Politike – Page 543 – Dielli

DITA E TE PAGJETURVE NE KOSOVE

April 27, 2017 by dgreca

-Kosovë-Thaçi: Bashkësia ndërkombëtare t’i bëjë trysni Serbisë për zbardhjen e fatit të pagjeturve/

-Kosova shënon Ditën e të Pagjeturve, tubim përkujtimor në Mejë të Gjakovës/

-“Liria, demokracia dhe çdo vlerë e ndërtuar me mund dhe sakrificë në Kosovën e lirë, nuk është e plotë pa dënimin e kriminelëve për personat e vrarë, të masakruar dhe pa zbardhjen e fatit të të zhdukurve dhe të varrosurve brenda dhe jashtë Kosovës”, tha presidenti Thaçi/

PRISHTINË, 27 Prill 2017-Gazeta DIELLI-B.Jashari/ Kosova shënoi sot Ditën e të Pagjeturve të saj -27 Prillin, në mesditë, në Mejë të Gjakovës në Kompleksin Memorial u organizua tubimi përkujtimor për masakran e para 18 viteve, ku presidenti i Republikës, Hashim Thaçi tha se bashkësia ndërkombëtare duhet t’i bëjë trysni Serbisë për zbardhjen e fatit të të pagjeturve.

“Dita Ndërkombëtare e Personave të Pagjetur në botë shënohet më 30 gusht, por në Kosovë ajo me të drejtë shënohet më 27 prill, në ditën kur forcat ushtarake dhe policore serbe vranë dhe masakruan 377 qytetarë të pafajshëm në Mejë të Gjakovës”, u shpreh presidenti.

Thaçi tha se, sakrifica dhe dhimbja e madhe e Mejës është ajo që përmbylli Javën e të Pagjeturve dhe të viktimave të terrorit shtetëror serb anekënd Kosovës, si në Qirez e Likoshan, në Prekaz, Reçak, Krushë, Izbicë, Rezallë, Çikatovë, Poklek, Qyshk e kudo ku pësuan banorët e pafajshëm në vitet e luftës.

“Liria dhe pavarësia e Kosovës në themelet e saj ka gjakun dhe jetën e dëshmorëve dhe martirëve. Prandaj për dëshmorët dhe martirët e Kosovës nderimi institucional është i përjetshëm”, u shpreh ai.

Presidenti kosovar shtoi se, do të përkulemi gjithmonë me respekt dhe pietet të thellë para secilit dëshmor dhe martir.

“Liria, demokracia dhe çdo vlerë e ndërtuar me mund dhe sakrificë në Kosovën e lirë, nuk është e plotë pa dënimin e kriminelëve për personat e vrarë, të masakruar dhe pa zbardhjen e fatit të të zhdukurve dhe të varrosurve brenda dhe jashtë Kosovës”, tha presidenti Thaçi.

Kreu i shtetit theksoi se vlerëson punën e të gjitha institucioneve vendore dhe ndërkombëtare që kanë bërë deri më tani për zbardhjen e fatit të të pagjeturve. Por, sipas tij, familjet e personave të pagjetur me të drejtë kërkojnë që të bëhet më shumë për zbardhjen e së vërtetës për më të dashurit e tyre.

“Ata me të drejtë kërkojnë ta dinë përfundimisht se kush kanë qenë urdhërdhënësit zyrtarë dhe ekzekutuesit e krimeve në periudhën ‎‎1998-1999. Institucionet vendore, shoqatat dhe komisionet për personat e pagjetur kanë bërë aq sa kanë lejuar kapacitetet e tyre në këtë drejtim. Përpjekjet për të ndriçuar çdo rast të krimit mbi civilët e pafajshëm nuk do të ndalen asnjëherë. Por, ajo çka mbetet jashtë mundësisë së ndikimit të institucioneve tona, i takon bashkësisë ndërkombëtare që të ushtrojë trysni serioze tek Beogardi zyrtar, i cili posedon arkivat dhe të dhënat e sakta të veprimeve të ushtrisë dhe policisë serbe”, theksoi presidenti Thaçi.

Ai edhe në Mejë ritheksoi se Kosova dhe qytetarët e saj kanë një orientim të qartë politik e strategjik dhe integrimi në BE, në NATO dhe OKB është vizioni dhe ardhmëria e Kosovës.

Në Mejë, në Lëndinën e Pikëllimit, në 27 prill 1999, forcat serbe masakruan e zhdukën 377 shqiptarë që i rrëmbyen nga kolona e refugjatëve.

