TE GJITHE TAKIMET E KRYEMINISTRIT HARADINAJ NE TIRANE

September 27, 2017 by dgreca

Kryeministri Haradinaj dhe kryeministri Rama nisin organizimin e Vitit Mbarëkombëtar të Gjergj Kastriotit-Skënderbeut/

TIRANË, 27 Shtator 2017-Gazeta DIELLI/ Rama Haradinaj Tiranë, 27 shtator 2017/Kryeministri i Republikës së Kosovës, Ramush Haradinaj, është pritur sot me nderime të larta në Tiranë nga kryeministri i Republikës së Shqipërisë, Edi Rama, që është edhe vizita e tij e parë jashtë vendit.

Tek Pallati i Brigadave, kryeministri Haradinaj është pritur me ceremoni ushtarake. Pas kësaj, nën kryesinë e dy kryeministrave, është mbajtur takimi i parë inaugurues i Komisionit për organizimin e Vitit Mbarëkombëtar të Gjergj Kastriotit – Skënderbeut.Me këtë rast, kryeministri Haradinaj është shprehur i kënaqur që një organizim i tillë, do të bashkoj edhe më tej shqiptarët.“Kosova ka një rrugë të vështirë të krejt etapave të veta, por çdoherë e ka ndjerë që nuk është vetëm. Edhe në momentet tona më të vështira nuk kemi mbetur vetëm. Pra, populli i Shqipërisë, bashkëkombësit tanë kanë qenë me ne në çdo kohë” ka thënë kryeministri Haradinaj.

Viti i Skënderbeut do të nis me mbledhjen e dy qeverive më 27 nëntor e vijon të nesërmen më 28 nëntor në 105 vjetorin e Pavarësisë. Kryeministri Rama e quajti këtë vit si motiv për të ripërtërirë lidhjet me njëri-tjetrin dhe si një yll orientues të rrugës së përbashkët, në funksion të një të ardhme të merituar për të gjithë shqiptarët.

“Nuk kishte se si sot, teksa kryeministri i Kosovës e nderon Shqipërinë me vizitën e tij zyrtare, mos të nguteshim që të çelnim siparin e përpjekjes së përbashkët për konkretizim të një viti simbolik që e duam të favorshëm dhe frymëzues për të gjithë shqiptarët, viti nën shenjën e paperëndueshme të Gjergj Kastriotit- Skënderbeut” tha kryeministri Rama.

Nën kujdesin simbolik të Presidentit të Republikës së Kosovës, Hashim Thaçit, dhe Presidentit të Republikës së Shqipërisë, Ilir Meta, Viti i Skënderbeut do të bëjë bashkë në aktivitete të ndryshme botën akademike e universitare të dy shteteve, por edhe të vendeve tjera ku jetojnë shqiptarët.

Shqipëria, mbështetëse në proceset euroatlantike të Kosovës/-Presidenti Meta e përgëzoi kryeministrin Haradinaj për marrjen e përgjegjësive të reja, duke premtuar mbështetjen e vazhdueshme të shtetit shqiptar për Kosovën/

-Kryeministri Haradinaj: Institucionet e Shqipërisë zë i fuqishëm në shtimin e njohjeve për Kosovën/

Gjatë qëndrimit në Shqipëri, kryeministri i Republikës së Kosovës, Ramush Haradinaj, është pritur në takim nga presidenti i Republikës së Shqipërisë, Ilir Meta.Fillimisht, presidenti Meta e përgëzoi kryeministrin Haradinaj për marrjen e përgjegjësive të reja, duke premtuar mbështetjen e vazhdueshme të shtetit shqiptar për Kosovën.Presidenti Meta e siguroi kryeministrin Haradinaj se Republika e Shqipërisë do të jetë mbështetëse në proceset euroatlantike të Kosovës, duke vlerësuar rolin e tij në këto procese të rëndësishme për Republikën e Kosovës.Kryeministri Haradinaj vlerësoi lartë rolin dhe kontributin e institucioneve të Shqipërisë, duke veçuar edhe rolin e presidentit Meta në ngritjen e bashkëpunimit në mes të dy vendeve.Poashtu, kryeministri kosovar tha se bashkëpunimi rajonal do të jetë në axhendë të Qeverisë së Kosovës gjatë këtij mandati, me theks me Republikën e Shqipërisë.Gjatë takimit, kryeministri Haradinaj kërkoi që institucionet e Shqipërisë të jenë zë i fuqishëm në shtimin e njohjeve për Kosovën, dhe mbështetëse në anëtarësimin e Kosovës në organizatat ndërkombëtare.

Kryeministri Haradinaj u prit në takime të ndara nga Basha e Berisha/

Kryeministri i Republikës së Kosovës, Ramush Haradinaj, gjatë vizitës në Shqipëri është pritur në takime të ndara nga kryetari i Partisë Demokratike të Shqipërisë, Lulzim Basha dhe nga ish -Presidenti dhe ish- kryeministri, Sali Berisha. Gjatë takimit kryetari Basha e ka uruar kryeministrin kosovar për marrjen e detyrës së re, duke i ofruar përkrahje edhe më tutje në proceset nëpër të cilat po kalon Republika e Kosovës, në këtë fazë. Kryeministri Haradinaj gjatë takimit me kryetarin Basha, shprehu mirënjohjen për përkrahjen që ka marrë në vazhdimësi ai dhe Kosova, nga institucionet dhe partitë politike të Shqipërisë, në të gjitha fazat e rëndësishme, si para po ashtu edhe pas pavarësisë.

