Anëtari i Kongresit amerikan Eliot Engel paraqiti në Dhomën e Përfaqësuesve një deklaratë për të nderuar Azem Hajdarin, udhëheqësin e lëvizjes për demokraci në Shqipëri në 15 vjetorin e vrasjes. Përmes fjalëve dhe veprave, thuhet në deklaratë, Azem Hajdari tregoi se liria nuk dhurohet, por fitohet me përpjekje, vendosmëri dhe besim.
Azem Hajdari, i cili u vu në krye të lëvizjes studentore që përshpejtoi rënien e komunizmit në Shqipëri, u vra më 12 shtator 1998. Ai kishte mundur t’i mbijetonte një atentati të mëparshëm në vitin 1997 brenda parlamentit shqiptar, ku mori plagë të rënda.
Gjatë konfliktit në Kosovës, thuhet në deklaratën e Kongresmenit Engel, Azemi mbështeti gjithashtu lëvizjen e Kosovës për liri e pavarësi, duke i kushtuar asaj kohë dhe energji.
Në deklaratën e tij, Eliot Engel, anëtar i Dhomës së Përfaquesve dhe numri i dy i komisionit për marrëdhëniet me jashtë të kësaj Dhome, thotë se Azem Hajdari ishte një mbrojtës i fuqishëm i vlerave demokratike dhe hero për shumë shqiptarë. Zoti Engel u kërkon kolegëve të tij, anëtarë të Dhomës së Përfaqësuesve, të përkujtojnë Azem Hajdarin për kontributin historik në ndërtimin e demokracisë në Shqipëri.
Më 12 shtator, shqiptarë nga i gjithë vendi, nga Kosova dhe vende të tjera do të mblidhen për ceremoninë e rivarrimit të Azem Hajdarit, i cili do të prehet në varrezat e dëshmorëve në Tiranë.
Berisha: Rama na shpalli luftë në Kuvend
Nuk kishin kaluar vetëm pak minuta pasi Rama kishte nisur fjalën e tij, ish-kryeministri Sali Berisha është ngritur nga karrigia e deputetit, ndjekur edhe nga deputetët e tjerë të opozitës kanë bojkotuar Kryeministrin e ri. Në një prononcim për mediat Berisha theksoi se nuk mund të qëndronte në Kuvend pasi mazhoranca i shpalli luftë opozitës.
“Në dëgjojë një retorikë të ulët. Me sharje dhe fyerje ndaj pozitës mendon se do të mundë të kapërcejë premtime alla Papandreu me të cilat mashtroi dhe mori votën e shqiptarëve. Vetëm me mashtrime publike për shërbim shëndetësor falas, për dëmshpërblim brenda dy viteve të të përndjekurve, për legalizime falas, për ulje të taksave për 95% të shqiptarëve. Në këto rrethana. Nuk kishte hapësirë për të ndjekur ligjeratën paranojave, banale të një piktori dështak që sot flet në emër të qeverisë. I rikujtoj zotërisë se sot janë dy data. 11 shtatori që nderon gjithë njerëzimi viktimat e Nju Jorkut, por dhe 11 shtatori i Pinocetit. Moralisht shprehu nderim për të parim, por në shpirt kishte të dytin. Ne erdhëm këtu, por Rama na shpalli luftë. Ajo që mazhoranca bëri ishte e paparë, nuk ndodh dhe në Korenë e Veriut që diskutimi të behet pa e marrë materialin dhe pa i dhënë qoftë një ditë të vetme. Nëse vijohet ne këtë mënyrë dëshmohet se etërit janë aty. E dëgjuat krahasimin me vitin ‘92, kjo është hakmarrje. Por në këtë rrugë do i ketë ditët e shkurtra. Demokratët nuk mposhtën, pasi demokratët janë të pathyeshëm”, u shpreh ai.
Vetëm Dashamir Shehi i LZHK dhe Gjovalin Kadeli, ish-deputet i PS, kanë ndjekur deri në fund fjalën e Ramës.
