Raporti i ODIHR-it: Opozita-një damkë e zezë, Pozita- Progres

September 10, 2015 by dgreca

Vendoret e 21 Qershorit, Basha “Vlerësimi një damkë e zezë për zjedhjet”. Bushati: “Raporti evidenton përparimin në krahasim me proceset e mëparshme”/

Ashtu sic ka ndodhur rëndom në të kaluarën, secila palë politike në Shqipëri ka një lexim të vetin të raportit të vëzhguesve ndërkombëtar për zgjedhjet. Edhe këtë herë, 24 orë pas publikimit të vlerësimeve përfundimtare të ODIHR-it për votën e 21 Qershorit, opozita e cilësoi atë një “damkë të zezë” për zgjedhjet, ndërsa qeveria nga ana e saj foli për një përparim krahasuar me proceset e mëparshme.

“Në Shqipëri nuk u mbajtën zgjedhje të lira dhe të ndershme. Togfjalëshi: “zgjedhje të lira e të ndershme” është zhdukur dhe nuk figuron në raport. Kjo, sepse qeveria zhbëri dhe dhunoi standardet themelore të zgjedhjeve, duke shënuar kështu një rrëshqitje mbrapa të demokracisë shqiptare” deklaroi zoti Basha duke shtuar se sipas tij, në cdo faqe të raportit ka prova e fakte që dëshmojnë dhunimin e standarteve nga ana e shumicës në pushtet.

Në emër të qeverisë shqiptare komentet mbi raportin i bëri ministri i jashtëm Ditmir Bushati: “Raporti përfundimtar i OSBE/ODIHR-it evidenton përparimin në krahasim me proceset e mëparshme zgjedhore në vend, si dhe evidenton mangësi që mbeten për t’u adresuar. Shqipëria organizoi një proces zgjedhor të qetë, ku dita e votimit siç përshkruhet në raport, ishte krejt normale dhe vetë fushata elektorale u karakterizua nga një klimë zgjedhore pozitive dhe paqësore. Përtej hapave dukshëm pozitiv bërë nga Shqipëria, evidentimi i mangësive që mbeten për t’u adresuar është për ne një udhërrëfyes për ato hapa që duhet të ndërmerren me synim konsolidimin e procesit zgjedhor në Shqipëri dhe praktikat më të mira dhe angazhimet e OSBE/ODIHR-it”.

Duke ju përgjigjur akuzave të drejtuesit të opozitës, zoti Bushati kujtoi konstatimet e raportit për zgjedhjet e vitit 2011, ndërsa shprehu gatishmërinë e qeverisë për të zbatuar të gjitha rekomandimet e raportit

Ndërsa për LSI-në, e cila përmendej në raport për situatën e tensionuar të krijuar në Vorë, vëmendja duhet të përqëndrohet në aspektet që duhen përmirësuar. “Përgjithësisht shumica e vërejtjeve në tërësinë e tyre kanë të bëjnë me përmirësime të karakterit legjislativ, të karakterit të administrimit dhe çështjet të adresuara të karakterit teknik të cilat natyrshëm janë të mirëpritura, kërkojnë një përgjigje të shpejtë dhe përgjigja e menjëhershme dhe me pozitive gjithë politikës në tërësi do të ishte një dhe vetëm një: t’i futemi sa më parë procesit të përmirësimit të vërejtjeve të konstatuara”, u shpreh kryetari i grupit parlamentar të LSI-së, Petrit Vasili.

