-Kosovë-Zhvillimi, shumë i domosdoshëm/
-Jahjaga: Zhvillimi ekonomik është shumë i domosdoshëm dhe garant i stabilitetit të mëtejmë të Kosovës, kontribuon edhe në proceset integruese/
PRISHTINË, 27 Janar 2016-B.Jashari/ Zhvillimi ekonomik është shumë i domosdoshëm dhe garant i stabilitetit të mëtutjeshëm të Kosovës, kontribuon edhe në proceset integruese, deklaroi sot Presidentja e Republikës, Atifete Jahjaga, gjatë vizitave në katër komuna, Fushë Kosovë, Vushtrri, Skenderaj dhe Gllogoc.
Në takimet me kryetarin e Fushës Kosovës, Burim Berisha, atë të Vushtrrisë Bajram Mulaku, nënkryetarin eSkënderajt Fadil Nura dhe kryetarin e Gllogocit Nexhat Demaku, Presidentja Jahjaga u njoftua me problemet me të cilat përballen këto komuna në fushën e zhvillimit ekonomik, përkrahjen e bizneseve vendore dhe në tërheqjen e investimeve të huaja.
Kryetari i Odës Ekonomike të Kosovës Safet Gërxhaliu, kryetari i Odës Ekonomike Amerikane Arian Zeka, dhe kryetari i Odës Ekonomike Gjermane Albert Matoshi, sikur edhe gjatë vizitave në komunat e tjera e shoqëruan edhe sot Presidenten. Në takime me kryetarët e komunave paraqitën problemet me të cilat përballen bizneset që ata përfaqësojnë dhe shtruan idetë për kapërcimin e tyre, në funksion të shtimit të zhvillimit ekonomik dhe krijimit të vendeve të reja të punës.
Presidentja Jahjaha vazhdoi kështu vizitat që po zhvillon gjatë janarit nëpër komunat e Kosovës, në kuadër të nismës së përbashkët me odat ekonomike me qëllim të diskutimit të sfidave të zhvillimit ekonomik, përkrahjes së bizneseve dhe krijimit të lehtësirave për to, me theks të veçantë në tërheqjen e investimeve të huaja.
Në 6 prill 2016 Presidentja Atifete Jahjaga përfundon mandatin, ndërsa sipas Kushtetutës “zgjedhja e Presidentit të Republikës së Kosovës duhet të bëhet jo më vonë se tridhjetë (30) ditë para përfundimit të mandatit të Presidentit aktual”. Zgjedhja e Presidentit të Republikës bëhet nga Kuvendi i Kosovës, me votim të fshehtë.