Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

BERISHA: QEVERIA ESHTE GATI TE KRIJOJE KUSHTE PER VOTIMIN E EMIGRANTEVE NE AMBASADA

by

Gënjeshtra është ves dhe është një ves i keq i burrit. Urdhëro të biem dakord. I kemi që të gjithë në lista, një për një. Që të gjithë janë në listat e votimit. Qeveria merr përsipër, kudo që janë ata, me shpejtësi të instalojë teknologjinë më moderne, të votojnë online, në ambasada, të votojnë kudo që janë, të votojnë të lirë. Mos ki frikë nga vota e tyre!

***

“Ne zotohemi se gjatë katër viteve që vijnë do të 3-fishojmë grantet për projektet tuaja, në mënyrë që ju të prosperoni, të ndërtoni kopshtet, serat, bahçet tuaja dhe të ecni të sigurt drejt një mirëqenie më të mirë; në mënyrë që ju të zhvilloni potencialet turistike të zonave tuaja të mrekullueshme”

Kryeministri Berisha ishte sot i pranishëm në inaugurimin e përfundimit të rikonstruksionit të rrugës Hotolisht – Frare, në rrethin e Librazhdit, financim i qeverisë shqiptare dhe Fondit të OPEC për Zhvillim Ndërkombëtar (OFID), me vlerë 146 milionë lekë.

Segmenti rrugor Hotolisht – Frare, me gjatësi 6.2 kilometër, tashmë është zgjeruar dhe pajisur me të gjithë elementët e nevojshëm të infrastrukturës, përfshirë kanalizimet e ujërave të bardha, mure mbajtës, vepra arti, si dhe sinjalistikën e nevojshme vertikale dhe horizontale. Pjesë e këtij projekti është ndërtimi i trotuarit pranë shkollës së fshatit dhe urës së re. Kjo rrugë u lehtëson transportin 1500 banorëve të kësaj zone, u krijon mundësi atyre të lidhen me Përrenjasin, Librazhdin dhe Elbasanin. Kjo zonë është e njohur për pasuri minerare kromi dhe ndërtimi i rrugës lehtëson ndjeshëm aktivitetin e shfrytëzimit të minierave, por edhe transportin e mineralit. Fermerët e kësaj zone janë të njohur për prodhimet bujqësore dhe blegtorale, në mënyrë të veçantë për vreshtarinë.

Në këto vite, në rrethin e Librazhdit janë ndërtuar e rikonstruktuar mbi 100 kilometër rrugë, 23 shkolla e kopshte, 15 ujësjellës e kanalizime, 17 qendra shëndetësore e ambulanca; mbi 2 milionë dollarë subvencione në pemëtari, vreshta, ullinj, sera; mbi 2 miliardë lekë janë investuar në sistemin e energjisë elektrike. Gjithashtu, po punohet në ndërtimin e 6 HEC-ve në këtë zonë.

Kryeministri Berisha, në përshëndetjen e tij drejtuar banorëve të kësaj zone, u shpreh se “për ne, nga dita e parë e ardhjes në pushtet e deri më sot, Shqipëria rurale e zhvilluar, fshati shqiptar i zhvilluar përbëjnë kushtin më themelor të një Shqipërie të zhvilluar, të një Shqipërie evropiane”.

“Në katër vitet që vijnë, – tha Kryeministri, – ne do të finalizojmë të gjithë infrastrukturën tuaj. Ne jemi zotuar që çdo fshat të ketë infrastrukturën e lagjeve të qytetit. Ne qëndrojmë para barazisë së qytetarëve shqiptarë. Ne besojmë se kudo që ata jetojnë duhet të gëzojnë shërbime dinjitoze, shërbime cilësore. Kjo është arsyeja që gjatë këtyre viteve, 60 përqind të të gjitha investimeve ne i kemi investuar në fshatin shqiptar, në Shqipërinë rurale”.

