Koha për një fitore të re të humanizmit liberal mbi fanatizmin e dhunshëm

June 2, 2016 by dgreca

-Kryetari i Kuvendit të Republikës, Kadri Veseli: Kosova mbetet e përkushtuar, me tërë qenien e saj, në luftën kundër ekstremizmit të dhunshëm. Ne kemi pasur rezultate të prekshme në këtë drejtim dhe aleatët tanë na janë falënderuar për këto rezultate/

-Çmimi i Kosovës për Dialog Ndërfetar për Monsignor Vincenzo Paglia, themelues i Komunitetit të Sant’Egidio dh kryetarin e Londrës Sadik Khan/

-Në Prishtinë përmbyllet Konferenca Ndërkombëtare Ndërfetare “Interfaith Kosovo”/

PRISHTINË, 2 Qershor 2016-B.Jashari/ Është koha për një fitore të re të humanizmit liberal mbi fanatizmin e dhunshëm, tha kryetari i Kuvendit të Republikës së Kosovës, Kadri Veseli, sot në Konferencën Ndërkombëtare Ndërfetare “Interfaith Kosovo”, e cila u përmbyll pasi gjatë tre ditëve u mbajt në Prishtinë. Kryeparlamentari kosovar ndau Çmimin e Kosovës për Dialog Ndërfetar për themeluesin i Komunitetit të Sant’Egidios, Monsignor Vincenzo Paglia. Me këtë çmim u nderua edhe kryetari i Londrës, Sadiq Khan.

Në fjalën para të pranishmëve, kryetari Veseli shkoqiti aspekte të kulturës fetare në Kosovë, e cila, siç tha kreu i Kuvendit, është një vend i vogël, por ka pasur fatin historik të trashëgojë një traditë të madhe e të fuqishme, atë të mirëkuptimit dhe bashkëjetesës mes feve të ndryshme.

“Historia jonë është historia e një territori, ku përgjatë shekujve, janë ndeshur perandoritë e ndryshme të lindjes e perëndimit. Është historia e një territori ku janë takuar kulturat dhe religjionet e ndryshme dhe kështu i kanë dhënë jetë pasurisë kulturore që ka sot rajoni ynë. Sot, vendi ynë mburret me faktin se është pjesë e kësaj pasurie”, theksoi kryetari Veseli.

Ai shtoi se, shekuj me herët, kur në vendet tona ballkanike po takohej krishterimi me islamin, “populli ynë krijoi individin multireligjioz, me të cilin zë fill tradita jonë e mirëkuptimit dhe bashkëjetesës religjioze, dhe pamja e bukur tradicionale e qyteteve tona ku kishat, xhamitë dhe sinagogat i kanë bërë hije njëra-tjetrës”.

“Ne jemi krenarë me këtë traditë dhe e ndjejmë veten të lumtur se shpirti i kësaj tradite është në përputhje me vizionin që kemi sot për vendin tonë – vizionin e integrimit në Bashkimin Evropian. Ne jemi plotësisht të përkushtuar në përmbushjen e këtij vizioni dhe ndihemi të lumtur se nuk kemi asnjë vizion tjetër alternativ për të ardhmen tonë”, theksoi kryeparlamentari Kosovar, Veseli.

Duke folur për disa tendenca për ta paraqitur Kosovën si një tokë pjellore për radikalizmin fetar, Veseli tha se ky është një perceptim i pavërtetë, sipërfaqësor dhe gjithsesi i përkohshëm. Ai e konsideroi të padrejtë dhe të pamoralshme që të gjykohet për një vend, duke marrë për bazë veprimet e një grupi të vogël individësh.

“Republika e Kosovës mbetet e përkushtuar, me tërë qenien e saj, në luftën kundër ekstremizmit të dhunshëm. Ne kemi pasur rezultate të prekshme në këtë drejtim dhe aleatët tanë na janë falënderuar për këto rezultate. Ne jemi të sigurtë ne fitoren kundër tendencave të ekstremizmit të dhunshëm”, potencoi kreu i Kuvendit.

Duke folur për kërcënimet i cili po i bëhet thelbit humanist të religjionit në botë nga grupe të ndryshme ekstremiste, Veseli tha se ashtu si qëllimet e tyre, edhe vizioni i tyre është i errët.

