Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kur thërret Erioni

by

Nga Ilir Levonja/

Një nga deputetët e kuvendit të Shqipërisë dhe zëvendës kryeministri Erion Braçe, i bën thirrje shqiptarëve për një mbyllje një ditore dhe një herë në muaj si tani. Pra një lloj karantine me qëllim pastrimin, dizifektimin a ruajtjen e mjedisit nga sulme të tilla epidemollogjike. Në atë sportivitetin qeveritar bën përjashtim pikërisht ai ose faktori politik që duam apo nuk duam ne janë sot një covid më i qelbët se ky që ka ngujuar një komb të tërin. Dhe Erjoni nuk bën përjashtim, nuk ka se si…

Ndaj sot ka një kulturë vrazhdësie me rrahje e gjoksi dhe përbuzje mbi sfidantët e urdhrave, mbi abuzuesit e çmimeve etj., ku domosdo viktimat e frontit më të parë janë si gjithmonë njerëzit apo nocioni popull. Përshembull sot shqiptarët e kanë lehtë t’i vënë gishtin disa provincialëve në moshë që kanë ndjekur fëmijët në Tiranën gjoja metropol, por që nuk i tuten aspak dominove apo shahut në parqet publike. Sot shumë syresh e kanë të lehtë t’i vënë gishtin disa tregtarëve tezgash që fatkeqësia u dha shancin të ”zhvasin” ca qindarka më shumë për kilen e limonit, nga që mund të kenë sosur ditën pa shitur më parë një kokërr. Megjithëse kurrë nuk u indinjuan në masë, nuk denoncuan në masë vjedhjet me reportabël të djersës së tyre nga ndrikullat e pushtetit. Denoncojnë dhe përbuzim një rritje çmimi limonash, madje me inat nga ai i shqiptarit për shqiptarin, shkrumb u bëfsha vet veç ai mos të ketë. 

Pra a duhet të mbyllen shqiptarët kështu në një karantinë, një ditore, një herë në muaj? Pa diskutim që duhet. Sepse edhe tani pavarësisht urdhrave ndihet qartë që në pjesë dërrmuese janë ngujuar për faktin se kuptuan më në fund se sa duhet jeta, se sa i vlefshëm është njeriu për njeriun deri në rang global. Mund të jetë një kulm kohor që ka shmangur deri një luftë të tretë botërore për shkak të ratifikimit të egos së perandorëve e perandorive me mjetet e demokracisë. Covidi a corona ka mbyllur studiot e neveritshme dhe foltoret politike të adresuar në luftë emrash se sa programesh, njerëzit po kuptojnë se koha e tyre nuk është përshembull vetëm Tak Ngjela dhe Tak Braho, por jeta në rrethinë dhe humori, keqardhja e shqiptarit për qytetarin italian, grek, kinez, iranian etj., pasi prej kohësh po mufatet një urrejtje globale. Po shohim foshnje kufoma nëpër brigje deti, karvanë shtegtarësh pa përfilluar kufijtë. Për hir të iks shtetari nuk na dhëmbi për prindërit e asaj fëmije, po ashtu as për dhimbjen e atyre refugjatëve që na kujton vetveten kur hapnin shtigje në monopatet e maleve tona me Greqinë. Kur dënoheshin e deklasoeshim për Amerikën dhe perëndimin. Kishim harruar të donim njëri-tjetrin, aq sa edhe Zotin e bëm ushtar pervers të çifutit apo arabit. Eshtë fije peri kjo që rrjedh, e ka emrin jetë, ikën dhe nuk vjen më. Ndaj mos u çudisni që kjo dëm pandemia mund të ketë shmangur një luftë të tretë botërore. Megjithatë shqiptarët zëvendës kryeministri i vendlindjes sime duhen të mbyllen e të mos dalin fare deri sa zhduket rraca jote që këlthet karshi një tezgazhiu limonash, karshi ndotjes mjedisore, karshi dizinfektimit etj., pasi burimi i të gjithave epidemive je ti dhe soji yt i neveritshëm. Një corona virus që nuk ka karantinë ta luaj vendit.

