Komunitet – Page 126 – Dielli

Në Zelandën e Re,Takim i përzemërt me Ambasador Dr. Hajdin Abazi

February 8, 2021 by dgreca

Nga Sabit ABDYLI/

Auckland, 7 shkurt 2021- Me iniciativën e Vesa Lumës me bashkëshortin e saj Geri Xhari në restoranti “Safran” me pronarë shqiptarë, komuniteti shqiptar në qytetin e Aucklandit e kaloi gjithë mbrëmjen në darkë të përbashkët me ambasadorin jo rezident të Republikës së Kosovës për Zelanden e Re Dr. Hajdin Abazin me bashkëshorten Fitoren i shoqëruar edhe nga konsulli i nderit për R. e Kosovës në Zelandën e Re Prof. Dr. Kenneth Jackson. Me ketë rast Ambasadori Hajdini u falënderua për pritjen dhe shprehu kënaqësinë që ndodhej në mesin e bashkëpatriotëve të tij nga të gjitha tokat shqiptare. U ndjeva krenar, vazhdoi ai, që me rastin e dorëzimit të letrave kredenciale në Wellington dëgjova fjalë të mira nga qeveritarët zelandez për Mërgatën shqiptare që në numër janë pak, më thanë ata, por punëtor e sjellje komfort ligjeve të vendit. Pastaj vazhdoi prajshëm Ambasadori Hajdin Abazi, poet e diplomat, që me krismat e para për liri në Kosovë lash Suedin ku isha me leje qëndrimi, lash poezinë, rroka armët jo se e doja luftën, por e doja lirinë e ekzistencën e popullit tim në trojet hon e dan të veta që kur mbiu lisi Në bashkëbisedim gjatë darkës u prekë gjeografia e historia shqiptare, diaspora e kontributi i saj, qëndresa dhe lufta që na u imponua në fund të shekullit XX, konsolidimi i shtetit të Kosovës, bashkëpunimi me diplomacitë e shteteve që na kanë njohur dhe dy shteteve tona shqiptare. Në ketë takim nuk munda të mos e pyesja Ambasadorin për fotografinë me diplomatin amerikan Richard Holbrooke 1941-2010 në Junik (24 qershor 1998), fotografi kjo që entuziazmoi shqiptarët për angazhimin e përkrahjen e administratës amerikane në zgjidhjen e çështjes shqiptare.Në ketë takim ishte edhe Konsulli i nderit Dr. Jacson për Republikën e Kosovës në Zelanden e Re, i cili në vitin 2016 ka punuar në një komision profesional në Parlamentin e Republikës së Kosovës për hartimin e raportit rreth industrisë së resurseve, minierave dhe ekonomisë dhe njohës i shkëlqyeshëm i situatës politike në Kosovë e përtej saj foli për marrëdhëniet e qëndrueshme e të ndërsjella mes Kosovës e Zelandës së Re. Qemajl Murati në emër të të pranishmëve shqiptaro-zelandez falënderoi Ambasadorin Abazi e Konsullin Jacson për punën e zellin e madh që po bëjnë në thellimin e bashkëpunimit në mes dy vendeve tona. Me ketë rast bëmë edhe fotografi.

NDËRROI JETË NË BOSTON LIRI (LILI) GJINISHI(KRAJA)

February 6, 2021 by dgreca

Me dhimbje njoftojmë komunitetin shqiptar në SHBA dhe në atdhe se të Premten me 5 shkurt 2021, ndërroi jetë në moshën 70 vjecare në Boston, Massachusetts, Liri(Lili) Gjinush(Kraja).

Familja ka njoftuar komunitetin se pret ngushëllime të Martën me datë 9 Shkurt 2021, në orën 4-7 pasdite në Shtëpinë Mortore -Buonfiglio Funeral Home.

Ceremonia e varrimit, bëhet ditën e Mërkurë me 10 Shkurt 2021në orën 10.00 paradite në varrezat që ndodhen në Winthrop, Boston MA. Për shkak të koronavirusit ceremonia do të jetë private.

Liri (Kraja) Gjinishi u lind me 23 gusht 1950. Bashkë me familjen emigroi në Shtetet e Bashkuara dhe u vendosën në Winthrop, Massachusetts.

