Featured – Page 869 – Dielli

Fatos Lubonja i cilëson shqiptarët skizofrenikë dhe Ramush Haradinajn vrasës

July 18, 2013 by dgreca

Fatos Lubonja, në një shkrim për revistën “Sudosteuropa Mittelungen”, e ka cilësuar Ramush Haradinajn një vrasës, që u lirua nga Haga pas zhdukjes dhe ekzekutimit të dëshmitarëve. Për këtë arsye, ai ka kritikuar politikanët shqiptarë, duke nisur nga Berisha dhe Rama, pse kanë dalë në mbrojtje dhe kanë përgëzuar Haradinajn për lirimin e tij.

“Ironia është se të gjithë politikanët e lartë që celebruan të shfajësuarin kanë informacion të mjaftueshëm, në mos për të qenë të bindur, për të pasur dyshime serioze se akuzat e Hagës ndaj Haradinajt janë të vërteta. Pra, se në vitet 1998–1999, dhe veçanërisht pas bombardimeve të NATO-s, njerëzit e UÇK-së, që Haradinaj ka drejtuar, kanë rrëmbyer serbë, romë, shqiptarë, ndër ta edhe gra, të cilët janë mbajtur në kushte çnjerëzore robërie në burgje të improvizuara, janë torturuar, përdhunuar, vrarë; se ka një numër jo të vogël të zhdukurish, ndër të cilët edhe shumë shqiptarë kosovarë, që janë ndër ata që UÇK i konsideronte tradhtarë apo jo mbështetës të saj; dhe se Haradinaj është çliruar nga këto akuza ngase ai apo njerëzit e tij kanë frikësuar dhe vrarë dëshmitarë. Ata e dinë se raporti i Këshillit të Europës i vitit 2010 e ka cilësuar gjendjen e mbrojtjes së dëshmitarëve në Kosovë si më të keqen në Ballkan edhe për shkak se vendimi i vitit 2008 i ICTY, që e nxori të pafajshëm Haradinajn herën e parë, nënvizonte vështirësitë për t’i bindur dëshmitarët nga Kosova të shkonin në Hagë dhe të dëshmonin.3 Ata e dinë se në gjyqin e fundit dhe përfundimtar dëshmitarët refuzuan të flasin ose ndryshuan versionin e tyre të ngjarjeve. Ata e dinë, po ashtu, se e njëjta gjë ka ndodhur edhe në gjyqin e një heroi tjetër të UÇK-së, Fatmir Limajt”, shkruan Lubonja.

Sipas tij, është e pabesueshme se si shqiptarët i glorifikojnë këto personazhe. Kjo ndodh, sipas tij, sepse jemi një komb skizofrenikësh.

“Kjo hipokrizi kaq kurajoze mund të shpjegohet me faktin se ky qëndrim ka të bëjë me mbisundimin e ideologjisë nacionaliste me të cilën vazhdojnë të punojnë në Shqipëri dhe Kosovë sistematikisht elitat politike dhe kulturore për t’u shpëlarë trurin njerëzve. Ashtu si në kohën e komunizmit, shqiptarët vazhdojnë të ushqehen me idenë se ata janë asgjë, si qenie individuale, përpara interesave të kombit, se ata duhet të sakrifikojnë veten për atdheun dhe të mbyllin sytë ndaj çdo krimi të kryer në emër të tij. Në sajë të kësaj shpëlarjeje trush ata vazhdojnë të jetojnë në mënyrë skizofrenike midis glorifikimit të heronjve të lavdishëm që sakrifikojnë veten për kombin dhe mjerimit të maskarenjve që i vjedhin, madje edhe i vrasin ata – gjithë duke qenë po ata heronj të glorifikuar”, shkruan ndër të tjera Lubonja.

IDRIZ SEFERI, HEROI KOMBETAR QE LUFTOI PER BASHKIMIN E TOKAVE SHQIPTARE

July 18, 2013 by dgreca

“U munova tanë jetën me çliru dhe bashku këtë vend, por po vdes me ixhram që nuk munda ti bëj tokat shqiptare Shqipni”, Idriz Seferi !