Dy raste me koronavirus në Kosovë

by

Ne SHBA jane 1680 persona te konfirmuar me CoronaVirus, numeri i te vdekureve 41/

  • Sipas të dhënave të Universitetit Johns Hopkins në gjithë botën, në total janë: 135,232 njerëz të infektuar, 4,981 të vdekur dhe 69,645 të shëruar./

Në Kosovë janë konfirmuar dy rastet e para me koronavirusit të ri. Këtë e bëri të ditur ministri i Shëndetësisë, Arbën Vitia përmes një konference të jashtëzakonshme për media, ku ishte i pranishëm edhe kryeministri Albin Kurti.

Pacientët janë të shtruar në Qendrën Klinike Universitare të Kosovës.

Ministri Vitia tha se pacientët e konfirmuar janë një shtetase italiane e moshës 20 vjeçare dhe një burrë 77 vjeçar, shtetas i Kosovës.

Ai tha se gjendja e të infektuarve është stabile.

“Në këtë moment që po flasim, është mbledhur edhe Komiteti për Koordinimin dhe Vlerësimin e Situatës me Koronavirus Covid-19 për të diskutuar dhe rekomanduar masat përkatëse konform situatës së re të parapara edhe me Planin e Veprimit”, tha ministri Vitia.

Të gjitha vendet e rajonit, përveç Malit të Zi, tashmë kanë raportuar raste me sëmundjen e koronavirusit të ri.

Në gjithë botën më shumë se 132,000 raste janë raportuar nga 123 vende, dhe 5,000 njerëz kanë vdekur.(RFL)

***

Historia e Korona virusit

Koronavirusi i ri, që është një familje e gjerë virusesh, është shfaqur për herë të parë në Kinë, në fund të vitit 2019.

  • Shenjat kryesore të infektimit me të janë: temperatura e lartë, kolla dhe vështirësitë në frymëmarrje.
  • Sëmundja që shkakton koronavirusi, është emëruar COVID-19.
  • Përveç Kinës, raste me koronavirus kanë raportuar edhe së paku 118 vende të tjera të botës.
  • Sipas të dhënave të Universitetit Johns Hopkins në gjithë botën, në total janë: 137,456 njerëz të infektuar, 5,074 të vdekur dhe 69,643 të shëruar.
  • Kina ka 80,945 raste me koronavirus, pas saj vjen Italia me 15,113 raste dhe Irani me 11,364.
  • Numri më i madh i njerëzve të vdekur është në Kinë: 3,062.
  • Kosova ka konfirmuar dy rastet e para me koronavirusin e ri.
  • Nga vendet e Ballkanit Perëndimor, aktualisht vetëm Mali i Zi nuk ka raste të regjiustruara me koronavirus.
  • Koronavirusi vjen nga një familje virusesh që mban emrin e dukjes së tij, sepse ka formën e një kurore.
  • Nga i njëjti grup virusesh vijnë edhe SARS dhe MERS – viruse që kanë shkaktuar epidemi në të kaluarën.
  • Rekomandimet e Organizatës Botërore të Shëndetësisë (OBSH) për të parandaluar përhapjen e koronavirusit janë: larja e rregullt e duarve, mbulimi i gojës dhe hundës gjatë kollitjes dhe teshtitjes, gatimi i plotë i mishit dhe vezëve dhe shmangia e kontaktit të ngushtë me personat që tregojnë simptoma të sëmundjeve të frymëmarrjes, si kollitje dhe teshtitje.
  • OBSH-ja e ka shpallur pandemi sëmundjen që shkakton koronavirusi, COVID-19.
  • Pandemia ndodh kur një sëmundje infektive përhapet lehtësisht nga personi në person në shumë pjesë të botës.
  • Ne SHBA jane 1680 persona te konfirmuar me CoronaVirus, numeri i te vdekureve 41/

Evropa – epiqendër e koronavirusit të ri

Evropa tani është epiqendra e pandemisë, thotë Organizata Botërore e Shëndetësisë.