Asnjëri nga të ndaluarit në rrethimin e hekurt të kolonës së civilëve nuk kishte arritur të dilte i gjallë. Ajo ishte një nga kolonat e shumta të spastrimit etnik, të rreth 1 milion shqiptarëve të dëbuar nga Kosova, shumica drejt Shqipërisë.

Në Kosovë, 18 vjet pas luftës, janë ende mëse 1600 të zhdukur të pagjetur. “Atyre që na mungojnë”, me këtë emërtim, u është ngritur përmendore në sheshin kryesor të Prishtinës, para ndërtesës së Kuvendit të Kosovës.

“27 Prill – Dita e të Pagjeturve të Kosovës…vazhdojmë t’i kërkojmë…” shkruan në njoftimet e Komisionit Qeveritar për Persona të Zhdukur, me axhendën e shënimit të kësaj dite, të vendosura nga grupe të rinjësh nëpër kryeqytet, Prishtinë.

Nisma e të Rinjve për të Drejtat e Njeriut-Kosovë ka paralajmëruar aksionin simbolik me rastin e Ditës Kombëtare për Personat e Pagjetur, i cili do të realizohet në mbrëmjen e sotme në Sheshin Ibrahim Rugova në Prishtinë.

Në luftën e para mëse 18 viteve kundër Kosovës, në fushatën e terrorit, spastrimit etnik e gjenocidit, forcat serbe të Milosheviçit, i njohur edhe si Kasapi i Ballkanit, i cili më pastaj ka përfunduar në Tribunalin për Krime Lufte në Hagë, kanë vrarë e masakruar më shumë se 12.000 shqiptarë, e mijëra të tjerë i zhdukën duke i dërguar e groposur edhe në Serbi, apo edhe duke i djegur, kanë dëbuar rreth një milion, shumicën drejt Shqipërisë “përtej Bjeshkëve të Nemuna”, dhe kanë djegur mëse 400 qytete dhe fshatra.

Instituti për Hulumtimin e Krimeve të Luftës në publikimet e tij dëshmon se, pas luftës së përfunduar në 12 qershor 1999 në Kosovë nga Kryqi i Kuq Ndërkombëtar evidentoheshin 6027 persona të zhdukur, të lajmëruar nga familjarët.

Edhe sipas të dhënave të asociacioneve familjare të të zhdukurve të pagjeturve, numri i tërësishëm i të zhdukurve të Kosovës pas luftës së para 18 viteve mbërrinte mëse 6.000 veta. Mbi 90 për qind prej tyre ishin civilë shqiptarë, të cilët u rrëmbyen, u morën të gjallë në mënyra të ndryshme nga formacionet policore-ushtarake dhe paramilitare të pushtetit okupues serb. Një numër i tyre, rreth 600 janë gjetur të gjallë nëpër burgjet në Serbi.

Kosova vazhdon të kërkojë zbardhjen e fatit të qytetarëve të saj të zhdukur dhe me këtë mesazh fotografitë e të pagjeturve janë vendosur e rivenodur edhe për shënimin e ditës së sotme nga familjarët në rrethojat e Kuvendit e qeverisë kosovare, në sheshin qendror të Prishtinës.

“Anarkia është debashkim, jo bashkim”

April 26, 2017 by dgreca

DRITËRO AGOLLI PËR BASHKIMIN KOMBËTAR/

1-Frank-shkreli-2-300x183-1

Nga Frank Shkreli/Kohët e fundit, Kryeministri i Shqipërisë, Z. Edi Rama dhe Presidenti i Kosovës, Z. Hashim Thaçi ngritën mundësinë e bashkimit të Shqipërisë dhe Kosovës në një shtet të vetëm, nëqoftse nuk ndodhë bashkimi i tyre brenda Bashkmit Evropian. Analistë të ndryshëm e kanë cilësuar deklaratën e udhëheqsve shqiptarë si një manovër parazgjedhore, si një përpjekje për të larguar vëmendjen e mbrendshme dhe të jashtme nga kriza aktuale politike në Shqipëri dhe në Kosovë, ose më keq, si një kërcënim dhe shantazh ndaj Evropës, nëqoftse Bashkimi Evropian nuk merr masa për të shpejtuar integrimin e Shqipërisë dhe Kosovës në radhët e tij.

