Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Bifurkacioni i Nerodimes, një monument shumë i veçantë për Kosovën

by

– Kryeministri i Republikës së Kosovës, Isa Mustafa, mori pjesë në përurimin e funksionalizimit të Bifurkacionit të Nerodimës, ku u shënua edhe Dita Botërore e Mjedisit/

–Mustafa: Përveç infrastrukturës do të hapim perspektivë ekonomike në fshatrat e Ferizajt/

 FERIZAJ, 5 Qershor 2016-B.Jashari/ Bifurkacioni i Nerodimes është një monument shumë i veçantë për Kosovën, tha sot kryeministri Isa Mustafa.

“Këtu në ndarjen e këtij lumi në dy lumenj, të cilët na qesin pastaj në dy dete të ndryshëm, në Detin Egje dhe në Detin e Zi, është një rast i veçantë i cili është këtu tek ne në Kosovë. Ne kemi dëshirë që ta kultivojmë, ta mbajmë mirë, të zhvillojmë turizëm, të krijojmë kushte që njerëzit të vijnë dhe ta vizitojnë sepse vërtetë meriton vizita dhe meriton kujdes”, tha kryeministri, duke falënderuar Komunën, Ministrinë e Mjedisit dhe Komisionin Evropian për investimet.

Kryeministri Mustafa, më tej tha se këto investime tani duhet të rikthehen dhe t’u jepet vlera e tyre.

“Të punojmë dhe të japim shembull të mirë se si duhet të kujdesemi në mënyrë që mjedisin ta bëjmë më të përshtatshëm për njerëzit, për qytetarët tanë, për fëmijët tanë dhe për ardhmërinë tonë”, theksoi ai.

Kryeministri i Republikës së Kosovës, Isa Mustafa, mori pjesë në përurimin e funksionalizimit të Bifurkacionit të Nerodimës, ku u shënua edhe Dita Botërore e Mjedisit.

Të pranishëm në këtë aktivitet ishin ministra, deputetë, kryetari i komunës së Ferizajt dhe shumë qytetarë e ambientalistë.

Kryeministri Mustafa tha se Dita Botërore e Mjedisit flet për ndërgjegjësimin e njerëzimit për kujdes ndaj planetit dhe ndaj mjedisit si dhe marrjen e përgjegjësive për mjedisin.

“Edhe motoja e kësaj dite është që ne të kujdesemi për vendin tonë, të kujdesemi për planetin dhe të marrim përgjegjësinë për të. Është edhe ditë e njerëzve sepse është në vullnetin e tyre, në përgjegjësinë e tyre, që ata të marrin masa pozitive që të përmirësojnë ambientin në të cilin jetojnë”, tha kryeministri Mustafa.

Ministri i Mjedisit dhe Planifikimit Hapësinor, Ferid Agani, tha se Dita Botërore e Mjedisit është një datë e veçantë për Kosovën sepse është ditë kur mund të shpalosen të gjitha vlerat e mjedisit të Kosovës, vlera të shënuara edhe në përmasa botërore e të cilat meritojnë të mbrohen në mënyrë institucionale.

Ministri Agani foli edhe për faktin se shumë prej këtyre vlerave janë të kërcënuara si pasojë e proceseve të ndryshme degraduese, duke shprehur përkushtimin e plotë të qeverisë së Kosovës për të punuar edhe më shumë që këto degradime të parandalohen dhe të ndërpriten dhe që këto vlera të mbrohen.

Ministri më tej ka folur për çështjet e shumta globale mjedisore që kanë nevojë për vëmendje urgjente siç janë ndryshimet klimatike, siguria mjedisore dhe zhvillimi i qëndrueshëm mjedisor.

Kryetari i komunës së Ferizajt, Muharrem Sfarqa tha se funksionalizimi i Bifurkacionit të Nerodimes është ngjarje shumë e rëndësishme për Ferizajn dhe Kosovën, pasi që e vendos në rrugë të mirë këtë fenomen të rrallë për të luajtur rolin që ka në pasurinë turistike e natyrore.

Sfarqa tha se funksionalizimi i Bifurkacionit paraqet një prej vendimeve më domethënëse të qeverisë për të ndihmuar Ferizajn që të realizoj synimet zhvillimore të saj.

Ai më tej tha se komuna e Ferizajt, me përkrahjen e qeverisë së Kosovës dhe institucioneve financiare ndërkombëtare, ndodhet në prag të nisjes së investimeve të rëndësishme zhvillimore.