Kreu i OBSH-së, Tedros Adhanom Ghebreyesus, konfirmoi se Evropa tani është “epiqendra” e pandemisë Covid-19.

Deri më tani Kina është konsideruar si epiqendër e virusit, pasi aty ishin paraqitur edhe rastet e para.

Mirëpo, përhapja e tij e shpejt në vendet evropiane ka bërë që OBSH-ja të ndryshojë destinacionin e epiqendrës së virusit.

Kina ka 80,945 raste me koronavirus, pas saj vjen Italia me 15,113 raste dhe Irani me 11,364.

KORONOVIRUSI- Qeveria shqiptare shpall “shtetrrethim”

by

Policia e Shtetit ka publikuar masat që do të aplikohen qysh nga dita e nesërme në lidhje me parandalimin e përhapjes së koronavirusit.

Në kuadër të këtyre masave, policia bën me dije se nuk do të lejohet qarkullimi i mjeteve si më poshtë:

1. Nga dita e premte, datë 13.03.2020, ora 06:00, deri të dielën, datë 15.03.2020, ora 00:00, të mos lejohet të qarkullojnë automjete të transportit ndërurban, automjetet private drejt Tiranës dhe Durrësit apo anasjelltas, nga Tirana dhe Durrësi, në drejtim të zonave të tjera të vendit.
2. Nga dita e premte, datë 13.03.2020, ora 06:00, deri të dielën, datë 15.03.2020, ora 00:00, të mos lejohet qarkullimi i automjeteve private brenda në qytetin e Tiranës, Durrësit, Shkodrës, Lezhës, Elbasanit, Lushnjës, Fierit dhe Vlorës.
3. Qarkullimi i automjeteve në këto territore do të jetë i hapur vetëm për autoambulancat dhe automjetet që kryejnë funksione shërbimi shtetëror (personeli shëndetësor dhe social dhe shërbimet mbështetëse në strukturat e kujdesit shëndetësor, publike dhe jopublike, personeli i farmacive publike dhe jopublike, personeli që ofron shërbimet e furnizimit me ushqime, medikamente, shërbimet e kateringut, shërbimet postare, zjarrfikëse, funerale, energjisë, ujësjellës kanalizime, shërbimet private të ruajtjes së sigurisë së objekteve, shërbimet aeroportuale dhe personeli i linjave ajrore), duke dërguar pranë adresës së email: policiarrugore@asp.gov.al, listën e personave të autorizuar dhe duke i paraqitur punonjësve të Policisë një kopje të këtij email-i.
4. Qarkullimi i automjeteve të personave me sëmundje kronike që kanë të planifikuara terapi mjekimi në spitale, duke provuar përmes një dokumenti nevojën për trajtimin e tyre, do të jetë i hapur.
5. Do të lejohen të qarkullojnë automjete të personelit të medias, duke paraqitur dokumentin e tyre të punësimit ose kartën e gazetarit.
6. Për qarkullimin vajtje – ardhje nga aeroporti i Rinasit, drejtuesi i automjetit duhet t’i tregojë punonjësit të policisë, biletat e fluturimit të personave që do të largohen apo foton e biletave të personave që do të mbërrijnë.
7. Marrja në automjetin e punës, e personave të familjes apo personave të tjerë që s’kanë lidhje me detyrën shtetërore është rreptësisht e ndaluar dhe do të ndëshkohet me sanksione të rënda të parashikuara në legjislacionin përkatës.
Policia e Shtetit kërkon mirëkuptimin e të gjithë drejtuesve të automjeteve që të respektojnë këto kufizime me rigorozitet, me qëllim parandalimin e përhapjes së COVID-19, duke kontribuuar të gjithë për sigurinë e jetës.

