Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

SPECIALE-Një ditë e lume, me vatranët nga SHBA në Kosovë

by

 

1 Vatranet Ipeshkevi-Delegacioni i Federatës Pan-Shqiptare të Amerikës Vatra, kryesuar nga zv/kryetari Agim Rexhaj, në Ipeshkvinë e Kosovës, në 16 gusht 2016, u prit me shumë nderim e respekt nga Ipeshkvi i Ipeshkvisë së Kosovës, Imzot Dodë Gjergji, i cili e shoqëroi gjithnjë edhe gjatë vizitës në Katedralen “Nënë Tereza”…/

-Gurthemeli i Katedrales në Prishtinë u vu në 26 gusht 2005 për nder të 95 vjetorit të lindjes së Nënës Terezë nga ana e Presidentit historik të Kosovës Dr. Ibrahim Rugova, Ipeshkvit të Ipeshkvisë së Kosovës Imzot Mark Sopi dhe kardinalit të Uashingtonit Teodor Mekkerik. Katedralja nisi të ndërtohet në 600 vjetorin e lindjes së kryeheroit kombëtar shqiptar Gjergj Kastrioti-Skënderbeu/

-E njohur në botë si Nënë Tereza, shqiptarja Gonxhe Bojaxhiu e lindur në 26 gusht 1910 në Shkup, do të shpallet e shenjtë nga Papa Françesku në 4 shtator 2016 në Vatikan/

-Kosova përgatit koncertin “Himni i Nënë Terezës”, që do të mbahet në Vatikan, në 3 shtator 2016, me rastin e shenjtërimit të të Lumturës Nënë Tereza/

-Në Katedralen “Nëna Tereza” janë ngritur flamujt e festës – titulli i reportazhit që kam shkruar në 1 Korrik të vitit 2010 – në 100 vjetorin e Nënë Terezës/

Gazeta DIELLI nga korrespondenti në Kosovë Behlul JASHARI/

PRISHTINË, 20 Gusht 2016/ Lajmin e Agjencisë shtetërore-zyrtare të lajmeve të Shqipërisë se shqiptarët në Nju Jork – SHBA kanë kontribuar me afër 2 milionë dollarë për ndërtimin e Katedrales “Nënë Tereza” në Prishtinë – kryeqytetin e Kosovës, të datës 18 gusht 2016, e morën dhe e botuan atë ditë, po edhe ditëve në vijim të javës e muajit, edhe shumë media kudo në trojt etnike e në botën shqiptare. Lajmi u transmetua shqip, edhe anglisht…

Si korrespondent nga Kosova prej çerek shekulli i  Agjencisë Telegrafike Shqiptare -Agjencisë së lajmeve të shtetit shqiptar, e raportova atë lajm nga vizita e delegacionit të Federatës Pan-Shqiptare të Amerikës Vatra, të kryesuar nga zv/kryetari Agim Rexhaj, në Ipeshkvinë e Kosovës, ku u pritëm me shumë nderim  e respekt nga Ipeshkvi i Ipeshkvisë së Kosovës, Imzot Dodë Gjergji, i cili na shoqëroi gjithnjë edhe gjatë vizitës në Katedralen “Nënë Tereza”… Dhe, më tej Ipeshkvi Gjergji bashkë me delegacionin e Vatrës, që e ftoi, eci më këmbë nëpër rrugët e sheshet e Prishtinës për të marrë pjesë në ceremoninë e promovimit të emisionit të jashtëzakonshëm të Pullës Postare “Shenjtërimi i Nënës Terezë”, që u bë në ambientet e hotelit më të madh të kryeqytetit të Kosovës.

Me delegacionin e shqiptarëve të ardhur nga SHBA, ku ishin Agim Rexhaj, zv/kryetar Vatrës, Marjan Cubi – arkëtar i Vatrës dhe kryetar i Komisionit për mbledhjen e  fondeve për ndërtimin e Katedrales “Nënë Tereza” në Prishtinë, si dhe Laura Rexhaj, Dila Cubi, Fran Marku, Mhill Gjuraj, Pashk Maksuti, Mëhill Velaj, i cili romanin e tij “Hyji në skëterrë” ia dhuroi Ipeshkvit Gjergji, gjatë gjithë kohës isha edhe unë, prej më shumë se një viti edhe korrespondent në Kosovë i Gazetës Dielli – organ i Vatrës.

Delegacionin e Vatrës, gjatë pjesëmarrijes në  ceremoninë e promovimit të Pullës Postare “Shenjtërimi i Nënës Terezë”, e takoi dhe përshëndeti me shprehje respekti dhe vlerësimi edhe  kryeministri i Republikës së Kosovës, Isa Mustafa, si dhe kryeshefi ekzekutiv i Postës së Kosovës, Sejdi Hoxha.

Delegacioni i Federatës Pan-Shqiptare të Amerikës Vatra  gjatë qëndrimit në Prishtinë vizitoi nga mesdita edhe Shtëpinë e Pavërësisë së Kosovës Dr. Ibrahim Rugova, ndërsa kishte edhe shumë takime e biseda gjatë gjithë ditës edhe gjatë kalimit nëpër rrugë e sheshe të kryeqytetit kosovar. Takime, biseda dhe përshëndetje me plot respekt.

Ishte dita e 16 gusht 2016, të cilën pjesëtarët e delegacionit të Vatrës si dhe unë e nisëm me udhëtim drejt selisë së Ipeshkvisë së Kosovës në Prishtinë, për takimin në orën 09:00 me Ipeshkvin Imzot Dodë Gjergji, pritja e të cilit ishte plot përzemërsi.

Në Ipeshkvinë e Kosovës në mëngjes mbërrita herët që atje të pres ardhjen e delegacionit të Vatrës, vatranëve që vinin nga vise të ndryshme të tokave shqiptare. Para Ipeshkvisë kisha mbërritur në të njëjtën orë me Don Lush Gjergjin, Vikar Gjeneral i Ipeshkvisë së Kosovës me seli në Prishtinë, i cili hapi dyertë dhe hymë brenda…Ndërsa, pas pak vjen të më takojë edhe zëdhënësi i Ipeshkvisë, Don Fatmir Koliqi, dhe së bashku presim delegacionin e Vatrës. Nga dritarja shohim se para Katedrales së pari mbërrin Fran Marku…Dyert e Ipeshkvisë hapen, vijnë edhe të tjerët…Së bashku mirëpritemi nga Ipeshkvi Imzot Dodë Gjergji, ndërsa kryesuesi i delegacionit, zv/kryetari i Vatrës, Agim Rexhaj, falënderon dhe nisë një bisedë të gjatë ku flasin të gjithë, për punë, angazhime, aktivitete…

Ipeshkvi Imzot Dodë Gjergji vlerëson lart organizimin dhe kontributet e Federatës Pan-Shqiptare të Amerikës Vatra, me kryetarin Dr. Gjon Buçaj e gjithë vatranët.

“E vlerësoj veçantë mënyrën e organizimit tuaj, të Vatrës, nga të gjitha trojet shqiptare së bashku…Vatra është edhe vatër e të mirave dhe kontributeve të mëdha për kombin”, shprehet ai.

Edhe nga ana e delegacionit të Vatrës edhe nga ana Ipeshkvit theksohet se Këshilli i Fondacionit për ndërtimin e Katedralës “Nënë Tereza” në Prishtinë, që vepron në Nju Jork dhe rrethinë, ka kontribuar për mëse 9 vite  me afër 2 milionë – 1.800.000 dollarë, që janë mbledhur dhe janë dorëzuar.

“Mendojmë të vazhdojmë që deri vitin e ardhëshëm shifra të arrijë në 2 milionë dollarë”, shprehet Marjan Cubi, kryetar i Komisionit që vepron në Nju Jork për mbledhjen e fondeve për ndërtimin e Katedrales “Nënë Tereza” në kryeqytetin e Kosovës.

Ipeshkvi i Ipeshkvisë së Kosovës, Imzot Gjergji falënderoi dhe vlerësoi lart të gjitha kontributet dhe njoftoi delegacionin e Vatrës me të gjitha punët e kryera në Katedralen “Nënë Tereza”, gurthemelin e së cilës e vuri Presidenti historik i Kosovës, Dr. Ibrahim Rugova dhe këtë të gjithë e kujtojmë gjatë bisedës.

Para 11 viteve, gjatë ceremonisë së vënies së gurthemelit të Katedrales katolike në Prishtinë, në 26 gusht 2005, Presidenti Rugova theksonte: “Sot është një ditë e madhe për kryeqytetin dhe për gjithë Kosovën, sepse po e bekojmë gurin e themelit të një tempulli të shenjtë, që i kushtohet Nënës së dashur shqiptaro-kosovare dhe Nënës së Njerëzimit – të lumturës Nëna Tereze – asaj që lartësoi nderin e Kosovës dhe të shqiptarëve në gjithë planetin duke i afirmuar vlerat tona dhe duke ndihmuar gjithë njerëzimin”.
Gurthemeli i Katedrales u vu për nder të 95 vjetorit të lindjes së Nënës Tereze nga ana e Presidentit Rugova, Ipeshkvit të Ipeshkvisë së Kosovës Imzot Mark Sopi dhe kardinalit të Uashingtonit Teodor Mekkerik, në oborrin e Gjimnazit “Xhevdet Doda”. Katedralja nisi të ndërtohet në 600 vjetorin e lindjes së kryeheroit kombëtar shqiptar Gjergj Kastrioti-Skënderbeu.

Ndërsa, para 20 viteve, 17 gusht 1996, Presidenti i Republikës së Kosovës Dr. Ibrahim Rugova i dërgoi një urim Imzot Mark Sopit, Ipeshkv i Ipeshkvisë së Kosovës në atë kohë, me rastin e Ditës së shenjtë të kremtimit të 18 gushtit, duke shprehur besimin se së shpejti do kremtohet në Kosovën e lirë e të pavarur.
“Me rastin e Ditës së Shenjëtorëve të Ulpianës e të Dardanisë iliro-shqiptare, Florit e Laurit të viteve 117-138 pas Krishtit, pranoni urimet e mia të përzemërta.
Besojmë se së shpejti këtë ditë të shenjtorëve tanë ta kremtojmë në Ulpianë të Prishtinës në liri e pavarësi të Kosovës, si kremte popullore”, thuhej në urimin e Dr. Rugovës.

Edhe për Ditën e Shenjëtorëve të Ulpianës e të Dardanisë iliro-shqiptare, si urohej e kremtohej para 20 viteve…Edhe për gurthemelin e Katedralës  “Nënë Tereza” para 11 viteve kam raportuar nga Kosova si edhe për shumë ngjarje të tjera të lëvizjes e luftës për liri, pavarësi e demokraci, dhe në këtë ditë të lume me Vatrën shqiptare nga SHBA në Kosovën e lirë e të pavarur vizitojmë Ipeshkvinë dhe Katedralen e ndërtuar në Prishtinë…

Ipeshkvi Gjergji duke iu përgjigjur interesimeve të delegacionit të Vatrës, foli edhe për ftesën e mundësinë e një vizite të Papa Françeskut në Kosovë.

Imzot Gjergji njoftoi edhe për përgatitjet e Kosovës të koncertit “Himni i Nënë Terezës”, që do të mbahet në Vatikan, në 3 shtator 2016, me rastin e shenjtërimit të të Lumturës Nënë Tereza.

E njohur në botë si Nënë Tereza, shqiptarja Gonxhe Bojaxhiu e lindur në 26 gusht 1910 në Shkup, do të shpallet e shenjtë nga Papa Françesku në 4 shtator 2016 në Vatikan.

Ndërkohë, për të shënuar ditëlindjen e saj dhe për të filluar zyrtarisht përgatitjen për shenjtërimin e Nënë Terezës, InfinityArt dhe Ipeshkvia e Kosovës organizojnë ekspozitë me portretet e Nënë Terezës, punime të artistëve të rinj të Kosovës.

Ekspozita do të hapet në 26 gusht në ora 10:00 e do të jetë e hapur deri në 28 gusht, prej orës 10:00 deri në 16:00, në Katedralen “Nënë Tereza” në Prishtinë.

KONCERTI PËR NËNË TEREZËN NË VATIKAN

 Në 2 gusht 2016,  Ipeshkvia e Kosovës, në bashkëpunim me F.A. “Nënë Tereza” dhe Filharmoninë e Kosovës, ka mbajtur Konferencë për media për të paraqitur zyrtarisht programin e Koncertit “Himni i Nënë Terezës”, që do të mbahet në Vatikan, më 3 shtator 2016, me rastin e shenjtërimit të Nënë Terezës.

Don Fatmir Koliqi, zëdhënës Ipeshkvisë së Kosovës, tha se, “viti 2016 do të shënohet në Historinë e Kishës Katolike ndër Shqiptarë dhe të Popullit Shqiptar, sepse bija e kësaj Kishe dhe këtij Populli, e Lumja Nënë Tereza do të shpallet e shenjtë nga Ati i Shenjtë Papa Françesku, në 4 shtator 2016 në Vatikan. Kurse për Kishën Universale ka rëndësinë të madhe, sepse Papa ka zgjedhur pikërisht Vitin e shenjtë – Jubileun e Jashtëzakonshëm të Mëshirës, për të treguar Nënë Terezën, shenjtëreshë të mëshirës dhe dashurisë së krishterë”.

Në vitin e shenjtërimit të Nënë Terezës, edhe ne, populli i saj, vijoi Koliqi, me nderim dhe falënderim Zotit për këtë dhuratë të madhe, jemi munduar të përgatitemi për t’u paraqitur në Vatikan me dinjitet.