Lili la në pikëllim bashkëshortin Sami Gjinishi,fëmijët; Edlirin, Eltona (Gjinishi) Musaku, dhe Anisa Gjinishi, la nipërit dhe mbesën e saj të dashur Uajda Musaku, Brandon Musaku, Erin Gjinishi; si dhe vëllezërit e saj të dashur me familjet e tyre Skënder dhe Përparim Kraja dhe motrën Natasha Sinani me familje.

Lajmi ka pikëllërua jo vetëm familjen por të gjithë komunitetin, vecanërisht komunitetin lushnjar. Lili ishte një zonjë fisnike e dashur dhe shumë e sjellshme.

U përcjellim ngushëllimet tona të sinqerta familjes, bashkëshortit Sami Gjinishi, vajzave dhe djalit, nipërve e mbesës. Ngushëllime u përcjellim edhe vëllezërve Skënder e Petrit Kraja, motrës Natasha Sinani me familjet e tyre.

Pushoftë në Paqë shpirti i Lilit!(Dielli)

Aktivistja Lindita Semanjaku vizitoi Vatrën

January 29, 2021 by dgreca

Aktivistja e të drejtave të njeriut Lindita Semanjaku vizitoi Federatën Panshqiptare të Amerikës Vatra në mesditën e së Premtes, 29 Janar 2021. Ajo u mirëprit nga kryetari i degës së Vatrës Hudson Valley dhe anëtar i Këshillit të Vatrës z.Simon Qafa, Editori i gazetës Dielli z.Dalip Greca dhe gazetari Sokol Paja. Semanjaku u shpreh shumë e gëzuar për mundësinë që iu dha për ta njohur më nga afër historinë e Federatës më të vjetër në historinë e organizatave e shoqatave shqiptare që veprojnë në diasporën shqiptare. K/redaktori i Diellit, i shpjegoi me detaje procesin historik në të cilin ka kaluar Federata Vatra dhe gazeta e Vatrës Dielli. Z.Greca i parashtroi etapat historike të shtetit shqiptar dhe rolin patriotik e diplomatik që ka luajtur Vatra në dobi të çështjes kombëtare. Po ashtu ai tregoi për funksionimin e sotëm të Vatrës dhe rolin e saj ne ceshtjen Kombëtare. Z.Greca i bëri të njohur aktivistes Semanjaku rreth projektit të botimit të historisë së Vatrës në dokumentat arkivore, një studim shkencor në pesë vëllime që vjen i kryesuar nga Akademik Beqir Meta.(SP)

Lamtumirë duararta Lida Grabocka Jonif

January 23, 2021 by dgreca

Nga Keze Kozeta Zylo/Është ndarë nga jeta bashkatdhetarja jonë e dashur në Diasporë Lida Grabocka Jonif.

Lida Grabocka Jonif jetonte në Brooklyn bashkë me bashkëshortin e saj dhe vajzën Migenën.

Siç e kam thënë dhe më parë, kurrë në jetën time nuk kam dhënë kaq shumë lamtumirë, si brenda këtij viti të tmerrshëm dhe gllabërues.

Fatkeqësia në këtë familje është nga ato të rrallat, pasi para shtatë muajsh i iku djali i vetëm Daniel Jonif. Dhe kur e dëgjon të tronditet shpirti dhe zemra që për shtatë muaj ikën nënë e bir në qiell. Dhimbja e parakohshme dhe me një vdekje akute të djalit në një spital në Brooklyn ishte një hata e madhe. Mesa duket zemra e nënës nuk e duroi dot ikjen e tij, zemra e saj lëngoi aq shumë sa brenda kësaj periudhe tragjike ikën të dy. Lida iku në moshën 61 vjecare në kohën kur kishte shumë mundësi t’i jepte familjes së saj të shtrenjtëe e të dashur.

E ndjera Lida erdhi me bashkim familjar pasi gjyshi nga nëna e saj kishte emigruar herët në Amerikë.

Naum (Nuçi) Melo është veteran i Luftës në Amerikë dhe ajo ndihej shumë krenare për këtë, pasi në se vertetëe do Lirinë duhet të falënderosh veteranët. Ajo ndihej me fat që i mori dokumentet nga gjyshi dhe po ëndërronte për një jetë më të bukur dhe më të mirë. Por fati e ndërpreu jetën e birit të saj në mes bashkë me të.