Kryeministri Rama: Do mbyllen qendrat tregtare, por jo furrat e bukës, ushqimoret dhe farmacitë

Kryeministri Edi Rama ka dhënë shpjegime të reja për 3 ditët e shtetrrethimit për të parandaluar përhapjen e koronavirusit.

Rama qetësoi të gjithë qytetarët se nuk do të mbyllen furrat e bukës, ushqimoret dhe farmacitë. Ndërsa shpjegoi se do të mbyllen qendrat tregtare që nuk ofrojnë shërbime ushqimi.

“Do të pezullohen aktivitetet brenda qendrave të mëdha tregtare që nuk janë të lidhur me shërbimin për ushqim apo farmaceutike. Dyqane rrobash, parfumesh do të mbyllën në mënyrë që të ruhen të gjithë. Ndërkohë që çdo shërbime për ushqime do të jetë hapur. Është dëmshme që të shkojmë të marrim me radhë furrat e bukës. Për blerjen e ushqimeve, medikamenteve do të jetë gjithmonë e mundur që të lëvizet. I gjithë zinxhiri ekonomik do të mbahet për këtë fazë këtu ku jemi. Nesër paradite ushqimoret, furrat e bukës, farmacitë do të jenë hapur”

Kush do të qarkullojë?

Qarkullimi do të jetë i hapur për ambulancat, makinat që kryejnë shërbim shëndetësor dhe social, për farmacitë, për personelin që furnizon me ushqime, me shërbime kateringu, shërbime postare, zjarrfikës, funeral dhe të gjithë personelin që është i lidhur me sistemet e furnizimit me energji apo ujësjellës kanalizime, plus personeli i policive private të ruajtjes së objekteve, gjithashtu personeli i shërbimeve të internetit“.

Rama sqaroi si duhet vepruar për tu akredituar për qarkullim

“Për të gjitha këto ka një metodë shumë të thjesht, në adresën policia rrugore asp.gov.al administratori i kompanisë duhet të dërgojë listën e personelit emër mbiemër, nr telefoni, nr e targës  se makinës. Është një mënyrë fare e thjeshtë për këtë shpejtësi dhe do të shohim si do të funksionojë. Do të ndiqet e njëjta mënyrë për mediat. Mediat duhet ti drejtojnë në adresën asp.gov.al kërkesën me të gjithë emrat me të njëjtin sistem. 

 Edhe qarkullimi i makinave të personave me sëmundje kronike, me dokumenton e nevojshëm për trajtimin e tyre është i hapur, siç është i hapur qarkullimi për persona që bëjnë kujdes sopcial për të moshuar”

Rama: Nëse numri rritet më shpejt sesa masat, do jemi në vështirësi

“Nëse numri do të na rritet më shpejt sesa masat atëherë do të jemi në një pozitë shumë të vështirë, por askush nuk i di të gjitha në këtë situatë. Këto që po ju them janë të konfirmuara nga burimet e ekspertizës. Kjo nuk është një shaka, ku secili mund të japë opinionet e veta “

Çfarë do të ndodhë pas të dielës?

“Para se të vija këtu po dëgjoja kryeministrin britanik i cili shpjegoi pse në Britania nuk do mbyllë shkollat dhe universitet. Është një qasje, por përsa na takon ne do ndjekim qasjen e përshkallëzimit strikt sipas planit për të ngadalësuar shpërndarjen e virusit”. 

Jo fluturime në Itali dhe SHBA, kompanive i kemi kërkuar garantimin e fluturimit ne një datë tjetër

“Patjetër nuk ka kufizim për fluturimet, përveç Italisë dhe Amerikës. Pra kush ka biletë për në Itali apo SHBA duhet të presë momentin kur do të rihapet fluturimi dhe rimbursimi apo më shumë sesa rimbursimi që s’ka për të ndodhur, kompanitë duhet të garantojnë fluturimin në një datë tjetër. Kjo është gjëja që i kemi kërkuar kompanive.