Ndërkaq, ish kryeministri Berisha, e ka uruar kryeministrin Haradinaj për detyrën siç tha ai jashtëzakonisht të rëndësishme, për punët që e presin përpara për t’i zgjidhur për Kosovën dhe për mbarë shqiptarët. “Pavarësisht nga kufijtë që kemi, interesat në shumë drejtime janë të njëjta. Kam besim të madh që z. Haradinaj dhe Qeveria e tij do të realizojnë një agjendë e cila është në interes më të madh të popullit të Kosovës, por dhe mbarë shqiptarëve”, tha Berisha.Kryeministri Haradinaj, tha se Kosova ka pasur nder që z.Berisha ta thërras president. “Kemi bashkëpunuar në çdo kapacitet tjetër dhe si kryeministër i Shqipërisë, si kryetar i PD së. Në Kosovë e kemi ndjerë dashurinë e presidentit Berisha për Kosovën. E ndjejmë edhe sot. Poashtu jemi vërtetë të nderuar ta ndajmë një kohë bashkë duke pasur parasysh që ka udhëhequr me Shqipërinë në procese të transformimit të vet, në procese jetike të anëtarësimit në NATO dhe në procese tjera. Njëkohësisht kosovarët përjetësisht do të jenë falënderues presidentit Berisha që në kohën e qeverisjes së tij me Shqipërinë rruga e kombit është bërë realitet”, tha Haradinaj.
Kryeministri Haradinaj u takua me Princin Leka II

Në vazhdën e takimeve që ka zhvilluar në Shqipëri, kryeministri i Republikës së Kosovës, Ramush Haradinaj, në Rezidencën e familjes Mbretërore është pritur edhe nga Princi Leka i II-të, nga i cili pranoi urimet më të përzemërta për zgjedhjen e tij në krye të Qeverisë së Kosovës.

” Ndjehem shumë mirë të pres kryeministrin e Kosovës z.Haradinaj pikërisht në Vitin e Skënderbeut, në Rezidencën e familjes Mbretërore. Ne jemi shumë krenar që kemi një kryeministër që është duke i shërbyer Kosovës me dinjitet, një atdhetar i vërtetë që e do Kosovën. Pikërisht është duke punuar për çështjen kombëtare. E vlerësoj shumë vizitën tuaj kryeministër. Uroj të keni sukses në detyrën tuaj, në shërbim të kombit shqiptar. Jam dhe do të mbetem gjithmonë në shërbim të Kosovës dhe në mbështetjen tuaj”, tha ai.Për kryeministrin Haradinaj tradita për ta vizituar familjen mbretërore, për ta vizituar mbretin Leka më herët, tani prapë mbretin Leka është një traditë e cila buron prej ndjenjës që kemi për rrugën tonë si komb, në shtetndërtim dhe në institucione. “Mbretëria shqiptare na bënë nderë në të gjitha dimensionet, kudo që jemi shqiptar marrim vetëm të mira. I jam mirënjohës mbretit Leka, zonjës Elia, për një angazhim të vazhdueshëm për çështjen shqiptare, qoftë për përfaqësimin e shqiptarëve, vlerave të shqiptarëve, por edhe për tema që lidhen me pozicionin e Kosovës si njohje, si anëtarësim në organizata ndërkombëtare. Ishte një kënaqësi e veçantë. Kemi qenë dhe do të mbetemi çdoherë bashkë”, tha Haradinaj.

Kryeministri Haradinaj u prit nga kryetari i Kuvendit të Shqipërisë, Gramos Ruçi

Kryeministri i Republikës së Kosovës, Ramush Haradinaj, është pritur në takim të veçantë nga kryetari i Kuvendit të Shqipërisë, Gramoz Ruçi, me bashkëpunëtorë.Gjatë takimit kryetari i Kuvendit, Ruçi e përgëzoi kryeministrin Haradinaj për detyrën e re në udhëheqje të Qeverisë së Kosovës, duke vlerësuar lartë dinamikën e re qeverisëse, të vendosur që në fillim të mandatit.Me këtë rast kryetari Ruçi theksoi gatishmërinë e institucionit që drejton që edhe më tutje të vazhdojë bashkëpunimin me Qeverinë e Kosovës në avancimin e agjendës evropiane.Nga ana e tij, kryeministri Haradinaj vlerësoi rolin e legjislativit shqiptar në ndihmën dhënë institucioneve të Kosovës dhe në shtetndërtimin e saj.”Institucionet e Shqipërisë kanë dhënë dhe vazhdojnë të japin kontribut të çmuar për Republikën e Kosovës në të gjitha periudhat, dhe kjo na inkurajon që të vazhdojmë edhe më tutje shkëmbimin e përvojave”, tha kryeministri Haradinaj.

