Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Andrea Smajlaj një i ri patriot i bashkohet Vatrës

by

Dielli

Andrea Smajlaj një i ri patriot i bashkohet Federatës Panshqiptare të Amerikës Vatra duke sjellur një energj të re në Vatër, një gjak të ri, mbi të gjitha një frymë patriotike dhe mallin për atdheun të një djali të largur që në moshën 3 vjeçare nga Shqipëria. Andrea Smajlaj vjen prej një familje shumë të nderuar patriotike nga Kelmendi i Malësisë së Madhe. Andrea punon në industrinë e shërbimeve në Manhattan dhe është një pjesëmarrës aktiv në jetën komunitare dhe aktivitetet patriotike në New York dhe më gjërë. Ai erdhi për të sjellë në Vatër eksperiencën e tij, energjinë dhe gatishmërinë për të shërbyer në çdo kohë në aktiviteet që ka Vatra për të mirën e kombit tonë. Andrea Smajlaj u prit nga kryetari i Vatrës z.Elmi Berisha i cili i shpjegoi me detaje profiling patriotik, kombëtar dhe diplomatik të Federatës  Vatra dhe rolin që ka pasur Vatra që nga themelimi e deri në ditët e sotme në dobi të çështjes shqiptare dhe të kombit shqiptar. Editori i Diellit Sokol Paja i shpjegoi z.Smajlaj historinë e gazetës Dielli si organ zyrtar i Vatrës që nga themelimi e deri në ditët e sotme. Vatra rritet dhe forcohet çdo ditë. z.Smajlaj u bëri thirrje edhe të rinjve e të rejave që ti bashkohen Vatrës në mbështetje të përmbushjes së misionit të saj patriotik. Andrea Smajlaj erdhi me gëzim në Vatër për t’iu bashkuar të rinjve e të rejave, patriotëve të tjerë shqiptarë me qëllim për të kontribuar në projektin kombëtar të nisur nga Noli, Konica e personalitetet më të larta të kombit shqiptar që kanë vepruar në Diasporën e Amerikës.  

Xhesika Shkorreti, një studente e shkëlqyer i bashkohet Vatrës

by

Dielli

Xhesika Shkorreti është anëtarja më e re e Federatës Panshqiptare të Amerikës Vatra. Ajo vjen prej një familje shumë të nderuar patriotike nga Kurbini. Xhesika është një studente e shkëlqyer e Hunter College në profilin “Computer Science and Business Administration”. Më herët ajo ka studiuar në Marble Hill School for International Studies dhe ka marrë diplomë të shkollës së mesme: “Advanced Regent Diploma”. Xhesika erdhi me gëzim në Vatër për t’iu bashkuar të rinjve e të rejave, patriotëve të tjerë shqiptarë me qëllim për të kontribuar në projektin që etërit e kombit dhe të diasporës nisën një shekull më parë në dobi të çështjes shqiptare dhe të kombit shqiptar. Xhesika Shkorreti u bëri thirrje edhe të rinjve patriotë shqiptarë që ti bashkohen Federatës Vatra me qëllim që diaspora të jetë e bashkuar, zëri shqiptar i unifikuar dhe kauza shqiptare të vazhdojë brez pas brezi. Të rinjtë dhe të rejat shqiptare janë ata që i japin frymë, shpirt dhe gjak të ri Vatrës. Vatra rritet dhe forcohet çdo ditë. Të rinjtë e kombit tonë që e duan atdheun, që angazhohen, janë garancia e jetëgjatësisë së identitetit, gjuhës, kulturës e trashëgimisë kombëtare shqiptare.

Shoqata “Duart e Hapura” festë për komunitetin shqiptar në ditën e bamirësisë

by

Nga Sokol Paja

Komuniteti shqiptar në Bronx dhe lagje të tjera të New Yorkut u mblodh për të festuar së bashku ditën e Bamirësisë, Festën e Shën Nënë Terezës dhe ditën e vullnetarëve. Shoqata Shqiptaro Amerikane “Albanian American Open Hand Association Inc (AAOHA) me drejtues Aleksander Nilaj kishte përgatitur një piknik në shenjë mirënjohjeje, vlerësimi dhe falënderimi për punën e shkëlqyer që vullnetarët dhe bamirësit kanë bërë gjatë kohës së pandemisë dhe jo vetëm. “Duhet të jem falenderues Zotit, shenjtores sonë Nënë Terezës dhe punës së palodhur që bashkëpunëtorët e mi si vullnetarët dhe bamirësit bëjnë çdo ditë. Falë punës dhe ndihmës së tyre ne mund të bëjmë gjëra të vogla me përkushtim e dashuri të madhe. Ky është viti i parë i këtij organizimi që do ta kthejmë në traditë pasi këta njerëz që shërbejnë e dhurojnë meritojnë festë, mirënjohje dhe respekt të pakufijshëm” u shpreh për Diellin e Vatrës z.Nilaj. Në këtë takim festiv historiani Bajram Doka për të gjithë pjesëmarrësit shpjegoi disa detaje historike të hartës dhe historisë së Shqipërisë. Në përgatitjen e ushqimeve, shërbimin dhe asortimente të tjera plotësuese kontribuoi familjarisht patrioti bamirës Toni Musaj. Festa vazhdoi deri në orët e pasdites duke shënuar një moment gëzimi mbresëlënës për të gjithë pjesëmarrësit.