Të gjitha ata që kanë bileta për në Itali me air albania do të kenë të rezervuar vendin në momentin kur të hapen fluturimet.

Masat janë dinamike dhe progresive. Masat nuk ndalojnë ardhjen e virusit, por ta ngadalësojmë shpërndarjen.”

DEPUTETI I BAVARISË SË EPËRME, DELI BALIDEMAJ, LIGJËROI NË FORUMIN RINOR SHQIPTAR NE BAJERN

by

Nga Fisnik Zeqiraj/

“Forumi Rinor Shqiptar” në Bajern, Gjermani, i kryesuar nga Dr. Asllan Tahiraj, organizoi një Simpozium me karakter kombëtar, në kuadrin e përvjetorit të 12-të të Pavarësisë të Kosovës. I ftuar për referim ishte deputeti i Bavarisë së Epërme Ing.Dipl. Deli Balidemaj, i cili ligjeroi mbi temat:

– Hedhja e themeleve të Pavarësisë së Kosovës, hapat e parë shtetformues të Kosovës pas çlirimit, deri te shpallja e Pavarësisë;

– Roli i Mërgatës Shqiptare në këtë proces;
-Roli i Faktorit Ndërrkombëtar dhe sfidat në themelimin e Institucioneve.

Fillimisht, kryetari Tahiraj prezantoi deputetin e vetëm shqiptar në Bavarinë gjermane. Ndër të tjera, ai foli për personalitetin dhe veprimtarinë shumëdimensionale të deputetit Balidemaj, angazhimin e tij, në vijimësi, për problemet dhe kërkesat e Mërgatës shqiptare, në Republikën e Bavarisë dhe më gjerë. Mësimi plotësues, shkolla shqipe ka qenë dhe mbetet preokupimi i deputetit bavarez. Ai është i pranishëm, gjithëherë dhe i kudondodhur, në mesin e mërgimtarëve tanë. Intelektual i kompletuar, komunikues i shkëlqyer, i dashur dhe me edukatë supreme, i gatshëm për të ndihmuar njerëzit në nevojë. Në mes të duartrokitje të anëtarëve të Forumit Rinor dhe të tjerëve, që kishin ardhur për ta dëgjuar ligjëratën dhe bashkëbisedimin, mori fjalën deputeti Ing. Dipl. Deli Balidemaj:

Hedhja e themeleve të Pavarësisë të Kosovës dhe hapat e parë 

shteformues të Kosovës pas çlirimit, deri në shpalljen e Pavarësisë

Suprimimi, marrja e dhunshme e Autonomisë të Kosovës, nga regjimi serb i Sllobodan Millosheviçit, shënon pikën kulmore që nxiti intelektualët e Kosovës, për t`i dhënë fund bashkëjetës me Jugosllavinë, përkatësisht, me Serbinë.

Zhvillimet rapide, të shpejta politike në Evropën Lindore Komuniste, për rrjedhojë, edhe në Ballkanin tonë, favorizojnë dhe trimërojnë edhe popullin e Kosovës, për radikalizimin e rezistencës, fillimisht, paqësore, për të ardhur deri tek veprimet guerile e luftë të armatosur.

Pluralizmi politik, largimi grupor i shqiptarëve nga Partia Komuniste Jugosllave dhe krijimi, fillimisht, i LDK-së, për t`u pasuar me partitë tjera, më vonë, sjellin bashkimin e popullit të Kosovës, në pikën më të lartë të ndërgjegjësimit kombëtar, se kundërshtia kolektive është domosdo e kohës.