Drejtoresha e VOA: Gjatë diktaturës transmentomin pa e ditur se na dëgjonit

September 27, 2017 by dgreca

Më datën 26 shtator, Drejtoresha e Zërit të Amerikës Amanda Bennett ishte e ftuar speciale në Forumet UET në bashkëbisedim me pedagogë, gazetarë dhe studentë/

Vizita e znj.Bennett në Tiranë erdhi në kuadër të një turneu që ajo ka nisur në pesë vende të Ballkanit, për të komunikuar me publikun e këtyre vendeve mbi rolin e Zërit të Amerikës dhe ndikimit të tij për rajonin. Zëri i Amerikës ka qenë e vetmja dritare e së vërtetës dhe lirisë për shqiptarët nën diktaturën komuniste, kur mund të burgoseshe apo internoheshe nëse kapeshe duke dëgjuar radion në këtë kanal.

Po kjo radio vijon të jetë po aq me ndikim edhe pas 27 vitesh demokraci. Sipas statistikave të vetë radios ajo ndiqet në masën 60.5% në Shqipëri dhe 64% në Kosovë, ndërsa shumë më pak në vendet e tjera të rajonit, respektivisht ndiqet nga 12% e popullsisë në Serbi, 13.4% në Bosnje Hercegovinë dhe 26.5% në Mal të Zi.

Për të kuptuar rolin e kësaj media në Ballkan Drejtoresha e përgjithshme e Zërit të Amerikës e emëruar nga Kongresi Amerikan në mars të vitit 2016, ka ndërmarrë një tur në vendet e Rajonit, i pari tur i këtij lloji nga një drejtor i VOA-s.

Duke folur folur për këtë lidhje të fortë të VOA-s me shqiptarët zonja Bennett tha se “Jam e nderuar të jem këtu, të kuptoj lidhjen që kemi patur ndër vite, ne kemi qenë në këtë zonë për 75 vite, dhe mësova se si për shumë shumë vite kemi transmetuar në Shqipëri pa e ditur, pa e ditur nëse po dëgjonte dikush, kishte thjesht transmetim dhe transmetim, dhe ishte e vështirë të merrje vesh diçka. Ndoshta herë pas herë dikush do të vinte si refugjat dhe do të na thoshte se që të gjithë në Shqipëri e dëgjonin VOA. Dhe mund të mendonim se po na e bëjnë qejfin, po na thonë thjesht atë që duam të dëgjojmë, por pasi çdo gjë u hap ne erdhëm këtu dhe kuptuam se sa shumë njerëz na kanë dëgjuar.

Dhe është nder të kuptosh se kemi një histori të gjatë së bashku. Dhe sot mendoj se ka një gabim që njerëzit kanë bërë në të shkuarën, me situatën e medias në botë; lufta mbaroi, problemet mbaruan, kështu që nuk kemi më nevojë më për këtë. Por unë mendoj që kjo është gabim. Ne po kuptojmë serish që situata e medias këtu në Shqipëri reflekton situatën e medias në botë që ka shumë presione në median e lirë, presioni ekonomik, presioni politik, mundimi për të mbajtur një shtyp të lirë, që s’mban anë, që s’thotë vetëm njërën anë të medaljes. Pra mendoj që mundimi është më i madh se kurrë dhe lidhja jonë është ende shumë e rëndësishme”.

Media në Shqipëri për Bennett përballet me sfida më të mëdha se mediat në SHBA e vendet me demokraci më të zhvilluar, por ajo beson se gazetarët shqiptarët duhet të jenë më të bashkuar për t’i shërbyer njerëzve me përcjelljen e së vërtetës.

“Gazetarët e rinj në Shqipëri përballen me sfida shumë të veçanta, të ndryshme me ato që përballen gazetarët në vendin tim. Ajo çfarë po shoh në Ballkan, është se edhe me këtë situatë ata sërish mund të gjejnë gjëra që mund të bëjnë. Mendoj që disa nga gjenerata më e vjetër e gazetarëve janë mjaft të fokusuar në atë ç’ka nuk mund të bëjnë, dhe ka shumë gjëra që mund të bëjnë. Shumë po përqëndrohen në atë ç’ka mund të bëjnë dhe mendoj është shumë e rëndësishme, po përpiqen të gjejnë burime, vende nga ku mund të gjejnë informacione për t’ia përcjellë njerëzve. Dhe mendoj që gjëja tjetër është që, gazetarët si të gjithë të tjerët duhet të bashkohen sepse nuk shoh ende ndonjë provë që ka një kulturë për të ndihmuar njëri-tjetrin dhe të mbështetin njëri-tjetrin. Ju keni ligje shumë të mira informacioni, që ndoshta nuk janë kaq optimale sa duhet të jenë, por në eksperiencën time, në SHBA, edhe pse kemi ligje të mira informacioni, nëse nuk do të kishim luftuar çdo ditë, çdo hap për ta marrë atë informacion, do të ishte pa kuptim. Sepse besoj se ti merr aq liri , sa lufton për të”- tha ajo.