“Këto investime pritet të përmirësojnë ndjeshëm gjendjen infrastrukturore dhe gjendjen e qytetarëve të komunës së Ferizajt dhe të rrethinës”, tha Sfarqa, duke përmendur fillimin e ndërtimit të Spitalit Rajonal në Ferizaj, zgjidhjen e problemit të hekurudhës, zgjerimin e rrugëve nacionale dhe hyrje daljet e Ferizajt, si dhe investimet në Hidrosistemin e Lepencit, që do t’ia zgjidhin Ferizajt përfundimisht problemet e ujit të pijshëm dhe të ujitjes.

 

Kryeministri i Republikës së Kosovës, Isa Mustafa, ka vizituar sot edhe fshatrat Dardani dhe Zllatar të komunës së Ferizajt, ku mori pjesë në përurimin e rrugës së re të ndërtuar me standardet më të larta evropiane, me gjatësi 3200 metra dhe gjerësi 6 metra, që lidh këto fshatra me magjistralen Ferizaj-Gjilan.

Kryeministri Mustafa u prit nga qindra banorë të këtyre fshatrave si dhe nga kryetari i Ferizajt, Muharrem Sfarqa, deputetë të Kuvendit të Kosovës, asamblistë  komunalë dhe përfaqësues të tjerë locale.

 

Para të pranishmëve të shumtë, kryeministri Mustafa tha se ndërtimi i kësaj rruge me standard, justifikohet më së miri me pjesëmarrjen e qytetarëve të saj në këtë përurim.

 

“Në qoftë se një investim nuk përjetohet nga qytetarët, nuk përjetohet nga njerëzit për të cilët bëhet dhe nuk pranohet nga ata, atëherë ai investim nuk e ka edhe vlerën e vet. Unë vlerën më të madhe të kësaj rruge e shoh në ju, në pjesëmarrjen e juaj këtu sot, në këtë numër të madh të njerëzve që e shënojnë këtë sukses, si sukses të tyre”, tha kryeministri.

 

Më tej, Mustafa tha se këtij suksesi do t’i shtohen edhe suksese të tjera.

 

“Ne do të bëjmë përpjekje maksimale që edhe zhvillimin ekonomik ta shpërndajmë kështu. Siç po ndërtojmë rrugë do të ndërtojmë edhe fabrika të vogla nëpër vendbanimet e juaja, në mënyrë që ju të gjeni punë këtu, këta të rinj dhe fëmijë që janë këtu të gjejnë ardhmërinë e tyre dhe perspektivën e tyre në këtë vend, në këto fshatra, në këtë komunë, në këtë Kosovë që e duam kaq shumë dhe që se zëvendësojmë me asnjë vend tjetër”, tha kryeministri Mustafa, duke shprehur përkrahjen për kryetarin e komunës edhe për kërkesat që i ka për rrugët e tjera.

 

Kryetari i komunës së Ferizajt, Muharrem Sfarqa, falënderoi kryeministrin Mustafa për praninë, duke theksuar se ai po i ndërron pamjen jo vetëm Ferizajt por edhe Kosovës përmes investimeve që po bën.

 

Kryetari Sfarqa tha se pas përfundimit të kësaj rruge, në bashkëpunim me Ministrinë e Infrastrukturës, do të punohet që ky lokalitet të lidhet edhe me Komunat e Gjilanit dhe të Vitisë.

 

“Vetëm 3 kilometra nga këtu mund të lidhet rruga që shpie në magjistralen Gadime-Gjilan, që do ta lehtësoj qarkullimin e njerëzve dhe të mallrave që lidh komunat tona si dhe me komunën e Vitisë në fshatin Remjan”, tha Sfarqa.

 

Ai më tutje tha se banorët e këtij lokaliteti duke qenë njerëz punëtorë e të vyeshëm janë bërë pjesë e zhvillimeve dhe e realizimit të planit qeverisës të Komunës së Ferizajt dhe më gjerë.

“Komuna e Ferizajt po bën investime në të gjitha sferat infrastrukturore për t’ua lehtësuar qytetarëve jetën e tyre, për të krijuar një perspektivë për të gjithë, në mënyrë që lëvizjet që ka pas ky lokalitet nga fshati në qytet të ndërpriten sepse edhe Zllatari edhe fshatrat tjera po marrin gjithnjë e më shumë pamjen e fshatrave evropiane”, tha kryetari Sfarqa.