Shkruan: Nga Gani Qarri /

Atdhetari i madh, heroi i kombit, si dhe njëri ndër organizatorët dhe udhëheqësit kryesor ushtarak të kryengritjeve kombëtare për lirinë dhe bashkimin e trojeve shqiptare, Idriz Seferi, u lind në vitin 1847 në fshatin Sefer të trevës së Karadakut afër Shkupit dhe vdiq në vitin 1927 me dëshpërimin e thellë në shpirt,ngase përkundër aq shumë vuajtjesh, luftërash e përpjekjesh kombëtare, shqiptarët asnjëherë nuk arritën ti bashkonin të gjitha trojet e tyre etnike dhe bënin – Shqipëri.

Shpirti i tij luftarak dhe shtypja e madhe e bashkëkombësve nga Perandoria turke,e shtynë heroin e atyre viteve të rënda e të vështira për kombin,kur një popull i tërë luftonte për jetë a vdekje,që qysh në moshën e tij të re, duke mos duruar shtypjen e mëtejme dhe varfërinë e cila do të keqësohej së tepërmi , sidomos pas reformave të Tanzimatit, të hidhej në luftë të armatosur kundër pushtuesve osman, për çka në vitin 1875, kur ishte vetëm 28 vjeçar , do të burgosej nga pushtetarët turq.

Si patriot dhe luftëtar i shquar që ishte, Idriz Seferi u ftua dhe mori pjesë në të gjitha ngjarjet kryesore të kohës, kuvendet me rëndësi dhe luftërat vendimtare që bëheshin kundër kësaj Perandorie, për çlirimin e trojeve shqiptare nga pushtimi shumë shekullor i saj.

Ai kudo u shqua me aftësitë e tij organizative dhe udhëheqjet e dëshmuara për strategji të larta ushtarake, i cili me të drejtë do të caktohej-udhëheqës i Betejës së Kaçanikut dhe njëri ndër prijësit kryesor të kryengritjes së përgjithshme të vitit 1912 në Kosovë.

Idriz Seferi, ishte njëri ndër strategët kryesor të betejave për çlirimin e Shkupit, Kumanovës, Preshevës, Gjilanit, Ferizajt e vendbanimeve të tjera shqiptare në këto dhe më gjerë në trojet tona.

Edhe pse me kërkesat e Fuqive të Mëdha, luftëtarët kombëtar nga fundi i muajit gusht të vitit 1912,do të detyroheshin të çarmatoseshin dhe ktheheshin në shtëpitë e tyre, pas fillimit të luftërave ballkanike, në tetor të vitit 1912, kur tokat shqiptare do të sulmoheshin nga të gjitha anët, ai do të mobilizohej përsëri dhe me vullnetarët e tubuar nga të gjitha trojet,do të hidhej në mbrojtjen e Bujanocit, Llapit, Gollakut, Kumanovës,e vendeve tjera,nga sulmet e pushtuesve serbomëdhenj, të cilëve do t’u shkaktonte humbje të mëdha, por me gjithë përpjekjet heroike, jo edhe t’i ndalte për kohë të gjatë, nga mungesa e armëve, municionit dhe ushqimeve, kur trojet shqiptare që të gjitha njëkohësisht, digjeshin në flakët e luftës nga çdo anë, të sulmuara njëherësh prej shumë shteteve ballkanike, si Serbia, Mali Zi, Greqia dhe Bullgaria.

Megjithatë, kryengritjet e tij për liri kundër pushtuesve serbë në vitet 1913 deri më 1915, dhe pushtuesve bullgarë nga vitet 1916 deri më 1918, asnjëherë nuk do të ndaleshin, për çlirimin e Kosovës dhe trojeve të tjera shqiptare nën Jugosllavi, deri në fund të jetës së tij.