Rreziku i industrisë së “Fake News” dhe ndikimit rus në Ballkan

Industria e “Fake News” dhe ndikimi me anë të mediave e Rusisë në Ballkan është një rrezik që duhet luftuar me median e vërtetë, me informacionet e bazuara në fakte. Kështu beson, drejtoresha e përgjithshme e Zërit të Amerikës.
E pyetur për rolin e Rusisë në Ballkan dhe ndikimit nëpërmjet mediave, gazetarja qëka fituar çmimin Pulitzer në SHBA, u shpreh:
“Mendoj që rreziku është nga çdo vend, organizatë, lëvizje politike, çdo gjë, çdo njeri, që mundohet të përhapë këtë lloj informacioni, sepse e sheh që vjen nga shumë vende të ndryshme, kshtu që,po mendoj që është një shqetësim shumë i madh. E shoh në Ballkan si dhe në SHBA, e shoh në të gjithë botën. Dhe mendoj që nuk vjen thjesht nga një vend, kshtu që duhet të dyfishojmë përpjekjet që të arrijmë të përcjellim informacion të bazuar në fakte njerëzve, është shumë kritike, veçanërisht në Ballkan, ku mendoj se ju keni shumë eksperiencë me këtë. “
Ndërsa për industrinë e “Fake News”, lajmeve të rreme ajo tha se duhet të shqetësohemi për çfarëdolloj përpjekje që po ndodh për të na mbushur mendjen se çfarë nuk është e vërtetë është e vërtetë dhe anasjelltas.
“Unë besoj se është ‘OK’ të luftosh në betejë edhe kur e di se do të humbasësh, dhe kjo është një betejë që unë e di se do ta humbas. Do doja që njerëzit të mos e përdorinin fjalën “lajm i rremë” kurrë më dhe e gjej shumë të vështirë, unë e përdor vetë sepse nëse thua lajm i rremë, do të thotë se pranon se lajmi mund të jetë i rremë, dhe nëse është i rremë nuk është lajm. Kjo është ajo për të cilën po mundohen të na bindin, se mund të kesh lajme që janë të rreme, por nuk mund të jetë. Nëse nuk është i saktë, i bazuar në fakte, nuk është lajm. Po përpiqen të na binin se s’ka fakte fare, se faktet janë opsionale, se faktet nuk kanë rëndësi dhe unë vërtetë e kundërshtoj këtë ide, që ska diçka të tillë si faktet. Por mund të shohësh problemi e lajmit të rremë, fjalës lajm i rremë, se shumë shpejt në vendin tonë, filloi duke thënë gjëra që vinin nga vendet e tjera, që ishin të gabuara, që vinin nga adoleshentë që po sillnin informacion fals dhe shumë shpejt lajmi i rremë u bë “lajmi me të cilin unë nuk bie dakort”. Dhe mendoj ky është rreziku kur e e thua këtë. Lajmi me të cilin nuk bie dakort nuk është domosdoshmërisht fals, mund të jetë i pakëndëshëm, që s’dua ta dëgjoj, por jo fals”, u shpreh Bennett.
Problemi i medias me lindjen e konceptit “post-truth” është shqetësues pranon ajo, por Bennett beson se ka gjithmonë diçka që gazetarët dhe media serioze mund ta kontrollojë.
”Nuk mund t’i detyroj qeveritë e huaja që të mos dërgojnë më informacione false nëpërmjet internetit, nuk mundem ta ndaloj këtë. Por mund të kontrolloj se cilat janë standartet që kemi dhe mendoj që në masën që mainstream media po polarizohet. Mendoj që media, përfshirë media mainstream, janë duke e vendosur veten në pozicione mjaft politike, puna jonë si VOA është të kthehemi në vlerat e vjetra të gazetarisë që kemi patur 30 vite më parë, që janë; të jemi të balancuar, të drejtë, të bëjmë lajme të bazuara në fakte, të raportojmë lajmet ashtu sic janë dhe të sigurohemi që të tregojmë të gjitha pikëpamjet, edhe të njerëzve që ndoshta nuk ua kemi vënë shumë veshin në vitet e kaluar”- theksoi ajo.
Drejtoresha Bennett shoqërohet në këtë turne nga Elez Biberaj, Drejtor i Divizionit të Euroazisë. Biberaj thotë se “në një botë ku besimi tek media po bie, Zëri i Amerikës vazhdon të luajë një rol jetik, si një prej burimeve më të besuara të lajmeve. Zëri i Amerikës ofron alternativën e njoftimit të bazuar në fakte, përballë propogandës, shërben si një mjet ku mund të gjesh alternativat që ofron opozita, si dhe debatin publik, duke nxitur zhvillimin e shoqërive të lira e të drejta”. {SH.K}

Kryediplomati i Kosovës, Pacolli vizitë zyrtare në Mal të Zi

September 26, 2017 by dgreca

-Pacolli: Ne e respektojmë plotësisht sovranitetin dhe integritetin territorial të Malit të Zi dhe jemi të bindur se dhe Mali i Zi ushqen të njëjtin respekt ndaj nesh. Asgjë nuk është e pamundur në marrëdhëniet midis dy fqinjëve, që e respektojnë dhe e vlerësojnë njeri tjetrin/-Qeveria e re e Kosovës javën e kaluar, në 22 shtator 2017, ka emëruar Komision të ri për shënjimin dhe mirëmbajtjen e kufirit shtetëror, ndërsa qeveria e kaluar, para një viti – në 1 shtator 2016, e përballur me kundërshtimet e opozitës, ka tërhequr nga rendi i ditës dhe procedura kuvendore marrëveshjen e Demarkacionit me Malin e Zi, e cila është nësnshkruar në Vjenë në 26 gusht 2015/

