Rajon – Page 127 – Dielli

Kosovë-Serbi, marrëveshja për diplomat drejt zbatimit

January 25, 2016 by dgreca

-Ministrja kosovare për Dialog, Edita Tahiri: Marrëveshja për njohjen reciproke të diplomave nis zbatimin në 1 mars 2016/
-Kjo Marrëveshje është veçanërisht e rëndësishme për shqiptarët e Luginës së Preshevës/
PRISHTINË, 25 Janar 2016/ Në Bruksel gjatë javës së kaluar, delegacionet e Republikës së Kosovës dhe të Serbisë me ndërmjetësimin e Bashkimit Evropian kanë arritur pajtimin që Marrëveshja për njohjen reciproke të diplomave të filloj zbatimin në 1 mars 2016, bëri të ditur sot qeveria kosovare.
Njoftimi i dërguar thekson se, ministrja kosovare për Dialog Edita Tahiri, njëherësh kryenegociatore në dialogun e Brukselit ka theksuar se kjo është një marrëveshje e re për diplomat, e cila është më e zgjeruar se ajo e vitit 2011, sepse përfshinë njohjen reciproke të diplomave të të gjitha niveleve të shkollimit, prej shkollës fillore deri te arsimi i lartë universitar si dhe nivelet profesionale. Me këtë marrëveshje Kosova dhe Serbia janë pajtuar që të njohin reciprokisht këto diploma: diplomat e shkollës fillore, të mesme, shkollimit vokacional, nivelin e pestë të kualifikimeve sipas kornizës së kualifikimeve evropiane (EQF), diplomat bachelor, master dhe doktoraturat.
Njohja reciproke e diplomave bëhet përmes procesit të certifikimit ndërkombëtar të diplomave nga një palë e tretë dhe në këtë rast këtë certifikim do të bëjë Asociacioni i Universiteteve Evropiane (European Association of Universities – EAU) dhe pastaj diplomat e certifikuara konsiderohen të njohura nga të dyja shtetet. Për njohjen e diplomave të shkollës fillore, të mesme dhe ato profesionale (që është risi në këtë marrëveshje) do të përzgjidhet një organizatë ndërkombëtare e cila do të bëjë certifikimin ndërkombëtar. Kandidatët e interesuar për njohjen e diplomave do të aplikojnë pranë zyrave të organizatës SPARK në të dyja shtetet për të paraqitur aplikacionin për njohje e diplomave cila pastaj do ta realizoj procesin e certifikimit ndërkombëtar.

Njohja e diplomave është e ndarë në dy grupe, në njohjen profesionale dhe akademike. Pas certifikimit ndërkombëtar, njohja profesionale do të realizohet nga institucionet e shteteve përkatëse në afat prej 90 ditësh dhe me një pagesë prej 50 eurosh apo në valutë tjetër ekuivalente me shumën prej 50 eurove. Njohja profesionale e diplomave do të shërbejë për qëllime punësimi, duke përfshirë edhe punësimin në institucionet qeveritare në shtetin përkatës. Njohja akademike e diplomave do t’iu shërbejë studentëve për të vazhduar studimet e mëtejmë në shtetin përkatës, ku procedurat do të realizohen nga secili institucion i arsimit të lartë i shtetit përkatës të cilës i drejtohet aplikuesi dhe afati i realizimit të njohjes është 5 muaj.

Po ashtu, të gjithë kandidatët të cilët tashmë kanë kryer procedurat e njohjes nga Asociacioni i Universiteteve evropiane (EUA) munden menjëherë pas 1 marsit 2016 të aplikojnë për njohje nga institucionet e larta arsimore të shtetit përkatës. Kandidatët gjatë aplikimit për njohje duhet të theksojnë se çfarë njohje dëshirojnë, profesional apo akademike. Të gjitha udhëzimet për procedura do të merren nga zyra implementuese përkatësisht zyrat e SPARK-ut në Kosovë dhe në Serbi.

Marrëveshja për diplomat vlen vetëm për diplomat që janë marrë nga universitetet e akredituara në shtetet përkatëse, Kosovë dhe Serbi.