“Është koha, që brenda traditave tona të ndryshme kulturore e fetare, të rizbulojmë burimet e mirëkuptimit dhe solidaritetit me njeri-tjetrin. Është koha t’u tregojmë ekstremistëve se religjionet janë vlerë e jona, e jo instrument i tyre. Religjioni është tepër i rëndësishëm për ta lënë në duart e tyre. Është koha për një fitore të re të humanizmit liberal mbi fanatizmin e dhunshëm. Vetë kjo konferencë, me një pjesëmarrje kaq globale, me emra të nderuar të dijes e humanizmit, është në funksion të këtij qëllimi të përbashkët”, tha kryetari i Kuvendit të Kosovës, Veseli.

Në Prishtinë, në pasditën e 31 majit, nisi një ndër takimet më të mëdha të dialogut ndërfetar në Evropë, ku marrin pjesë më shumë se 300 pjesëmarrës nga 50 shtete të botës, përfshirë edhe shumë sosh që nuk e kanë njohur pavarësinë e Kosovës. Ata u mblodhën për tre ditë për të diskutuar rolin e gruas në luftimin e ekstremizmit. Në Prishtinë kanë mberritur edhe Nobelistët e paqes Shirin Ebadi (Iran) dhe Tawakkol Karman (Jemen).

Prishtina për herë të pestë ishte mikpritëse e këtij takimi të madh, të titulluar Interfaith Kosovo. Në këtë konferencë sivjet kishte shumë pjesëmarrës, përfshirë edhe liderë fetarë nga Argjentina, Jemeni, Amerika, Kuba, Tajlanda, Nigjeria, dhe mbi 45 shtete tjera nga mbarë rruzulli tokësor.

Konferenca titullohej “Roli i Gruas në Promovimin e dialogut Ndërfetar dhe luftimin e ekstremizmit” dhe është organizuar nga disa organizata që promovojnë dialogun si Instituti Ndërkombëtar për Dialog Ndërfetar, Tony Blair Faith Foundation, ndërsa mbështetës janë Ministria e Punëve të Jashtme, Kuvendi i Kosovës, Ambasada Amerikane, Ambasada Kanadeze, Ambasada Norvegjeze si dhe Organizata e Kombeve të Bashkuara.

Pjesëmarrësit ishin në panele të ndryshme që i dedikohen temave që kanë të bëjnë me familjen, rolin e gruas, pastaj gjuhën e urrejtjes në rrjete sociale. Konferenca Interfaith Kosovo sivjet ndau edhe Çmimin e Kosovës për Dialog Ndërfetar.

Në Prishtinë mbahet Konferenca e 21-të e EPSO-s

June 2, 2016 by dgreca

-Ministri i Shëndetësisë i qeverisë kosovare, Imet Rrahmani, vlerësoi shumë faktin që EPSO – Partneriteti Evropian për Organizatat Mbikëqyrëse në Shërbimet Shëndetësore dhe Kujdesin Social ka zgjedhur Kosovën për ta mbajtur një konferencë të tillë/

PRISHTINË, 2 Qershor 2016/ Në Prishtinë sot dhe nesër mbahet Konferenca e 21-të e EPSO-s (European Partnership for Supervisory Organization in Health Services and Social Care), organizuar edhe nga Ministria e Shëndetësisë e Kosovës-Inspektorati Shëndetësor.

Konferenca nisi me një ceremoni dhe fjalën e hapjes të ministrit të Shëndetësisë të qeverisë kosovare, Imet Rrahmani, i cili e vlerësoi shumë faktin që EPSO – Partneriteti Evropian për Organizatat Mbikëqyrëse në Shërbimet Shëndetësore dhe Kujdesin Social ka zgjedhur Kosovën për ta mbajtur një konferencë të tillë.

Mbështetja e organizatave që mbikëqyrin shërbimet shëndetësore, tha ai, ka rëndësi të veçantë kur po e thellojmë reformën shëndetësore, sidomos në Kosovë, ku ka numër të madh të institucioneve shëndetësore të cilat duhet të mbikëqyren.

“Inspektorati Shëndetësor po e bën të pamundurën që të jetë në nivel të detyrës dhe janë shënuar rezultatet inkurajuese përkundër resurseve të kufizuara”, theksoi Ministri Rrahmani, duke shtuar se mbikëqyrja është element që duhet të instalohet në çdo kohë.

Ai tha se Ministria e Shëndetësisë po mundohet që edhe përmes formave të ndryshme të bashkëpunimit midis Inspektoratit Shëndetësor të Kosovës me organizatat si motra jashtë vendit të rris nivelin e punës dhe kapacitetet e Inspektoratit. “Inspektorati është dora e djathtë e Ministrisë…”, tha Ministri.