Sidoqoftë sikur të kishte nevojë për një deklaratë të tillë në këtë moment deklarata e Kryeministrit Rama dhe e Presidentit Thaçi dashtë e pa dashtë ndezi tensionet politike në Balkan, duke shkaktuar reagime të ashpëra jo vetëm nga Beogradi, por edhe nga Moska. Rusia dhe Beogradi mezi prisnin një deklaratë të tillë që të drejtonin gishtin akuzues Tiranës dhe Prishtinës zyrtare për destabilizim të rajonit. Ndërsa, edhe Bashkimi Evropian (BE) ka kritikuar gjithashtu ashpër deklaratën e Z. Rama dhe Z. Thaçi. Komisioneri Hahn, sipas Deutsche Welle-s, ka hedhur poshtë mundësinë e presioneve dhe shantazheve ndaj Brukselit duke thënë se deklaratat nxitëse mund t’u këthehen vendeve të Ballkanit si bumerang. Në vend të kësaj, ka thënë përfaqsuesi evropian, vendet e Ballkanit duhet të përqëndrohen tek bërja e reformave të nevojshme për të plotësuar kushtet për antarësim në BE. Edhe ambasadat amerikane në Tiranë, Beograd dhe Prishtinë, kanë reaguar ndaj deklaratave të Z. Rama dhe Z. Thaçi, duke i cilësuar si të nxituara dhe të pakujdesshme.

Ndërkaq, gazeta Illyria në New York sjellë një reagim të Presidentit të Kosovës, Z. Hashim Thaçi, i cili u përgjigjet edhe njëherë kritikave të zyrtarëve të BE-së ndaj deklaratave të tij dhe të Kryeministrit të Shqipërisë, Edi Rama për mundësinë e bashkimit të Kosovës dhe Shqipërisë duke i quajtur “bajate”, “të gërditshme” dhe “neveritëse”, deklaratat e zyrtarëve të BE-së. Ai ka theksuar se kërcënim për paqën përbën nacionalizmi serb dhe jo deklaratat e tij.“Kërcënim për BE-en është nacionalizimi serb. Është Beogradi që është duke punuar në destabilizimin e rajonit dhe instalimin e ndikimit të fuqishëm së Rusisë në Serbi, prej bazave ushtarake e deri tek ‘MIG-at’ rusë”, është shprehur udhëheqsi i Kosovës në reagimin e tij ndaj kritikave evropiane. Bashkimi kombëtar i shqiptarëve është një ëndërrë e shënjët e të gjithë brezave deri më sot. Por bashkimi kombëtar arrihet me vepra e jo me fjalë, as me akuza ndaj njëri tjetrit as me ultimatume ndaj të tjerëve. Është kundër dinjitetit kombëtar që thirrjet për bashkim kombëtar të përdoren për qëllime politike parazgjedhore ose për të treguar mllef ndaj një vendimi ose jo, të Bashkimit Evropian. Fatkeqsisht, me dështimin e përfaqsuesve evropianë për arritjen e një kompromisi për zhdukjen e ngërçit politik në Tiranë, Shqipëria gjëndet para një “kollapsi politik”, siç e cilësoi në një shkrim dje Karl Bildt, bashkëkryesues i Këshillit Evropian për Marrëdhëniet me Jashtë,, ndërkohë që kriza politike vazhdon për një kohë të gjatë në Kuvendin e Kosovës, ndërsa edhe atje po bëhet thirrje për zgjedhje të përgjithëshme, të parakohëshme parlamentare, sikur zgjedhjet janë zgjidhja e të gjitha problemeve.

