Patriotja dhe veprimtarja e çështjes kombëtare në mërgatën shqiptare të Amerikës zonja Effi Qeleshi kryetare e degës së Vatrës në Worcester, MA, dhuroi 1 mijë dollarë për Federatën Pan-Shqiptare të Amerikës Vatra, ndërsa patrioti Endri Filipi dhuroi 500 dollarë. Zonja Qeleshi si veprimtare, patriote, humaniste, vatrane e angazhuar në komunitetin shqiptar të Worcesterit është një shembull i shkëlqyer i gruas shqiptare dhe model suksesi e frymëzimi për Vatrën e komunitetin shqiptar. Nënkryetari i Vatrës në Tampa Bay Florida z.Endri Filipi aktivist i shkëlqyer, është ndër vatranët kontributorë në Federatë. Çdo vit, për çdo fushatë të Vatrës z.Filipi kontribuon bujarisht duke qenë ndër patriotët më shembullorë në Vatër dhe komunitetin shqiptar në Tampa. Fisnikëria e Effit dhe Endrit dhe shqiptarëve që japin për Vatrën e bëjnë Federatën dhe misionin e saj në shërbim të çështjes kombëtare, të përjetshëm dhe të pavdekshëm. Federata Vatra përulësisht falënderon çdo patriot që kontribuon për Vatrën.

Mirënjohje për bujarinë dhe fisnikërinë Effi Qeleshi dhe Endri Filipi.

Suksesi i shqiptarëve në disiplina të veçanta, institucione të sigurisë kombëtare të Shteteve të Bashkuara të Amerikës, institucione arsimore, politikbërje, diplomaci apo fusha të tjera, përbëjnë një krenari për mërgatën shqiptare të Amerikës dhe kombin tonë. Suksesi i shqiptarëve të lindur në Amerikë por që flasin shqip e ruajnë traditat më të çmuara kulturore, familjare e patriotike e atdhetare shqiptare, është frymëzim dhe emocion i veçantë për çdo të ri shqiptar që ka ëndrra dhe pasion për ti shërbyer Amerikës. Joseph Cubi filloi një rrugëtim të jashtëzakonshëm në Forcat Ajrore të Amerikës. Prestigj, përgjegjësi, sukses dhe krenari. Josephi është djali i Ilir Cubit, anëtarit të kryesisë së Vatrës dhe nipi i Marjan Cubit, atdhetarit që i kushtoi 43 vite çështjes kombëtare në Shtetet e Bashkuara të Amerikës.

Joseph Gjergj Cubi i angazhuar që i vogël në aktivitete kulturore komunitare e kombëtare u rrit me ndjenjat patriotike për të dashur atdheun e tij Amerikën dhe atdheun familjar shqiptarinë. Që prej datës 28 Shkurt të vitit 2024 ai bëhet pjesë e forcave Ajrore të Shteteve të Bashkuara të Amerikës duke shënuar jo vetëm një sukses por duke përmbushur dhe një falënderim për ndihmën që Amerika ka dhënë për çlirimin e Kosovës. Arritjet e të rinjve shqiptarë në mërgatë, janë suksese komunitare e kombëtare shqiptare në Shtetet e Bashkuara të Amerikës.

“VATRA” e Bostonit, në bashkëpunim me Shoqatën e Studentëve Shqiptarë të Harvardit organizon prezantimin e Librit “Fan Noli – Apostulli” të gazetarit Ilir Ikonomi, me rastin e 59 vjetorit të ndarjes nga jeta të Fan S. Nolit!

Ftohet i gjithë komuniteti shqiptar, të bashkohet rreth VATRES në Harvard, për të kujtuar njeriun e madh të kombit shqiptar!

Më 16 Mars 2024 (e shtunë) nga ora 12:00 deri në 2:00pm, në një nga sallat e Universitetit të Harvardit në Boston!

Adresa: Boylston Hall 103 Harvard Yard Cambridge MA 02138 Për detajet shikojeni ftesën, ku do të ketë edhe libra në gjendje!

Flamur VEZAJ/

Dje, në sallën historike Hamilton Hall në Salem të Massachusetts, u fol për Kosovën!

VATRA në Boston, në bashkëpunim me bordin drejtues të ndërtesës historike Hamilton Hall, organizuan një tryezë diskutimi për Kosovën! Ku foli për komunitetin shqiptar dhe jo vetëm Z.Christopher Hyland, ish-drejtori politik i Presidentit Klinton, njëherazi i dekoruar nga Presidentet e Kosovës dhe Shqipërisë.

Salla historike e qytetit të Salemit dhe e SHBA-së e ngritur në vitin 1805, sot ishte mbushur me shqiptar e jo vetëm, ku ishin prezent edhe drejtues të organizatave shqiptare të Massachusetts! Si bashkëorganizator i këtij eventi, kryetari i VATRES në Boston z.Mentor Maksutaj, i shoqëruar nga Shoqata Kosova e Bostonit, Asociacioni i Studentëve Shqiptar të Harvardit si dhe bordi drejtues i klubit social “Çunat e Bostonit” në Peabody!