Pra shqiptarët, për fat të keq, nuk kishin vetëm një armik,kështu që pushtuesi i radhës-qeveria shoviniste serbe,që nga viti 1900,kishte filluar ti forconte agjenturat e saj, përmes mësuesve dhe priftërinjve sllavo-ortodoks, nëpër fshatrat e përziera dhe të banuara me sllavë, të cilat vepronin nën emrin e njohur si “Dora e zezë”.

Madje ajo, do të dërgonte edhe oficer të lart ushtarak,dhe nga viti 1907, do të krijonte edhe çeta të armatosura çetnikësh,të cilat kishin për detyrë të përgatisnin terrenin për ndërhyrjen ushtarake serbe në Kosovë, pas largimit të Perandorisë Turke nga tokat tona.

Banda të armatosura dhe grupe spiunazhi,përherë janë mbajtur dhe strehuar në kishat dhe manastiret serbe,gjithandej trojeve tona, të cilat gjatë gjithë kohës ishin dhe mbetën, vatra të agjenturave të fshehta ushtarake të Serbisë dhe Rusisë në Kosovë

Një çetë të tillë çetnikësh, që në vitin 1907,Serbia do ta formonte edhe në fshatin Pasjan,në lindje të Gjilanit,e cila për një kohë do të strehohej e kamufluar në kishën sllavo-ortodokse të këtij fshati të banuar jo tërësisht me serbë. Por,pas paraqitjes publike, prijësi popullor i kryengritësve shqiptar, heroi Idriz Seferi do të urdhëronte asgjësimin e kësaj çete të armatosur,bashkë me udhëheqësin e saj, oficerin e lartë ushtarak, Dragolub Nikoliq, i cili ishte dërguar enkas nga Beogradi,për këtë detyrë.

Kjo ishte vetëm një pjesë e vogël nga historia e gjatë e luftërave dhe trimërive të shumta të këtij Burri.

Ndaj,për betejat që udhëhoqi dhe heroizmat e treguara gjatë atyre viteve të vështira për kombin dhe atdheun e shqiptarëve, Idriz Seferi bashkë me Isa Buletinin u shndërruan në mite,kurse luftimet e fuqishme që ata organizuan dhe udhëhoqën me trimëri, të zhvilluara me aq sukses, në përballje me ushtri shumë herë më të mëdha armike,në luftë për çlirim dhe bashkim kombëtar u kthyen në legjenda dhe vlerësuan lartë në historinë e kombit tonë.

Kryengritjet e tyre, kundër pushtimit osman, të cilat që nga reformat e Tanzimatit, nuk u ndalën asnjë herë, deri në përzënien përfundimtare të Perandorisë Osmane nga trojet tona, si dhe organizimi i mbrojtjes,për aq sa ishte e mundur nën kushtet e një lufte pothuajse duarthatë kundër shteteve ballkanike, ishin përpjekje titanike të cilat do të çonin në shpalljen historike të Pavarësisë së Shqipërisë etnike më 1912 në Vlorë, edhe pse ai do të vdiste me “ixhram” si shumë patriot tjerë të kombit,të cilët me gjithë luftën që bënë dhe vuajtjet që përjetuan,nuk arritën ti bënin të gjitha tokat shqiptare Shqipni.

*Pjesë nga libri “Krijuesit e Historisë”

Shehi i thote Jo Neftcit! Skenderbeu barazon ne ndeshjen e pare 0-0.

July 17, 2013 by Administrator

Skënderbeu doli pa pësuar gol nga një transfertë vërtet e vështirë, ndaj një kundërshtari potent si Neftci Baku, dhe ushqen kësisoji shpresën për t’u kualifikuar në kthim, në Korce pas një jave. Bardhekuqte e Mirel Josës kanë zhvilluar një 90 minutësh heroik, sidomos në pjesën e dytë, kur u është dashur të përveshin mirë mëngët në mbrojtje të portës së Orges Shehit, por jane ndihmuar deri diku edhe nga fati ne disa raste.