“Kisha katolike do të shtegtojë në Vatikan me një numër të konsiderueshëm, për të marrë pjesë në këtë ngjarje të rëndësishme për ne. Do të mbahet Koncerti për Nënë Terezën në Vatikan, në 3 shtator 2016”, tha ai.

Duke folur për atë se, prej nga ka ardhur ideja për të mbajtur Koncert në Vatikan në vigjiljen e shenjtërimit të Nënë Terezës, Don Koliqi tha:

Në vitin 2015, më 5 shtator, në Katedralen “Nënë Tereza” në Prishtinë, është mbajtur Koncerti për Nënë Terezën, i ideuar nga producenjta Diana Toska, i realizuar nga artistë të mirënjohur shqiptarë nga Kosova, Shqipëria dhe Maqedonia, i cili ishte një realizim i mrekullueshëm.

Nga këtu lindi ideja që i njëjti koncert të ekzekutohet në ambientet e Vatikanit.

Ipeshkvi i Kosovës, Imzot Dodë Gjergji, ia ngarkoi vetës detyrën për të kërkuar nga Selia e Shenjtë që të na mirëpret me këtë koncert, pikërisht në vigjiljen e Shenjtërimit të Nënë Terezës, me idenë për të falënderuar Zotin bashkë me Kishën Katolike universale për këtë Nënë të madhe të botës, që ka dhënë Kisha jonë.

Pas kërkesës së Ipeshkvit të Kosovë, Selia e Shenjtë me kënaqësi e ka pranuar ftesën dhe është bërë nikoqire e kësaj ngjarje kulturore dhe artistike.

Këtij organizimi të Kishës Katolike në Kosovë i është bashkangjitur edhe Konferenca Ipeshkvore e Shqipërisë, Argjipeshkvia e Tivarit dhe Ipeshkvia e Shkupit.

Këtë ide dhe këtë nismë kulturore dhe artistike e ka përkrah dhe e ka mbështetur financiarisht Qeveria e Kosovës.

Vendi ku ka përcaktuar Selia e Shenjtë, që të na pret për ta mbajtur këtë koncert, është njëra ndër Bazilikat madhështore Papnore: Bazilika Papnore e Shën Palit.

Prandaj, vazhdoi zëdhënësi i Ipeshkvisë, dua të shpreh falënderimet Selisë së Shenjtë për mikpritjen, Ipeshkvin e Kosovës, Imzot Dodë Gjergjin për angazhimin e tij personal që ka bërë që ky koncert të realizohet në Vatikan, Qeverinë e Kosovës për mbështetjen dhe financimin, Diana Toskën, producenten e koncertit dhe punën e saj të vazhdueshme e të palodhshme, Filharmonin e Kosovës, artistët që kanë pranuar të bashkëpunojnë për të realizuar këtë ngjarje të rëndësishme kulturore në mënyrë vullnetare, gjegjësisht pa honorare…

Në vazhdim, Diana Toska, producente e Koncertit, foli për pjesëmarrjen e artistëve të mirënjohur, që do të marrin pjesë në Koncert: Inva Mula, Ermonela Jaho, Rita Ora, Shkelzen Doli, Saimir Pirgu, Ramë Laja, Gëzim Mushketa etj, të cilët do të këndojnë në këtë ngjarje të rëndësishme kulturore për ta nderuar jetën dhe veprën e Nënë Terezës. Diana i tregoi edhe recituesit e vjershave/uratave të Nënë Terezës: Don Lush Gjergji, Lorik Cana, Majlinda Kelmendi dhe dy artistët e rinj të filmit “Shok” Andi dhe Lumi, të cilët ishin të pranishëm në konferencë.

Drejtor i Filharmonisë së Kosovës, Baki Jashari tha se Filarmonia e Kosovës është e nderuar që është pjesë e kësaj ngjarje artistike. Që nga fillimi kemi bashkëpunuar me të gjithë artistët dhe organizatorët dhe besoj se do të jetë një koncert që do të paraqes denjësisht popullin tonë. Do të tregojmë se Nënë Tereza ka bijë dhe bija të kulturës dhe artit, që dinë ta nderojnë veprën e saj të madhe. I pyetur se në çfarë gjuhe do të këndohet, ai tha se programi është në disa gjuhë, shqip, italisht dhe anglisht.

Don David Xhuxha, drejtor i programit të Radio Vatikanit në gjuhën shqipe, i caktuar nga Ipeshkvia e Kosovës koordinator i koncertit për Romë, foli për Bazilikën e Shën Palit, ku do të mbahet koncerti, si një vend me simbolikë të veçantë, pasi Shën Pali është ungjillëzuesi i shqiptarëve. Shën Pali ka mbjell farën e krishterimit ndër shqiptarë dhe Nënë Tereza është figura më brilante e këtij krishterimi. Koncerti i Nënë Terezës, tha Don Davidi, ka hy në axhendën e aktiviteteve të Vatikanit për shenjtërim e Nënë Terezës dhe si i tillë ka një interesim të madh nga mediat ndërkombëtarë që do ta transmetojnë bashkë me mediat shqiptare.

Nënë Tereza në rend të parë është bijë e këtij populli, e këtyre traditave, theksoi Don Davidi, ajo këtu është frymëzuar nga vatra e saj familjare… “Nënë Tereza është ikona të cilën Papa Francesku e ka dashur pikërisht në fazën përfundimtare të këtij viti jubilar për arsye shpirtërore, por edhe të jetë emblemë e atij qytetërimi të ri botëror, për çka Papa Francesku nënvizon se ka nevojë për figura për shembuj për stilin e një jete, siç ishte Nënë Tereza, dhe ne duhet të jemi krenarë për këtë”, tha Gjugja.

Për të paraqitur Koncertin për mediat ndërkombëtare do të mbahet një konferencë për media në Sallën e Shtypit të Vatikanit, në 1 shtator 2016.

Koncerti do të mbahet më 3 shtator, në ora 19:30, në Bazilikën e Shën Palit. Hyrja do të jetë falas, porse nevojitet të sigurohen biletat, të cilat e kanë rolin e rezervimit të vendeve. Kurse gjithë ata që do të marrin pjesë në koncert, duhet të jenë te Bazilika në ora 18:00, për shkaqe protokolli.

Të nesërmen, me 4 shtator 2016-që është dita kulminante, do të jetë mesha e solemne e shenjtërimit të Nënë Terezës, të cilën do ta kremtojë Papa Françesku, në bashkëmeshim me qindra ipeshkvijë dhe meshtarë të botës, në ora 10:00, në Sheshin e Shën Pjetrit. Edhe për pjesëmarrje në meshë duhet të rezervohen biletat (falas) për të rezervuar vendet. Biletat mund të sigurohen te Ipeshkvia e Kosovës në Prishtinë, pranë Katedrales “Nënë Tereza”.

KOSOVA PËRGATITET TË SHTEGTOJË NË VATIKAN PËR SHENJËTËRIMIN E NËNË TEREZËS

Shenjtërimi i Nënë Terezës më 4 shtator të këtij viti, është një ngjarje e papërsëritur dhe me rëndësi të madhe për popullin tonë, u tha në takimin mes Ipeshkvit të Kosovës Imzot Dodë Gjergjit dhe Kryeministrit të Kosovës, Isa Mustafa, i cili u zhvillua në ambientet e Kryeministrisë, në 24 qershor 2016 në Prishtinë.

Gjatë takimit, ku ishte i pranishëm edhe zëvendëskryeministri, njëherësh ministër i Kulturës, Rinisë dhe Sportit, Kujtim Shala, Vikari Gjeneral i Ipeshkvisë së Kosovës, Don Lush Gjergji dhe Sekretari – Zëdhënësi Don Fatmir Koliqi, u bisedua për përgatitjet që po bëhen për Shtegtimin në Vatikan me rastin e shenjtërimit të Lumes Nënë Tereza.

Imzot Dodë Gjergji e informoi Kryeministrin Mustafa për përgatitjet e Ipeshkvisë së Kosovës që ka ndërmarrë për këtë ngjaje të papërsëritshme për të gjithë shqiptarët. Përveç shtegtimit 3 ditor në Vatikan, që do jetë i organizuar nga Ipeshkvia, në kuadër të kësaj do të jetë edhe koncerti i Himinit të Nënë Terezës, i cili do të mbahet me 3 shtator, në vigjilje të shenjtërimit.

“Populli i gëzohet kësaj ngjarje të madhe. Është një vit që Zoti e ka mbush me dhurata të mëdha popullin tonë dhe këtë rast duhet ta shfrytëzojmë për qenë të pranishëm në mënyrën më të dinjitetshme”, tha Imzot Dodë Gjergji.

Kryeministri  Mustafa tha se “Kosova dhe shqiptarët kanë një arsye më shumë që të ndjehen krenarë në këtë vit me shumë suksese. Shenjtërimi i Nënës Terezë është një përjetim i veçantë për qytetarët e Kosovës dhe shqiptarët në përgjithësi”.

Në këtë kontekst, kryeministri Isa Mustafa, bëri të ditur se Qeveria e Kosovës do të financojë koncertin, i cili do të mbahet në Vatikan, më vigjilje të shenjtërimit të Nënës Terezë.
Ipeshkvi i Kosovës, Imzot Dodë Gjergji, shprehu mirënjohje për Qeverinë për punën e saj në këtë drejtim dhe për mbështetjen e koncertit për nder të shenjtërimit të Nënës Terezë.

NË KOSOVË, VITI 2016 ËSHTË VITI I NËNË TEREZËS

Viti 2016 është Viti i Nënë Terezës në Kosovë, i deklaruar në 15 janar nga qeveria kosovare, e cila më pas në mbledhjen e 22 korrikut vendosi të ndajë mjete financiare me qëllim të mbështetjes së aktiviteteve që lidhen me kanonizimin dhe shpalljen e shenjtërisë së Nënës Terezë.

Kosova ka shpallë 5 Shtatorin “Dita e Bamirësisë – Nëna Terezë”. Për këtë, Kuvendi i Republikës së Kosovës në seancën plenare në 11 korrik, me votim unanim, ka miratuar propozimin e Kryesisë së Kuvendit.
Asambleja e Përgjithshme e Kombeve të Bashkuara në vitin 2012 ka shpallë datën 5 shtator, ditën kur kaloi në amshim Nënë Tereza, si Ditën Ndërkombëtare të Bamirësisë.

Rezoluta e OKB-së bënte thirrje që në 5 shtator, të gjitha shtetet anëtare të OKB-së, organizatat e Kombeve të Bashkuara, organizatat e tjera ndërkombëtare dhe rajonale, shoqëria civile, si dhe individët, të përkujtojnë Ditën Ndërkombëtare të Bamirësisë.

***

“Në Katedralen ‘Nëna Tereza’ janë ngritur flamujt e festës”, është titulli i reportazhit që kam shkruar në 1 Korrik të vitit 2010 – në 100 vjetorin e Nënë Terezës, botuar atë ditë në Agjencinë zyrtare-shtetërore të lajmeve të Shqipërisë – ATSH:

***

REPORTAZH I VITIT 2010 – NË 100 VJETORIN E NËNËS TEREZË:

Kosovë-Në Katedralen “Nëna Tereza” janë ngritur Flamujt e Festës

PRISHTINË, 1 Korrik/ATSH-Behlul Jashari/.- Flamujt janë ngritur këtë verë lart mbi kulmin e katedrales në ndërtim, me emrin e Nënës Terezës, në qendër të kryeqytetit të Kosovës, përballë Universitetit të Prishtinës.
Janë flamujt e ngritur në 100 vjetorin e lindjes së nobelistes shqiptare, në këtë vit jubilar, të cilin Kosova e shënon si “Viti i Nënës Terezës”, i shpallur e tillë nga presidenti i shtetit më të ri evropian.
I pyetur për këtë imazh flamujsh në Katedrale, Don Shan Zefi, thotë se “është flamuri kombëtar shqiptar, flamuri i shtetit të Kosovës, dhe Flamuri i Vatikanit. Janë tre flamujt, që paraqesin Kishën Katolike edhe në Kosovë”.
Ipeshkvia e Kosovës, e cila kishte selinë në qytetin e Prizrenit, tani ka selinë në Prishtinë, në një ndërtesë të sapondërtuar, shumë pranë, në një oborr, me Katedralen “Nëna Tereza”, e cila është në ndërtim.
Don Shan Zefi, i cili udhëheq punën për ndërtimin e Katedrales, thotë se projekti ecën përpara, sipas afatit të parashikuar. “Deri më 26 gusht 2010, kur kremtohet 100-vjetori i lindjes së Nënës Terezës, mendojmë se ndërtesa e Katedrales do hyjë nën kulm, do përfundojnë punimet e mëdha, do të ketë dyert e hyrjes dhe dritaret”, thotë ai.
“Dita e 100-vjetorit të Nënës Terezë është një jubile jashtëzakonisht madhor, do të kremtohet me një pjesëmarrje të madhe e shumë veprimtari. Do të ketë edhe një meshë solmene”, tregon Kancelari i Ipeshkvisë së Kosovës, Don Shan Zefi.
Ndërsa, shton ai, shenjtërimi – shugurimi i Katedralës “Nëna Terezë”, do të jetë më vonë, pas një kohe që do zgjasë sa dhe përfundimi i të gjitha punimeve, përfshirë edhe ato të brendshme në objektin e Katedrales, që do jetë edhe një mrekulli arkitekturore.
“Është një projekt që do kohë të realizohet. Do të ketë piktura, skulptura, simbole.Do të ketë dekorim me mermere të çmueshëm, me ngjyrat e Nënës Terezës.Edhe arkitektura do të ‘flasë’ shqip”, thotë Zefi.
Katedralja në Prishtinë do të jetë ngjarja më e rëndësishme në kalendarin e aktiviteteve të “Vitit të Nënës Terezës” në Kosovë.
Më 11 nëntor 2009 në Prishtinë u mbajt takimi i parë i Këshillit Organizativ të Kosovës për 100-vjetorin e lindjes së të Lumes Nënës Tereze, ndërsa viti jubilar u hap në 10 dhjetor, me Akademinë kremtore me rastin e 30-vjetorit të laurimit të Nënës Terezës me Çmimin Nobel për Paqe.
Në këtë Akademi, Presidenti i Kosovës, Fatmir Sejdiu, kujtoi se “30 vjet më parë, Nëna Tereza, teksa po dilte nga manifestimi solemn i pranimit të Çmimit Nobel, pasi i nënshkroi Dom Lush Gjergjit një foto-portret të sajin, shkruajti ‘Unë gjithmonë e kam në zemër popullin tim shqiptar”.
Presidenti Sejdiu më atë rast shpalli dhe vendimin për “Vitin e Nënës Terezës”.
Don Shan Zefin tregon dhe për kalendarin e aktiviteteve kushtuar 100 vjetorit të lindjes së bamirëses shqiptare me famë botërore, të cilat janë paralajmëruar deri në fund të këtij viti nga Këshilli Organizativ i Kosovës.
Ai ka folur dhe rreth temës “Kush ishte e Lumja Nënë Tereza?”, në një nga aktivitetet e zhvilluara deri tani, gjatë Panairit të Librit në Prishtinë, në qershor.
“Kjo datë historike e 100 vjetorit të Nënes Terezës do të jetë dhurata më e madhe për të krishterët, por edhe për mbarë botën për të cilën u flijua, e sidomos për popullin shqiptar, nga e mori gjakun, gjuhën dhe fenë”, pat theksuar më atë rast Zefi.
Gjatë kesaj vere, gushtit, pritet që “Figura e Nënës Terezës në letërsi” të jetë tema e një sesioni në kuadër të Seminarit Ndërkombëtar për Gjuhën, Letërsinë dhe Kulturën Shqiptare në Prishtinë.
Po gjatë gushtit, mendohet që të bëhet përurimi dhe emërtimi i Urës së Mitrovicës, mbi lumin Ibër, “Ura e Paqes – Nëna Tereza”.
Për ditën e lindjes së Nënës Terezës, krahas veprimtarive për Katedralen, do të jetë edhe një koncert i Filarmonisë së Kosovës, dhe pritet akordimi i Medaljes Humanitare “Nëna Terezë” nga presidenti i vendit.
Më 5-10 shtator është paraparë Konferenca Shkencore Ndërkombëtare “Jeta dhe vepra e Nënës Terezës”.
Ndër aktivitetet që priten deri në fund të vitit është dhe botimi i pullës postare me portretin e Nënës Terezës dhe përurimi i shtëpisë muze “Nëna Tereza” në qytetin e Prizrenit.
“Unë jam prej Prizreni, prindërit e mi kanë lindur në Prizren”, kujton fjalët e Nënë Terezes, Don Shan Zefi, nga takimi i parë me të në vitin 1975.
“Isha në gjimnazin klasik në Suboticë (qytet në Krahinën e Vojvodinës në federatën e atëhershme jugosllave), ku ishim rreth 40 seminaristë kosovarë. Kur i thamë se jemi nga Kosova, Nëna Tereza menjëherë u shpreh shqip. Tregoi se është nga Prizreni. Me një emocion të jashtëzakonshëm filloi të flasë shqip me ne shqiptarët.”, kujton Zefi.
Zefi tregon se me Nënën Terezën u ritakua dhe në Shkup, në vitin 1986. “Thoshte edhe atje se ishte e lindur në Shkup, se kishte prindërit nga Kosova”.
Po ashtu, Zefi tregon se me Nënën Terezën ka pasur 3-4 takime edhe në Romë.
“Edhe recitonte, lutej në shqip. ‘Punën e pendimit’ e thoshte shqip gjithmonë.E ka dashur shumë Prizrenin. Shkupin. Është një figurë padyshim që lidh botën shqiptare”, thotë Zefi, ndërsa bisedojmë në Selinë e re të Ipeshkvisë së Kosovës dhe në Katedralen në ndërtim në Prishtinë. Fryma, emri dhe shembulli i Nënës Terezës në Kosovë është kudo. Emrin e saj e mban dhe shoqata e bamirësisë, që ka vepruar e ndihmuar që nga kohët më të vështira për Kosovën. E mban dhe sheshi kryesor i kryeqytetit, Prishtinës.Do ta mbajë dhe ura e Mitrovicës mbi Ibër, me mesazhin për t’u shndërruar nga një simbol konfliktesh e ndarjesh në një simbol paqeje e bashkimi.
Ipeshkvi i Kosovës, imzot Dodë Gjergji, në Akademinë solemne me rastin e 30-vjetorit të dhënies së çmimit Nobel për Paqe Nënës Terezë, theksoi se “Nënë Tereza ishte dhe mbetet simbol i përkryer i ushtrimit të dashurisë ndaj të afërmit, dashuri kjo që tejkalon kufijtë njerëzorë e mund të shpjegohet dhe të kuptohet vetëm me dimensionin hyjnor”.

SPECIALE- ZV PRESIDENTI BIDEN PERFUNDON VIZITEN: SHBA Gjithmonë Përkrahje Kosovës

by

biden-mustafa

-NË KOSOVË RRUGA FERIZAJ-GJILAN EMËRTOHET BEAU BIDEN/

*Kryeministri Mustafa: Tek SHBA-të, Kosova sheh aleatin e saj të përhershëm/

-Nënpresidenti i SHBA, Joe Biden në vizitë Kosovës: Kosova do të ketë gjithmonë përkrahjen e Shteteve të Bashkuara të Amerikës në rrugën drejt suksesit/

-Joe Biden, tash e dy dekada ka mbështetur luftën për lirinë, pavarësinë dhe integrimin e Kosovës në NATO e BE\

Gazeta DIELLI nga korrespondenti në Kosovë Behlul JASHARI /më vonë raporti i plotë/

PRISHTINË, 17 Gusht 2016/ Nënpresidenti i SHBA, Joe Biden, mbërrti mbrëmë për vizitë në Kosovë, i pritur në Aeroportin e Prishtinës me ceremoni shtetërore, me nderimet më të larta e mirënjohjen e gjithëmonëshme.

Presidenti i Republikës Hashim Thaçi ka pritur në Aeroport nënpresidentin Joe Biden dhe familjen e tij, siç është shprehur, për t’iu uruar përzemërsisht mirëseardhjen miqve të përjetshëm të Kosovës.“Partneriteti strategjik me SHBA-të na ka mundësuar të bëhemi shtet dhe gjithnjë e më shumë po na bën një shoqëri demokratike me mundësi të barabarta për të gjithë”, është shprehur presidenti i Kosovës.

“Joe Biden, tash e dy dekada ka mbështetur luftën për lirinë, pavarësinë dhe integrimin e Kosovës në NATO e BE”, ka theksuar Thaçi duke shprehur falënderim.Në Prishtinë, sot, nënpresidenti amerikan Biden zhvilloi takime dypalëshe me presidentin Hashim Thaçi dhe kryeministrin Isa Mustafa.

“Kosova do të ketë gjithmonë përkrahjen e Shteteve të Bashkuara të Amerikës në rrugën drejt suksesit”, deklaroi  në konferencë për shtyp pas takimeve nënpresidenti amerikan Joe Biden.

“Kosova ka shënuar progres dhe ka marrë njohje më të mëdha globale. Jeni në një pozitë ku bota po ju njeh po ashtu jeni duke bërë përpara nën emrin tuaj dhe duke garuar me flamurin tuaj”, tha nënpresidenti amerikan në konferencën e përbashkët për shtyp me presidentin kosovar Thaçi.

“SHBA do të qëndrojë përkrah Kosovës sepse ne besojme tek ajo. SHBA ka dhënë 2 miliardë dollarë ndihma dhe do vazhdojmë të ndihmojmë më tej Kosovën”, theksoi, mes tjerash, në“Pata nderin e veçantë të pres sot Zëvendës Presidentin Amerikan, mikun e madh të Republikës së Kosovës, Joe Biden. Pasi i urova Zëvendës Presidentit Biden mirëseardhje në Kuvendin e Kosovës, zhvilluam një takim shumë të frytshëm bilateral.

Jam thellësisht i bindur se kjo vizitë do të ketë ndikim pozitiv në fuqizimin e mëtejshëm të miqësisë dhe të partneritetit strategjik ndërmjet Kosovës dhe SHBA-së. Zoti i bekoftë Kosovën dhe Shtetet e Bashkuara të Amerikës!”, u shpreh kryeministri Mustafa.

Kryeparlamentari kosovar Kadri Veseli ka shkruar në ‘facebook”: “I urova mirëseardhje në Kuvendin e Republikës së Kosovës, mikut tonë të çmuar, zëvendëspresidentit të SHBA-së, Joe Biden dhe Familjes së tij. Shtetet e Bashkuara janë sinonim i lirisë dhe pavarësisë tonë. Përgjithmonë.”

Gjithashtu, nën patronatin e qeverisë së Kosovës, nënpresidenti Joe Biden dhe Dr. Jill Biden do të shkojnë për vizitë afër kampit Bondsteel për të marrë pjesë në ceremoninë e përurimit të emërimit të rrugës kushtuar djalit të tyre të ndjerë, Joseph R. “Beau” Biden, III, bën të ditur Ambasada e SHBA në Kosovë.

Ndërkohë, bashkëshortja e nënpresidentit amerikan Biden, Jill Biden do të shkojë në manastrin e Graçanicës, ku do të takohet me peshkopin Teodosije, si dhe do të vizitojë ambientet e manastirit.

Në prag të vizitës, Ambasada amerikane në Prishtinë ka deklaruar për shtypin kosovar se “nënpresidenti vjen në Kosovë për të dëshmuar mbështetjen e Shteteve të Bashkuara të Amerikës për zhvillimet demokratike në Kosovë, si dhe për të përforcuar marrëdhëniet e fuqishme midis dy vendeve tona”.

Kjo është vizita e dytë e nënpresidentit të SHBA, Joe Biden,  në Kosovë, pas të parës në 21 maj 2009, pak më shumë se një vit pas shpalljes së pavarësisë, kur është dekoruar me Medaljen e Artë të Lirisë, e cila u jepet personaliteteve të njohura të botës për meritat e tyre për mbrojtjen e lirisë së Kosovës dhe për ndërtimin e vendit të lirë të Kosovës, si dhe për integrimin e tij në bashkësinë e kombeve të lira të botës.

Pavarësinë e Kosovës, të shpallur në 17 shkurtin historik 2008, Shtetet e Bashkuara të Amerikës e kanë njohur që në ditën e parë pas shpalljes.

Që prej 20 vitesh, SHBA-të janë vendi i parë nga gjithë bota me prani diplomatike në Prishtinë. Hapja e Zyrës Amerikane në Prishtinë, para 20 viteve, në 6 qershor 1996, që u bë nga nënsekretari amerikan i Shtetit, Xhon Kornblum, shënoi vendosjen e pranisë amerikane në Kosovë në rrethana të veçanta.

Në pritjen në Aeroport të nënpresidentit amerikan Biden ishte edhe Majlinda Kelmendi, fituse e medaljës së artë në xhudo në “Rio 2016”, të parës medale olimpike të Kosovës shtet. Trajneri i xhudistes, Driton Kuka ka thënë se nënpresidenti amerikan Joe Biden ia dhuroi Stemën Shtetërore të SHBA-ve kampiones olimpike Kelmendi, e përgëzoi dhe nipave të tij ua prezantoi si heroinë të Kosovës.

“Joe Biden Nënkryetar Amerikan jep dekoratë Stemën Shtetërore për Majlindën gjatë zbritjes në Aeroport. Përgëzoi Kampionen tonë dhe ja prezentoj Majlinden nipave të tij si Heroina e Vendit tonë”, është shprehur Kuka.

NË KOSOVË RRUGA FERIZAJ-GJILAN EMËRTOHET BEAU BIDEN

Në Kosovë, emrin e Beau Biden, djalit të ndjerë  të nënpresidentit amerikan Joe Biden e mori sot rruga 35 kilometërshe që lidh dy qytete, Ferizajn e Gjilanin.“Ky është një moment i ëmbël, por edhe i hidhur, pasi po këtu në këtë vend isha me Beau para disa viteve”, tha nënpresidenti amerikan dhe shprehu falënderimet e tij dhe gjithë familjes Biden,  në fjalën e mbajtur në ceremoni, ku morën pjesë edhe krerët e shtetit të Kosovës dhe drejtuesit e komunave.

Beau Biden ka ndërruar jetë me 6 janar të vitit 2015. Beau Biden, ka punuar në Kosovë në vitin 1998-99 pas luftës, duke ndihmuar në trajnimin e prokurorëve dhe gjykatësve vendas për organizatën për siguri dhe bashkëpunim në Evropë (OSCE).

Beau Biden ishte edhe Prokuror i Përgjithshëm në Delaware ndërsa për një kohë kishte shërbyer edhe me Forcat Amerikane në Irak.

PËRFUNDON VIZITA E BIDEN, POLICIA E KOSOVËS: ASNJË INCIDENT

Gjatë realizimit të vizitës së Zëvendës Presidentit Amerikan Joe BIden në Kosovë, në 16 e 17 gusht 2016, Policia e Kosovës ka qenë e angazhuar sipas planifikimeve operacionale të parapara për garantimin e rendit dhe sigurisë së përgjithshme, e në veçanti ka qenë e përkushtuar në ndermarrjen e masave shtesë për siguri që parashihen per porsonalitete të larta.

