuani ish drejtor ekzekutiv i Fondit “Vendlindja thërret” për Amerikën dhe Kanadan, njëkohësisht dhe njeri ndër themeluesit dhe organizatorët kryesor të Batalionit “Atlantiku” e kemi pasur pjesëmarrës në aktivitete.

Amerika me politikën e saj parimore po ndihmon shumë në proceset demokratike si duke e anëtarësuar shqiperinë në Nato, më 1 prill 2009 si dhe në të gjitha organizmat Euroatlantike çka e radhisin Shqipërinë e vogël midis vendeve më demokratike dhe më properëndimore.

Amerika për të gjithë shqiptarët është kthyer Atdheu i dytë i tyre, ngase e ka ndjerë në palcë të shpirtit ndihmën dhe përkrahjen e jashtëzakonshme në botë, në kancelaritë perëndimore, e ka ndjerë mikpritjen e saj si dhe progresin që kanë bërë dy shtetet shqiptare në Europë si Shqipëria dhe Kosova.

Shqiptarët sot janë më të ndjerë se kurrë në botë, emri i tyre po lakohet për mirë, emra shqiptarëh të famshëm në art, kulturë, shkencë, politikë po trondisin mediat botërore, çka tregon për një ardhmëri më të mirë dhe për një mbështetje të jashtëzakonshme nga Shtëpia e Bardhë, Kongresi Amerikan dhe populli amerikan. Prandaj me krenarinë e ligjshme si shqiptaro amerikanë e festojmë me madhështi dhe mirënjohje Pavarësinë e Amerikës, Atdheun e dytë të shqiptarëve, status që e ka fituar me punë dhe me veprat e saja konkrete!

Ligjvënësi amerikan z.David Tubiolo nderoi me mirënjohje shoqatën “Skënderbej”, z.Mark Gjonaj, TV dhe Shkollën Shqipe “Alba Life si dhe shoqatën “Devolli”

Në këtë aktivitet festiv nderoi me pjesëmarrjen e tij Ligjvënësi i Westchester County Z.David Tubiolo, me një karierë të shkëlqyer në politikën amerikane.

Zgjedhja e David Tubiolo në Këshillin e Legjislatorëve të Qarkut të Westchesterit, gushtin e kaluar, e pozicionoi atë si personin më të ri në historinë e trupit qeverisës prej 17 anëtarësh.

David_Tubiolo është Ligjvënës dhe është pasardhës i gjeneratës së katërt Yonkers i cili po punon për ta bërë komunitetin Westchester një vend më të mirë çdo ditë. Ai u zgjodh për herë të parë në 2016-të gjatë një zgjedhje të jashtëzakonshme për të zëvendësuar ligjvënësin legjendar të qarkut Bernice Spreckman, ku mori 65% të votave.

Shtëpia dhe zemra e Davidit është në Westchester. Ai ka qene president i Këshillit të Arteve Artistike (UPAC), aktualisht është nënkryetar i Klubit Yonkers të Shkëmbimit, nënkryetar i Këshillit të Komunitetit dhe anëtar i Bordit të Shoqatës Hyatt, Sons of Italy Calandra Lodge dhe keshilltar në Kishën Shën Barnabas.

Ligjvenesi amerikan z.David Tubiolo u mirëprit me duartrokitje dhe brohorrima nga pjesëmarrësit si USA, USA, çka përkonte me 243 vjetorin e Pavarësisë së saj. Ndërkohë grupi i valleve të veshur me kostumet kombëtare interpretuan valle të ndryshme nga krahinat e Shqipërisë, valle që u mirëprit me shumë emocion nga Amerikanët dhe të pranishmit.