PRISHTINË, 26 Shtator 2017-Gazeta DIELLI-B.Jashari/ Zëvendëskryeministri i parë dhe ministri i Jashtëm i Kosovës, Behgjet Pacolli, sot në vizitë zyrtare në Mal të Zi zhvillon takime me autoritetet e këtij shteti fqinj, fillimisht me ministrin e Jashtëm Srdjan Darmanoviq.

Pas takimit, kryediplomati i Kosovës, Pacolli deklaroi:“Jemi këtu me mikun tim, kolegun, Srdjan Darmanoviç, për të konfirmuar ndjenjat më të forta të miqësisë së popullit kosovar, të qeverisë sonë, të shtetit të Kosovës ndaj popullit malazez, qeverisë dhe shtetit të Malit të Zi. Dua t’ju falënderoj në mënyrë të veçantë për mikpritjen dhe gatishmërinë e treguar për të organizuar në mënyrë të suksesshme vizitën time.

Qeveria e re, e vendosur në Prishtinë e kryesuar nga Kryeministri Haradinaj, unë në cilësinë e numrit dy të qeverisë, edhe në emër të Presidentit Thaçi, donim shumë që ta konfirmonim vullnetin për të çuar në një nivel të ri marrëdhëniet me Republikën fqinje të Malit të Zi, duke zhvilluar këtu njërën ndër vizitat e para të miat jashtë vendit.

Mali i Zi është shteti i dytë, që unë po vizitoj në cilësinë e Ministrit të Jashtëm. Në këtë gatishmëri, në këto përpjekje tonat, ne shprehim në mënyrën më besnike ndjenjat e miqësisë të popullit tonë kundrejt popullit të Malit të Zi.

Kosova i është mirënjohëse Malit të Zi për mbështetjen gjatë historisë së largët dhe të afërt, veçanërisht gjatë periudhës së luftës së fundit. Midis dy popujve tanë ka lidhje tradicionale miqësie dhe bashkëpunimi, në nivel familjesh, individësh, komunash, institucionesh dhe partish politike.

Minoriteti malazez është një urë e fuqishme miqësie. Si diskutuam me Srdjanin, ne jemi të gatshëm të nënshkruajmë një marrëveshje të Partneritetit Strategjik midis dy vendeve;

Ne jemi të gatshëm të organizojmë mbledhjet e përbashkëta të dy qeverive tona në momentin më të parë;

Ne duam të shfrytëzojmë eksperiencën e Malit të Zi për integrimin euroatlantik;

Ne duam të shtyjmë përpara zhvillimin e marrëdhënieve ekonomike, të rrisim vëllimin e shkëmbimeve tregtare;

Ne jemi të gatshëm të shohim mundësitë e shtimit dhe ndërtimit të rrugëve të komunikimit midis dy vendeve;

Ne jemi të vetëdijshëm për ekzistencën e një problemi në marrëdhëniet midis nesh. Ne do të bëjmë çmos që ky problem të kapërcehet në frymën e miqësisë dhe të bashkëpunimit midis dy vendeve dhe të parimeve të së drejtës ndërkombëtare;

Ne e respektojmë plotësisht sovranitetin dhe integritetin territorial të Malit të Zi dhe jemi të bindur se dhe Mali i Zi ushqen të njëjtin respekt ndaj nesh. Asgjë nuk është e pamundur në marrëdhëniet midis dy fqinjëve, që e respektojnë dhe e vlerësojnë njeri tjetrin”.

Në vijim, në axhendë janë takimet e veçanta me zv/kryeministrin dhe ministrin e Drejtësisë, Zoran Pazhin, kryetarin e Parlamentit, Ivan Brajoviq dhe presidentin e Malit të Zi, Filip Vujanoviq.

Kryediplomati i Kosovës do ketë edhe një takim me drejtuesit e partive politike shqiptare në Mal të Zi.

Nuk janë njoftuar zyrtarisht temat e takimeve, ndërsa sipas shtypit të sotëm kosovar, “temë qendrore e diskutimit me zyrtarët e lartë të shtetit malazez pritet të jetë marrëveshja e pa përfunduar për shënimin e kufirit ndërshtetëror”.

Qeveria e re e Kosovës javën e kaluar, në 22 shtator 2017, ka emëruar Komision të ri për shënjimin dhe mirëmbajtjen e kufirit shtetëror, ndërsa qeveria e kaluar, para një viti – në 1 shtator 2016, e përballur me kundërshtimet e opozitës, ka tërhequr nga rendi i ditës dhe procedura kuvendore marrëveshjen e Demarkacionit me Malin e Zi, e cila është nësnshkruar në Vjenë në 26 gusht 2015.

Mali i Zi është shteti i 48-të që ka njohur Kosovën në 9 tetor të vitit historik 2008 të shpalljes së pavarësisë.