Në fjalën e tij, Kryeministri Berisha u shpreh:

Të dashur banorë të komunës Hotolisht,

zoti nënkryetar i Parlamentit,

zoti ministër,

zotërinj deputetë,

zotërinj qeveritarë vendorë,

Së pari, përshëndetjet e mia më të përzemërta banorëve të Hotolishtit. Dua të shpreh kënaqësinë time të madhe që ndaj me ju gëzimin e inaugurimit të kësaj rruge, prej 6.2 kilometrash, investim 146 milionë lekë, rrugë nga e cila përfitojnë 1500 banorë të kësaj zone. Me këtë rrugë, kjo zonë fiton një dalje të shpejtë, të pamundimshme në rrugën kombëtare dhe afrohet me Librazhdin, Elbasanin dhe Tiranën. Kjo rrugë i shtohet edhe 100 kilometrave rrugë të tjera që ne kemi ndërtuar dhe rindërtuar në rrethin e Librazhdit. Për ne, nga dita e parë e ardhjes në pushtet e deri me sot, Shqipëria rurale e zhvilluar, fshati shqiptar i zhvilluar përbëjnë kushtin më themelor të një Shqipërie të zhvilluar, të një Shqipërie evropiane.

Vëllezër e motra,

Bazuar në këtë parim, gjatë këtyre viteve, ne kemi investuar në Shqipërinë rurale, kemi ndërtuar e rindërtuar 8000 kilometra rrugë të saj, kemi ndërtuar dhe rindërtuar mbi 1000 shkolla, mbi 318 sisteme kanalizimesh dhe ujësjellësish. Unë ju siguroj se kjo rrugë do të shkojë e do të vazhdojë deri sa banorët e Librazhdit të mund të dalin atje lart, në malet me dëborë, në resorte të mëdha turistike. Zoti kryetar, jam këtu për të dhënë fjalën e së bashku do të ndërtojmë dhe rindërtojmë çdo rrugë të komuniteteve të komunës tuaj. Në këtë hark kohor, nga 2007 e deri më sot, me skemën e granteve ne kemi financuar projektet e 42 mijë fermerëve. Ne zotohemi se gjatë katër viteve që vijnë do të 3-fishojmë grantet për projektet tuaja, në mënyrë që ju të prosperoni, të ndërtoni kopshtet, serat, bahçet tuaja dhe të ecni të sigurt drejt një mirëqenie më të mirë; në mënyrë që ju të zhvilloni potencialet turistike të zonave tuaja të mrekullueshme.

Vëllezër e motra,

Në qoftë se deklaroj se ne do të 3-fishojmë grantet, unë ju garantoj se ndihma direkte për bujqësinë, për projektet në blegtori, në pemëtari, në sera, në bletari dhe në të gjitha fushat e kësaj sfere të rëndësishme do të jenë shumë më të mëdha, sepse marrja e statusit të vendit kandidat do të thotë mbështetje e fuqishme për fermerët shqiptarë nga fondet direkt të Komisionit Evropian, do të thotë shumëfishim i mbështetjes për ju, në të gjitha drejtimet. Në katër vitet që vijnë ne do të finalizojmë të gjithë infrastrukturën tuaj. Ne jemi zotuar që çdo fshat të ketë infrastrukturën e lagjeve të qytetit. Ne qëndrojmë para barazisë së qytetarëve shqiptarë. Ne besojmë se kudo që ata jetojnë duhet të gëzojnë shërbime dinjitoze, shërbime cilësore. Kjo është arsyeja që gjatë këtyre viteve, 60 përqind të të gjitha investimeve ne i kemi investuar në fshatin shqiptar, në Shqipërinë rurale. Ne konstatojmë me kënaqësi të madhe pasionin e fermerëve për të punuar tokën e tyre, për të përfituar prej saj. Kudo që kalojmë, sado që ne bëjmë, ata bëjmë shumë më tepër se ne. Ne përpiqemi t’i lehtësojmë ata.

Vëllezër e motra,

Kjo është alternativa jonë. Ajo bazohet në problemet më kryesore që ju shqetësojnë ju dhe ato nuk janë të pakta. Ne do bëjmë gjithçka që ju të nxirrni fitimin më të madh të mundshëm nga pronat tuaja, nga tokat tuaja. Katërvjeçari i ardhshëm do të jetë katërvjeçari i sistemit më modern të vaditjes në rajon dhe më gjerë. Këto janë premtimet, së bashku me rritjen e vazhdueshme të pensioneve për të moshuarit në Shqipërinë rurale dhe kudo që janë.

