Shkrimtarja e shquar e letërsisë për fëmijë, sekretare e degës së Vatrës Ridgewood Monda Hamitaj është vatranja e parë e cila dhuroi 2 mijë dollarë për shtëpinë e re të Vatrës. Krahas shtëpisë së vjetër të Vatrës që do qëndrojë si Muze, Arkiv e Bibliotekë Shkencore e Vatrës, Shtëpia e re e Vatrës do të shërbejë për të zhvilluar të gjitha aktivitetet patriotike, atdhetare e komunitare të Federatës Vatra e gazetësDielli. Kjo shtëpi do të jetë qendër kombëtare që do ta bashkojë të gjithë shqiptarët e Amerikës. Federata Vatra fton të gjithë vatranët, shoqata e organizata, biznesmenë shqiptarë anembanë botës që të kontribuojnë për qendrën më të madhe kombëtare shqiptare në Amerikë.

Gazetarja nga Kosova zonja Hyrë Tejeci vizitoi Federatën Pan-Shqiptare të Amerikës Vatra. Ajo u prit nga z.Ilir Cubi anëtar i kryesisë, editori i Diellit Sokol Paja dhe editorja e gjuhës angleze në gazetën Dielli Rafaela Prifti. Gazetarja Hyrë Tejeci i kushtoi një telereportazh historik veprimtarisë së Vatrës dhe Diellit mbi kontributin e jashtëzakonshëm për komb, atdhe dhe komunitet shqiptar në Shtetet e Bashkuara të Amerikës.

Hyrë Tejeci është gazetare në RTK radio. Ajo ka kryer studimet master në Shkencat e Komunikimt Masiv dhe Gazetari. Prej 2001 punon në media. Ka qenë e angazhuar në Kolegjin AAB, si ligjeruese në lëndë të Radio gazetarisë. Ka punuar edhe në Radio Evropa e Lirë në Pragë (2003).

Vazhdon të punojë në Radio Kosovë. Vëmendje të veçantë ajo i ka kushtuar edhe mërgatës shqiptare dhe përpjekjeve të shqiptarëve për Kosovën. Ka përgatitur disa emisione, reportazhe, dokumentarë dhe disa projekte, me të cilat ka marrë dhe çmime. Ndër çmimet më të mëdha është: Çmimin Special për radio në nivel botër, “Lorenzo Natali”, të Komisionit Evropian në Strasburg (2008). Ka publikuar disa shkrime në media online dhe në gazetat e vendit. Ka marrë pjesë me punime në Konferenca Ndërkombëtare që kanë pasur të bëjnë me hulumtimet në fushën e medias. Disa nga punimet shkencore : “Mediat lokale në Kosovë, gjendja dhe sfidat”, “Ushtrimi i ndikimit ndaj gazetarëve në Kosovë”, “Më kupto më ndihmo”, “Pozita e gruas në shoqërinë kosovare”, etj.

Është e angazhuar si trajnere për gazetarë në disa projekte që janë organizuar nga Instituti i Medias së Kosovës dhe nga OSBE-ja. Ka marrë pjesë me projekte hulumtuese në qendra të ndryshme të vendeve të ndryshme të botës: Nju Jork, Paris, Strasburg, Berlin, Bern, Luzan, Sofje, Shkup, Tiranë.

Ka botuar tre libra deri tani: “Raportimi televiziv, si teori dhe praktikë”, Përmbledhja “MONUMENT – i dëshirës së përflakur për atdhe” dhe “Dielli i jetës”. Ka në

dorëshkrim edhe dy libra të tjerë. Është e martuar dhe ka një vajzë. Jeton në Prishtinë.

Kryetari i Federatës Pan-Shqiptare të Amerikës Vatra Dr. Elmi Berisha u prit në një takim të përzëmërt e vëllazëror nga lideri i AAK-së z.Ramush Haradinaj. Ish kryeministri i Kosovës shkroi në faqen e tij zyrtare:

“Sot, në selinë e AAK-së, pata kënaqësinë të pres z. Elmi Berisha, presidentin e Federatës Pan-Shqiptare “Vatra”, të cilin e falënderova për angazhimin dhe kontributin e madh që po ofron në mbështetje të Republikës së Kosovës dhe kauzave kombëtare.

Z. Berisha, si udhëheqës i Federatës pan-shqiptare “Vatra”, tashmë në mandatin e tij të dytë, ka dhënë një kontribut të jashtëzakonshëm në sensibilizimin e agjendës së Kosovës, veçanërisht në ndërtimin e marrëdhënieve me vendimmarrësit në Washington, si dhe në Kongres dhe Senat.

Kërkova nga z. Berisha që këtë përkushtim ta shtojë edhe më tej, duke ndihmuar agjendën e integrimit direkt të Kosovës në NATO përmes Planit Aksional për Anëtarësim”.

Vatra fton të gjithë shqiptarët e Amerikës në festën e Flamurit Kombëtar në New York më 22 Nëntor 2024.

Patriotët e Vatrës në Long Island zhvilluan një vizitë zyrtare në Selinë Qendrore të Federatës Vatra. Kryetari Dr. Paulin Marku, nënkryetari Afrim Gega, arkëtari Besnik Bajraktari, sekretari Klaudio Turkaj e mbështetësi i grupit nismëtar David Turkaj të cilët u pritën nga arkëtari i Vatrës Besim Malota, këshilltari për art e kulturë Nazim Salihu dhe editori i Diellit. Në fjalën e mirëseardhjes arkëtari z.Malota përgëzoi degën më të re të Vatrës me 45 anëtarë, vlerësoi seriozitetin dhe angazhimin maksimal të patriotëve që drejtojnë degën dhe vlerësoi punën e çmuar atdhetare për shkollën shqipe “Gjergj Fishta”. Nga ana tjetër kryetari i Vatrës në Long Island dhe themeluesi i shkollës shqipe Dr. Paulin Marku shprehu vlerësim e mirënjohje për Federatën Vatra, falenderim kryetarit Dr. Elmi Berisha, Kryesisë e Këshillit, gazetës Dielli, ekipit drejtues të degës në Long Island, patriotëve që po bashkohen me Vatrën, prindërve dhe fëmijëve që po i japin jetë shkollës shqipe “Gjergj Fishta” e komunitetit shqiptar në Long Island. Ndër të tjera Dr. Marku tha se qëllimi i Vatrës e Shkollës është për ti shërbyer kombit, atdheut dhe komunitetit shqiptar në Long Island për avancimin e çështjes kombëtare dhe ruajtjen e gjuhës shqipe, kulturës dhe identitetit kombëtar shqiptar në mërgatën e Shteteve të Bashkuara të Amerikës.