“Vizita e Zëvendës Presidentit Amerikan z. Biden, në Republikën e Kosovës, ka perfunduar sipas planifikimeve të parapara, nuk është raportuar asnjë incident”, deklaroi pak më parë Policia kosovare.

Policia e Kosovës falenderon të gjithë akterët e përfshirë, e në veçanti qytetarët e vendit për maturinë e treguar dhe mirkuptimin gjatë nderprerjeve të përkohshme të qarkullimit nëpër disa rrugë gjatë realizimit të vizitës dhe njofton se të gjitha rrugët tani janë të lira për qarkullim.

Fjalimi i presidentit Thaçi në ceremoninë e përurimit të rrugës “Beau Biden”/

17 gusht 2016/

I nderuari zëvendëspresident Biden,

E nderuara Dr. Biden,

E nderuara familje Biden,

I nderuari Kryeministër,

I nderuari ambasador Delawie

Të nderuar mysafirë të ceremonisë,

Jemi sot në këtë vend për një arsye shumë të veçantë.Jemi këtu të kujtojmë Beau Biden, por, nëpërmjet këtij kujtimi, të reflektojmë pak edhe për rrugën e përbashkët që kemi ne – Republika e Kosovës dhe Shtetet e Bashkuara të Amerikës, në këtë botë plot sfida. Beau Biden i ndjerë, për ata që nuk e dinë, përveç se ishte i biri i zëvendëspresidentit Biden, ishte edhe një nga amerikanët që kanë shërbyer me zell dhe me dashuri në Kosovën e pasluftës.Si një jurist i ri dhe entuziast, ai ka ndihmuar që të ngritën kapacitetet e para të sundimit të ligjit.Ai ka ndihmuar prokurorët dhe gjykatësit vendorë të fitojnë përvojën e duhur të drejtësisë, ashtu që Kosova të mos jetë vetëm një shoqëri e lirë, por edhe një vend me të drejta të barabarta.

Ju ftoj të mendojmë pak për këtë koncept të të qenit të barabartë.Zëvendëspresidenti Biden shquhet në SHBA dhe në mbarë botën si një luftëtar për të drejta të barabarta në mes njerëzve. Si i pasuri, ashtu dhe i varfëri, si pjesëtari i shumicës etnike, ashtu edhe ai i pakicës kanë lindur mbi këtë tokë e nën këtë diell, me të drejtën e pamohueshme të lirisë dhe të barazisë.Para 20 vitesh jemi strehuar nëpër male, kur s’ka pasur as autostrada e as rrugë të reja, duke luftuar për lirinë tonë.Kemi luftuar që çdo njeri të jetë i lirë në Kosovën tonë të përvuajtur.

Kemi pasur një fat të paparë.Intervenimi humanitar i SHBA-së dhe aleatëve të tjerë na ka shpëtuar.Partneriteti ynë strategjik tash e një çerekshekulli na ka bërë shtet, na ka bërë një demokraci dhe na ka sjellë në prag të integrimeve euroatlantike.Në majën e majës së këtij udhëtimi të gjatë, por të rëndësishëm historik midis dy shteteve dhe dy kombeve ka qenë zëvendëspresidenti Biden, fillimisht si senator, pastaj si numri dy i shtetit amerikan, por edhe si baba krenar i Beau Biden.Beau, i cili erdhi këtu, na dha kohë të çmuar të jetës së tij të shkurtër dhe mbetet deri në përjetësi simbol i vlerave tona të përbashkëta.

E nderuara familje Biden,

Më lejoni të ju them edhe ca fjalë në fund:Beau, disa vite para vdekjes së tij të hershme, ka thënë se “nuk është gjithmonë mirë të përqendrohemi te caku, pa i shikuar mjetet me të cilat arrijmë në cak”.Nganjëherë duhet të ngrihemi mbi emocione të çastit dhe mbi zhurmën e lajmeve ditore.Duhet të shikojmë më tutje.Mu si kjo rrugë ku jemi sot, që është pjesë e një lidhjeje të re të Kosovës me botën, ashtu edhe ne duhet të jemi pjesë e solucioneve rajonale dhe botërore.Ne, tani, si Kosovë duhet të ofrojmë zgjidhje.Duhet t’u ofrojmë miqësi fqinjëve dhe duhet t’i mbyllim kapitujt e së kaluarës.Nëse ia zgjasim dorën edhe një prindi kosovar serb që ende kërkon fëmijën e zhdukur, nuk na bën kjo të dobët, por shumë më të mëdhenj.Nëse përkrahim të drejtat e barabarta të dashurisë për komunitetin LGBT, nuk na bën kjo më pak të moralshëm, por me fuqi superiore morale.

Nëse kërkojmë të drejtat e një nëne apo motre të goditur nga dhuna familjare, kjo na bën më të fuqishëm.Nëse ngulmojmë në dinjitetin e veteranit të luftës dhe fëmijëve të veteranëve, kjo na bën më krenarë.

Po ashtu, nëse me Malin e Zi forcojmë partneritet strategjik pa asnjë dilemë për kufirin në mes nesh, nuk na bën kjo humbës historik, por na bën fitues të përbashkët të një ardhmërie të sigurt në NATO.Nëse plotësisht normalizojmë marrëdhëniet me Serbinë, ne i japim kuptim paqes – pajtimit në mes popujve dhe vendeve tona.

Të gjithë do të jemi fitues.

Zëvendëspresident Biden dhe Dr. Jill Biden,

 Ju siguroj këtu, në këtë vend, nën emrin e djalit të juaj të ndjerë Beau Biden, se Kosova është  një rrëfim suksesi, është një storie fenomenale e mrekullisë së SHBA-së.Por, mbi të gjitha, ju informoj se në këtë vend, falë punës tuaj, familjes suaj dhe të ndjerit Beau, jemi duke ndërtuar një vend të barabartë për të gjithë.Jam i sigurt se bashkërisht do t’ia dalim.

Ju faleminderit!

***

Kryeministri Mustafa: Tek SHBA-të, Kosova sheh aleatin e saj të përhershëm

Prishtinë, 17 gusht 2016-Kryeministri i Republikës së Kosovës, Isa Mustafa, mori pjesë në ceremoninë e emërtimit të rrugës Ferizaj-Gjilan me emrin Joseph R. “Beau” Biden, III, djalit të Zëvendës Presidentit të SHBA-ve, Joe Biden.Ceremonia që u organizua në Sojevë të Ferizajt, në afërsi të kampit Bondsteel, u mbajt pas takimeve që Zëvendës Presidentit Biden zhvilloi në orët e mëngjesit me Kryeministrin Isa Mustafa dhe Presidentin Hashim Thaçi.

Kryeministri Mustafa, para të pranishmëve të shumtë ku ishin edhe familja e Zëvendës Presidentit Joe Biden, dhe shumë personalitete vendore e ndërkombëtare, shprehu bindjen se emërtimi i kësaj rruge  me emrin e Beau Biden, do ta forcojë edhe më shumë lidhjen ndërmjet popullit të Kosovës dhe të SHBA-ve.

Duke vlerësuar lartë kontributin e Beau Biden dhënë pas luftës në vënien e themeleve të sistemit juridik në Kosovë, Kryeministri Mustafa, tha se ai meriton të jetë engjëlli mbrojtës i kosovarëve për shkak të historisë së jetës së tij.

“Shtetet e Bashkuara të Amerikës janë partneri kryesor strategjik i Kosovës. Prandaj, edhe pagëzimin e kësaj rruge me emrin Beau Biden, ju lutemi ta shihni si një përpjekje të kosovarëve për të respektuar angazhimin e qindra, mijëra e miliona amerikanëve për çlirimin e Kosovës dhe për shtetndërtimin e saj. Partneriteti mes dy vendeve tona është natyral. Ne ndajmë vlera të përbashkëta. Prandaj, tek Shtetet e Bashkuara të Amerikës, Kosova sheh aleatin e vet të përhershëm, të cilin, Presidenti historik i Kosovës, Ibrahim Rugova, e ka emërtuar mrekullisht si Miqësi të përhershme të dy vendeve që kanë të vendosura lidhje speciale”, tha kryeministri Mustafa.

 ***

Fjala e plotë e kryeministrit Mustafa në ceremoni.

 I nderuari Zëvendës president i SHBA-ve, Joe Biden

E nderuara doktor Jill Biden

Shumë e respektuara Familje Biden,

I nderuari President i Republikës së Kosovës, z. Hashim Thaçi

Të dashur kryetarë të Gjilanit dhe Ferizajt, z. Lutfi Haziri dhe Muharrem Svarqa

Të nderuar të pranishëm, 

Jam i nderuar që Ju drejtohem nga kjo pjesë e rrugës Beau Biden, e cila lidhë dy qytete të mëdha të Kosovës, Ferizajn dhe Gjilanin.Kjo rrugë, jam i bindur se do ta forcojë edhe lidhjet mes dy popujve dhe shteteve tona.Beau Juaj i dashur, në këtë mënyrë bëhet i Kosovës, ku ai shërbeu me fisnikëri për të vënë themelet e një shteti të së drejtës. Kjo rrugë përshkon Bondstill-in, ku kosovarët shohin garantin e mbrojtjes dhe të sigurisë së tyre dhe të rajonit të Ballkanit.Beau Biden e meritoi të jetë Engjëlli Mbrojtës i kosovarëve.Për shkak të historisë dhe jetës së tij.Për shkak të gatishmërisë së tij për t’ia krijuar sistemin e drejtësisë një populli të sunduar padrejtësisht për shekuj të tërë.Për shkak se karakteri i tij luftarak për jetën është simbiozë e përpjekjes për mbijetesë të kosovarëve.Për shkak se emri i tij Beau dhe mbiemri i tij, Biden, mishërojnë kuptimin e mikut të çdo kosovari.  Doktor Biden, Faleminderit që keni nderuar popullin tim me ardhjen tuaj në Kosovë.Ju jeni një shembull i shkëlqyer i ruajtjes së vlerave të familjes.Populli im ka mbijetuar duke kultivuar këtë vlerë të shenjtë.Miku im, Joe, më lejoni t’ju drejtohem në emër dhe më fal nëse trazoj ndjenjat tuaja.Beau nuk mund të ishte ndryshe. Veçse një djalë i denjë i familjes së mrekullueshme Biden.Populli i Kosovës dhe unë, admirojmë forcën dhe karakterin tuaj për t’u ngritur mbi dhimbjen.Për të shikuar përtej saj, tek e ardhmja, për pasardhësit e Beau-t, Natali e Hunter. Për të ardhmen e Shteteve të Bashkuara të Amerikës dhe të globit tonë.

I nderuar zëvendëspresident i Shteteve të Bashkuara të Amerikës, zotëri Joe Biden.

 Siç biseduam edhe në Prishtinë, Shtetet e Bashkuara të Amerikës janë partneri kryesor strategjik i Kosovës.Prandaj, edhe pagëzimin e kësaj rruge me emrin Beau Biden, ju lutemi ta shihni si një përpjekje të kosovarëve për të respektuar angazhimin e qindra, mijëra e miliona amerikanëve për çlirimin e Kosovës dhe për shtetndërtimin e saj.Partneriteti mes dy vendeve tona është natyral. Ne ndajmë vlera të përbashkëta. Prandaj, tek Shtetet e Bashkuara të Amerikës, Kosova sheh aleatin e vet të përhershëm, të cilin, Presidenti historik i Kosovës, Ibrahim Rugova, e ka emërtuar mrekullisht si Miqësi të përhershme të dy vendeve që kanë të vendosura lidhje speciale.

 I nderuar zëvendëspresident Biden,

 Shtetet e Bashkuara të Amerikës kanë shpëtuar Kosovën.

Kanë mbështetur e po mbështesin rindërtimin dhe shtetndërtimin e saj.

Ne e ndjejmë se falënderimi ynë më i mirë për tërë këtë investim tuajin është ta bëjmë Kosovën një shtet të denjë për të qenë mik i Shteteve të Bashkuara të Amerikës.

Ne kemi shumë punë për ta arritur këtë objektiv.

Kemi edhe shumë pengesa gjatë rrugës.

Por, populli i Kosovës do t’u del ballë shtigjeve të gjata.

Ai do t’i kapërcejë pengesat dhe do ta bëjë Kosovën një vend të denjë për të jetuar secili qytetar i saj, pavarësisht përkatësisë etnike dhe pavarësisht besimit.

Populli i Kosovës i beson përkushtimit të Shteteve të Bashkuara të Amerikës për ta mbështetur Kosovën.

Për zhvillimin e saj ekonomik.

Për luftën kundër korrupsionit dhe krimit të organizuar.

Për parandalimin e ekstremizmit dhe terrorizmit.

Për sundimin e rendit dhe të ligjit.

Për forcimin e demokracisë së saj.

Për të qenë faktor i stabilitetit rajonal.

Për të krijuar raporte të mira me fqinjët.

Për të forcuar subjektivitetin e saj shtetëror.

Për të qenë e barabartë në familjen euro-atlantike.

Për të qenë një rrëfim i plotë i suksesit, të cilit i gëzohen të gjithë miqtë e saj.

Siç iu gëzuan triumfit të Majlinda Kelmendit në Olimpiadë.

Për ta bërë Kosovën një shtet që sillet me përgjegjësi të plotë ndaj qytetarëve të saj dhe ndaj interesave të tyre.

Një shtet që është i gatshëm të marrë dhe t’i zbatojë obligimet ndërkombëtare.

  Doktor Jill, i nderuar zëvendëspresident Joe,

 Rruga, emërimin e të cilës po e promovojmë sot, jam i bindur se do ta kthejë shpesh vëmendjen e familjes tuaj kah Kosova.Sipas traditës tonë, shtëpia e kosovarit është shtëpi e mikut të tij.Ju tashmë jeni miqtë e Kosovës.