Normale është të shtroni pyetjen- pse nuk janë bërë këto deri më tani? Në vitin 2005 nga 18 300 kilometra rrugë që kishte Shqipëria, kishte të asfaltuara gjithsej vetëm 2430 kilometra. Unë ju garantoj se shumica dërmuese e rretheve të Shqipërisë nuk kishin qoftë edhe një metër linear rrugë të asfaltuar, përveç akseve kombëtare. Kur ne nisëm këtë projekt, opozita u tall dhe tha se këto rrugë nuk ekzistojnë në Shqipëri. Nuk ekzistonin për ta, sepse ata ju dhe jo vetëm ju, shumicën dërmuese të fshatrave të Shqipërisë, të Shqipërisë verilindore dhe juglindore i kishin shpallur si zonat e asgjësë, si zona ku nuk duhej investuar dhe nuk ke pse investon.

Ndryshe është koncepti ynë – kudo duhet investuar. Ne kemi tokë të mrekullueshme, plot ujë, plot dritë, plotë diell dhe kemi njerëz punëtorë. Ne do të bëjmë gjithçka që të mbjellin në të katër anët e saj dru frutorë, të mbjellin perime, të mbarështojnë blegtorinë, të rrisim mirëqenien e atyre që jetojnë në fshat. Ndaj dhe ju keni shumë arsye të besoni se kudo që të shkoni do të ndjeni angazhimin tonë për infrastrukturën.

Pak vite më parë fshatit shqiptar i priteshin dritat 16 orë në ditë. Sot, absolutisht, fshati nuk ka asnjë dallim me qytetin e Shqipërisë. Por ka një problem, përsëri, sepse ju korrentin nuk e keni të cilësisë që duhet. E keni me parametra më të ulët, për shkak të rrjetit. Unë ju jap fjalën se katër vitet që vijnë rrjeti në çdo fshat do të ndërtohet i njëjtë me atë të qytetit. Ne duam që ju të keni të njëjtat shërbime. Në të gjitha shkollat e fshatrave shqiptarë sot ka internet dhe kabinete informatike. Ka mbi 1000 qendra që japin internet falas. Sigurisht, që duhet të ketë. Pse fëmijët tuaj të mos lundrojnë në internet në shkollat e tyre. Ne i mbajmë qytetarët të barabartë përpara ligjit. Kemi rindërtuar dhe do të rindërtojmë çdo shkollë. Kanë mbetur edhe disa qindra, por deri më sot kemi rindërtuar dhe ndërtuar 1302 shkolla në mbarë vendin.

Cila është alternativa tjetër? Alternativa e mashtrimit, alternativa e mohimit. I them zotit Rama se gënjeshtra është dobësia më e madhe e burrit dhe gënjen vetëm burri që ka frikë nga vetja e tij. Dy janë alternativat e tij, gënjeshtër dhe mohim. Mohim, mohim dhe vetëm mohim. Nihilizmi është doktrina e asgjësë. Ai që mohon, harron se duke mohuar Shqipërinë reale dhe duke shpallur Shqipërinë e gënjeshtërt, shpall të gënjeshtërt mundin, djersën, sakrificën tuaj; shpall të gënjeshtër lumenjtë e djersës që derdhën qindra e mijëra shqiptarë në vendet përreth për të ndihmuar familjet e tyre; shpall të gënjeshtër anëtarësimin e Shqipërisë në NATO; shpall të gënjeshtër heqjen e vizave dhe lëvizjen e lirë për shqiptarët.

Çfarë bërë ti zotëri këto tetë vite? Këto tetë vite ti bëre vetëm një gjë, bëre gjithçka për të bllokuar, por, fatmirësisht, anëtarësimin në NATO se bllokove dot; fatmirësisht, nuk bllokove dot lëvizjen e lirë të shqiptarëve, ndonëse bërë gjithçka për tua hequr këtë mundësi. Ti bllokove tre ligjet që kërkojnë 3/5. I bllokove, por dita e gjykimit po vjen, 23 qershori po vjen. Vëllezër, duhet ta dini se me atë bllokim ka bllokuar qindra e qindra milionë euro për shqiptarët. Jo për qeverinë, por për qytetarët shqiptarë. Investimet private të vendeve anëtare të Bashkimit Evropian janë investime që punësojnë qytetarët. Mbështetja për investime publike e Komisionit Evropian është për rrugë, ujësjellës, kanalizime, vaditje, për shkolla, për kopshte. I bllokove vetëm për ligësinë e shpirtit tënden. Mendove se në qoftë se merrej statusi, Berisha do të merrte kredi më të mëdha. Berisha bëri gjithçka, qeveria e tij bëri çdo gjë dhe statusi u rekomandua për Shqipërinë nga Komisioni Evropian, me kusht që të votohen tre ligje. Dua t’i them se me bllokimin e ligjeve ke bërë një akt të shëmtuar, ke shkelmuar një interes jetik të çdo qytetari shqiptar, të fëmijëve, të të rinjve, të burrave, të grave, të pensionistëve.