Shpallja e Dreklaratës së Pavarësisë të Kosovës, më 2 korrik 1990, nga deputetët shqiptarë të Kuvendit të Kosovës, ishte akt i mençurisë dhe i guximit qytetar, duke shpërfillur dhunën, bunkerizimin e Kosovës dhe tanket serbo-jugosllave, anekënd Kosovës. Deklaratën e Pavarësisë, të shpallur në Bulevardin Qendror të Prishtinës, e pason Kushtetuta e 7 shtatorit 1990, e aprovuar në Kaçanik, nga po ata deputet të Kosovës. Tashmë, Pavarësia e Kosovës konfirmohej edhe juridikisht, pavarësisht shpalljes së njëanshme dhe të mos njohjes nga Jugosllavia dhe bota.

Krijimi i Institucioneve Paralele të Kosovës: Forcat e Armatosura të Republikës të Kosovës, Ministria e Brendshme dhe Sherbimi Informativ i Kosovës, deri tek zgjedhjet Presidenciale më 1992, ishin hapat e parë të shtetndërtimit të Kosovës, madje 10 vjet para çlirimit të Kosovës, më 12 qershor 1999.

Me gjithë përpjekjet për shkëputjen në rrugë paqësore nga Serbia, madje as me luftën e armatosur, Kosova, për shkak të raporit të pabarabartë të forcave ushtarake me Serbinë, nuk arriti të çlirohet me forcat vetanake. Ndërhyrja e forcave të organizuara të NATO-s, me bombardimet në caqet vitale ushtarake në Kosovë, Serbi, Mal të Zi, detyroi, forcërisht, dorëzimin dhe largimin e ushtrisë dhe të pushtetit të dhunës të Serbisë.

Topat dhe krismat e armëve pushuan. Pushteti mikst, vendor dhe ndërkombëtar, po i hidhte hapat e parë, për themelimin e shtetit më të ri në hapësirat ballkanike. Ishte një lindje e vështirë, një lindje e përgjakshme, me krime, masakra dhe rrënim e shkatërrim të pasurive të brezave shqiptarë.

Një Qeveri e Përkohëshme filloi qeverisjen në qershor 1999. Por, ajo nuk u njohë nga ndërkombëtarët, sepse ishte formuar pa zgjedhje normale.

Edhe angazhimi i UNMIK-ut, me multietnicitetin e proklamuar fort, nuk tregoi forcën, që ligji ia garantonte. Në këtë amulli filloi dominimi i Rezolutzës 1244, i kushtëtuar me Dialogun me Serbinë, duke prolonguar, stërzgjatur Pavarësinë e Kosovës. Rol negativ po loznin edhe kontradiktat, etjet dhe ethet për pushtet të forcave politike vendore. Ndërkohë, Serbia e mundur në luftë, mbështetej nga Rusia. Gjeopolitika po kushtëzonte themelimin e një shteti të mirëfilltë, me moton: “Plotësimi i standardeve para statusit!” Serbia aktivizoi agjentët e vetë shqipfolës. Vrasjet e numerike politike, me qëllim të marrjes të pushtetit me dhunë, ishin projekt i Serbisë, për ta bindur botën, Qendrat e Vendosjes Ndërkombëtare, se “shqiptarët nuk janë të aftë për të bërë shtet dhe aq më pak për ta mbajtur atë, pa ndihmën e Serbisë!”

Në favor të kësaj teze, Serbia organizoi protestat e dhunshme dhe të përgjakshme të shqiptarëve në Kosovë, në mars-prill 2004, duke sulmuar e kallur shtëpitë dhe kishat serbe. Këto dhe veprimet tjera, të projektuara në Serbi dhe të lëndëzuara, të zbatuara në Kosovë, i larguan pritjet e afërta, për shpalljen e Pavarësisë të Kosovës. Megjithatë, SHBA-ja me aleatë, përcillnin vëmendshëm zhvillimet në Kosovë dhe nuk lejuan përdhosjen, dështimin e investimeve të mëdha politike e financiare të tyre, për ta finalizuar suksesshëm formimin e shtetit të Kosovës.