Serbia në Paris kundër shtetit dhe anëtarësimit të Kosovës në UNESCO

September 26, 2017 by dgreca

Fejaz Drançolli*/

Akademiku serb Dobrica Qosiq konstaton: “Gënjejmë për ta mashtruar veten, për ta ngushëlluar tjetrin, gënjejmë nga dhembshuria, gënjejmë nga turpi për t’u trimëruar, për ta fshehur varfërinë tonë, gënjejmë për arsye nderi. Gënjejmë për arsye të lirisë. Gënjeshtra është pamje e patriotizmit serb, vërtetim i inteligjencës së lindur. Gënjejmë me kreativitet, imagjinatë dhe inovacion. Gënjeshtra është interes shtetëror serb. Gënjeshtra është pjesë e të qenit serb. Në këtë vend secila gënjeshtër në fund pranohet si e vërtetë. Serbët shumë herë në histori i ka shpëtuar gënjeshtra.”.
Një shtet që me egoizëm e mbron trashëgiminë në territorin vet, e përvetëson kulturën shpirtërore e materiale të të tjerëve, dhe në anën tjetër plaçkitë, djegë e shkatërron trashëgiminë kulturore si të lëvizshme ashtu edhe të palëvizshme, vlerat historike të një populli tjetër si në rastin e Kosovës, nuk bën pjesë ndër shtetet e civilizuara.

Një shtet si Serbia që me forcat shtetërore plaçkiti, dogji dhe rrënoi afro 2700 objekte të trashëgimisë kulturore shqiptare e në kuadër të tyre edhe një numër të komplekseve dhe të objekteve të shpallura si monumente kulturore-historike me rëndësi dhe vlera të veçanta, nuk e meriton që të jetë anëtare e UNESCO-s e lëre më të pengojë pranimin e Kosovës në këtë organizatë ndërkombëtare.

Marrja e muzealeve nga Muzeu i Kosovës (1998) si dhe shkatërrimi gjenocidal i trashëgimisë shqiptare në Kosovë (1998-1999, por edhe më parë), plaçkitja e dokumentacionit të Institutit të Kosovës për Mbrojtjen e Trashëgimisë Kulturore në Prishtinë dhe moskthimi i tyre në Kosovë, nuk duhet të jetë dhe nuk është diç e panjohur për shtetet anëtare të UNESCO-s. Mirëpo, shteti gjenocidal i Serbisë këto ditë, (15 shtator 2017) para ambasadorëve të vendeve anëtare të UNESCO-s u paraqit me një ekspozitë e film dokumentar, me një prezantim jo të saktë, të rrejshëm në lidhje me trashëgiminë e Kosovës në Paris.

Serbët gjatë historisë së tyre shpesh kanë gënjyer. Këtë më së miri na e dëshmon edhe thënia e akademikut serb Dobrica Qosiq: “Gënjejmë për ta mashtruar veten, për ta ngushëlluar tjetrin, gënjejmë nga dhembshuria, gënjejmë nga turpi, për t’u trimëruar, për ta fshehur varfërinë tonë, gënjejmë për arsye nderi. Gënjejmë për arsye të lirisë. Gënjeshtra është pamje e patriotizmit serb, vërtetim i inteligjencës së lindur. Gënjejmë me kreativitet, imagjinatë dhe inovacion. Gënjeshtra është interes shtetëror serb. Gënjeshtra është pjesë e të qenit serb. Në këtë vend secila gënjeshtër në fund pranohet si e vërtetë. Serbët shumë herë në histori i ka shpëtuar gënjeshtra.”

Si përherë edhe kësaj radhe në Paris të Francës, Serbia vazhdon me avazin e vjetër, tradicional, garashanian (1844) shekullor, pa precedent përpjekjet e saja të ulëta për përvetësimin e trashëgimisë fetare ortodokse mesjetare në veçanti. Trashëgimia historike-kulturore si fetare ashtu edhe ajo laike që gjenden në territorin e Kosovës u takojnë kryesisht banorëve autoktonë, pra shqiptarëve dhe popujve të tjerë ardhacakë, që disa nga këto monumente shfrytëzohen edhe sot nga ata.

Propagandimi në vijimësi i këtij lloji dhe në mënyrë jo reale, jo qytetëruese me ekspozitë dhe film të përgatitur enkas nga shteti i Serbisë që u paraqit në qendër të Parisit, në qytetin ku është edhe selia e UNESCO-s, është një prezantim bajat për shqiptarët dhe të tjerët që i njohin qëllimet e Serbisë. Kosova është shtet dhe si e tillë është njohur dhe pranuar me vendim të posaçëm edhe nga Gjykata Ndërkombëtare e Drejtësisë. Pra, shpallja e pavarësisë së Kosovës është legjitime dhe e pranuar ndërkombëtarisht, deshi apo nuk deshi Serbia. Legjitime do të jetë edhe pranimi, anëtarësimi i Kosovës në UNESCO. Serbia duhet të ecë me hapa të kohës, sa më parë aq më mirë për Serbinë dhe popullin e saj.