Raporti i ODIHR-it nënvizonte se “politizimi i vazhdueshëm I institucioneve shtetërore minoi administrimin efektiv të procesit të zgjedhjeve. Përgjithësisht, dita e zgjedhjeve është vlerësuar pozitivisht, por u vunë re disa raste të votimit në grup dhe parregullsi të rëndësishme proceduriale”, theksonte raporti në të cilin flitej për akuzat e përhapura për trysni ndaj votuesve apo ato për blerje të votës, për disa probleme me listat, ndërsa nuk munguan kritikat dhe për rolin e Komisionit Qëndror të Zgjedhjeve.(Kortezi-Armand MERO- Zeri i Amerikes-Titulli i Diellit)

TE TALLESH ME POPULLIN…

September 9, 2015 by dgreca

Opinion nga Faik KRASNIQI/

Shqiptarët e Kosovës sot me keqardhje po përjetojnë një tragjikomedi të shëmtuar të politikës, ku aktorët e saj realë janë të gjithë kriminelë, mafiozë, banditë dhe matrapazë, me ideologji dhe veprimtari të ngjashme me njëra tjetrën, por të rreshtuar në dy-tri kampe me emërtime të ndryshme, vetëm e vetëm sa për të krijuar tek të huajt imazhin, se Kosova me të vërtetë është një vend me “sistem pluralist”. Sistemi pluralist e ruan funksionin si i tillë për sa kohë politika është në duar të politikanëve vendas, dhe jo në dosjet e Evropës, të cilët mafio-politikës në Kosovë, ua ka zënë bishtin me derë, me veprat e tyre kriminale dhe mafioze. Prandaj këta pushtetarë mafiozë, edhe janë të ”detyruar” të nënshkruajnë lloj-lloj marrëveshje me Serbinë, edhe pse shumica e atyre marrëveshjeve të nënshkruara, janë në dëm të shtetit të Kosovës dhe qytetarëve të saj, ku me krijimin e ”Zajednicës”, po krijohet një minishtet serb brenda Republikës së Kosovës.

Qeverisja skandaloze LDK-PDK!

U mbushën më shumë se një vit që nga zgjedhjet e fundit, dhe pothuajse e gjithë shoqëria kosovare është duke përjetuar një tmerr të vërtetë, nga kjo qeverisje e dy partive, që e kanë kapur shtetin keq për fyti dhe kanë uzurpuar çdo segment shtetëror, dhe pamëshirshëm duke e vjedhur dhe plaçkitur. Kushdo është në dijeni se gjatë kësaj periudhe, nuk kemi pasur asnjë përmirësim te mirëqenies së jetesës. Përkundrazi, kemi pasur vetëm përkeqësim të kushteve dhe rritje të papunësisë, për shkak të shuarjes së mijëra bizneseve dhe ikjes së shumë bizneseve të ndershme vendase drejt vendeve të rajonit, si dhe rritjes graduale të çmimeve të produkteve, të energjisë dhe të ujit të pijshëm. Nuk kemi pasur asnjë përmirësim në drejtim të forcimit të rendit publik. Përkundrazi krimet e rënda, vrasjet dhe kërcënimet, të krijojnë imazhin e ekzistencës së një lufte civile me pasoja të paparashikueshme për të ardhmen. Kemi pasur nga njëra anë kërcënime masive kundër popullatës dhe individëve të caktuar nga jeta publike, që janë bërë halë në sy nga ky regjim autoritar, kurse nga ana tjetër mosndëshkime për krime apo vepra të rënda penale, nga keqbërësit e mafio-politikës dhe parapolitikës. Pa qenë nevoja të përmenden këtu individë të veçantë, të cilët gjithsecili nga ne i ka të ngulitura në kokë. Nuk bën pa përmendur edhe eksodin masiv të qytetarëve të Kosovës, ku brenda 3 muajve më shumë se 100 mijë qytetarë të Kosovës, kryesisht të rinj, gra, fëmijë dhe pleq, ikën drejt shteteve të perëndimit, duke ikur nga ky pushtet mafioz dhe për një jetë më të mirë. Gjatë këtyre 9 muajve të kësaj qeverie, kemi pasur mangësi të theksuara deri në skandale në çështjet e punësimit apo të marrëdhënieve në punë, për shkak të nepotizmit të çmendur, nga ky pushtet i korruptuar dhe i kriminalizuar. Nga njëra anë janë dëbuar nga puna njerëz, më konkretisht profesionistë dhe njerëz që s’kanë mbështetje politike, kurse nga ana tjetër janë punësuar pa asnjë kriter kryesisht familjarë, farefis dhe miq të pushtetarëve, dhe servilë e militantë të partive në pushtet.

