-Në festimet e 28 Nëntorit në Kosovë, gazetarit Marin Mema nga Shqipëria, i vlerësuar për realizimin e temave shumë të rëndësishme për gjurmë e histori të shqiptarëve në trojet e tyre shekullore, iu dha çmimi “Hasan Prishtina” nga Shoqata për Kthimin e Shqiptarëve të Shpërngulur nga Trojet e Veta, në një ceremoni ku mori pjesë edhe kryeministri Ramush Haradinaj/
-Gazetari Marin Mema më ngjanë në personazhin e një reportazhi futuristik që kam pas shkruar para 21 viteve, në funddhjetorin 1996, me titull “Udhëtimi për në Prizren”, të nisur nga Arta e jugut të trojeve ku flitet shqip, në kërkimet drejt “Mollës së Kuqe” ku dikur ishte kufiri verior i shqiptarëve…
SPECIALE-Gazeta DIELLI nga korrespondenti në Kosovë Behlul JASHARI/
PRISHTINË, 26 Nëntor 2017/ Gazetari Marin Mema nga Shqipëria është fitues i çmimit “Hasan Prishtina”, më të lartit të Shoqatës për Kthimin e Shqiptarëve të Shpërngulur nga Trojet e Veta, i cili u nda në mbrëmjen e djeshme në Prishtinë, në një ceremoni ku mori pjesë edhe kryeministri i Kosovës, Ramush Haradinaj.
Kru i qeverisë së Kosovës tha se është një numër i madh i atdhetarëve shqiptarë që rrugëtimin e tyre e kanë përmbyllur me flijim për atdhe.“Njëri nga ta që nderon shqiptarët në shumë parametra është Hasan Prishtina. Çmimi ‘Hasan Prishtina’ është i lidhur me një kauzë tepër të dhimbshme për shqiptarët, pra me shpërngulje, por edhe krenari se nuk është hequr dorë për kthimin në atdhe”, u shpreh kryeministri Haradinaj, duke falënderuar kryetarin e Shoqatës për Kthimin e Shqiptarëve të Shpërngulur nga Trojet e Veta, Jahja Lluka, për angazhimin e tij në sensibilizimin e shqiptarët për kthimin në atdhe.
Me tej, kryeministri Haradinaj tha se ndarja e çmimit nga Shoqata për Kthimin e Shqiptarëve të Shpërngulur nga Trojet e Veta, për gazetarin Marin Mema dallon, sepse Marini nuk është nga ata që e ka përmbyllur karrierën e tij jetësore, por është prej atyre shqiptarëve të rinj që nuk është ndalur së gjurmuari atë se kush janë shqiptarët.
Kryeministri Haradinaj, ka uruar që shqiptarët kudo që janë të forcohen dhe të bashkohen në trojet e tyre me vëllezërit e gjakut, të shpërngulur nga atdheu i tyre në të gjitha kohërat.
Kryetari i Shoqatës për Kthimin e Shqiptarëve të Shpërngulur nga Trojet e Veta, Jahja Lluka, duke i dhënë çmimin gazetarit Mema, tha se çmimi “Hasan Prishtina”, nuk është vetëm një çmim që ndahet nga kjo Shoqatë, por është një çmim që në bazën e tij ka dhimbjen, vuajtjen e popullit shqiptarë, por edhe krenarinë dhe luftën për liri.
“Sot është një ditë e veçantë, sepse çmimi ‘Hasan Prishtina’ po ndahet në vigjilje të Festës tonë Kombëtare – Ditës së Flamurit. Marinin e përgëzoj për gjithë punën që ka bërë në të gjitha trojet shqiptare me një guxim të jashtëzakonsëm. Ai i ndoqi gjurmët e historisë, informoi për gjenocidin dhe përpjekjet që tokat shqiptare të tëkurren vazhdimisht”, u shpreh Lluka.
Ai foli edhe për historikun e Shoqatës për Kthimin e Shqiptarëve të Shpërngulur nga Trojet e Veta. “Në kohën e gjenocidit e dhunës së paparë për të larguar sa më shumë shqiptarë nga Kosova ishte mëse e nevojshme të fillojë funksionimi i një subjekti, i cili do të merrej me pengimin e largimit të shqiptarëve nga Kosova. Në vitin 1990, pas shumë protestave dhe demonstratave në qytetin e Pejës u dha iniciativa për themelimin e Shoqatës për Kthimin e Shqiptarëve. Kjo iniciativë u përkrah nga të gjitha trojet shqiptare dhe shumë shpejt Shoqata u shtri në gjithë Kosovën, Shqipëri, Mal të Zi, Maqedoni dhe në Preshevë”, tha Lluka.
Fituesi i çmimit “Hasan Prishtina”, gazetari Marin Mema, tha se, çmimi ka rëndësi të dyfishtë për të, e para ngase mbanë emrin e njërit prej figurave më të mëdha të kombit shqiptar, Hasan Prishtinës, dhe së dyti sepse është detyrim për të ardhmen, është një detyrim për të ecur përpara dhe për të sjell sa më shumë të vërteta historike.