Nuk keni nevojë për ftesë që të vini në Kosovë.

Sepse ju tashmë vini në shtëpinë tuaj.

Zoti e bekoftë miqësinë tonë të përhershme

Zoti e bekoftë familjen Biden

Zoti e bekoftë popullin amerikan dhe Shtetet e Bashkuara të Amerikës

Zoti e bekoftë Kosovën dhe popullin e saj.

Biden-Kosove-16-e-17-gusht-2016

CURRAJT E EPËRM, “ORA POETIKE” E NDUE VATNIKAJT

by

Nga Ramiz LUSHAJ/
  1.Curraj i Epërm është një fshat konkurent dinjitar për “mis” e “ginnes” në planet.  Prej 13 dhjetorit 1951 shenjohet dhe vendlindje e poetit Ndue Vatnikaj. Ky amfiteatër natyror, luftarak, poetik, turistik i Currajt të Epërm,, për shumkënd, për nga largësia kilometrike alpine dhe ngjitja e atjeshme në kambë në ecje të thiktë disaorëshe, duket sikur asht “Fundi i Botës”, po, njëherash, asht dhe “Fillimi i Parajsës”. Nji Parajsë hyjnore e tokësore, biblike e historike, kulturore e poetike. Nji Parajsë me rranjë lisnore e degë të mëdha. E gjithkohshme.
            Currajt e Epërm janë pikturë e Zotit, janë poezi e Zotit. Truall etno-historik i banorëve të saj dalëzotas.
Currajt e Epërm janë një parajsë e thesartë, hyjnore e homerike, legjendë e realitet, aqsa nuk e ka të lehtë as shkenctari i eposit e i etnosit Anton (Ndoc) Papleka ta gdhendi në parathanien e librit poetik “Djepi i thyer”, as Ndue Vatnikaj ta sjelli në poezitë e librit të tij, as djali i tij piktor, mjeshtri i ri Astrit Vatnikaj, ta pasqyrojë në tablotë e tij.
Currajt e Epërm janë një parajasë e rrallë që jeton prej shekujsh si realitet, si vlerë, si amanet, në shpirtin e hapat e çdo banori të këtij fshati alpin.
Currajt e Epërm janë një parajsë e vërtetë drejt së cilës do të shkojnë banorët e sotëm autoktonë të tij dhe vargnia e turistëve të botës, të lodhur nga qytetet e të joshur nga turizmi i këtij visi alpin. Currajt e Epërm do të kenë turizmin sipas stinëve: turizmin e bardhë e të gjelbër, por dhe turizmin historik, kulturor, shëndetësor, sportiv.
Aty, në Curraj të Epërm, sigurisht, së shpejti, përgjithnji, për kohërat e turistët, do të jenë në një tezgë tregu apo në ndonjë stendë muzeu dhe dy librat e deritanishëm të poetit vendali, Ndue Vatnikaj, vëllimet e tij poetike “Vargu im, shpirti im” (2011) dhe “Djepi i thyer” (2016).
 Këta dy libra poetik të Ndue Vatnikajt, ashtu sikurse veprat e profesor doktor Murat Gecajt, publicistika e Agron Prebibajt, Dedë Qokajt, studimet e Ylli Prebibajt, e të tjerëve, në faqet e krijimtarisë së tyre rrezatojnë fort e mirë me genet poetike e letrare, me frymën biblike, epike e lirike të visit të tyre, Curraj i Epërm.
2.Currajt e Epërm janë Tokë e Krishtit. Jetë e mote.
            Aty, Kisha Katolike, kjo “shtëpi e Zotit”, ka jetue dhe kur vendi ynë u ba ligjërisht ateist. Aty po bien dhe muret e kullave alpine maje thepit si “Kulla e Ngujimit”, po Kisha Katolike gjithmonë ringrihet, mbetet e re.
Aty, në Curraj të Epërm, njerëzit bajnë kryq për malet alpine dhe malet alpine bajnë kryq për banorët e këtij fshati besimtar të fismë.
Fryma e fytyra e besimit tek Zoti, në Krisht, në brengat e apelin për ardhmërinë e Currajve të Epërm e të Kohës së Re Shqiptare, ndihen me fuqi shpirti dhe me forcë vizionare në fjalën poetike të Ndue Vatnikajt.
 3.Currajt e Epërm lartësinë mbidetare e kanë 800 m. Sikurse dhe qyteti i Korçës. Po, në kohën e sotme kur bota shkon deri në planetin Mars, në këtë fshat me histori e bukuri të rralla, ende nuk i ka shkue rruga e makinës apo të ngrihet nji teleferik.
Po kjo nuk do të thotë se në këtë trevë nuk ka shkue qytetrimi pellazg, ilir e arbnor, pasi në anën lindore të malit të Rrukut, rreth 1.000 m. lartësi, është nji shteg që lidh fshatin Curraj i Poshtëm me bjeshkët e tij dhe aty gjenden toponimet “Gjyteti i Madh” dhe “Gjyteti i vogël”, çka lidhet praktikisht me mure të trasha e taracimet e një vendbanimi të shek. III-IV pas Krishtit.
Albanologu i shquar Baron Nopçe në fillim të shek. XX, pasi shkoi dy herë në Curraj të Epërm, i propozoi Parlamentit të Austro-Hungarisë për ta shpall “Monument Kulture” këtë fshat  të Nikaj-Mërturit, të Shqipërisë së Veriut. Kjo nuk po ndodh as sot me asnjë nga qeveritë shqiptare të Tranzicionit, të pakten për të shpallë “Monument Kulture” ndonjë objekt të damtuar si “Kulla e Thepit”, etj.
Gjithashtu, do të ishte me interes kombëtar shqiptar që “Eposi i Kreshnikëve”, “Kanga Maje-Krahu”, “Xhubleta” e Lahuta, që janë pasuri tipike e historisë e kulturës dhe të Currajve, të shpallen të shpallen Trashëgimi Botërore e UNESCO-s (Organizata Botërore për Edukim, Shkencë e Kulturë), të merren në mbrojtje prej saj.
Unë, kam pasë fat të kem disa herë, në disa raste, rrezatim nga Parajsa e rrallë “Curraj i Epërm”, nga qytetërimi i Currajve të Epërm, ndaj, sot, iu shpreh mirënjohje shpirtërore e publike:
E kam pasë mësuesen time të klasës së parë e të krejt fillores, mësuesen Drande Ramja, nuse në derën e Prebibajve.
            Kryehere, kur isha në ciklin e lartë të 8-vjeçares, e kam pasë mësues të parë në udhën e poezisë, shkrimtarin e gazetarin Murat Gecaj, i cili, asokohe, kishte ardhë nga Tirana të punonte në Komitetin Ekzekutiv të Tropojës për kulturën dhe ishin shokë me babën tim, në nji institucion në qytetin tonë alpin. Ky personalitet, i origjinës nga Currajt e Epërm, më ka pasë ndihmue atëherit për me e botue poezinë e parë në revistën “Pionieri”.
            Në vitet ’80, kur punoja me rininë në Tropojë,, në pranverë të vonë, jam kanë mysafir tek kulla mikpritëse e Pjetër Sokolit të Currajve të Epërm, tek kulla e djemve të tij: Ndue, Nikollë, Lulash e Gjin Vatnikaj. Kurrë ma nuk jam kanë në Curraj të Epërm, por kurrë në jetën time nuk e harroj atë pritje të madhe e të rrallë në atë kullë fisnike, bujare, gjallnike. Asokohe stinore kur mbaronin deri dhe turshitë, nana e fisme Linë Sokolja e kullës së Vatnikajve, i kishte koritat me tamel (qumësht), na pruni në sofër deri dhe mazë të zieme e mjaltë. Atë mazë të zieme në Curraj të Epërm ende nuk e kam hasë ndokund ndër vise e udhë të jetës time. Ishin prodhime “bio” të  tokës së atyhit, të barit të shëndetshëm e të qindra luleve, të kullotave të shumta të atyhit. Mbi të gjitha, kulla e Vatnikajve ndriste nga gjithçka: nga bisedat, pastërtia, mikpritja, e gjithmonë dritë paçin ndër breza e kudo qofshin me banesë e jetesë këta njerëz të nderuar, njerëz me nder e të nderave, njerëz me kontribute e atribute.
Shenjë e rrezatim i këtij qytetërimi në/nga Currajt e Epërm është dhe vëllimi poetik “Djepi i thyer” i poetit të fismë Ndue Vatnikaj.
4.Në masmedia panshqiptare e në biseda rasti thonë se Currajt e Epërm janë një “vend i braktisur”. Jo. Kurrë. Nuk ka ndodh dhe as ka për të ngjarë ndonjiherë kjo. Currajt e Epërm i kanë banorët e vet të përjetshëm, të cilët rrijnë gjithmonë aty.
Aty, në Curraj të Epërm, rrijnë Orët e Zanat. Aty tek lumi që e ndan likpërmjet fshatin. Aty tek lugina që i mban kullat e tokat e fshatit. Aty tek lartësitë alpine që i rrijnë si kurorë bukurie e madhështie fshatit. Aty, në Curraj të Epërm, është “Ora” e çdo banori të atyhit, vendas në ikje e në rikthim. Aty është dhe “Ora poetike” e Ndue Vatnikajt, aty burimojnë librat e tij poetik.
Aty, në Curraj të Epërm, si në legjenda të moçme, ende jetojnë Kreshnikët. Aty enden Muja e Halili, vijnë e ikin Tanushat, Agët e Jutbinës. Aty asht mbledh nji kangë dhe për legjendarin Gjergj Elez Alia. Aty është një nga djepet e dekanatet e Eposit të Kreshnikëve. Argati i folklorit, Martiri i Krishtërimit, i përndrituri e i përvuajturi Bernard Palaj me bashkëpunëtorin e tij, Donat Kurti, autorë të veprës piedestalore “Visaret e Kombit”, thonë se “variantet e rapsodive ma të gjalla e ma të kullueta gjendeshin në Curraj të Epërm”.  E, disa kangë të Eposit të Kreshnikëve i gjetën tek kangëtarët e lahutarët e shquar në Curraj të Epërm, tek Mëhill Preka dhe tek Shan Zefi, çka duhet me thane botnisht se pa kangët e këtyne të dyve, kjo vepra madhore “Visaret e Kombit” do të vinte pak e mangët, jo e plotë,  për brezat shqiptarë e për studiuesit e botës.
Aty, në Curraj të Epërm, jetojnë përgjithmonë dhe krijuesit vendas, ata të penës letrare, të fjalës poetike, si poeti Ndue Vatnikaj  me librat e tij të sotëm e të nesërm, pasi e kanë nji fjalë të moçme latinët: “Heronjtë vdesin, por shkrimtarët kurrë”.
            5.Ndue Vatnikaj e ka pasë gjithmonë me vete poezinë, pasi trevat e mrekullueshme alpine Curraj i Epërm, Nikaj-Mërturi e Malësia e Gjakovës përherë kanë lind e rritë poetë. I ban vet toka me bukuritë e pasuritë e rralla, trashëgimia kulturore e madhe, historia e tyre e shquar.
            Tek zemra e shpirti, mendja e fjala e Ndue Vatnikajt, siç jeton realisht e përgjithmonë Currajt e Epërm, frymon për mirë e burimon e pastër dhe poezia e tij, tekstet e kangëve të tij. Përndryshe, Ndue Vatnikaj, shoku im i mirë i shkollës së mesme në qytetin tonë alpin, sa ma shumë ecën në kohë, aq ma shumë i lartnohen vendlindja e poezia, i mbeten gjithmonë te dyja dashuri të reja e të përjetshme dhe kur lumturisht bahet gjysh me nipër e mbesa, dhe kur mirësisht po afirmohet poet me libra poetik të botuar e të mirëpritur nga lexuesit.
Kur e shfleton vëllimin poetik “Djepi i thyer” të poetit Ndue Vatnikaj, tek kapitulli “Shkrihej bora e bahej lotë”(që më kan thanë me e cek në fjalën time) shof qartësisht se në 12 poezitë e këtij kapitulli ka muzë nga Eposi i Kreshnikëve, ndihet fryma e Eposit të Kreshnikëve, ka shumçka nga homerika e Eposit të Kreshnikëve dhe e Gjergj Fishtës, si tek poezitë “Ibrahim Rugovës”, “Marash Ucit” të fisit të Hotit, “’In pesë vllazën” nga Perajt e Nikaj-Mërturit, “Mushak Haxhisë” të Valbonës, “Sokol Delisë”- derë e bajrakut të fisit të Nikajve, “Kangë për Pal Nikën” e Currajve të Epërm,, “Këngë për Man Avdinë e Palçit”, “Kukel Ndout” të Currajve të Epërm, “Avdyl Ukës”- hero nga Vushtri e Kosovës, “Këngë për Familjen e Babun Ukës së Perajve”, “Antigona Fazliut”- nga Drenica, dëshmorja ma e re e UÇK-së, ”Fran Zefit” – nga Gjonpepajt – martir i dritës në Gurore të Fierzës, “Këngë për Kol Nikollajn” e Klinës të Kosovës.
6.Aty, në parajsën Curraj i Epërm, malet takohen me qiellin, dielli lahet tek lumi i Currajve, kullat thepohen në luginë e mbi male, aty njerëzit flasin me Orët e Zanat, me Kreshnikët, aty njerëzit jetojnë me legjendat dhe prekin të ardhmen e vet.
Kudo në Shqipëri mund të pijsh nji kafe magjike me nji president apo kryeministër, me nji mbret, me nji shkrimtar kandidat për nobelist, me një biznesmen sheik, po vetëm në vendin e mrekullueshëm alpin Curraj i Epërm mund të pijsh një kafe hyjnore me Zotin.
Zoti i bekoftë Currajt e Epërm, Nikaj-Mërturin e Malësinë e Gjakovës!
Tiranë, 13 gusht 2016

SPECIALE PER DIELLIN: Prizren-DokuFest përmbyllet me ceremoni e çmime

by

 

1 mbyllet Doku– Në gjashtë kategori, në garë ishin gjithsej 107 filma. Çmim filmit të regjisorit serb Ognjen Glavonić “Thellësia dy” –“Depth two” (“Dubina dva” në serbisht), i cili ballafaqon Serbinё me krimet e kryera gjatё luftёs nё Kosovё në fundshekullin e kaluar/

-Derisa ka vijuar DokuFest, nga Kalaja e Prizrenit është shikuar perëndimi i diellit nën tingujt e iso-polifonisë shqiptare, nga Grupi Jonianët/

PRIZREN, 14 Gusht 2016-Gazeta DIELLI-Behlul Jashari/ Në qytetin e Prizrenit natën e kaluar është përmbyllë Festivali Ndërkombëtar i Filmit të Shkurtër dhe Dokumentar, DokuFest,  edicioni i 15-të jubilar, me ceremoninë e ndarjes së çmimeve në Kinemanë Lumëbardhi, pas vendimeve të jurive.