Bifurkacioni në Kosovë, mrekulli botërore

by

-Në Kosovë Dita e Mjedisit shënohet në Nerodime, në një nga dy bifurkacionet e gjithë botës, të vetmit në Evropë/

Nga Behlul Jashari/ PRISHTINË, 5 Qershor 2016/ Në Kosovë, sot, Dita Botërore e Mjedisit shënohet atje ku është një nga mrekullitë e trojeve shqiptare – në Bifurkacionin e lumit Nerodime, i cili derdhet në dy dete, fenomenit unikat natyror të vetëm në Evropë e një prej dyve në botë.

Bifurkacionin e lumit Nerodime e viziton kryeministri i Kosovës, Isa Mustafa, ndërsa kryetari i komunës së Ferizajt, Muharrem Svarqa, ka paralajmërar se sot “fillon funksionalizimi i fenomenit të Bifurkacionit, i cili për një kohë ka qenë i degraduar”. 

“Përmes Ministrisë së Planifikimit Hapësinor kemi përfituar një shumë simbolike të mjeteve, e cila ka mjaftuar për funksionalizimin e këtij fenomeni. Jemi në fazën e përgatitjes së planit detaj për rregullimin e shtratit të lumit Neredimja dhe dy degëve të Bifurkacionit, në mënyrë që të kemi një funksionim estetik dhe atraktiv për vizitorët”, ka bërë të ditur kryetari i komunës në një konferencë shtypi.

“Ky fenomen i Bifurkacionit, i pari në Evropë dhe i dyti në globin tokësor, përbën vlera të jashtëzakonshme për qytetarët e Ferizajt dhe vizitorët e ndryshëm vendës dhe ata të huaj”, është shprehur ai.

Lumi Nerodime njihet për derdhje në dy dete: përmes lumit Sitnica, pastaj  Ibrit i cili nga Kosova kalon në Serbi dhe vazhdon nëpër lumin Morava e pastaj lumin Danub duke kaluar edhe shtete tjera deri në Detin e Zi, dhe përmes lumit Lepenc në Kosovë që kalon në Maqedoni e më tej nëpër lumin Vardar duke kaluar edhe nëpër Greqi deri në Detin Egje. “Kjo ndarje, që në hidrologji quhet bifurkacion,  paraqet rastin e dytë në botë bashkë me atë të lumit Orinoko në Amerikën Latine. Bifurkacioni i lumit Nerodime për të parën herë përmendet në një dokument në vitin 1321”, është shkruar nga një grup autorësh në monografinë “Ferizaj me rrethinë”  botuar në vitit 1975.

Në dhjetor 2015, ministri i Mjedisit dhe Planifikimit Hapësinor, Ferid Agani, ka marrë vendim për vënien nën Mbrojtje Paraprake të Zonës së Bifurkacionit të Lumit Nerodime, si zonë potenciale për shpallje, Vlerë e Mbrojtur e Natyrës në kategorinë e Monumentit të Natyrës të Rëndësisë së Veçantë me sipërfaqe prej rreth 15 hektarëve.

Me këtë vendim Mbrojtja e Paraprake do të zgjas deri sa zona të shpallet e mbrojtur në kategorinë e Monumentit të Natyrës të Rëndësisë së Veçantë, por jo më gjatë se dy vite nga dita e nxjerrjes së këtij vendimi.

Gjatë periudhës sa do të zgjat statusi i Mbrojtjes Paraprake do të zbatohen dispozitat e Ligjit për mbrojtjen e natyrës dhe Zona do të gëzojë statusin e zonës së mbrojtur.
Në prill 2016, Ministria kosovare e Mjedisit dhe Planifikimit Hapësinor ka ndarë 25 mijë euro për punën fillestare të “Funksionalizimit të Bifurkacionit në Lumin Nerodime”, në komunën e Ferizajt.

Marrëveshja për bashkëfinancim të këtij projekti u nënshkrua nga ministri Ferid Agani dhe kryetari i Komunës së Ferizajt, Muharrem Svarqa. Ata theksuan se ishin dakorduar që me një shumë të vogël të parash të fillojnë realizimin e një projekti të madh në vlerë prej 5 milionë euro.