Të përkujtojmë se në Qendrën Kulturore të këtij shteti në Paris, pos tjerash u prezantua një material në lidhje edhe me shkatërrimin e trashëgimisë kulturore në Kosovë në ditët e 17 dhe 18 marsit të vitit 2004. Të theksojmë dhe duhet përkujtuar se në marsin e vitit 2004, pas vrasjes së tre fëmijëve shqiptarë në Mitrovicë dhe djegies së Xhamisë në Beograd dhe tjetrës në Nish, më 17 mars, në Kosovë shpërthyen trazirat, (përveç viktimave të shumta kryesisht shqiptarë, të vrarë e të plagosur), dhe nga individë të paidentifikuar deri më tani, u dogjën pesë kisha dhe u demoluan dymbëdhjetë kisha të tjera ortodokse në Kosovë si dhe disa objekte banimi në Nënkalanë e Prizrenit.

Pesë kishat e djegura kryesisht ishin të ndërtuara pas okupimit të Kosovës në mes të dy luftërave botërore si dhe të periudhës pas Luftës së Dytë Botërore. Asnjë kishë a kompleks me rëndësi dhe monument i periudhës paleokristiane të shekujve IV-VI, (kur serbët as që dinin dhe as që ishin në territorin e Kosovës së sotme, ata ishin paganë dhe në fenë krishtere filluan të konvertohen diku rreth shek. IX e që zgjati edhe gjatë sundimit Nemanjid) përkatësisht të riadaptuara dhe të përshtatura liturgjisë së kohës mesjetare të shek. XIII e XIV nuk u dëmtuan, nuk u demoluan dhe nuk u dogjën.

Ёshtë me interes të veçantë, dhe duhet theksuar se gjatë luftës çlirimtare (1998-1999) në zonat e kontrolluara nga Ushtria Çlirimtare e Kosovës, nuk u dogj dhe nuk dëmtua asnjë objekt fetar ortodoks në territorin e Kosovës.

Njëherësh, duhet cekur se nga autori i tekstit u përgatit publikimi në gjuhën angleze ”Monuments of Kosova”, botoi MKRS, Prishtinë, 2005. Publikimi në fjalë u paraqit në vitin 2005, në Selinë e UNESCO-s, në Paris, përkitazi me shkatërrimin e trashëgimisë, monumenteve në Kosovë nga ana e pushtetit serb, duke zënë në gojë edhe trazirat e marsit të vitit 2004. Po ashtu, nga autori i njëjtë u përgatit dhe u hap ekspozita e fotografive të monumenteve të shkatërruara, IHKL, Prishtinë, 2012. Kjo ekspozitë u prezantua në disa shtete si në Shqipëri (Tiranë), Turqi (Ankara, Stamboll dhe Bursa) në Austri (Vjenë) e Prishtinë. Këtu u prezantua një pjesë e djegieve, rrënimeve, dëmeve dhe përgjithësisht barbaria ndaj monumenteve, trashëgimisë kulturore-historike shqiptare të kryera nga forcat policore, ushtarake e paramilitare serbe gjatë luftës së viteve 1998-1999. Po nga autori i njëjtë në botim të IHKL-së dolën edhe dy monografi: “Monumentet e shkatërruara në Kosovë 1998/99”, Prishtinë, 2015, dhe “Trashëgimia e shkatërruar në Kosovë 1998/99, Prishtinë, 2017. Monumentet e shkatërruara të trashëgimisë kulturore, të trajtuara në këto botime, u takojnë shek. XV-XIX dhe XX. Këto publikime janë dëshmi të mjaftueshme për ta demaskuar prezantimin e tendencioz të Serbisë në Paris.

Shkatërrimet e monumenteve ishin të planifikuara nga shteti serb dhe kishin për qëllim zhdukjen e komplekseve urbane-arkitekturale, të ekzemplarëve të veçantë të objekteve të vjetra qytetare të banimit etj., që ishin të valorizuara dhe kishin vlera me rëndësi historike, artistike, arkitekturale e mjedisore, kishin për synim zhdukjen e gjurmëve autoktone të lokaliteteve arkeologjike, veçmas të gjurmëve të kulturës ilire-arbërore-shqiptare. Kjo u pa sheshazi nga ajo që ndodhi pas luftimeve të para në Kosovë në vitet 1998-1999. Këto shkatërrime të trashëgimisë kulturore si fetare ashtu edhe laike, publike e individuale as që u përmendën në këtë film “dokumentar” të shtetit serb. Por, një gjë të tillë as që e kemi pritur nga Serbia.

Shteti i Kosovës nuk duhet të rrijë duarkryq, duhet të veprojë kundër gënjeshtrave të shtetit serb meqë, në këtë aspekt edhe posedojmë fakte, dëshmi dhe publikime të pamohueshme për vjedhje dhe shkatërrimin e trashëgimisë historiko-kulturore shqiptare. Sot, si pasojë e këtyre shkatërrimeve një numër i madh i tyre nuk ekzistojnë. Një shkatërrim i përmasave të këtilla ndaj trashëgimisë nuk duhet të harrohet por, përherë të përkujtohen. Forcat shtetërore të Serbisë, përkatësisht të mbetjes së ish-Jugosllavisë, ushtria, policia dhe paramilitarët i dogjën 218 xhami, 6 teqe, 2 tyrbe, 4 medrese, 4 mejtepe, 1300 dyqane (në Çarshinë e Vjetër të Pejës, Gjakovës dhe të Vushtrrisë), 685 kulla, 33 shtëpi të arkitekturës banesore tradicionale, 2 hamame, 1 urë, 560 metra kub piktura murale, 8 kisha katolike e shumë ndërtime të tjera me vlera të trashëgimisë historike – kulturore e fetare, duke mos i përmendur sendet e lëvizshme që ishin pjesë e enteriereve të objekteve.