Kjo Marrëveshje është veçanërisht e rëndësishme për shqiptarët e Luginës së Preshevës. Ministrja Edita Tahiri ka thënë se njohja reciproke e diplomave mes Republikës së Kosovës dhe Serbisë ka një rëndësi të madhe për shqiptarët e Luginës së Preshevës, sepse shumica e tyre kanë studiuar dhe diplomuar në Kosovë dhe u duhet kjo njohjen e diplomave, në mënyrë që të kthehen në vendlindje për të ndihmuar zhvillimin e komunitetit shqiptarëve etnik atje, duke u angazhuar në jetën institucionale dhe sidomos në fushën arsimore për të përgatitur gjeneratat e reja. Ajo ka inkurajuar kuadrot universitare që të kthehen në Luginën e Preshevës, sepse brezi i shkolluar ka obligim t’i shërbejë kombit për të zhvilluar dhe forcuar shqiptarët. Kuadrot e shkolluara duke u kthyer në vendlindje japin ndihmën më të mirë për zhvillimin dhe emancipimin politik, shoqëror dhe ekonomik të një kombi dhe kjo është mënyra e duhur për të penguar shpërnguljen e shqiptarëve nga Lugina e Preshevës. Politikat diskriminuese të Serbisë ndaj shqiptarëve etnik në Luginën e Preshevës luftohen më së miri përmes shkollimit dhe shërbimit në interes të shqiptarëve, është shprehur ministrja.
Qeveria e Kosovës angazhohet dhe kërkon një bashkëpunim të ngushtë me komunat e Preshevës, Bujanocit dhe Medvegjës për zbatimin e plotë të kësaj Marrëveshje, në interes të qytetarëve dhe për një efikasitet për zbatimin e kësaj marrëveshjeje.
Ministrja Tahiri ka theksuar po ashtu se moszbatimi i kësaj Marrëveshje nga Serbia për pesë vjet me radhë, që nga viti 2011 kur është arritur marrëveshja, ka pasur për qëllim që të pamundësojë perspektivën dhe punësimin e shqiptarëve të Luginës së Preshevës të cilët shkollohen në universitetet e Republikës së Kosovës. Politikat e tilla diskriminuese të Serbisë të dëshmuara edhe me sabotimin e zbatimit të kësaj marrëveshje, unë i kam denoncuar vazhdimisht në takimet me Bashkimin Evropian, ka thënë ministrja Tahiri, duke shtuar se edhe Bashkimi Evropian ka qenë i ngadalshëm në masat e saja për detyrimin e Serbisë që të përmbush obligimet zbatuese. Ajo shprehu besimin se BE-ja nuk do të lejojë zvarritjet e mëtejme nga ana e Serbisë.
Qeveria e Kosovës do të publikojë së shpejti një udhëzues të hollësishëm për t’i njoftuar të interesuarit me procedurat e aplikimit për njohje./b.j/