Ndërkohë Kryeministri nuk ka vonuar dhe e ka komnetuar këtë situatë edhe në rrjetin social facebook, ku theksoi se programi i Kryeministrit Edi Rama ishte fund e krye sharje, urrejtje dhe poshtërime ndaj opozitës dhe popullit opozitar.
“Demokrate dhe demokratë, shqiptare dhe shqiptarë, këta janë neobllokmenët, të mbushur me urrejtje dhe vetëm urrejtje të etërve të tyre. Ne jemi këtu të gatshëm për çdo qëndresë, çdo sakrificë! Të gjithë jemi dhe do të jemi në këmbë! Të dashur miq, sharje, urrejtje dhe poshtërime ndaj opozitës dhe popullit opozitar, ky ështe programi i Edvin Kristaq Ramës dhe neobllokmenëve në pushtet. Ne jemi dhe do të jemi për çdo qëndresë, për çdo sakrifice, për të mbrojtur vlerat e lirisë nga bijtë e etërve mizorë!” shkruan Berisha në fb.
Ndërkohë që po mbrëmjen e sotme PD ka mbledhur në një mbledhje urgjente grupin e saj parlamentar si dhe aleatët opozitarë, nga ku pritet të ketë një qëndrim të qartë lidhur me mënyrën sesi do të proçedojë opozita, ndërsa programi i qeverisë së re pritet të diskutohet në parlament të shtunën në orën 10:00.
KLITHMËLINDJE…Nga ARTUR VREKAJ
KLITHMËLINDJE*/
Si kalimtar i përditshëm klithmëlindjet e jetës/
i përjetoj në çdo stinë./
Kur ndjeni që mushkëritë ju çliren,/
një oksigjen i ri, jetëson/
gjithësinë…/
Dhe shoh si dheu barin e kon/
me frymën shpërthyese të lulesythnajës/
dhe tërë bota bleron./
Dua të jem klithmë-lindje …/
Çdo ditë me lindjet njerëzore,/
Çdo ditë me klithmë-dehjen e agimeve pranverore .
Kurrë nuk do t’u ndahem klithmave.
Edhe dhimbjeve,
gjithsesi.
Kur nuk do të më ndjeni,o njerëz,
kërkomëni,
dhe do të më gjeni:
me një trëndafil Përmeti në dorë…
dhe, herë-herë,
…edhe me lot’ në sy…
Me lindje është mbushur plot-përplot zemra ime:
me mall, me këngë dhe me ëndërrime….
Kam një dhimbje njerëzore, që më mundon:
“Pse , moj Vesë-parfumeri-agimesh
Më tretesh pa gjurmë dhe,
…më avullon?!…
Përse, moj Vesë-parfumeri-agimesh, pse ?!
Jetën kaq të shkurtër e ke ?!”…
ME NJË ENDËR E LIDH DITËN
Pas një vargu naimian,
shpirtshtegtuar dritëDiellit,
i thaj lotët e mërgimit
me agimet e Përmetit….
Sa dal portës, në oborr
shpirt e këngë bilbilkënduar;
Pas një lule trëndafili
paqem, gazem lulëruar!
Me një endërr e lidh ditën,
shpresëruar me besë e zot;
Si zotin kam Amerikën,
kombvëlla si dje, si sot!
Kënga visesh më shtegton,
ku e ardhmja shpresëron!
VALËZAMBAKËRISHT
Liqeni val bregut
të tijat buzëvalë;
Tufat e zambakëve
i përkund pa fjalë.
Syre, syre pihen
pas zambakërisë;
Shpirtër-a që krihen
qeshur vajzërisë.
Lulebardhët puthin
faqeujësinë;
Vajzëria shtiz
pritjedashurinë.
Era merr liqenin
në ditët katran;
zambakëve majëthikash
fytyrëgjakur qan.
I urti liqen
gjizambakëruar;
Shpirtbardhë si lulja
rrathë-rrathë shkruar.
Si dashuria ime
ëndërrlëmshëzuar;
Me mall të vendlindjes
mërgimit pikuar!
Syprinës rrathëprerë
Valëzambakërisht;
Vargu im këndon
Ditën djalërisht!