Deputetët nuk duhet t’u shërbejnë interesave të mafio-politikës dhe parapolitikës!

Ndërkohë në vend që të priteshin hapa të suksesshme nga Qeveria aktuale për t’u treguar qytetarëve distancimin që duhet të kenë me keqbërësit e ndëshkuar me votë masive, të gjithë ne po e ndjejmë se ka filluar një degjenerim gradual i frikshëm i principeve të demokracisë, dhe në vend të saj po rikthehet një mentalitet i zgërlaqur diktatorësh të rinj.

Deputetët janë përfaqësues të popullit dhe si të tillë janë të detyruar të zbatojnë një me një kërkesat e tij. Kush nuk pranon t’i bindet vullnetit të sovranit, me votën e të cilëve janë zgjedhur deputetë, duke injoruar me skuthëri çdo dëshirë apo pretendim të tyre, apo më keq akoma, kur denjon të ulet këmbëkryq me keqbërësit, atëherë ai duhet të qërohet me hir a me pahir një orë e më parë si nga salla e kuvendit, ashtu dhe nga skena politike, se nuk është i devotshëm të përfaqësojë interesat e një populli të tërë. Duhet të qërohet me hir, a me pahir, sepse populli nuk i ka zgjedhur që të tallen me ta dhe me votën e tyre në kuvend, t’u shërbejnë interesave të mafio-politikës dhe parapolitikës.

Ambasada Amerikane mirepriti doreheqjen e deputetit te akuzuar per trafik

September 9, 2015 by dgreca

Deklaratë e Ambasadës së SHBA.

Ambasada e Shteteve të Bashkuara mirëpret vendimin e deputetit Arben Ndoka për t’u dorëhequr nga parlamenti dhe vendimin për të lejuar arrestimin e deputetit Armando Prenga. Këto vendime përfaqësojnë përparim të mirëfilltë për Shqipërinë drejt krijimit të një sistemi politik me drejtues të standardeve më të larta etike.

U.S. Embassy Statement

The United States Embassy welcomes the decision of Member of Parliament Arben Ndoka to resign from Parliament and the decision to allow the arrest of Member of Parliament Armando Prenga. These decisions represent real progress for Albania towards creating a political system with leaders of the highest ethical standards.