Kosovë-Gjermani, marrëveshje për Efiçiencë në Energji

January 22, 2016 by dgreca

-Nga kjo marrëveshje me KfW (Banka Gjermane për Zhvillim) do të përfitojnë qytetarët e komunave e Gjilanit, Gjakovës, Prishtinës dhe Ferizajt/
PRISHTINË, 22 Janar 2016/ Qeveria e Republikës së Kosovës dhe KfW (Banka Gjermane për Zhvillim) nënshkruan sot Marrëveshjen për masat e Efiçiencës në Energji për nivelin Komunal.
Marrëveshja u nënshkrua nga ministri kosovar i Financave, Avdullah Hoti dhe Drejtori i KfW-së për Evropën Juglindore e Turqinë, Christoph Tiskens, ndërsa pjesëmarrës ishin edhe ministri i Zhvillimit Ekonomik Blerand Stavileci, si dhe kryetarët e komunave përfituese, kryetari i komunës së Prishtinës Shpend Ahmeti, kryetarja e komunës së Gjakovës Mimoza Kusari – Lila, kryetari i komunës së Gjilanit Lutfi Haziri, si dhe kryetari i komunës së Ferizajt Muharrem Sfarqa.
Ministri i Financave Avdullah Hoti, duke falënderuar qeverinë gjermane, BE-në dhe KfW për bashkëpunimin e shkëlqyer të ofruar gjatë të gjitha këtyre proceseve, bëri të ditur se nga kjo marrëveshje do të përfitojnë qytetarët e komunave e Gjilanit, Gjakovës, Prishtinës dhe Ferizajt.
“Kjo marrëveshje vije në sajë të bashkëpunimit të shkëlqyer që kemi me Gjermaninë dhe BE-në. Marrëveshja për këtë projekt kap vlerën prej 7.5 milionë euro, ku 5 milionë euro janë grant, 2.5 nga qeveria gjermane dhe 2.5 nga WBIF. Pjesa e kredisë përfshinë vlerën prej 2.5 milionë euro nga KfW-ja me një grejs periudhe 3 vjeçare dhe me afat amortizimi deri në vitin 2028, me këste që paguhen dy herë brenda vitit”, tha ministri Hoti.
Ai vijoi se, marrëveshja për këtë projekt edhe më tutje konfirmon përpjekjet e qeverisë së Republikës së Kosovës dhe partnerëve ndërkombëtarë për përmirësimin e jetës së qytetarëve të Republikë së Kosovës, pasi që nga ky projekt direkt do të përfitojnë institucionet më të rëndësishme të këtyre qyteteve, siç janë shkollat fillore dhe të mesme dhe shëndetësia primare.
“Kjo marrëveshje vije pas nënshkrimi të marrëveshjes me Bankën Botërore për të njëjtin qëllim për nivelin qendror, i cili njëherit paraqet edhe synimin e qeverisë së Republikës së Kosovës dhe miqve ndërkombëtarë drejt përmirësimit të sistemi të energjisë, si një sektor kyç për zhvillimin e vendit dhe inkuadrimin e mëtutjeshëm në strukturat ndërkombëtare”, theksoi ministri Hoti.
Ndërsa, drejtori i KfW-së për Evropën Juglindore e Turqinë,. Christoph Tiskens, tha se “qëllimi i këtij programi është përmirësimi i kushteve të jetesës për banorët e komunave të Prishtinës, Gjakovës, Gjilanit dhe Ferizajt dhe është i bazuar në studimin e fizibilitetit, i përfunduar në vitin 2012 dhe i financuar nga Korniza Investuese për Ballkanin Perëndimor, ku janë identifikuar 30 ndërtesa në komuna të ndryshme që kanë nevojë për rehabilitimin e masave të efiçiencës energjetike, në ndërrim të dritareve, izolim, sisteme të ngrohjes, të shkollave, kopshteve të fëmijëve, spitaleve dhe qendrave mjekësore. Kostoja e zbatimit është rreth 7.5 Milionë Euro”./b.j/

Presidentja Jahjaga në Abu Dhabi, takohet edhe me Ban ki Moon

January 18, 2016 by dgreca

-Po merr pjesë në hapje të javës së energjisë së qëndrueshme/
PRISHTINË, 18 Janar 2016/ Presidentja e Republikës së Kosovës, Atifete Jahjaga po merr pjesë në hapje të javës së energjisë së qëndrueshme në Abu Dhabi, Emiratet e Bashkuara Arabe.
Presidenca kosovare në njoftimin e dërguar bën të ditur se, java e energjisë së qëndrueshme është një ngjarje e cila mbledh liderët botërorë për të diskutuar sfidat dhe zgjidhjet për energji të qëndrueshme. Java e energjisë u mbajt nën patronatin e Princit të Kurorës të Emirateve të Bashkuara Arabe, Mohammed bin Zayed Al Nahyan dhe aty morën pjesë Sekretari i Përgjithshëm i Kombeve të Bashkuara, Ban ki Moon, presidentë, kryeministra, ministra dhe udhëheqës të shteteve të ndryshme.
Presidentja Jahjaga, në takim me princin e kurorës, Mohammed bin Zayed Al Nahyan, bisedoi për bashkëpunimin e Kosovës me Emiratet e Bashkuara Arabe në fushën e ekonomisë. Ajo me këtë rast theksoi se Kosova tashmë ka infrastrukturën ligjore për tërheqjen e investimeve të huaja direkte. Për më shumë, Presidentja tha se dy marrëveshje ndërkombëtare me Emiratet e Bashkuara Arabe dhe ligji për investime strategjike do të ndihmojnë edhe më shumë në ndërtimin e partneritetit të qëndrueshëm midis vendeve.
Presidentja Jahjaga e falënderoi Princin për donacionin për ndërtimin e spitalit të fëmijëve në Prishtinë, ndërtimi i të cilit do të fillojë së shpejti.
Princi i Kurorës, Mohammed bin Zayed Al Nahyan, e falënderoi Presidenten Jahjaga për pjesëmarrje në hapjen e javës së energjisë së qëndrueshme në Abu Dhabi dhe theksoi se Emiratet e Bashkuara Arabe e konsiderojnë Republikën e Kosovës partner të rëndësishëm ekonomik.
Presidentja Jahjaga, në suaza të këtij organizimi, gjithashtu u takua edhe me Sekretarin e Përgjithshëm të Kombeve të Bashkuara, Ban ki Moon, Presidentin e Islandës, Olafur Ragnar Grimsson, Presidentin e Nigerisë, Mohammed Buhari, Kryeministrin e Marokos, Abdelilah Benkirane dhe Presidentin e Seychelles, James Michael.
Presidentja Jahjaga në takim me kryeministrin e Marokos dhe Presidentin e Seychelles diskutoi për mundësinë e bashkëpunimit dhe kërkoi njohjen e Kosovës nga këto shtete. Ajo theksoi se njohja e Kosovës do të hapte perspektiva të reja të bashkëpunimit me këto vendeve./b.j/