Azerët e kanë kërkuar me të gjitha mënyrat golin e avantazhit, kanë krijuar jo pak raste, por kanë gabuar në finalizim. Pengesë e pakalueshme për ta ka qenë vecanërisht Orges Shehi, i cili ka bërë pritje të mrekullueshme. Tensioni ka qenë jo i paktë, cka duket edhe në tetë kartonët e verdhë të akorduar nga kryesori qipriot, megjithatë loja është zhvilluar brenda normave të “fair-play”-it.

Skenderbeu eshte mbojtur per pjesen me te madhe te ndeshjes, por edhe ka tentuar dhe madje rrezikuar qe ne fillim te takimit. Pergatitjet e Joses mesa duket kane qene te suksesshme ne ditet paraardhese pasi vendosja ne mbrojtje dhe disiplina ka qene perfekte.

Skënderbeu e ka nisur i vendosur mjaft mirë në fushë, me repartet që vendosin ekuilibër mes tyre, ku mesfusha ka kreativitet dhe i jep frymëmarrje lojës së kuqebardhëve. Nuk futet aspak me frikë në fushën e lojës skuadra e Mirel Josës, përkundrazi, tenton “të mbrohet duke sulmuar”. E bën këtë nëpërmejt dy krahëve, ku funksionon Gilman Lika dhe Sefa, ndërkohë që Shkëmbi dhe Sabien Lilaj filtorojnë gjithcka nëpër këmbët e tyre në mesfushë. Orelesi është i kudondodhur me ndërhyrjet e tij decizive, sidomos në aspektin shkatërrues të manovrës ofensive të vendësve, ndërsa Pero Pejic betet shqetësim konstant për mbrojtjen e Neftcit. Kroati shtatlartë shpenzon shumë energji, tërhiqet deri mbrapa për ta marrë topin, por bie shpesh në kurthin e pozicionit jashtë loje, që aplikon skuadra vendëse. Portieri Orges Shehi tregohet në lartësinë e duhur në rastet që krijojnë azerët, duke pritur me zotësi disa topa të adresuar në kuadratin e tij, ndërkohë që mbrojtja me Ademir, Gvozdenovic, Radas dhe Arapi bëjnë një punë të madhe në mbajtjen sa më larg të kundërshtarit. Natyrisht, Neftci është më kërkues dhe e rrit lojën e tij me kalimin e minutave, krijon edhe ndonjë rast sporadik, por nuk ka qetësinë e duhur në finalizim. Kombinimet e vendësve deri në zonën korcare janë për t’u admiruar, ata luajnë shtruar dhe me një pasim, aplikojnë murin në zona të vogla dhe arrijnë të dalin plot befasi para portrierit Orges Shehi. Fatmirësisht, ky i fundit tregon gadishmëri të lartë, por edhe sulmuesit azer gabojnë në konkludim, ndaj goli nuk del në dritë. Skënderbeu ia del të zhvillojë 45 minuta lojë të bukura, me qartësi taktike dhe me kooperim mes reparteve. Nëse i mungoi dicka në këtë pjesë të parë, kjo ishte iniciativa individuale e elementëve të spikatur si Gilman Lika, Shkëmbi apo Pejic. Gjithsesi, Josa duket qartë se i ka udhëzuar të tijtë të mos bëjnë gabime, të mos kalojnë në aventurë dhe t’ia bëjnë hyzmetin para së gjithash mospësimit të golit.