Përballë këtij aktualiteti politik sot në trojet shqiptare, ndodhë se jam duke lexuar librin e Adnan Merovcit, truprojës së Presidentit Ibrahim Rugova, “Në Hap me Rugovën”, ku vura re ndër të tjera edhe deklaratën e të ndjerit Dritëro Agolli mbi bashkimin kombëtar, gjë që më tërhoqi vëmendjen, pasi është temë e ditës. Ai e kishte bërë këtë deklaratë gjatë një takimi me shkrimtarët e njohur të asaj kohe gjatë një vizite në Kosovë. Takimi i kryesuar nga Ibrahim Rugova në Prishtinë, me Shoqatën e Shkrimtarëve të Kosovës, është mbajtur gushtin e vitit 1991, një periudhë e vështirë kjo politike si për Shqipërinë ashtu edhe për Kosovën. Është një këshill nga Dritëro Agolli që vlente atëherë për të gjithë, por përgjigja e tij 25 vjetë më parë, është edhe sot shumë aktuale, përball krizës politike në Tiranë dhe debatit të shkaktuar nga dy udhëheqsit shqiptarë në lidhje me bashkimin kombëtar, për ata që duan t’a dëgjojnë dhe për ata që janë me të vërtetë serioz dhe të cilët janë me të vërtetë të dhënë për realizimin eventual të bashkimit kombëtar. Pyetjes në lidhje me bashkimin kombëtar të shqiptarëve nga njëri prej pjesëmarrësve një temë e ditës sot Dritëro Agolli iu përgjigj kështu, sipas shënimit në librin e lartë përmendur.“Këtë gjë”, u tha ai shkrimtarëve më të njohur të asaj kohe në Kosovë, “Duhet ta shikojmë më shumë në të ardhmen.Të ardhmen, sepse është problem jo vetëm për Shqipërinë, për ta forcuar atë dhe për ta bërë për Shqipërinë e brendshme, por edhe për Shqipërinë e jashtme, se tashti ka ardhur ajo pika më kulminante që o do të ngrihet me të madhe ky problem i bashkimit kombëtar ose tjetër shanse është vështirë të jepet sepse me ç’ta ka dhënë historia, Shqipëria kalon në demokratizimin e plotë të vendit – por nëqoftse kjo do të merret, të ketë një anarki të plotë në Shqipëri, siç ka tani, që është anarki, tashti po qartësohet një çik më shumë, por ka një anarki.Nëqoftse është kjo anarki, ajo nuk mund të marrë përsipër bashkimin kombëtar.Anarkia është debashkim, jo bashkim. Ajo i sjellë dëm edhe pjesës këtu (Kosovës) nëqoftse vazhdon ajo gjëndje, sepse nuk ka as autoritet, qoftë edhe në Ballkan qoftë edhe në vende të tjera. Do ju thonë juve, me ke jeni mo, me ata që po grinden e po zihen njëri me tjetrin, ku do veni ju?” Mungesa e rregullit, qetësisë dhe e unitetit politik në Shqipëri, ka thanë Agolli, “duket medoemos se i sjellë dëm çështjes së madhe kombëtare”. Nuk mund të ketë bashkim të trojeve shqiptare, pa bashkimin e shqiptarëve, me qëllim për të bërë më së pari “Shqipërinë e brendshme” dhe “Shqipërinë e jashtme”, të lirë e demokratike të standardeve evropiane.Dritëro Agolli porosiste një çerek shekulli më parë, aty në zemër të Dardanisë, që më së pari të bëhet Shqipëria e brendshme dhe e jashtme, e pastaj të flitet për bashkim kombëtar! Këtë nuk mund ta bëjë as Evropa as Amerika dhe askush tjetër, përveç vetë shqiptarëve. Ndëgjoni porositë e të moçëmve dhe mos sillni ujë në mullijtë e armiqëve të kombit.

Jemi popull i Unit….

April 26, 2017 by dgreca

*Shqipëri dil e bërtit poshtë opozitarizmi/

Nga Ilir Levonja/Florida/

Më duket si paradoksale që bijtë e vetmisë së madhe, Bijtë e Dullës, I kujtojnë sot opozitës, vetminë. Çudi si nuk po dalim në rrugë me pankarta. Të mobilizojmë popullin. Pasi jemi në vitet 60, shekulli i kaluar. Dilni. Atëherë bërtisnim poshtë Hrushovi. Sot bërtisni, poshtë opozitarizmi.

Kulmi i kokës, kur hiqen perëndimorë. Këta traktoristat e kulisave me Erdoganin, Putinin. Këta ideistët e atij hajnit bjellorus Llukashenkos. Ideistët e pushtetit të pa mjaftueshëm.

Pushtetarët e dreqit. Thua demokracia është 40 vjet pushtet. Jo, pushtet katërvjeçar a rrotacionit etj. Jo, jo.

Ne nuk e durojmë dot erën e freskët të demokracisë.

Duam erën e qelbur të diktatit.

Jemi popull i Unit.

Po kjo është e vërteta jonë.

Një vend paradoks.

Dhe me që po flasim për kulisa, blofe lojrash politike. Apo, negociata të dështuara…?! Për shance të humbura të opozitës etj. Për një mbyllje të saj. Në një vetmi të madhe. Një devijim nga misioni. Një mosdashje Vetingu. Kjo kuvli magjike e shqiptarëve pushtetarë. Tema e një fushate që edhe pse e kanë nisur, nuk po u shkon me qejf për poshtë. Që ikin me mendimin se po u votua Vetingu. Ua ndreqën jetën shqiptarëve dhe me siguri investitorët e huaj do jenë më të shumtë. E plot budallallëqe të tjera.

Në fakt po ndodh e kundërta. Brenda një vetmie të madhe është tashmë pushteti. Jo opozita. Një opozitë më e madhe se kurrë më sot. Më e qartë dhe më e vendosur.

E qartë si drita e diellit. Qeveri teknike.

Sfiduese.

Po shqiptarëve të pushtetit, u duket e çuditshme që një lojë me sfidë, bojkot dhe vetvrasje. Në një vend totalisht në krizë, të marrë peng nga hyrje-daljet. Rama tek Meta, e anasjelltas. Me farsat e etapave presidenciale. Me bojkotin si mrekullia e kokëfortësisë, peshqesh i gjenisë së përparimit shqiptar Edi Rama. Aq sa u kanë vënë një fashë boje a pudre të gjitha strategjive të tyre të dikurshme. Deri tek mosnjohja e shtetit. Me tekat e tyre bojkotuese.