Në gjashtë kategori, në garë ishin gjithsej 107 filma,  ndërsa në garën për filmin më të mirë të Ballkanit fituesi është filmi i regjisorit serb Ognjen Glavonić “Thellësia dy” –“Depth two” (“Dubina dva” në serbisht), i cili ballafaqon Serbinё me krimet e kryera gjatё luftёs nё Kosovё në fundshekullin e kaluar.

Tregimi i filmit, sipas prezantimit të DokuFest, është ky: “1999: Derisa NATO po bombardonte Jugosllavinë, një kamion me 53 trupa të vdekur zhytet në Danub pranë kufirit me Rumaninë. Asnjë hetim nuk ndërmerret. Më parë, në Suharekë, Kosovë: policia serbe tubon fshatarët. Një grua përjeton gjëra të tmerrshme, trupat zhduken në varret masive të largëta. Për njerëzit thjeshtë pothuajse nuk ka konsideratë. Ngjarje monstruoze, çdo dhe secila hollësi të organizuara në bazë të një logjistike të dhunës nga një shtet që zbaton një plan sekret vdekjeprurës kundër popullsisë së vet. ‘Dubina dva’ me sukses mat të vërtetën. Njerëzit mund t’i vrasin njerëzit, por jo edhe kujtimet”.

Deklarata e jurisë në përbërje Eric Hynes, Marek Septimus, Maria Bonsanti ishte kjo: “Për filmin të cilin të gjithë e konsideruam të përmbushur në aspektin kinematografik aq sa është shkatërrues moralisht, duke e përdorur një gjuhë për t’ia përshtatur temës së tij që e kombinon dëshminë në audio me pamje nga peizazhe të braktisura tragjikisht, duke e vënë shikuesin në pozitën edhe të reflektimit historik edhe të nëpërkëmbjes aktuale, dhe duke ofruar një betejë të shtresuar, emocionale dhe intelektuale të cilën nuk do ta harrojmë shpejtë, me admirim të thellë, mirënjohje dhe entuziazëm e shpërblejmë filmin ‘Depth two’ nga Ognjen Glavonic me çmimin Best Balkan Documentary”.

Organizatorët janë shprehur shumë të kënaqur me ecurinë e festivalit dhe falenderimet ishin edhe për iso-polifoninë për ngrohtësinë që solli me muzikën shqiptare nga jugu. Derisa ka vijuar DokuFest, nga Kalaja e Prizrenit është shikuar perëndimi i diellit nën tingujt e iso-polifonisë shqiptare, nga Grupi Jonianët.

Në DokuFest 2016, festivalin e hapur në 5 gusht me ceremoninë e zhvilluar në kinemanë mbi lumin Lumëbardh, sipas orgnizatorëve, u shfaqen 238 filma nga 57 shtete të botës, mes tyre Shqipëria e Kosova, që janë përzgjedhur nga një numër rekord – mbi 5 mijë aplikime.

Korrupsioni ishte tema qendrore e DokuFest 2016, ndërsa janë mbajtur punëtori, panele, debate, master klasa, ekspozita dhe një seri e organizimeve në kuadër të DokuNights, që kanë përfshirë  edhe yjet botërorë si Omar Souleyman dhe Yasmine Hamdan.

DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.

Njoftimi i plotë dërguar nga Festivali: DOKUFEST XV SHPALL FITUESIT!

Në ceremoninë e ndarjes së çmimeve, që u mbajt sot në Kinemanë Lumbardhi në Prizren, pas vendimit të jurisë, u shpallën fituesit e edicionit të 15 të Dokufest-it. Nga gjashtë kategori, në garë ishin gjithsej 107 filma. Në fund do të jepet edhe çmimi i publikut.

Duke arritur që për nëntë ditë të organizojë  aktivitete nga më të ndryshmet, gjatë festivalit janë shfaqur 238 filma nga 57 shtete, janë mbajtur punëtori, panele, debate, master klasa, ekspozita dhe një seri e organizimeve në kuadër të DokuNights, që kanë përfshirë  edhe yjet botërore si Omar Souleyman dhe Yasmine Hamdan, Prizreni edhe njëherë u kthye në qytetin ku gërshetohet kinemaja dhe kultura.

Ju lutem gjeni listën e fituesve më poshtë:

GARA PËR FILMIN MË TË MIRË TË BALLKANIT – FITUESI: THELLËSIA DY nga Ognjen Glavonić

Juria: Eric Hynes, Marek Septimus, Maria Bonsanti

Deklarata: Për filmin të cilin të gjithë e konsideruam të përmbushur në aspektin kinematografik aq sa është shkatërrues moralisht, duke e përdorur një gjuhë për t’ia përshtatur temës së tij që e kombinon dëshminë në audio me pamje nga peizazhe të braktisura tragjikisht, duke e vënë shikuesin në pozitën edhe të reflektimit historik edhe të nëpërkëmbjes aktuale, dhe duke ofruar një betejë të shtresuar, emocionale dhe intelektuale të cilën nuk do ta harrojmë shpejtë, me admirim të thellë, mirënjohje dhe entuziazëm e shpërblejmë filmin DEPTH TWO nga Ognjen Glavonic me çmimin Best Balkan Documentary.

Juria e njejtë zgjodhi për “Çmim Special” në kategorinë për FILMIN MË TË MIRË TË BALLKANIT filmin SOMETHING ABOUT LIFE nga Nebojsa Slijepcevic.

Deklarata: Juria deshi të falënderojë grupin e filmave të shkurtër tepër të fuqishëm që ishin në garë, si Postcards from Manila, A Short Family Film, dhe It Could Be a Film. Por filmi i cili qëndroi me ne gjatë gjithë javës është një film i vëzhgimit me respekt dhe kureshtje të madhe, një portret i vogël megjithatë i thellë i një vajze të re që ka një familjaritet të lindur me bashkëpunimin. Juria i jep mirënjohje të veçantë filmit SOMETHING ABOUT LIFE nga Nebojsa Slijepcevic.

Juria e njejtë zgjodhi FILMIN MË TË MIRË NGA REGJISORI BALLKANIK NË ARDHJE: TOURISM (TURIZMI) nga Tonci Gacina.

Deklarata: Për filmin i cili i qaset me ndjeshmëri të madhe, humor dhe humanitet një subjekti të cilit një tjetër regjisor thjesht mund ta përqeshte, një film që zë të gjithë ekosistemin, nga punëtorët deri te pushuesit, nga uji në ajër, me një kamerë të kujdesshme, të qetë dhe të gjithëpranishme. Ky është regjisori të cilin jemi shumë të emocionuar ta përcjellim në të ardhmen. Çmimi Best Balkan Newcomer i shkon filmit TOURISM nga Tonci Gucina.

Juria e njejtë zgjodhi për “Çmim Special” në kategorinë për FILMIN MË TË MIRË NGA REGJISORI BALLKANIK NË ARDHJE filmin DRUMS OF RESISTANCE nga Mathieu Jouffre.

Deklarata: Për filmin i cili merr formën e bashkëbisedimeve, një shkëmbim i hapur i kujtimeve personale, që e lejon të shkuarën të dalë në të tashmen si diçka relevante derisa gjithashtu e përdor dialogun dhe përcjelljen e përvojës si mjet rezistence; Juria i jep një mirënjohje të veçantë filmit DRUMS OF RESISTANCE nga Matthieu Jouffre.

FILMI MË I MIRË DOKUMENTAR NDËRKOMBËTAR I METRAZHIT TË GJATË – FITUESI: OLEG AND HIS RARE ARTS nga Andrés Duque

Juria: Carlos Ramos, Jetmir Idrizi, Luke Moody, Nick Pinkerton, Rachael Rakes

Deklarata: Oleg and His Rare Arts është një dokumentar i pazakontë muzikorë që lejon personazhin ta udhëheq filmin, një personazh i paimitueshëm të cilit i jepet hapësira dhe koha në të cilën mund ta shpalosë veten në kohën e tij të mirë. Montimi është i çuditshëm dhe i shkathtë, duke i zgjedhur momentet e buta, të shkëlqyera, rrëfyese në kohë të përsosur, duke ndryshuar në vazhdimësi në mes të interpretimeve të gjata dhe të shkurtra.

Juria e njejtë zgjodhi për “Çmim Special” në kategorinë për FILMIN MË TË MIRË DOKUMENTAR NDËRKOMBËTAR TË METRAZHIT TË GJATË filmin ON FOOTBALL nga Sergio Oksman.

Deklarata: Filmi shumë tërheqës i Sergo Oksman e sajon strategjinë e tij – një sekuencë e xhirimeve me kamerë kryesisht të rregulluar, duke dokumentuar bashkimin e regjisorit me babanë e tij të larguar gjatë periudhës së Kupës Botërore në Brazil – dhe nuk e braktis orientimin e tij edhe përballë tragjedisë: Tragjedisë së një adhuruesi, dhe tragjedinë e të birit. Ashpërsia e qasjes së Oksmanit e zmadhon më shumë se sa e qetëson ndikimin emocional të imazheve, në një film i cili në mënyrë elokuente, thjesht e shpreh shkallën në të cilën sporti mund të luaj rolin e një kanali komunikimi në mes të burrave të heshtur e të tërhequr.

FILMI MË I MIRË DOKUMENTAR NDËRKOMBËTAR I METRAZHIT TË SHKURTËR – FITUESI: IMPRESSIONS OF A WAR nga Camilo Restrepo

Juria: Carlos Ramos, Jetmir Idrizi, Luke Moody, Nick Pinkerton, Rachael Rakes

Deklarata: Impressions of a War pikturon një fotografi të fuqishme dhe të thellë të konfliktit të brendshëm të 70 viteve të fundit në Kolumbi. Duke u larguar nga papërsosuria e gazetave vendore, Camilo Restrepo krijon një univers të shkëlqyer ku këto të meta janë të pranishme në strukturën e filmit, duke theksuar një kombinim të pasur dhe kuptimplotë të shtresave që i drejtohen aspekteve historike, politike dhe njerëzore të rajonit.

Juria e njejtë zgjodhi për “Çmim Special” në kategorinë për FILMIN MË TË MIRË DOKUMENTAR NDËRKOMBËTAR TË METRAZHIT TË SHKURTËR filmin THE PARK nga Randa Maroufi.

Deklarata: The Park ofron një vizion të guximshëm koreografik të rinisë marokene. Dekonstruktimi i regjisorit të fenomenit ‘selfie’ na jep një vetëdije më të lartë për politikën dhe kompozimet artificiale të këtyre imazheve. Secila kornizë është e mbushur pamje të brishta të testosteroneve si friza antike gati për tu shkatërruar.

 

FILMI MË I MIRË PËR TË DREJTAT E NJERIUT – FITUESI: HOMELAND (IRAQ YEAR ZERO) nga Abbas Fahdel

Juria: James Longely, Mustafa Kerem Yuksel, Tue Sten Muller

Deklarata: Një dokumentar monumental dhe i papërkulur që me qetësi shpalos rutinën ditore të një familje irakiane që vërtitet buzë një tragjedie, Homeland e personalizon çmimin e vërtetë të luftës përmes vështrimit plot respekt të regjisorit.

Juria e njejtë zgjodhi për “Çmim Special” në kategorinë për FILMIN MË TË MIRË PËR TË DREJTAT E NJERIUT filmin STARLESS DREAMS nga Mehrdad Oskouei.

Deklarata: Një film dokumentar i një hijeshie të rrallë, Starless Dreams eksploron botën e brendshme të grave të burgosura në Iran me një saktësi emocionale të pashlyeshme dhe ndjeshmëri ndaj subjektit të tij.

 

FILMI MË I MIRË PËR AMBIENTIN – FITUESI: WHEN TWO WORLDS COLLIDE nga Heidi Brandenburg dhe Mathew Orzel

Juria: Defne Koryurek, Diego Mas Trelles, Martin Horyna

Deklarata: Patëm një ndjenjë shumë të fuqishme për sinqeritetin e punës, përkushtimin e përzemërt dhe respektin për personazhet dhe njerëzit e përfshirë. Prandaj, do të donim t’i falënderonim regjisorët dhe ekipin për sjelljen e një barbarizmi aq të madh që mori jetët dhe rrezikoi jetesën e shumë të tjerëve. Do të donim t’ia jepnin çmimin filmit When Two Worlds Collide.