Loja rinis pa zëvendësime për të dyja skuadrat. Vijon e njëjta “muzikë” te korcarët, që mbrohen mirë dhe me forca të shumta tashmë, ndërsa Neftci e kërkon me ngulm golin. Azerët arrijnë të fitojnë terren me kalimin e minutave, e kanë më së shumti topin në zotërim, por vijojnë të shfaqin të njëjtën “sëmundje” si në 45 minutat e para. U mungon finalizimi, ndërkohë që aksionet e tyre janë të rrjedhshme deri në zonën e Shehit. Aty mbetet i pakalueshëm portieri durrsak i Skënderbeut, që vijon të bëjë pritje spektakolare dhe shpëtimtare. Kjo i nevrikos jo pak vendësit, që pas minutës së 70-të derdhën totalisht e me forca të shumta në gjysmëfushën korcare. Trajneri i tyre bën edhe zëvendësimin e parë, duke freskuar dicka në repartin e sulmit, ndërsa i udhëzon azerët të sulmojnë nga krahët, me synimin final krosimin në qendër të zonës kuqebardhë. Rastet nuk u mungojnë vendësve, madje shpërdorojnë disa prej tyre në mënyrë të pabesueshme, por fati në këtë ndeshje duket se është me korcarët. Ata vuajnë presingun asfiksues të azerëve, që shfaqin më tepër freski fizike, ndaj detyrohen të godasin topin pa adresë në drejtim të mesit të fushës, ku Pejic tenton të mbajë topin, por bie në darën e tre mbrojtësve kundërshtarë. Duken qartë veprimet e sforcuara në aspektin fizik të korcarëve, sepse kanë shpenzuar shumë në këtë drejtim dhe janë disi deficitarë karshi vendësve. Kjo shoqërohet me ndërhyrje të gabuara, duke e cuar në katër numrin e kartonëve të verdhë për kampionët e Shqipërisë (Ademir, Arapi, Sefa, Abazi). Josa vendos ta bëjë zëvendësimin e parë në minutën e 81-të, teksa aktivizon Abazin në vend të Sefës, ndërsa nuk vonon të hedhë në fushë edhe Nimagën për Gilman Likën.

Misioni per te ruajtur barazimin 0-0 mbyllet me sukses, ndaj një kundërshtari tepër solid dhe të përbërë me elementë cilësorë, por që shfaqi pikën e vet më të dobët, finalizimin. Në këtë dobësi të azerëve ka padiskutim meritën e tij edhe portieri Orges Shehi, që ka zhvilluar një ndeshje “për kornizë”, duke evituar dy-tre gola të sigurtë në kuadratin e të tijve dhe mbajtur Skënderbeun në “pole position” për të kaluar turin. Ndeshja e klthimit, pas një jave në Korcë, do të vendosë gjithcka, por nisur nga faktori fushë dhe mbështetja e madhe e tifozërisë korcare, shpresat janë të mëdha për juglindorët.

NEFTÇI – SKENDERBEU 0-0

NEFTÇI: Stamenković, D.Silva, Mitreski, Bertucci, Shukurov, Sadygov, Abdullayev (Imamverdiyev 69′), Flavinho, Wobay (Nasimov 86′), Ramos, Platje. Trajner: Boyukagha Hajiyev
SKENDERBEU: Shehi, Arapi, Gvozdenovic, Radas, Ademir, Lilaj, Shkembi, Orelesi, J.Sefa, G.Lika (Nimaga 86′), Pejiç.
Trajner: Mirel Josa
Gjyqtarë: L. Trattou, M. Soteriou, A. Kyriakou (Qipro)
Kartonë të verdhë: Sadygov 22′, Mitreski 77′, Shukurov 81′, Flavinho 90+2′ / Ademir 59′, Arapi 65′, Sefa 79′, Abazi 90+2′

Ambasadori Amerikan: Shqiperia ka problem me trafikimin e qenieve njerëzore

July 17, 2013 by dgreca

Ambasadori i Shteteve të Bashkuara të Amerikës, Alexandër Arvizu tha se Shqipëria nuk ka bërë sa duhet kundër trafikimit të qenieve njerëzore, krim të cilin e quan me të tmerrshmin që ekziston në Botë. Deklaratën diplomati amerikan e bëri nga qyteti i Elbasanit ku mori pjesë në një tryezë të rrumbullakët mbi parandalimin e trafikimit të qenieve njerëzore.

” Disa prej jush mund të jenë familjarë me raportin e përvitshëm të trafikimit të personave që përgatitet çdo vit nga Departamenti Amerikan i Shtetit dhe që mandatohet nga Kongresi Amerikan. Ndonëse është bërë përparim, përsëri sipas vlerësimit tonë është vënë re që ka pasur rënie performance nga ana e qeverisë shqiptare nga ana e trafikimit, dhe rezultati praktik i saj ka qenë që Shqipëria ka lëvizuar poshtë në shkallë në atë që quhet lista e dështimit të Grupit 2” tha Arvizu.