Një prezantim lidhur me karakteristikat e përgjithshme të Kosovës, në veçanti ato të sistemit shëndetësor dhe niveleve të kujdesit të tij e ka prezantuar Kryeinspektorja Ardita Baraku, ndërsa më pastaj ekspertë të fushës së mbikëqyrjes së shërbimeve shëndetësore dhe kujdesit social nga Shqipëri, Danimarka, Mbretëria e Bashkuar, Finlanda, Estonia, Norvegjia, Sllovenia, Suedia, Skocia, Uellsi, Bullgaria dhe shteti mikpritës, Kosova, kanë vijuar me punime në grupe dhe diskutime interaktive për temat që lidhen me mbikëqyrjen dhe monitorimin e institucioneve shëndetësore dhe të kujdesit social, e-shëndetësinë, normat dhe standardet e saj, e-shëndetësinë e telemjekësinë dhe tema të tjera të fushave përkatëse.

Konferenca do t’i vazhdojë punimet edhe ditën e premte./b.j/

Kosovë-Në Gjakovë nis Java Olimpike

May 31, 2016 by dgreca

-Gara të fëmijëve në disa sporte. Kjo ngjarje vjen menjëherë pas Ditës Olimpike që u shënua me 27 maj në Prishtinë/ Gjakovë, 31 Maj 2016/ Ka nisur në Gjakovë ‘Java Olimpike’ për fëmijë, një aktiviteti ky i karakterit edukativo – sportiv që bashkë organizohet nga Komiteti Olimpik i Kosovës dhe Komuna e Gjakovës. Kjo ngjarje vjen menjëherë pas Ditës Olimpike që u shënua me 27 maj në Prishtinë.

Në ceremoninë e hapjes së këtij aktiviteti ka marrë pjesë edhe kryetarja e komunës së Gjakovës Mimoza Kusari – Lila, e cila para nxënësve ka potencuar rëndësinë e edukimit dhe aktivizimit sportiv që nga mosha e re, një garanci kjo për një jetë të shëndosh.

“Ne si komunë jemi tejet të kënaqur që për herë të parë kemi arritur ta sjellim në Gjakovës një aktivitet të tillë, i cili lirisht mund të them, se e ka një rëndësi të madhe, pasi sporti ndikon drejtpërdrejt në shëndetin e njeriut. Jemi të kënaqur gjithashtu që ky aktivitet po mbahet në Gjakovë në një vit të rëndësishëm për sportin kosovar, pasi për herë të parë sportistët kosovarë kanë mundësi që të marrin pjesë në garat olimpike ndërkombëtare”, ka thënë kryetarja Kusari – Lila.

Ajo ka nxitur fëmijët që të merren me sport dhe të ushtrojnë në vazhdimësi, pasi vetëm ushtrimi i vazhdueshëm dërgon drejtë një ëndrre të madhe siç është ëndrra e çdo fëmije që të bëhet një kampion i madh në sportin e tij të preferuar.

Java Olimpike e cila ka nisur dje do të mbyllet të premten, ndërsa fëmijët pjesëmarrës do të mësojnë por edhe do të garojnë në disa sporte, përfshirë këtu atletikën, futbollin, basketbollin, volejbollin, çiklizmin, bjeshkatarinë dhe orientimin në natyrë, notin, xhudon, ping – pongun, gjimnastikën e të tjera.

Gjatë këtyre aktiviteteve para nxënësve do të prezantohen figura të shquara të sportit kosovar, të cilët do të flasin për përvojat e tyre nëpër garat sportive.

Axhenda javore:

E martë 31 maj 2016
10:00 Gara në çiklizëm
10:00 Gara në bjeshkatari dhe orientim në natyrë
Lokacioni: Shkugëz

E merkurë 1 qershor
10.00 Kuiz sportiv
Lokacioni: Shkolla e Muzikës “Prenk Jakova”

12:00 Garat në vrapim
Lokacioni “Qendra e Qytetit – Rruga “UÇK”

Ora 15:00 Garat në basketboll
Lokacioni i Shkollës Fillore “Zekeria Rexha”

Ora 15:00 Garat në volejboll
Lokacioni: Shkolla Fillore “Zekeri Rexha”

E Enjte 02 qershor

Ora10:00 Garat në futboll
Lokacioni: Stadiumi prapa Pallatit të Sporteve

Ora 10.00 Garat në Tenis
Lokacioni: Fusha e Tenisit në Gjimnazin “Hajdar Dushi”

E premte 03 qershor
Ora 10:00 Garat ne not
Lokacioni: Pishina “Nertili”

Ora 10:00 Garat në Ping Pong
Lokacioni: Pallati i Sporteve “Shani Nushi”

