Anija Zbarkuese e Flotës greke L173-501 {HNC CHIOS}, viziton portin e Durrësit/

Nga Shefqet Kërcelli/

Në kuadër të bashkëpunimit dypalësh midis Forcave të Armatosura të RSH dhe atyre të Republikës së Greqisë për vitin 2016, nga data 9 deri më 11 gusht, po zhvillon një vizitë portuale  në Durrës, anija zbarkuese e Flotës Greke, L173-501{HNS CHIOS}. Qëllimi i kësaj vizite është njohja e marinarëve të rinj të shkollës greke me bregdetin dhe qytetin e Durrësit si dhe zhvillimi i stërvitjes “PASSEX” me anije të Forcës Detare Shqiptare. Mëngjesin e datës 9 gusht, anija greke u prit në ujërat tona territoriale nga anija jone patrulluese “ARCHANGEL-04” me Komandant KapitenLejtnant Alket Cullaj dhe më pas në molin 4 të Portit,  nga kuadro të Forcës Detare, Kapitanerisë së Portit Durrës dhe Autoritetit Portual. Pilotimi i anijes ushtarake greke u bë nga Kapiten Lulëzim Hate. Në vijim të programit, Komandanti i anijes HNS CHIOS, Commander V. Chalatsis i shoqëruar nga Lieutenant Commander A. Tselepis H.N, zhvilluan një vizitë në Komandën e Forcës Detare, ku u pritën nga Komandanti i FD, Gjeneralmajor Ylber Dogjani, Zv.Komandanti, Kapiten i Rangut të I-rë Subi Zenelaj dhe Shefi i Shtabit i FD, Kapiten i Rangut të II-të, Arsen Mullaj. Fillimisht Gjeneralmajor Dogjani i uroi mirëseardhjen në vendin tonë  Kapiten Chalatsis dhe qëndrim sa më të këndshëm në Durrës, bashkë me ekuipazhin e HNS CHIOS. Gjatë takimit u shkëmbyen mendime për nivelin e fushat e bashkëpunimit midis dy flotave tona si dhe zhvillimin e tyre në të ardhmen, ku patrullimi i anijeve tona në Egje do shtojë dukshëm këtë bashkëpunim. Gjithashtu u trajtuan cështje të arësimimit e kualifikimit të detarëve, zbatimi i standarteve të NATO-s gjatë stërvitjeve e trajnimeve të ndryshme dhe procedurat që do zbatohen gjatë stërvitjes “PASSEX” midis anijes greke dhe grupit të II-të Patrullues të Forcës Detare. Më pas ushtarakët grekë zhvilluan një vizitë në Bashkinë e Durrësit ku u pritën nga Nënkryetari i kësaj bashkie Arbër Braho dhe zyrtarë kryesorë. Zoti Braho prezantoi rolin e turizmit e transportit detar e tokësor të qytetit të Durrësit dhe perspektivën e zhvillimit të tyre në të ardhmen. Po ashtu u nënvizua bashkëpunimi midis qytetarëve të dy vendeve, ku vecohet bashkëpunimi me bashkinë e Selanikut, shprehje e të cilit është fakti se, një shesh në Durrës, është emërtuar “Sheshi i Selanikut”. Ndërkohë kryetari i Bashkisë së Selanikut si mik i shqiptarëve është shpallur Qytetar Nderi i Durrësit. Ushtarakët grekë u interesuan për vendet e objektet që mund te vizitojnë marinarët grekë gjatë tre ditëve të qëndrimit në Durrës. Në vijim të takimeve të planëzuara në program, drejtuesit e anijes greke zhvilluan një takim dhe në Prefekturën e Durrësit, ku u pritën nga prefekti Roland Xhelilaj dhe stafi i tij. Zoti Xhelilaj vlerësoi vizitën e anijes greke si shprehje të frymës së miqësisë midis dy popujve e dy shteteve tanë,.ku bashkëpunimi ushtarak në kuadrin e NATO-s ka rëndësi të vecantë. Këtyre mardhënieve i paraprijnë marrdhëniet e vendosura midis qytetarëve të dy vendeve në këto vite, të cilat nxisin konsolidimin në plan shtetëror në të ardhmen,  theksoi zoti Xhelilaj. Gjatë takimit, Kapiten Chalatsis sqaroi të dhënat dhe qëllimin e vizitës së anijes që drejton, pjesë e të cilës është dhe njohja me bregdetin, bukuritë dhe traditat e vendit tonë nga kadetët detarë. Gjatë takimeve të zhvilluara u shkëmbyen dhurata simbolike, ndërsa kapiten Chalatsis falenderoi autoritetet ushtarake dhe civile shqiptare për pritjen e organizuar dhe i ftoi ata të vizitojnë anijen bashkë me zyrtarët e institucioneve që drejtojnë. Anija do e jetë e vizitueshme për qytetarët durrsakë në orare të caktuara. Në program është parashikuar vizita e kadetëve detarë grekë në objektet muzealë, historikë e kulturorë të qytetit të Durrësit dhe Krujës. Mbas zhvillimit të stërvitjes “PASSEX” me anije të Forcës Detare, anija zbarkuese L173, {HNS CHIOS”, më datën 11 gusht do largohet nga porti i Durrësit.