Rajon – Page 147 – Dielli

Kosova drejt BE-së, prioritet kombëtar

September 11, 2015 by dgreca

-Veseli: Qasje të njëjtë të BE-së në procesin integrues ndaj shteteve të Ballkanit/

PRISHTINË, 11 Shtator 2015/ Kryetari i Kuvendit të Republikës së Kosovës, Kadri Veseli, gjatë debatit në panelin e Forumit të 25-të ekonomik që po mbahet në Krynica, Poloni, ka diskutuar rreth Politikës së zgjerimit të Bashkimit Evropian dhe fqinjësisë së mirë. Ai me këtë rast vuri në dukje perspektivën e Kosovës në BE, si rrugë të vetme që synojnë Kosova dhe shtetasit e saj, duke e pasur si vizion të qartë.

“Për të arritur këtë, ne kemi një vizion të qartë, të vendosur si një prioritet kombëtar. Kjo mund të bëhet nëpërmjet: zhvillimit të qëndrueshëm ekonomik, sistemit të qëndrueshëm të sundimit të ligjit, procesit të pajtimit në mes të të gjitha etnive, fqinjësisë së mirë dhe partneritetit të vazhdueshëm me organizatat ndërkombëtare. Megjithatë, Kosova nuk është një ishull. Rajonin duhet parë në mënyrë optimiste si partnerin më të rëndësishëm për integrim të përbashkët dhe sa më të shpejtë në BE”, theksoi Veseli.

Ndërsa rreth qasjes së institucioneve të BE-së ndaj Kosovës, kryeparlamentari kosovar kërkoi trajtim të barabartë me shtetet tjera, duke theksuar se Bashkimi Evropian pa Ballkanin nuk mund të pretendojë të jetë Evropa e vërtetë.

“Duhet të ndryshohet qasja e BE-së ndaj Ballkanit, duke i trajtuar të gjithë në të njëjtën mënyrë. Kosova është e vendosur për realizimin e axhendës së integrimit në BE, jo vetëm si qasje institucionale, por edhe si vullnet, qëllim politik dhe interes nacional”, theksoi Veseli.

“Kosova i përket Evropës, jo vetëm në aspektin gjeografik edhe në atë kulturor, psikologjik e shpirtëror. Institucionet e Kosovës dhe shtetasit e saj, do të bëjnë përpjekje për të përmbushur standardet e BE-së për anëtarësim në familjen e madhe evropiane”, theksoi në diskutimin e tij, kryetari i Kuvendit të Republikës së Kosovës, Kadri Veseli, në panelin e Forumit ekonomik./b.j/

Nishani: Kosova kontribut në përmirësimin e klimës së bashkëpunimit rajonal

September 10, 2015 by dgreca

TIRANË, 10 Shtator/ATSH/.- “Kosova është shtet i pavurur dhe sovran dhe po jep një kontribut të qenësishëm në përmirësimin e klimës së bashkëpunimit rajonal dhe praktikat e respektimit të pakicave kombëtare në Kosovë që duhet të merren si shembull nga të gjitha vendet e tjera të Ballkanit”, deklaroi sot në Tiranë Presidenti Bujar Nishani.

Gjatë një konference të përbashkët për shtyp me Presidenten e Kosovës, Atifete Jahjaga, Presidenti Nishani theksoi se “sot Kosova me gjithë sfidat e mëdha gëzon një status të ri, plotësisht të merituar në rajon edhe përmes të gjithë nismave dhe angazhimeve të saj në forumet rajonale dhe ndërkombëtare”.

“Statusi i ri i Kosovës e gjen edhe në dialogun e vendosur me Serbinë të dy shtetet janë në pozicione të barabarta”, nënvizoi Nishani duke shtuar se Shqipëria e ka mbështetur në vijimësi këtë proces dhe produktet e tij me pritshmërinë legjitime e të nevojshme që ëdo marrëveshje e arritur të zbatohet me shpejtësi dhe plotësisht.

Kreu i Shtetit shprehu bindjen se zbatimi i angazhimeve të marra në kuadër të këtij dialogu do të shërbejë në normalizimin e marrëdhënieve të dy vendeve Kosovës e Serbisë, por njëkohësisht do të vazhdojë të çlirojë energji pozitive për gjithë rajonin.

“Kosova ka përpara sfida si çdo njëri prej vendeve të rajonit. Shqipëria e mirëpriti dhe mbështeti vendimin për themelimin e Gjykatës Speciale duke vlerësuar se marrja e këtij vendimi ishte i vështirë, por e duhura pasi vetëm kështu mund të hidhen poshtë të gjtiha pretendimet e ngritura”, u shpreh Nishani.