Dhe që sot rrahin përditë në një pike. Veting dhe vetvrasje bojkoti. Aq sa u është mbushur mendja se Shqipëria bëhet pa oopozitë.

Bëjeni… !

Të gjitha i keni.

Bëjeni dhe Vetingun. Në fund të fundit qeverisja është një revolucion. Dhe ju bij të revolucionarëve jeni.

Sipas shakaxhiut tuaj, doni edhe 20 vjet pushtet, që të bëni reformat. Që të zbusni klimën për investitorët etj. Këto janë përralla. Pas 20 vjetëve do kërkoni 20 të tjera. Kështu që lum ai popull për këtë sfidë të hapur opozitare.

Turpi më i madh i takon pushtetit që kërkesave opozitare për tubime, iu përgjigj me kërcënime policësh. Nga foltoret politike të institucioneve tona të rendit. Iu përgjigj me Jo të madhe. Aq sa shenjat e një autoritarizmi monopol shtetëror i kohës së Dullës, po pluskojnë mbarë vendin.

Ideja më e keqe e gjithë këtyre viteve. Eshtë mohimi i opozitarizmit. Në fund të fundit, është diçka e traditës tuaj.

Po shqiptarët nuk duan të kuptojmë më pasi e kanë të lehtëtashmë. U njihet pasaporta. U mjafton të ikin.

Ju i tegonit telat me gjemba. Kallashin. I varnit në sheshe publike. Demokracia për ju është monopjesmarrje, monovendosje, monogjithçka.

Dhe klima popullore shqiptare, stoike, se pa iksin apo ypsilonin nuk bëhet. Bëhet ore bëhet. E keqja fillon tek këta, që thonë se duam edhe 20 vjet të tjerë të kryejmë reformat.

reformat o bëhen o nuk bëhen. 20 vjeçari është monopolizim pushteti. Rruga bjelloruse, ruse, azerbajxhanase e së fundi kjo turke.

Eshtë për të vënë duart në kokë. Duhet t’ju kapi paniku. Një erdoganizëm i gjallë po mbyt vendin.

Një lëshim pushteti në një fund mandati, nuk është asgjë. Biles një sfidë e bukur politike. Por kush e ka ndërmend këtë. Ata që hyjnë e dalin tek njëri-tjetri…. dhe që e shohin revanshin a suksesin ekonomik, tek vrasja e opozitës?.

Jo tek fitorja me votë. Por nuk kanë faj. Fajin e kemi ne…që, harrojmë. Jo më shumë se dje. Një nga fitimtarët me ”vote të lirë”. Një nga ata, në atë milionshin e votimeve populiste, mburrjes, u dënua dje me 7 vjet heqje lirie. Dhe sekuestro pasurie prej milionash euro. Këta, e ca të tjerë si këta, ishin fituesit. Po ne shqiptarët nuk e kemi për herë të parë që vimë në pushtet me hajna. Sidomos e majta. Këtë ne e harrojmë.

Nuk po të kërkojmë zyrat, pushtetin. Por shance të barbarta për votë të lirë.

Misionarët e Krizës Shqiptare Dështojnë, shkak qeveria teknike

April 25, 2017 by dgreca

*Rama- Pa Vetingun s’ka kompromis-BASHA:Javën e ardhshme nis mosbindja civile!/

2 Misionaret

*BASHA: Javën e ardhshme do të nisim përshkallëzimin e mosbindjes civile anembanë Shqipërisë për ti treguar Edi Ramës dhe tiranisë së krimit dhe drogës se koha kur në Shqipëri bëheshin votime por jo zgjedhje ka marrë fund njëherë e mirë. Nuk do ketë më kurrë votime dhe jo zgjedhje, nuk do ketë më pushtet pa opozitë./

Pasditja e së Martës mezi është pritur nga shqiptarët, te cilet i kishin vare shpresat tek i dërguari i Kancelares gjermane Merkel David Mcallister dhe raporteri për Shqipërinë në Parlamentin Evropian Fleckenstein. Mirepo klasa politike, teper e politizuar dhe e ndare ekstremisht ne kushtet qe i vene njera-tjteres, sic hyne, ahstu dhe dolen nga negociatat. Dy mesiaret e zgjidhjes se krizes nuk arritën të afrojnë drejt kompromisit liderët politikë shqiptarë, Rama, Meta, e Basha. Të gjithë iu drejtuan Pallatit të Kongreseve me shpresën e një zgjidhjeje, veç negociatorëve e liderëve politikë, mbërritën edhe ambasadorët e BE, SHAB dhe OSBE. Ne dhoma të veçanta me negociatorët, palët qëndruan për rreth 50 min përpara se të shihej të largohej i pari kryetari i PD Lulzim Basha, ndërkohë që miqtë ndërkombëtarë ishin ende ne ambientet e Pallatit të Kongreseve.