Trepça, pasuri e një rëndësie të përjetshme për Kosovën

September 3, 2015 by dgreca

-Haradinaj: Është urgjente njohja e ndërjesllë e Kosovës dhe Serbisë/
Nga Behlul Jashari/ PRISHTINË, 3 Shtator 2015/ “Trepça është një pasuri e një rëndësie të përjetshme për Kosovën”, ka deklaruar sot Kryetari i AAK-së, Ramush Haradinaj.
Ai gjatë një vizite në Kombinatin Trepça, tha se Kosova në asnjë situatë nuk guxon ta humbas pronësinë mbi Trepçën, por se duhet të gjendet një partner publiko-privat, që do ta aktivizonte këtë gjigand të fjetur të ekonomisë kosovare.
“Administrimi i mëtutjeshëm i Trepçës nga Agjencia Kosovare e Privatizimit nuk është zhvillim, as i Trepçës e as i ekonomisë së Kosovës përmes saj, por administrim i gjendjes së saj egzistuese, që është koncept i gabuar e i papranueshëm”, tha Haradinaj.
“Riaktivizimi i Trepçës në gjithë kapacitetin e saj, nënkupton zhvillim për tërë vendin, prandaj institucionet e Kosovës duhet të merren urgjentisht me këtë çështje. Situata siç është tani është e papranueshme”, u shpreh lideri i partisë opozitare AAK.
Po sot, Ramush Haradinaj, në një tryezë politike me temën “ndërtimi i raporteve shqiptaro-serbe” që u mbajt në Mitrovicë, e ku morën pjesë përsonalitete të rëndësishme nga jeta politike si përfaqësues diplomatikë nga shumë vende, tha se është urgjente njohja e ndërjesllë e Kosovës dhe Serbisë. Çdo vonesë në këtë proces, tha ai, po krijon vakum dhe keqkuptime të shumta. Haradinaj tha se në këtë proces rol vendimtarë mund të luaj faktori ndërkombëtar.
Duke folur për Bashkimin Evropian, ai tha se BE-ja po tregohet e pasuksesshme në Ballkan. “Rasti I Kosovës e cila vazhdon akoma të jetë në një fazë tranzicioni, rasti i moszgjidhjes së çështjës së emrit të Maqedonisë si dhe Greqia, janë vetëm disa shembuj mossuksesi të BE-së në Ballkan”, citohet Haradinaj në njoftimin e AAK-së.
Haradinaj tha se konferenca e sotme është një rast i mirë që të harrohen tabutë dhe gjërat të thuhen hapur.
“Kosova duhet ta përfundojë atë që quhet fazë e tranzicionit dhe të përfshihet seriozisht në të gjitha proceset integruese”, përfundoi ai.