Presidenti Nishani tha se asgjë dhe askush nuk e tjetërson dot luftën heroike të Ushtrisë Çlirimtare të Kosovës dhe popullit të Kosovës në përballje me agresionin dhe genocidin çnjerëzor Millosheviçian.

Kosova, marrëdhënie ndërparlamentare me Poloninë

September 10, 2015 by dgreca

-Kryetari i Kuvendit të Kosovës, Veseli takime me udhëheqës të Senatit dhe Parlamentit të Polonisë/

PRISHTINË, 10 Shtator 2015/ Kryetari i Kuvendit të Republikës së Kosovës, Kadri Veseli, sot, gjatë pjesëmarrjes në Forumin e 25-të ekonomik, me temën: “Drejt një Evrope të qëndrueshme. Strategjitë për të ardhmen”, ka takuar drejtues të Senatit dhe Parlamentit të Polonisë. Në këto takime u diskutua nevoja e thellimit të bashkëpunimit ndërparlamentar dhe diplomatik të nivelit më të lartë. Gjatë ditës, Veseli ka takuar zv/kryetarin e Senatit të Polonisë, Stanislaw Karczewski, me të cilin ka diskutuar për nevojën e thellimit të bashkëpunimit në mes të dy shteteve, veçanërisht në nivel të dy Kuvendeve. Në takim, Veseli diskutoi për zhvillimet në vend dhe rajon, duke u fokusuar në axhendën e Republikës së Kosovës drejt integrimit në BE, sfidat e kësaj agjende dhe nevojën e përkrahjes nga vendet mike, si Polonia. Bashkëbiseduesit u dakorduan për mundësitë e thellimit të marrëdhënieve ekonomike dhe diplomatike me interes të të dyja vendeve.

Gjatë ditës, kryetari i Kuvendit, Veseli ka takuar edhe zv/kryetarin e Kuvendit të Polonisë, Eugeniusz Grzeszczak. Çështjet e ngritura në këtë takim ishin: zhvillimi i bashkëpunimi ndërparlmentar, vizitat reciproke dhe marrja e përvojës nga Polonia në procesin e integrimit.

Veseli theksoi rëndësinë e stabilitetit në Ballkan, bashkëpunimin rajonal, integrimit të Kosovës dhe kësaj pjese të Evropës në Bashkimin Evropian, duke kërkuar që Polonia të bëhet mbështetëse e këtij procesi.

Konkludim i përbashkët ishte se vizitat reciproke do ta ndihmonin bashkëpunimin ndërparlamenatar me fokus procesin e integrimit të Kosovës në BE.

Kryeparlamentari Veseli është i ftuar në Forumin Ekonomik në Poloni si panelist, ku marrin pjesë shtetarë, ekspertë dhe drejtues nga fusha politike, ekonomike dhe sociale nga Evropa dhe më gjerë./b.j/

Kosova, bashkëthemeluese e Qendrës së Ballkanit Perëndimor për Hulumtime dhe Inovacione

September 9, 2015 by dgreca

-Marrëveshja rajonale do të nënshkruhet në 17 shtator nga Shqipëria, Kosova, Bosnja dhe Hercegovina, Kroacia, Maqedonia, Mali i Zi dhe Serbia/

Nga Behlul Jashari/ PRISHTINË, 9 Shtator 2015/ Qeveria e Republikës së Kosovës miratoi nismën për lidhjen e Marrëveshjes Rajonale për Themelimin e Qendrës së Ballkanit Perëndimor për Hulumtime dhe Inovacione.“Themelimi i Qendrës së Ballkanit Perëndimor për Hulumtime dhe Inovacione është një nismë rajonale që synon të realizohet përmes marrëveshjes rajonale që do të nënshkruhet më 17 shtator të këtij viti në Split, Kroaci, nga Shqipëria, Kosova, Bosnja dhe Hercegovina, Kroacia, Maqedonia, Mali i Zi dhe Serbia”, u bë e ditur sot në mbledhjen e qeverisë kosovare.U theksua se, “Qendra e Ballkanit Perëndimor për Hulumtime dhe Inovacione do të jetë një organizatë ndërkombëtare e pavarur, jofitimprurëse dhe në pronësi të palëve nënshkruese të marrëveshjes rajonale”.

“Kjo qendër do të mbështes fuqizimin e bashkëpunimit në nivel evropian dhe nivel ndërkombëtar, duke përmirësuar klimën e Ballkanit Perëndimor për hulumtime dhe inovacione”, deklaroi qeveria e Kosovës.

Qeveria e Republikës së Kosovës, e drejtuar nga kryeministri Isa Mustafa, ka zhvilluar sot mbledhjen e 48-të me radhë.