Vëllezër,

Janë me dhjetëra e mijëra emigrantë shqiptarë që vetëm për shkak të mosmarrjes së statusit nuk u njihet pensioni në vendet ku punojnë. Ndërkohë, po qe se Shqipëria do të kishte statusin, të gjithë ata do të gëzonin pensionet dhe kohën e pensioneve siç e meritojnë.

Edhe njëherë i them, gënjeshtra është dobësia më ekstreme e burrit. E dëgjoja një natë, ishte në Milano, u thoshte emigrantëve – nuk deshi Berisha që të votonit ju.

Të dashur miq, po i them nga këtu, para jush, – nuk deshe ti dhe në qoftë se ti ke kthyer mendje, urdhëro ditën e hënë të biem dakord që çdo emigrant, në Itali, në Greqi dhe kudo që ndodhet, në Evropë dhe në botë, të votojë për vendin e tij, të votojë për zgjedhjet e 23 qershorit.

Gënjeshtra është ves dhe është një ves i keq i burrit. Urdhëro të biem dakord. I kemi që të gjithë në lista, një për një. Që të gjithë janë në listat e votimit. Qeveria merr përsipër, kudo që janë ata, me shpejtësi të instalojë teknologjinë më moderne, të votojnë online, në ambasada, të votojnë kudo që janë, të votojnë të lirë. Mos ki frikë nga vota e tyre!

Le ta lëmë atë në mashtrimet e tij, në kënaqësinë e ligësinë që i krijon atij bllokimi. Le të vazhdojmë ne ndryshimin. Ne jemi ndryshimi, vëllezër. Ndryshimi është kjo rrugë; ndryshimi është çdo investim; ndryshimi është lëvizja e lirë e shqiptarëve në Evropë; ndryshimi janë rrugët e ndërtuara, shkollat e rindërtuara dhe të ndërtuara rishtazi, ujësjellësit, kanalizimet; ndryshimi janë fermat që prosperojnë gjithnjë e më shumë; ndryshimi është prodhimi që rritet çdo ditë e më shumë.

Ndaj dhe ju ftoj të ecim përpara, të shndërrojmë 23 qershorin ditën e ngadhënjimit të programit të Shqipërisë së zhvilluar, të votojmë për vazhdimin e ndryshimit, të votojmë për Shqipërinë e zhvilluar, të votojmë për Shqipërinë evropiane.

Gëzuar rrugën dhe faleminderit për pritjen”.

 