Ishja shumë e shokuar kur pashë statuset e dy motrave të mrekullueshme të të ndjerës Lida, Mirandës dhe Anidës si dhe të bijës së vetme Migenës të cilat lajmëronin për vdekjen e motrës së tyre. Vajtimi i tyre në telefon ishte përpirës, i dhimbshëm, sidomos në këte kohë izolimi që nuk ke mundësi t’ju shkosh pranë, t’i përqafosh dhe t’i ngushëllosh siç e do zakoni i shqiptarit, por pandemia është si rojet e burgut, s’të jep leje…

Danieli djali qe iku në qiell punonte në një shtypshkronjë në Queens dhe ishte integruar shumë mirë, por Zoti e donte në krahët e tij këtë djalë të edukuar dhe simpatik.

Lida ishte një mjeshtre në rrobaqepësi si në Korçë ku punoi një jetë të tërë, por dhe këtu në Amerikë. Ajo me duartë e arta, priste dhe qepte rroba të ndryshme, ajo bënte art me gjilpërë. Lida merrte pjesë në shumë aktivitete dhe ne ndiheshim shumë mirë kur i shikonim bashkë këto tri motra të pandara. Në çdo aktivitet që merrnin pjesë, e pamundur të mos e shikoje Lidën me një buqetë lulesh të freskëta duke na i dhuruar në shenjë mirënjohjeje.

Ajo kishte një qetësi kur fliste, kishte të folur të shtruar dhe nxirrte veç mjaltë nga goja. Dhimbja e ikjes së djalit e helmoi, e treti gjersa e mori aq shpejt gojëmblën Lida.

Familja humbi bashkëshorten dhe mamanë e mrekullueshme, motrën e dashur, ndërsa Diaspora në Amerikë një bashkatdhetare më pak.

Nesër do t’i bëhet ceremonia mortore në Dahill Funeral Services, shërbesa fetare në St. Nicholas Greek Orthodox Church dhe varrimi në Ocean View Cemetery, Staten Island atje ku ka birin e vet.

Dritë të pastë shpirti dhe të qofte i lehtë dheu i Amerikës që e deshe aq shumë Lida!

Lamtumirë duararta Lida Grabocka Jonif!

21 Janar, 2021

Staten Island, New York

POETI LUIGJ ÇEKAJ NDËRROI JETË NË NJU JORK

January 5, 2021 by dgreca

Familja Cekaj në Nju York njoftoi se ka pushuar së rrahuri zemra e njeriut të tyre të dashur Luigj Cekaj. Poeti ynë i talentuar shkoi të pushoi!

Vatra dhe Dielli i përcjellin ngushëllimet më të thella familjes, miqëve, dhe gjithë të dashurëve të Luigjit.

Në vend të homazhit zgjodhëm nga arkivi i Diellit një poezi të Luigjit kushtuar Shkodrës, që ai e deshi me shpirt.

Pusho në Paqe poeti ynë i dashur !

LUIGJ CEKAJ

SHKODRA I MJAFTON VETEVETES

Shkodra është një qytet,

Që sikur “I mjafton vetvetes”…

Shkruante dikur historian anglez Edward Gibson,

Tek një kryevepër historike.

Ndërsa pushtetarët e sotëm,

Si për t’i shërbyer deri në mbarim së keqes,

Buzë liqenit të këtij qyteti

Sikur dhe paraflasin

Duan të ngrejnë agregate atomike!

A thua se qyteti; ashtu “sikur i mjaftonte vetvetes”?!

Nuk i dilnin, madje i stërtepronin

Edhe hallet e veta aq sa duhej…?

Duke pasur parasysh se po të shpërthenin rezervuarët

E lumit të rrëmbyshëm të Drinit,

Apo, larg qoftë, sikur të thyhej diga e Vaut të Dejës,

Shkodra do të mbytej deri në katin e tretë të Hotel Turizmit…

Pastaj, të gjitha këto, si punë shkuesish homoseksuale,

Sikur nuk ndodhin krej rastësisht..!