Ambasadori është optimist se gjërat do të përmirësohen, pasi siç zbuloi edhe vetë, Arvizu ka marrë premtimin e Edi Ramës dhe Ilir Metës se qeveria e majtë do të bëjë maksimumin në këtë drejtim. Dhe për këtë SHBA do të vijojnë mbështetjen.

Në komunikimet tona me Ramën, dhe Metën, dhe disa aktorë të tjerë kemi folur që qeveria e re duhet ta ketë një nga gjërat që duhet të marrë parasysh, ndërsa do të fuqizohen ndihmat që do të ofrohen. Një rast specifik i gjërave që ne po përpiqemi të bëjmë është që IOM është duke marrë një grant prej 500 mijë dollarësh për çështjet e trafikimit në Shqipëri. Dhe me të vërtetë ky është një shembull shumë specifik një partneriteti të nisur në nivelin vendor në Elbasan ndaj dëshiroj të falenderoj pjesëmarrësit në tryezën e rrumbullakët nën drejtimin e Bashkisë, dhe ne si SHBA do të vazhdojmë të kemi partneritet ma sa njerëz të mundemi,por jo vetëmn në çështjen e trafimimit që është një krim i tmerrshëm, por edhe me çështje të tjera që kanë nevojë të trtajtohen siç është korrupsioni, sepse ligjet egzistojnë dhe janë të mira” shtoi ambasadori.

Një tjetër pikë e rëndësishme në këtë drejtim për ambasadorin ëstë edhe bashkëpunimi më i fortë mes policisë dhe prokurorisë.

“U kënaqa kur pashë kur presidenti organizoi një takim me të ashtuquajturën istitucione të pavarura, dhe qartazi guri i themelit të demokracisë është kur institucionet të mund të veprojnë të pavarura. Por mesazhi që duhet të përcillet është që policia dhe prokurorët duhet të punojnë së bashku pasi performanca juaj matet në fakt me se sa mirë ju do të punoni së bashku. Për këtë arsye ka nevojë që të ketë arrestime më të sukseshme, ndjekje penale, gjithashtu edhe dënime të fajtorëve. Qofshin këto çështje korruptive, raste të pandëshkushmërisë ose raste kriminale që meritojnë të ndëshkohen. Kjo është ajo që qytetarët e Shqipërisë kërkojnë dhe kjo është ajo që ata meritojnë” shtoi ai.

Në tryezën e rrumbullakët morën pjesë edhe kryetari i bashkisë Elbasan dhe Organizata Joqeveritare që veprojnë në këtë qytet