Z.David Tubiolo përshëndeti dhe falënderoi të gjithë pjesëmarrësit që kishin ardhur dhe festonin së bashku duke nderuar Pavarësinë e Amerikës. Ai vlerësoi shumë lart komunitetin Shqiptaro Amerikan, lidhjet e forta dhe të ngushta që mbajnë me Kongresin Amerikan dhe popullin. Diaspora shqiptaro amerikane ka një kontribut të dukshëm në shumë fusha dhe punon me shpirt duke zbatuar ligjet dhe demokracinë amerikane. Une ju falënderoj që më keni ftuar sot këtu dhe të behem pjesë e këtij aktiviteti të rëndësishëm të Shoqatës Shqiptaro Amerikane “Skënderbej”. Sot dua të nderoj Shoqatën tuaj për një punë të devotshme që po bëni duke organizuar aktivitete shumë të rëndësishme dhe duke i shërbyer komunitetit dhe Amerikës. Z.Tubiolo vlerësoi gjithashtu me pllakë mirënjohjeje z.Mark Gjonaj, këshilltar në Bashkinë e Nju Jorkut dhe ish Ansambleist i shtetit të Nju Jorkut. Shkollën Shqipe dhe TV “Alba Life” pllakë që u mor nga mësuesit e Shkollës Shqipe si dhe shoqatën e mirënjohur “Devolli” që u mor nga z.Odise Salillari kryetar i shoqatës “Devolli” dhe z.Robert Metolli n/kryetar i shoqatës.

Skena u pushtua përsëri nga nxënësit e Shkollës Shqipe “Alba Life” Ambasador i Kombit. I pari që e hapi programin ishte nxënësi i talentuar Arelt Xhaferri i cili interpretoi poezinë:

“Në Pavarësinë e Amerikës”

Gloria Puli me një shqipe të ëmbël interpretoi poezinë “Atdheu” nga Asdreni. Kelvin Rustani këndoi me plot përkushtim: “Ty Flamur të duam shumë” dhe Çamëria. Enzo Rustani: “Kuq e Zi”. Grupi i Devollit doli në skenë me “Vallja e Devollit” që u interpretua nga nxënësit e Shkollës Shqipe “Alba Life” si Oresti Salillari, Daniel Hoxha, Ermal Hoxha, Rafael Gjona, Andri Gjona dhe Arelt Xhaferri përgatitur nën kujdesin e mësusese Adelina Laçaj dhe asistentes Adelina Halimi Shehu.

Një Interpretim brilanterdhi nga z.Lek Çelaj qe interpretoi “I Dëbuemi” shkruar nga poeti Kombëtar Gjergj Fishta, çka është një temë që nuk i ikën koha ngase hemoragjia e ikjes vazhdon deri në këto momente, si: “Lamtumirë!-vendet e mija/ Që po zhduken dalë-kadalë/ Gjimon deti,ushton duhija/ Lkundet barka valë mbi valë.

Një përshëndetje e veçantë dhe tejet vëllazërore erdhi nga Shqipëria nga z.Gjovalin Progni i cili falënderoi kryesine dhe të gjithë anëtarët për këtë organizim dhe në shenjë respekti e mirënjohjeje i dhuroi z.Bashkim Shehu dhe z.Mark Qehaja portretin e Skënderbeut dhe Flamurin Kombëtar.

Në këtë aktivitet përshëndetën gjithashtu z.Lambro Guma si më i moshuari 85 vjeç, Gjok Gojcaj, Gjok Lini, Arjan Haxhi i cili interpretoi poezinë për kurbetin “Venë me këmbë e vijnë pa kokë” të shkruar nga ati i tij poeti i mirënjohur Petrit Metushi.

Një surprizë e bukur erdhi për z.Imer Laçaj anëtar i kryesisë dhe financier i shoqatës i cili kishte ditëlindjen, festë jubilare surprizë që u mirëprit me plot emocion nga të gjithë të pranishmit të cilët i uruan jetë të gjatë dhe vetëm suksese në këtë detyrë shoqërore që ka marrë përsipër, detyrë që e kryen me plot përkushtim.

Kryesia dhe të gjithë anëtarët i dhanë një falënderim krejtësisht të veçantë z.Mark Qehaja n/kryear i shoqatës për punën me plot pasion, sacrificë dhe durim që po kryen për shoqatën.

Pjesëmarrësit u argëtuan nën tingujt e DJ-it drejtuar mjeshtërisht nga z.Odise Salillari, argëtim komod dhe vëllazëror si në Atdheun e dytë të tyre në Amerikë.

Aktiviteti u filmua nga TV “Alba Life” me producent z.Qemal Zylo dhe bashkëpunëtor z.Klaudio Mucollari.

Per me shume fotografi shihni ne Facebook Dielli vatra.Autorja është shkrimtare, publiciste, mësuese dhe themeluese e Shkollave Shqipe në New York