Ora 14:00
Garat në Xhudo
Prezentim i Majlinda Kelmendit
Lokacioni: Sheshi “Ali Podrimja”/b.j/

DEKLARATA E NATO-s NGA TIRANA: Forcim i Mbrojtjes Kolektive

May 30, 2016 by dgreca

Asambleja e NATO-s mbyll punimet në Tiranë me miratimin unanim të një deklarate/

TIRANË, 30 Maj/ATSH/.- Sesioni pranveror i Asamblesë Parlamentare të NATO-s mbylli të hënën punimet në Tiranë me miratimin me unanimitet të një deklarate të përbashkët, e titulluar “Një Axhendë e përbashkët dhe Rezolutë për NATO-n në Samitin e Varshavës”.

Deklarata, e miratuar dhe me amendamentet e propozuara nga anëtarët e AP-së, kërkon nga krerët e Aleancës të forcojnë mbrojtjen kolektive dhe parandaluese, të zhvillojnë një strategji gjithëpërfshirëse për promovimin e stabilitetit në Afrikën e Veriut dhe Lindjen e Mesme, të sigurojnë se të gjithë aleatët do të përmbushin objektivat e shpenzimeve ushtarake, si dhe të nxisin bashkëpunimin me Bashkimin Evropian.

Deklarata e konsideron shumë të rëndësishëm ‘bashkimin dhe vendosmërinë’ e vendeve anëtare të NATO-s në luftën kundër terrorizmit dhe në marrëdhëniet me Rusinë.

Por, nënvizon deklarata, për të përmbushur këto objektiva, krahas hartimit të strategjive, nevojitet dhe rritja e investimit për mbrojtjen. Barra për mbrojtjen dhe ndarja e saj mes vendeve anëtare është një çështje që duhet trajtuar nga Samiti i NATO-s në Varshavë, në muajin korrik, thuhet në deklaratë.

Në mbyllje të sesionit të AP-së në Tiranë, Presidenti i saj, Michael Turner falenderoi autoritetet shqiptare ‘për mikpritjen dhe për udhëtimin e mrekullueshëm’, sidomos personelin e parlamentit të Shqipërisë, vullnetarët e përkushtuar, dhe stafin e sigurisë, që punuan për ta kthyer këtë sesion në një sukses.

Asambleja Parlamentare e NATO-s u mblodh për herë të parë në Shqipëri, 7 vjet pas anëtarësimit të saj. Takimi bëri bashkë rreth 260 parlamentarë nga 28 vendet anëtare, nga Amerika e Veriut dhe Evropa, si dhe delegatë nga vendet partnere dhe vëzhgues, që diskutuan çështje te sigurisë ndërkombëtare aktuale.

Ambasadori Amerikan Lu takon ish Kryeministrin Sali Berisha

May 30, 2016 by dgreca

Ambasadori i SHBA Donald Lu dhe ish kryeministri Sali Berisha kanë zhvilluar sot një takim, ku kanë diskutuar për arritjen e kompromisit mes partive që do t’i shërbente pozitivisht vendit tonë. Lu e njohu Berishën me përpjekjet e komunitetit ndërkombëtar për të arritur në një kompromis midis maxhorancës dhe opozitës për të votuar amendamentet kushtetuese brenda afatit të përcaktuar.Ish- kreu i demokratëve shprehu vlerësimin e tij për përpjekjet e ambasadorit Lu për arritjen e një kompromisi, në vlerësimin tij plotësisht të mundshëm, midis palëve për votimin e reformës. Ai u ndal më tej në rëndësinë jetike që ka zbatimi i ligjit të dekriminalizimit, për institucionet dhe vendin në tërësi. Sipas Berishës, Edi Rama nuk ka vullnet për zbatimin e këtij ligji. Por sipas tij, Rama ka futur në Parlament vrasës, pengmarrës, trafikantë dhe jo vetëm që nuk kërkon ndjesë po përpiqet të maskoje aktin e tij kriminal duke i krahasuar ata me deputetë të dënuar për shkelje të rregullave të trafikut rrugor apo të burgosur me ligjin e arratisjes së kohës së diktaturës, ndërkohë mashtron diplomatë të huaj duke iu thënë se ai vertet ka futur kriminelë nga Veriu në Parlament, por ato zona ashtu qeverisen dhe se ata i ka marë nga Berisha. Berisha theksoi më tej se, nga lista e PD nga viti 1991 deri më sot nuk ka absolutisht asnjë deputet apo kandidat për deputet të dënuar për krimet e konventës.