Me propozimin e Ministrisë së Infrastrukturës është aprovuar nisma për lidhjen e marrëveshjes ndërmjet qeverisë së Republikës së Kosovës dhe qeverisë së Mbretërisë së Norvegjisë për Transportin Rrugor Ndërkombëtarë të Udhëtarëve dhe Mallrave.

Projektligj për ndryshimin dhe plotësimin e Ligjit për Lirinë Fetare në Kosovë ka marr miratimin e qeverisë. Sipas këtij projektligji, bashkësitë fetare ekzistuese dhe ato që regjistrohen të reja, kanë statusin e personave juridikë dhe kanë të drejtë të themelimit të institucioneve të ndryshme brenda tyre, me karakter humanitar, fetar, edukativ, apo karakter tjetër të ngjashëm, të cilat mund të fitojnë edhe vetë statusin e personit juridik. Shteti respekton të gjitha bashkësitë fetare në Republikën e Kosovës, njeh si përfaqësues të tyre vetëm personat e autorizuar nga bashkësitë fetare në Kosovë dhe garanton mbrojtjen e bashkësive fetare nga çdo person apo grup që pretendon emrin, objektet e kultit, pronat, logot dhe vulën e tyre.

Në mbledhjen e sotme, qeveria ka emëruar drejtorët në Bordet e Ndërmarrjeve Publike: “Posta e Kosovës Sh.A”, “Aeroporti i Gjakovës” dhe “Hekurudhat e Kosovës – INFRAKOS Sh.A”.

Qeveria e Republikës së Kosovës miratoi vendimin për rishikimin e ndarjes së shtesave të cilat realizohen nga Buxheti i Republikës së Kosovës.

Pas kërkesës së ministrave të komunitetit serb, qeveria e Kosovës ka shtyrë për mbledhjen e ardhshme miratimin e Ligjit për arsimin e lartë.

Kosova në Forumin ekonomik në Poloni

September 9, 2015 by dgreca

-Kosovës, MSA dhe liberalizim vizash për perspektivë evropiane/

PRISHTINË, 9 Shtator 2015/ Kryetari i Kuvendit të Republikës së Kosovës, Kadri Veseli, në Poloni merr pjesë në Forumin e 25-të ekonomik, me temën: “Drejt një Evrope të qëndrueshme. Strategjitë për të ardhmen”.Veseli është i ftuar të marrë pjesë si panelist dhe me këtë rast janë paraparë edhe takime me homologë të shteteve të ndryshme, burrështetasë, diplomatë dhe ekspertë pjesëmarrës të Forumit. Njoftimi dërguar nga Kuvendi i Kosovës thekson se, Forumi Ekonomik është konferenca më e rëndësishme ekonomike në Evropën Qendrore. Për 25 vjet ajo ka qenë një vend debati e diskutimi i krerëve më të lartë shtetërorë të Evropës dhe më gjerë.

Ndërsa Ministria e Integrimit Evropian të Kosovës bën të ditur se, zëvendësministri Ramadan Ilazi po merr pjesë në Forumin Ekonomik të Polonisë dhe ka qenë pjesë e panelit të Forumit Ekonomik të Liderëve të Rinj me titull “Çfarë mund të bëjnë liderët e së ardhmes të shpëtojnë projektin evropian”.

Ai tha se, Kosova vazhdon të jetë e izoluar dhe jemi mbrapa në procesin e integrimit në krahasim me vendet e tjera.

“Nënshkrimi i MSA-së dhe liberalizimi i vizave për qytetarët e Republikës së Kosovës është konfirmim dhe konkretizim i perspektives evropiane për Kosovën, të cilën e mbështesin të gjitha shtetet e Bashkimit Evropian”, u shpreh Ilazi.

Ai ka thënë se, “pa perspektiven evropiane, Ballkani do të kishte të pamundur të bënte hapin drejt pajtimit dhe orientimit kah zhvillimi”.

“Prandaj, forcimi i perspektives evropiane për rajonin, duke përshpejtuar procesin e integrimit duhet të jetë objektiv strategjik i BE-së, sepse përafrimi i vendeve të Ballkanit me BE-në, kontribuuan në sigurinë dhe zhvillimin e rajonit”, ka theksuar Ilazi.

Christoph Zoepel, ish ministri i Shtetit në Ministrinë e Jashtme Federale të Gjermanisë, gjatë diskutimit deklaroi se problemi i BE-së është fakti që rreth 22 milionë njerëz nuk janë pjesë e saj, e që duhet të jenë, duke përfshirë edhe Kosovën.

Në Forumin Ekonomik të Liderëve të Rinj po marrin pjesë 350 pjesëmarrës nga 42 shtete. Zëvendësministri Ilazi sot do të flasë edhe në panelin dedikuar pajtimit në kuadër të Forumit Ekonomik të Polonisë./b.j/