Ri-integrimi, sfidë për të riatdhesuarit

by

Familja shtatë anëtarëshe, Hamiti, para tri vjetësh është kthyer nga Gjermania në Kosovë. Kryefamiljari i kësaj familjeje, Arseni, mbi të 50-at, tregon se tashmë jeton në shtëpinë e tij në Graçanicë, por që kushtet janë të vështira, pasi që nuk ka arritur të gjejë ndonjë vend pune.
Arseni është nga komuniteti rom. Ai tregon se në vitin 2010, kur është kthyer nga Gjermania, ka marrë 5000 mijë euro, por këto mjete, thotë ai, janë shpenzuar për renovimin e shtëpisë. Ndërkaq, ka tre muaj që Arseni merr 90 euro në muaj, si ndihmë sociale, nga Qeveria e Kosovës.
“Po, kur jam kthyer 2500 euro kam marrë nga Gjermania, ndërsa 2500 nga Kosova, kurse tash marr 90 euro në muaj. Me këto para po paguaj rrymë, miell, disa gjëra ushqimore, por për shtatë persona këto mjete nuk po mjaftojnë”, thotë Hamiti.
Por, nuk është vetëm familja Hamiti që është riatdhesuar në Kosovë. Sipas zyrtarëve të institucioneve kosovare, mesatarisht çdo vit në Kosovë kthehen 5 mijë persona, qoftë në mënyrë vullnetare ose të dhunshme.
Sipas Ministrisë së Punëve të Brendshme, e cila koordinon procesin e ri-integrimit të personave të riatdhesuar, që nga viti 2008 e deri më tani, vlerësohet se nga shtetet e Bashkimit Evropian janë riatdhesuar mbi 20 mijë persona.
Kthimet, kryesisht janë bërë nga Gjermania, Suedia , Zvicra dhe Franca.
Ndërkaq, përfaqësues të shoqërisë civile, të cilët monitorojnë procesin e ri-integrimit të personave të kthyer në Kosovë, konsiderojnë se zgjidhja e problemeve të personave të riatdhesuar, duhet të jetë e qëndrueshme dhe jo e përkohshme.
Naim Osmani, drejtor ekzekutiv në Programin për të Drejtat Civile, konsideron se ky proces është i mbuluar me infrastrukturë të duhur ligjore, porse gjendja në terren sipas tij, mbetet shqetësuese.
Ai thotë se moskoordinimi i autoriteteve kompetente për krijimin e kushteve adekuate për personat e riatdhesuar, po pengon procesin e ri-integrimit të tyre në shoqërinë kosovare.
“Në momentin e kthimit në Kosovë, personat e riatdhesuar ballafaqohen më probleme të natyrave të ndryshme për integrimin e tyre në shoqëri. Si problem kryesor mund të theksojmë mungesën e dokumentacionit përkatës të identifikimit dhe atij personal, sigurimit të të ardhurave personale për ekzistencë si pasojë e papunësisë, vështirësitë që ata hasin rreth çështjeve pronësore dhe sigurimit të banimit – vendstrehimit, gjithashtu mund të përmendim problemet në shëndetësi, shkollim, dokumentacion personal, etj “ thekson Osmani.
Mungesa e dokumenteve personale i ka shkaktuar problem edhe Arsen Hamitit. Ai thotë se për këtë arsye, katër fëmijët e tij, nuk vazhdojnë shkollimin. Familja Hamiti, jeton në Graçanicë, zonë kjo e banuar më shumicë serbe, ndërkaq edhe dokumentet thotë ai, i kërkojnë të shtetit të Serbisë.
Se ri-integrimi i personave të riatdhesuar paraqitet sfidë për institucionet e Kosovës, thotë edhe Artan Duraku, ushtruesi i detyrës së drejtorit në Departamentin për ri-integrim të personave të riatdhesuar, në Ministrinë e Punëve të Brendshme

Është një proces shumë i vështirë dhe një proces shumë kompleks…

 “Është një proces shumë i vështirë dhe një proces shumë kompleks. Për këtë kërkohet angazhim i ministrive të ndryshme, pasi këta persona kanë nevoja të ndryshme, qoftë regjistrimi në librat e Kosovës, ndihmë për regjistrim në shkollë, qasje në fondet sociale, ndihmë për banim dhe për këtë arsye ky proces ka pasur vështirësitë e veta”, pohon Duraku.
Problemet, me të cilat po përballen personat e riatdhesuar, pas qëndrimit në Kosovë, po i detyrojnë ata që të gjejnë forma alternative, për t’u kthyer në shtetin nga kanë ardhur, thotë Naim Osmani, për Radion Evropa e Lirë
“Gjatë takimeve që kemi pasur me personat e riatdhesuar, për shkak të problemeve të lartpërmendura, një numër i madh i tyre shprehin dëshirën që të kthehen mbrapa përsëri nw vendin, shtetin nga i cili janë kthyer në Kosovë, ose në ndonjë shtet tjetër të Unionit Evropian. Madje, shumë shpesh ka tentime të gjetjes së rrugëve alternative për kthim në vendet prej nga janë riatdhesuar apo në vendet tjera të Evropës Perëndimore”, thekson Osmani
Qeveria e Kosovës, kohë më parë ka nënshkruar disa marrëveshje me më shumë se tetë shtete të Bashkimit Evropian për riatdhesimin e kosovarëve.
Ri-integrimi dhe riatdhesimi i personave të kthyer, është një ndër kriteret kryesore për liberalizimin e vizave nga Bashkimi Evropian.(kortezi Nadie Ahmeti)