Kosova në Forumin Botëror të Arsimit në Londër

January 18, 2016 by dgreca

-Ministri Bajrami ka njoftuar ministrat e arsimit të vendeve të ndryshme për reformën në arsimin kosovar/
PRISHTINË, 18 Janar 2016/ Ministri kosova i Arsimit, Shkencës dhe Teknologjisë, Arsim Bajrami, me ftesë të Jo Johnson MP, ministër për Universitete dhe Shkencë dhe Rt Hon Nicky Morgan, Sekretar i Shtetit për Arsim, po qëndron për vizitë zyrtare në Britani të Madhe për të marrë pjesë në Forumin Botrëror të Arsimit 2016, i cili po mbahet në Londër nga 18 deri më 21 janar.
Në tryezën e organizuar nga Këshilli Britanik, në kuadër të punimeve të Forumit Botëror të Arsimit 2016, në Londër, ministri kosovar Bajrami ka takuar ministrat pjesëmarrës, si dhe i ka njoftuar për procesin e reformës në arsim, me theks të veçantë në fushën e arsimit profesional dhe ndërlidhjen e tij me nevojat e tregut të punës, me qëllim të punësimit të të rinjëve.
Ministri Bajrami, gjatë ditës së nesërme do të zhvillojë takime bilaterale me ministra tjerë të Arsimit, për të biseduar rreth mundësive për zgjerimin e bashkëpunimit, si dhe për përkrahje në reformat e domosdoshme për ngritjen e cilësisë në arsim. Gjithashtu, gjatë ditës së nesërme ministri Bajrami do të pritet nga përfaqësues të institucioneve të qeverisë Britanike
Në punimet e këtij Forumi po marrin pjesë mbi 90 ministra të arsimit nga vende të ndryshme të botës./b.j/