Shoqata Atdhetare Kraja bashkoi patriotët shqiptarë në Yorktown, New York

by

Nga Sokol Paja

Shoqata Atdhetare Kraja bashkoi si një familje e vetme të gjithë shqiptarët e Krajës e patriotë të tjerë që jetojnë në New York. Kjo shoqatë është formuar që në vitin 1991 në New York, USA me synim mbajtjen gjallë të lidhjeve shpirtërore e tradicionale mes patriotëve krajanë që jetojnë në Amerikë dhe vendlindjes së tyre në Krajë. Ky ishte një piknik tradicional vjetor që organizohet me qëllim ruajtjen e traditave kombëtare, ruajtjen e identitetit kombëtar shqiptar, ruajtjen e gjuhës, forcimin e lidhjeve shpirtërore të patriotëve krajanë. Në këtë piknin të përvitshëm organizohen lojëra sportive, gatime tradicionale shqiptare, muzikë popullore shqiptare, promovohet identiteti shqiptar nëpërmjet botimeve të librave historikë, promovim i pikturave, punimeve të ndryshme nga anëtarët e shoqatës. Është një organizim mbarëfamiljar nga Shoqata Atdhetare Kraja ku secili nga patriotët gatuan diçka, sjell diçka, kryen një shërbim. Është një punë e shkëlqyer vëllazërisht, një model organizimi model dhe për organizatat e tjera. Shoqata Atdhetare Kraja ka marrë pjesë gjithmonë masivish në të gjitha aktivitetet patriotike si festa e Flamurit,, Pavarësia e Kosovës,, Parada Shqiptare dhe organizime të tjera atdhetare në New York, Uashington, New Jersey etj. Kjo shoqatë kryen një aktivitete bamirësie, patriotike dhe edukative në vendlindje duke promovuar talentet nëpërmjet dhënies së bursave për studentët. Shoqata Kraja çdo vit organizon festivalin e fëmijëve të titulluar “Tradita” ku këndohet, kërcehet dhe vallëzohet vetëm shqip. Kjo shoqatë loboi në Uashington te instancat qeveritare shqiptare dhe amerikane për hapjen e pikës së kufirit Zogaj-Skje në Shkodër. Për Diellin e Vatrës u shprehën Mirsad Kovaçi kryetari i Shoqatës Atdhetare Kraja, Hysen Kraja nënkryetari dhe ish kryetarët Hamid Alaj dhe Dul Perashi të cilët u deklaruan se ky aktivitet masiv do të vazhdojë në traditën e aktiviteteve patriotike që kjo shoqatë zhvillon prej tre dekadash. Shoqata Kraja mori pjesë në festimet për Nënë Terezën në Vatër dhe është një prej shoqatave më të organizuara dhe aktive në komunitetin shqiptar në New York.

Familja e Marjan Cubit organizoi festën e Shenjtores Nënë Tereza

by

Dielli

Marjan Cubi me familje organizoi për të katërtin vit me radhë festën e Nënë Terezës, një traditë familjare dhe fetare në nderim të Shenjtores shqiptare. Familjarë, vatranë dhe patriotë të dalluar e klerikë katolikë bashkohen çdo vit në shenjë nderimi dhe respekti për figurën e Nënë Terezës, shembullin e saj, shërbimin që i dha botës dhe mbi të gjitha përfaqësimin e vlerave më të larta të kombit shqiptar. Një festë sa fetare por edhe patriotike që familja Cubi organizon me fisnikëri e bujari çdo vit.

Ceremoninë festive e hapi Ilir Cubi i cili falenderoi të pranishmit dhe zbuloi detaje nga festa e përvitshme për Nënë Terezën.. Presidenti i Nderit të Vatrës z.Agim Rexhaj u shpreh se: “Marjan Cubi është punëtor, shqiptar me cilësi të mira, kontributor i madh për Shqipëri e Kosovë. Ilir Cubi është një djalë energjik, aktivist dhe patriot i angazhuar. Zoti e bekoftë familjen tuaj. Shëndet, mirësi e bujari për familjen tuaj të nderuar” uroi z.Rexhaj. Ish nënkryetari i Vatrës z.Asllan Bushati vlerësoi kontributin e Marjan Cubit ndër vite si një patriot e veprimtar. Dalip Greca Editori epokal i Diellit që e drejtoi Diellin e Vatrës për 12 vjet u ndal në cilësitë e Marjan Cubit si vatran, patriot e shqiptar i ndershëm. Nënkryetari i Vatrës Dr. Pashko Camaj solli përshëndetjet e patriotëve shqiptarë nga Kosova, Shqipëria e Mali i Zi. Marjan Cubi u shpreh për Diellin e Vatrës se këtë festë do e vazhdojë përgjithmonë duke e kthyer në një traditë shqiptare në vlerësim e respekt të shqiptares universale. Nënë Tereza bën çdo shqiptar krenar me përkatësinë e saj kombëtare, me atë që i ofroi botës, me dashurinë e saj, përkushtimin e saj, përshpirtshmërinë e saj, devotshmërinë e saj dhe thjeshtësinë e saj. Nënë Tereza bashkon vlerat shqiptare me vlerat më të larta universale.