HAKMARRJA E RUSISE: 18 AMERIKANE NE LISTEN E ZEZE

by

Rusia e ka publikuar listën e zezë të saj me emrat e shtetasve amerikanë, të cilëve u ndalohet hyrja në këtë vend, në shenjë të hakmarrjes për dokumentin e njohur si “Lista Magnitsky”.
Ministria e jashtme e Rusisë sot e ka publikuar listën e 18 zyrtarëve amerikanë, për të cilët thuhet se “janë implikuar në shkelje të të drejtave të njeriut”.
Në këtë listë gjenden edhe zyrtarë në administratën e ish presidentit George Bush, dhe zyrtarë të përfshirë në dënimet e rusëve, që aktualisht gjenden në burgjet e Shteteve të Bashkuara.
Ky zhvillim u bë një ditë pasi Shtetet e Bashkuara kanë imponuar sanksione të mosdhënies së vizave dhe ngrirje të pasurive të 18 njerëzve, shumica prej tyre shtetas rusë, që dyshohet se kanë bërë shkelje të të drejtave të njeriut.
Për 16 persona rusë në këtë listë, theksohet roli i tyre në rastin e avokatit moskovit, Sergei Magnitsky, i cili i kishte akuzuar zyrtarët rusë për mashtrime tatimore në shumë prej 230 milionë dollarësh.
Avokati Magnitsky vdiq në paraburgim në Moskë në vitin 2009.

SHBA: 18 vetë në Listën Magnitsky/

 Shtetet e Bashkuara kanë ndërmarrë ndalesë të dhënies së vizave dhe ngrirje të pasurive të 18 personave, shumica prej tyre rusë, që janë emëruar në atë që njihet si “Lista Magnitsky”.
Për 16 persona nga kjo listë theksohet roli i tyre në rastin Sergei Magnitsky, që ishte një avokat rus nga Moska, i cili e kishte akuzuar një numër të zyrtarëve rusë për një skemë të mashtrimit tatimor, në vlerë prej 230 milionë dollarësh.
Pasi i kishte bërë këto akuza, ai ishte ngarkuar nga autoritetet e Rusisë me fshehje të taksave në vitin 2008.
Derisa ishte në paraburgim, Magnitsky ishte rrahur dhe nuk i ishte dhënë përkujdesje mjekësore, kështu që ai kishte vdekur në vitin 2009.
Në listën e Shteteve të Bashkuara, që këta persona i konsideron fajtorë për shkelje të mëdha të të drejtave të njeriut, gjenden edhe dy çeçenë.
Para shpalljes së mbrëmshme të listës, zëdhënësi i presidencës së Rusisë, Dmitry Peskov, tha se ajo do të ketë “padyshim efekt shumë negativ në raportet bilaterale ruso-amerikane”.