Këto fakte të pamohueshme duhet t’i tregojmë përherë, t’ua përkujtojmë shteteve anëtare të UNESCO-s, ( edhe pse ata e dinë, zyrtarisht janë të informuar, përmendim këtu rastin se gazeta parisiene “Le Monde”, në dhjetor të vitit 1999, ka biseduar dhe shkruar për shkatërrimin e trashëgimisë kulturore me ish-drejtorin i IKMMK, autorin e këtij shkrimi.

Shteti i Serbisë, në kuadër të ish-Jugosllavisë edhe pse i ka ratifikuar konventat ndërkombëtare në lidhje me mbrojtjen e vlerave kulturave, ajo nuk i zbatoi në asnjë rast. Nuk e zbatoi Konventën e Hagës (1954) për Mbrojtjen e Trashëgimisë Kulturore Gjatë Luftës. Nuk i ka zbatuar as Konventat e Konferencës Gjenerale të Kombeve të Bashkuara për Arsim e Shkencë, të mbajtur në Paris në vitin 1972, etj. Pra, çfarë morali dhe çfarë të drejte ka Serbia të na shet mend në zemrën e kulturës dhe të artit botëror në Paris?!!! Serbia këtë e di, por kur gjejnë…

Për sjellje dhe veprime barbare, anticivilizuese ndaj vlerave, kulturave, monumenteve shqiptare që kishin për qëllim zhbërjen e kulturës dhe të identitetit shqiptar duhet të ndëshkohet Serbia e jo të pësojë shteti i Kosovës. Këtë duhet ta dinë shtetet anëtare të UNESCO-s e nëse ato kanë harruar duhet t’ua përkujtojmë dhe vetëm t’ua përkujtojmë… Barbarizmi që e bëri Serbia ndaj trashëgimisë, kulturës dhe identitetit shqiptar, nuk është krim vetëm ndaj kulturës së popullit në fjalë, por është krim edhe ndaj thesarit botëror. Me këto shkatërrime nuk rrënohet vetëm trashëgimia dhe arti i një rajoni dhe i një populli, por një pjesë e krijimtarisë shekullore të trashëgimisë botërore.

*(Autori i shkrimit është historian i artit, Këshilltar Shkencor në Institutin për Hulumtimin e Krimeve të Luftës (IHKL), në Prishtinë). E falenderojme qe e dergoi per lexuesit e Diellit.

Grupe kriminale, droga dhe dhuna në familje

September 25, 2017 by dgreca

….PD e LSI debate të ashpra me Qaton në Komisionin e Sigurisë/

Komisioni i Sigurisë Kombëtare ka nisur me debate për shqetësimin e madh që është krijuar për fenomenin e dhunës në familje, por edhe grupet kriminale, nisur nga rastet e fundit ku të paktën në 5 raste është sulmuar policia.

Është drejtori i Përgjithshëm i Policisë për Rendin dhe Sigurinë në Policinë e Shtetit, Altin Qato ai i cili po raporton në Komisionin e Sigurisë në Kuvend.

Deputeti i PD, Flamur Noka ka lëshuar akuza të forta në drejtim të policisë së shtetit, ndërsa sipas tij, Shqipëria është vend transit për drogën. “Një Shqipëri që është vend transit i drogave të forta, nuk mund të ketë polici të besueshme.

Drejtues të lartë të policisë janë të përfshirë në trafikun e kanabisit. Ndërsa drejtues policie janë të larguar me kërkesë të ambasadës amerikane.

Nëse do vazhdoni ta mbani policinë në lidhje me krimin, do ta degradoni dhe kalbeni. Në 4 vitet që shkuan nuk u fol gjë tjetër vetëm për drogën.

Ato që thashë nuk bazohen në hamendje. Deklaratat e prokurorisë dhe informacionet e shërbimit sekret flasin për përfshirjen e zyrtarëve të policisë së shtetit janë të lidhur me drogën.

Partnerët ndërkombëtarë sidomos ata amerikane e kanë evidentuar këtë” deklaroi Noka.

Nga ana e tij, deputeti i LSI, Endrit Brahimllari ka ngritur pyetjen se çfarë masash po merren nga policia për dhunën në familje.

Ndërsa Qato ka deklaruar se “po analizojmë rastet dhe po studiojmë ndërhyrjen. Nuk mjafton policia. Duhet dhe partneritet mes aktoreve të tjerë”.

Deputeti i djathtë Ervin Salianji ka kërkuar informacion nëse është zbardhur ndonjë grup i strukturuar kriminal.