Sanxhak: Përveç ndryshimit të mbiemrave, fillon edhe ai i emërtimit të shkollave

January 16, 2016 by dgreca

Nga Ismet Azizi/
Se në Sanxhak po krijohen rrethana të reja, tregon fakti se sanxhaklinjtë gjithnjë e më shpesh po dalin me kërkesa të reja për ta ndryshuar gjendjen e cila i ka përcjellë për 70 vite me radhë.Pas më tepër se 70 vite vjen koha që një shkollë fillore e paralagjës së Pazarit të Ri, Sellakovci përfundimisht ta emëroj , gjegjësisht të ndryshoj e mrin nga “Sellakovac” dhe të merr emrin e poetit “Avdo Mexhedoviq “./
Nga Ismet Azizi/
Ministria e Arsimit të Republikës së Serbisë, pas dy refuzimeve dhe ndërhyrjes së Avokatit të Popullit, miraton kërkesën e boshnjakëve që shkolla fillore në fshatin Sellakovc tash e tutje të mbajë emrin e poetit të njohur boshnjak.
Kërkesën për ndryshimin e emrit të shkollës e dërgoi qysh në vitin 2013 Këshilli Kombëtar Boshnjak (BNV). Kjo shkollë është një nga të parat që ka filluar mësimin në gjuhën boshnjake, Ndërsa Këshilli Kombëtar Boshnjak e shpalli institucionin të një rëndësie të veçantë për arsimimin e boshnjakëve.
Ministria e Arsimit të Republikës së Serbisë ka refuzuar dy herë kërkesën, dhe vetëm pas ndërhyrjes së Avokatit të Popullit lejohet që në të ardhmen të mbajë emrin “Avdo Mexhedoviq”.
Në KKB njoftojnë se do të kërkojë të ndryshojë emrin e të gjitha shkollave në Sanxhak, në të cilat mësimi zhvillohet në gjuhën boshnjake. Ndër të tjera, planifikohet të marrë emrat e personaliteteve boshnjake shkollat “Desanka Maksimoviq”, “Stefan Nemanja”, “Vuk Karaxhiq” dhe të tjerat.
Kush është Avdo Mexhedoviq?
Avdo Mexhedoviqi (nga fshati Obrov në afërsi të Bijello Poles,2 1875-1953) ishte një këngëtar lahutar nga Mali i Zi. Mexhedoviqi është një nga poetët epik më të mëdhenj të Sanxhakut por edhe më gjerë. Poema e tij epike “Martesa e Mehë Smailagiqit” e cila ka 12.311 vargje, aq sa kanë së bashku Iliada dhe Odisea. Shkencëtari amerikan Milman Parry, studiues dhe profesor në Universitetin e Harvardit në gjysmën e parë të shekullit të XX, Avdon e ka quajtur “Homeri ballkanik”.
Duhet theksuar se Mexhedoviqi nuk ka vijuar as shkollën fillore. Në moshën madhore ka shërbyer nëntë vite në ushtrinë osmane. Gjatë kësaj kohe zotëroi mirë gjuhën osmane dhe atë turke kurse në Selanik përfundoi shkollën e oficerëve të marinës. Pas përfundimit të shërbimit ushtarak është kthyer në Obrovë, në vendin e tij të lindjes, ku hapi një fermë dhe punoi në dyqanin (mishtore) familjar në Bijello Pole. Me lahutën u mishërua që në fëmijërinë e hershme ndërsa aftësinë e ekzekutimit e mësoi nga babai i tij Huseini, i cili ishte një lahutar i shkëlqyer dhe më i njohuri i asaj kohe. Në sajë të talentit të jashtëzakonshëm dhe aftësisë që posedonte, me kalimin e kohës arrin të bëhet këngëtari dhe lahutari më i kërkuar në trevën e Sanxhakut dhe më gjerë.
Hulumtuesi i njohur i krijimtarisë epike ballkanike Milman Parry, gjatë vitit 1935, regjistroi në pllakë speciale fonografe me 80.000 vargjet epike të Avdo Mexhedoviqit. Në bazë të këtyre studimeve Parry ka shpikur teorinë moderne të letërsisë gojore dhe homerologjinë moderne. Lordi Albert Bates, gjithashtu profesor në Universitetin e Harvardit, vazhdoi punën për mbledhjen e krijimtarisë epike nga viti1950 deri më 1951 dhe regjistroi edhe 18.000 vargje të Avdos. Në këtë mënyrë është kompletuar një koleksion mbresëlënës prej rreth 100.000 vargjeve të Avdo Mexhedoviqit. Mexhedoviqi i ka rrëfyer Perry-it se “të parët e tij kanë ardhur para 200 viteve nga Nokshiqi apo Nikshiqi,( nga inqizimi i dobët nuk dëgjohet mirë për cilin vend bëhet fjalë saktësisht). Ata kanë dyshuar në identitetin e tij, por nuk u ka shkuar mendja se ai mund të jetë shqiptarë. Profesori Perry një vit ka qëndruar në Beograd për ta mësuar gjuhën serbe. Perry ka qenë bartës i projektit, ndërsa Lordi ka qenë asistent i tij. Profesori e mësoi serbishten por gjithnjë duke menduar se kjo zonë është sllavo folëse” – thotë mes tjerash prof. Zymer Neziri.
Avdo nuk ka lënë vargje në shqip, por fjalë po. Neziri potencon se kur është përgatitur poema “Martesa e Mehë Smailagiqit” (Zhenidba Smajlagiq Mehe), poema më e gjatë me mbi 12 000 vargje, kanë hasë në fjalë të cilat nuk i kanë kuptuar, atëherë është kërkuar ndihma e Qamil Sijariqit, i cili i ka përkthyer fjalët shqipe.
I panjohur dhe i papranuar, Avdo Megjodoviqi vdiq në vendlindjen e tij Obrovë në vitin 1953. Sulejman Zatriqi në vitin 2011 ka prodhuar emisionin filmik për jetën dhe veprën Avdo Megjedoviqit.