KONGRESI I PARTISE PER DREJTESI E INTEGRIM

by

*Idrizi: PDIU, faktor politik i rëndësishëm; Rama: Gara me mitet, prish fqinjësitë/

* Merr pjesë edhe Kryetari i Federatës Panshqiptare të Amerikvs “VATRA”, Dr. Gjon Buçaj/

TIRANË, 4 Qershor /Ka nisë sot në Tiranë Kongresi i Partisë Drejtësi e Integrim, e etiketuar si Partia e çameve, por qe i ka kaluar caqet e çamerisë.

PDIU është një faktor politik i rëndësishëm dhe i pashmangshëm, dhe ajo nuk është vetëm parti e çamëve, cilesoi në fjalën e mbajtur në Kongresin e kesaj partie, kryetari Shpëtim Idrizi. Ai tha se partia që ai drejton ka në themel të saj çështjen çame, por është një parti që shkon përtej kësaj çështje.

“Etiketimi i PDIU si partia e çamëve është vepër e analistëve të cekët dhe e ndonjë kancelarie fqinje nga padija ose ligësia”, u shpreh ai. Idrizi tha se nuk çështja çame nuk i takon vetëm çamëve, aq më pak vetëm një partie, por është një çështje që i takon të gjithë shqiptarëve.

Idrizi apeloi Ramën ti qëndrojë draftit të mbështetur dhe hartuar me asistencën e ndërkombëtrarëve dhe të mos e kthejë në çështje pazaresh mes dy partish, siç tha ai, ka ndodhur në të shkuarën.

“Ne jemi pa mëdyshje në favor të reformës në drejtësi, e dimë se është e ashpër, e papreçedent ndoshta dhe cënon konceptin klasik të sovranitetit. Por sa herë ne politikanët shqiptarë e kemi shkelur këtë koncept klasik në këtë 25 vjet. E dimë shumë mirë që është një zgjidhje ekstreme dhe sigurisht që do një zgjedhje ekstreme.Por dimë gjithashtu se nuk do të ishte nevoja për reformën në drejtësi nëse drejtësia jonë do të ishte në pozitatat e duhura, e pakontrolluar nga politika dhe krimi i organizuar.Ata që sot janë kundër saj janë për status-quonë, për kënetën në sistemin e drejtësisë, gjykata dhe prokurori. Ne si parti jemi kundër status-quosë, jemi pro këtij revolucioni të madh që kërkon me ngulm snhumica dërmuese e shqiptarëve dhe që është urgjencë kombëtare për gjithë shqiptarët. Zoti. Kryeminstër ju ditën e hënë keni lënë takim me kryetarin e opozitës. Unë do tu bëj një thirrje. Reforma në drejtësi nuk është çështje pazaresh midis jush por ajo duhet të zbatohet dhe të bëhet pjesë e gjithë politikës shqiptare, ashtu siç kemi mbështetjen dhe ashtu si e kanë dizajnuar partnerët tanë ndërkombëtarë, SHBA dhe BE. Jam i bindur zoti Kryeministër që ju do tu rrini këtyre linjave dhe të mos jetë një histori”, tha Idrizi.

Kryeministri  Rama: Gara me mitet, prish fqinjësitët

Kryeministri edi Rama i ftuar në Kongresin e Partisë për Drejtësi, Integrim dhe Unitet e ka vlerësuar këtë parti si kultivuese të fqinjësisë së mirë, përçuese e patriotizmit modern, për të cilin sipas tij ka sot nevojë Shqipëria.

“Gara me mitet nuk i ka sjellë kurrë asgjë të mirë fqinjësisë mes shteteve. Gara se kush është më i vjetri, se kush i ka më të mëdhenj heronjtë e së shkuarës, është një garë që i takon të shkuarës ndaj edhe këtë shëmbëlltyrë përbashkuese që ju keni krijuar nën degën kuptimplotë të degës së ullirit e shoh si shprehje të miqësisë, por edhe reciprocitet mes shqiptarëve dhe fqinjëve.

Vendit tonë i duhet një patriotizëm modern, që merr energji nga shqipatarët e ndarë në shumë territore dhe vende të botës, që merr jetë nga heqja e barrierave është patriotizëm i shëndetshëm për kohë tonë. PDIU nuk është parti që mbërthehet pas të shkuarës, vendi ka nevojë për një patriotizëm modern”, tha Rama.