Juria e njejtë zgjodhi për “Çmim Special” në kategorinë për FILMIN MË TË MIRË PËR AMBIENTIN filmin THE WOODS DREAMS ARE MADE OF nga Claire Simon

Deklarata: Do të donim t’i jepnim një mirënjohje të veçantë punës e cila paraqiti një sfidë aq të madhe për ne. Ne e falënderojmë regjisoren dhe ekipin e saj që na dha rastin ta shohim ekologjinë nga një këndvështrim tërësisht ndryshe. E falënderojmë për sfidën filmin The Woods Dreams Are Made Of.

 

FILMI MË I MIRË I SHKURTËR – FITUESI: IMPORT nga Ena Sendjevic

Juria: Anri Sala, Barbara Orlicz – Szczyputa, Christopher Tidman

Deklarata: Juria e shpërblen me çmimin e parë një vështrim intim në natyrën absurde të fillimeve të reja. Përmes përdorimit të teknikave vizuale unike për kohën e tyre, ai eksploron një temë që është edhe sot relevante. Një vështrim i çuditshëm në Migrimin, Ndarjen, Integrimin, Pranimin dhe Familjen në kërkim të një normaliteti të ri.

Juria e njejtë zgjodhi për “Çmim Special” në kategorinë për FILMIN MË TË MIRË TË SHKURTËR filmin FRANKFURTER STR. 99A nga Evgenia Gostrer

Deklarata: Një fotografi e çastit e një jete të rëndomtë të pak ditëve më parë e treguar në mënyrë unike përmes stilit të veçantë të animuar. Një përzierje e animacionit me dokumentar, që nuk kombinohet shpesh në rrëfim, formohen bashkë në mënyrë të përkryer për të eksploruar këtë marrëdhënie.

 

GARA KOMBËTARE – FITUESI: PERFORMANCË nga Dritëro Mehmetaj

Juria: Blerta Basholli, Christoffer Olofsson, Eriola Pira

Deklarata: Për mjeshtrinë në formën e filmit të shkurtër artistik në një histori të plotë dhe imponuese të dy studentëve dhe negociatave të tyre të përditshme në skenë dhe jashtë saj. Performanca autentike, skenari i zgjuar dhe regjia bindëse ia del të shpalos ëndrrat dhe luftërat e personazheve me një kujdes dhe integritet që refuzon përfundimet e lehta në lidhje me profesionin e tyre të zgjedhur apo vetë-vlerësimin.

Juria e njejtë zgjodhi për “Çmim Special” në kategorinë për GARËN KOMBËTARE filmin I KISSED YOU KISS ON YOUR GIRLFRIEND’S CHEEK, IT WAS STILL WET nga Samuel Weniger, Dardan Zhegrova

Deklarata: Për bastisjen e tij ambicioze në një drejtim të ri, me pamje joshëse në aspektin vizual, poetik dhe zanor, që kombinohen për të krijuar një film të shquar.

 

ÇMIMI I AUDIENCËS 

“Batusha’s House” Tino Glimmann dhe Jan Gollob

 

ÇMIMI I BANKËS PROCREDIT PËR EKOVIDEO-N MË TË MIRË

Fituesit e garës EkoVideo jane:

Besnik Boletini
Indrit Loshi
Agon Veselaj

Speciale e Diellit- Nënpresidenti amerikan Joe Biden në vizitën e dytë në Kosovë

by

 

1 Behlul

-Ne Foto:Diplomati i parë i SHBA në Kosovë Majkëll Mekllellën (Michael McClellan) në konferencë për shtyp, ku është korrespondenti tash i Gazetës DIELLI Behlul Jashari – në plan të parë në mes dhe gazetarë tjerë

Nënpresidenti amerikan Joe Biden në vizitën e dytë në Kosovë/

-Nënpresidenti amerikan Joe Biden dhe dr. Jill Biden vizitojnë Kosovën javën e ardhëshme/

-Thaçi: Zëvendës-Presidenti Biden është i përkushtuar për paqen dhe stabilitetin në rajonin tonë. Populli i Kosovës është krenar me mikun i cili që nga fillimi i viteve nëntëdhjetë ishte shpresa dhe zëri i fuqishëm për lirinë dhe pavarësinë e Kosovës në Washington/

-“Kosova pret në festë zëvendëspresidentin amerikan Joseph Biden”, “Biden: Njohja e Pavarësisisë së Kosovës përbën proces të pakthyeshëm”, “Ambasada e SHBA: Biden, i prekur nga të shprehurit masiv të dashurisë dhe respektit”, janë titujt e raportimeve që kam bërë gjatë vizitës së parë historike në maj 2009./ -Që prej 20 vitesh, SHBA-të janë vendi i parë nga gjithë bota me prani diplomatike në Kosovë. Në vitin 1996, më 12 janar, Presidenti historik Ibrahim Rugova përshëndeste paralajmërimin e Ndihmës-Sekretarit të Shtetit të SHBA, Riçard Hollbruk, për hapjen e një Zyre Amerikane në kryeqytetin e Kosovës, në Prishtinë/

-Fillimisht, Zyrtari i USIA-as (Agjencia Informative Amerikane), Majkëll Mekllellën (Michael McClellan) në 22 maj 1996 ka mbërritur në Prishtinë për të udhëhequr punët në hapjen e Zyrës në Kosovë/

Gazeta DIELLI nga korrespondenti në Kosovë Behlul JASHARI
PRISHTINË, 14 Gusht 2016/Nënpresidenti i SHBA, Joe Biden dhe Dr. Jill Biden do të udhëtojnë për në Prishtinë, Kosovë, javën e ardhëshme.

Të martën, 16 gusht, në mbrëmje, mbërrinë në Aeroportin e Prishtinës.

Të mërkurën, 17 gusht, Nënpresidenti Amerikan Biden do të zhvillojë takime dypalëshe me Presidentin Hashim Thaçi dhe Kryeministrin Isa Mustafa.

Gjithashtu, nën patronatin e Qeverisë së Kosovës, Nënpresidenti Joe Biden dhe Dr. Jill Biden do të shkojnë për vizitë afër Kampit Bondsteel për të marrë pjesë në cermoninë e emërimit të rrugës kushtuar djalit të tyre të ndjerë Joseph R. “Beau” Biden, III.

Para vizitës, Ambasada e SHBA në Kosovë ka dërguar axhendën.

Ndërsa, presidenti i Kosovës, Hashim Thaçi, sot ka paralajmëruar se, javën e ardhshme vjen Zëvendës-Presidenti Biden në Republikën e Kosovës.

“Kjo vizitë e mikut të Kosovës shënon një moment të ri dhe historik për Kosovën. Tash e 26 vite, Zëvendës-Presidenti Biden është i përkushtuar për paqen dhe stabilitetin në rajonin tonë. Populli i Kosovës është krenar me mikun i cili që nga fillimi i viteve nëntëdhjetë ishte shpresa dhe zëri i fuqishëm për lirinë dhe pavarësinë e Kosovës në Washington. Miqësia e Kosovës me SHBA-në është e përjetshme. Kosova dhe populli i saj i janë mirënjohës për jetë Zëvendës-Presidentit Biden dhe familjes së tij për kontributin e tyre. Zoti e bekoftë Kosovën, Zoti e bekoftë SHBA-në”, shprehet presidenti Thaçi.

Kjo do jetë vizita e dytë e nënpresidentit të SHBA, Joe Biden, në Kosovë. E para ishte në maj 1999, për të cilën atëherë kam raportuar me titujt: “Kosova pret në festë zëvendëspresidentin amerikan Joseph Biden”, “Biden: Njohja e Pavarësisisë së Kosovës përbën proces të pakthyeshëm”, “Ambasada e SHBA: Biden, i prekur nga të shprehurit masiv të dashurisë dhe respektit.

20 Maj 2009: KOSOVA PRET NË FESTË ZËVENDËSPRESIDENTIN AMERIKAN JOSEPH BIDEN

PRISHTINË, 20 maj 2009/ Kosova pret në festë zëvendëspresidentin amerikan, Joseph Biden në vizitën e nesërme të vlerësuar historike nga institucionet e vendit dhe populli, ndërkohë që përgatitjet për mikpritjen e mirëpritjen e madhe shihen kudo në Prishtinë , kryeqytetin e shtetit më të ri në  botë, raportoja në 20 maj 2009.

Më tej, mes tjerash, theksoja se, në orët e pasditës së sotme, derisa punëtorët komunal të kryeqytetit kishin përfunduar punët në stolisjen e shesheve dhe rrugëve me flamuj të SHBA-ve dhe të Kosovës dhe në vendosjen në bilborda të  fotografive të mëdha të zëvendësprsidentit amerikan Biden bashkë me përshendetjet e mirëseardhjes.

Ndërsa , në ditën e vizitës, në 21 maj 2009 raportoja:

21 Maj 2009: BIDEN: NJOHJA E PAVARËSISISË SË KOSOVËS PËRBËN PROCES TË PAKTHYESHËM

Zëvendëspresidenti amerikan, Joseph Biden sot në Prishtinë në takim me drejtuesit më të lartë të vendit ka ritheksuar qëndrimin e SHBA-së se pavarësia e Kosovës përbën proces të pakthyeshëm.

“Shtetet e Bashkuara të Amerikës e kanë bërë të qartë tashmë se njohja e pavarësisë së Kosovës përbën proces të pakthyeshëm. Kjo nuk do të ndryshojë”, tha ai pas takimit me presidentin Fatmir Sejdiu e kryeministrin Hashim Thaçi.

“Së dyti, një Kosovë e tërë dhe e bashkuar është kusht minimal, për aq sa i përket qëndrimit të SHBA-ve. Një Kosovë e Bashkuar dhe e pandarë është absolutisht kusht esencial dhe themelor”, theksoi Biden.

“Gjëja e tretë që dua ta potencoj është se mendoj se qeveria ka arritur një progres të konsiderueshëm gjatë vitit të parë. Progresi që qeveria e ka arritur brenda një viti është i jashtëzakonshëm dhe unë mendoj se një element qenësor i suksesit të vazhdueshëm të qeverisë dhe i faktit që kjo qeveri është përqafuar nga bota është natyra vërtetë shumetnike e kësaj shoqërie, e këtij vendi dhe e kësaj qeverie”, tha Biden.

“Dhe unë jam i bindur se përkushtimi për këtë është i vërtetë dhe njëmend i përhershëm. Për aq sa të ekzistoj ky përkushtim, do të ekzistojë edhe mbështetja e vazhdueshme nga Shtetet e Bashkuara të Amerikës”, vijoi ai.

“Gjatë udhëtimit tim në Bosnjë, Serbi dhe tani në Kosovë, unë kam thënë se ky është një rast historik. Që nga përfundimi i Luftës së Dytë Botërore, Shtetet e Bashkuara të Amerikës dhe shumica e shteteve evropiane kanë ëndërruar një Evropë të tërë, të bashkuar, të lirë dhe në paqe. E vetmja pjesë që i mungon kësaj gjëegjëze – ndonëse më herët thashë paqe – e vetmja pjesë që i mungon kësaj gjëegjëze apo tërësie është që, për herë të parë në historinë e tij, Ballkani të ketë rast të jetë tërësisht i integruar në BE. Kjo është mundësia që ne e kemi tani, ky është qëllimi i SHBA-ve, ky është qëllimi i këtyre liderëve dhe ky është qëllimi i – kujtoj unë – pothuaj të gjithë liderëve të rajonit. Kur kjo të ndodhë, ëndrra që ka lindur pas Luftës së Dytë Botërore do të bëhet realitet”, theksoi zëvendëspresidenti Bajden.

Në vizitën e parë në Kosovë pas shpallljes së pavarësisë Biden tha se për të kjo ishte një ditë vërtetë e mrekullueshme.

“Bazuar në përvojën tonë, kur një vend është demokratik dhe kur është i bashkuar me vendet e tjera demokratike, të gjitha gjërat që e kanë pllakosur atë vend në të kaluarën tejkalohen dhe ofrohet një mundësi më e mirë për një të ardhme më të ndritshme, kështu që unë jam optimist. Jam optimist dhe edhe njëherë dua ta falënderoj qeverinë për mikpritjen dhe dua t’ju tregoj se sa kisha kënaqësinë të kthehesha në një Kosovë që po ndërtohet dhe zhvillohet. Pash njerëz nëpër rrugë që po buzëqeshin. Gjersa po fluturoja për në aeroport, pashë çati të shtëpive të tjera, të reja; pashë përparim, pashë se njerëzit po ecnin para. Për mua kjo është një ditë vërtetë e mrekullueshme, që pata rastin të kthehem. Dhe unë u jam shumë mirënjohës, jo vetëm qeverisë, por edhe tërë popullit të Kosovës”, përfundoi zëvendëspresidenti i SHBA-ve,  Biden.

Ndërsa, që në fillim të fjalës së tij, zëvendëspresidenti Biden falënderoi për nderimin e tij nga presidenti Sejdiu me Medaljen e Artë të Lirisë, duke e quajtur këtë si një nga nderet më të mëdha që i janë bërë ndonjëherë, raportoja, mes tjerash.

***

Në Ditën e Lirisë, 12 qershor 2004 – në 5 vjetorin e hyrjes shpëtimtare të NATO-s në Kosovë në 12 qershorin e vitit 1999, Presidenti në atë kohë Ibrahim Rugova në akademinë solemne njoftonte se me rastin e atij përvjetori kishte vendosur të dekorojë me “Medaljen e Artë të Lirisë” burra shtetesh dhe personalitete të njohura të botës për meritat e tyre për mbrojtjen e lirisë së Kosovës dhe për ndërtimin e lirë të Kosovës.