Dështimi i negociatave, shkak qeveria teknike

Takimet e zhvilluara gjatë mbrëmjes te se Martes, 25 prill 2015 në Pallatin e Kongreseve midis përfaqësuesve të Parlamentit Evropian dhe tre liderëve kryesor politik në Shqipëri kanë përfunduar pa sukses.Burime diplomatike bënë me dije se negociatat midis mazhorancës dhe opozitës me ndërmjetësimin e eurodeputetëve David McAllister dhe Knut Fleckenstein, kanë dështuar. Partia Demokratike nuk është tërhequr nga kërkesa e saj për qeveri teknike, gjë që mazhoranca e ka kundërshtuar dhe kjo ka bërë që palët të mos gjejnë kompromis për zgjidhjen e krizës politike.Sipas burimeve, Ilir Meta ka propozuar për të arritur kompromisin shtyrjen e zgjedhjeve në 16 korrik, gjë që është pranuar edhe nga Rama edhe pse me vështirësi. Por për këtë ai ka kërkuar kthimin e PD-së në Kuvend për të votuar vettingun.Gjithashtu është ofruar dhe largimi i 3 Ministrave që lidhen me zgjedhjet 3 muaj përpara zgjedhjeve dhe që ky model të kthehet në një praktike të përhershme, por as kjo nuk është pranuar. Të njëjtat burime bënë me dije se është ofruar edhe Presidenti konsensual si mundësi kompromisi.Sipas burimeve, opozitës i janë ofruar ndryshime në KQZ, institucionin e Avokatit të Popullit, emërime të drejtorëve të policive në qarqe në bashkëpunim me ndërkombëtarët, etj.

Në Pallatin e Kongreseve, kryeministri Rama dhe kryeparlamentari Meta u takuan me eurodeputetin Fleckenstein, ndërsa Basha zhvilloi takimin veçmas me zv/Presidentin e Partive Popullore Evropiane, David McAllister.Fillimisht nga Pallati i Kongreseve ka dalë kryetari i PD-së, Basha dhe më pas kryeministri Rama dhe kryetari i Kuvendit, Ilir Meta.Në fund nga ndërtesa kanë dalë zv/Presidenti i Partive Popullore Evropiane, McAllister dhe eurodeputeti Fleckenstein.Pas takimit me eurodeputeputetin David McAllister në Pallatin e Brigadave, kreu i Partisë Demokratike Lulzim Basha rreth orës 21:05 të mbrëmjes i është drejtuar zyrës së ish-kryeministrit Sali Berisha, ku ka zhvilluar një takim disa minutësh me të.

Rama: Pa Vetingun s’ka kompromis

Kryeministri Edi Rama në një mesazh në Facebook, shkroi pas takimit se mbetet i hapur për dialog, por pa kushte. Sipas Ramës, pa Vettingun s’ka asnjë kompromis.Rama: Miq! Gjithnjë të hapur për dialog pa kushte. Por pa Vetingun s’ka asnjë kompromis, sepse Drejtësia për Shqipërinë që duam nuk negociohet. Reagimi erdhi ndërkohë që palët politike nuk mundën të arrinin një marrëveshje për të dalë nga kriza.Ky ishte reagimi i parë dhe i vetmi i Ramës deri te marten e vone.

Basha: Javën e ardhshme mosbindje civile

Kreu i Partisë Demokratike, Lulzim Basha, u kthye në çadrën e protestës për ti thënë mbështetësve të tij se negociatat dështuan për faj të kryeministrit Rama që nuk pranon krijimin e qeverisë teknike. Basha paralajmëroi mosbindje civile javën e ardhshme në të gjithë vendin.

Dështimin e negociatave me eurodeputetët, lideri i opozitës Lulzim Basha ia faturon kryeministrit Rama që sipas tij nuk pranoi krijimin e qeverisë teknike, kushti themelor i opozitës.

Kreu i PD tha se nuk ka negociata për qeverinë teknike.