Rama u ka kujtuar çamëve të PDIU se ishte i pari drejtues i një partie që e bëri zyrtarisht çështjen çame pjesë te programit të vet elektoral dhe i pari kryeministër i një qeveri që synon fqinjësinë e mirë mbi bazën e reciprocitetit të respektit.

“Mos prisni që nga ky kongres unë të hedh ndonjë rrufe drejt Greqisë, se nuk jemi në Olimp. Unë jam i pari drejtues i një partie që çështjen e çamëve e futi në programin e saj, dhe jam i pari drejtues i një qeverie që përballë fqinjëve është i vendosur të tregojë paanshmëri mbështetur tek reciprociteti në respekt. Marrëdhënien me Greqinë e kemi të lidhur pazgjidhshmërisht si për të na vënë përballë një prove. Çështja çame po faktorizohet, por shqisa e verbër po tretet, po forcohet shqisa e shembullit që duhet të na bëjë më të urtë, më të mençur”, tha Rama.

Në këtë kongres merr pjesë edhe Kryetari i Federatës Panshqiptare të Amerikvs “VATRA”, Dr. Gjon Buçaj, i cili edhe do të përshëndes në emër të Federatës dhe do të përcjellë qëndrimet e Vatrës për çështjen çame ne veçanti dhe çështjen Kombëtare në tërësi.

 

Reforma në drejtësi, zyrtarja e DASH, telefonoi Bashën e Berishën

by

Një komunikatë e orëve të mbrëmjes së të premtes, nga Ambasada e Shteteve të Bashkuara të Amerikës në Tiranë, ka bërë të ditur mbi një komunikim telefonik mes ndihmës-sekretares së Shtetit për Çështjet Europiane dhe të Euroazisë, Victoria Nuland, dhe kreut të Partisë Demokratike, Lulzim Basha. Sigurisht që në qendër të telefonatës ka qenë reforma në drejtësi, teksa Nuland ka nxitur udhëheqësin e opozitës për përparim në lidhje me miratimin e kësaj reforme. Victoria Nuland ka theksuar se krerët e partive politike duhet ta përdorin takimin e 6 qershorit mes Bashës dhe kryeministrit Rama, për të rënë dakord mbi miratimin e shpejtë të një reforme kuptimplotë dhe tërësore në drejtësi. Nuland nënvizoi gjithashtu se kjo reformë gëzon mbështetje të gjerë mes popullit shqiptar, ndërsa mbetet prioritet i lartë në marrëdhëniet mes SHBA-ve dhe Shqipërisë, por edhe për përparimin e Shqipërisë drejt Bashkimit Europian.Nga ana e tij, zoti Basha rikonformoi qëndrimin e Partisë Demokratike në mbështetje të formulës së vendeve të rezervuara të propozuar nga SHBA dhe BE që prej muajit shkurt 2016 për institucionet e reja të sistemit të drejtësisë, si dhe e njohu ndihmës-sekretaren e Shtetit me zgjidhjet e propozuara nga PD për thjeshtimin e arkitekturës së drejtësisë në funksion të moskapjes politike. Duke theksuar se korrupsioni në drejtësi është produkt dhe pasojë e korrupsionit politik, Basha nënvizoi vendosmërinë e opozitës për të garantuar kushtet për zgjedhje të lira dhe të ndershme dhe në veçanti për votimin biometrik dhe elektronik, si prioriteti kryesor i demokracisë shqiptare. Gjithashtu, Ndihmës/sekretarja e Shtetit ka zhvilluar edhe një bisedë me ish-kryeministrin dhe ish-kryetarin e Partisë Demokratike, Sali Berisha. Sipas asaj që mësohet nga Partia Demokratike, biseda ka patur si kryefjalë reformën në drejtësi. Nuland ka theksuar në bisedë rëndësinë e madhe të kësaj reforme për integrimin e Shqipërisë në Europe dhe shprehu vlerësimin e saj në përpjekjet e fundit të ambasadorëve të SHBA dhe BE për një kompromis midis palëve në ditët që vijnë. Në bisedën telefonike, Berisha ka theksuar se beson se një kompromis në rast se qeveria dëshiron reformën, është plotësisht i mundshëm. Sipas Berishës, kërkesa e opozitës për vende të rezervuara është një kërkesë anti-kapje, bazohet plotësisht në rekomandimet ndërkombëtare dhe Qeveria nuk ka asnjë arsye të mos e pranojë. Berisha thotë se thjeshtimi i arkitekturës së institucioneve të drejtësisë është plotësisht i mundshëm dhe se shpreson që palët do bien dakord për këtë. Në bisedë Berisha ka ngritur edhe atë që Lulzim Basha e quajti disa ditë më parë si “nëna e reformave”, reformën zgjedhore.“Kërkesa e opozitës për të votuar, së bashku me nenet e reformës në drejtësi, edhe nenin për votimin dixhital, biometrik, do të dëshmonte vullnetin e qeverisë për një proces zgjedhor transparent, jetik për vendin”, është shprehur ish-kryeministri.