Putin: Nuk lejojmë që Snowden të dëmtojë raportet tona me SHBA-në

July 17, 2013 by dgreca

Raportet Rusi-Amerikë janë shumë më të rëndësishme sesa çështja Edward Snowden!/
Por, megjithatë Snowden ka shkaktuar tensione mes dy superfuqive, pasi Rusia refuzon ta ekstradojë tek autoritetet amerikane.
Megjithatë, presidenti rus, Vlladimir Putin, duke folur para gazetarëve nga qyteti lindor Chita, mbrojti të drejtën e Moskës për të pasur një politikë të jashtme “të pavarur” pasi Shtetet e Bashkuara përsëritën thirrjen e tyre që t’i dorëzohet Snowden.
“Lidhjet tona bilaterale (Rusi-SHBA), sipas meje, janë shumë më të rëndësishme sesa grindjet rreth punës së shërbimeve të sigurisë”, tha Putin.
Moska zyrtare, madje, edhe ka paralajmëruar ish-kontraktorin e Agjencisë Kombëtare Amerikane të Sigurisë që Rusia nuk do të tolerojë asnjë aktivitet të tij, i cili do të dëmtonte raportet me Shtetet e Bashkuara.
Snowden ka mbetur i ngujuar në aeroportin e Moskës Sheremetyevo, që nga 23 qershori, kur është larguar nga Hong-Kongu nga frika se do të ekstradohej në Shtetet e Bashkuara.
Të martën Snowden ka kërkuar azil të përkohshëm në Rusi.
Ndërsa autoritetet ruse i kanë ndaluar Snowdenit që të publikojë çfarëdo dokumenti tjetër të shërbimeve sekrete përderisa është në tokën ruse.
“Kemi paralajmëruar zotin Snowden se çfarëdo aktiviteti nga ana e tij, i cili mund të dëmtojë raportet Rusi-Shtete të Bashkuara është i papranueshëm për ne”, ka thënë Putin të mërkurën.
Informatat që Edward Snowden u ka dhënë medieve ndërkombëtare flasin për një vëzhgim të paprecendentë të Shteteve të Bashkuara në telefoni mobile dhe internet.
Programet e mbikëqyrjes që kanë përdorur autoritetet, kanë shkaktuar një debat të gjerë në Amerikës rreth ligjshmërisë së masave të tilla dhe kufirit që duhet të ketë qeveria në jetën private të njerëzve.
Raportet për programet dikur sekrete, kanë shkaktuar fërkim edhe në raportet e Washingtonit me një numër të shteteve aleate, përfshirë ata kryesorët në Evropë.
Në fillim të këtij muaji gazeta britanike “The Guardian” ka cituar informata të marra nga Snowden, që thonë se Washingtoni ka spiunuar 38 ambasada dhe zyre të përfaqësive evropiane, si ato të Japonisë, Turqisë, Francës, Italisë dhe Greqisë.
Javën e shkuar, ndërkaq, magazina gjermane “Der Spiegel” ka raportuar se cak i spiunimit ishin edhe zyrat e BE-së në Washington, New York dhe Bruksel, dhe se përveç këtyre, edhe komunikimi në Gjermani është mbikëqyrur.
Për shkak të gjithë kësaj rrëmuje, presidenti rus, Vlladimir Putin, dëshiron që Edward Snowden të largohet sa më parë nga Rusia, pasi atij i kanë ofruar azil disa shtete të Amerikës Latine.
Kreu i Komitetit për Mbikëqyrje Publike, në kuadër të Ministrisë së Brendshme, Anatoly Kucherena, i cili edhe po ndihmon Snowdenin me kërkesën e tij për azil të përkohshëm në Rusi, tha të mërkurën se rasti i amerikanit të arratisur do të zgjidhet për pak ditë.
“Mendoj se Snowden do të largohet nga aeroporti në ditët e ardhshme. Edhe pse, megjithatë, disa dokumente ende kërkojnë kohë për t’u proceduar, por mendoj se e tërë kjo punë do të mbarojë brenda javës. Pastaj do të shqyrtohet çështja e dhënies apo jo të azilit të përkohshëm për zotin Snowden”, tha Kucherena.
Të martën mbrëma, zëdhënësi i Shtëpisë së Bardhë, Jay Carney, përsëriti që Snowden duhet t’iu dorëzohet autoriteteve gjyqësore amerikane, pasi ai akuzohet për vjedhje të dokumenteve shtetërore dhe rrjedhjen e informatave sekrete në publik.
“Qëndrimi ynë është që Snowden duhet të dëbohet (nga Rusia) dhe të kthehet prapa në Shtetet e Bashkuara, dhe se atij nuk duhet t’i lejohet që të hipë në fluturime tjera përveç atij që është i nevojshëm për t’u kthyer në Shtetet e Bashkuara. Ai nuk është aktivist i të drejtave të njeriut. Ai nuk është disident. Ai akuzohet për publikim të dokumenteve sekrete”, tha zëdhënësi Carney.
Sido që të jetë, Ministria Federale Ruse për Migracion, tha se procedurat e rishikimit të aplikacioneve për azil, mund të zgjasin deri në tre muaj, para se të vendoset nëse Snowden do të marrë azil të përkohshëm.(Kortezi: Radio Evropa e Lirë)