Lideri i Opzites Basha e shoi kureshtjen e emdias me deklaraten e tij pas kthimit nga Pallati i Kongreseve ne Cader. Ai ne fillim falenderoi negoziatoret: Falenderim dhe mirënjohje të thellë për David McAllister, kryetarin e Komisionit të Punëve të Jashtme në PE, njëkohësisht zëvendës/president i PPE, si dhe për eurodeputetin Knut Fleckenstein, raporterin për Shqipërinë në PE, të cilët erdhën sot në Shqipëri dhe nuk kursyen asnjë përpjekje për ti kontribuar një zgjidhje reale të krizës politike që ka mbërthyer vendin tonë. Falenderimet dhe mirënjohjen time, të PD, opozitës dhe çdo qytetari protestues. Për fat të keq përpjekja e dy ndërmjetësuesve europianë nuk pati sukses sepse Edi Rama refuzon qeverinë teknike të zgjedhjeve të lira, si zgjidhjen e vetme por edhe si zgjidhjen e ndershme për të krijuar kushte dhe premisa të barabarta për zgjedhje të lira dhe të ndershme duke zbatuar ligjin për dekriminalizimin, pra duke larguar kriminelët nga institucionet shtetërore, duke luftuar trafikun e drogës, kultivimin dhe paratë e drogës si kërcënim jetik për demokracinë dhe votën e lurë dhe duke garantuar reformën zgjedhore sipas rekomandimeve të OSBE-ODIHR përfshirë edhe votimin biometrik dhe elektronik dhe numërimin elektronik të votës. Ky refuzim ka për bazë frikën e Edi Ramës për të lëshuar karrigen kryeministrore dhe garancitë që përmes karriges kryeministrore ka dhënë tash 3 vite e gjysëm krimit të organizuar dhe narkokartelit.

Lideri i Partisë Demokratike paralajmëroi përshkallëzim të aksionit opozitar me mosbindje civile duke nisur nga java e ardhshme në të gjithë vendin.

Basha tha se Kryeminsitri Rama nuk do as zgjedhje të lira dhe as vetting të vërtetë, i trembet demokracisë së vërtetë dhe dretësisë së vërtetë.Nuk do të pranojmë as zgjedhje fasadë as veting fasadë të diktuar nga Rama dhe interesat e tij korruptive dhe kriminale. Jemi të vendosur të vazhdojmë pa kthim betejën tonë për zgjedhje të lira dhe të ndershme dhe vetting të vërtetë sipas ndryshimeve kushtetuese të 22 korrikut. Javën e ardhshme do të nisim përshkallëzimin e mosbindjes civile anembanë Shqipërisë për ti treguar Edi Ramës dhe tiranisë së krimit dhe drogës se koha kur në Shqipëri bëheshin votime por jo zgjedhje ka marrë fund njëherë e mirë. Nuk do ketë më kurrë votime dhe jo zgjedhje, nuk do ketë më pushtet pa opozitë.

Kreu i PD-së tha se PD ka rënë dakord me një numër të madh propozimesh të natyrës teknike për dekriminalizimin dhe luftën kundër drogës.

Por, shtoi ai, “PD nuk mund të pranojnë kurrë që këto detyra që Rama me vetëdije nuk i kreu gjatë kohës që ishte në qeverisje do mund ti bëjë në këto katër javë, asnjë mundësi, asnjë mendje e shëndoshë nuk mund të pranojë që njeriu që ktheu Shqipërinë në Kolumbi do jetë përgjigja për këto probleme. Kushti i patjetërsyeshëm për zgjedhje të lira dhe të ndershme mbetet qeveria teknike për të luftuar drogën, nxjerrë jashtë institucioneve kriminelët dhe për të krijuar kushtet për votimin elektronik për zgjedhje të lira dhe të ndershme.Kjo nuk është çështje ose-ose por edhe-edhe”.

Sipas liderit të opozitës vetëm pas qeverisë teknike do të bëhet vetting i vërtetë në bazë të ndryshimeve kushtetuese të miratura në 21 korrik të 2016.

DEKLARATA E NEGOCIATOREVE

Pas dështimit të takimit mes palëve për gjetjen e krizës ka dalë një reagim i Bashkimit Europian. “Deklaratë për shtyp në emër të Kryetarit të Komitetit të Punëve të Jashtme të Parlamentit Europian David McAllister (EPP) dhe Raportuesi i Përhershëm i Parlamentit Evropian për Shqipërinë Knut Fleckenstein (S&D).

Kryetari i Komitetit të Punëve të Jashtme të Parlamentit Europian David McAllister (EPP) dhe Raportuesi i Përhershëm i Parlamentit Europian për Shqipërinë Knut Fleckenstein (S&D) u takuan me shumicën dhe opozitën dhe patën një diskutime të mira.