DEGA NË JACKSONVILLE ZGJODHI DELEGATËT PËR KUVENDIN E VATRËS

by

Nga Lek Gjoka/

Vatra shekullorë po përgaditet jo vetem për Kuvendin e radhes por me teper,për Kuvendin e Shekullit te Ri të saj.Sigurisht dikur Noli pat thenë:Shqipëri mos ki frikë se ke bijtë në Amerikë..Vetem po te lexosh me pak ndienja këto dy vargje kanë nje mesazh të madh për vleren madhore që kishtë në ate kohë Shqiperia për to.Po sot? Sigurisht që gjithë e duam Shqipërine,kombin shqiptar sepse kemi gjak shqiptari por vallë sa detyrime ndiejme ndaj Memedheut?Sa kontribojme ndaj tij kur mundesite i kemi?Sigurisht përgjigjen e kësaj pyetjeje ja leme më mire kohes sepse ajo është sita e historise,e atdhedashurise,e kontributit te çdo mërgimtari shqiptar këtu ne SHBA dhe me tej…
Në një ambjet shqiptar më 7 Prill antaret e deges së Vatres në Jacksonville Florida u mblodhën në reastaurantin e shqiptarit me zemer te madhe zotit Edi Ruka.Sigurisht qe nuk ishtë një dite si të tjeret sepse ishte një pervjetor i hidhur për kombin shqiptar,përvjetori i pushtimit të Shqipërise nga Italia fashiste por historinë s’e harrojme dhe datave të tilla duam ti ndryshojme për gjera më te mira në sherbim te Shqipërise siç është takimi i sotëm për zgjedhjen e kandidateve për në Kuvend.Kështu nisi në një ambient familjar vatran bashkëbisedimi i rradhes.
Të gjithë menjëhere pas hapjes nga kryetari i deges zoti Adriatik Spahiu nisën të diskutojnë për probleme të ndryshme se si ti bashkojnë më tepër shqiptaret e Jacksonvillës.
Gjithashtu u diskutua qe në një te ardhmë të afert të japin sugjerimët e tyrë per Kanunoren (Rregullorën) e re të Vatres.Gjithashtu u diskutua për gjëra madhore siç janë detyrimet e degeve të Vatres më Qendren dhë të drejtat e autonomise financiare te degeve.Sigurisht pa para nuk mund ti sherbesh as kominitetit shqiptar dhe as kombit.Sugjerimët do të bëhen publike me imtësisht në Kuvend.Më pas u kalua në votim të hapur për zgjedhjen e kandidatëve.Më shumice votash në Kuvend u zgjodhën vatranet zoti Adriatik Spahiu kryetar i deges,zonja Lavdie Mato antare,zoti Ardian Gjoka antar bordi,zoti Besim Hasani antar.Sigurisht qe sikur tha në fillim Tiku dëshira është të jemi të gjithë pjesmarres por statusi është ai qe cakton numrin ndaj të gjithë janë dakort më zgjedhjen demokratike pa hadermetje të çastit.
Dukë ditur që dega e Vatres ne Jacksonville si foshnjë që është nuk afron asnjë mundësi finaciare për shpenzimet e delegateve për në Kuvend disa antare që janë zotërinjte Nevzat Loci, Sokol Curi, Vebi Musta ,Fatmir Niko Bengu , Petrit Kaba, Hasan Hakrama, Mariglen Kocibelli , Fuat Haxho, Arber Tabaku ,Bukurosh Currre, Miklovan Aleksi etj…sipas mundësive dhuruan një sasi të hollash që tregon fare qartë shpirtin bujar të shqiptarit.Më pas u prezantuan antaret e rinje zoterinjte Petrit dhe aei figu që iu uruan mireseardhjen ne sofren e madhe të Vatres të cilët pasi morën fjalen u zotuan që do të punojnë me sa mundësi që kane në shërbin te komunitetit shqiptar ketu në Jacksonville dhe në sherbim të Atdheut. Gjithashtu kryetari i deges se Jacksonvilles zoti Adriatik Spahiu falenderoje përzemersisht të gjitha antaret qe kontribuan finaciarisht në kete mbledhje dhe
ato që e mbeshteten por për problemë të ndryshme personale ishin vetëm shpirtërisht prezent në mbledhje.Jo më kot -vazhdoi Adriatiku- fjalet e Nolit që i drejtohet Shqipërise që te mos kete kurrë frike se ka djemte në Amerike janë mese reale në ketë shekull të ri. Dukë bisededuar si në një sofër të madhe kohe kishte ecur shumë shpejt më hapin e ores.Sigurisht që sontë ishte hera e parë që dega e Vatres zgjedh delegatet e saj për në Kuvend dhe që do ti përfaqesoje denjesisht jo vetem antaret e tjere por gjithë shqiptaret qe jetojne e punojnë prej shumë vitesh në Jacksonville Florida më një shprese të madhe që Vatra të arrijë të konsilidohet dhe si dikur por në rrëthana të reja ti sherbeje me se miri diaspores shqiptare të Amerikes,interesave kombetare të Shqipërise e kombit shqiptar si dhë të jape nje kontribut të çmuar edhe per Shtetet e Bashkuera të Amerikes si një Atdhe i dyte për të gjithe shqiparet qe jo vetem na pranoji pranë vatres se saj por na afron më afer zjarrit shpirteror që të na afroje sa me shume ngrohtësi qe të mos ndiejme ne pafundesi mungesen e vendlindjes dhe ëndrra Amerikanë të mos jete thjeshte një ëndërr Amerikanë por nje realitet qe çdo shqipar e shijon dhe do ta shijoje gjithmone.