 

KFOR-i DHE ORGANIZATAT E SIGURISË NË KOSOVË ME USHTRIM TË PËRBASHKËT

by

Prishtinë, 3 Qershor 2016 Njësitë manovruese të KFOR-it kanë planifikuar një ushtrim të përbashkët me pjesëtarë të Misionit Evropian të Sundimit të Ligjit (EULEX) dhe Organizatës së Sigurisë së Kosovës (OKS), përfshirë Policinë e Kosovës dhe Forcat e Sigurisë së Kosovës (FSK)
Në këtë edicion të parë të vitit 2016, ushtrimi “Shpata e Argjendtë” bazohet kryesisht në menaxhim të trazirave dhe migrimit në Kosovë sipas skenarit. 
Aktivitetet ishin kryer në disa lokacione të ndryshme gjeografike në mënyrë që të simulohen skenar të ndryshëm operacional. Në kampin “Pomozatin” dhe në “Vrellë” në zonat e trajnimeve, Forcat e Sigurisë së Kosovës zhvendosin një ekip të reagimit për të menaxhuar fluksin e imagjinuar të migrimit dhe për të ngritur kampin e pranimit, në bashkërendim të ngushtë me Grupin Luftues Shumëkombësh-Lindje për menaxhim të një krize të mundshme të migrimit. FSK-ja ishte paraqitur në kapacitet të marrjes me mbrojtjen e civilëve në kushte emergjente së bashku me njësitë e deminimit dhe kërkim shpëtimit. Këto ushtrime i kanë mundësuar FSK-së të rrisë aftësitë e tyre në përmbushjen e detyrave të tyre specifike në lidhje me funksionet e sigurisë me fokus në aftësitë e reagimit vendor në kriza. 
Në kapin “Villaggio Italia” trupat e KFOR-it dhe elementet e Policisë së Kosovës intervenauan në kontroll të turmave sipas skenarit, të shkaktuara nga demonstratat e dhunshme në rrethinën e një lokacioni fetar ku KFOR-i vepron si reagues i parë. Ky skenar i zhvilluar me kujdes ishte bazuar në eskalim të dhunës ku njësitet e KFOR-it kërkojnë përforcim nga PK-ja për të rivendosur ambientin e sigurtë dhe të qetë. 
Trajnimet dhe ushtrimet janë një rutinë e aktiviteteve ushtarake për trupat e KFOR-it. Në baza vjetore KFOR-i kryen ushtrime të tilla për t’u trajnuar dhe përmirësuar aftësitë e njësive të veta sipas skenarëve intensiv real.
Qëllimi i këtyre ushtrimeve periodike është që të ngritet aftësia e KFOR-it në mbajtje të gatishmërisë së trupave dhe përforcimin e fleksibilitetit operacional. Harmonizimi i teknikave, taktikave dhe procedurave në mes të policisë së Kosovës, EULEX-it, FSK-së dhe KFOR-it ishte objektivi fundamental i kësaj periudhe të ushtrimeve. 
Ushtrimet e KFOR-it sigurojnë ndërveprueshmëri me partnerët aktualë dhe potencialë si dhe për të kryer detyra të mundshme të misionit të komandës përfshirë rrejtet kompjuterike dhe ndërveprueshmërisë në komunikim. 
Ndërlidhja, komunikimi dhe ndihma e reaguesve të ndryshëm ishte pjesë kritike e ushtrimit dhe skenar të atypëratyshëm që kërkojnë bashkëpunim të përparuar në mes të të gjithë reaguesve, sidomos kur kemi të bëjmë me Procesin e Vendim-marrjes Ushtarake, përfundon komunikata e dërguar sonte nga KFOR. /b.j/