Të dy eurodeputetët paraqitën propozime për të ecur përpara duke përfshirë çështje mbi dekriminalizimin, luftën kundër narkotikëve, masa teknike për përmirësimin e zhvillimit të zgjedhjeve dhe masa të ndërtimit e besimit politik.
Ata gjithashtu propozuan ide për diskutim mbi datën e zgjedhjeve dhe ndryshimet e mundshme para-zgjedhore në strukturat qeveritare për të ndërtuar besimin afatgjatë në sistem.

Për anën e shumicës kishte marrëveshje mbi pikat e parashikuara për sa kohë që Vetingu do të votohej në parlament.
Partia Demokratike mbajti qëndrimin e saj për emërimin e një Kryeministri teknik dhe për miratimin e një sistemi votimi elektronik për hir të zgjedhjeve të lira dhe të ndershme” – thuhet në deklaratë.

Mustafa në Bruksel ‘lobon’ për pezullim të kushtit të Demarkacionit

April 25, 2017 by dgreca

Kryeministri i Kosovës, Isa Mustafa, të martën do të diskutojë me komisionerin e BE-së për çështje të brendshme dhe migracion,Dimitris Avramopoulos, çështjen e ‘pezullimit të përkohshëm të kushtit për ratifikimin e marrëveshjes së Demarkacionit me Malin e Zi për liberalizimin e vizave për Kosovën’.

epa05290687 Prime Minister of the Republic of Kosovo Isa Mustafa (L) and EU Commissioner for Migration and Home Affairs Dimitris Avramopoulos (R) speak to media during a press conference following their meeting in Pristina, Kosovo, 05 May 2016. The European Commission has proposed in Brussels on 03 May 2016 visa-free travel for the citizens of Kosovo. EPA/VALDRIN XHEMAJ — Kryeministri Mustafa po qëndron në Bruksel dhe ka paralajmëruar hapjen e diskutimeve me zyrtarët e lartë të BE-së për ratifikimin e marrëveshjes së debatueshme të kufirit me Malin e Zi, të cilën Komisioni Evropian e ka shndërruar në kusht për liberalizim të vizave.

Në Komisionin Evropian, njofton bashkëpunëtori i Radios Evropa e Lirë në Bruksel, thonë se takimi me kryeministrin Mustafa është një rast i mirë ‘për të analizuar gjendjen momentale në procesin e liberalizimit të vizave dhe përmbushjen e kushteve nga ana e Kosovës’.

Ata thonë se Kosova ka bërë përparim të madh në këtë proces dhe kanë vlerësuar ‘përpjekjet e saj për të përmbushur edhe dy kushtet e tjera, përfshirë kushtin e ratifikimit të marrëveshjes me Malin e Zi’.

Zyrtarë të Komisionit Evropian kanë thënë se ‘marrëveshja e Demarkacionit duhet të përmbyllet sa më parë në mënyrë që KE të mund të japë dritën jeshile për liberalizim vizash edhe me Kosovën’.

Por, ata nuk kanë pranuar që të japin një përgjigje rreth pranueshmërisë së idesë së kryeministrit Mustafa.

Marrëveshja për damarkimin e vijës kufitare ndërmjet Prishtinës e Podgoricës u nënshkrua në verën e vitit 2015 në Vjenë, në praninë e përfaqësuesve ndërkombëtarë dhe Mali i Zi e ratifikoi në Kuvendin e tij, duke i hapur rrugën vendit drejt anëtarësimit në NATO.

Por, ajo ngjalli reagime të fuqishme të opozitës në Kosovë, e cila përdori edhe gazin lotsjellës për të parandaluar miratimin e saj në Kuvend.

Një projektligj në Kuvend u tërhoq nga Qeveria, vitin e kaluar, e cila pohoi se do ta rikthejë ‘në kohën kur të ketë arritur numrin e mjaftueshëm të votave’.

Partnerët në koalicionin qeverisës thanë se janë pajtuar që brenda ditësh ta votojnë Demarkacionin me Malin e Zi, pas bisedave me zëvendës ndihmës sekretarin amerikan të shtetit, Hoyt Yee.

Por, opozita ka këmbëngulur sërish se marrëveshja do të kundërshtohet meqë, sipas saj, ‘Kosova me demarkacion humbet mbi 8 mijë hektarë tokë të saj’.

Propozimi i kryeministrit Mustafa, për pezullim të përkohshëm të kushtit të demarkacionit ndërkaq është diskutuar të martën me deputetët e Grupit të Partive Popullore në Parlamentin Evropian.

Kryeministri Mustafa gjatë ditës do të takojë edhe Joseph Daul kryetarin e Partisë Popullore Evropiane, pjesë e së cilës, në cilësinë e vëzhguesit është edhe Lidhja Demokratike e Kosovës.