KTHE, O SHPIRTMËRGUAR
Dita përmes zërash kthjell veç zëbilbilin,
bahçes krehur, larë me erë kamomili;
Ajri ajkëzënë me ajkë nektari,
rrugëve nga shkon bleta harliset behari.
Bleta e mjalt ditën në zgavër të lisit,
që jeta të zërë farë lumturimi;
Në të shenjtin vend ku ndrin hij’ e fisit
kthe, o shpirtmërguar g’zoju paqësimit!
LOTI DHËMB SI NJË FRYMOR
Loti dhëmb si një frymor,
sepse shpirti i tij vaj:
I nxehtë si dalë nga furra,
moshëfoshnjë i pafaj.
Qiell’n e syrit lan me qarje
kripen dhe gurët pa zë;
Këputet nga buzë e syrit
njolla e lotit ngrin e fle…
Kur një shpirt loton plaguar,
vështron urtë si vetë zoti,
sa njeriu shpirtlënduar,
nuk arrin të fshijë lotin.
Lot’n e pafaj qelq të larë,
mos e pafshim që të bjerë;
Të fiket dashurivrarë,
tek vetja dhe tek të tjerë!
FARËZIMI I GRURIT
Si një foshnjëz pa pelena,
brazdës në bukëvaltin shtrat,
nis një jetë e madhërishme,
farë e vogël ngrihet lart…
Rrënjëzon kjo jetë e re,
thith nektarë e nënës- tokë,
farëzon e shtohet jeta,
ndrit një yll i art’ në botë…
Ja një kokërr shtohet, rritet,
pushton fushën tejpërtej…
Farëzon një kokërr fare,
dhe pavdekësinë mbjell…
KUMBULLA IME
Kaq të bardha, kaq të paqme,
i çel lulet kumbull-o;
Të mbolla as njëvjeçare
edhe pse mërguar-o!
Kaq e paqme, kaq e bardha,
velloveshur kumbull-o;
Sa zili të ka dhe dardha,
sythfjetur, vonuar-o.
Sa gëzuar bletët rendin,
se ti kumbull çel e para;
Lulegjinjtë nektar u falin,
të ëmblave këngëmjalta!
S’dua që bletët të trëmben,
kur një degëz e shkund era;
Bleta shtegtare dhe unë,
rrugëve, në kërkim përhera…
Ah, moj kumbull që të pres
Çdo pranverë, si lajmëtare,
bardhësia jote më jep
pasaportën përmetare …
TË MOS THAHEM I MËRGUAR
Det mendimi e kthjell vargun,
të pastër, të ngrohtë, të dashur;
Dhe një shpirt që shkon frymëmardhur
e ngre gjallë, të papërmbajtur.
Me të shpirtit ajkëkuar,
ditënatë shqipëroj;
Të mos thahem i mërguar,
vargun vesh e pranveroj!
Me vargun çmend edhe detin,
kur hoven hiret e fjalës;
Dashurin’ e dashurive
shkruaj tantellave të valës!
* Cikël me poezi nga libri “Klithmëlindje”, 2013/
Bashkia e Tiranës: Azem Hajdari do prehet nesër tek varrezat e Dëshmorëve të Kombit
Bashkia e Tiranës njoftoi se ditën e enjte, me 12 shtator, trupi i Azem Hajdarit do të prehet në varrezat e Dëshmorëve të Kombit./
“Ditën e enjte, më datë 12 shtator, personalitete të larta të jetës politike nga Shqipëria dhe më gjerë, kryetarët e partive politike, studentët e dhjetorit ‘90, intelektualët, nismëtarë të lëvizjes për demokraci, miq, shokë dhe kolegë të Azemit do të kryejnë homazhe për nder të tij e më pas ta përcjellin për në Varrezat e Dëshmorëve të Kombit.
-Në orën 10:00, në Pallatin e Kongreseve do të kryhen homazhe, në nderim të Heroit të Demokracisë Azem Hajdari.
-Në orën 12:00, kortezhi i përmortshëm me arkivolin e vendosur në shtratin e topit, do të niset për në varrezat e Dëshmorëve të Kombit.