Më 17 shkurt 2008, Kosova u shpall shtet i pavarur dhe sovran dhe deri më tani e kanë njohur mbi 100 vende në mbarë botën. Republika e Kosovës u bë shteti më i ri në botë dhe synon anëtarësimin në organizata ndërkombëtare, si: NATO, OKB, BE dhe tjera. Por realiteti i ri vazhdon edhe me tej të kundërshtohet nga Serbia, e cila pretendon sovranitet mbi atë.

Megjithatë, politikat antishqiptare, lufta për pushtet, statusi politik, keqadministrimi ndërkombëtar dhe ai i politikës vendase, në vitet e fundit, kanë bërë që Kosova të radhitet si vendi më i varfër, jo vetëm në Evropë, por edhe ndër vendet më të varfëra në botë. Të vetmet të ardhura janë nga diaspora, ndihmat ekonomike e BE-së dhe Shteteve të Bashkuara, si shtyllat e vetme të ekonomisë së Kosovës.

Roli i Diasporës në procesin e Pavarësisë

Në Mërgatë jeton tej gjysma e popullsisë të Kosovës, po ashtu edhe e Shqipërisë. Mërgimtarët e hershëm të Kosovës, si emigracion i pakët politik, por i shumtë ekonomik, me kontributet e tyre materiale – financiare, dogjën etapat breshkore zhvillimore në Kosovë dhe ngritën standartin e jetesës.

Në aspektin politik, Shoqatat, klubet, partitë politike, pavarësisht nga përkatësia e tyre ideologjike, u angazhuan skajshëm në informimin e popujve dhe të qeverive të tyre, në shtetet ku punonin dhe jetonin ata. Protestat, demonstratat në kryeqytetet e shteteve të Evropës dhe të botës, të cilat, her-herë, arrinin shifrën deri në 100 mijë pjesëmarrës, trokitën në ndërgjegjën e botës demokratike, se mbi popullin shqiptar të Kosovës po ushtrohet dhunë, terror, genocid.

Drejtuesit e subjekteve politike në Diasporë, bënin një informim profesional, shkrimorë dhe gojorë, me personalitetet e vendeve të fuqishme botërore. Lobi Shqiptaro-Amerikan, garda e vjetër e ikanakëve politikë shqiptarëe e kosovarë dhe garda e të sakatosurëve politikë, të diktaturës komuniste, bënin një punë të shkëlqyer informative. Arbreshi Jozef DioGardi me bashkëshortën dhe miqtë e tij amerikanë, kongresmenë e senatorë, agjitonin, fuqishëm, në kancelaritë vendimmarrëse, për ta shpëtuar nga shfarosja popullin e Kososvës. Lobi Shqiptar – Amerikan, qoftë i hershëm apo i vonshëm, arritën të kontaktonin edhe hierarkinë më të lartë drejtuese të SHBA.

Roli i Diasporës, në procesin e luftës për çlirim dhe të Pavarësisë së Kosovës, ka qenë i madh, në mos, vendimtar. Përgjatë bllokadës 10-vjeçare serbo- sllave, 1990-1999, largimit të shqiptarëve nga puna dhe shkolla, Diaspora, mërgimtarët kosovarë dhe të trevave tjera jashtë kufijëve të Kosovës, me kontributet financiare të tyre, mundësuan mbijetesën e popullit të Kosovës. Me Fondet e tyre të liçensuara në Mergatë, sidomos me Fondin e Republikës të Kosovës, të shprehur në 3 %-in obligativ, nga të ardhurat mujore, përballoi emergjencën për ushtrinë e Kosovës, ushqimin, veshmbathjen, mjekësinë dhe një pjesë të armatimit.