Prill 2013
Jacksonville Florida

Zëvendësimi i anëtarit të KQZ, shtyhet votimi per te Henen

by

Bllokohet puna në Komisionin qëndror të Zgjedhjeve. Tre anëtarët e propozuar nga të majtët dhe zoti Muho i propozuar nga LSI braktisën mbledhjen/

Në Shqipëri parlamenti shtyu për të hënën e ardhshme votimin për zëvendësimin e anëtarit të Komisionit Qëndror të Zgjedhjeve, propozuar nga Lëvizja socialiste për integrim. Vendimi I marrë dje nga Komisioni i Ligjeve vetëm me votat e së djathtëve ka rritur tensionin politik. Lsi ka kërkuar ndërhyrjen e trojkës së ambasadorëve. Kreu i pranisë së Osbe-së në Tiranë Eugen Wollfarth tha sot se duhet të sqarohet baza ligjore mbi të cilën po veprohet Situata e nderë e krijuar nga vendimi i shumicës së djathtë për të zëvendësuar anëtarin e Komisionit qëndror të Zgjedhjeve të propozuar nga Lëvizja socialiste për Integrim, u ndje që në mjediset e jashtme të parlamentit. Për më shumë se tre orë deputetët qëndruan në pritje të nisjes së seancës dhe askush nuk dinte shkaqet e vonesës. Votimi i paralajmëruar nuk ishte një cështje e lehtë, edhe për shkak të numrave, pasi ashtu si dhe në rastin e votimit të ministrave të rinj, demokratët do të duhen t’i shtrijnë sërish dorën tre deputetëteve socialistë të pakënaqur, që janë larguar nga grupi i tyre. Seanca filloi pasi më parë ishte marrë vendimi për shtyrjen e hedhjes në votim të ndryshimit në KQZ.

Kalimi i Lëvizjes socialiste në opozitë shtyu partinë demokratike që të vepronte me shpejtësi dhe të mbyllte brenda ditës së djeshme procedurat e zëvendësimit në komisionin e ligjeve, me argumentin se barazpeshimi politik në Komisionin qëndror dhe për pasojë edhe ne nivelet e dyta ishte prishur. Demokratët ju përmbajtën një arsyetimi nisur nga fryma sic thanë ata, e vetë kodit zgjedhor. Por po i njejti kod, ka parashikuar në mënyrë specifike rastet kur ndërpritet mandati, dhe në asnjë prej tyre, nuk bëhet fjalë për ndërprerje kur ndryshojnë raportet politike në parlament.

Opozita e cilësoi si antikushtetues vendimn e të djathtëve. Sot kryetari I Lëvizjes socialiste për integrim Ilir Meta foli gjithashtu për një akt të rëndë: “Problemi është që kemi një sjellje prej diversantësh, jo prej ligjvënësish, jo prej politikanësh, jo prej njerëzish të përgjegjshëm. Ky është shqetësimi”.
Por ndërsa parlamenti ishte në pritje, tensioni ishte transferuar edhe në Komisionin qëndror të Zgjedhjeve, ku anëtarët e propozuar nga e majta, së bashku me zotin Ilirjan Muho, i propozuari I LSI-së, braktisën mbledhjen. Puna në Komisionin qëndror të Zgjedhjeve u bllokua duke qenë se mbeti vetëm me tre anëtarë.
Situata e krijuar ka aktivizuar përfaqësuesit më të rëndësishëm ndërkombëtarë në TIranë. Mbrëmë LSI kërkoi ndërhyrjen e trojkës së ambasadorëve. Sot kreu i pranisë së OSBE-së Eugen Wollfarth, tha se aspektet politike varen nga mënyra se si i sheh cdo kamp, ndërsa ato ligjore duhet të jenë të njejta për të gjithë: “Do të jetë shumë e rëndësishme të kemi shpjegime të mëtejshme lidhur me bazën ligjore mbi të cilën është marrë apo duhet të merret çdo vendim. Disa aktorë politikë, por gjithashtu edhe ekspertë ligjorë, na kanë shprehur dyshime lidhur me bazën ligjore. Prandaj, nga këndvështrimi ynë, ne do të ftonim qartas që të sqarohet baza ligjore mbi të cilën veprohet”. Sipas ambasadorit Wollfarth “në kohën kur u zgjodhën, u emëruan dhe u miratuan nga parlamenti, nëtarët e KQZ-së reflektuan gjendjen e opozitës dhe të qeverisë në parlament. Kur morën detyrën, ata morën një detyrë apolitike”, saktësoi ai. Nga ana e tij ambasadori i Bashkimit Europian Ettore Sequi, tha vetëm se cështja po ndiqet nga afër prej tyre.(Kortezi-Zeri i Amerikes)