Në të kundërt ngjajnë, kur Migjeni s’jeton më, as si poet dhe as si shejt!

Veçse zëri i tij, edhe prej varrit, sikur na kujton kohën, kur egërsisht

Të gjithë fëmijët e shqiptarëve, si për t’u mësuar me luftrat

Tek të “Korrat e Migjenit”:

“Oh, oh, psherëtinin qosheve, gati si shpirtra të vdekur…

Se tash kena me u msue edhe me hangër hekur…”

***

Oh, oh, sikur rimallkojnë prapë shtetin,

Të gjithë vogëlushët, pa përjashtim të shkodranëve!

Teksa dëgjojnë gjithëfarë lloj- lajm-shpifjesh si të tjera botshme

Tashmë edhe në kohë moderne,

Kur krejt si Çernobilasit e Majakovskëve,

Ne do të mësohemi që ashtu si me hekur,

Të ushqehemi edhe me energji bërthamore!

Para shumë vitesh, si të avulluara, Shkodra,

Si e ngrime akull prej dëborës,

Ndëgjonte si në heshtje edhe këtë vendim

të Komitet-Qendrorëve!

Se këtej e tutje, njerëzit, ashtu si dhe kuajt,

Do t’i përviheshin vetëm kullotjes së barit!

Dhe tamam në dimrin e shumë uritur të ’85-ës,

Vetë, si një lypës ordiner, qëndroja në Serreq tek radha e bukës.

Pothuajse fytyrë për fytyrë me zotin Xhenarin Topallin…

Por edhe kjo krizë tepër e rëndë , dhe si e nënkuptuar ndryshe,

Edhe si një fund dështimi i të gjitha manovrave politike;

Sikur kaloi pa bujë e zhurmë, ashtu si kalohej në heshtje edhe kufiri, kur ikje…

Dhe shkodranë-malësorët e irrituar, si kurrë më parë prej krimesh,

Iknin, porse gjaku i tyre Ilir, si i kthyem në ujë prej dhimbjeve,

Sa herë vinte vera te plazhi i vjetër i Shirokës,

dukej sikur valevinte…

Mandej prapë edhe më vonë, edhe në kohra të tjera, si më e serta,

Kur kryeqytetin e veriut shqiptar, sikur e zuri gripi i qeverive,

Dhe pushtetin, si Makbethë të rinj, e uzurpuan ish bijtë e komunistëve –

Të cilët në çast veshën dorza si të errëta ambasadorësh ,

Bile edhe u vetëzgjodhën si ministra…

Si për t’i maskuar fytyrat me portrete njerëzish të ndershëm dhe të pafajshëm.

Si kryetare e Parlamentit shqiptar fatmirësisht qëlloi që zgjodhën Xhozefina Topallin.

Tashti sikur dihet mirë, se për ne shqiptarët, si xhentëlmenë dhe…

Si mikpritës,

As një vdekje më të turpshmë nuk ka ,

Se kur të zotëve të shtëpisë u mungon deri edhe buka e krypa te bufeja,

Si për të pritur bujarisht tek sofra miqët …

Por edhe kjo si kryetradita jonë më e bukur prej atyre u minua,

Sepse te vendi i saj buzë banketit, si për të hëngër krena njerëzish

Sikur u parashfaqën frikshëm dhëmbët e centraleve atomike.

Dhe në fund, si për shqyrtim dhe si për të vënë sipër një kapak arkivoli i të gjithë çështjes…!

Të gjitha këto si mashtrim- hile në emrin e qytetit tim i denoncoj tek Amerika

Dhe pasi të bëj një protestë me shkrim, edhe tek presidenti im, Barak Obama,

Urgjentisht do të kërkoj edhe si një pikëmbështetje të dytë tek NATO-ja ,

Si tek një pakt tashmë edhe i yni, që sikur u përket të dy det-Oqean,

… Atlantikut dhe Adriatikut…

Por nëqoftëse kërkesa ime, do të rispiunohet prej ”zonjës Europë” si anashjuridike …..

Vetëm që të shpëtoj Shkodrën time, si prej atom-shpërthimeve më agresive,

Do t’u bie në gjunj deri edhe shovinistëve…

Nju Jork, maj 2009