Rrjedhimisht, Diaspora shqiptare ishte investitorja potenciale e luftës për çlirim dhe deri ke Pavarësia e Kosovës. Por, me keqardhje duhet pranuar se për të gjithë këtë bagazh shërbimi e ndihme të dhënë, ka munguar mirënjohja, shpërblimi, qoftë ai edhe moral. Përkundrazi, përçmimi ka qenë sa i dukshëm, aq edhe i turpshshëm. Korrupsioni pushtetar ka penguar investimet e Diasporës shqiptare në Atdhe. Urojmë që kjo praktikë të ndryshojë, me qeverisjen aktuale të koalicionit qeverisës aktual.

Roli i Faktorit Ndërkombëtar dhe 

sfidat në themelimin e Institucioneve

Shpallja e pavarësisë së Kosovës ishte hap politik, i koordinuar me faktorët e rëndësishëm të diplomacisë ndërkombëtare, të SHBA dhe vendeve kryesore të Bashkimit Evropian. Pas 17 shkurtit të vitit 2008, sfidë kryesore mbeti njohja ndërkombëtare e pavarësisë së Kosovës. Sfidë në vete përbën mosnjohja nga pesë vendet anëtare të BE-së. Ky fakt ndikon direkt në stabilitetin e vendit dhe në perspektiven e qytetarëve të Kosovës.

Kosova duhet të thellojë edhe më shumë bashkëpunimin me SHBA-në, Gjermaninë, BE-në dhe faktorë të tjerë relevant, në interes të rritjes së efikasitetit dhe shtimin e numrit të njohjeve ndërkombëtare për Kosovën.

Në fokus të këtij ligjerimi është trajtimi i karakterit demokratik të shtetit të Kosovës dhe sfidat e tij, për realizimin e standardeve moderne të qeverisjes, për t’iu bashkuar familjes politike evropiane. Gjithashtu, merret në analizë progresi i padiskutueshëm në zhvillimin dhe promovimin e demokracisë si dhe në ndërtimin e shtetit të së drejtës.

Nuk mund të mos evidentohen përpjekjet serioze të klasës politike të Kosovës për stabilitet politik, qeverisje të qёndrueshme dhe konsolidim institucional. Megjithatë, dekadën e parë të shtetit të tyre të pavarur, kosovarët e festuan në një mjedis politiko-social të karakterizuar edhe nga disa shfaqje të mungesës së hapësirave të lirisë së dëshiruar. Politikberja konsiderohet si një proces evolutiv organizimi dhe administrimi, që zhvillohet dhe përparon, duke mbledhur përvojat e veta. Si e tillë shndërrohet në një organizëm vital, ku shtetasit me aftësinë e tyre kritike, korrektojnë çdo shfaqje spontane privuese, kundrejt progresit të pandalshëm, kah standardeve moderne të lirisë e demokracisë autentike.

Ky jubile i pavarësisë ka si moto, për të gjithë shoqërinë politike të Kosovës, se liria duhet të rritet e të forcohet dhe se qytetarët e vendit nuk janë spektatorë, por aktorë aktivë në formësimin e një shoqërie të mirëorganizuar, në themel të së cilës qëndron koncepti universal i lirisë, drejtësisë dhe demokracisë.

Me shpresë që Qeveria e re do t`i përmbushë pritjet e qytetarëve të Kosovës, ju falenderoj për durimin dhe shpresoj që unë kam mundur t`i përmbushi, deri diku, pritjet e juaja”, – përmbylli ligjëratën e tij, deputeti i Bavarisë gjermane, Ing.Dipl. Deli Balidemaj.

Në fund, kryetari i Forumit Rinor Shqiptar, Dr. Asllan Tahiraj, falenderoi z.Balidemaj dhe u bëri thirrje të gjithë Shqiptarëve në Mynih, më të drejtë vote, më 15 mars 2020, të dalin, masivisht, në zgjedhjet për Keëshillin Bashkiak të Mynihut dhe ta përkrahin zërin e shqiptarëve, Deputetin Balidemaj, i Partisë të Gjelbëve gjermanë.