BRITMATE GREKËVE PËR SHËN ATHANASIN

August 31, 2015 by dgreca

Nga Arben LLALLA/
Prishja e një ndërtimi pa leje në Dhërmi të Himarës që prej disa vitesh kishte shërbyer si kishë me emrin Shën Athanasit, nxori edhe një herë në dukje konfliktet politike të Greqisë me Shqipërinë, konfliktet për asimilimin deri të rrënjë të shqiptarëve nga Greqia ortodokse. Prishja e objektit të njohur si Shën Athanasi nuk i ngjante nga ana arkitekture një kishe, ajo më shumë ngjante me një garazhd apo ahur. A ishte e drejtë prishja? Patjetër që ishte e drejtë sepse në radhë të parë ishte ndërtim pa leje dhe kryeministri Rama ka dëshmuar se çdo ndërtim pa leje që ndodhet në vend jo të përshtatëm do rrënohet. Jemi dëshmitar se me ardhjen e qeverisë socialiste janë prishur me dhjetëra ndërtime pa leje, që nga shtëpitë e vogla e deri tek pallatet e hotelet luksoze që kanë kushtuar miliona euro dhe askush nuk reagoj kaq fuqishëm sa për prishjen në Dhërmi të ahurit që ka shërbyer si kishë. Reagimi i parë për prishjen e ndërtimit pa leje erdhi nga Kryepeshkopi i Kishës Autoqefale të Shqipërisë, Anastasi i cili nxitoj të ankohej politikisht tek mëma Greqi. Nuk është hera e parë që Hirësia ankohet tek Greqia për rastet e ortodoksëve shqiptar dhe nuk ankohet tek institucionet e Republikës së Shqipërisë. Me ankesën tek mëma Greqi, Kryepeshkop Anastasi na vërtetoj edhe njëherë se ai nuk e ndjen Shqipërinë si atdheun e tij të dytë, por misioni i tij ka qenë e është asimilimi i shqiptarëve dhe uzurpimi i Kishës Autoqefale Ortodokse të Shqipërisë. Gafa që bëri Kryepeshkop Anastasi ishte se ai nuk reagoj në mënyrë institucionale tek organet kompetente shtetërore të Shqipërisë si në Gjykatë, tek përfaqësuesi qeveritar për problemet e fesë, tek kryeministri dhe kryetari i Republikës, etj. Por Hirësia si gjithnjë që e tradhtojnë veprimet e tija të nxituara, ja mbathi vrapit tek institucionet e Greqisë duke e nxjerrë zbuluar fare se ai për çështjet e ortodoksëve shqiptar ankohet tek Greqia dhe jo Shqipëria, duke na pagëzuar ortodoksit shqiptar si grek. Kjo është një metodë e vjetërruar që i përket mesjetës ku feja ngatërrohej me kombësinë.
Më tej reagoj ekstremisti, Mitropoliti i Konicës, Andreas i cili është edhe kryetari i organizatës SFEVA që punon për aneksimin e jugut të Shqipërisë, reagoj Leonidha Papa i OMONIA, reaguan edhe partitë greke në Shqipërisë si PBDNJ, MEGA, (reagimet e tyre ishin sa për të thënë se reaguan), MPJ e Greqisë, lobi greko-amerikan me kryetarin e saj, Nikolas Gaxhojanis i cili disa herë është akuzuar për keqpërdorim të fondeve të grekëve të SHBA dhe qeverisë greke më 2014. Reagoj deputeti i Demokracisë së Re, Kosta Gjoleka pasi bëri një takim në Shqipëri me Spiro Kserën dhe Leonidha Papën. Deputeti Gjoleka pasi piu raki në qendrën e vllehëve në Samarina e filloj fushatën e tij për zgjedhjet e parakohshme në Greqi me një reagim fshatarçe, pa pikë serioziteti për Shën Athanasin. (Deputeti Kosta Gjoleka nuk ka origjinë shqiptare por vllehe, mos ta gënjej njeri veten nga mbiemri i fjalës shqipe, është çështje e thellë puna e mbiemrit të tij).
Por ajo që bie në sy është se nuk reagoj Patriarkana e Stambollit e cila ka në gjirin e saj Kishën Autoqefale të Shqipërisë. Nuk reagoj zyrtarisht Kryetari dhe kryeministri i Greqisë, nuk reaguan as partitë greke me përjashtim të Demokracisë së Re e cila lëshoj një reagim të brishtë. Trimat e Agimit të Artë këtë herë nuk reaguan duke logjikuar se është çështje e brendshme e ortodoksëve shqiptar. Nuk reagoj asnjë simotër e Kishës Autoqefale të Shqipërisë si fjala bie Kisha e Greqisë, Patriarkana Serbe, Patriarkana e Rusisë, etj. Po përse të reagojnë kur ata e logjikuan me të drejtë se është punë e brendshme e Shqipërisë dhe e besimtarëve ortodoks shqiptar! Çështja e prishjes së ndërtimit pa leje në Dhërmi po shfrytëzohet nga një Lob i fuqishëm Ballkanik për të filluar dalëngadalë rrëzimin e kryeministrit Rama edhe si kryetar i PS.
Pas gjithë këtyre britmave greke në shek.21 se po rrezikohen ortodoksit të cilët në Shqipëri janë grek sipas logjikës primitive, qeveria Rama me një seriozitet ja përplasi në fytyrë grekëve dhe grekofilëve shqiptar që nxituan të ngrenë akuza të pa drejta për prishjen e ndërtimit pa leje në Dhërmi, projektin e për rindërtimit të kishës së re të Shën Athanasit në një vend më të përshtatëm se sa atje ku ishte. Tashmë dikush mund ta interpretojnë si të dojë rindërtimin e kishës në Dhërmi, por prishja e objektit të shëmtuar ishte e drejtë dhe të ndërtosh kisha, xhami, tyrbe, etj., në Shqipëri nuk do të thotë se ke puthur këmbët e përmjerra të ndonjë vendi të huaj, por ke ndërtuar diçka humane për ti shërbyer besimtarëve të devotshëm.
Asnjë shqiptar nuk është për prishjen e objekteve fetare, por këto objekte duhet të ndërtohen me leje dhe në vendin e duhur, ashtu sikurse merret leja për ndërtesa banimi ashtu duhet të merret leja edhe për shtëpinë e lutjeve shpirtërore në ZOT.