Para nisjes së leksionit akademik z.Hyland përshëndeti të gjithë shqiptarët e në veçanti falenderoi kryetarin e VATRES në Boston z.Maksutaj, të cilin e ftoi të jepte një mesazh! Z.Maksutaj në fjalën e tij, falenderoi z.Hyland për angazhimin disa vjeçar në ndihmë dhe mbështetje të Kosovës. z.Maksutaj foli për krijimin e VATRES dhe punën patriotike të shumë shqiptarëve në SHBA dhe angazhimin e federatës për të mirën e kombit! Gjithashtu kryetari i VATRES në fund, falenderoi të gjithë ata shtetas amerikan që kanë ndihmuar ndër vite që sot Kosova të jetë e pavarur!

Më pas i dekoruari nga Presidenti i Shqipërisë me “Urdhërin e Kalorësit të Skenderbeut”, z.Hyland nisi diskutimin një orësh, ku foli për Kosovën dhe ruajtjen e Kushtetutës më gjithëpërfshirëse në botë. Ai renditi vuajtjet historike të popullit të Kosovës, rezistencën e shqiptarëve, angazhimin e patriotëve këtu në SHBA, ndërhyrjen amerikane dhe të NATO-së, luftën çlirimtare, shpalljen e pavarësisë, ngritjen e institucioneve atje si dhe problemet që Kosova po ndeshet çdo ditë me ndërhyrjet dhe provokimet e Serbisë!

Sipas z.Hyland, Kosova është një rast unik në botë ku shtetet perendimore me këmbnguljen e SHBA-ve vendosen të sulmojnë Serbin për të ndaluar gjenocidin dhe masakrat ndaj popullatës civile! Atje nuk kishte luftë të barabartë mes regjimit serb dhe popullit të Kosovës të cilët nuk gëzonin të drejtat elementare të njeriut! Por pas ndërhyrjes ushtarake dhe punës së bërë nga qeverit e Kosovës, sot, kjo e fundit është ndër shtetet me demokratike në atë rajon-tha z.Hyland, duke theksuar se zyrtaret e Kosovës duhet të ruajnë dhe zbatojnë Kushtetutën dhe rregullat ligjore të shtetit!

Kosova, tha ai, ka një Kushtetutë unike, pasi ju jep të drejta të gjithë komuniteteve pa dallim feje, rrace, gjinie apo orientim seksual! Z.Hyland theksoi se minoritetet gëzojnë çelësin e aprovimit të secilit ligj, ku pa miratimin e tyre nuk kalon asnjë legjislaturë, e për të gjitha këto Kosova duhet të merret si shembull nga fqinjët e jo vetëm, vuri në dukje ai!

Sipas z.Hyland shteti serb përdorur individ të caktuar, për të shkaktuar e nxitur probleme në Kosovë! E nga ana tjetër, qeveria serbe, vazhdoi ai, është bërë një vegël e Rusisë, e cila po tenton çdo ditë të përhap ndikimin e saj në Ballkanin perendimor!

Në fund, z.Hyland Ju përgjigjë edhe pyetjeve nga të pranishmit në sallë, duke vënë theksin se

SHBA-ja, duhet të bëj më shumë për Kosovën dhe të ushtroi trysni edhe ndaj Bashkimit Europian që të mbyll me marrveshje dhe njohje të pavarësisë së Kosovës nga shtetet që ende nuk e kanë njohur bashkë me Serbin!

Në sallë gjithashtu, ishte edhe kongresmeni Seth Moulton dhe shumë zyrtar të qytetit të Salemit!

Foto: Subi Çako

Sokol Paja/

New York, 28 Shkurt 2024 – Kryetari i Komunës së Istogut z.Ilir Ferati vizitoi Federatën Pan-Shqiptare të Amerikës Vatra. Z.Ferati shoqërohej nga z.Ali Nimanaj nënkryetar i Komunës së Istogut, z.Kushtrim Buleshkaj, drejtor i inspektoriatit dhe z.Shpetim Qorraj aktivist i komunitetit shqiptar në Shtetet e Bashkuara të Amerikës. Delegacioni nga Kosova u prit nga sekretari i Vatrës Dr.Pashko Camaj dhe këshilltari i medias në kabinetin e kryetarit të Vatrës z.Dritan Haxhia. Në fjalën e mirëseardhjes Dr.Camaj u shpjegoi miqve rolin dhe kontributin e jashtëzakonshëm të Vatrës për çështjen kombëtare dhe komunitetin shqiptar në mërgatën e Amerikës, ndërsa z.Haxhia pyeti kryekomunarin e Istogut rreth bashkëpunimit më mërgatën dhe çështje të edukimit në komunë. Kryetari i Komunës së Istogut z.Ilir Ferati pasqyroi punën 2 vjeçare në krye të komunës, ekspozoi pika të veçanta të zhvillimit ekonomik e demografik në Istog. Federata Pan-Shqiptare e Amerikës Vatra në nderim dhe respekt të politikanit të shquar shqiptar në Kosovë, babait të z.Ilir Ferati, e nderoi me mirënjohje z. Fadil Ferati (Pas vdekjes) si ish Nënkryetar i Lidhjes Demokratike të Kosovës, Kryetar i Komunës së Istogut dhe veprimtar i çështjes kombëtare për kontributin e jashtëzakonshëm për lirinë, pavarësinë dhe procesin e shtetndërtimit të Republikës së Kosovës, si dhe për bashkëpunimin në vazhdimësi me Federatën Pan-Shqiptare të Amerikës “VATRA” dhe për avansimin e aspiratave tona kombëtare”. Miqtë zhvilluan biseda historike për çështjen kombëtare ku Vatra ka pasur rol përcaktues dhe historik.