Në tekstin e Dekretit Presidencial thuhej:

“Në pesëvjetorin e hyrjes së trupave të NATO-s/KFOR-it në Kosovë, 12 qershorit, Ditës së Lirisë së Kosovës, në bazë të fuqive kushtetuese të Presidentit të Kosovës me Dekret të veçantë kam vendosur të dekoroj me ‘Medaljen e Artë të Lirisë’ shefa të shteteve, të qeverive, senatorë, kongresmenë, deputetë, ushtarakë, ministra, personalitete të Amerikës e të Evropës për meritat e tyre për mbrojtjen e lirisë së Kosovës, dhe për ndërtimin e vendit të lirë të Kosovës, si dhe për integrimin e tij në bashkësinë e kombeve të lira të botës”.

22 Maj 2009: KOSOVË – AMBASADA E SHBA: BIDEN, I PREKUR NGA TË SHPREHURIT MASIV TË DASHURISË DHE RESPEKTIT

PRISHTINË, 22 maj 2009/ Ambasada Amerikane  në Prishtinë falënderon popullin e Kosovës për mirëseardhjen e ngrojhtë dhe zemërgjerë për nënkryetarin  SHBA-ve, Joseph Biden, gjatë vizitës në Kosovë, duke theksuar ai  ishte i prekur nga të shprehurit masiv të dashurisë dhe respektit.

“ Ambasada e SHBA-ve dëshiron të falënderojë popullin e Kosovës për mirëseardhjen e ngrohtë dhe zemërgjerë që ia ofruan nënkryetarit Biden me 21 maj. Gjersa nënkryetari nuk pati mundësi të takohet personalisht me gjithë ata mijëra njerëz që shfaqën entuziazmin e tyre duke u rreshtuar pranë rrugëve të Kosovës, ai ishte i prekur nga të shprehurit masiv të dashurisë dhe respektit”, thekson deklarata e kumtuar nga Ambasada Amerikane.

“Kërkojmë falje për çdo vështirësi të shkaktuar nga mbyllja e rrugëve dhe masave tjera të nevojshme që ishin të lidhura me vizitën”, shtohet në kumtesë.

 

SHBA, 20 VJET PRANIE NË KOSOVË

 

Që prej 20 vitesh, SHBA-të janë vendi i parë nga gjithë bota me prani diplomatike në Kosovë. Në vitin 1996, më 12 janar, Presidenti historik Ibrahim Rugova përshëndeste paralajmërimin e Ndihmës-Sekretarit të Shtetit të SHBA, Riçard Hollbruk, për hapjen e një Zyre Amerikane në kryeqytetin e Kosovës, në Prishtinë. “Ky është një moment i rëndësishëm në marrëdhëniet e shkëlqyeshme midis SHBA dhe Kosovës, dhe tregon kujdesin e vazhdueshëm amerikan për gjendjen në Kosovë dhe çështjen e Kosovës”, theksonte Rugova dhe shfaqëte shpresën se edhe vende të tjera, nga Evropa, do të hapnin zyra të tilla në Kosovë.

Hapja e Zyrës Amerikane në Prishtinë u bë nga Nënsekretari Amerikan i Shtetit, Xhon Kornblum, në 6 qershor 1996. Presidenti Rugova bashkë me familjen ka marrë pjesë në hapjen solemne të Zyrës Amerikane në Prishtinë, të parës nga gjithë bota, në një ditë historike.

Fillimisht, Zyrtari i USIA-as (Agjencia Informative Amerikane), Majkëll Mekllellën (Michael McClellan) në 22 maj 1996 ka mbërritur në Prishtinë për të udhëhequr punët në hapjen e Zyrës së këtij shërbimi.

Hapja e përfaqësisë amerikane në kryeqytetin e Kosovës ishte festë për kosovarët dhe u përjetua si një moment shumë i rëndësishëm dhe historik për të ardhmen, raportoja para 20 viteve.

Pas përfundimit të luftës, në Kosovën e lirë, Zyra e SHBA-ve në Prishtinë (USOP) rifilloi të punojë në shtator të vitit 1999.

USOP përfaqësonte Departamentin e Shtetit të SHBA-së, Agjencinë për Zhvillim Ndërkombëtar të SHBA-së (USAID), Departamentin për Drejtësi dhe Departamentin për Mbrojtje.

Më pak se dy muaj pas shpalljes së Pavarësisë, Zyra e SHBA-së në Prishtinë u bë Ambasadë në 8 prill 2008, ndërsa, po atë vit historik, në 18 korrik, Tina Kaidanow është betuar si Ambasadore e parë Amerikane për Republikën e Kosovës.
Zyra e SHBA-ve në Prishtinë u bë Ambasadë në një ceremoni ku kanë marrë pjesë udhëheqësit më të lartë të Kosovës. “Si rezultat i statusit të ri të Kosovës si vend i pavarur, i njohur nga shumë prej kombeve më të fuqishme dhe më të përparuara të botës, na është dhënë leja nga Kongresi i SHBA-ve për t’u hapur formalisht si ambasadë e Shteteve të Bash kuara”, ka thënë Kaidanow në ceremoninë solemne.

Ajo ka shtuar se, “derisa Zyra e SHBA-ve në Prishtinë ka funksionuar për shumë vite me të gjitha përgjegjësitë dhe detyrat e një misioni të zellshëm diplomatik, emërimi si ambasadë pasqyron një fazë të re në zhvillimin tonë dhe nënvizon përkushtimin tonë të thellë dhe të qëndrueshëm për të punuar për përparimin e Kosovës dhe popullit të saj”.

Diplomatja e SHBA-ve në Prishtinë, Kaidanoë, siguroi për vazhdimin dhe intensifikimin e përpjekjeve në vitet në vijmim dhe se asistenca amerikane Kosovës do të ketë për qëllim sigurimin e një të ardhme më të ndritur për të gjithë.

“Ju sjell urimet nga niveli më i lartë i Qeverisë së SHBA-ve për këtë rast shpresdhënës, përfshirë nga Sekretarja e Shtetit Rice, e cila dërgoi përshëndetjet e saj personale”, tha më tej Kaidanow.

“Është kanqësi dhe nder të jemi këtu në Kosovë në një kohë aq të rëndësishme, dhe i shprehim mirënjohjen tonë të posaçme popullit të Kosovës, i cili na ka ofruar besimin dhe bashkëpunimin e vet gjatë gjithë këtyre viteve”, ka theksuar e ngarkuara me punë në Ambasadën e SHBA-ve në Prishtinë.

Duke e marrë fjalën në ceremoni atëherë Presidenti i Republikës, Fatmir Sejdiu tha se “Kosova ka tashmë një histori të marrëdhënieve speciale me Shtetet e Bashkuara të Amerikës, që janë farkuar nëpër kohë të stuhishme të ekzistencës sonë”.

Më tej presidenti Sejdiu përkujtoi:

“Po mbushen 12 vjet që kur kemi përfaqësim diplomatik të SHBA-ve në Kosovë. Hapja e Zyrës Amerikane më 6 qershor 1996, që u bë nga Nënsekretari Amerikan i Shtetit John Kornblum, ka shënuar vendosjen e pranisë amerikane në Kosovë në rrethana të veçanta.
Ky shënonte moment të rëndësishëm të marrëdhënieve të shkëlqyeshme në mes të Kosovës dhe SHBA-ve, do të thoshte më 1996 Presidenti Ibrahim Rugova, i cili me të drejtë e quante këtë lidhje ‘miqësi të përhershme’ në mes të dy vendeve tona”.
Më tej Sejdiu tha se Presidenti amerikan George W. Bush, në letrën e tij të njohjes së pavarësisë së Kosovës, që ia kishte dërguar atij të nesërmen e shpalljes, përkujtonte “lidhjet e thella dhe të sinqerta të miqësisë që bashkojnë njerëzit tanë”.

“Kjo miqësi, theksonte Presidenti Bush, ‘e farkuar gjatë orëve më të errëta të tragjedisë së Kosovës, është bërë edhe më e fortë në nëntë vitet që kur ka mbaruar lufta në Kosovë’”, tha Sejdiu.
“Sot, me hapjen e Ambasadës së SHBA-ve në Prishtinë, po kurorëzohet njëra pjesë e punës për vendosjen e marrëdhënive të plota diplomatike në mes të Kosovës dhe SHBA-ve. Kjo do të përmbyllet me hapjen e Ambasadës së Kosovës në Shtetet e Bashkuara të Amerikës”, përfundoi Sejdiu, President në atë kohë.
“Dita e sotme është e veçantë për ne, sepse miku ynë më i madh, SHBA-të po avancojnë statusin e prezencës së tyre në shtetin tonë të ri”, ka thënë në ceremoni  atëherë Kryeministri Hashim Thaçi, Presidenti i tashëm i Kosovës.

Ai vlerësoi se, “duke e avancuar statusin e zyrës së deritanishme në Ambasadë të plotëfuqishme, dëshmohet së SHBA-të kanë besim në Kosovë”.

“Prandaj, unë si Kryeministër dhe i tërë populli i Kosovës jemi të nderuar dhe jemi mirënjohës për këtë gjë. Si përfaqësues i popullit tim, me lejoni që të them se edhe ne kemi besim të madh në Shtetet e Bashkuara. Ne gjithmonë e kemi çmuar dhe do ta çmojmë miqësinë dhe marrëdhëniet tona me Shtetet e Bashkuara të Amerikës”, tha Thaçi.

“Besimi në liri, barazi, dhe drejtësi janë vlerat sublime, të cilat e bëjnë kombin amerikan të jetë madhështor sot. Prandaj, ne me vendosmëri shikojmë drejt Shteteve të Bashkuara dhe do të vazhdojmë t’i mbështesim dhe kultivojmë këto vlera të përbashkëta”, nënvizoi kryeministri në atë kohë.

“Ndërkohë, që Kosova do të vazhdojë udhëtimin e saj në mesin e vendeve të lira dhe demokratike të botës, ne përgjithmonë do të ruajmë në zemrën tonë respektin e veçantë për popullin e Shteteve të Bashkuara të Amerikës, të cilët janë të përfaqësuar nga kjo Ambasadë këtu”, përfundoi Thaçi duke uruar “në këtë rast madhështor”.

Në 1 korrik 2009 Prishtina ndau 5 hektarë truall për ndërtimin e objektit të ri të ambasadës së SHBA-ve në Kosovë.

Atëherë kryetari i komunës së Prishtinës Isa Mustafa (tash kryeministër) dhe ambasadorja amerikanë në Kosovë Tina Kajdanow, nënshkruan Memorandumin e Mirëkuptimit për dhënien e truallit në shfrytëzim Ambasadës Amerikane, në lagjen Arbëria të kryeqytetit.

Memorandumi është edhe një shembull i forcimit të lidhjeve ndërmjet SHBA-së dhe Kosovës, u theksua në ceremoni.

Në 5 maj 2015, në Prishtinë u zhvillua ceremonia e përurimit të fillimit të ndërtimit të ambasadës së Shteteve të Bashkuara të Amerikës, ku ishin të pranishëm përfaqësuesit e institucioneve më të larta kosovare, si dhe  të ambasadave në Kosovë.

“Ky moment shënon fillimin e ndërtimit të shtëpisë tuaj të përhershme në Kosovë, në shtetin tonë të ri qytetarët e të cilit u janë përjetësisht falënderues dhe mirënjohës për rolin e guximshëm dhe historik që keni në bërjen e Kosovës shtet”, theksonte atëherë Presidentja e Republikës, Atifete Jahjaga, në fjalën e rastit, duke iu drejtuar, Ambasadores së SHBA-ve, Tracey Ann Jacobson, e cila përfundonte misionin në Prishtinë.

Ambasada Amerikane në Prishtinë në 30 mars njoftonte se, Presidenti Obama ka nominuar Greg Delaëie-n që të shërbejë si Ambasadori i ardhshëm i SHBA-ve në Kosovë.

Ambasadori i ri amerikan në Kosovë me “mirëmengjes” niste prezantimin e tij përmes videos duke paralajmëruar ardhjen në Prishtinë. “Unë jam Greg Delawie dhe është nder për mua të shërbej si ambasador i Shteteve të Bashkuara në Republikën e Kosovës. Pres ta vazhdoj miqësinë e gjatë mes shteteve tona. Zyrën tonë informative në Kosovë e kemi hapur në vitin 1996. Tani pothuaj 20 vjet më vonë, objekti i ambasadës sonë të re në Prishtinë është në ndërim e sipër”, shprehej ambasadori duke shtuar se shërbimi publik është i rëndësishëm për familjen e tij.

“Gjithmonë kam besuar në vlerën e marrëdhënieve mes popujve, jo vetëm mes qeverive. Vazhdimi dhe ndërtimi i lidhjeve të tilla me Kosovën, demokracinë më të re të Evropës, do të jetë njëri prej prioriteteve të mia kryesore”, theksonte ambasadori amerikan.

Njoftimi dërguar nga ambasada e SHBA në Prishtinë theksonte se, Greg Delawie ndjehet i nderuar që do të shërbejë si ambasador i ardhshëm amerikan në Kosovë.

Në 21 gusht 2015, Ambasadori i ri i Shteteve të Bashkuara të Amerikës në Kosovë, Greg Delawie, dorëzoi letrat kredenciale në pritjen me ceremoni solemne shtetërore te atëherë Presidentja e Republikës, Atifete Jahjaga, bashkë me të cilën edhe shëtitën më këmbë shesheve të Prishtinës.

Pavarësinë e Kosovës të shpallur në 17 Shkurtin historik 2008 Shtetet e Bashkuara të Amerikës e kanë njohur që në ditën e parë pas shpalljes.