“Ajo për të cilën unë jam krenar më shumë se gjithëçka është që, pavarësisht historisë së padrejtë që është bërë mbi shqiptarët, jemi prapë këtu sot, këndojmë shqip, kërcejmë shqip, përshëndetemi shqip dhe jemi krenarë që jemi shqiptarë”, u shpreh gazetari Mema, në ceremoninë edhe me këngë e valle shqiptare që ishte edhe festë për 28 Nëntorin – Ditën e Flamurit Shqiptar e të Pavarësisë së Shqipërisë.
Në ceremoninë e ndarjes së çmimit “Hasan Prishtina” ishin të ftuar nga institucionet e Kosovës, Shqipërisë dhe trojet tjera shqiptare, mes të cilëve ambasadori i Shqipërisë në Prishtinë, Qemal Minxhozi, si dhe korrespondenti i Gazetës DIELLI e përfaqësues tjerë të mediave.
Pasardhësi i Heroit të Kombit, Hasan Prishtina, Mehmet Prishtina, u shpreh se, “gazetari Marin Mema na solli të dokumentuara gjurmët shqiptare kudo në trojet e Shqipërisë së vjetër”.
Ai theksoi edhe se, “nderimi që po i bëhet gazetarit Mema është vetëm një vazhdimësi e denjë e Shoqatës për Kthimin e Shqiptarëve të Shpërngulur nga Trojet e Veta, e cila me Dekret të Presidentit është nderuar edhe me Urdhrin Nderi i Kombit.
Në vendimin për dhënen e çmimit për vitin 2017 theksohet se, “Marin Mema, si gazetar i Televizionit Top-Channel, me emisionin e tij ‘Gjurmë shqiptare’ ka realizuar me sukses tema shumë të rëndësishme për historinë e shqiptarëve në trojet e tyre shekullore”, duke kaluar të gjitha pengesat dhe kufijtë e ndarjeve.
Në vendim thuhet edhe se, “Marin Mema është realizues i një sërë dokumentarësh për shqiptarët në Sanxhakun e Serbisë, Gjurmët e historisë për zonat dhe fshatrat e shqiptarëve në Greqi (Çameri), Maqedoni, Sarajevë në Bosnje, Ulqin, Plavë dhe Guci, Rekë, Dibër të Madhe. Komunitetet shqiptare ne SHBA, Itali, Greqi, Maqedoni, Mal të zi, Serbi, Turqi e me tej kanë qënë në fokus te dokumentarëve dhe reportazheve…Marin Mema, ka arritur gjithashtu që të zbardhi dokumente nga arkiva të ndryshme për heronjë e veprimtarë shqiptarë nëpër kohë…”.
Gjatë ceremonisë së ndarjes së çmimit, në biseda, thash se gazetari Marin Mema më ngjanë në personazhin e një reportazhi futuristik që kam pas shkruar para 21 viteve, në funddhjetorin 1996, me titull “Udhëtimi për në Prizren”, të nisur nga Arta e jugut të trojeve ku flitet shqip, në kërkimet drejt “Mollës së Kuqe” ku dikur ishte kufiri verior i shqiptarëve…
“Udhëtimi për në Prizren”, ishte reportazhi që kam shkruar në kohën e viteve të rënda të okupimit, kur me shkrimet futuristike e shihja dhe e përshkruaja Kosovën e së ardhmes, të lirë, shtet, të ëndërrave…
Ai reportazh është botuar edhe në Kosovë, edhe në Shqipëri, në 31 dhjetor 1996, në kohët kur thyeja kufirin e hekurt me shkrimet shqip.
Në të dy anët e kufirit që i ndante shqiptarët që edhe e kishin të ndaluar ta kalojnë, madje edhe t’i afrohen, kam të botuara edhe shumë shkrime tjera në vitet, kohët, kur mes Kosovës dhe Shqipërisë ishte “Muri ndërshqiptar si ‘fundi i botës’”, si titullohej shkrimi që u botua në 19 mars 1996.
“Sa afër e sa larg Shqipëria” thoshte titulli i shkrimit të asaj kohe, botuar në 11 gusht 1996…
Çmimi “Hasan Prishtina” i Shoqatës për Kthimin e Shqiptarëve të Shpërngulur nga Trojet e Veta në vitin 2014 i është ndarë Kombëtares Shqiptare të Futbollit, pas ndeshjes së Beograd, ku edhe u mbrojt Flamuri Kombëtar Shqiptar.
“Ky çmim iu ndahet personaliteteve dhe organizatave të shquara në dhënien e kontributit të tyre në rrafshin kombëtar, në mbrojtjen dhe sublimimin e vlerave dhe të qenies sonë kombëtare”, theksonte me atë rast kryetari i Shoqatës, Jahja Lluka.