-Në orën 12:30, do të nisë ceremonia e varrimit në Varrezat e Dëshmorëve të Kombit,” thuhet në njoftimin e Bashkisë, e cila ka shpërndarë edhe një CV të Azem Hajdarit.
Biografia e Azem Hajdarit:
-Azem Hajdari u lind më 11 mars 1963, në qytetin Bajram Curri;
-I martuar, me tre fëmijë, Kirjaldi, Rudina dhe Azemi i vogël, i lindur katër muaj pas vdekjes së Azemit;
-Më 1987 fiton të drejtën e studimit dhe regjistrohet në Universitetin e Tiranës, Fakulteti i Shkencave Politike e Juridike;
-Në vitin 1993 diplomohet për filozofi në Universitetin e Tiranës;
-Në vitin 1995 diplomohet si jurist në Universitetin e Tiranës;
-Në vitet 1993-1994 ndjek kualifikim pasuniversitar në Shtetet e Bashkuara të Amerikës për filozofi;
-Më 1996 ndjek kualifikim për politikat e sigurisë e mbrojtjes, në kuadrin e NATO-s, në Garmisch-Partenkirchen, në Gjermani;
Aktiviteti Politik:
-Dhjetor 1990 – Udhëheqës i Lëvizjes Studentore;
-Dhjetor 1990 –Kryetar i Komisionit Nismëtar të Partisë Demokratike;
-1991 – 1993 – Nënkryetar i Partisë Demokratike të Shqipërisë dhe anëtar i Komitetit të saj Drejtues;
-31 mars 1991- Deputet i Partisë Demokratike të Shqipërisë për Shkodrën;
-22 mars 1992 – Deputet i Partisë Demokratike të Shqipërisë për Shijakun;
-26 maj 1996 – Deputet i Partisë Demokratike të Shqipërisë për Bulqizën;
-29 qershor 1997 – Deputet i Partisë Demokratike të Shqipërisë për Tropojën;
-1992-1996 – Kryetar i Komisionit Kuvendor për Rendin Publik dhe SHIK-un;
-Nëntor 1996 – Kryetar i Sindikatave të Pavarura Shqiptare;
-Qershor 1997 – Kryetar i Komisionit Kuvendor për Mbrojtjen Kombëtare;
-1995 – 1998 – President i klubit të futbollit “Vllaznia” – Shkodër dhe president i Federatës Shqiptare të Arteve Marciale
Vlerësime për Heroin e Demokracisë:
-Urdhri i Flamurit;
-Urdhri “Gjergj Kastrioti-Skënderbeu”, dhënë nga Presidenti i Republikës;
-Medalja e Artë e Lidhjes Shqiptare të Prizrenit, dhënë nga ish-Presidenti i Republikës së Kosovës, Ibrahim Rugova, në vitin 2003;
-Urdhri “Nderi i Kombit” (2002);
-Pishtar i Demokracisë;
-“Qytetar Nderi” i qytetit të Tiranës, Vlorës dhe i pothuajse të gjithë bashkive e komunave të Shqipërisë
SHENIM: Kryetari i Vatres, editori i Diellit dhe nje grup vatranesh kane marre ftese per te qene pjese e asaj ceremonie.
Thaçi: Veprimet e Maqedonisë janë anti-evropiane
Oda Ekonomike Amerikane thirrje Maqedonisë, hiqi taksat për kosovarët/
Bllokimi i mallit nga Kosova dhe i lëvizjes së lirë të qytetarëve që duan të shkojnë në Maqedoni është veprim anti-evropian, thotë shefi i qeverisë në Prishtinë, i cili bëri thirrje që kjo gjendje të tejkalohet sa më parë.
Kryeministri Hashim Thaçi mendon se raportet e mira ndërfqinjësore që janë acaruar së fundi, duhet t’i kthehen normales, por vetëm nëse ato janë në të mirë të shtetit dhe qytetarëve të Kosovës.
“Besoj se ka vullnet për tejkalimin e kësaj gjendje të padëshirueshme, mund të them për shtetin e Kosovës por, aspak ndihmuese për qasjen anti-evropiane të Maqedonisë në raport me shtetin e Kosovës. Kështu që ftoj që të përmbyllet sa më shpejt që është e mundur, dhe të gjendet zgjidhja. Por gjithmonë duke respektuar interesat e shtetit dhe të qytetarëve të Kosovës”, tha ai.
Gjatë mbledhjes së qeverisë, kryeministri i tregoi kabinetit të tij se ka biseduar në telefon me homologun maqedonas Nikolla Gruevski për këtë punë, por nuk sqaroi nëse po të njëjta fjalë ia tha atij sikur që po i thotë të mërkurën.
Kryeministri Thaçi megjithatë bëri të ditur disa detaje nga kjo bisedë e zhvilluar ditë më parë, ku sipas tij, si ai ashtu edhe Gruevski janë të shqetësuar nga situata e krijuar dhe se të dytë janë pajtuar që zgjidhja të gjendet shumë shpejt.
Këto probleme, siç tha ai, mund të zgjidhen brenda 24 orëve.
“Jemi dakorduar [me kryeministrin maqedonas Nikolla Gruevski] që të vazhdojnë takimet në nivel sa më të lartë politik dhe të përmbyllet mundësisht sot ose nesër”, tha kryeministri Thaçi.
Shoqata e transportuesve të Maqedonisë po mban të bllokuar rrugët që çojnë në pikëkakimet kufitare në Han të Elezit dhe Glloboçicë prej të hënës mbrëma, dhe nuk lënë asnjë mjet transportues që të hyjë apo dal nga Maqedonia për në Kosovë.
Kjo pas kundërpërgjigjes së Prishtinës zyrtare për të mbyll kufirin për produktet maqedone, që erdhi si pasojë e futjes së një takse rrugore për shtetasit e Kosovës.
Oda Ekonomike Amerikane thirrje Maqedonisë, hiqi taksat për kosovarët
Oda Ekonomike Amerikane vlerëson se heqja e vendimit maqedon që detyron qytetarët kosovarë të paguajnë taksë sa herë hyjnë në Maqedoni “do të krijonte hapësirën e nevojshme për të dyja palët që të ulen dhe negociojnë për zgjidhjen e mospajtimeve dhe tejkalimin e situatës momentale”.
Përmes një njoftimi dërguar mediave, Oda Ekonomike Amerikane vlerëson se vendimi maqedon për këtë taksë është politik dhe ai “nuk ka të bëjë asgjë me çështjet tregtare ndërmjet Kosovës dhe Maqedonisë”.
“Çfarëdo reagimi ose veprimi politik ndaj veprimeve që kufizojnë tregtinë e lirë, siç është vendosja e taksave për hyrje, apo edhe regjimi i mundshëm i vizave për shtetasit e Republikës së Kosovës, të ndërmarra në mënyrë arbitrare nga shtetet anëtare të CEFTA-së, e që shkelin dispozitat e CEFTA-së mbi çështjet e konsultimit ose arbitrazhit mund të shkaktojë dëme të pariparueshme në raportet tregtare ndërmjet dy shteteve, në këtë rast Kosovës dhe Maqedonisë. Veprimet e tilla politike nuk lejojnë shtetet anëtare që të zgjidhin kontestet e tyre përmes mjeteve ligjore të parapara në kuadër të marrëveshjes CEFTA”, thuhet ndër të tjera në këtë njoftim.
Komunikata vlerëson më tej se “duke pasur parasysh, ndikimet negative që ka situata momentale në ekonomitë e të dyja vendeve, por edhe pasojat që mund të ketë kjo situatë në raportet afatgjata midis të dyja vendeve, e që janë në kundërshtim me vlerat e fqinjësisë së mirë në të cilën ndërtohet Bashkimi Evropian, Oda Amerikane u bënë thirrje autoriteteve në Kosovë dhe në Maqedoni që duke shfrytëzuar kornizën ligjore të paraparë në kuadër të marrëveshjes CEFTA, të zgjidhin sa më shpejtë të jetë e mundur të gjitha kontestet tregtare”.
- « Previous Page
- 1
- …
- 841
- 842
- 843
- 844
- 845
- …
- 894
- Next Page »